Junio

Ijetuʼueterei ningo pe viudami situasión. Haʼe oiméne ndorekói voi pláta ni ojogua hag̃ua umi mbaʼe oikotevẽva oñemantene hag̃ua. Upéicharõ jepe, haʼe lomímonte oho omoĩ mokõi monedaʼi peteĩva umi káhape ha oñehaʼãmbaite pono ollama la atensión. Oiméne apenamínte voi oñehendu raʼe koʼã monedaʼi hoʼávo pe káhape. Jesús oikuaa kuri haʼe opoi hague mokõi leptón, haʼéva hína umi monéda saʼive ovaléva upe tiémpope. Ni peteĩ gorrión ningo ndaikatúi vaʼekue ojejogua umi monédare, hiʼarive umi gorrión haʼe vaʼekue umi guyraʼi varatove oñevendéva ojejapo hag̃ua chugui tembiʼu. Jesús ningo omombaʼeterei la ojapóva ko viudami. Upévare ohenói idisipulokuérape ha oseñalávo pe viúdare, heʼi: “Ko viúda mboriahumi omeʼẽ hetave enterovete umi ótro omeʼẽ vaʼekuégui”. Upéi heʼive: “Haʼekuéra [koʼýte umi ipláta hetáva] omeʼẽ hembývante chupekuéra, pe viúda katu imboriahúramo jepe, omeʼẽmbaite la oreko vaʼekue, omeʼẽ orekóva guive oñemantene hag̃ua” (Mar. 12:43, 44). Upe díape ko viudami ijerovia mbaretetéva omeʼẽ kuri pe última monedaʼi oreko vaʼekue. Upéicha haʼe omoĩ hekove Jehová pópe, oikuaágui haʼe oporohayhuetereiha ha oñangarekotaha hese (Sal. 26:3). w21.04 6 párr. 17, 18

Jesús oĩrõ guare ko yvy ape ári siémpre ipositívo ha ikyreʼỹ vaʼekue predikasiónpe, ha oipota vaʼekue avei isegidorkuéra ikyreʼỹ opredikávo (Juan 4:35, 36). Jesús oĩ aja idisipulokuérandi, haʼekuéra opredika vaʼekue kyreʼỹme (Luc. 10:1, 5-11, 17). Péro ojejagarra ha ojejuka rire Jesúspe, idisipulokuéra ou vaʼekue naikyreʼỹvéi opredika hag̃ua peteĩ tiémpore (Juan 16:32). Orresusita rire, Jesús omokyreʼỹ vaʼekue chupekuéra omotenonde hag̃ua pe predikasión. Upéicha rupi, Jesús oho rire yvágape haʼekuéra ikyreʼỹeterei opredikávo, ha iñenemigokuéra jepe ojeplagea vaʼekue heʼívo umi mbaʼe jatopáva pe téxto koestediaguápe. Jesús ogia vaʼekue umi kristiáno ypykuépe opredika hag̃ua, ha Jehová ovendesi rupi chupekuéra heta hénte oasepta pe mensáhe. Por ehémplo, pe Pentekostés áño 33-pe, ojevautisa 3.000 persónarupi (Hech. 2:41). Ha upéi hetaitereivéntema ohóvo umi disípulo (Hech. 6:7). Péro Jesús oprofetisa vaʼekue hetaitereive persóna oaseptataha pe mensáhe umi ára pahápe (Juan 14:12; Hech. 1:8). w21.05 14 párr. 1, 2

¿Ndépa nemanduʼa mbaʼéichapa reñeñandu raʼe rehechakuaárõ guare retopa hague la verda? Katuete repensáne raʼe enterovénte oaseptataha umi mbaʼe regueroviáva. Nde reime kuri segúro pe mensáhe oĩva la Bíbliape oipytyvõtaha chupekuéra ovyʼave hag̃ua koʼág̃ama voi, ha omeʼẽtaha chupekuéra peteĩ esperánsa iporãitereíva amo gotyove g̃uarã (Sal. 119:105). Upévare kyreʼỹme remombeʼu ne amigokuéra ha ne parientekuérape umi mbaʼe reaprende vaʼekue, péro tuicha reñesorprende rehechakuaávo hetaiterei orrechasaha umi mbaʼe eréva. Nañanesorprendéi vaʼerã oĩ jave orrechasáva pe mensáhe japredikáva. Jesús tiémpope la majoría orrechasa vaʼekue chupe, jepe haʼe ojapo umi milágro ohechaukáva Ñandejára oapojaha chupe. Por ehémplo, Jesús omoingove jey vaʼekue Lázarope, ha upe milágro ni umi iñenemigokuéra jepe ndaikatúi vaʼekue onega. Péro umi líder judío lomímonte ndoaseptái Jesús haʼeha pe Mesías, ha ojukase voi hikuái Jesúspe ha Lázarope (Juan 11:47, 48, 53; 12:9-11). w21.05 2 párr. 1, 2

Eñehaʼãmbaitékena ani rejavy ni peteĩ rreunión. Umi mbaʼe ojehecháva rreunionhápe nemokyreʼỹetereíta, ha avei reikuaavéta umi ermáno ha ermanakuérape. Eñehaʼã eñamiga umi ermáno ha ermanakuéra haʼévare ehémplo porã ndéve g̃uarã, ndahaʼéiramo jepe ndeavegua térã orekóramo jepe ótra kultúra. La Biblia ñanemomanduʼa voi: “Umi ijedavéva ningo iñarandu” (Job 12:12). Péro umi ijedáva ikatúnte avei oaprende heta mbaʼe umi imitãvagui. Por ehémplo, David imitãiteve vaʼekue Jonatángui, péro haʼekuéra lomímonte oñoamigoite (1 Sam. 18:1). David ha Jonatán oñopytyvõ vaʼekue oservi hag̃ua Jehovápe heta situasión ijetuʼúvape (1 Sam. 23:16-18). Irina, peteĩ ermána haʼe añoiténteva la Testígo ifamíliape heʼi: “Ñane ermáno ha ermanakuéra kongregasionpegua añetehápe haʼe hína ñande túa, ñande sy ha ñane ermanokuéra teéicha. Jehová ikatu ojevale hesekuéra ñanepytyvõ hag̃ua ñaikotevẽ jave”. Ne amigokuéra ningo nepytyvõse ha nemokyreʼỹse, péro haʼekuéra oikotevẽ nde remombeʼu chupekuéra mbaʼéichapa ikatu ojapo upéva. w21.06 10, 11 párr. 9-11

