Agosto

Umi orekóva añoite Jesúspe iñamigoitéramo ikatúta oñevenefisia pe sakrifísio haʼe ojapo vaʼekuégui. Jesús voi heʼi vaʼekue haʼe ‘ontregataha hekove iñamigokuéra rehehápe’ (Juan 15:13). Umi Jehová siervokuéra oiko vaʼekue Jesús ou mboyve ko yvy ape ári, oikuaa ha ohayhu vaʼerã avei chupe. Koʼã kuña ha kuimbaʼe ihústovape oñemoingove jeýta, péro haʼekuéra jepe tekotevẽta oreko Jesúspe iñamígoramo ikatu hag̃uáicha oikove pára siémpre (Juan 17:3; Hech. 24:15; Heb. 11:8-12, 24-26, 31). Ñande javyʼaiterei ikatu haguére ñambaʼapo Jesús ndive, japredika ha ñamboʼévo umi notísia porã. Jesús oĩrõ guare ko yvy ape ári, omboʼe vaʼekue umi héntepe. Ha oho guive yvágape haʼe omoakã pe kongregasión, ha osegi odirihi ko tembiapo ojepredika ha oñemboʼe hag̃ua la héntepe. Jesús ningo omombaʼeterei ohechávo ñañehaʼãmbaiteha ñaipytyvõ opa ikatúvape oikuaa hag̃ua chupe ha Itúape. Ha añetehápe Jehová ha Jesús ñanepytyvõ rupínte ikatu jajapo ko tembiapo (Juan 15:4). w20.04 22 párr. 7, 8

Yma pe título rréi del nórte ojepuru oñeñeʼẽ hag̃ua pe governánte oĩvare nórte gotyo Israélgui, ha pe título rréi del sur oñeñeʼẽ hag̃ua pe governánte oĩvare sur gotyo Israélgui (Dan. 10:14). Pentekostés 33 peve umi israelita haʼe vaʼekue Ñandejára puévlo. Péro upe tiémpo guive Jehová ohechauka porã Jesús disipulokuéra haʼeha ipuévlo. Upéicharõ hetave mbaʼe heʼíva pe profesía oĩva Daniel kapítulo 11-pe oñeʼẽ hína Jesús disipulokuérare ha ndahaʼéi umi israelitakuérare (Hech. 2:1-4; Rom. 9:6-8; Gál. 6:15, 16). Ha ohasávo pe tiémpo, okambia ohóvo mávapa pe rréi del nórte ha mávapa pe rréi del sur. Péro koʼã rréi ojojogua mbohapy mbaʼépe. Primero, koʼã rréi ogoverna umi lugár Ñandejára puévlo oikoha, térã opersegi chupekuéra. Segundo, haʼekuéra ohechauka otrata lájare Ñandejára puévlope ndaijaʼeieteha Ñandejára Jehováre. Ha tercero, umi mokõi rréi opuʼã ojuehe orekosevégui podér. w20.05 3 párr. 3, 4

Primero, Jehovágui oiko oimeraẽ mbaʼe tekotevẽva ikatu hag̃uáicha okumpli hembipota. Segundo, Jehová ikatu oipytyvõ isiervokuéra imperféktope oiko hag̃ua chuguikuéra oimeraẽ mbaʼe tekotevẽva oservi hag̃ua chupe ha okumpli hembipota (Is. 64:8). Koʼã mbaʼe rupive Jehová okumpli ivolunta. Ndaipóri mbaʼeve ojoko vaʼerã chupe ojapo hag̃ua umi mbaʼe ojaposéva (Is. 46:10, 11). ¿Mbaʼépa ikatu jajapo ñamombaʼe ha jarrespetave hag̃ua ñande Túa yvagapeguápe? Upearã jajepyʼamongeta vaʼerã umi mbaʼe haʼe ojapo vaʼekuére, ha umi mbaʼe jajapóvare haʼe rupive. Por ehémplo, ñanemopirĩmba voi jajepyʼamongetávo Jehová kreasiónre, ha jahechávo umi mbaʼe ijojahaʼỹva haʼe ojapo vaʼekue (Sal. 8:3, 4). Ñande ningo koʼýte jarrespetave Jehovápe jajepyʼamongetáramo mbaʼéichapa haʼe ñanepytyvõ raʼe jajapo hag̃ua hembipota. Añetehápe ningo tuichaiterei mbaʼe Jehová réra. Upéva orrepresenta hína mbaʼeichagua persónapa Jehová, entéro mbaʼe haʼe ojapo vaʼekue ha opa mbaʼe haʼe ojapótava (Sal. 89:7, 8). w20.06 9 párr. 6, 7

Pe oxíheno ningo peteĩ gas umi yvypóra ha animalkuéra oikotevẽva osegi hag̃ua oikove. Ojekalkula ñande yvypóra ha umi animalkuéra jarrespira hag̃ua ñaikotevẽha hetaiterei oxíheno káda áño. Péro avei jarrespirávo ñaguenohẽ ñande retepýgui peteĩ gas hérava dióxido de karvóno. Upéicharõ jepe pe oxíheno núnka ndopái, ha ko yvy nahenyhẽinte avei dióxido de karvónogui, haʼéva pe gas hemby reímava. ¿Mbaʼéichapa oiko upéva? Pórke Jehová ojapo vaʼekue avei opaichagua plánta michĩva ha tuicháva, ha haʼekuéra oipuru pe dióxido de karvóno ha opoi oxíheno. Péicha ombaʼapo rupi pe áire jarrespiráva ikatu jaʼe siertoha pe heʼíva pe téxto koestediagua. ¿Mbaʼépa ikatu jajapo ñamombaʼeve hag̃ua ko ñande yvy ijojahaʼỹva ha entéro mbaʼe porã oĩva pype? (Sal. 115:16). Upearã ikatu jajepyʼamongeta umi mbaʼe porãita Jehová ojapo vaʼekuére. Upéva ñanemomýita káda día jaagradese hag̃ua chupe umi mbaʼe porãite omeʼẽvare ñandéve. Ha jahechauka avei ñamombaʼeha ko yvy ñamantenévo potĩ asy pe lugár jaikoha. w20.05 22 párr. 5, 7

