Septiembre

Apóstol Pedro imanduʼárõ guare Joel profesíare, espíritu sánto rupive haʼe okambiaʼimi kuri umi palávra oipuru vaʼekue ko proféta (Hech. 2:16, 17). Oñepyrũvo, heʼi rangue “upéi”, Pedro heʼi: “Umi ára pahápe”. Ko pártepe haʼe oñeʼẽ kuri umi judío ára paháre, pórke upe tiémpope Jerusalén ha itémplo oñehundi potaitéma kuri. Upe tiémpope Ñandejára omeʼẽta ijespíritu “entéro persónape”. Kóva ohechauka Joel profesía oñekumpli hag̃ua ohasa hague hetaiterei áño. Ñandejára omeʼẽ rire ijespíritu umi kristiánope yma síglo primérope, haʼekuéra oñepyrũ opredika hetaiterei hendápe ko yvy ape ári. Ha Pablo oskrivírõ guare ikárta umi colosénsepe áño 61 rupi, haʼe ikatu vaʼekue heʼi umi notísia porã ojepredikáma hague “ko múndo tuichakuére” (Col. 1:23). Pablo heʼírõ guare upéicha oñeʼẽ umi lugár oĩvare ko múndope ha ikatu haguépe oviaha haʼe ha umi ótro ermáno. Péro Jehová ñanepytyvõ rupi ijespíritu sánto ipoderosoitéva rupive, ñane tiémpope japredikáma hetaitereive hendápe ha ñag̃uahẽma “umi lugár mombyryvehápe ko yvy ape ári” (Hech. 13:47). w20.04 6 párr. 15, 16

Jehová ñanderayhu káda únope, umíva apytépe umi isiervokuéra oñemomombyry vaʼekuépe ijovecha atýgui (Mat. 18:12-14). Ñandejára opromete vaʼekue haʼe ohekataha umi ijovecha okañy vaʼekuépe, ha oipytyvõtaha chupekuéra oreko jey hag̃ua hendive peteĩ amista iporãva. Jehová omombeʼu mbaʼe mbaʼépa haʼe ojapóta osalva hag̃ua chupekuéra, ha umíva ningo yma umi pastór israelita ojapóma vaʼekue voi (Ezeq. 34:12-16). Primeroite pe pastór ohekáta ijovechápe, ha upearã oñemotiémpo ha heta oñehaʼã vaʼerã. Otopa rire pe ovecha okañy vaʼekuépe, pe pastór ogueru jeýta chupe pe ovecha atýpe. Ha oiméramo pe ovecha oñelastima raʼe térã iñembyahyieterei, pe pastór mborayhúpe oipytyvõta pe ovecha ikangymívape, ovendáta umi oñelastima hague, avei ohupi ha omongarúta chupe. Umi ansiáno hína umi pastór oñangarekóva “Ñandejára ovechakuérare”, ha tekotevẽ avei ojapo koʼã mbaʼe oipytyvõ hag̃ua umi oñemomombyry vaʼekuépe kongregasióngui (1 Ped. 5:2, 3). Umi ansiáno oho oheka chupekuéra, oipytyvõ ou jey hag̃ua kongregasiónpe, ha mborayhúpe oipytyvõ chupekuéra oiko jey hag̃ua chuguikuéra Jehová amígo. w20.06 20 párr. 10

¿Opensápa raʼe Jesús umi kokue oĩmaha oñemonoʼõ hag̃uáicha ohaʼarõ rupi la majoría umi héntegui oiko idisípulo? Nahániri. La Biblia heʼíma vaʼekue voi ndahetamoʼãiha umi ojeroviáva hese (Juan 12:37, 38). Hiʼarive Jesús oreko vaʼekue podér oikuaa hag̃ua mbaʼépa oĩ umi hénte korasõme (Mat. 9:4). Upéicharõ jepe, haʼe oñekonsentra vaʼekue umi mbovymi ojeroviátavare hese ha kyreʼỹme opredika enterovépe. Ñande ndajarekói podér jaikuaa hag̃ua mbaʼépa oĩ umi hénte korasõme, upévare koʼytevéntema jajejoko vaʼerã ani hag̃ua jahusga ñande território térã peteĩ persónape. Upéva rangue, jahecháma vaʼerã umi héntepe Jesús disípuloramo. Ñanemanduʼa vaʼerã mbaʼépa Jesús heʼi vaʼekue idisipulokuérape. Umi kokue morotĩmbáma, ha oĩma oñemonoʼõ hag̃uáicha. Umi hénte ikatu okambia ha oiko chuguikuéra Jesús disípulo. Jehová ojerovia umi oĩvare ñande territóriope ikatuha oiko chuguikuéra Jesús disípulo, ha ohecha koʼã héntepe ‘umi mbaʼe iporãvaramo’ (Ageo 2:7). Jahecháramo umi héntepe Jehová ha Jesús ohechaháicha, ñañehaʼãta jaikuaa mbaʼe famíliaguipa ou, pe edukasión orekóva, umi mbaʼe ohasa vaʼekue ha mbaʼépa ointeresa chupekuéra. Upéicha jajapóramo haʼekuéra ndahaʼemoʼãi extráño ñandéve g̃uarã, síno jahechátama chupekuéra ñane ermáno ha ermánaramo. w20.04 13 párr. 18, 19

Ñandejára Ñeʼẽ ohechauka porã ñande jahayhu vaʼerãha Jesúspe ikatu hag̃uáicha Jehová ñandeguerohory. Peteĩ mbaʼe ikatúva jajapo oiko hag̃ua ñandehegui Jesús amígo haʼe hína jaikuaa chupe. Upearã ikatu jalee umi lívro de Mateo, Marcos, Lucas ha Juan. Jajepyʼamongetávo umi mbaʼe oñemombeʼúvare koʼã lívrope Jesús rekove rehe, jahechakuaáta mbaʼéichapa haʼe otrata porã vaʼekue la héntepe ha péicha jahayhu ha jarrespetavéta chupe. Por ehémplo, haʼe omoakãramo jepe idisipulokuérape, ndotratái vaʼekue chupekuéra esklávoramo. Upéva rangue, Jesús omombeʼu chupekuéra mbaʼépa haʼe opensa ha oñandu. Haʼekuéra ombyasy jave álgo, Jesús ombyasy ha hasẽ avei hendivekuéra (Juan 11:32-36). Umi iñenemígo jepe ohechakuaa umi ohendu vaʼekue umi notísia porã Ñandejára Rréinore oikoha chuguikuéra Jesús amígo (Mat. 11:19). Ñande jatratáramo ñande rapichakuérape Jesús otrata haguéicha idisipulokuérape, jajogueraha porãvéta, javyʼave, jajoayhuve ha jarrespetavétantema Crístope. w20.04 22 párr. 9, 10

