Octubre

Jaikuaávo Jesúspe, ñapensa ha jaikóta haʼe ojapo haguéicha. Ha amáske jaikuaa porãve chupe ha ñapensa haʼe opensaháicha, ñane amista hendive imbaretevéta. ¿Mbaʼéichapa ikatu jasegi Jesús ehémplo? Ñapensamínte ko mbaʼére. Jesúspe g̃uarã iñimportanteve vaʼekue oipytyvõ ótrope opensa rangue ijehe (Mat. 20:28; Rom. 15:1-3). Opensa rupi upéicha, haʼe ojesakrifika vaʼekue ótro rehehápe ha oporoperdona. Chupe nombopochýi vaʼekue péicha péichante umi mbaʼe heʼíva hese la hénte (Juan 1:46, 47). Ha oiméramo peteĩ persóna ofalla rakaʼe yma, haʼe ndohejái upéva oafekta otrata lája chupe (1 Tim. 1:12-14). Jesús heʼi: “Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:35). Upévare iporãta ñañeporandúramo: “¿Asegípa hína Jesús ehémplo ha ajapo ikatúva guive aiko hag̃ua pyʼaguapýpe che ermáno ha ermanakuérandi?”. w20.04 24 párr. 11

Ko múndope oĩramo jepe hetaiterei hénte ijapúva ha oñeʼẽ vaíva Jehová rérare, ñande ikatu ñadefende chupe ha jaʼe umi héntepe Jehová isánto, ihústo, ivuéno ha oporohayhuha. Ñande ikatu jahechauka jaapojaha igoviérno, ha ikatu ñaipytyvõ la héntepe ontende hag̃ua Jehová goviérno añoite ihustoha, ha upéva oguerutaha pyʼaguapy ha vyʼa entéro mbaʼe oikovévape (Sal. 37:9, 37; 146:5, 6, 10). Ñamboʼe jave la Biblia ótrope, pyʼỹinte jarresalta Jehová añoite orekoha derécho ogovernávo ko univérso, ha upéva ningo siertoite. Jaikuaa iñimportanteha ñamboʼe umi héntepe Ñandejára mandamientokuéra, péro iñimportanteve jey hína ñamboʼe chupekuéra ohayhu hag̃ua ñande Túa Jehovápe ha ifiél chupe. Upévare tekotevẽ jarresalta umi kualida porãite orekóva Jehová, ha jahechauka porã mbaʼeichagua persónapa orrepresenta hína upe téra (Is. 63:7). Upéicha jajapóramo ñaipytyvõta ótrope ohayhu ha iñeʼẽrendu hag̃ua Jehovápe, pórke oserviséta chupe ipyʼaite guive. w20.06 6 párr. 16; 7 párr. 19

Ñane apytuʼũ ojejapo lája ningo ndaijojahái. Ñaimérõ guare ñande sy retepýpe, ñane apytuʼũ oñepyrũ oñeforma osegívo peteĩ pláno. Ha káda minúto oñeforma vaʼekue hetaiterei sélula oĩva ñane apytuʼũme, hérava neuróna. Umi estudióso okalkula peteĩ persóna okakuaapámava apytuʼũme oĩha amo 100 mil millónrupi umi neuróna oformáva ñane apytuʼũ orekóva 1 kílo imédiorupi. Ñane apytuʼũ ningo ñanepytyvõ ñañeʼẽ hag̃ua, ha upéva haʼe peteĩ milágro. Por ehémplo, káda palávra jaʼévape, ñane apytuʼũ omonguʼe vaʼerã oñondive amo 100 múskulorupi oĩva ñane kũ, ñande ahyʼo, ñane rembe, ñande karretílla ha ñande péchope. Entéro koʼã múskulo okuʼe vaʼerã en órden ikatu hag̃uáicha oñentende umi mbaʼe jaʼéva. Peteĩ informasión osẽ vaʼekue 2019-pe ohechauka umi mitã onase ramóva ikatumaha odiferensia unas kuánta palávra. Ko informasión oapoja heta estudióso ogueroviáva: Ñanasérema voi ikatuha ñantende ha ñaaprende umi idióma. Añetehápe ikatu ñañeʼẽ pórke Ñandejára omeʼẽ vaʼekue ñandéve upéva peteĩ rregáloramo. w20.05 22, 23 párr. 8, 9

Abrahán oiko porã vaʼekue siuda de Úrpe, péro vyʼápe oheja vaʼekue entéro umi komodida. Haʼe ojapo upéva pórke ohaʼarõ “pe siuda oguerekóva simiénto teete” (Heb. 11:8-10, 16). Pe siuda Abrahán ohaʼarõ vaʼekue haʼe hína Ñandejára Rréino. Jesucristo hína pe rréi ogovernáva ko Rréinope, ha umi 144.000 unhído ogovernáta hendive. Apóstol Pablo heʼi vaʼekue pe Rréino haʼeha ‘Ñandejára oikovéva siuda, haʼéva hína Jerusalén yvagapegua’ (Heb. 12:22; Apoc. 5:8-10; 14:1). Jesús omboʼe vaʼekue idisipulokuérape ojerure hag̃ua ko Rréinore oñemboʼe jave, ikatu hag̃uáicha ojejapo Ñandejára volunta ko yvy ape ári, ojejapoháicha yvágape (Mat. 6:10). ¿Oikuaa porãpa rakaʼe Abrahán mbaʼéichapa oñeorganisáta Ñandejára Rréino? Nahániri. Hetaiterei tiémpore umi mbaʼe haʼe vaʼekue peteĩ “sekréto sagrádo” (Efes. 1:8-10; Col. 1:26, 27). Péro Abrahán oikuaa vaʼekue algúno ifamiliarégui oikotaha rréi, pórke Jehová opromete vaʼekue chupe upéva (Gén. 17:1, 2, 6). w20.08 2, 3 párr. 2-4

