Julio

Oĩ jave oñemosẽva kongregasióngui, Jehová okorrehi hína upe persónape. Haʼe ojapo upéva oipytyvõ hag̃ua pe ofalla vaʼekuépe, ha avei pe kongregasión kompletoitépe. Kongregasiónpe ikatu oĩ hína umi oñeʼẽ vaíva la odesidi vaʼekuére umi ansiáno, péro nemanduʼákena umichagua persóna ojapoha jepi upéva odefende ha ndohejavaiséiguinte pe mbaʼe vai apohápe. Péro añetehápe ñande ndajaikuaái hína entéro mbaʼe oiko vaʼekue. Upévare iporãve ñakonfia pe odesidi vaʼekuére pe komite hudisiál. Haʼekuéra ningo oñatende porã ojapo hag̃ua la Biblia heʼíva, ha ohusga hag̃ua “Jehovápe g̃uarã” (2 Crón. 19:6). Nde reapojáramo umi ansiáno odesidi vaʼekue, añetehápe ikatu hína reipytyvõ pe oñemosẽ vaʼekuépe oñemoag̃ui jey hag̃ua Jehováre. Elizabeth heʼi: “Ijetuʼuetereíngo kuri chéve ani hag̃ua añekomunika che membykariaʼy oñemosẽ vaʼekuéndi. Péro haʼe ou jey rire Jehovápe, orrekonose omerese hague voi oñemosẽ. Tiémpo rire, haʼe heʼi omombaʼetereiha umi mbaʼe oaprende vaʼekue”. w21.09 28, 29 párr. 11, 12

Ñapensamína pe viúdare. Haʼéngo katuete omeʼẽséne raʼe Jehovápe hetave mbaʼe, péro haʼe ojapo pe ikatumíva ha omeʼẽ Jehovápe pe iporãvéva orekóva. Ha Jesús oikuaa porã vaʼekue Itúa ovaloraiterei hague pe viudami kontrivusión. Upéva ñanemboʼe peteĩ mbaʼe iñimportantetereíva: Jehová oguerohoryha ñameʼẽ jave chupe pe iporãvéva jarekóva, térã jaservi jave chupe ñande pyʼaite guive ha ñande rekove kompletoite reheve (Mat. 22:37; Col. 3:23). ¡Jehová ningo ovyʼaiterei ohecha jave jajapoha opa ikatúva iservísiope! Umívape oike pe tiémpo ha pe mbaretekue jaipurúva jaadora hag̃ua chupe, por ehémplo japredikávo ha jahávo rreunionhápe. ¿Mbaʼéichapa ikatu ñamoĩ en práktika umi mbaʼe ñaaprendéva pe viudamígui ñaipytyvõ hag̃ua ótrope? Ñapensamína umi ermáno ikatúvape omokyreʼỹ jaʼéramo chupekuéra Jehová oguerohoryetereiha umi mbaʼe ojapóva iservísiope. Ikatu oime jaikuaa peteĩ ermána ijedáva ha hasykatúmavape. Haʼe naimbaretevéima ha ndaikatuvéima osẽ predikasiónpe ymave guaréicha. Upéicha rupi haʼe oñeñandu kulpávle ha opensa ndovaleveimaha mbaʼeverã. w21.04 6 párr. 17, 19, 20

Jehová ningo oikuaa mbaʼe moméntopepa opyta porãvéta ohundi hag̃ua ko múndo aña. Haʼe ipasiénsia rupi, koʼág̃a oñembyatýma peteĩ aty guasu oĩháme millones oadoráva ha ombotuicháva chupe. Enterove haʼekuéra oagradeseterei Jehovápe oaguanta haguére hetaite tiémpoma. Upéicha rupi, haʼekuéra oguereko jepe la oportunida onase hag̃ua, oikuaa ha ohayhu Ñandejárape, ha upe rire odesidi hikuái oñemeʼẽ ha oservitaha chupe. Amo gotyove Jehová ohechaukáta ojapo porã hague odesidírõ guare oaguanta, upéva oikóta haʼe ovendesi vove umi millones oaguanta vaʼekue ipahaite peve. Jepe Satanás hetáma oporomoakã rasy ha oporombosufri, Ñandejára lomímonte osegi ovyʼa (1 Tim. 1:11). Ñande avei ikatu jasegi javyʼa ha ñanepasiénsia ñahaʼarõ aja Jehová osantifika héra, odefende pe derécho orekóva ogoverna hag̃ua, ha oipeʼaite opaichagua mbaʼe vai ha provléma jarekóva koʼág̃a. Jajedesidíkena jasegitaha ñaaguanta, ha ani ñanderesarái ñande Ru yvagapegua oaguantaha avei hína. w21.07 13 párr. 18, 19