Áño 1870 rupi, Gran Bretaña ogoverna vaʼekue hetave lugár umi ótro paísgui, ha oreko vaʼekue pe ehérsito tuichavéva ko múndope. Daniel profesíape oñeñeʼẽ peteĩ animál ratĩ michĩvare oitýva mbohapy hatĩme osẽ hag̃ua. Pe animál ratĩ michĩva orrepresenta Gran Bretáñape, ha umi ótro mbohapy hoʼáva orrepresenta Francia, España ha Países Bájospe (Dan. 7:7, 8). Gran Bretaña haʼe vaʼekue pe rréi del sur 1917 peve. Upe tiémpope, Estados Unídosgui oiko pe país irrikovéva ko múndope, ha oñomoirũ Gran Bretaña ndive ombaʼapo hag̃ua oñondive. Pe primera gérra mundiál aja, Estados Unidos ha Gran Bretaña oñomoirũ oñorairõ hag̃ua, ha oiko chuguikuéra peteĩ ehérsito ipoderosoitereíva. Péicha Gran Bretaña ha Estados Unídosgui oiko umi nasión ipoderosovéva ko múndope. Daniel oprofetisa haguéicha, ko rréi ombyaty “peteĩ ehérsito tuichaitereíva ha ipoderósova”. Koʼã ára paha aja, pe rréi del sur haʼe hína Gran Bretaña ha Estados Unidos. w20.05 4 párr. 7, 8

Ko yvy oĩ peteĩ distánsia exákta pe kuarahýgui ikatu hag̃uáicha jareko y. Michĩmi hiʼag̃uivérire pe kuarahýgui, pe y hypáta kuri ha ko yvy hakueterei ha isékota, ha ndaiporimoʼãi oikovéva pype. Péro michĩmi mombyryvérire pe kuarahýgui, kompletoite pe y oñekonheláta kuri, ha ko yvy tuichakue ojagarrapáta iélo ha niéve. Jehová omoĩ rupi ko yvy pe lugár tekotevẽhaitépe oĩ, ikatu oĩ y ko yvy ape ári ha ikatu ojeikove. Pe kuarahy ombyaku pe y oĩva umi oséano ha ko yvy ape ári, ha umíva ojeevapora térã ojupi yvate, ha oiko chugui umi arai. Káda áño ningo pe y millones de lítro ojeevapora, ha oiko rire chugui arai opyta upépe 10 díarupi, ha upéi oky térã hoʼa niéveramo. Tiémpo rire pe y ou jey umi oséanope térã umi ótro lugárpe, ha pe y osegi orrepeti upe tape. Jehová ojapo rupi péicha, núnka ndopamoʼãi pe y ko yvy ape ári, ha upéva ohechauka haʼe iñarandu ha ipoderosoha (Job 36:27, 28). w20.05 22 párr. 6

Jesús ñanemokyreʼỹ vaʼekue jasegi hag̃ua jajerure espíritu sánto (Luc. 11:9, 13). Jehová oipuru ijespíritu ñanemombarete ha omeʼẽ hag̃ua ñandéve “pe podér umi ótra hénte ndorekóiva” (2 Cor. 4:7). Haʼe ñanepytyvõ rupi, ikatu ñaaguanta oimehaichagua jehasa asy. Pe espíritu sánto ikatu avei ñanepytyvõ ñakumpli porã hag̃ua umi asignasión jarekóva Ñandejára servísiope, ha avei ikatu ñanembovaleve umi mbaʼe jajapokuaámavape voi. Jaikuaa ningo umi mbaʼe porã jahupytýva Ñandejára servísiope jahupytyha pe espíritu sánto rupive añoite. Ikatu jajerure Ñandejárape ijespíritu tañanepytyvõ jahechakuaa hag̃ua jarekópa algún pensamiénto térã deséo ivaíva (Sal. 139:23, 24). Jajapóramo upéicha, Jehová ñanepytyvõta ijespíritu rupive jahechakuaa hag̃ua umi pensamiénto térã deséo vai jarekóva. Upéi jajerure Ñandejárape ijespíritu tañanemombarete ñandepuʼaka hag̃ua umichagua pensamiénto ha deséore. Jajapóramo upéicha, Jehová ohecháta ndajajaposeiha mbaʼeve ojokótava chupe osegi hag̃ua ñanepytyvõ ijespíritu sánto rupive (Efes. 4:30). w20.05 28, 29 párr. 10-12

Ñadefende jave Jehová réra, ñande jasegi hína Jesucristo ehémplo. Jesús oikuaauka vaʼekue Itúa réra oipurúvo upe téra, ha avei omboʼévo umi héntepe mbaʼeichaguápa añetehápe Jehová. Por ehémplo umi fariséo oheja vaieterei vaʼekue Jehovápe, pórke ontendeka umi héntepe haʼe ipyʼahatãha, iñexihénte, iñaña ha ndoporoporiahuverekoiha. Jesús oipytyvõ vaʼekue umi héntepe ohechakuaa hag̃ua Itúa oporontendeha, ipasiénsia, oporohayhu ha oporoperdonakuaaha. Avei umi mbaʼe ojapóva rupive káda día, Jesús ohechauka porãiterei vaʼekue umi kualida porã Itúa orekóva. Péicha oipytyvõ umi héntepe oikuaa hag̃ua mbaʼeichagua persónapa Jehová (Juan 14:9). Jesús ojapo haguéicha, ñande ikatu ñamombeʼu umi héntepe umi mbaʼe jaikuaáva Jehovágui, ñamboʼe chupekuéra haʼeha peteĩ Dios oporohayhu ha imbaʼeporãva. Upéicha jahechauka japuha umi mbaʼe vai ojeʼéva Jehováre. Ñande ñasantifika Jehová réra ñaipytyvõvo umi héntepe oreko hag̃ua upe téra sagrádoramo. Umi mbaʼe jaʼéva ha jajapóva ohechauka umi héntepe mbaʼeichagua persónapa añetehápe Jehová. Ñande ñamopotĩ Jehová réra, ñaipytyvõvo umi héntepe anivéma hag̃ua oguerovia umi japu ojeʼéva hese. w20.06 6, 7 párr. 17, 18