Ñande jarrechasaite vaʼerã umi apóstata omboʼéva. Oñepyrũ guive pe kongregasión kristiána, pe Diablo ojevale umi oporombotavývare omboduda hag̃ua Ñandejára siervokuéra ifiélvape. Upévare tekotevẽ ñadiferensiakuaa mbaʼépa siérto ha mbaʼépa japu. Ñane enemigokuéra ikatu oipuru Internet ha umi rred sosiál, omokangy hag̃ua ñande jerovia Jehováre, ha anive hag̃ua jahayhu ñane ermanokuérape. Aníkena núnka jaguerovia umi japu, umíva ningo ou Satanásgui (1 Juan 4:1, 6; Apoc. 12:9). Ndajaipotáiramo Satanás ipuʼaka ñanderehe, tekotevẽta ñamombareteve ñande jerovia Jesús rehe ha mbaʼéichapa Ñandejára ojevale hese okumpli hag̃ua hembipota. Tekotevẽ avei jajerovia ‘pe esklávo de konfiánsa ha iñarandúvare’, ha jajerovia Jehová ojevaleha hesekuéra añoite odirihi hag̃ua iñorganisasión (Mat. 24:45-47). Ñamombarete hag̃ua ñande jerovia, jastudia vaʼerã la Biblia kontinuadoite, péicha ñande jerovia ojoguáta peteĩ yvyramáta hapo pypukúvape. Apóstol Pablo heʼi vaʼekue avei upéicha oskrivírõ guare pe téxto koestediagua. w20.07 23, 24 párr. 11, 12

Ñande ñaneimperfékto rupi, pyʼỹinte pyaʼe jahusga ótrope umi mbaʼe jahechávarente (Juan 7:24). Péro ndaikatúi jaikuaa heta mbaʼe peteĩ persónagui umi mbaʼe jahechávarente. Por ehémplo, peteĩ doktór ivaletereíramo jepe, ndaikatumoʼãi oikuaa mbaʼépa oreko ipasiénte omañánteramo hese. Haʼe ojapysaka porã vaʼerã ipasiéntere oikuaaséramo mbaʼe mbaʼasýpa oreko raʼe oikóvo, mbaʼéichapa oñeñandu térã mbaʼe síntomapa oreko. Pe doktór ikatu voi ojapoka chupe rradiografía ohecha hag̃ua pe pasiénte retepy. Ndojapóiramo koʼã mbaʼe, pe doktór ikatu ndojasertái mbaʼeichagua mbaʼasýpa oreko ipasiénte. Upéicha avei, ñande ndaikatúi jaikuaa porã ñane ermáno ha ermanakuérape ñamañánteramo ipíntare. Ñañehaʼã vaʼerã jahecha mombyryve, jaikuaa mbaʼeichagua persónapa hikuái. Jaikuaa ningo ñande ndaikatuiha jahecha mbaʼépa oĩ ñande rapichakuéra korasõme. Upéicharõ jepe, ñande jajapokuaa ikatúva guive jasegi hag̃ua Jehová ehémplo. Haʼe ohendu isiervokuérape, oreko enkuénta umi mbaʼe ohasa vaʼekue ha ontende isituasionkuéra, ha avei oiporiahuvereko chupekuéra. w20.04 14, 15 párr. 1-3

Tekotevẽ ningo ñañehaʼã ñaneumílde, pórke umi oñemombaʼeguasúva ‘ohasáma hína la rrája’. Umi ijorgullósova ningo oiko vaise ha oñembotuichase. Haʼekuéra opensáva ha ojapóva pyʼỹinte olastima chupekuéra voi ha avei umi ótrope. Haʼekuéra nokambiáiramo opensa lája, Satanás omohesatũta chupekuéra ha omoingéta iñakãmekuéra umi mbaʼe naiporãiva (2 Cor. 4:4; 11:3). Péro peteĩ persóna iñumíldeva ndohasái la rrája. Haʼe opensa hekópe porãnte ijehe ohechakuaágui heta mbaʼépe umi ótro tuichaveha chugui (Filip. 2:3). Ha haʼe oikuaa ‘Ñandejára oñemoĩha umi ijorgullósovare, péro imbaʼeporãiterei umi iñumíldevandi’ (1 Ped. 5:5). Umi opensa porãva ijehe ha ndohasáiva la rrája ndorekoséi Jehovápe iñenemígoramo. Jasegi hag̃ua ñaneumílde, jasegi vaʼerã ko konsého oĩva la Bíbliape: “Peipeʼaite vaʼerã pendejehegui peteĩ aóicha pene kondúkta yma guare, ha umi mbaʼe pejapo vaʼekue yma, ha pemonde pendejehe peteĩ aóicha pe kondúkta pyahu”. Upearã tekotevẽ jastudia Jesús rekovekue ha jajapo ikatúva guive jasegi hag̃ua iñehémplo (Col. 3:9, 10; 1 Ped. 2:21). w20.07 7 párr. 16, 17

¡Tuichaiterei mbaʼe ningo ñandéve g̃uarã ñaime Jehová kongregasiónpe! Ñande jareko tuicha pyʼaguapy ha javyʼa jaadorávo Jehovápe ñane ermáno ha ñane ermanakuérandi kongregasiónpe. ¿Mbaʼe lugárpa jareko ha mbaʼéichapa ñandedeprovécho kongregasiónpe? Apóstol Pablo okompara vaʼekue pe kongregasión peteĩ persóna retére. Ombojoja avei káda persóna oĩvape kongregasiónpe peteĩ párte oĩvare ñande retépe (Rom. 12:4-8; 1 Cor. 12:12-27; Efes. 4:16). Pablo ehémplogui ñaaprende káda uno jarekoha peteĩ lugár iñimportánteva Jehová famíliape. Oñepyrũvo iñehémplo Pablo heʼi: “Ñande retépe ningo jareko heta párte, péro káda párte ojapo peteĩ mbaʼe idiferénteva. Upéicha avei ñande ñandereta péro ñaime rupi unído Crístondi, oiko ñandehegui peteĩ kuérponte. Káda uno ñanediferénte péro ñaikotevẽmba ojuehe” (Rom. 12:4, 5). ¿Mbaʼépa heʼise rakaʼe Pablo? Káda uno jarekoha diferénte traváho kongregasiónpe, péro enterovépe ojevaloraitereiha. w20.08 20 párr. 1, 2; 21 párr. 4