Heta hénte Jesús tiémpope guare orrechasa vaʼekue chupe. Chupekuéra g̃uarã Jesús haʼe vaʼekue peteĩ karpintéro mboriahumi raʼýnte. Hiʼarive haʼe okakuaa vaʼekue Nazarétpe, peteĩ siuda hetápe g̃uarã naiñimportanteguasúiva. Natanaélgui oiko vaʼekue Jesús disípulo, péro haʼe jepe ñepyrũrã heʼi vaʼekue: “¿Nazarétgui piko ikatu osẽ álgo iporãva?”. Chupe oiméne ndogustái raʼe pe siuda Jesús okakuaa hague. Térã opensáne raʼe pe profesía oĩvare Miqueas 5:2-pe, upépe ningo ojeprofetisáma vaʼekue pe Mesías onaséta hague Belénpe, ndahaʼéi Nazarétpe. Proféta Isaías heʼíma vaʼekue voi Jesús enemigokuérape nointeresamoʼãiha “máva familiarépa” haʼe, térã moõguipa ou (Is. 53:8). Haʼekuéra oñemotiémpo vaʼerã kuri oinvestiga hag̃ua koʼã mbaʼe. Ojapórire upéicha, opilláta kuri hikuái Jesús onase hague Belénpe ha haʼeha rréi David familiare (Luc. 2:4-7). Jesús ningo onase vaʼekue pe lugár ojeprofetisa haguépe Miqueas 5:2-pe. ¿Mbaʼépa raʼe upéicharõ la provléma? Umi hénte pyaʼeterei ohusga Jesúspe oikuaa porãʼỹre umi mbaʼe oiko vaʼekue. Upéicha rupi oñepysanga hikuái ha ndojeroviái hese. w21.05 3 párr. 4-6

La Biblia ohechauka oĩ hague avei umi oaseptáva umi konsého ha upéicha rupi heta Jehová ovendesi chupekuéra. Ñapensamína por ehémplo Job rehe. Haʼe ningo ojerovia vaʼekue Jehováre péro iñimperfékto vaʼekue, ha upéicha rupi heʼi vaʼekue heta mbaʼe noiporãiva. Upévare peteĩ vuéltape tekotevẽmante kuri okorrehi chupe Elihú ha avei Jehová. ¿Ha mbaʼéichapa orreaksiona raʼe Job? Haʼe heʼi vaʼekue: “Che ningo ndaikuaáiguinte añeʼẽ kuri. [...] Ambyasyeterei la haʼe vaʼekue ha atĩ apytávo. Koʼág̃a aguapy yvýpe tanimbu apytépe, ahechauka hag̃ua añarrepentiha” (Job 42:3-6, 12-17). Job ohechauka iñumildeha ohendúrõ guare la konsého Elihú omeʼẽ vaʼekue chupe, hiʼarive haʼe imitãitereive kuri Jóbgui. Ha Jehová ovendesi chupe la péicha ojapo rupi (Job 32:6, 7). Ñaneumílderamo jaaseptáta avei umi konsého oñemeʼẽva ñandéve ñapensáramo jepe nañaikotevẽi hague upéva, térã katu la persóna omeʼẽva ñandéve pe konsého imitãvéramo ñandehegui. Ñarrekonose vaʼerã enterovéva tekotevẽha jasegi japrogresa jahechauka hag̃ua umi kualida oúva Jehová espíritugui, ha jajapo porãve hag̃ua la haʼe omandáva ñandéve. w22.02 11 párr. 8; 12 párr. 12

Enterove ningo jareko la rresponsavilida oĩ hag̃ua pyʼaguapy kongregasiónpe ha jahechauka hag̃ua jajoayhuha, péicha avave noñandumoʼãi oñemboykeha chupe. ¡Tuichaiterei ningo ikatu omokyreʼỹ ótrope umi mbaʼe jaʼe ha jajapóva! ¿Mbaʼéichapa ikatu ñaipytyvõ umi ermáno orekóvape ihentekuéra ndahaʼéiva Testígo oñandu hag̃ua orekoha peteĩ lugár kongregasiónpe? Ñañehaʼã ñañamiga umi ipyahúvare kongregasiónpe. Ñepyrũrã ikatu torýpe jarresivi chupekuéra (Rom. 15:7). Péro ndahaʼéi jasaluda porãsénteva chupekuéra. Ñande jaipota oiko chuguikuéra ñane amigoite. Upévare ñaneamávle vaʼerã ha jahechauka añetehápe jajepyʼapyha hesekuéra. Ñaporanduʼỹre peteĩ mbaʼe omoñeñandu vaítava chupekuéra, ñañehaʼã ñantende umi mbaʼe ohasáva hikuái. Algúnope ikatu hína ijetuʼu omombeʼu hag̃ua mbaʼéichapa oñeñandu, upévare aníkena jajopy chupekuéra oñeʼẽ hag̃ua umi mbaʼére. Upéva rangue, mborayhúpe ñaporandu umi mbaʼe ndohejavaimoʼãiva chupekuéra, ha trankílo porã jajapysaka umi mbaʼe heʼívare hikuái. Por ehémplo, ikatu ñaporandu chupekuéra mbaʼéichapa oikuaa raʼe Jehovápe. w21.06 11 párr. 13, 14