Umi mbaʼe Jehová ojapo vaʼekue Satanás opuʼãrõ guare hese, ohechauka haʼe iñaranduha, ipasiénsia ha ihustoha. Avei haʼe ohechaukáma heta hendáicha ipoderosoitereiha, ha iñimportanteveha ikatu jahecha haʼe oporohayhuha entéro mbaʼe ojapóva rupive (1 Juan 4:8). Jehová ningo núnka noñentregái, síno osegi ombaʼapo osantifika hag̃ua héra. Satanás ningo koʼag̃aite peve osegi ijapu Ñandejára kóntrape. Haʼe ombotavy umi héntepe oipotágui oduda Ñandejára ipoderóso, ihústo, iñarandu ha oporohayhuha. Por ehémplo, Satanás oñehaʼã ogueroviaka la héntepe Jehová ndahaʼeiha opa mbaʼe Apohare. Ha oiméramo oasepta hikuái Ñandejára oexistiha, Satanás oñehaʼã ogueroviaka chupekuéra Ñandejára iñinhustoha ha ojopyetereimaha ñanendive. Hiʼarive haʼe omboʼe la héntepe Jehová haʼeha peteĩ Dios ipyʼahatã ha iñañáva, oporohapýva peteĩ infiérnope. Haʼekuéra ogueroviáramo koʼã japu, ifasilvétama chupekuéra orrechasa hag̃ua Jehová goviérno ihustoitéva. Satanás ningo oñehundiete peve osegíta oñehaʼã nde avei remboyke hag̃ua Jehovápe. ¿Okonsegítapa upéva? w20.06 5 párr. 13-15

Heta kongregasiónpe oĩ umi ermáno ha ermána oñehaʼãmbaitéva hína oaprende hag̃ua ótro idióma. Ikatu oime ijetuʼu chupekuéra heʼi hag̃ua umi mbaʼe opensáva. Péro ndajaikóiramo ñañatendénte mbaʼéichapa oñeʼẽ hikuái pe idióma, jahecháta haʼekuéra ohayhuha Jehovápe, ha oserviseha chupe. Jahecháramo umi kualida porãite orekóva hikuái, javaloraitereíta ha jarrespetáta koʼã ermáno ha ermánape. Ndajaʼemoʼãi chupekuéra: “Naikotevẽi nderehe”, noñeʼẽporãi haguérente ñane idióma (1 Cor. 12:21). Jaagradesete ningo Jehovápe omeʼẽ haguére ñandéve peteĩ lugár ikongregasiónpe. Jehovápe noimportái oimépa ñande kuimbaʼe térã kuña, ñamenda térã nahániri, ñanemitã térã ñandeedáma, ñañeʼẽ porãpa peteĩ idióma térãpa ñandeforsaʼimi hína. Jehová ningo enterovépe ñanemombaʼeterei, ha ñande avei ñañomombaʼeterei (Rom. 12:4, 5; Col. 3:10). Siémprekena jahechakuaa mbaʼépa ikatu jajapo ñamokyreʼỹ hag̃ua ñane ermanokuérape. Avei siémprekena jahayhu ha jarrespeta chupekuéra Jehová kongregasiónpe. w20.08 31 párr. 20-22

Apóstol Pablo ohecháramo jepe mbaʼéichapa Aténaspe henyhẽte umi hénte oadoráva taʼanga, hekovaíva ha oroviáva umi filosofía japu, nopensái vaʼekue umi hénte ndaikatumoʼãiha okambia. Ha otrata vaíramo jepe chupe hikuái, haʼe lomímonte osegi opredika chupekuéra. Páblogui oiko kristiáno, jepe haʼe ‘oñeʼẽ vai vaʼekue Ñandejárare, opersegi ipuévlope ha ijorgullóso’ (1 Tim. 1:13). Jesús ningo ojerovia vaʼekue Páblore ikatuha oiko chugui idisípulo, ha upéicha avei Pablo ojerovia umi oikóvare Aténaspe ikatuha oiko chuguikuéra Jesús disípulo. Ha jaikuaa ndojeroviareíri hague (Hech. 9:13-15). Síglo primérope, opaichagua héntegui oiko vaʼekue Jesús disípulo. Pablo oskrivírõ guare umi kristiáno oikóvape Gréciape, pe siuda héravape Corinto, haʼe heʼi vaʼekue upe kongregasiónpe oĩ hague umi anteve ojapo vaʼekue heta mbaʼe vai ha hekokyʼaiterei vaʼekue. Upéi Pablo heʼive: “Péro koʼág̃a Ñandejára penemopotĩma” (1 Cor. 6:9-11). ¿Ñandépa ñapensáne raʼe umichagua hénte ikatuha okambia ha oiko chugui Jesús disípulo? w20.04 12 párr. 15, 16

Ansianokuéra ndojapurái vaʼerã ohusga hag̃ua umi oñepyrũvape opensa noiméipa oñehaʼã rei hína oservi Jehovápe. Okondena rangue chupekuéra, umi ansiáno oñehaʼã vaʼerã ontende mbaʼérepa haʼekuéra heʼi térã ojapo peteĩ mbaʼe. Upéicha añoite haʼekuéra ikatúta oipuru porã la Biblia omokyreʼỹ hag̃ua chupekuéra. Proféta Elías oho vaʼekue okañy rréina Jezabélgui (1 Rey. 19:1-3). Haʼe opensa ndovaleiha mbaʼeverã pe traváho ojapo vaʼekue ha omanose voi (1 Rey. 19:10). Péro Jehová okondena rangue Elíaspe, oasegura chupe haʼe noĩriha haʼeño, ikatuha ojerovia Ñandejára podér rehe ha oĩha gueteri heta traváho chupe g̃uarã. Jehová mborayhúpe ohendu vaʼekue Elíaspe omombeʼúrõ guare mbaʼéichapa oñeñandu, ha upéi omeʼẽ chupe hetave traváho ojapo hag̃ua (1 Rey. 19:11-16, 18). ¿Mbaʼépa ñanemboʼe upéva? Enterove ñande ha koʼýte umi ansianokuéra jatrata vaʼerã mborayhúpe Jehová ovechakuérape. Peteĩ persóna heʼíramo ipochyha térã opensáramo Jehová núnka noperdonamoʼãiha chupe, ansianokuéra ohendu vaʼerã upe persónape omombeʼu jave chupekuéra mbaʼéichapa oñeñandu. Upéi haʼekuéra oaseguráta upe ovecha okañy vaʼekuépe Jehová ohayhuetereiha chupe. w20.06 21, 22 párr. 13, 14