Ikatu ningo jaipuru porã umi rred sosiál, por ehémplo, ñañekomunika hag̃ua ñane hentekuéra ha ñane amigokuérandi. Péro, ¿jahechámavapa oĩha umi omoĩva ikomentário, ifóto ha vidéo umi rred sosiálpe, oipotágui ótro ohecharamo chupekuéra? Haʼetévaicha haʼekuéra oikóva ollamasénte voi la atensión. Oĩ voi umi ijarhél ha ijurutieʼỹva okomenta jave ifóto térã umi ótro ohupi vaʼekue. Péro umi ojapóva upéicha naiñumíldei ha noñemoĩri hapichakuéra lugárpe, kristianokuérape oñemokyreʼỹháicha ojapo hag̃ua (1 Ped. 3:8). Jaipurúramo umi rred sosiál, iporãta ñañeporandu: “¿Ótropa opensáta chejejapoha ohechávo umi komentário, fóto térã vidéo ahupíva? ¿Cheenvidiátapa umi ohecháva umi mbaʼe ahupíva?”. Ñande kristianokuéra ndajaikoséi voi ñañemoimportánte, ha ndajaipotái umi ótro ñanemombaʼeguasu. Ñande jasegi pe konsého bíblico oĩva ñande téxto koestediaguápe. Ñaneumílderamo ndajajoguasemoʼãi umi hénte ko mundopeguápe ijorgullóso ha oipotávape umi ótro opensa hese iñimportantetereiha (1 Juan 2:16). w20.07 6 párr. 14, 15

Apóstol Páblogui oiko mboyve Jesús disípulo, haʼe vaʼekue peteĩ kariaʼy ijorgullósova ha opersegíva Jesús segidorkuérape (Hech. 7:58). Jesús voi ojoko vaʼekue Páblope, oñehenóiva Saulo upe tiémpope, anive hag̃ua oataka umi kristiánope. Jesús oñeʼẽ vaʼekue Páblope yvága guive ha ombosiégo chupe. Ikatu hag̃uáicha ohecha jey, Pablo ojerure vaʼerã kuri ajúda umi hénte haʼe opersegi vaʼekuépe oikóvo. Haʼe iñumílde ha oheja oipytyvõ chupe peteĩ disípulo hérava Ananías, ha haʼe omonguera Páblope ohecha jey hag̃ua (Hech. 9:3-9, 17, 18). Upéi Pablo ikonosidoiterei vaʼekue umi kristianokuéra apytépe, péro haʼe arakaʼeve ndahesaráiri Jesús omboʼe vaʼekuégui chupe Damasco rapére, oñeʼẽrõ guare chupe yvága guive. Pablo osegi vaʼekue iñumílde ha oasepta pe ajúda omeʼẽva chupe umi ermáno ha ermanakuéra. Haʼe orrekonose haʼekuéra haʼe hague ‘peteĩ ajúda omombaretéva chupe’ (Col. 4:10, 11, nóta). w20.07 18, 19 párr. 16, 17

Jehová haʼéramo jepe Todopoderóso, omeʼẽ autorida ótrope. Por ehémplo, oiporavo Jesúspe oiko hag̃ua chugui rréi pe Rréinope, ha omeʼẽta avei siérta autorida umi 144.000 yvypóra ogovernátavape Jesús ndive. Jaikuaaháicha Jehová omboʼe ha ombokatupyry Jesúspe oiko hag̃ua chugui rréi ha súmo saserdóte (Heb. 5:8, 9). Haʼe omboʼe ha ombokatupyry avei umi ogovernátavape Jesús ndive okumpli hag̃ua hembiapo, péro upéi ndoikói okontrola entéro mbaʼe ojapóva hikuái iñasignasiónpe. Upéva rangue ojerovia hesekuéra okumplitaha ivolunta (Apoc. 5:10). Ñande Ru yvagapegua ningo noikotevẽi avave oipytyvõ chupe, péro haʼe lomímonte omeʼẽ autorida ótrope, upéicharõ ñande koʼytevéntema jajapo vaʼerã upéicha. ¿Mbaʼéichapa ikatu osegi iñehémplo umi omoakãva hogapy ha umi ansiáno kongregasionpegua? Omeʼẽvo rresponsavilida ótrope, péro upéi ndoikóivo okontrolapase entéro mbaʼe. Resegíramo Jehová ehémplo, ojejapóta pe traváho, ha avei remboʼéta ha reipytyvõta ótrope ojeroviave hag̃ua ijehe (Is. 41:10). w20.08 9 párr. 5, 6

¿Mbaʼéichapa Jehová oipota ñande jahecha umi ijovechakuéra okañy vaʼekuépe? Ñande ikatu ñaaprende Jesús ehémplogui, haʼe oikuaa vaʼekue Jehovápe g̃uarã entéro ijovechakuéra ivaliosoitereiha. Upévare Jesús ojapo vaʼekue ikatúva guive omoag̃ui jey hag̃ua Jehováre umi ovecha okañy vaʼekue oĩva Israélpe (Mat. 15:24). Jesús haʼe rupi pe pastór imbaʼeporãva ojapo vaʼekue opa ikatúva ani hag̃ua okañy ni peteĩ Jehová ovecha (Juan 6:39). Apóstol Juan omokyreʼỹ vaʼekue kongregasión Efesopegua ansianokuérape osegi hag̃ua Jesús ehémplo. Haʼe heʼi chupekuéra: ‘Peipytyvõ umi ikangývape. Ha avei penemanduʼa vaʼerã ñande Ruvicha Jesús heʼi vaʼekuére: “Javyʼaiteve ñameʼẽvo, ñandéve oñemeʼẽ rangue”’ (Hech. 20:17, 35). Ko téxto ohechauka ansianokuéra orekoha tuicha rresponsavilida oñangarekóvo Jehová puévlore. Peteĩ ansiáno hérava Salvador oikóva Espáñape heʼi: “Apensávo mbaʼeichaitépa Jehová ojepyʼapy umi ijovechakuéra okañy vaʼekuére, upéva chemomýi ajapo hag̃ua ikatúva guive aipytyvõ hag̃ua chupekuéra. Che aikuaa Jehová oipotaha añangareko porã hesekuéra”. w20.06 23 párr. 15, 16