Ñandéve g̃uarã ningo peteĩ priviléhio jaservi oñondivepa Jehovápe ‘peteĩ ovecha atýicha’, oĩva “peteĩ pastór” poguýpe. Pe lívro Pe organisasión ojapóva Jehová volunta, páhina 165-pe heʼi: “Oikóvo ñandehegui testígo de Jehová vautisádo, ñande jaike ko família tuichaitévape. Upévare enterove jareko pe rresponsavilida ñaipytyvõvo siémpre ojeiko hag̃ua peteĩ ñeʼẽme”. Upéicharõ, “ñañehaʼãmbaite vaʼerã jahecha ñane ermanokuérape Jehová ohechaháicha chupekuéra”. Jehovápe g̃uarã enterove jajogua “mitãme”, ha haʼe ñanderayhueterei. Ñande upeichaite avei jahecha vaʼerã ñane ermanokuérape. Jehová ohecha ha omombaʼe entéro mbaʼe jajapóva ñaipytyvõ ha jakuida hag̃ua hesekuéra (Mat. 10:42). Ñande ningo jahayhueterei ñane ermáno ha ermanakuérape. Upévare jajedesidíma nañalastimamoʼãiha ni “ndajajapomoʼãiha mbaʼeve ikatúva omoñepysanga ñane ermánope ni mbaʼeve omokangýva ijerovia” (Rom. 14:13, nóta). Ñandéve g̃uarã ningo ñane ermáno ha ermanakuéra tuichave ñandehegui, ha ñaperdonase chupekuéra ñande pyʼaite guive. Aníkena jaheja ñanemoñepysanga umi ótro ojapóva. Upéva rangue, “jasegíkena jajapo entéro mbaʼe ikatúva oipytyvõ oĩ hag̃ua pyʼaguapy ha omombaretétava ñane ermanokuérape” (Rom. 14:19). w21.06 24 párr. 16, 17

Jastudia porãramo ha jasegi umi konsého omeʼẽva ñandéve la Biblia ha Jehová organisasión, mbeguekatúpe jajoguavéta jahávo Crístope ha jaikuaa porãvéta Ñandejárape. Peteĩ ehémplo rupive, Jesús omyesakã vaʼekue pe mensáhe oñeʼẽva pe Rréinore ojoguaha peteĩ semílla michĩvape. Upe semílla heñói ha mbeguekatúpe okakuaa ohóvo umi ipyʼaporãva korasõme. Haʼe heʼi: “Pe semílla heñói ha okakuaa ohóvo, péro haʼe [pe agrikultór] ndoikuaái mbaʼéichapa oiko upéva. Mbeguekatúpe ijehegui voi pe yvy omoheñói pe semílla. Primerorã osẽ hakã, upéi ijespíga ha ipahápe hiʼajúma” (Mar. 4:27, 28). Jesús omyesakã peteĩ plánta okakuaaháicha mbeguekatúpe, umi persóna ogueroviáva pe mensáhe oñeʼẽva Ñandejára Rréinore okambiaha avei ohóvo mbeguekatúpe. Por ehémplo, ñane estudiánte de la Biblia oñemoag̃uívo ohóvo Jehováre, ñande ñañepyrũ jahecha haʼe ojapoha heta kámbio iporãva hekovépe (Efes. 4:22-24). Péro ñanemanduʼa vaʼerã Jehová haʼeha hína pe omongakuaáva pe semílla michĩetéva. w21.08 8, 9 párr. 4, 5

La Biblia heʼi mbaʼépa ñanepytyvõta javyʼa hag̃ua. Peteĩ persóna ‘odisfrutáva umi mbaʼe ikatúva ohecha’ omombaʼe la orekóva, ha ovyʼa umi mbaʼe ikatúvare ojapo asegún pe situasión orekóva koʼág̃a. Péro peteĩ persóna ‘oipotáva umi mbaʼe ndaikatumoʼãiva ohupyty’ núnka noñekontentái, ha osegi odesea umi mbaʼe ndaikatúiva oreko. ¿Mbaʼépa ñanemboʼe upéva? Javyʼa hag̃ua, ñapensa meme vaʼerãha umi mbaʼe jarekóvare ha umi méta si ikatúvare jahupyty. ¿Añetehápe piko ikatu javyʼa umi asignasión jarekóvare koʼág̃a? Heta hénte opensa ndaikatumoʼãiha, pórke ñande ñaaprendese ha jajapose jepi umi mbaʼe pyahu. Péro añetehápe ikatu hína javyʼa umi mbaʼe jarekóvare koʼág̃a. ¿Mbaʼéichapa ikatu jajapo upéva? Jaikuaa hag̃ua ikatu ñaanalisa pe ehémplo Jesús oipuru vaʼekue Mateo 25:14-30-pe, ha jahecha mbaʼéichapa ikatu javyʼa ha mbaʼépa ikatu jajapo javyʼave hag̃ua umi asignasión jarekóvare koʼag̃aite. w21.08 21 párr. 5, 6

Jehová ningo ojepyʼapyeterei ‘umi oñeñandúvare yvýre’. Ha enterove ikatu ñaipytyvõ umi ermáno ha ermanakuéra oñeñandúvape péicha, ndahaʼéi umi ansianokuérante. Upearã ikatu jahechauka añetehápe jajepyʼapyha hesekuéra. Jehová ningo oipota voi jaikuaauka koʼã ermánope mbaʼeichaitépa haʼe ohayhu chupekuéra (Prov. 19:17). Ikatu avei ñaipytyvõ koʼã ermánope ñaneumíldevo ha ndajaikóivo jasovra umi mbaʼe jajapokuaávare. Ñande ndajaikoséi ñañemoimportánte, pórke upéva káusare ñane ermanokuéra ikatu oñepyrũ iñenvidióso. Upéva rangue, jaipurúkena umi avilida jarekóva ha umi mbaʼe jaikuaáva ñañomokyreʼỹ hag̃ua (1 Ped. 4:10, 11). Jesús ningo otrata porã vaʼekue idisipulokuérape, ha ñande ikatu ñaaprende iñehémplogui. Haʼéngo pe kuimbaʼe iñimportantevéva oiko vaʼekue ko yvy ape ári. Upéicharõ jepe, ‘haʼe ndaipochyreíri ha iñumílde ipyʼaite guive’ (Mat. 11:28-30). Haʼe omboʼérõ guare la héntepe omboʼe sensillomínte, ha oipuru umi ehémplo ndahasýiva oñentende hag̃ua ha og̃uahẽva umi iñumíldeva korasõme (Luc. 10:21). w21.07 23 párr. 11, 12