Jehová oipota javyʼa ñane amigokuérandi ha ñane famíliandi (Sal. 133:1). Jesús oreko vaʼekue heta amígo (Juan 15:15). La Biblia omombeʼu mbaʼéichapa ñanevenefisia jarekóramo umi amígo añetetéva (Prov. 18:24). Ha heʼi avei ñandéve naiporãiha ñañemohaʼeño (Prov. 18:1). Heta oĩ opensáva umi rred sosiál rupive ikatuha jareko heta amígo, ha péicha nañaimemoʼãiha ñaneaño. Péro tekotevẽ ñañatende porã jaipuru jave umi rred sosiál. Umi investigasión ojejapóvape ojehechakuaa umi persóna oipurúva heta tiémpo ohecha hag̃ua umi komentário ha fóto ojehupíva umi rred sosiálpe, amo ipahápe ikatuha oñeñandu haʼeño ha oñedeprimi. ¿Mbaʼérepa? Ikatu hína pórke umi hénte pyʼỹinte ohupi umi fóto ohechaukáva umi mbaʼe iñimportánteva ohasáva hekovépe, ohechauka umi fóto iporãvévante osẽháme haʼekuéra, iñamigokuéra, ha umi lugár porã porã oho haguépe hikuái. Peteĩ persóna ohecháva koʼã fóto ikatu oñekompara ha opensa hekovépe ndohasaiha voi mbaʼeve iñinteresánteva ha ijavurridoha. w20.07 5, 6 párr. 12, 13

Pe Ñemañaha 1 de octubre de 1988 heʼi vaʼekue: “Ansianokuéra orrekonose vaʼerã Jesucristo ikatuha ojevale espíritu sántore oipytyvõ hag̃ua oimeraẽ ansiáno oĩvape kongregasiónpe, imanduʼa hag̃ua peteĩ konsého oĩvare la Bíbliape, ha péicha oipytyvõ chupekuéra oikuaa hag̃ua mbaʼépa ojapóta peteĩ situasiónpe, térã odesidíta jave peteĩ mbaʼe iñimportánteva (Hech. 15:7-15). Pe espíritu sánto ningo oipytyvõ enterove ansiáno oĩvape kongregasiónpe, ha ndahaʼéi peteĩme añónte”. Peteĩ ansiáno orrespetáva umi ótro ansiánope noñehaʼãmoʼãi siémpre oñeʼẽ raẽ umi rreunión de ansiánope. Ndahaʼéi haʼénte la oñeʼẽva tódo el tiémpo, ha nopensái haʼe heʼívante oĩ porãha siémpre. Upéva rangue, haʼe heʼi umíldemente umi mbaʼe opensáva, ha ojapysaka porã umi ótro heʼívare. Ha iñimportanteveha, haʼe kyreʼỹme oñeʼẽ umi konsého oĩvare la Bíbliape, ha osegi umi instruksión oúva pe “esklávo de konfiánsa ha iñarandúvagui” (Mat. 24:45-47). Umi ansiáno ohechaukáramo ojoayhu ha ojorrespetaha oñemongeta jave peteĩ témare, Jehová espíritu sánto oĩta hendivekuéra ha ogiáta chupekuéra odesidi porã hag̃ua umi mbaʼe omombaretétava pe kongregasiónpe (Sant. 3:17, 18). w20.08 27 párr. 5, 6

Apóstol Pablo enemigokuéra ipoderosoiteve vaʼekue chugui. Heta vése haʼekuéra ombyepotika ha oguerahaka chupe kárselpe. Avei, Páblope otrata vai vaʼekue umi oiko vaʼekue iñamígoramo peteĩ tiémpore. Kongregasiónpe voi oĩ vaʼekue umi oñemoĩva hese (2 Cor. 12:11; Filip. 3:18). Péro Páblore ndaipuʼakái vaʼekue umi iñenemigokuéra. ¿Mbaʼéichapa haʼe ojapo vaʼekue upéva? Haʼe osegi opredika oĩramo jepe oñemoĩva hese. Pablo osegi ohayhu umi ermáno ha ermanakuérape oĩramo jepe umi odesepsionáva chupe. Ha iñimportanteveha, osegi vaʼekue ifiél Ñandejárape omano meve (2 Tim. 4:8). Haʼe ikatu vaʼekue ojapo entéro koʼã mbaʼe, ndahaʼéi ojerovia rupi ijehe ha umi mbaʼe ikatúvare ojapo, síno ojerovia rupi Jehováre. ¿Oĩpa algúno ndetrata vaíva térã ndepersegíva? Oĩ jave umi oñemoĩva ñanderehe, ñande ñandepuʼaka umi mbaʼe vaíre ñaipytyvõvo la héntepe oikuaa hag̃ua Jehovápe ha la Biblia heʼíva. ¿Mbaʼépa ñanepytyvõta upearã? Jaipuru vaʼerã la Biblia ñambohovái hag̃ua umi héntepe umi mbaʼe oikuaaséva, jarrespeta ha jatrata porã vaʼerã umi ñandetrata vaívape, ha jajapo vaʼerã iporãva enterove rehehápe, umi ñane enemigokuéra rehehápe jepe (Mat. 5:44; 1 Ped. 3:15-17). w20.07 17, 18 párr. 14, 15