Jehová ningo ipasiénsia ha ohaʼarõta opa umi 1.000 áño oiko hag̃ua ñandehegui yvypóra perfékto. Ha og̃uahẽ meve upe tiémpo, haʼe osegíta gueteri operdona ñande pekadokuéra. Upévare jasegi vaʼerã iñehémplo ha jahecha umi kualida porã orekóva ñande rapichakuéra, ha ñanepasiénsia hesekuéra. Jesús ha umi ánhel ningo ovyʼaiterei vaʼekue ojejapórõ guare ko yvy. Péro ñañeimahinamína mbaʼeichaitépa ovyʼáta hikuái, ág̃a ko yvy henyhẽ vove yvypóra perféktogui ohayhu ha oservíva Jehovápe. Ñapensamína mbaʼeichaitépa ovyʼáta avei umi ohótava yvágape ogoverna hag̃ua Jesús ndive, ág̃a yvyporakuéra oñevenefisia vove entéro mbaʼe ojapótavagui hikuái (Apoc. 4:4, 9-11; 5:9, 10). Ha ñañeimahinamína mbaʼéichatapa ndaiporivéi vove omanóva, oñelamentáva ni hasýva. Upe vove nañanerasẽmoʼãvéima jahasa asýgui, síno javyʼaitereítagui. Upéicharõ, jajedesidíkena jasegi ñande Túa oporohayhu, iñarandu ha ipasiensiaitéva ehémplo. Jajapóramo upéicha jasegíta javyʼa, tahaʼe haʼéva umi provléma ñambohováiva (Sant. 1:2-4). ¡Ajépa jaagradesete Jehovápe omeʼẽ haguére pe esperánsa oĩtaha rresurreksión! (Hech. 24:15). w20.08 19 párr. 18, 19

La Biblia ningo peteĩ rregálo Ñandejára omeʼẽ vaʼekue ñandéve ñanderayhúgui. Ñande Ru yvagapegua ijespíritu sánto rupive ojevale vaʼekue unos kuánto kuimbaʼére oskrivi hag̃ua Iñeʼẽ, pórke haʼe ningo ñanderayhueterei. La Biblia rupive, Jehová okontesta ñandéve umi pregúnta iñimportantevéva ikatu vaʼerã ñañeporandu. Por ehémplo, ¿moõguipa jaju? ¿Maʼerãpa jaikove? ¿Ha mbaʼépa ñaneraʼarõ amo gotyove? Jehová ningo ñanderayhuetereígui oipota enterove ñambohovái koʼã pregúnta. Upévare ymaite guive omomýi umi kuimbaʼépe otradusi hag̃ua la Biblia heta idiómape. Koʼág̃a, la Biblia kompletoite térã en párte oĩma mas de 3.000 idiómape. Ndaipóri ótro lívro la Bíbliaicha hetaiterei idiómape ojetradusíva ha hetaiterei hénte orekóva. Ñande ikatu jahechauka ñamombaʼeha la Biblia jaleéramo káda día, jajepyʼamongetáramo umi mbaʼe omboʼévare, ha ñañehaʼãmbaitéramo jaiko upe ñaaprende haguéicha. Avei jahechauka jaagradeseha Ñandejárape ñañehaʼãmbaitéramo ñamombeʼu opa ikatúvape mbaʼépa omboʼe la Biblia (Sal. 1:1-3; Mat. 28:19, 20). w20.05 24, 25 párr. 15, 16

Proféta Jeremías opredika vaʼekue peteĩ território ijetuʼuetereívape, umi hénte nohenduséi rupi chupe. Peteĩ jey haʼe oñedesanimaiterei ha oñandu voi ndaikatumoʼãveimaha opredika. Péro haʼe noñentregái. ¿Mbaʼérepa? Pórke “Jehová ñeʼẽ” ‘haʼete voi tatarendy oĩva Jeremías kangue kuápe’ (Jer. 20:9). Upévare haʼe ndaikatuvéima okirirĩ ha osegímante opredika. Ha upeichaite avei oikóta ñanderehe ñamyenyhẽramo ñane akã ha ñane korasõme Jehová ñeʼẽ. Upearã tekotevẽta jastudia la Biblia káda día ha jajepyʼamongeta hese. Upéicha jajapóramo javyʼavéta predikasiónpe ha ikatu hína hetave hénte ñanerenduse (Jer. 15:16). Upévare, ñanedesanima jave, jajerure asýkena Jehovápe tañanepytyvõ. Haʼe ojapóta upéva ha péicha jagueropuʼakáta ñane imperfeksión, ñande fallakuéra, térã ñanderasykatu jave. Avei ñanepytyvõta jahecha hag̃ua hendápe porã umi priviléhio, ha ñandepositívo hag̃ua predikasiónpe. Ñañemboʼékena ñande Ru ñanderayhuetévape ha ñamombeʼupaite chupe mbaʼépa ñanekevranta. Ha haʼe ñanepytyvõ rupi, ikatúta ñandepuʼaka pe desánimore. w20.12 27 párr. 20, 21