Ñañehaʼãkena ñande voi ñañemboja umi ijedávare ha ñañemongeta hendivekuéra. Ikatu ningo añete ndohechaporãvéima hikuái, oguataʼipaitéma ha oñeʼẽ mbegueve, péro ipyʼapýpe haʼekuéra imitã gueteri, ha ojapóma heta mbaʼe Jehová “imanduʼa porã” hag̃ua hesekuéra (Ecl. 7:1). Ñanemanduʼákena mbaʼérepa Jehová omombaʼete ha hakateʼỹete hesekuéra. Upévare, jasegíkena javalora koʼã ermánope. Ñande ningo jajoguase Eliséope. Haʼe ningo oinsisti vaʼekue Elíaspe opyta hag̃ua hendive pe último día oĩtahápe hikuái oñondive, ha 3 vése voi heʼi chupe: “Che ndorohejamoʼãi” (2 Rey. 2:2, 4, 6). Jahechaukákena añetehápe ñañeinteresaha umi ijedávare, ha mborayhúpe ñambaʼeporandu chupekuéra (Prov. 1:5; 20:5; 1 Tim. 5:1, 2). Por ehémplo, ikatu ñaporandu chupekuéra: “¿Mbaʼépa ndéve nekonvense rakaʼe kóva haʼeha la verda? ¿Mbaʼéichapa nemoag̃uive raʼe Jehováre umi mbaʼe rehasa vaʼekue? ¿Mbaʼépa ndéve nepytyvõ raʼe resegi hag̃ua vyʼápe reservi Jehovápe?” (1 Tim. 6:6-8). Upéi jajapysaka porã hesekuéra okasea jave ñandéve umi mbaʼe ohasa vaʼekue hikuái. w21.09 5 párr. 14; 7 párr. 15

Ñañehaʼãmbaite jave ñakumpli pe mandáto japredika ha jajapo hag̃ua disípulo, jahechauka hína jahayhuha Ñandejárape (1 Juan 5:3). Ñapensamína ko mbaʼére: Pe mborayhu ñañandúva Jehováre ñanemomýima japredika hag̃ua la héntepe. ¿Ifásilpa raʼe ñandéve jajapo upéva? Oiméne nahániri. ¿Ñanemanduʼápa mbaʼéichapa ñañeñandu raʼe ñasẽrõ guare primera ves japredika? Katuete oiméne jakyhyje ha ñanenervióso raʼe, ¿ajépa? Péro jaikuaa avei upéva haʼeha pe traváho Jesús oipota vaʼekue jajapo, ha upévare ñakumpli upe mandamiénto. Oiméne japredika rire peteĩ tiémpore, ifasilvéma ñandéve jajapo hag̃ua upéva. ¿Péro mbaʼéichapa ñañeñandu jaikuaávo jajapo vaʼerãha estúdio bíblico? ¿Ñandépa ñanenervióso ñapensa haguénte voi upévare? Ikatu oime upéicha hína. Péro ñañemboʼéramo Jehovápe ha jajerure chupe tañanembopyʼaguasu jaofrese hag̃ua peteĩ estúdio bíblico, haʼe katuete ñanepytyvõta jajapose hag̃ua disípulo. w21.07 3 párr. 7

Yma ningo umi esklávope oñemarka vaʼekue ojekuaa hag̃ua mávapa la ijára. Upéicha avei, koʼág̃arupi oñehaʼarõ enterove hénte oreko peteĩ márka ohechaukáva mávapepa oapoja hikuái. Ha umi hénte ohechauka hína umi mbaʼe opensáva ha ojapóva rupive, oapojaha umi goviérnope ha haʼekuéra haʼeha la ijára. ¿Ñandépa jaaseptáta upe márka ha jaapojáta umi goviérnope? Umi orrechasáva upe márka ningo heta ohasa asýta ha ojapeligráta. Pe lívro de Apocalipsis omombeʼu voi: “Umi ndorekóiva pe márka ndaikatumoʼãi ojogua mbaʼeve ni ovende, síno umi orekóva pe márka añoite” (Apoc. 13:17). Péro Ñandejára puévlo oikuaa mbaʼépa Jehová ojapóta umi orekóvare pe márka (Apoc. 14:9, 10). Upévare, oasepta rangue hikuái upe márka, umi mbaʼe ojapóva rupive haʼekuéra haʼetévaicha oskrivíva ipóre: “Che Jehová mbaʼe hína” (Is. 44:5). Koʼág̃a hína la tiémpo jajasegura hag̃ua ñandefieltaha Jehovápe toiko la oikóva. Jajapóramo upéicha, Jehová vyʼápe heʼíta ñanderehe ñande haʼeha imbaʼe. w21.09 18 párr. 15, 16