Jesús omoĩ vaʼekue peteĩ ehémplo oñeʼẽva peteĩ rréi ha ijesklávore. Pe esklávo ningo odeve pe rréipe hetaiterei pláta ha núnka ndaikatumoʼãi kuri opagapa, péro pe rréi operdona chupe upe odevéva. Upe rire ko kuimbaʼe noperdonaséi kuri ótro esklávo odevévape chupe, hiʼarive saʼietereive upe haʼe odeve vaʼekuégui. Upéi pe rréi omoingeka kárselpe ko esklávope ndoiporiahuverekoséi haguére hapichápe. Umi mbaʼe ojapóva pe esklávo ningo operhudika chupe voi ha avei ótrope. Primero, haʼe ipyʼahatã ha ndoiporiahuverekói pe ótro esklávope, upévare “omoingeka chupe kárselpe opagapa peve la odevéva”. Segundo, haʼe operhudika avei umi ótro esklávope. Jesús heʼi: “Umi ótro esklávo ohecha pe oikóva ha ombyasyeterei” (Mat. 18:30, 31). Upéicha avei, umi mbaʼe jajapóva ikatu operhudika ótrope. ¿Mbaʼépa ikatu oiko peteĩ ermáno ñandetrata vaíramo ha ñande nañaperdonaséi chupe? Primero, ñalastima hína pe ermánope, pórke nañaperdonaséi chupe. Avei ikatu ñañembotavy chugui ha ndajahechaukavéi jahayhuha chupe. Segundo, umi ermáno kongregasionpegua ohechávo ndajajoguerahaporãveimaha ótro ermánondi, ndovyʼamoʼãi ha oñeñandu vaíta hikuái. w21.06 22 párr. 11, 12

Jehová ningo ñandeapo vaʼekue ijoguaháramo, péro Satanás ovyʼaitereíta ojapokáramo ñandéve umi mbaʼe ivaietéva. Noé tiémpope, Jehová ohechakuaa vaʼekue “mbaʼeichaite pevépa umi hénte iñaña ha ojapo hetaiterei mbaʼe vai”. Upévare “Jehová omañávo ko yvýre ombyasy ha omokorasõ rasy chupe” (Gén. 6:5, 6, 11). ¿Koʼág̃a piko omehoráma la situasión? ¡Ni mbaʼevéicharõ! Satanás oiméne ovyʼaiterei ohechávo mbaʼeichaitépa umi hénte hekovai ha ojapo opaichagua mbaʼe tieʼỹ ñanembojeguarúva. Chupekuéra g̃uarã ndaivaivéima umi mbaʼe kyʼa ojapóva oñondive umi kuimbaʼe ha kuña, avei umi kuimbaʼe oñentremetéva hapicha kuimbaʼére, ha kuña oñentremetéva hapicha kuñáre (Efes. 4:18, 19). Péro Satanás koʼýte ovyʼa ohechávo umi oadoráva Jehovápe hoʼaha peteĩ pekádo ivaietereívape. Satanás poguýpe umi “yvypóra omanda hapicháre operhudika hag̃uánte chupe”. Péro ndahaʼéi upévante, umi yvypóra noñangarekói avei ko yvýre ni umi animalkuérare, Jehová onkarga haguéicha chupekuéra (Ecl. 8:9; Gén. 1:28). ¿Ha mbaʼépa oiko upe haguére? Oĩ umi sientífiko heʼíva unos kuánto áñopente, la hénte káusare mas de 1 millón de animál ha plánta ndoexistimoʼãveimaha. w21.07 12 párr. 13, 14

Oĩ umi Jehová siervokuéra osegíva oñeñandu vaieterei umi mbaʼe vai ojapo vaʼekuére yma. Haʼekuéra osegi opensa Jehová núnka noperdonamoʼãiha chupekuéra, oñarrepenti ha ndojapovéimaramo jepe umi mbaʼe vai ojapo vaʼekue yma. Oiméramo nde reñeñandu hína péicha, tuichaiterei nepytyvõta nemanduʼáramo Jehová ohechaukataha ndéve mborayhu ifiélva, pórke upéicha rupi ikatu eservi vyʼápe Jehovápe ha konsiénsia potĩ reheve. Upéva ningo ikatu jajapo pórke “Itaʼýra Jesús ruguy ñanemopotĩ opaichagua pekádogui” (1 Juan 1:7). Upévare ñañeñandu vai jave ñaneimperfékto rupi, ñanemanduʼákena Jehová oĩha ñaneperdona hag̃uáicha la ñañarrepentíma guive. Jahechamína mbaʼéichapa pe salmísta David oñeʼẽrõ guare pe mborayhu ifiélvare, oñeʼẽ hague avei pe perdón rehe. Haʼe heʼi vaʼekue: “Pe yvága mombyryeterei oĩ ko yvýgui, ndaikatúi ñamedi, péicha avei ndaikatúi ñamedi mbaʼeichaitépa haʼe ohechauka mborayhu ifiélva isiervokuéra iñeʼẽrendúvape. Pe kuarahyresẽ ningo mombyryeterei oĩ pe kuarahyreikégui, upéicha Ñandejára omomombyry ñandehegui umi ñane rembiapo vaikue” (Sal. 103:11, nóta, 12). w21.11 5 párr. 12, 13