Tuakuéra, ¿mbaʼéichapa ikatu pesegi Jehová ehémplo ha peneumílde avei? Opyta porã jave, peporandu pene famíliape opensáva, heʼi hag̃ua mbaʼéichapa ikatu ojejapo peteĩ mbaʼe. Oiméramo oĩ porã upe heʼíva hikuái, ikatu pejapo upéicha. Jehová omoĩ avei ehémplo pórke ipasiénsia isiervokuéra noĩri jave de akuérdo, térã odudáramo peteĩ mbaʼe odesidi vaʼekuégui. Jehová ohendu Abrahánpe heʼírõ guare chupe haʼe opensaha noĩporãmoʼãiha ohundíramo Sodoma ha Gomorra (Gén. 18:22-33). Ñanemanduʼa vaʼerã avei mbaʼéichapa Jehová otrata vaʼekue Sárape, Abrahán rembirekópe. Haʼe ningo opuka vaʼekue Jehová oprometérõ guare haʼe hyeguasutaha ig̃uaig̃ui pyréma. Upéicharõ jepe, Jehová ndaipochýi ni noñeofendéi, síno ohechauka orrespetaha chupe (Gén. 18:10-14). Peẽ túa ha ansianokuéra, ¿mbaʼépa ikatu peaprende Jehová ehémplogui? ¿Mbaʼépa pejapo jepi pene família térã peteĩ ermáno noĩriramo de akuérdo térã ndogustáiramo upe pedesidi vaʼekue? ¿Ensegídapa pekorrehíma voi chupekuéra, térãpa peñehaʼã pentende haʼekuéra opensáva? Añetehápe entéro família ha kongregasiónpe ou porãiterei umi orekóva autorida osegíramo Jehová ehémplo. w20.08 10 párr. 7-9

¿Mbaʼépa ikatu ñaaprende Pablo ehémplogui? Ñañepyrũrõ guare jastudia la Biblia ha jajeheʼa ermanokuérare, oiméne jaipota rakaʼe ñanepytyvõ hikuái, jahechakuaágui ofaltaha gueteri ñandéve ñaaprende hetaiterei mbaʼe (1 Cor. 3:1, 2). Péro, ¿mbaʼépa ikatu jaʼe koʼág̃arupi? Oimérõ jaservíma Jehovápe heta áñore ha jahasáma heta mbaʼe, ikatu hína ijetuʼu ñandéve jaasepta hag̃ua ótro ñanepytyvõ, ha koʼýte pe ñanepytyvõséva oimérõ saʼive tiémpo oservi hína Jehovápe ñandehegui. Upéicharõ jepe, Jehová pyʼỹinte ojevale jepi umi ermáno ha ermanakuérare ñanemombarete hag̃ua (Rom. 1:11, 12). Upévare, jaipotáramo Jehová ñanemombarete jaasepta vaʼerã pe ajúda omeʼẽséva ñandéve ñane ermanokuéra. Peteĩ persóna ojapo hag̃ua heta mbaʼe porã, iñumílde ha odepende vaʼerã Jehováre, ha upéva nodependéi hína moõguipa ou, hesãipa, ijestúdio porãpa, térã ipláta hetápa. Upévare hiʼãite ningo enterove ñañehaʼãmbaite: 1) Jajerovia Jehováre, 2) ñaaprende umi ehémplo oĩvagui la Bíbliape, ha 3) jaasepta pe ajúda omeʼẽva ñandéve ermanokuéra. Upéicharõ, ñande ñañandúramo jepe ñanekangyha, Jehová katuete ñanemombaretéta. w20.07 14 párr. 2; 19 párr. 18, 19

Ikatu ijetuʼu ñandéve ñanepasiénsia hag̃ua japredika jave umi ñane hénte ndahaʼéivape Testígo. Péro upearã ikatu ñanepytyvõ upe heʼíva Eclesiastés 3:7. Upépe heʼi: “Oĩ tiémpo ñakirirĩ hag̃ua ha tiémpo ñañeʼẽ hag̃ua”. Sapyʼánte ikatu japredika ñane kondúkta rupive jaʼeʼỹre mbaʼeve, péro siémpre ñaime vaʼerã avei preparádo ñañeʼẽ hag̃ua chupekuéra Jehováre (1 Ped. 3:1, 2). Ñande ningo kyreʼỹme japredika ha ñaporomboʼe vaʼerã, péro siémpre tekotevẽ ñanepasiénsia enterovére, umíva apytépe ñane hentekuérare. Ñande ikatu ñaaprende ñanepasiénsia hag̃ua Jehová siervokuéra ifiélva ehémplogui jatopáva la Bíbliape, ha avei umi isiervokuéra koʼag̃aguágui. Habacúcpe hiʼãitereíma vaʼekue opa umi mbaʼe vai, péro haʼe ohechauka ipasiensiaha heʼírõ guare: “Che aĩta umi guárdia oĩháme, asegíta añatende upe guive” (Hab. 2:1). Apóstol Pablo ipyʼaite guive heʼi vaʼekue omohuʼãseha pe tembiapo oñemeʼẽ vaʼekue chupe. Péro haʼe ipasiénsia vaʼekue ha osegi ‘oikuaauka porã umi notísia porã’ (Hech. 20:24). w20.09 12 párr. 12-14

Jesús nopensái ijehe iñimportantetereiha, jepe Jehová añoite ipoderosove chugui. Umi Jehová siérvo osegíva Jesús ehémplo, iñumílde avei haʼéicha ha koʼýte ohayhu hapichakuérape, ha Jesús heʼi vaʼekue upéva ohechaukataha ñande haʼeha kristiáno tee (Luc. 9:48; Juan 13:35). ¿Mbaʼépa jajapo vaʼerã oĩramo provléma kongregasiónpe, ha ñapensa umi ansianokuéra noñatendeporãiha hína upe situasiónre? Jajeplagea rangue ikatu jahechauka ñaneumildeha jaapojávo umi ansianokuérape (Heb. 13:17). Upearã ikatu ñañeporandu: “¿Añetehápe piko tuichaiterei hína umi provléma? Ha tekotevẽramo oñesolusiona, ¿koʼág̃apa hína pe moménto ojejapo hag̃ua upéva? ¿Che piko areko hína pe rresponsavilida asolusionávo umíva? ¿Añehaʼã piko hína oĩve hag̃ua unida kongregasiónpe, térãpa añemoimportantesénte hína?”. Jehovápe g̃uarã iñimportanteve ñaneumílde ñandevaleterei rangue. Ha haʼe omombaʼeve ñaiméramo en unida, jajapo rangue hetaiterei mbaʼe. Upévare jajapókena opa ikatúva ñaneumílde hag̃ua jaservívo Jehovápe. Jajapóramo upéicha ñaipytyvõta oĩ hag̃ua unida kongregasiónpe (Efes. 4:2, 3). w20.07 4, 5 párr. 9-11