Ñakumpli porã hag̃ua ñane rembiapo, jaasepta vaʼerã ótro ñanepytyvõse jave. Por ehémplo, apóstol Pablo omboʼe vaʼekue Timotéope mbaʼéichapa opredika ha oporomboʼe vaʼerã, ha omokyreʼỹ Timotéope oipytyvõ hag̃ua avei ótrope upéicha (1 Cor. 4:17). Oiko haguéicha Timotéore, ñandéve avei ikatu ñanepytyvõ umi ermáno ikatupyrýva ha iñexperiénsiava oĩva ñane kongregasiónpe. Avei ñañemboʼe vaʼerã Jehovápe ha jajerure chupe tañanepytyvõ. Japredikáta jave jajerurékena Jehovápe tañandegia. Ijespíritu sánto ipoderosoitéva nañanepytyvõiramo ñande ndaikatumoʼãi jajapo mbaʼeve (Sal. 127:1; Luc. 11:13). Ñañemboʼe jave, ñamombeʼu porãkena Jehovápe mbaʼéichapa jaipota haʼe ñanepytyvõ. Por ehémplo, jajerure chupe tañanepytyvõ jatopa hag̃ua umi hénte ipyʼaporãva ha ohenduséva pe mensáhe. Ñañemotiémpo vaʼerã avei jajapo hag̃ua ñande estúdio personál. Ñandejára Ñeʼẽ heʼi: “Peikuaa porã Ñandejára volunta iporãva, haʼe oguerohorýva ha ndorekóiva defékto” (Rom. 12:2). Jajapo jave ñande estúdio personál jaikuaa porãve jahávo Jehovápe. Ha upéi ñañeʼẽ jave ótrondi Ñandejárare, upe persóna ohechakuaáta ñande añetehápe jagueroviaha umi mbaʼe jaʼéva. w21.05 18 párr. 14-16

Ikatu oime ñande jastudia hína la Biblia peteĩ persónandi, ñañehaʼãmbaite ñamboʼe porã chupe ha heta ñañemboʼe hese. Péro haʼe lomímonte ndojapói umi mbaʼe oaprendéva, ha jahejámante vaʼerã chupe. Térã ikatu oime núnka nañaipytyvõiva peteĩ persónape oprogresa ha ojevautisa hag̃ua. ¿Ñañeñandu vaʼerãpa kulpávle upe haguére, ha ñapensa Jehová ndoguerohoryiha umi mbaʼe jajapóva predikasiónpe? Jahechakuaa vaʼerã mbaʼépa Jehová oreko enkuénta heʼi hag̃ua ñakumpli porãha hína la ñane rembiapo. Haʼe ningo ohecha mbaʼeichaitépa ñañehaʼã ha nañañentregaiha. Ñande ñañehaʼãmbaitéramo predikasiónpe ha jajapóramo upéva mborayhúpe, Jehovápe g̃uarã ñande jajapo porã hína ñane rembiapo, umi hénte nañanerenduséiramo jepe. Pablo oskrivi vaʼekue: “Ñandejára ningo ihústo hína ha ndahesaraimoʼãi umi mbaʼe pejapo vaʼekuégui ha mbaʼéichapa pehayhu héra. Peẽ pehechauka koʼã mbaʼe pesegívo peservi umi ermánope, yma guive koʼág̃a peve” (Heb. 6:10). Ndajarekóiramo jepe rresultádo porã predikasiónpe, Jehová lomímonte imanduʼa umi mbaʼe jajapo vaʼekuére ha mbaʼéichapa jahayhu chupe. Upévare ikatu jaʼe oñekumpliha avei ñanderehe umi mbaʼe Pablo heʼi vaʼekue pe téxto koestediaguápe. w21.10 25 párr. 4-6

Jahechakuaa Jesús imbaʼeporã ha ohayhu hague idisipulokuérape pe otrata lájare chupekuéra. Haʼe oikuaa vaʼekue káda uno situasión idiferenteha ha avei umi avilida orekóva. Avei oikuaa ndaikatumoʼãiha enterove okumpli la mísma rresponsavilida, térã iguápo predikasiónpe peteĩchapa. Upéicharõ jepe, haʼe omombaʼeterei vaʼekue umi mbaʼe ojapóva káda uno ipyʼaite guive. Jesús ohechauka ontendeha chupekuéra pe ehémplo oñeʼẽvape umi monéda de plátare. Upe ehémplope pe patrón omeʼẽ itravahorã káda esklávope asegún ‘pe ikatúva okuida porã’. Mokõi esklávo ningo iguapoiterei, péro peteĩva ogana hetave pe ótrogui. Upéicharõ jepe, pe patrón oguerohory mokõivévape heʼívo: “Oĩ porãiterei la rejapóva. Nde ningo peteĩ esklávo de konfiánsa ha ndeguápo” (Mat. 25:14-23). Ñandetrata lájare, Jesús ohechauka imbaʼeporã ha ñanderayhuha. Haʼe oikuaa káda uno situasión idiferenteha ha avei umi avilida jaguerekóva, ha ovyʼa ñandereheve jajapo jave pe iporãvéva. ¿Mbaʼéichapa ikatu jasegi Jesús ehémplo? Ikatu jajapo upéva jatrata porãvo ñane ermanokuérape. w21.07 23 párr. 12-14