Peteĩ ména oservíva Jehovápe omombaʼe vaʼerã hembirekópe (1 Ped. 3:7). Por ehémplo, peteĩ ména ohechauka omombaʼeha hembirekópe orrespeta ha ovalorávo chupe. Haʼe ndojeruremoʼãi hembirekópe peteĩ mbaʼe ndaikatumoʼãiva ojapo, ha ndoikomoʼãi asy okompara chupe ótro kuñáre. ¿Ha mbaʼéichapa oñeñandúta peteĩ tembireko iména ojapóramo upéicha? Jahechamína la oikóva peteĩ ermána héravare Rosa. Iména ndahaʼéiva Testígo pyʼỹinte okompara chupe ótro kuñáre. Umi mbaʼe heʼíva omoñeñandu vaieterei Rósape, ha opensa voi ijehe ndovaleiha mbaʼeverã. Haʼe heʼi: “Aikotevẽ manterei ótro chemomanduʼa Jehová chevaloraha”. Upévare peteĩ ména oservíva Jehovápe omombaʼe vaʼerã hembirekópe. Haʼe oikuaa ndojapóiramo upéva oafektataha pe amista orekóva hembirekóndi ha avei Jehovándi. Peteĩ ména omombaʼéva hembirekópe oñeʼẽ porã hese ótrope, ha heʼi voi hembirekópe ohayhu ha ovaloraha chupe. w21.07 22 párr. 7, 8

¿Reñekevrantátapa otardáramo og̃uahẽ hag̃ua peteĩ enkomiénda reikotevẽva hína? ¿Nepasiensiavétapa reikuaáramo oiko hague álgo ha upévarente la nog̃uahẽi? Jahechami Proverbios 13:11-pe peteĩ ehémplo ohechaukáva mbaʼérepa tekotevẽ ñanepasiénsia. Upépe heʼi: “Umi hénte sapyʼaitépe irríkova pyaʼeterei operdepa jeýta ipláta, péro pe ombyatýva ohóvo pláta mbeguekatúpe irríkota”. ¿Mbaʼépa ñanemboʼe ko versíkulo? Pe persóna iñarandúva ningo ipasiénsia ha mbeguekatúpe porãnte ojapo opa mbaʼe, ha upévare katuete osẽ porãta. Proverbios 4:18 heʼi ñandéve: “Umi ihústova rape haʼete pe lus ohesapéva pyhareve, hesakã hesakãvéva ohóvo asajepyte peve”. Ko téxto ohechauka mbaʼéichapa Jehová mbeguekatúpe omyesakã ha oipytyvõ ipuévlope ontende hag̃ua ivolunta. Péro ko versíkulo ñanepytyvõ avei ñantende hag̃ua mbaʼéichapa peteĩ kristiáno ojapo umi kámbio hekovépe ha oprogresa. Upéva ningo ndaikatúi ñambyapura, ñaikotevẽmante voi tiémpo ñañemoag̃ui hag̃ua Jehováre. w21.08 8 párr. 1, 3, 4

Ñande ningo jareko hetaiterei traváho jajapo vaʼerã amáske hiʼag̃ui pe fin (Mat. 24:14; Luc. 10:2; 1 Ped. 5:2). Enterove jajapose voi opa ikatúva Jehová servísiope. Heta oĩ ombaʼapovémava hína predikasiónpe, ha algúnope hiʼãiterei oservi de prekursór. Ótro katu ombaʼaposeterei Betélpe térã konstruksiónpe, tahaʼe omopuʼã hag̃ua umi Salón del Reino, Salón de Asambléa, sukursál térã umi ofisína rremóta de traduksión. Avei hetaiterei ermáno ombaʼapo jejopy hína oiko hag̃ua chuguikuéra siérvo ministeriál térã ansiáno (1 Tim. 3:1, 8). ¡Oiménengo ovyʼaite Jehová ohechávo mbaʼéichapa ipuévlo kyreʼỹme oñehaʼã oservi porãve chupe! (Sal. 110:3). ¿Péro ndépa reñeñandu vai hína nderehupytýi haguére gueteri peteĩ méta erekóva Jehová servísiope? Oiméramo upéicha, eñemboʼe ha emombeʼu Jehovápe mbaʼéichapa eñeñandu (Sal. 37:5-7). Ikatu avei eporandu umi ermáno ijerovia mbaretévape mbaʼépepa ikatu emehora eservi porãve hag̃ua Jehovápe, ha upéi eñehaʼãmbaite esegi umi konsého omeʼẽva ndéve hikuái. Ejapóramo upéicha, ikatu hína rehupyty upe ne méta térã oñemeʼẽ ndéve pe priviléhio reipotaitéva. w21.08 20 párr. 1; 21 párr. 4

Pe profetísa Ana orekómarõ jepe 84 áño “núnka ndofaltái pe témplope”. Jehová ovendesi Ánape upe haguére, ha opermiti avei chupe ohecha Jesúspe imichĩetérõ guare (Luc. 2:36-38). Ñane tiémpope, heta ermáno ha ermána ijedáva omoĩ avei ehémplo iporãitereíva umi imitãvape. Tuichaiterei ñañevenefisiáta ñañemotiémporamo ñambaʼeporandu hag̃ua chupekuéra, ha ñahendu omombeʼúvo umi mbaʼe porã ohasa vaʼekue Jehová organisasiónpe. Ñane ermanokuéra ijedáva ningo iñimportanteterei Jehovápe ha iñorganisasiónpe g̃uarã. Haʼekuéra ohecháma mbaʼéichapa Jehová ovendesi iñorganisasión ha chupekuéra voi heta hendáicha. Koʼã ermáno oaprendéma avei ikostíllare heta mbaʼe iñimportánteva. ‘Pe arandu osẽva chuguikuéra ningo osyry peteĩ rríoicha’, upévare jaaprovecha vaʼerã pe experiénsia orekóva hikuái ha ñaaprende chuguikuéra (Prov. 18:4). Ñañemotiémporamo jaikuaa porãve hag̃ua chupekuéra, ñamombaretéta ñande jerovia. w21.09 3 párr. 4; 4 párr. 7, 8; 5 párr. 11, 13