Jesús omombaʼeterei vaʼekue oipytyvõ haguére chupe umi kuña ohayhúva Ñandejárape, ha “oipurúva ipláta ha umi mbaʼe orekóva” oñatende hag̃ua hese (Luc. 8:1-3). Haʼe omboʼe chupekuéra heta mbaʼe iñimportánteva Ñandejára voluntágui. Por ehémplo, heʼi chupekuéra haʼe omanotaha ha upéi oñemoingove jeytaha (Luc. 24:5-8). Ojapo haguéicha ijapostolkuérare, haʼe oprepara koʼã kuñáme ombohovái hag̃ua umi mbaʼe ijetuʼúva ohasátava (Mar. 9:30-32; 10:32-34). Ha iñimportánte jahechakuaa umi apóstol ohejáramo jepe Jesúspe ojejagarrárõ guare chupe, umi kuña oñatendéva hese apytépe oĩ vaʼekue umi opytáva hendive omanórõ guare (Mat. 26:56; Mar. 15:40, 41). Umi kuña ojeroviáva Ñandejárare raẽvete ohecha vaʼekue Jesúspe oikove jey rire. Haʼe onkarga koʼã kuñáme heʼi hag̃ua umi apóstolpe oñemoingove jeýma hague chupe (Mat. 28:5, 9, 10). Ha pe Pentekostés áño 33-pe, espíritu sánto oguejýrõ guare umi disípulo ári, ijapytepekuéra oiméne oĩ avei umi kuña, ha enterovépe oñemeʼẽ vaʼekue pe avilida oñeʼẽ hag̃ua diferénte idiómape, ha omombeʼu umi ótro paisguápe “umi mbaʼe ijojahaʼỹva Ñandejára ojapo vaʼekue” (Hech. 1:14; 2:2-4, 11). w20.09 23 párr. 11, 12

Ñaipytyvõ jave umi héntepe oiko hag̃ua chuguikuéra Jesús disípulo, añetehápe ñaipytyvõ hína chupekuéra ojesalva hag̃ua. ¿Mbaʼérepa jaʼe upéva? Jesús omeʼẽrõ guare pe mandáto jatopáva Mateo 28:19, 20-pe heʼi vaʼekue: ‘Tapeho pemboʼe umi héntepe oiko hag̃ua chuguikuéra che disípulo, ha pevautisa chupekuéra’. ¿Mbaʼérepa iñimportantete jajevautisa? Pórke upéicharõ añoite ikatúta jajesalva ha jaikove pára siémpre. Pe ojevautisaséva oguerovia vaʼerã ikatuha oikove pára siémpre Jesús omano haguére ñanderehehápe ha orresusita rupi añoiténte. Upévare, Pedro heʼi vaʼekue umi kristiánope: ‘Pe vautísmo pendesalva hína avei koʼág̃a, Jesucrístope oñemoingove jey rupi’ (1 Ped. 3:21). Upéicharõ peteĩ persóna ojevautisa jave, orekóma pe esperánsa oikovévo pára siémpre. Ikatu hag̃uáicha ñaipytyvõ umi héntepe oiko hag̃ua chuguikuéra Jesús disípulo, ‘ñandevale vaʼerã ñaporomboʼe hag̃ua’ (2 Tim. 4:1, 2). ¿Mbaʼérepa iñimportánte upéva? Pórke Jesús heʼi vaʼekue: ‘Tapeho pemboʼe umi héntepe oiko hag̃ua chuguikuéra che disípulo’. Pablo heʼi vaʼekue Timotéope ‘osegi hag̃ua ojapo’ ko traváho, ‘pórke ojapóramo péicha ojesalváta haʼe ha avei umi ohendúva chupe’. w20.10 14 párr. 1, 2

Apóstol Pédrope ogustaiterei vaʼekue avei upe traváho orekóva ojagarrávo hénte ojejagarraháicha pira. Ha Jehová oipytyvõ rupi chupe, ikatupyryeterei vaʼekue ojapóvo upéva (Hech. 2:14, 41). ¿Mbaʼépa prinsipálmente ñanemomýi japredika hag̃ua? Jajapo upéva jahayhúgui Jehovápe. Jahayhúramo Jehovápe, upéva ñanepytyvõta ñañeʼẽ hag̃ua ótrope hese, ñapensáramo jepe nañandevaleiha jajapo hag̃ua upéva. Jesús oinvitárõ guare Pédrope ojagarra hag̃ua hénte ojejagarraháicha pira, heʼi chupe: “Ani rekyhyje” (Luc. 5:8-11). Pédrope nomongyhyjéi vaʼekue umi mbaʼe oikótava hese haʼe haguére Jesús disípulo. Upéva rangue, haʼe oñesorprendeterei ohechávo hetaiterei pira ojagarraha hikuái Jesús oipytyvõ rupi chupekuéra. Haʼe oikuaa Jesús ojapo hague peteĩ milágro, ha upévare opensa nomereseiha ombaʼapo Jesús ndive. Ikatu oime nde rekyhyje avei Pedro okyhyje haguéicha. Por ehémplo, ikatu rejepyʼapy entéro mbaʼe rejapo vaʼerãre oiko hag̃ua ndehegui Cristo disípulo. Oiméramo upéicha, reñehaʼã vaʼerã rehayhuve Jehovápe, Jesúspe ha umi nde rapichakuérape. Upéva nemomýita reasepta hag̃ua Jesús invitasión rejagarra hag̃ua hénte ojejagarraháicha pira (Mat. 22:37, 39; Juan 14:15). w20.09 3 párr. 4, 5