David ndahaʼéi vaʼekue la siémpre oiporiahuverekóva hapichápe. Por ehémplo, Nabal haʼe vaʼekue peteĩ kuimbaʼe ijarheletereíva, ha ojaʼo vaipa David soldadokuérape nomeʼẽséi rupi chupekuéra hoʼumi vaʼerã. Upéva omorrenegaiterei Davídpe, ha odesidi voi ojukataha Nabálpe ha entéro kuimbaʼe oĩvape hógape. Péro Abigaíl, haʼéva Nabal rembireko, imbaʼeporã ha ipasiénsia, ha pyaʼe ohecha oñemeʼẽ hag̃ua hiʼupy David umívape. Upéicha rupi David ndojukái Nabálpe ni umi ótro kuimbaʼépe (1 Sam. 25:9-22, 32-35). David ningo ipochyetereírõ guare odesidi Nabal ha umi hogaygua omereseha omano. Upe rire pyaʼe porã avei odesidi ojejuka vaʼerãha pe kuimbaʼe Natán istóriape guarépe. Péro David ningo haʼe vaʼekue peteĩ kuimbaʼe ipyʼaporãva. ¿Mbaʼére piko upéicharõ la ipyʼahatãite raʼe ohusgárõ guare pe mondahápe? Ñantende hag̃ua, ñapensami mbaʼépa haʼe ohasa vaʼekue upe moméntope. Upérõ ningo omolesta hína kuri chupe la ikonsiénsia. Peteĩ persóna ojepokuaáramo ipyʼahatãiterei oporohusga jave, upéva heʼise noĩporãiha Jehová renondépe. w21.10 12 párr. 17, 18; 13 párr. 20

Pe téxto koestediagua ñanemboʼe ñande ikatuha ñanepotĩ ha ñanesánto Jehováicha, ha haʼe ohaʼarõ voi ñandehegui upéva. Péro ikatu hína ñapensa imposivleha jajapo upéva ñaneimperfékto rupi. Apóstol Pedro voi ningo heta vése ojavy vaʼekue, péro iñehémplo ñanemboʼe ñande ikatuha ñanesánto. ¿Mbaʼéichapa la hénte oñeimahina oñekomportaha peteĩ persóna sánta? A lo mehór opensa haʼeha peteĩ persóna oñemonde diferentepáva ha hova santurrón guasúva. Péro upéva ningo ndaupéichai, pórke Jehová ningo sántonte avei péro la Biblia heʼi haʼe ovyʼaha (1 Tim. 1:11). Ha haʼe oipota avei isiervokuéra ovyʼa (Sal. 144:15). Jesús ningo okondena vaʼekue voi umi fariséope, pórke haʼekuéra oñemonde diferentepa ha oiko oñembohústo guaʼu ojechauka hag̃uánte (Mat. 6:1; Mar. 12:38). ¿Péro mbaʼépa ñapensa ñande kristianokuéra? Jaikuaa hag̃ua oimépa peteĩ persóna sánto hína Jehová renondépe, ñande jareko enkuénta la Biblia heʼíva, ha ndahaʼéi umi hénte heʼíva. Ñande ningo jaikuaa porã Jehová ñanderayhuetereiha. Upévare ñaĩ segúro haʼe núnka nomandamoʼãiha ñandéve peteĩ mbaʼe ndaikatumoʼãiva jajapo. w21.12 2 párr. 1, 3

Jehová imbaʼeporãiterei rupi omeʼẽma ñandéve heta rregálo, péro umíva apytégui pe iñimportantevéva hína pe kapasida jarekóva jaadora hag̃ua chupe. Ha ñande jahechauka hína jahayhuha Jehovápe ‘ñakumplívo imandamientokuéra’ (1 Juan 5:3). Peteĩva umi mandamiénto Jehová oipotáva ñakumpli haʼe hína pe omeʼẽ vaʼekue Jesús rupive: Jajapo disípulo ha javautisa chupekuéra (Mat. 28:19). Jesús omanda vaʼekue avei ñandéve jajoayhu hag̃ua (Juan 13:35). Jehová ningo vyʼápe orresivíta umi okumplívape imandamientokuéra oĩ hag̃ua ifamília tuichaitévape (Sal. 15:1, 2). Ñande ningo jahayhu vaʼerã ñande rapichakuérape. Pe kualida iñimportantevéva Jehová orekóva ningo haʼe hína pe mborayhu (1 Juan 4:8). Jehová ohechaukáma vaʼekue ñanderayhuha jaikuaa mboyve jepe chupe (1 Juan 4:9, 10). Ñande ningo jasegi hína iñehémplo jahayhu jave ñande rapichakuérape (Efes. 5:1). Ñaipytyvõ jave umi héntepe oikuaa hag̃ua Jehovápe oĩ aja gueteri tiémpo, jajapo hína pe iporãvéva jahechauka hag̃ua jahayhuha chupekuéra (Mat. 9:36-38). Upéicha, ñameʼẽ chupekuéra la oportunida oĩ hag̃ua Ñandejára famíliape. w21.08 5, 6 párr. 13, 14