Isaías heʼi Jehová puévlo orekoha ‘entéro mbaʼe oikotevẽva’ (Is. 60:5, 16). Koʼãva hína umi kuimbaʼe ha kuña ivaliosoitéva ha orekóva diferénte avilida. Haʼekuéra ningo oñepyrũ oservi Jehovápe ha oipytyvõ pe predikasiónpe. Upéicha rupi ikatúma oñeg̃uahẽ mas de 240 paíspe ha oñeguenohẽma umi puvlikasión mas de 1.000 idiómape. Ñande ningo jaiko hína umi ára pahápe, ha Jehová ombokacha rupi umi tetãnguérape, umi hénte odesidímante vaʼerã mbaʼépa ojapóta. ¿Oapojátapa hikuái Ñandejára Rréino, térãpa ojeroviáta umi goviérno oĩvare ko múndope? Upéva ningo peteĩ mbaʼe iñimportantetereíva enterove odesidi vaʼerã. Ñande jaservíva Jehovápe ningo ñakumpli umi léi omoĩva umi goviérno pe país ñande jaikohápe, péro nañañentremetéi polítikape (Rom. 13:1-7). Ñande jaikuaa pe Rréino añoite osolusionataha yvyporakuéra provléma, ha upe Rréino ndahaʼéi hína ko mundopegua (Juan 18:36, 37). w21.09 17, 18 párr. 13, 14

Peteĩ rehayhúva ohejáramo Jehovápe, iñimportanteterei nde ha avei umi ótro oĩva ne famíliape pesegi pemombarete pene amista Jehovándi. ¿Mbaʼéichapa ikatu pejapo upéva? Upearã pejepokuaa vaʼerã pelee la Biblia, pejepyʼamongeta hese ha peime rreunionhápe, péicha Jehová penemombaretéta hína. Epensamína Joanna ehémplore, haʼe ningo itúa ha iñermána oheja vaʼekue Jehovápe, haʼe heʼi: “Tuichaiterei ningo chepyʼaguapy alee jave umi rreláto oĩva la Bíbliape oñeʼẽva Abigaíl, Ester, Job, José ha Jesúsre. Iñehemplokuéra ningo chemokyreʼỹ ha chepytyvõ chepositivave hag̃ua, ha péicha menovéma hasy chéve la oiko vaʼekue”. Eñeñandu vai jave, esegíkena eñemboʼe Jehovápe. Ejerure asýkena ñande Ru yvagapeguápe tanepytyvõ ehecha hag̃ua pe situasión haʼe ohechaháicha. Ha ejerure avei chupe ‘tanemoarandu ha tohechauka ndéve moõrupipa reho vaʼerã’ (Sal. 32:6-8). Jaikuaa ningo ikatuha ijetuʼu ndéve emombeʼu hag̃ua Jehovápe mbaʼéichapa añetehápe reñeñandu. Péro Jehová ontende porãiterei mbaʼeichaitépa hasy hína ndéve la oiko vaʼekue, ha oipota voi emombeʼupaite chupe umi mbaʼe oĩva nde pyʼapýpe (Éx. 34:6; Sal. 62:7). w21.09 28 párr. 9, 10

Opa rire pe Páskua áño 32-pe, umi apóstol Pedro, Santiago ha Juan oreko vaʼekue peteĩ visión ijojahaʼỹva. Posívlemente haʼekuéra oĩ kuri pe Sérro Hermónpe, ha upépe ohecha mbaʼéichapa Jesús oñekambiapaite la ipínta. La Biblia heʼi: “Pe hova kuarahýicha omimbi ha ijao avei omimbipa” (Mat. 17:1-4). Umi apóstol ohendu Ñandejára voi oñeʼẽha chupekuéra pe yvágagui, ha heʼi: “Kóva hína che Raʼy ahayhuetéva ha aguerohorýva, pehendúke chupe”. Ñande ningo jasegiseterei koʼã mbohapy apóstol ehémplo, pórke haʼekuéra siémpre ohechauka vaʼekue iñeʼẽrenduha Jesúspe. Jehová ningo omoĩ Jesúspe omoakã hag̃ua pe kongregasión, ha jaagradeseterei chupe ojevale haguére hese ñandegia hag̃ua (Efes. 5:23). Katuete ningo ñande jajedesidíma ñaneñeʼẽrendutaha chupe, ojapo haguéicha Pedro, Santiago ha Juan. Upéicha Jehová ñanevendesíta koʼág̃ama voi ha avei pára siémpre. w21.12 22 párr. 1; 27 párr. 19

Coríntope oĩ vaʼekue peteĩ kristiáno oikóva hekovai, pórke oreko rrelasión sexuál itúa rembirekóndi, ha apóstol Pablo heʼi oñemosẽ hag̃ua chupe. Umi mbaʼe vai ojapóva ko kuimbaʼe operhudikáma ótrope kongregasiónpe. Oĩma voi ijapytepekuéra umi notĩvéimava la oikóvare ni nopensavéimava ivaietereiha upe pekádo (1 Cor. 5:1, 2, 13). Tiémpo rire, Pablo oikuaa pe pekadór oñarrepentíma hague ipyʼaite guive, ha upévare heʼi umi ansiánope: “Pyʼaporãme peperdona vaʼerã pe kuimbaʼépe, ha pekonsola chupe”. Ha omyesakã chupekuéra mbaʼérepa ojapo vaʼerã upéva: “Ani ág̃a oñembyasyetereígui oñentrega”. Pablo ningo ombyasy pe pekadór oñarrepenti vaʼekuépe. Haʼe ndoipotái ko kuimbaʼe oñeñandu vai rasáma ni omboguapyeterei ijehe umi mbaʼe vai ojapo vaʼekue, ha amo ipahápe noñehaʼãvéi Ñandejára operdona hag̃ua chupe (2 Cor. 2:5-8, 11). Umi ansiáno ningo osegi Jehová ehémplo ha oiporiahuvereko hapichápe oporohayhu rupi. Tekotevẽ jave, haʼekuéra okorrehi mbaretéta peteĩ pekadórpe, péro ikatúma guive ohechaukáta oiporiahuverekoha chupe. Umi ansiáno ndokorrehíriramo pe pekadórpe tekotevẽháicha, añetehápe ndoiporiahuverekomoʼãi hína chupe, síno iflóho ha ipermisívota hikuái. w21.10 11 párr. 12-15