Ñande vyʼápe jaipuru ñane tiémpo, ñane mbaretekue ha ñande pláta jatopa hag̃ua ‘umi ipyʼaporãvape ohupyty hag̃ua jeikove opaveʼỹva’ (Hech. 13:48). Jajapo jave upéva, jasegi hína Jesús ehémplo. Haʼe heʼi vaʼekue: “Che rembiʼu hína kóva: ajapo upe chembou vaʼekue volunta, ha atermina pe traváho haʼe omeʼẽ vaʼekue chéve” (Juan 4:34; 17:4). Ha ñande ningo ñande pyʼaite guive jajapose avei upéva. Ñaterminase pe traváho Jesús onkarga vaʼekue ñandéve (Juan 20:21). Ha jaipota voi umi ótro osegi ojapo ñanendive ko traváho, umíva apytépe umi inaktívo (Mat. 24:13). Ñande ningo jaikuaa tuichaitereiha pe traváho Jesús onkarga vaʼekue ñandéve. Péro ñande nañaiméi ñaneaño. Jesús opromete vaʼekue oĩtaha ñanendive. Ñande jajapo jave disípulo, oiko hína ñandehegui “Ñandejára ajudánte”, ha “ñamoirũ Crístope” (1 Cor. 3:9; 2 Cor. 2:17). Upévare ñaime segúro ikatuha jajapopa ko traváho. ¡Ajépa javyʼaite ha tuichaite priviléhio ñandéve g̃uarã ikatu haguére jajapo ko traváho, ha ñaipytyvõ ótrope ojapo hag̃ua avei upéicha! (Filip. 4:13). w20.11 7 párr. 19, 20

Pyʼỹinte ningo umi mbaʼe tuakuéra odesidíva oafekta ifamiliakuérape heta tiémpore. Umi tuakuéra odesidi vaíramo ikatu omoprovléma hína ifamiliakuérape. Haʼekuéra odesidi porãramo katu oipytyvõta ifamíliape oiko hag̃ua vyʼápe. Péro umi ifamiliakuéra odesidi porã vaʼerã avei. Ha peteĩ persóna odesidíramo oservi ñande Ru yvagapegua Jehovápe, upéva hína pe mbaʼe iporãvéva ikatúva odesidi (Sal. 73:28). Jesús tuakuéra, José ha María oipytyvõse vaʼekue ifamiliakuérape oservi hag̃ua Jehovápe. Ha umi mbaʼe odesidíva ohechauka vaʼekue upéva iñimportanteterei hague chupekuéra g̃uarã (Luc. 2:40, 41, 52). Jesús odesidi porã vaʼekue avei, ha upéva oipytyvõ chupe ojapo hag̃ua Jehová ojeruréva chugui (Mat. 4:1-10). Jesús okakuaapávo oiko chugui peteĩ kuimbaʼe ivuéno, ifiél ha ipyʼaguasúva. Ha enterove tuakuéra ohayhúva Jehovápe ijorgullóso ha ovyʼáta orekóramo peichagua família. w20.10 26 párr. 1, 2

Ñapensamína koʼã mbohapy ehémplore. Peteĩ ermána ijedáva imanduʼa umi mbaʼe porã ohasa vaʼekuére yma. Koʼág̃a ijetuʼuvéramo jepe hekove, haʼe osegi ojapo ikatúva guive (1 Cor. 15:58). Káda día haʼe oñeimahina oĩmaha pe paraísope ifamília ha iñamigokuérandi. Ótra ermána imanduʼa peteĩ ikongregasiongua ombopochy hague chupe, péro haʼe odesidi ndopytamoʼãiha ipyʼaro hese (Col. 3:13). Peteĩ ermáno katu imanduʼa umi mbaʼe vai ojapo vaʼekuére yma, péro odesidi oñehaʼãmbaitetaha osegi ifiél Jehovápe koʼág̃a guive (Sal. 51:10). ¿Mbaʼépepa ojojogua koʼã mbohapy ermáno? Enterove imanduʼa umi mbaʼe ohasa vaʼekuére yma, péro ndoikói opensaiterei umívare. Upéva rangue, haʼekuéra ‘omaña siémpre henonderãre’. ¿Mbaʼérepa iñimportánte upéva? Peteĩ persóna oguatáva hína ohóvo ndaikatumoʼãi oho derechoite oikóramo omaña manterei hapykue gotyo. Péicha avei ñande ndaikatumoʼãi jaservi porã Jehovápe jaikóramo siémpre ñapensa umi mbaʼe oiko vaʼekuére yma (Luc. 9:62). w20.11 24 párr. 1-3

Pe gerréro ipoderosoitéva Goliátpe g̃uarã, David ikangy vaʼekue. Añetehápe ningo Goliat tuichave, oĩve ekipádo ha entrenádo oñorairõ hag̃ua. David katu haʼete vaʼekue ikangýva, pórke haʼe peteĩ mitãrusumínte ha ndahaʼéi peteĩ soldádo entrenádo. Péro haʼe ojerovia Jehováre, ha Jehová omeʼẽ chupe podér ikatu hag̃uáicha ogana Goliátpe (1 Sam. 17:41-45, 50). David ombohovái avei ótra situasión ijetuʼúva ikatu vaʼekue odesanima ha omokangy chupe. Haʼe oservi vaʼekue fiélmente Saúlpe, pe rréi Jehová oiporavo vaʼekue ogoverna hag̃ua Israel. Ñepyrũrã rréi Saúl orrespeta vaʼekue Davídpe. Upéi Saúl ijorgullóso rupi oenvidia Davídpe. Haʼe otrata vaieterei vaʼekue Davídpe ha oñehaʼã voi ojuka chupe (1 Sam. 18:6-9, 29; 19:9-11). Rréi Saúl iñinhústo ha otrata vaíramo jepe Davídpe, haʼe osegi orrespeta chupe haʼe rupi pe rréi Jehová oiporavo vaʼekue (1 Sam. 24:6). David ojerovia Jehová omeʼẽtaha chupe pe fuérsa haʼe oikotevẽva, ogueropuʼaka hag̃ua ko situasión ijetuʼuetéva (Sal. 18:1, ha introduksión). w20.07 17 párr. 11-13

Heta mbaʼe oĩva pe profesía oñeʼẽvape pe rréi del nórte ha pe rréi del sur rehe oñekumplíma, upévare ikatu jajerovia pe párte ofaltáva gueteri katuete oñekumplitaha. Ñantende hag̃ua pe profesía oĩva Daniel kapítulo 11-pe, tekotevẽ ñanemanduʼa upépe sólamente oñeñeʼẽha umi governánte ha umi goviérno oafektávare Ñandejára puévlope. Jaikuaa ningo ndahetaiha oĩ umi oservíva Ñandejárape ñakomparátaramo entéro umi hénte oĩvare ko múndope. ¿Mbaʼérepa upéicharõ koʼã goviérno oatakáta Ñandejára puévlope? Pórke Satanás ha imúndo ohundiseterei umi oservívape Jehovápe ha Jesúspe (Gén. 3:15; Apoc. 11:7; 12:17). Avei pe profesía oĩva Daniélpe nokontradesíri vaʼerã umi ótro profesía oĩva Ñandejára Ñeʼẽme. Añetehápe ñantende porã hag̃ua Daniel profesía tekotevẽtante voi jahecha umi ótro téxto oĩva la Bíbliape. w20.05 2 párr. 1, 2