Jesús ningo ohayhueterei vaʼekue Jehovápe, upéicha rupi oĩ vaʼekue ojapo hag̃uáicha oimeraẽ mbaʼe hesehápe ha avei ñanderehehápe (Juan 14:31). Oĩrõ guare ko yvy ape ári, Jesús ohechauka vaʼekue ohayhuetereiha umi héntepe. Por ehémplo, haʼe siémpre otrata porã vaʼekue enterovépe ha oiporiahuvereko chupekuéra, umi iñenemigokuérape jepe. Haʼe ohechauka vaʼekue avei ohayhuha umi héntepe omombeʼúvo chupekuéra umi notísia porã oñeʼẽva Ñandejára Rréinore (Luc. 4:43, 44). Ha Jesús ohechauka vaʼekue avei ohayhuetereiha Itúape ha ñanderayhuha ñandéve avei, oĩrõ guare dispuésto omano asývo ñanderehehápe ha péicha omeʼẽ ñandéve la oportunida jaiko hag̃ua pára siémpre. Ñande ningo jahayhueterei Jehovápe, ha upéicha rupínte ñañemeʼẽ vaʼekue chupe ha jajevautisa. Péro jahechauka vaʼerã jahayhuha Jehovápe jahayhúvo ñande rapichakuérape, Jesús ojapo haguéicha. Apóstol Juan heʼi vaʼekue voi: “Pe ndohayhúiva iñermáno ohechávape, ndaikatúi ohayhu Ñandejára ndohecháivape” (1 Juan 4:20). w22.03 10 párr. 8, 9

Igustoiterei ningo jahasa tiémpo Jehovándi, péro sapyʼánte upéva ijetuʼu. Enterovévanteko jareko jajapo vaʼerã, ha upévare ikatu ijetuʼu hína ñandéve jadedika hag̃ua tiémpo Jehovápe. Oĩ heta mbaʼe hoʼúva ñandehegui ñane tiémpo ha ndaikatúiva ñambotapykue. Por ehémplo ñambaʼapo vaʼerã, jareko tembiapo ogapypegua, jakuida vaʼerã ñane famíliare, ha hetave mbaʼe. Upévare sapyʼánte ñañandu jepi ndajarekoveimaha tiémpo ñañemboʼe hag̃ua, jastudia hag̃ua térã jajepyʼamongeta hag̃ua. Oĩ avei hetave mbaʼe ikatúva hoʼupa ñandehegui ñane tiémpo japillaʼỹetére, ha upéicha rupi ndajarekovéima tiémpo ñañemoag̃ui hag̃ua Jehováre. Por ehémplo, ñapensamíntena umi mbaʼe jajapóvare jajediverti hag̃ua. Ndaivaíri jajediverti sapyʼapyʼa, iporã voi katu upéva ñandéve g̃uarã. Péro umi mbaʼe jajapóva jajediverti hag̃ua ikatu hoʼupa ñandehegui ñane tiémpo ha nañanetiempovéima Jehovápe g̃uarã. Igústoko jajediverti mimi, ñanemanduʼánte vaʼerã upéva ndahaʼeiha la iñimportantevéva (Prov. 25:27; 1 Tim. 4:8). w22.01 26 párr. 2, 3

Jehová omanda vaʼekue umi israelítape ohayhu hag̃ua enterovévape, ha ndahaʼéi sólamente umi ótro israelítape. Por ehémplo haʼe oipota kuri haʼekuéra ohayhu avei umi extranhéro oikóvape upépe. Upéva ohechauka porã la heʼíva Levítico 19:33, 34. Haʼekuéra ningo otrata vaʼerã umi extranhérope haʼeramoguáicha peteĩ israelita ha ohayhu vaʼerã chupekuéra. Jehová omanda vaʼekue voi umi israelítape okosecha vove umi mbaʼe orekóva ikokuépe, oheja vaʼerãha algúna kósa ikatu vaʼerã ombyaty umi imboriahúva ha avei umi extranhéro (Lev. 19:9, 10). ¿Mbaʼépa ñande kristiáno ikatu ñaaprende upéva pe léigui? (Luc. 10:30-37). A lo mehór ko léi ikatu ñanepytyvõ ñapensa hag̃ua umi inmigrántere, ikatu voi oĩ algúno pe nde reikohárupi. Ko léi ñanemboʼe iñimportantetereiha jatrata porã chupekuéra. w21.12 12 párr. 16

Amáske jaheja Jehová ñandegia, japilla porãvétantema haʼe ikatutaha ñandesalva amo gotyove. Jajeroviámante vaʼerã Jehováre ikatu hag̃uáicha jajerure permíso ñane patrónpe jaha hag̃ua peteĩ aty guasúpe, térã jaʼe hag̃ua chupe ndaikatuichénepa saʼimie ñambaʼapo ikatu hag̃uáicha jaha rreunionhápe ha japredikave hag̃ua. Péro ñamoĩ chupe ne patrón nomeʼẽseiha ndéve permíso ha nemosẽha. ¿Ejeroviátapa Jehová nanderejamoʼãiha ha omeʼẽtaha ndéve la reikotevẽva? (Heb. 13:5). Umi oservíva de tiémpo kompléto, ikatu omombeʼu heta experiénsia ohechaukáva Jehová oipytyvõ hague chupekuéra oikotevẽve jave hikuái. Jehová núnka ndohejareíri chupekuéra. Jehová oĩramo ñande ykére ndaipóri ñanemongyhyje vaʼerã, ni umi mbaʼe oikótava amo gotyove. Ñandejára Jehová ndahesaraimoʼãi ñandehegui ñamotenondéma guive Irréino ñande rekovépe. w22.01 7 párr. 16, 17