Oĩramo álgien heʼi térã ojapóva álgo ñanemoñeñandu vaíva, la ojehúva ñandéve ikatu ñakompara peteĩ erídare. Ñamoĩ chupe ñaikytĩha michĩmi ñane kuã, ha uno térã dos día haguépe ja okuera jeýma. Upéicha avei sapyʼánte peteĩ ñane amígo ikatu heʼi térã ojapo álgo ñanemoñeñandu vaíva, péro upéi pyaʼeterei ñanderesarái chugui. Péro ñamoĩ chupe tuichaʼi voi ñañekytĩ hague, upéicha jave tekotevẽta voi jaha doktórpe ha haʼe ombovyvýta pe erída ha upéi ovendáta ñandéve. Upe rire manterei japokóramo pe erídare hasyve reíta ñandéve, ha ikatu voi ndokuerái. Ñambyasýramo jepe, oĩ heta hénte ojapóva upéva. ¿Mbaʼérepa? Pórke álgien heʼi térã ojapóramo álgo omoñeñandu vaíva chupe, haʼe opyta opensa hese tódo el tiémpo. Ha amo ipahápe upéicha rupi oúma ipyʼaro ha péva legálmente ombosufri rei chupe. ¿Jahechakuaápa mbaʼeichaitépa ideprovécho ñandéve pe konsého oĩva pe téxto koestediaguápe? w21.12 12 párr. 15

Ñamoĩ chupe peteĩ ansiánope ndogustaiha mbaʼéichapa oñemonde peteĩ ermáno térã ermána, péicha jave pe ansiáno ikatu oñeporandu: “¿Mbaʼére che apensa oĩ vaiha la oñemonde lája ko ermáno térã ermána?”. Pe ansiáno ningo ndoovligaséi iñermánope opensa hag̃ua haʼéicha, upéicha rupi ikatu oporandu ótro ansiánope térã peteĩ ermáno iñexperiénsiavape mbaʼépa haʼe opensa. Péicha oñondive ikatúta oanalisa pe konsého apóstol Pablo omeʼẽ vaʼekue ko témare (1 Tim. 2:9, 10). Apóstol Pablo oakonsehárõ guare umi kristiánope mbaʼéichapa oñemonde vaʼerã, heʼínte vaʼekue chupekuéra oñemonde porã vaʼerãha, iñakãguapy vaʼerãha ha nomondéi vaʼerãha álgo omotĩtava Jehovápe. Péro ndeʼíri vaʼekue chupekuéra espesífikamente mbaʼépa omonde vaʼerã ha mbaʼépa nahániri. Haʼe oikuaa vaʼekue káda ermáno ha ermána igústo diferenteha ha ikatuha omonde omondeséva noñemoĩrima guive la Biblia heʼívare. Upévare oiméramo pe ermáno térã ermána oñemonde lája ndohói hína la Biblia heʼíva kóntrape, posívlemente natekotevẽmoʼãi umi ansiáno oñemoñeʼẽ chupe ko témare. Ñarrekonose vaʼerã káda kristiáno ikatuha oelehi diferénte mbaʼe ha lomímonte mokõivéva oĩ porãta. Ndovaléi ñande jaovliga ñane ermanokuérape opensa hag̃ua ñandéicha. w22.02 16 párr. 9, 10

Oĩ ningo heta rrasón jahechauka hag̃ua ojupe mborayhu ifiélva. ¿Mbaʼe mbaʼépa hína umíva? Jahechamína mbaʼéichapa koʼã proverbio bíblico ombohovái upe pregúnta: “Esegíkena siémpre ehechauka mborayhu ifiélva, ha aníkena refalla avavéndi [...]. Péicha rehechaukáta neentendidoha, ha Ñandejára ha umi hénte ndeguerohorýta”. “Peteĩ persóna ohechaukáramo mborayhu ifiélva, haʼe voi oñevenefisia”. “Pe ohechaukáva mborayhu ifiélva ha oñehaʼãva ihústo oikovéta” (Prov. 3:3, nóta, 4; 11:17, nóta; 21:21, nóta). Koʼã provérbiope oñemensiona mbohapy rrasón ñanemomýiva jahechauka hag̃ua mborayhu ifiélva. 1) Jehová ñandeguerohorýta. 2) Ñande voi ñañevenefisiáta. Por ehémplo, ikatúta jareko amígo verdadéro heta tiémpore. Ha 3) jahupytýta heta vendisión amo gotyove, umíva apytépe ikatúta jaiko pára siémpre. Añetehápe iñimportanteterei hína ñakumpli ko mandáto Jehová omeʼẽ vaʼekue ñandéve: “Pehechauka ojupe mborayhu ifiélva ha pejoporiahuvereko”. w21.11 8 párr. 1, 2

Jahasa jave umi mbaʼe ijetuʼúva, jahechakuaáta imbaretépa ñande jerovia térã nahániri. Oimérõ ehechakuaa ofaltaha ndéve ejeroviave, tahaʼe umi mbaʼe rehasa vaʼekuére yma térã rehasáva hína koʼág̃a, aníkena eñedesanima. Eaprovechákena umi mbaʼe rehasáva emombarete hag̃ua nde jerovia. Eñemboʼe memékena Jehovápe, koʼýte ijetuʼu jave nendive. Ha nemanduʼákena Jehová ikatuha ojevale ne hentekuérare ha ne amigokuérare nepytyvõ hag̃ua. Ehejáramo Jehová tanepytyvõ koʼág̃ama voi, katuete ejeroviavéta hese ha nderedudamoʼãi haʼe nepytyvõtaha avei amo gotyove. Jesús oipytyvõ vaʼekue idisipulokuérape ohechakuaa hag̃ua tekotevẽha ojeroviave. Péro haʼe oikuaa vaʼekue avei, Jehová rupive idisipulokuéra oaguantataha umi mbaʼe ijetuʼuvéva oñepresentátava chupekuéra (Juan 14:1; 16:33). Haʼe oikuaa vaʼekue avei pe aty guasu oaguantataha pe jehasa asy guasu ojerovia mbarete rupi Jehováre (Apoc. 7:9, 14). Nde reiméta ijapytepekuéra eaprovecháramo opa oportunida erekóva koʼág̃a emombarete hag̃ua nde jerovia (Heb. 10:39). w21.11 25 párr. 18, 19