Peteĩ persóna ombodudaséva ótrope pe rresurreksiónre ikatu hína oporandu: “¿Mbaʼéichapa oñemopuʼãta umi omanóvape? ¿Mbaʼeichaguáta piko hete oñemopuʼã vove?”. Iporãta ñapensa mbaʼéichapa Pablo ombohovái vaʼekue upéva, pórke koʼág̃arupi káda persóna oreko ikreénsia pe oikóvare ñanderehe ñamano rire. ¿Péro mbaʼépa omboʼe la Biblia? Peteĩ persóna omano rire, upéi pe hetekue oñembyaipa. Péro pe ojapo vaʼekue ko univérso ikatu omoingove jey upe persónape, ha omeʼẽ chupe pe kuérpo haʼe oikotevẽtava (Gén. 1:1; 2:7). Apóstol Pablo oipuru vaʼekue peteĩ ehémplo ohechauka hag̃ua Ñandejára noikotevẽiha omoingove jey peteĩ persónape el mísmo kuérpo reheve. Ñapensamína peteĩ semíllare. Ñañotỹ jave peteĩ semílla, upéva heñói, okakuaa ha oiko chugui peteĩ plánta. Upe plánta ningo idiferéntema pe semíllagui. Pablo oñeʼẽrõ guare pe rresurreksión oikótavare yvágape oipuru vaʼekue ko ehémplo. Upéicha ohechauka ñande Apohare ikatuha omeʼẽ pe persóna orresusitávape peteĩ kuérpo “haʼe oipotaháicha”. Pablo heʼi vaʼekue avei: “Umi oikóva yvágape hete diferénte umi oikóvagui ko yvy ape ári”. ¿Mbaʼépa heʼise vaʼekue Pablo? Ñande jaikóva ko yvy ape ári ningo jareko kuérpo umáno, péro umi oikóva yvágape oreko kuérpo espirituál, por ehémplo orekoháicha umi ánhel (1 Cor. 15:36-41). w20.12 9, 10 párr. 7-9

Enterove ningo jaikose trankílo ha pyʼaguapýpe. Avave ndoikoséi voi ojepyʼapyháre. Péro sapyʼánte ñañekevrantánte voi, ha ñañeporandu avei rréi David ojapo haguéicha pe téxto koestediaguápe. Heta mbaʼe ningo ikatu ñandepyʼapy, ha umíva apytépe oĩ umi mbaʼe ñande ndaikatúiva jajoko. Por ehémplo, ndaikatúi jajoko ani hag̃ua káda áño hepyve umi hiʼupy, ao, óga térã alkilér. Ndaikatúi avei jajoko umi ñane kompañéro de traváho térã eskuelapeguápe ani hag̃ua ñanemboliga jajapo hag̃ua peteĩ mbaʼe ivaíva térã ñanderekovai hag̃ua. Ha ndaikatúi avei jajapo mbaʼeve anive hag̃ua oĩ umi delinkuénte pe lugár jaikohápe. Ñande ningo jahasa koʼã mbaʼe, pórke ko múndope la majoría umi hénte ndoikói la Bíbliape heʼiháicha. Avei Satanás hína ko múndo jára, ha haʼe oikuaa oĩtaha umi hénte ‘ojepyʼapyetereíva umi mbaʼe oikotevẽvare oikove hag̃ua ko múndope’, ha upéicha rupi ndoservimoʼãiva Jehovápe (Mat. 13:22; 1 Juan 5:19). Upévare ndajahecharamói ko múndope henyhẽteha umi kevránto ha la hénte oikoha ojepyʼapyháre. w21.01 2 párr. 1, 3

Apóstol Juan ñandeavisa vaʼekue avei ani hag̃ua jaju ndajachaʼéi ñane ermáno ha ermanakuérare. Nañapenáiramo upe konséhore, Satanás ikatu ojevale upévare ha ojapoka ñandéve álgo ivaíva (1 Juan 2:11). Upéva oiko vaʼekue yma opa potaitévo pe síglo primero. Upérõ Satanás ojapo vaʼekue opa ikatúva Ñandejára siervokuéra ndochaʼéi hag̃ua ojuehe ha ojodividipa. Juan oskrivírõ guare umi ikartakuéra oikéma vaʼekue kongregasiónpe umi kuimbaʼe ojoguáva Satanáspe, ha odividiséva umi ermanokuérape. Por ehémplo, Diótrefes káusare ojeiko vaipáma hína kuri peteĩ kongregasiónpe. Haʼe ndorrespetái umi ansiáno ovisitávape umi kongregasión ha omondo vaʼekue pe Kuérpo Governánte. Haʼe oñehaʼã voi omosẽ kongregasióngui umi ermáno orresivi porãvape umi haʼe ndochaʼéivare. ¡Ajépa ivaiete la ojapo vaʼekue! (3 Juan 9, 10). Satanás ningo koʼág̃a peve oñehaʼã ha itarovaite voi odividise Ñandejára puévlope. Animoʼãkena ni núnka jaju ndajachaʼéi ñane ermanokuérare ha upevakuére jaju jajodividipa. w21.01 11 párr. 14