Oĩ ermána saʼieterei oportunida orekóva ojeheʼa hag̃ua ermanokuérare, ha rreuniónpemante ikatu ojapo upéva. Upévare jaaprovechase umi rreunión jarresivi porã hag̃ua chupekuéra, ñañemongeta ha jaʼe hag̃ua mbaʼeichaitépa jaapresia chupekuéra. Jesús ojapo haguéicha, ikatu avei ñañemotiémpo jajeheʼa hag̃ua ermanakuérare (Luc. 10:38-42). Por ehémplo, ikatu ñainvita chupekuéra okaru hag̃ua ñande rógape, térã algúna diversionrã. Upéicha jave, jajasegura vaʼerã umi mbaʼe jaʼéva rupive ñañomokyreʼỹha (Rom. 1:11, 12). Ansianokuéra ningo osegi vaʼerã Jesús ehémplo. Haʼe oikuaa vaʼekue algúnope g̃uarã ijetuʼutaha opyta soltéro. Péro ohechauka porã peteĩ persóna ovyʼa hag̃ua natekotevẽiha omenda térã ifamília (Luc. 11:27, 28). Upéva rangue, jaiko hag̃ua vyʼápe pára siémpre jaservi vaʼerã Jehovápe ha ñamotenonde chupe ñande rekovépe (Mat. 19:12). Koʼýte ansianokuéra tekotevẽ otrata ermanakuérape iñermána ha isýicha. Iporãta ansianokuéra oñemotiémporamo rreunión mboyve térã opa rire oñemongeta hag̃ua ermanakuérandi. w20.09 21, 22 párr. 7-9

Israélpe umi kóga okakuaapa vaʼekue amo 6 méseperupi. Pe kokueséro oñemitỹ vaʼekue ou rire pe ama otoñopegua, upéva hína octubre mbytérupi, ha upéi okosecha ohasa rire pe ama primaverapegua, upéva hína abril mbytérupi (Mar. 4:28). Ñande ñanearandúta jasegíramo pe kokueséro ehémplo, péro upéva sapyʼánte ndahaʼéi la ifasilpáva. Ñaneimperfékto rupi, ñande pyaʼe voi jahechase jepi la rresultádo umi mbaʼe jajapóvape. Péro ñañemitỹ hag̃ua tekotevẽta jajoʼo, ñañotỹ, ñamopotĩ ha jarrega pe kóga. Ñañangareko porã vaʼerã hese kontinuadoite jaipotáramo umi plantasión okakuaa ha oprodusi porã. Ñande avei tekotevẽ ñañehaʼã kontinuadoite ñaipytyvõséramo umi héntepe oiko hag̃ua chuguikuéra Jesús disípulo. Ñaikotevẽ tiémpo ñaipytyvõ hag̃ua ñane estudiantekuérape otrata hag̃ua entérope peteĩchapa ha oporohayhu hag̃ua. Ñanepasiénsiaramo nañañedesanimamoʼãi oĩramo nañanerenduséiva. Ha tekotevẽta avei ñanepasiénsia oĩramo ñanerenduséva ha oaprendeséva Jehovágui. Ñande ndaikatúi ñambyapura peteĩ estudiántepe omombarete hag̃ua ijerovia. Sapyʼánte Jesús disipulokuéra jepe imbegue vaʼekue ontende hag̃ua umi mbaʼe haʼe omboʼéva (Juan 14:9). Ñanemanduʼa vaʼerã ñande ikatuha ñañotỹ pe semílla ha jarrega, péro Ñandejára hína upe omongakuaáva (1 Cor. 3:6). w20.09 11 párr. 10, 11

Ñande ningo jaipota ñane estudiánte oprogresa porã ha ojevautisa. Upearã iñimportánte hína ñamokyreʼỹ chupe oho hag̃ua umi rreuniónpe. Umi estudiánte ensegída ohóva rreunionhápe, pyaʼetereive oprogresa jepi. Oĩ umi instruktór heʼíva iñestudiántepe oĩha heta mbaʼe oaprendétava rreunionhápe, noaprendemoʼãiva haʼekuérante ostudia jave la Biblia, ha upévare tekotevẽtaha oho rreunionhápe. Jalee Hebreos 10:24, 25 ñane estudiántendi, ha ñamyesakã chupe mbaʼe iporãvapa ohupytýta ohóramo umi rreuniónpe. Jaʼénte rangue chupe oho hag̃ua umi rreuniónpe, vyʼápe ha kyreʼỹme ñamombeʼu vaʼerã chupe mbaʼépa ñaaprende kuri rreunionhápe, upéva omokyreʼỹvéta chupe oho hag̃ua. Umi mbaʼe ñane estudiánte ohecha ha ohendúva pe primer rreunión ohóvape, iporãitevéta umi mbaʼe ohecha ha ohendu vaʼekuégui umi ótra rrelihiónpe (1 Cor. 14:24, 25). Upépe haʼe ohecháta umi ehémplo porã oipytyvõtava chupe ikatu hag̃uáicha ojevautisa. w20.10 10, 11 párr. 14, 15

¿Mbaʼépa ikatu jajapo? Ñandejára espíritu sánto ñanepytyvõta jajapo hag̃ua umi mbaʼe jalee ha jastudiáva Ñandejára Ñeʼẽme. Pe salmístaicha avei ikatu ñañemboʼe ha jajerure: “Jehová, chemboʼemína aguata hag̃ua nde rapére ha che asegíta pe añetegua rapére. Ñandejára, chepytyvõna ani hag̃ua chepyʼamokõi, ikatu hag̃uáicha arrespeta nde réra” (Sal. 86:11). Upévare jasegíkena jalee ha jastudia la Biblia ha umi puvlikasión omeʼẽva Jehová organisasión. Ñande ningo ndajajapói upéva jaikuaaséguinte heta mbaʼe. Upéva rangue jaipota pe añetegua og̃uahẽ ñane korasõme ha ñamoĩ en práktika umi mbaʼe ñaaprendéva. Ha Jehová espíritu ikatu ñanepytyvõ upearã. Ñande ningo ñamokyreʼỹse avei ñane ermáno ha ermanakuérape (Heb. 10:24, 25). ¿Mbaʼérepa jajapose upéva? Pórke haʼekuéra hína ñane família. Upévare, ñañemboʼe vaʼerã Ñandejárape, ha jajerure chupe espíritu sánto ñakomenta hag̃ua ñande pyʼaite guive umi rreunionhápe, ha jajapo porã hag̃ua umi párte jarekóva jepi. Péicha jahechaukáta Jehová ha Jesúspe ñande jahayhuha ‘ijovechakuéra mimíme’ (Juan 21:15-17). Upéicharõ, ñahendúkena ñane Mboʼehára Ijojahaʼỹvape jaaprovechávo entéro umi informasión haʼe omeʼẽva. w20.10 24, 25 párr. 15-17