Ñande ningo koʼág̃a nañahaʼarõmoʼãi Jehová ñandeprotehe milagrósamente, péro jaikuaa porã umi ojeroviáva Jehováre ikatutaha oikove pára siémpre. Omanóramo jepe koʼág̃a, Jehová omoingove jeýta chupe. Koʼẽrõitéma tekotevẽta jahechauka añetehápepa jajerovia Jehová ikatutaha ñandesalva. Gog de Magog (pe grúpo de nasión) ñandeataka vove, haʼetéta voi ñandéve haʼekuéra ñandejukapátava. Péro ág̃a upérõ, jajerovia mbarete vaʼerã Jehováre, ha ndajadudái vaʼerã haʼe ñandesalvataha. Chupekuéra g̃uarã ñande jajoguáta umi ovecha ndorekóivape odefende vaʼerã chupekuéra (Ezeq. 38:10-12). Ñande ndajarekói árma ha ndajaikovaikuaái gerrahápe, upévare opensáta hikuái sapyʼaitépe ñanerundipataha. Péro ñande jaikuaa oĩha hetaiterei ánhel ñande jerére ikatu hag̃uáicha ñanedefende, péro ñane enemigokuéra ndoikuaái upéva pórke ndojeroviái Ñandejárare. Upévare tuichaiterei oñesorprendéta hikuái ou vove hetaiterei ánhel ñandesalva hag̃ua (Apoc. 19:11, 14, 15). w22.01 6 párr. 12, 13

Enterove ñane ermáno ha ermanakuéra iñimportánte Jehovápe g̃uarã, upéicharõ ñandéve g̃uarã iñimportánte vaʼerã avei hikuái. Ñande ñaime vaʼerã jajapo hag̃uáicha ikatúva guive japrotehe hag̃ua chupekuéra ha ñañangareko hag̃ua hesekuéra. Ñande jaikuaáramo ñamoñeñandu vai térã ñaofende hague peteĩ ermánope, ndovaléi ñapensa upéva vyroreiha, haʼe ipirepererĩetereiha ha oaprende vaʼerãha ombohasa reínte la ojejapóva hese. ¿Mbaʼéicha rupípa peteĩ ermáno ipochy jepi? Ikatu oime imitãme heta ohasa asy raʼe, ha upéicha rupi ndojeroviaguasúi ijehe térã opensa ndovaleiha mbaʼeverã. Ótro katu oñepyrũ ramónte oservi Jehovápe, ha ndoikuaái gueteri mbaʼépa ojapóta oĩ jave ofalláva hendive. Tahaʼe haʼéva la oiko vaʼekue, ñande ñañehaʼãmbaite vaʼerã jajogueraha porã jey ñane ermanokuérandi. Avei oiméramo peteĩ persóna ipirepererĩ ha ipochypa rei, upéicharõ pe persóna orrekonose vaʼerã upéva haʼeha peteĩ defékto ha okambia vaʼerãha. Haʼe ojapo vaʼerã upéva ovyʼa hag̃ua ha ojogueraha porã hag̃ua ermanokuérandi. w21.06 21 párr. 7

Jesús ningo ontende mbaʼéichapa ñañeñandu. Ñañeñandu vai jave, igústota jarekóramo peteĩ amígo ñanentendéva, koʼýte oimérõ ohasa avei la ñande jahasáva. Peichagua amígo hína Jesús. Haʼe oikuaa porã mbaʼépa heʼise la ñanekangy ha ñaikotevẽ ótro ñanepytyvõ. Jesús ningo oikuaa porã avei mbaʼe mbaʼépepa ñanekangy ha upévare katuete ñanepytyvõta “ñaikotevẽ jave” (Heb. 4:15, 16). Jesús oĩrõ guare pe hardín de Getsemanípe oheja vaʼekue Jehová oipytyvõ chupe pe ánhel rupive, ha ñande upéicha vaʼerã avei. Jehová ikatu hína ojevale peteĩ ansiáno térã ótro ermánore ñanepytyvõ hag̃ua. Térã ikatu avei ñanepytyvõ peteĩ puvlikasión, peteĩ vidéo térã peteĩ diskúrso rupive (Luc. 22:39-44). Jehová omeʼẽta avei ñandéve pyʼaguapy ha ñanemombaretéta. ¿Mbaʼéichapa ojapóta upéva? Ñañemboʼe jave, Jehová omeʼẽ ñandéve pe “pyʼaguapy tuichavéva entéro mbaʼe yvyporakuéra ikatúvagui ontende” (Filip. 4:6, 7). w22.01 18, 19 párr. 17-19

Jehová ningo siémpre odesidi porãta entéro mbaʼe. Péro sapyʼánte ikatu ijetuʼuʼimi ñandéve jajerovia hag̃ua umi ansianokuérare, pórke ikatu hína jaduda oimépa haʼekuéra ojapo hína umi mbaʼe Jehovápe ogustaháicha térã ojapóntepa hína ojaposéva. Péro ñanemanduʼákena ko mbaʼére: Ndaikatúi jaʼe jajeroviaha Jehováre, ndajajeroviáiramo umi haʼe omoĩvare odirihi hag̃ua ipuévlope. Koʼág̃arupi Jehová ojevale ‘pe esklávo de konfiánsa ha iñarandúvare’ ogia hag̃ua iñorganisasión (Mat. 24:45). Ojapo haguéicha pe kuérpo governánte oĩ vaʼekue síglo primérope, koʼág̃arupi pe esklávo de konfiánsa oorganisa Jehová puévlo ha omeʼẽ instruksión umi ansianokuérape. Upéi umi ansiáno ojasegura umi kongregasión osegitaha koʼã instruksión, ha ñande jahechaukáta jajeroviaha Jehováre jasegíramo umi instruksión omeʼẽva iñorganisasión ha umi ansianokuéra. w22.02 4 párr. 7, 8