Pe primera gérra mundiálpe, Alemania ha Gran Bretaña goviérno opersegi vaʼekue Ñandejára siervokuérape ndoporojukaséi haguére gerrahápe. Estados Unidos goviérno katu ogueraha kárselpe umi odirihívape pe predikasión. Péicha ojepersegi haguére chupekuéra, oñekumpli pe profesía oĩva Apocalipsis 11:7-10-pe. Upéi 1933 guive ha koʼýte pe segunda gérra mundiál aja, pe rréi del nórte oataka vaivéntema Ñandejára puévlope. Hitler ha iñirũnguéra oproivi Ñandejára puévlo rembiapo. Koʼã enemígo ojuka vaʼekue oiméne 1.500 rupi Jehová siervokuérape ha hetaitereivépe omondo umi kámpo de konsentrasiónpe. Daniel oskrivi vaʼekue: “Umi ijehérsito opuʼãta ha omongyʼáta pe lugár sánto [...]. Ha ikáusare ndojejapomoʼãvéima umi sakrifísio siémpre ojejapóva” (Dan. 11:30b, 31a). Pe rréi del nórte ‘omongyʼa vaʼekue pe lugár sánto’ opersegi mbaretérõ guare umi unhído ha iñirũnguérape. Pe rréi del nórte oproivi avei pe predikasión ha upéicha rupi ‘ndojejapovéima umi sakrifísio siémpre ojejapóva’. Ha hiʼarive Hitler, pe omandáva Alemániape, ohura vaʼekue ohundipaitetaha Ñandejára siervokuéra oĩva Alemániape. w20.05 5, 6 párr. 12, 13

Jajoayhúramo ñande pyʼaite guive, kongregasiónpe ndaiporimoʼãi okompetíva oñondive. Ñanemanduʼa vaʼerã Jonatán noenvidiái hague Davídpe ha ndoikói hague okompeti hendive ojupi hag̃ua de rréi (1 Sam. 20:42). Enterove ningo ikatu jasegi Jonatán ehémplo. Ani ñaenvidia ñane ermanokuérape ivaleve haguére ñandehegui peteĩ mbaʼépe. ‘Upéva rangue ñaneumílde vaʼerã ha ñapensa umi ótro tuichaveha ñandehegui’ (Filip. 2:3). Ñanemanduʼákena káda uno ikatuha jajapo álgo oipytyvõtava pe kongregasiónpe. Jasegíramo ñaneumílde jahecháta umi kualida porã orekóva ñane ermanokuéra ha ikatúta ñaaprende heta mbaʼe chuguikuéra (1 Cor. 12:21-25). Jahechauka jave jajoayhuha ñande pyʼaite guive, ñañopytyvõ jaservi hag̃ua Jehovápe vyʼápe ha en unida. Jahechauka avei ñande haʼeha Jesús disípulo tee, ha upéva omomýi umi hénte ipyʼaporãvape oservise hag̃ua Jehovápe. Péro la iñimportantevéva hína, ñande ñamombaʼeguasu Jehovápe haʼéva ‘peteĩ Túa ñanderayhúva ha ñandeporiahuverekóva, ha peteĩ Dios omeʼẽva konsuélo opaichagua situasión vaípe’ (2 Cor. 1:3). w21.01 24 párr. 14; 25 párr. 16

Koʼág̃arupi oĩ umi hénte oapoʼíva testígo de Jehovápe ha oñembohorýva ñanderehe openságui ñandelápi mbykyha ha ndahaʼeiha mbaʼeve. ¿Mbaʼérepa? Pórke ñande nañapensái haʼekuéra opensaháicha. Ko múndope ningo oñemombaʼe umi ijorgullósovape, oñemombaʼeguasúva ha irrevéldevape. Péro ñande ñañehaʼã ñaneumílde, ñandepyʼaguapy ha ñaneñeʼẽrendu. Avei ndajaikéi polítikape ni mbaʼeveichagua país ehérsitope. Ñande ningo ñanediferénte umi hénte oĩvagui ko múndope, ha upévare haʼekuéra ñandeapoʼi (Rom. 12:2). Umi hénte ko mundopegua opensáramo jepe ñande ndahaʼeiha mbaʼeve, Jehová ojevale hína ñanderehe jajapo hag̃ua heta mbaʼe ijojahaʼỹva. ¿Ha mbaʼépa haʼe ohupytýma upéicha rupi? Koʼág̃a ojepredikáma ko yvy tuichakuére ha arakaʼeve ndojejapóiva gueteri peichaite peve. Isiervokuéra oguenohẽ umi rrevísta ojetradusíva hetave idiómape ha ojerrepartíva hetave lugárpe ko yvy ape ári, ha oipuru hikuái la Biblia oipytyvõ hag̃ua hetaiterei héntepe oiko porãve hag̃ua. Entéro koʼã mbaʼe porãite ningo ojehupyty Jehová rupivénte. w20.07 15 párr. 5, 6

Jesús oñemoĩ Jehová poguýpe, péro upéva ndeʼiséi haʼe naiñintelihenteiha térã ndaikatupyryiha. Haʼe ningo oporomboʼe vaʼekue sensíllo ha oñentende porã hag̃uáicha, ha peteĩ persóna iñintelihentetereívante ikatu ojapo upéicha (Juan 7:45, 46). Jehová oikuaa vaʼekue Jesús ivaletereiha, ha opermiti chupe ombaʼapo ijykére okreárõ guare opa mbaʼe yvágape ha ko yvy ape ári (Prov. 8:30; Heb. 1:2-4). Upéi Jehová omoingove jey rire Jesúspe, ‘omoĩ ipoguýpe entéro mbaʼe oĩva yvágape ha ko yvy ape ári’ (Mat. 28:18). Ha Jesús ivaletereíramo jepe, haʼe osegi oheka Jehová gía. ¿Mbaʼérepa haʼe ojapo upéicha? Pórke ohayhu Itúape. Upévare, menakuéra oikuaa vaʼerã Jehová ndeʼíri hague tembirekokuéra oñemoĩ vaʼerãha iména poguýpe openságui umi kuimbaʼekuéra iñimportanteveha umi kuñágui. Jehová voi ohechauka upéva oiporavo rupi kuimbaʼe ha kuñáme ogoverna hag̃ua Jesús ndive (Gál. 3:26-29). Jehová ohechauka vaʼekue avei ojeroviaha Itaʼýrare omeʼẽvo chupe autorida. Péicha avei peteĩ ména iñarandúva omeʼẽ hembirekópe siérta autorida. w21.02 11 párr. 13, 14