¿Mbaʼéichapa Jesús otrata vaʼekue ijapostolkuérape ikangýrõ guare hikuái? Orresusita riremi, Jesús heʼi unos kuánto isegidorkuérape: “¡Ani pekyhyje! Tapeho pemombeʼu che ermanokuérape [aikove jeýma hague]” (Mat. 28:10a). Jesús nopensái vaʼekue ijapostolkuéra naipohãveimaha. Haʼekuéra oheja reíramo jepe chupe, Jesús lomímonte ohenói chupekuéra ‘che ermanokuéra’. Jesús osegi vaʼekue Jehová ehémplo oiporiahuverekóvo ha operdonávo chupekuéra (2 Rey. 13:23). Upéicha avei, ñande jajepyʼapyeterei umi ñane ermáno opyta vaʼekuére inaktívo. Haʼekuéra ningo haʼe gueteri ñane ermáno ha ermanakuéra, ha ñande jahayhueterei chupekuéra. Ñanemanduʼa gueteri mbaʼéichapa ombaʼapo jejopy vaʼekue Jehovápe g̃uarã, ha ikatu voi ojapo raʼe upéva hetaiterei áñore, péro koʼág̃a opyta hikuái inaktívo (Heb. 6:10). ¡Ñande ningo añetehápe jahechagaʼueterei chupekuéra! (Luc. 15:4-7). Upévare, ñande ikatu ñainvita umi inaktívope oho hag̃ua rreunionhápe. Ha peteĩ inaktívo og̃uahẽ vove Salónpe ñande voi ñañemboja vaʼerã hendápe ha mborayhúpe jarresivi chupe. w20.11 6 párr. 14-17

Santiago, Juan ha isy ojerure vaʼekue Jesúspe peteĩ priviléhio haʼe ndorekóiva autorida omeʼẽ hag̃ua. Upepete voi Jesús heʼi Itúa añoite orekoha autorida odesidi hag̃ua mávapa oguapýta iderécha térã ijiskiérdape pe Rréinope (Mat. 20:20-23). Jesús orrespeta ha orrekonose vaʼekue umi mbaʼe ndaikatúiva ojapo. Haʼe núnka ndojapóiva mbaʼeve Itúa nomandái vaʼekue chupe (Juan 12:49). ¿Mbaʼéichapa ikatu jasegi Jesús ehémplo porãite? Ñande jasegi Jesús ehémplo, jajapóvo upe heʼíva pe téxto koestediagua. Upéicharõ, ojejerure jave ñandéve peteĩ konsého, ndajaikoséi jaovliga ótrope opensa hag̃ua ñande ñapensaháicha, ha ndajaʼeséi avei upe ou raẽvévante ñandéve ñane akãme. Upéva rangue, jaipuruse umi konsého oĩva la Bíbliape ha ñane puvlikasionkuérape. Péicha jahechaukáta ñarrekonoseha umi mbaʼe ndaikatúiva jajapo ha ñaneumíldeta, pórke jahechaukáta Jehová konsého siémpre iporãveha ñande jaʼévagui (Apoc. 15:3, 4). w20.08 11 párr. 14, 15

Repensáramo reakonseha vaʼerãha peteĩ ne amígope, ¿mbaʼe mbaʼépa ereko vaʼerã enkuénta? Eñeʼẽ mboyve hendive, eñeporandu vaʼerã: “¿Noiméi piko añembohustoitereíma hína ha ‘ahasa la rrája’?”. Peteĩ persóna oñembohustoitereíva ohusga hapichakuéra asegún la haʼe opensáva, orekoʼỹre enkuénta mbaʼépa Jehová opensa, ha ikatu voi hína ndoiporiahuverekói hapichápe. Rejepyʼamongeta rire, rehechakuaáramo tekotevẽha gueteri reñemoñeʼẽ ne amígope, emombeʼu porã vaʼerã chupe mbaʼépa la provléma. Avei ikatu eipuru umi porandu oipytyvõtava chupe ohechakuaa hag̃ua mbaʼépepa ojavy raʼe. Aníkena nderesarái ndovaleiha ejerovia umi mbaʼe nde repensávare, síno rejerovia vaʼerã Ñandejára Ñeʼẽ heʼívare. Nemanduʼa vaʼerã avei ndahaʼeiha ne rresponsavilida ehusga ne amígope, síno reipytyvõ chupe ontende hag̃ua mbaʼéichapa Jehová oñeñandu upe haʼe ojapóvare (Rom. 14:10). Jaipurúkena Ñandejára Ñeʼẽ, ha ñameʼẽta jave peteĩ konsého jaiporiahuvereko ñande rapichápe Jesús ojapo haguéicha (Prov. 3:5; Mat. 12:20). ¿Mbaʼérepa jajapo vaʼerã upéva? Pórke Jehová ñandetratáta ñande jatrataháicha ñande rapichakuérape (Sant. 2:13). w20.11 21 párr. 13

¿Ndépa reipota la hénte ndehusga nde pire kolór rehe, neporã térã ndevai haguére, o ndekyra térã ndepiru haguére? Katuete nandegustamoʼãi. Ajépa ñanembopyʼaguapy jaikuaávo Jehová nañandehusgaiha umi mbaʼe jahechávare. Por ehémplo, proféta Samuel ohechárõ guare Jesé raʼykuérape, haʼe ndohechái vaʼekue upe Jehová ohecháva. Jehová heʼi vaʼekue Samuélpe peteĩva umi Jesé raʼykuéragui oikotaha rréi de Israel. Péro, ¿mávaguipa? Samuel ohechárõ guare Eliábpe, haʼéva Jesé raʼy ypykue, heʼi: “Katuete péva hína la Jehová oiporavóva rreirã”. Eliab ipínta porãiterei voi ha upévare Samuel opensa chupe ojeporavotaha rreirã. “Péro Jehová heʼi Samuélpe: ‘Ani remaña la ipíntare térã ijyvate haguére, pórke che ndaiporavói chupe’”. ¿Mbaʼépa ñaaprende upévagui? Jehová osegi heʼi chupe: “Peẽ pejesegi la pehechávarente, péro Jehová ohecha umi hénte korasõme oĩva” (1 Sam. 16:1, 6, 7). Iporãta jasegíramo Jehová ehémplo jatratáta jave ñane ermáno ha ermanakuérape. w20.04 14 párr. 1; 15 párr. 3