¿Añetehápe piko ikatu jaʼe Jehováre iñumildeha? Si ikatu, David heʼi haguéicha pe téxto koestediaguápe (Sal. 18:35). Heʼírõ guare koʼã mbaʼe, David oiméne imanduʼa raʼe proféta Samuel ohórõ guare itúa rógape, oiporavo hag̃ua pe rréi opytátavape Saúl rekovia. Jehová ohechauka iñumildeha, pórke oiporavo Davídpe Saúl rekoviarã. Hiʼarive David haʼe vaʼekue pe imitãvéva umi 8 Jesé raʼykuéra apytépe (1 Sam. 16:1, 10-13). David katuete ohechakuaáne raʼe siertoha pe Salmo 113 heʼíva Jehováre: ‘Iñumílde rupi, ojayvy omaña hag̃ua yvágare ha ko yvy ape ári. Haʼe omopuʼã umi iñumíldevape pe yvýgui, omopuʼã umi imboriahúvape ha omboguapy umi orekóva autorida apytépe’ (Sal. 113:6-8). Jehová ohechauka iñumildeha otrata lájare yvyporakuéra imperféktope. Haʼe ndahaʼéi ku ohejánteva jaadora chupe, síno ñanderecha voi iñamígoramo (Sal. 25:14). Ikatu hag̃uáicha jaiko Jehová amígoramo, haʼe ojapo raẽ vaʼekue álgo ñanderehehápe: Omeʼẽ Itaʼýra sakrifísioramo oñeperdona hag̃ua ñandéve ñande pekádo. ¡Mbaʼeichaitépa Jehová ñanembyasy ha ñandeporiahuvereko! w20.08 8 párr. 1-3

Jehová odesidíma pe día ha pe óra ohundi hag̃ua ko múndo aña (Mat. 24:36). Haʼe ndojapomoʼãi upéva itiempopeʼỹ ha noñedespasiensiamoʼãi avei. Chupe hiʼãitereíma omoingove jey umi omano vaʼekuépe, péro haʼe ipasiénsia (Job 14:14, 15). Haʼe ohaʼarõnte hína og̃uahẽ pe tiémpo iporãvéva oiporavo vaʼekue, omopuʼã jey hag̃ua chupekuéra (Juan 5:28). Añetehápe jareko heta mbaʼe jaagradese hag̃ua Jehovápe ipasiénsia haguére. Ñapensamíntena: Jehová ipasiénsia haguére hetaiterei hénte oreko tiémpo oñarrepenti hag̃ua, ha umíva apytépe ñande avei. Jehová oipota voi heta hénte oreko pe oportunida oikovévo pára siémpre. Upéicharõ, jahechaukákena jaagradeseha chupe ipasiénsia haguére. ¿Mbaʼéichapa ikatu jajapo upéva? Jajapo opa ikatúva jatopa hag̃ua umi ‘ipyʼaporãvape ohupyty hag̃ua jeikove opaveʼỹva’, ha ñaipytyvõ chupekuéra ohayhu ha oservi hag̃ua Jehovápe (Hech. 13:48). Upéi ñandéicha avei, haʼekuerahaitéma oñevenefisiáta Jehová ipasiénsia haguére. w20.08 18 párr. 17

Pe estudiánte ndahaʼéi ontendénte vaʼerã umi mbaʼe oĩva la Bíbliape, síno og̃uahẽ vaʼerã ikorasõme. ¿Mbaʼérepa? Pórke upéva omomýita chupe ojapo hag̃ua umi mbaʼe oaprendéva. Umi mbaʼe Jesús omboʼéva ningo isentído vaʼekue ha omopensa la héntepe. Péro haʼekuéra osegi vaʼekue Jesúspe pórke oporomboʼe jave, haʼe og̃uahẽ ikorasõmekuéra (Luc. 24:15, 27, 32). Ñane estudiánte ohechakuaa vaʼerã haʼe ikatuha oreko Jehovápe iñamigoitéramo, ikatuha oñemoag̃ui hese, ha ohecha chupe Itúa ha Idiósramo (Sal. 25:5). Jastudia aja hendive, ñaipytyvõ chupe ohechakuaa ha omombaʼe hag̃ua umi kualida porãite orekóva Jehová (Éx. 34:5, 6; 1 Ped. 5:6, 7). Tahaʼe haʼéva pe téma jastudiáva hína, siémpre ñaipytyvõ vaʼerã chupe oikuaa hag̃ua mbaʼeichagua persónapa Jehová. Ñaipytyvõ vaʼerã ñane estudiántepe ontende hag̃ua mbaʼeichaitépa Jehová oporohayhu, imbaʼeporã ha oporoporiahuvereko. Jesús heʼi vaʼekue “pe primer mandamiénto ha pe iñimportantevéva” haʼeha ‘jahayhu Ñandejára Jehovápe’ (Mat. 22:37, 38). Ñaipytyvõkena ñane estudiántepe ohayhu hag̃ua Ñandejárape ipyʼaite guive. w20.10 10 párr. 12

Jesús orrespeta vaʼekue enterove kuñáme (Juan 4:27). Péro haʼe koʼýte orrespeta vaʼekue umi kuña ojapóvape Itúa volunta. Iporãveha, Jesús oñeʼẽrõ guare umi oĩvare ifamíliape, heʼi vaʼekue oĩha kuimbaʼe ha avei kuña, ha ohecha vaʼekue chupekuéra iñermánaicha (Mat. 12:50). Jesús haʼe vaʼekue avei iñamigokueraite. Por ehémplo, ñapensamíntena pe amista oreko vaʼekuére María ha Mártandi, amalisia mokõivéva soltéra vaʼekue (Luc. 10:38-42). Umi mbaʼe Jesús heʼi ha ojapóva rupive, katuete oñeñandu porãne raʼe hikuái hendive. Por ehémplo, María naiprovlémai vaʼekue oguapy hag̃ua Jesús ypýpe ojapoháicha peteĩ disípulo. Ha Marta ipochýrõ guare María noipytyvõi haguére chupe, ndokyhyjéi vaʼekue heʼi hag̃ua Jesúspe mbaʼéichapa oñeñandu. Upérõ Jesús omboʼe vaʼekue mokõivépe heta mbaʼe iñimportánteva. Haʼe ohechauka ohayhuha chupekuéra ha iñermáno Lázarope, pórke ovisita jey vaʼekue chupekuéra heta vése (Juan 12:1-3). Ndareíri Lázaro hasykatuetérõ guare, María ha Marta oikuaa ikatuha ojerure ajúda Jesúspe (Juan 11:3). w20.09 20 párr. 3; 21 párr. 6