¡Ñande ningo javyʼaiterei haʼe haguére testígo de Jehová! Upéva ningo peteĩ priviléhio ñandéve g̃uarã. ¡Ha ajépa javyʼaite ñaipytyvõ jave peteĩ ‘ipyʼaporãvape ohupyty hag̃ua jeikove opaveʼỹva’! (Hech. 13:48). Ñañeñandu voi Jesús oñeñandu haguéicha. Haʼe ovyʼaiterei vaʼekue idisipulokuéra omombeʼúrõ guare chupe umi mbaʼe porãite ohasa vaʼekue hikuái predikasiónpe (Luc. 10:1, 17, 21). Apóstol Pablo heʼi vaʼekue Timotéope: “Siémprekena eñatende reiko lájare ha remboʼe lájare”. Ha heʼi chupe mbaʼérepa: “Pórke rejapóramo péicha rejesalváta nde ha avei umi nerendúva” (1 Tim. 4:16). Upéicharõ, umi hénte rekove odepende hína pe predikasiónre. Ñande siémpre ‘ñañatende porã jaiko lájare’ ñaime rupi Ñandejára Rréino poguýpe. Upévare siémpre jajapose umi mbaʼe omombaʼeguasútava Jehovápe, ha ohechaukáva ñamombaʼeha umi notísia porã japredikáva (Filip. 1:27). Avei ‘ñañatende ñamboʼe lájare’ jajeprepara porã jave japredika hag̃ua, ha jajerure jave Jehovápe tañanepytyvõ predikasiónpe. w21.10 24 párr. 1, 2

Peteĩ persóna orekóva “pe kondúkta pyahu” ikatu jaʼe ojoguaha Jehovápe, pórke opensa haʼéicha ha ojapo umi mbaʼe haʼe ojapóva. Peichagua persóna ningo oheja Ñandejára espíritu sánto ogia umi mbaʼe opensáva, oñandúva ha ojapóva. Por ehémplo, haʼe ohayhueterei Jehovápe ha avei iñorganisasión (Mat. 22:36-39). Upe persóna osegi ovyʼa ombohováiramo jepe heta mbaʼe ijetuʼúva (Sant. 1:2-4). Oñehaʼã oĩ hag̃ua pyʼaguapy (Mat. 5:9). Haʼe ipasiénsia hapicháre ha otrata porã enterovépe (Col. 3:13). Ohayhu umi mbaʼe Jehová ohayhúva ha siémpre ojapo iporãva (Luc. 6:35). Umi mbaʼe ojapóvare ojekuaa haʼe ojeroviaitereiha Jehováre (Sant. 2:18). Ha oiméramo algúno ombopochy chupe, haʼe lomímonte osegi trankílo porã ha ojejokokuaa (1 Cor. 9:25, 27; Tito 3:2). Ikatu hag̃uáicha ñamonde peteĩ aóicha pe kondúkta pyahu, jareko vaʼerã entéro umi kualida oñemensionáva Gálatas 5:22, 23-pe, ha avei hetave versíkulo bíblicope. w22.03 8, 9 párr. 3, 4

Umi ansiáno osegíva Pablo ehémplo ndopredikái ogahárupinte, síno siémpre oĩ preparádo opredika hag̃ua oimehápe (Efes. 6:14, 15). Umi ansiáno ikatu voi ojapo apóstol Pábloicha, oaprovecha pe tiémpo ohasáva predikasiónpe ontrena hag̃ua umi ermánope, por ehémplo umi siérvo ministeriálpe (1 Ped. 5:1, 2). Péro umi ansiáno hembiapo hetáramo jepe, oñatende vaʼerã ani hag̃ua umíva hoʼupa chuguikuéra itiémpo ha upéicha rupi ndaikatuvéima osẽ predikasiónpe (Mat. 28:19, 20). Upévare sapyʼánte oñeasigna jave chupekuéra peteĩ mbaʼe heʼímante vaʼerã hikuái ke no. Haʼekuéra opensa porã vaʼerã upe témare ha oñemboʼe Jehovápe. Upéicha ikatu hína ohechakuaa oaseptáramo entéro umi asignasión oñemeʼẽva chupe, ndaikatumoʼãveimaha ojapo ijestúdio de família, osẽ pyʼỹi predikasiónpe, ni omboʼe ifamiliakuérape opredikakuaa hag̃ua. Ikatu oĩ hikuái segúro Jehová ontende porãitereiha haʼekuéra oñehaʼãnteha okumplipa porã entéro umi rresponsavilida orekóva, ha oforsatamaha chupekuéra oasepta jeýrõ ótra asignasión. w22.03 27 párr. 4, 7; 28 párr. 8