Jesús ningo ohasa kuri ohóvo umi kokuérupi, ha amalisia upérõ vérde asy gueteri umi seváda (Juan 4:3-6). Ko sevadatýpe ningo upérõ oiméne ofalta 4 méserupi ojekosecha hag̃ua. Upévare iñextrañoiterei la Jesús heʼi vaʼekue: “Pemañamína umi kokuére, mbaʼéichapa morotĩmbáma, oĩma oñemonoʼõ hag̃uáicha” (Juan 4:35, 36). ¿Mbaʼépa heʼise rakaʼe upérõ? Jesús amalisia heʼi hína kuri oñembyatytaha umi héntepe, ha ndahaʼéi ojekosechataha seváda. ¿Mbaʼérepa jaʼe upéva? Ñapensamína pe oiko vaʼekuére upe mboyvemi. Upe tiémpope, umi judío noñeʼẽi jepi umi samaritánondi, péro Jesús opredika peteĩ kuña samaritánape, ha haʼe ohendu porã chupe. Jesús heʼi aja pe kokue morotĩmbamaha ha oĩmaha “oñemonoʼõ hag̃uáicha”, heta samaritano ou hína kuri hendápe oaprendese rupi hetave mbaʼe chugui. Umívape pe kuña samaritana oñeʼẽ kuri Jesús rehe (Juan 4:9, 39-42). Peteĩ expérto oskrivi vaʼekue ko rrelátore heʼi: “Umi hénte ningo pyaʼe voi oho kuri Jesús rendápe ha ohendu chupe. Upéva ohechauka haʼekuéra haʼete hague umi seváda morotĩmbámava ojekosecha hag̃ua”. w20.04 8 párr. 1, 2

Umi ñane rreunión ñanepytyvõ oiko hag̃ua ñandehegui peteĩ soldádo ikatupyrýva japredika ha ñaporomboʼe porãve hag̃ua. Por ehémplo, ñaaprende jaipurukuaa hag̃ua umi puvlikasión oĩva ñande kit de enseñánzape. Upévare jajeprepara porãkena umi rreunionrã, jajapysaka ha ñañatende porãkena ñaime jave upépe. Ha opa rire katu, jajapo umi mbaʼe ñaaprende vaʼekue. Upéicha jajapóramo, oikóta ñandehegui “Cristo Jesús soldádo teete” (2 Tim. 2:3). Jareko avei ñanepytyvõ hag̃ua millones umi ánhel ipoderosoitéva. Ñapensamínte mbaʼépa peteĩ ánhel añónte ikatu ojapo (Is. 37:36). Ha ñapensami mbaʼépa ikatúne ojapo peteĩ ehérsito kompletoite de ánhel ipoderosoitereíva. Ndaipóri ni peteĩ kuimbaʼe ni demónio ikatúva ogana Jehová ehérsito ipoderosoitévape. Jaikuaa ningo Jehová ipoderosoitereiha, upévare haʼe oĩramo ñanendive ndaiporimoʼãi ehérsito ipuʼaka vaʼerã ñanderehe (Juec. 6:16). ¡Upéva siertoite! Ñanemanduʼákena koʼã mbaʼére peteĩ ñane kompañéro de traváho, de eskuéla, térã peteĩ ñane pariénte ndahaʼéiva Testígo heʼi térã ojapo jave peteĩ mbaʼe ñanemoñeñandu vaíva. Ñanemanduʼákena nañaimeiha ñaneaño ko gérrape. Ñande jasegi hína pe gía omeʼẽva Jehová ha haʼe katuete ñanepytyvõta. w21.03 29 párr. 13, 14

Apóstol Pablo oiméne imanduʼa raʼe pe heʼívare Isaías 22:13. Upépe oñemombeʼu mbaʼéichapa vaʼekue umi israelita lája. Haʼekuéra oñehaʼã rangue ohayhuve Ñandejárape, oñehaʼãnte oiko vyʼarã rapykuéri. Haʼetévaicha umi israelita heʼíva: “Jaaprovecha katu koʼág̃a javyʼa hag̃ua, pórke oimeha óra ikatu hína ñamano”. Ha koʼág̃a peve oĩ heta opensáva upéicha. Jaikuaa ningo Jehová omoingove jeytaha umi omano vaʼekuépe, ha upéva ñanepytyvõ vaʼerã jaiporavo porã hag̃ua ñane amigorã. Yma umi ermanokuéra Corintopegua oñatende vaʼerã ani hag̃ua ojeheʼa umi onegávare oĩtaha rresurreksión. ¿Mbaʼépa ikatu ñaaprende upévagui? Tuicha ikatuha jajeperhudika jajeheʼáramo umi noimportáivare chupe mbaʼépa oikóta amo gotyove, síno oikosénteva vyʼarã rapykuéri. Upéicharõ, peteĩ kristiáno ohasáramo hetaiterei tiémpo peichagua persónandi ikatu operde umi mbaʼe porã ojepokuaáva ojapo. Umichagua hénte ikatu voi ojapoka chupe umi pekádo ivaietereíva Ñandejára renondépe. Upévare Pablo oñemoñeʼẽ mbarete vaʼekue heʼívo: “Pendehuísio porã jeýna ha pejapo iporãva, anive pepeka” (1 Cor. 15:33, 34). w20.12 9 párr. 3, 5, 6