Jesús disipulokuéra ohaʼarõitereíma vaʼekue ‘ou upepete’ Ñandejára Rréino, ha oguenohẽ chupekuéra umi rrománo poguýgui. Ha ñandéve katu hiʼãitereíma Ñandejára Rréino oipeʼa entéro mbaʼe vai, ha ogueru pe múndo pyahu henyhẽtétava umi hénte iñeʼẽrendúvagui Ñandejárape (2 Ped. 3:13). Péro tekotevẽ ningo ñanepasiénsia ha ñahaʼarõ og̃uahẽ meve pe tiémpo Jehová oiporavo vaʼekue ojapo hag̃ua upéva. Jehová omeʼẽ vaʼekue Noépe pe tiémpo oikotevẽva ojapo hag̃ua pe árka, ha ‘opredika hag̃ua umi mbaʼe ihústova’ (2 Ped. 2:5; 1 Ped. 3:20). Jehová ohendu vaʼekue Abrahánpe oporandúrõ guare chupe heta mbaʼe odesidi haguére ohundi umi hénte aña oikóvape Sodoma ha Gomórrape (Gén. 18:20-33). Ha heta tiémpore Jehová ipasiensiaiterei vaʼekue umi israelita naiñeʼẽrendúivare (Neh. 9:30, 31). Koʼág̃arupi jahecha avei mbaʼéichapa Jehová ipasiénsia, pórke haʼe omeʼẽ tiémpo ikatu hag̃uáicha “oñarrepenti” enterove umi haʼe oipotáva oiko chugui iñamígo (2 Ped. 3:9; Juan 6:44; 1 Tim. 2:3, 4). Jehová ehémplo ñanepytyvõ ñanepasiénsia hag̃ua jasegi aja japredika ha ñaporomboʼe. w20.09 10 párr. 8, 9

Jehová omoingove jey vove umi omano vaʼekuépe, haʼekuéra imanduʼa jeýta umi mbaʼe ohasa vaʼekuére ha nokambiamoʼãi mbaʼeichagua persónapa hikuái. Ñapensamíntena mbaʼépa upéva ohechaukáta. Jehová ñanderayhueterei rupi ohecha ha imanduʼa entéro mbaʼe ñande ñapensa, ñañandu, jaʼe ha jajapóvare. Upévare, tekotevẽramo ñanemoingove jey, ifásilta chupe omeʼẽ jey hag̃ua ñandéve umi rrekuérdo jareko vaʼekue, ñande lája, ha ñanemopuʼã ñamano mboyve guareichaite jey. Rréi David ohechakuaa vaʼekue mbaʼeichaite pevépa Jehová ñandekuaa porã (Sal. 139:1-4). ¿Mbaʼéichapa ñañeñandu ñantendévo mbaʼeichaitépa Jehová ñandekuaa? Jajepyʼamongetávo mbaʼeichaitépa Jehová ñandekuaa, natekotevẽi jakyhyje, síno ñanemanduʼa vaʼerã mbaʼeichaitépa haʼe oñeinteresa ñanderehe. Káda únore haʼe hakateʼỹ ha ñanemombaʼeterei. Imanduʼa entéro mbaʼe jahasávare ñande rekovépe ha ñanediferensiáva ótrogui. ¡Ajépa tuichaite ñanembopyʼaguapy upéva! Núnka nañapensái vaʼerã ñaimeha ñaneaño. Jehová siémpre oĩ ñande ykére, ha ohecha hína mbaʼéichapa ikatu ñanepytyvõ (2 Crón. 16:9). w20.08 17 párr. 13, 14

Jehová ovyʼaiterei voi omboʼévo ipuévlope. Jehová oipota jaikuaa chupe, jahayhu chupe ha jaikove pára siémpre. Entéro koʼã mbaʼe ndajahupytymoʼãi kuri haʼe nañanemboʼéirire (Juan 17:3). Jehová ojevale vaʼekue pe kongregasión kristiána ypykuére omboʼe hag̃ua ipuévlope (Col. 1:9, 10). Pe espíritu sánto, haʼéva “pe ajudánte” Jesús opromete vaʼekue tuichaiterei oipytyvõ umi disípulope (Juan 14:16). Pe espíritu sánto rupive umi disípulo ontende Ñandejára Ñeʼẽ ha imanduʼa entéro mbaʼe Jesús heʼi ha ojapo vaʼekuére, heta koʼã mbaʼe upe rire ojeskrivi umi lívro de Mateo, Marcos, Lucas ha Juánpe. Koʼã mbaʼe oikuaáva omombarete umi kristiáno ypykue jerovia ha oipytyvõ chupekuéra ohayhuve hag̃ua Ñandejárape, Itaʼýrape ha ojoayhuve hag̃ua hikuái. Jehová oprofetisa vaʼekue “umi ára pahápe” umi hénte opa tetãygua ohotaha imontáñape haʼe oikuaauka hag̃ua chupekuéra hape (Is. 2:2, 3). Ñande jahecha hína mbaʼéichapa oñekumpli upe profesía. w20.10 24 párr. 14, 15

¿Mbaʼérepa peteĩ persóna ikatu orrechasa peteĩ konsého porã omeʼẽva iñamígo ohayhúva chupe? Ijorgullóso rupi. Umi ijorgullósovape ogustaiterei voi oĩ jave “ombojuruheʼẽva chupekuéra”. “Haʼekuéra nohendumoʼãi pe añetegua” (2 Tim. 4:3, 4). Umi ijorgullósova oimoʼã noikotevẽiha mbaʼeveichagua konsého, pórke opensa iñarandu ha iñimportanteveha umi ótrogui. Péro apóstol Pablo heʼi vaʼekue: “Oĩramo opensáva haʼe iñimportanteha, ha ndaupéichai, haʼe voi oñembotavy hína ijupe” (Gál. 6:3). Rréi Salomón oexplika porã vaʼekue upéva heʼírõ guare: “Peteĩ mitãkariaʼy imboriahu ha iñarandúva ovaleve peteĩ rréi ijedáva ha itavývagui ha nohendusevéimava umi konsého” (Ecl. 4:13). Jahechamína pe ehémplo apóstol Pedro oheja vaʼekue, apóstol Pablo okorrehírõ guare chupe enterove rovake (Gál. 2:11-14). Pedro ikatu kuri opyta ipyʼaro upe Pablo heʼi vaʼekuére chupe, oñemoĩtaramo opensa pe heʼi lájare chupe ha heʼi haguére upéva umi ótro rovake. Péro Pedro iñarandu. Haʼe oasepta pe konsého ha ndopytái ipyʼaro Páblore, ni ndosegíri opensa upe oiko vaʼekuére. Upéva rangue, tiémpo rire imanduʼávo hese heʼi: “Ñane ermáno Pablo jahayhuetéva” (2 Ped. 3:15). w20.11 21 párr. 9, 11, 12