¿Ñandépa jakyhyje vaʼekue oiko hag̃ua ñandehegui testígo de Jehová? Ikatu voi ñapensa raʼe: “Che ni mbaʼevéicharõ nasẽichéne apredika”. Térã ikatu oime jakyhyje raʼe ñane hénte ha amigokuéra oñemoĩrõ g̃uarã ñane kóntrape. Oiméramo upéicha, ñande ikatu ñantende mbaʼéichapa oñeñandu ñane estudiánte oiko jave avei hese upéicha. Jesús orrekonose vaʼekue oĩtaha umi hénte okyhyjétava péicha, péro haʼe omokyreʼỹ vaʼekue idisipulokuérape ani hag̃ua okyhyjégui ou ndoservivéi Jehovápe (Mat. 10:16, 17, 27). Ñamboʼe ñane estudiántepe oñeʼẽ hag̃ua ótrondi umi mbaʼe ogueroviávare. Jesús omondórõ guare idisipulokuérape opredika hag̃ua, oiméne okyhyje raʼe hikuái. Péro haʼe oipytyvõ vaʼekue umi idisípulope heʼívo chupekuéra mávape ha mbaʼe mensáhepa opredika vaʼerã (Mat. 10:5-7). ¿Mbaʼéichapa ikatu jasegi Jesús ehémplo? Ñaipytyvõ ñane estudiántepe opensa hag̃ua mávapepa ikatu opredika. Por ehémplo, ikatu ñaporandu chupe: “¿Mávapepa nde ere ikatuha ideprovécho ko mbaʼe omboʼéva la Biblia?”. Upéi ñamboʼe chupe mbaʼépa ikatu heʼi, ha ñañensaja hendive ikatu hag̃uáicha sensillomínte oñeʼẽ upe témare ótrondi. w21.06 6 párr. 15, 16

Oikórõ guare peteĩ terremóto Nepálpe áño 2015-pe, umi hénte ojesalva vaʼekue heʼi koʼã mbaʼe: “Sapyʼaitépe ningo umi negósio ha edifísio tuja oñepyrũ oupaite yvýpe”. “Emañaha gotyonte la hénte ojedesesperapa [...]. Heta hénte heʼi upe yvyryrýi opa hague 2 minútopente, péro chéve g̃uarã haʼete voi kuri la ndopamoʼãiva”. Ñane tiémpope oiko hína avei peteĩ ñembokacha, péro kóva idiferénte pórke Jehová ombokacha hína entéro tetã oĩva ko múndope. Ageo oprofetisa vaʼekue: “Péicha heʼi Jehová, umi ehérsito yvagapegua ruvicha: ‘Koʼẽrõitéma ambokacha jeýta pe yvága ha yvy’” (Ageo 2:6). Pe ñembokacha Ageo oñeʼẽ hague idiferénte hína peteĩ terremótogui, pórke umíva ningo sarambímante ojapo. Péro pe ñembokacha Ageo oñeʼẽ hague oreko rresultádo porã. Jehová voi heʼi vaʼekue: “Ambokacháta kompletoite umi tetãnguéra, ha umi mbaʼe iporãva oĩva entéro tetãme oikéta ko ógape, ha amomimbíta ha ambojajaipáta ko óga”. w21.09 14 párr. 1-3

Jarekoséramo peteĩ amista ótra persónandi, ñañemongeta meme vaʼerã hendive ha ñamombeʼu chupe mbaʼéichapa ñañeñandu. Ha peichaite avei pe amista jarekóva Jehovándi. Ñañemboʼe jave, ha ñamombeʼu chupe umi mbaʼe ñapensáva, ñañandúva ha ñandepyʼapýva, jahechauka hína jajeroviaha hese ha jaikuaaha haʼe ñanderayhuha (Sal. 94:17-19; 1 Juan 5:14, 15). Jahasa vaʼerã avei tiémpo ñane ermanokuérandi. Haʼekuéra ningo peteĩ rregálo oúva Jehovágui (Sant. 1:17). Ñande Ru yvagapegua ohechauka ojepyʼapyha káda únore, omeʼẽvo ñandéve umi ermáno ha ermána haʼéva ñane família ñanderayhúva “tódo el tiémpo” (Prov. 17:17). Pe kárta oskrivi vaʼekuépe umi colosénsepe, apóstol Pablo imanduʼa unos kuánto kristiáno oipytyvõ vaʼekuére chupe, ha heʼi voi hesekuéra: “Tuichaiterei chekonsola hikuái” (Col. 4:10, 11). Jesucristo jepe oikotevẽ vaʼekue iñamigokuérare ha omombaʼeterei haʼekuéra oipytyvõrõ guare chupe, tahaʼe umi ánhel térã umi yvypóra (Luc. 22:43). Ñamombeʼu jave ñane provlemakuéra térã umi mbaʼe ñandepyʼapýva peteĩ ermáno ijerovia mbaretévape, upéva ndeʼiséi ñandejerovia kangyha. Añetehápe upéva ikatu hína ñandeprotehe. w21.04 24, 25 párr. 14-16

¿Mbaʼépa ikatu jajapo peteĩ ermáno ñanelastimáramo? Ñañehaʼãmbaitékena jaiko jey hag̃ua pyʼaguapýpe hendive. Ñamombeʼu Jehovápe mbaʼéichapa ñañeñandu. Jajerure avei chupe tañanepytyvõ jahecha hag̃ua ñane ermánope haʼe ohechaháicha chupe. Por ehémplo, jahechakuaa hag̃ua umi kualida porãite haʼe orekóva ha Jehová oguerohorýva hese (Luc. 6:28). Ha oiméramo ndaikatúi ñambohasa rei upe ojapo vaʼekue ñanderehe, jahecha vaʼerã mbaʼéichapa iporãvéta ñañemongeta hendive. Siémpre iporãve ñapensa ñane ermáno imbaʼeporãha, ha ndahaʼéi hague ñanelastimaséva (Mat. 5:23, 24). Ñañeʼẽ jave hendive, ani ñapensa ñanelastima hague a propósito. ¿Péro mbaʼépa jajapóta pe ermáno ndoikoporãséi jeýramo ñanendive? La Biblia heʼi: “Pesegíkena peñoaguanta”. Upéicharõ, jasegíkena ñanepasiénsia ñane ermánore (Col. 3:13). Ha iñimportantevéva, ani japyta ñandepyʼaro, pórke upéva ikatu ombyai ñane amista Jehovándi. Aníkena núnka jaheja mbaʼeve ñanemoñepysanga, upéicha jahechaukáta jahayhuveha Jehovápe oimeraẽ mbaʼégui (Sal. 119:165). w21.06 23 párr. 15