Ko versíkulo omombeʼu mbaʼéichapa Jehová oorganisa ifamília oĩva yvágape ha ko yvy ape ári. Jehová hína pe omoakãva entéro mbaʼe, upéicha rupi haʼe oreko pe autorida tuichavéva. Ha haʼe omeʼẽ siérta autorida umi ánhelpe ha avei yvyporakuérape, péro enterove orrendíta chupe kuénta upe oipuru lájare ijautorida (Rom. 14:10; Efes. 3:14, 15). Jehová omeʼẽ vaʼekue autorida Jesúspe omoakã hag̃ua pe kongregasión, péro Jesús orrendíta kuénta Jehovápe ñandetrata lájare (1 Cor. 15:27). Jehová omeʼẽ avei autorida pe ménape omoakã hag̃ua hembirekópe ha ifamíliape. Péro, ¿mbaʼéichapa peteĩ kuimbaʼe ikatu oaprende omoakã porã hag̃ua ifamília? Tekotevẽ ontende mbaʼépa Jehová ohaʼarõ chugui. Tekotevẽ avei ontende mbaʼérepa Jehová omeʼẽ algúnope autorida oporomoakã hag̃ua, ha mbaʼéichapa haʼe ikatu osegi pe ehémplo omoĩva Jehová ha Jesús. ¿Mbaʼérepa iñimportánte peteĩ kuimbaʼe oikuaa koʼã mbaʼe? Jehová omeʼẽgui siérta autorida umi omoakãvape peteĩ família, ha haʼe oipota oipuru porã hikuái upe autorida (Luc. 12:48b). w21.02 2 párr. 1-3

Iporãta jasegíramo Jehová ehémplo ha jadesidi ñañembyesaráinte algúna kósagui. Por ehémplo, Jehová ikatu imanduʼa entéro mbaʼére, péro ñande ñañarrepentíramo haʼe odesidi ñaneperdona ha oñembyesarái umi mbaʼe vai jajapo vaʼekuégui (Sal. 25:7; 130:3, 4). Ha haʼe oipota avei jajapo upéva ñande rapichakuéra rehehápe, haʼekuéra ofalla jave ñanendive (Mat. 6:14; Luc. 17:3, 4). Ñande ikatu jahechauka ñamombaʼeha ñane apytuʼũ ijojahaʼỹva jaipurúvo upéva ñamombaʼeguasu hag̃ua Upe omeʼẽ vaʼekuépe ñandéve. Oĩ umi odesidíva oipuru iñapytuʼũ ojapo hag̃ua chupekuéra ogustávante, ha odesidi hag̃ua ijeheguínte mbaʼépa oĩ porã ha mbaʼépa oĩ vai. Péro Jehová haʼe rupi ñande Apohare, ikatu jaʼe haʼe odesidi porãvetaha ñandehegui mbaʼépa iporã ha mbaʼépa ivai ñandéve g̃uarã (Rom. 12:1, 2). Ñande ningo jaiko pyʼaguapýpe ñaneñeʼẽrendúramo Jehovápe (Is. 48:18). Ha ñaaprende mbaʼépa Jehová oipota jajapo jaikove aja entéro: Ñamombaʼeguasu ñande Apohare ha ñande Túape, ha ñambovyʼa chupe (Prov. 27:11). w20.05 23, 24 párr. 13, 14

¿Mbaʼéichapa ikatu koʼág̃arupi jahayhu ñande pyʼaite guive ñane ermáno ha ermanakuérape? Jaikuaa porãvévo chupekuéra ifasilvétama ñandéve ñantende ha jahayhu hag̃ua chupekuéra ñande pyʼaite guive. Ikatu jaiko oñoamigoitéramo haʼekuéra ndahaʼéiramo jepe ñandeavegua, térã ikostúmbre diferénte ñandehegui. Ñanemanduʼa vaʼerã Jonatán itujave hague Davídgui amo 30 áñorupi, upéicharõ jepe oiko vaʼekue chugui David amigoite. ¿Oĩpa kongregasiónpe peteĩ ijedavéva térã imitãvéva ndehegui ikatúvape ereko ne amigoitéramo? Rejapóramo upéicha, rehechauka hína ‘rehayhuha enterove ermanokuéra oĩvape ko múndope’ (1 Ped. 2:17). Jahayhu vaʼerã ñane ermanokuérape ñande pyʼaite guive. ¿Heʼisépa upéva jarekotaha ñane amigoitéramo enterovépe kongregasiónpe? Nahániri, upéva ningo hasýta. Ndaivaíri jareko ñane amigoitéramo umi ogustávape la mísma kósa ñandéve ñandegustáva avei. Jesús heʼi vaʼekue enterove ijapostolkuérare “che amígo”. Péro haʼe espesiálmente ohayhu vaʼekue Juánpe (Juan 13:23; 15:15; 20:2). Péro ndahaʼéi upévare haʼe ombojeroviave vaʼekue Juánpe (Mar. 10:35-40). w21.01 23 párr. 12, 13

Apóstol Pablo ndopredikái vaʼekue umi ndahaʼéivape judío ojepokuaaháicha jepi opredika umi judíope umi sinagógape. Haʼe ojesareko porã umi mbaʼe oĩvare ijerére, ha ohechakuaa umi kostúmbre orekóva hikuái irrelihionkuérape (Hech. 17:23). Upéi Pablo oñehaʼã otopa mbaʼépepa oĩ de akuérdo umi mbaʼe ojapóva hikuái iñadorasiónpe, Ñandejára Ñeʼẽ heʼívandi. Upévare Pablo oñehaʼãmbaite vaʼekue oadapta ipredikasión umi héntere. Umi Atenasgua ojapo vaʼekue peteĩ altár ‘peteĩ dios ndoikuaáivape g̃uarã’, upévare Pablo heʼi chupekuéra pe mensáhe haʼe opredikáva ouha pe Dios haʼekuéra oñehaʼãvape oadora oikuaaʼỹre. Umi ndahaʼéiva judío ndoikuaáiramo jepe Ñandejára Ñeʼẽ heʼíva, Pablo nopensái núnka ndoikomoʼãiha chuguikuéra kristiáno. Upéva rangue, haʼe ohecha chupekuéra umi seváda morotĩmbávaicha oĩmava ojekosecha hag̃ua, ha ojadaptánte omombeʼu hag̃ua chupekuéra umi notísia porã. Pablo ojapo haguéicha, jajesareko porã vaʼerã. Ñañehaʼã vaʼerã jahecha umi mbaʼe ñanepytyvõtava jaikuaa hag̃ua mbaʼépa oguerovia umi hénte oĩva ñande territóriope. Ñañatende mbaʼe adórnopa oreko hikuái hógape, hiʼáutope térã ikamiónpe. Sapyʼánte avei pe persóna réra, oñeʼẽ lája térã oñemonde ha ojarregla lája ñanepytyvõta japilla hag̃ua mbaʼe rrelihionguápa. w20.04 9, 10 párr. 7, 8