Iñimportanteterei umi estudiánte oho rreunionhápe oprogresa hag̃ua. Umi mbaʼe ohendúva rreunionhápe oipytyvõta chupekuéra oaprende hag̃ua hetave mbaʼe, omombaretéta ijerovia ha oipytyvõta chupekuéra ohayhuve hag̃ua Ñandejárape (Hech. 15:30-32). Avei peteĩ ermáno ikatu heʼi pe estudiántepe haʼe iñeʼẽrendu hague Ñandejára mandamientokuérape ohayhu rupi Jehovápe ipyʼaite guive (2 Cor. 7:1; Filip. 4:13). Ha pe estudiánte oikuaavévo ohóvo hetave ermáno ifiélvape, iñehemplokuéragui oaprendéta ohayhu hag̃ua Ñandejárape ha hapichakuérape Cristo omanda haguéicha (Juan 13:35; 1 Tim. 4:12). Peteĩ estudiánte ikatu oaprende umi ermáno ombohováivagui umi situasión haʼe ohasáva hína, ha ohechakuaáta haʼe ikatuha avei ojapo umi kámbio tekotevẽva oiko hag̃ua chugui Cristo disípulo (Deut. 30:11). Káda uno ñaiméva kongregasiónpe ñaipytyvõkuaa heta hendáicha umi estudiántepe oprogresa hag̃ua (Mat. 5:16). w20.11 5 párr. 10-12

Apóstol Pablo oiméne omombeʼu raʼe Éfesope oñorairõ hague umi animál de verdándi peteĩ koliséope (2 Cor. 1:8; 4:10; 11:23). Térã oiméne oñeʼẽ raʼe umi judío ha umi ótro oñemoĩ mbaretévare hese, ha ojoguáva ‘umi animál salváhepe’ (Hech. 19:26-34; 1 Cor. 16:9). Tahaʼe haʼeháicha, Pablo ohasa vaʼekue heta mbaʼe ipeligrosoitereíva. Péro haʼe osegi oguerovia ohaʼarõha chupe heta mbaʼe porã amo gotyove (1 Cor. 15:30, 31; 2 Cor. 4:16-18). Koʼág̃arupi jaiko umi tiémpo ipeligrósovape. Heta ermánope ojeasalta, ha oĩ avei umi oikóva umi lugár oĩháme gérra, ha upéicha rupi noĩri hikuái segúro. Ha oĩ avei umi lugár Jehová siervokuéragui ojeproivihápe opredika, ha oservi chupe hikuái oikuaáramo jepe ikatuha oho kárselpe térã ojejuka chupekuéra upe haguére. Upéicharõ jepe, koʼã ermáno ha ermána osegi oadora Jehovápe, ha omoĩ ehémplo porã ñandéve g̃uarã. Haʼekuéra ndokyhyjéi oikuaáramo jepe ikatuha omano, pórke Jehová opromete chupekuéra umi mbaʼe iporãvéva amo gotyove g̃uarã. w20.12 9 párr. 3, 4

Sapyʼánte ikatu ñañedesanima umi hénte ñande territoriopegua nohenduséi haguére umi notísia porã, térã saʼieterei hénte jatopa haguére hógape. ¿Mbaʼépa ikatu ñanepytyvõ jasegi hag̃ua javyʼa, térã javyʼave hag̃ua? Iñimportánte ningo jahecha hendápe porã pe predikasión. ¿Mbaʼépa upéva heʼise? Ñanemanduʼa vaʼerã ñande japredikaha jaikuaauka hag̃ua Ñandejára réra ha Irréino. Jesús heʼi porã vaʼekue saʼitaha umi hénte omoirũva chupe (Mat. 7:13, 14). Japredika jave ñande jareko pe priviléhio ñambaʼapóvo Jehová, Jesús ha umi ánhel ndive (Mat. 28:19, 20; Apoc. 14:6, 7). Jehová ningo oheka hína umi hénte oservisévape chupe (Juan 6:44). Upévare aníkena ñañedesanima peteĩ persóna nañanerenduséiramo koʼág̃a, ág̃a ótro japredikávape ikatúma hína ohenduse pe mensáhe jagueraháva. Peteĩ ermána hérava Débora heʼi: “Pe desánimo ningo peteĩ árma ipoderósova Satanás oipurúva ñane kóntrape”. Péro Jehová ipoderosoiteve Satanásgui ha oimeraẽ árma haʼe oipurúvagui ñane kóntrape. w20.12 26 párr. 18, 19; 27 párr. 21

Heta ermáno ningo ombaʼapo vaʼerã un día pukukue ikatu hag̃uáicha oñemantene hikuái ha ifamiliakuérape. Upéicharõ jepe, koʼã ermáno ifiélva ojapo ikatúva entéro oapoja hag̃ua Ñandejára organisasión. Por ehémplo, oĩ umi ohóva oipytyvõ oiko jave sarambi, ótro ombaʼapo konstruksiónpe, ha enterovete ikatu ñameʼẽ ñane kontrivusión jaapoja hag̃ua pe traváho ojapóva Jehová organisasión ko múndo tuichakuére. Ñande jajapo koʼã mbaʼe jahayhu rupi Jehovápe ha ñande rapichakuérape. Avei jahechauka jahayhuha ñane ermanokuérape ñaimévo rreunionhápe káda semána ñanekaneʼõramo jepe, ha ñakomenta ñandeforsáramo jepe. Enterove ningo ñaneprovléma, péro lomímonte ñamokyreʼỹ ñane ermanokuérape oñepyrũ mboyve ha opa rire umi rreunión (Heb. 10:24, 25). ¡Ajépa jaagradesete opa mbaʼe ojapóva ñane ermáno ha ermanakuéra jahayhuetéva! w21.01 10 párr. 11