Ñandejára Ñeʼẽ ojogua peteĩ espéhope, pórke ñanepytyvõ jaikuaa hag̃ua mbaʼépepa tekotevẽ ñamehora ha mbaʼéichapa ikatu jajapo upéva (Sant. 1:23-25). Por ehémplo, jastudia rire Ñandejára Ñeʼẽ ikatu jahechakuaa tekotevẽha jajejokokuaa. Upéi Jehová ñanepytyvõ rupi, ñaaprende ñandepyʼaguapy hag̃ua jatrata jave umi hénte térã provléma ikatúva ñanembopochy. Koʼág̃a ñande ikatúma ñapensa porãve ha jadesidi umi mbaʼe oĩ porãvéva (Sant. 3:13). ¡Ajépa iñimportantete jaikuaa porã la Biblia heʼíva! Sapyʼánte ñañakãmbota rire ae ñaaprende mbaʼépa ndovaléi jajapo. Péro iporãvéta ñañemoarandu ñaaprendévo umi ótrogui, tahaʼe umi mbaʼe vai térã umi mbaʼe porã ojapo vaʼekuégui. Upévare Santiago ñanemokyreʼỹ jasegi hag̃ua umi ehémplo jatopáva la Bíbliape, umíva apytépe Abrahán, Rahab, Job ha Elías ehémplo (Sant. 2:21-26; 5:10, 11, 17, 18). Koʼã Jehová siervokuéra ifiélva ikatu vaʼekue oaguanta heta pruéva ha lomímonte osegi ovyʼa. Iñehemplokuéra ohechauka ñandéve Jehová rupive ikatuha avei jajapo upéva. w21.02 29, 30 párr. 12, 13

Ojejapo jave peteĩ estúdio bíblico, pe instruktór kárgope oĩ oipytyvõ iñestudiántepe ontende hag̃ua Ñandejára Ñeʼẽ. Pe instruktór ñaneinvitáramo ñamoirũ hag̃ua chupe, ñande ñaime upépe ñaipytyvõ hag̃ua pe instruktórpe (Ecl. 4:9, 10). ¿Péro mbaʼépa ikatu jajapo ñaipytyvõ porã hag̃ua pe estúdio aja? Jajeprepara pe estudiorã. Jajerure pe instruktórpe teʼi ñandéve umi mbaʼe ñanepytyvõtava jaikuaave hag̃ua pe estudiántepe. ¿Mbaʼe mbaʼépa reikuaa pe estudiántegui? ¿Mbaʼe témapa restudiáta hendive? ¿Mbaʼépa reipota haʼe oaprende ko estúdiope? ¿Oĩpa álgo ndovaléiva haʼe térã ajapo pe estúdio aja? ¿Mbaʼépa ikatu haʼe térã ajapo aipytyvõ hag̃ua chupe oprogresa hag̃ua? Jaikuaa ningo pe instruktór nomombeʼumoʼãiha ñandéve umi mbaʼe natekotevẽiva jaikuaa pe estudiántegui, péro umi mbaʼe heʼíva ñandéve ikatu ideprovechoiterei. Peteĩ misionéra hérava Joy, heʼi: “Añemongeta rupi koʼã mbaʼére pe chemoirũvandi, upéva oipytyvõ chupe oñeinteresa hag̃ua pe estudiántere, ha oikuaa hag̃ua mbaʼépa heʼíta pe estúdio aja”. w21.03 9 párr. 5, 6

Sapyʼánte la hénte ndaijaʼéi ñanderehe, pórke ñande jaiko Ñandejára léi heʼiháicha. Umi mbaʼe Ñandejárape g̃uarã ivaíva térã iporãva, tuichaiterei idiferénte umi mbaʼe heʼívagui ko múndo ivai térã iporãha. Por ehémplo, Ñandejára yma ohundi vaʼekue Sodoma ha Gomorra umi hénte oñemeʼẽ rupi umi rrelasión sexuál ikyʼávape, péro koʼág̃arupi heta hénte opensa ndaivairiha oñemeʼẽramo avei umi rrelasión sexuál ikyʼávape (Jud. 7). Ñande ñakumpli rupi la Biblia heʼíva koʼã mbaʼére, heta hénte oñembohory ñanderehe ha heʼi ndajaaseptaseiha umi opensa térã igústo diferéntevape ñandehegui (1 Ped. 4:3, 4). ¿Mbaʼépa ikatu ñanepytyvõ ñaaguanta hag̃ua umi hénte ndaijaʼéi jave ñanderehe ha ñanemaltrata? Upearã jajerovia vaʼerã ñande pyʼaite guive Jehová ñanepytyvõtaha, pórke ñande jerovia haʼete peteĩ eskúdo ‘omboguéva kompletoite umi flécha hendýva opoíva Satanás’ (Efes. 6:16). Péro ndahaʼéi jajeroviánte vaʼerã. Iñimportánte avei pe mborayhu, pórke pe oporohayhúva “ndaipochyreíri”, avei oaguanta oñembohasa asy jave chupe ha ni mbaʼevéicharõ noñentregái (1 Cor. 13:4-7, 13). Ñande jahayhúramo Jehovápe, ñane ermanokuérape ha umi ñane enemigokuérape jepe, ñanepytyvõta ñaaguanta hag̃ua oĩ jave ndaijaʼéiva ñanderehe. w21.03 20, 21 párr. 3, 4

Sapyʼánte umi mbaʼe ndajajapóiva rupive jahechauka jahayhuha ñane ermáno ha ermanakuérape, por ehémplo, nañandepochyreíriramo umi mbaʼe heʼívare hikuái. Ñapensamína mbaʼépa oiko vaʼekue Jesús oĩrõ guare ko yvy ape ári. Haʼe heʼi vaʼekue idisipulokuérape hoʼu vaʼerãha hoʼo ha huguy ohupyty hag̃ua jeikove opaveʼỹva (Juan 6:53-57). Upe heʼíva ndogustaiete voi heta idisípulope, ha upévare oheja chupe hikuái, péro umi iñamígo tee ndojapói upéva. Koʼã iñamígo ifiélva osegi hendive nontendéiramo jepe mbaʼépa heʼise vaʼekue Jesús, ha oiméne oñesorprende avei hikuái. Péro haʼekuéra ndaipochýi ni nopensái oĩ vai hague la Jesús heʼi vaʼekue. Upéva rangue, haʼekuéra ojerovia hese oikuaágui haʼe heʼiha pe añetegua (Juan 6:60, 66-69). ¡Ajépa iñimportantete nañandepochyreíri umi mbaʼe heʼívare ñane amigokuéra! Upéva rangue ñameʼẽ vaʼerã chupekuéra tiémpo oexplika hag̃ua mbaʼépa la heʼise vaʼekue (Prov. 18:13). w21.01 11 párr. 13