Umi ijorgullósovape ijetuʼu ofelisita hag̃ua hapichápe, haʼekuéra oipota ojeguerohory chupekuérante. Avei oñekompara jepi hikuái ótrore ha oikose ivalevévaramo hapichágui. Omboʼe ha omeʼẽ rangue ótrope rresponsavilida, pe ijorgullósova heʼi jepi: “Nde reipotáramo ojejapo porã álgo, ndete voi rejapo vaʼerã”. Umichagua persóna oñemoimportanteseve ótrogui ha iñenvidióso oĩramo ojapo porãvéva chugui álgo. Upéicharõ, jahechakuaáramo ñañepyrũha ñandeorgullóso, ñañemboʼe vaʼerã Jehovápe ñande pyʼaite guive ha jajerure chupe tañanepytyvõ ‘ñakambia hag̃ua ñapensa lája’, péicha ndoikomoʼãi ñandehegui peteĩ persóna ijorgullósova (Rom. 12:2). ¡Ajépa jaagradesete Jehovápe pe ehémplo porãite omeʼẽvare ñandéve! (Sal. 18:35). Jahechakuaa haʼe iñumildeha otrata lájare isiervokuérape, ha ñande jasegise iñehémplo. Avei jasegise umi ehémplo oĩva la Bíbliape, umi ohechakuaa vaʼekue umi mbaʼe ndaikatúiva ojapo, ha oreko vaʼekue pe priviléhio oguatávo Ñandejárandi. Siémprekena ñambotuicha Jehovápe, ha ñamombaʼeguasu chupe haʼe omereseháicha (Apoc. 4:11). w20.08 13 párr. 19, 20

Pe matrimónio ningo peteĩ rregálo perfékto oúva Ñandejáragui, péro ñande ñaneimperfékto (1 Juan 1:8). Upévare Ñandejára Ñeʼẽ oavisa ‘umi omendáva heta iprovlemataha’. Jehová ningo oipota umi ména oipytyvõ ifamíliape oreko hag̃ua peteĩ amista iporãva Jehovándi, omoñeñandu ojehayhuha chupekuéra ha omantene umi hogayguápe (1 Tim. 5:8). Péro umi ermána omendáva hembiapoitereíramo jepe, oñemotiémpo vaʼerã káda día olee hag̃ua la Biblia ha ojepyʼamongeta hag̃ua hese, ha oñemboʼe hag̃ua Jehovápe ipyʼaite guive. Upéva ningo ikatu hína ijetuʼu, pórke umi tembireko oreko heta mbaʼe ojapo vaʼerã. Upéicharõ jepe, iñimportanteterei hína oñemotiémpo umiarã. ¿Mbaʼérepa? Pórke Jehová oipota káda uno jareko ha ñamantene peteĩ amista iporãva hendive (Hech. 17:27). Ñantende ningo peteĩ tembireko oñehaʼãmbaite vaʼerãha oñemoĩ hag̃ua iména imperfékto poguýpe. Péro ifasilvéta chupe okumpli hag̃ua pe asignasión Jehová omeʼẽ vaʼekue tembirekokuérape, haʼe ontende ha oaseptáramo mbaʼérepa la Biblia heʼi oñemoĩ vaʼerãha iména poguýpe. w21.02 9 párr. 3, 6, 7

Umi pruéva ikatu voi ojogua pe tata ojepurúvape ojejapo hag̃ua peteĩ espáda de aséro. Pe espáda ningo oñemoingévo tatápe ha upéi ýpe, pe aséro imbareteve. Upéicha avei, ñande ñaaguanta jave umi pruéva ojoguáva tatápe, ñande jerovia imbareteve. Upévare Santiago oskrivi vaʼekue: “Peaguanta meme rupi peñentrena porã hína, péicha perekopaitéta opa mbaʼe peikotevẽva, ha pejapo porãta entéro mbaʼe” (Sant. 1:4). Jahechávo mbaʼéichapa umi pruéva omombareteve ñande jerovia, vyʼápe ikatúta ñaaguanta umíva. Pe kárta oskrivi vaʼekuépe, Santiago omombeʼu avei mbaʼérepa ikatu jaju ndajavyʼavéi. Ikatu hína ndajaikuaái rupi mbaʼépa jajapóta. Jahasa jave umi situasión ijetuʼúva, ñande jadesidise umi mbaʼe ombovyʼátava Jehovápe, ou porãtava ñane ermanokuérape, ha ñanepytyvõtava jasegi hag̃ua ñandefiél Jehovápe (Jer. 10:23). Ñande ningo ñaikotevẽ arandu jaikuaa hag̃ua mbaʼépa jajapóta ha mbaʼépa jaʼe vaʼerã umi oñemoĩvape ñanderehe. Ndajaikuaáiramo mbaʼépa jajapóta ikatu ñañedesanima, ha pyaʼeterei ikatu jaju ndajavyʼavéi. w21.02 28 párr. 7-9

Jehová voi omoĩ ñandéve la ehémplo upearã. Haʼe ñanderayhueterei, upévare ñande ñandefiélramo Jehovápe mbaʼeve ndojokomoʼãi chupe osegi hag̃ua ñanderayhu (Rom. 8:38, 39). Pe palávra griega ojetradusíva “pejoayhuetereíkena”, ñanemopensa peteĩ persóna oñehaʼãmbaitévare ohupyty térã ojapo hag̃ua álgo. Sapyʼánte ñande tekotevẽta avei ñañehaʼãmbaite jahayhu hag̃ua ñane ermanokuérape. Ha oĩ jave ñanembopochýva tekotevẽta ‘ñañoaguanta mborayhúpe, jaiko pyʼaguapýpe oñondivepa ha ñañehaʼãmbaite ñaime hag̃ua siémpre peteĩ ñeʼẽme, jahupytýva pe espíritu sánto rupive’ (Efes. 4:1-3). Upévare ndajaikomoʼãi jajesareko ñane ermanokuéra fallakuérare, ha ñañehaʼãmbaitéta jahecha chupekuéra Jehová ojapoháicha (1 Sam. 16:7; Sal. 130:3). Sapyʼánte ndahaʼéi la ifasilpáva jahayhu hag̃ua ñane ermanokuérape ñande pyʼaite guive, ha koʼýte jaikuaapa jave mbaʼépepa ojavy hikuái. Amalisia upeichagua situasión ijetuʼúva oiko vaʼekue umi kristiáno ypykue apytépe, upéva oiko vaʼekue Evodia ha Síntique rehe. Apóstol Pablo ojerure chupekuéra “opensa hag̃ua peteĩcha oservívo ñande Ruvichápe” (Filip. 4:2, 3). w21.01 22 párr. 10, 11

Umi ermanokuéra ovaloraiterei peẽ imitãva peservi haguére Jehovápe “peteĩ ñeʼẽme” hendivekuéra (Sof. 3:9). Haʼekuéra ovyʼaiterei ohecha jave mbaʼéichapa peẽ penekyreʼỹ, penderory ha vyʼápe pejapoha umi traváho oñemeʼẽ vaʼekue peẽme, ha pendeguerohoryeterei voi. Mitãrusukuéra, aníkena núnka penderesarái Jehová penderayhuha ha okonfiaha penderehe. Haʼe oprofetisa vaʼekue koʼã ára pahápe oĩtaha hetaiterei mitãrusu ojoguáva peteĩ ehérsitope, ha kyreʼỹme oútava ojeofrese (Sal. 110:1-3). Jehová oikuaa porã peẽ pehayhuha chupe, ha pejaposeha ikatúva entéro iservísiope. Upévare, penepasiénsiakena ótrore ha penepasiénsia avei pendejehe. Pejavy jave, peaseptákena umi konsého ha pe disiplína oñemeʼẽva peẽme, ha pehechakuaa umíva ouha Jehovágui (Heb. 12:6). Pembaʼapo jejopýkena pekumpli porã hag̃ua oimeraẽ asignasión oñemeʼẽva peẽme. Ha iñimportanteveha, opa mbaʼe pejapóvape, pembovyʼákena pende Túa yvagapeguápe (Prov. 27:11). w21.03 7 párr. 17, 18

Oĩ heta mbaʼe ikatúva ñanedesanima, por ehémplo umi mbaʼe vai ñapensáva ñandejehe voi, umi ñande fallakuéra, térã ñanderasykatu jave. Ikatu avei ñañedesanima noñemeʼẽi jave ñandéve peteĩ asignasión ñande jaipotáva Jehová servísiope, térã japredikáramo peteĩ território umi hénte nohenduseihápe pe mensáhe jagueraháva. Ñapensa jave ñaneimperfektoha ha umi ñande fallakuérare, ndahasyiete ñandéve ñañeñandu vai hag̃ua. Upévare ikatu ñapensa Jehová arakaʼeve ndoipotamoʼãiha ñaime pe múndo pyahúpe. Péro ipeligrosoiterei hína ñapensáramo upéicha. Enterove yvypóra ningo pekadór, ha Jesúspe añoite ndohupytýi upéva (Rom. 3:23). Péro Jehová ndoikói ojesareko umi ñande fállare, ha nohaʼarõi ñandehegui ñandeperfékto. Upéva rangue, haʼe hína ñande Túa ñanderayhúva ha ñanepytyvõséva. Jehová ipasiénsia avei ñanderehe. Haʼe oikuaa mbaʼéichapa ñañehaʼãmbaite jajapo hag̃ua iporãva ha ani hag̃ua ñapensa vai ñandejehe. Haʼe ningo oĩ voi ñanepytyvõ hag̃uáicha (Rom. 7:18, 19). w20.12 22 párr. 1-3

Enterove ñande ñaime hína peteĩ viáhepe. Ñande ñag̃uahẽse hína pe múndo pyahúpe, Jehová ñanegovernatahápe mborayhúpe. Káda día ningo ñande ñañehaʼã jasegi pe tape oguerahávare jeikovépe. Péro Jesús heʼi haguéicha, upe tape ipoʼi ha sapyʼánte ijetuʼu jasegi hag̃ua (Mat. 7:13, 14). Ha ñaneimperfékto rupi, ndahasyiete ñasẽ hag̃ua upe tapégui (Gál. 6:1). Ñande jasegiséramo jaha pe tape ipoʼíva oporoguerahávare jeikovépe, kyreʼỹme ñakambia vaʼerã ñapensa lája, ñande aktitu ha umi mbaʼe jajapóva. Apóstol Pablo ñanemokyreʼỹ vaʼekue ‘ñakambia hag̃ua tekotevẽhápe’. Ijetuʼu ningo jaikuaa hag̃ua mbaʼépa ñapensa ha ñañandu. ¿Mbaʼérepa? Pórke ñane korasõ itraisionéro, upévare hasy jepi japilla hag̃ua mbaʼépa ojapokase hína ñandéve (Jer. 17:9). Ndahasyiete ningo ñanembotavy hag̃ua “umi japu la hénte opensáva” (Sant. 1:22). Upévare jaipuru vaʼerã Ñandejára Ñeʼẽ ikatu hag̃uáicha jajepyʼamongeta ha jahechakuaa “mbaʼépa ñapensa ha mbaʼépa jaipota ñane korasõme” (Heb. 4:12, 13). w20.11 18 párr. 1-3

Ñaneumílderamo ha ñarrekonose umi mbaʼe ndaikatúiva jajapo, javyʼavéta katuete. ¿Mbaʼérepa? Pórke jahechakuaa jave oĩha umi mbaʼe ndaikatúiva jajapo, jaagradese ha ñamombaʼéta oĩramo ñanepytyvõva. Por ehémplo, ñapensamína Jesús omonguerárõ guare umi 10 leprósope, peteĩva añoite ou jey Jesús rendápe oagradese hag̃ua omonguera haguére chupe upe mbaʼasy vaietégui. Ko kuimbaʼe iñumílde ha ohechakuaa ndaikatumoʼãiha kuri okuera Jesús noipytyvõirire chupe, upévare haʼe oagradese oñepytyvõ haguére chupe ha ombotuicha Ñandejárape upe haguére (Luc. 17:11-19). Umi iñumíldeva ha orrekonoséva umi mbaʼe ndaikatúiva ojapo, ojogueraha porãve jepi hapichakuérandi ha ifasilve chupekuéra oreko hag̃ua umi amígo teete. ¿Mbaʼérepa? Pórke haʼekuéra vyʼápe orrekonose hapichakuéra orekoha umi kualida iporãva ha ohechauka ojeroviaha hesekuéra. Ovyʼa avei ótro ojapo porã jave umi asignasión oñemeʼẽva chupe, ha pyaʼe voi ofelisita ha omombaʼe chupe. w20.08 12 párr. 17, 18