¿Mbaʼéicha javépa ikatu hína ijetuʼu ñandéve jaapoja hag̃ua la odesidi vaʼekue umi ansiáno? Oiméramo oñemosẽ raʼe kongregasióngui peteĩ jahayhúva, ikatu ñapensa umi ansiáno ndorekói hague enkuénta entéro mbaʼe, ha ndohusgái hague upe persónape Jehová ojapotaháicha. ¿Péro mbaʼépa ñanepytyvõta lomímonte jarrespeta hag̃ua la odesidi vaʼekue umi ansiáno? Ñanemanduʼa vaʼerã Jehová voi heʼiha oñemosẽ vaʼerãha umi pekadór noñarrepentírivape. Upéva ningo oipytyvõta upe persónape voi, ha avei pe kongregasión kompletoitépe. ¿Mbaʼérepa jaʼe upéva? Pórke peteĩ ermáno opekáramo ha noñarrepentíri, ha lomímonte opyta pe kongregasiónpe, ikatu hína oraha vai umi ótrope (Gál. 5:9). Avei noñemosẽiramo chupe, haʼe ndohechakuaamoʼãi ivaieterei hague la ojapóva, ha noñehaʼãmoʼãi okambia ha oñemoĩ porã jey Jehovándi (Ecl. 8:11). Ikatu ñaĩ segúro umi ansiáno odesidíramo omosẽtaha peteĩ ermánope, haʼekuéra ojagarraha ensério pe rresponsavilida orekóva. w22.02 5, 6 párr. 13, 14

Umi ansiáno ningo koʼýte tekotevẽ ipasiénsia ha imbaʼeporã oiméramo peteĩ ermánope ijetuʼu oasepta hag̃ua peteĩ konsého oñemeʼẽ vaʼekue chupe. Haʼekuéra ndaipochýi vaʼerã ndojesegipyaʼéiramo la konsého haʼekuéra omeʼẽ vaʼekue. Upévare pe ansiáno oñemboʼe jave haʼeñoháme, iporãta ojeruréramo Jehovápe oipytyvõmi hag̃ua pe ermánope osegi hag̃ua pe konsého. Ikatu oime pe ermáno oikotevẽnte hína tiémpo opensa porã hag̃ua pe konsého oñemeʼẽ vaʼekuére chupe. Ha oiméramo pe ansiáno ipasiénsia ha imbaʼeporã hendive, ifasilvéta chupe osegi hag̃ua pe konsého. Péro umi konsého oñeguenohẽ vaʼerã Ñandejára Ñeʼẽgui. Ñande ningo jaipota pe konsého ideprovécho chupe, ha jaipota avei ojagarra porã upéva ha tomokyreʼỹ chupe (Prov. 27:9). w22.02 18 párr. 17, 19

Ikatu ñapensa Jehová otardaitereimaha okontesta hag̃ua ñandéve ñane ñemboʼe, jajerure jave chupe tañanemombarete ñaaguanta hag̃ua peteĩ provléma, térã anivéma hag̃ua jajapo peteĩ mbaʼe ndogustáiva chupe. ¿Mbaʼérepa Jehová nokontestapyaʼéi ñandéve kompletoite umi ñane ñemboʼe? Ñañemboʼe jave ñande pyʼaite guive, jahechauka hína chupe mbaʼeichaitépa jajerovia hese (Heb. 11:6). Ñande ñañemboʼe jave Jehovápe ha jajerure chupe tañanepytyvõ jajapo hag̃ua umi mbaʼe ogustáva chupe, haʼe ohechase ñañehaʼãmbaitépa hína jajapo hag̃ua ivolunta (1 Juan 3:22). Upéicharõ, jajerure jave Jehovápe tañanepytyvõ anivéma hag̃ua jajapo peteĩ mbaʼe ndogustáiva chupe, tekotevẽ ñanepasiénsia ha jajapo opa ikatúva ñakambia hag̃ua. Jesús ontendeka vaʼekue oĩtaha umi ñane ñemboʼe noñekontestapyaʼemoʼãiva. Haʼe heʼi: “Pesegi pejerure ha oñemeʼẽta peẽme, pesegi peheka ha petopáta, pesegi pembota pe okẽ ha ojeavríta peẽme. Pórke oñemeʼẽta enterove ojerurévape, ojuhúta opavave ohekáva, ha ojeavríta pe okẽ enterove ombotávape” (Mat. 7:7, 8). w21.08 8 párr. 1; 10 párr. 9, 10

Ñamombarete hag̃ua ñande jerovia ñande Apoharére, tekotevẽta jasegi jastudia Ñandejára Ñeʼẽ (Jos. 1:8). Por ehémplo, ñapensami entéro umi profesía oñekumplímavare ha oĩva la Bíbliape, ha mbaʼéichapa umi diferénte persóna oskrivi vaʼekue la Biblia noñokontradesíri. Jajapóramo upéicha, koʼýte jagueroviavéta ñandeapo hague peteĩ Kreadór iñarandúva, ha haʼe oskrivika hague la Biblia (2 Tim. 3:14; 2 Ped. 1:21). Jastudiakuévo Ñandejára Ñeʼẽ, jahechakuaákena mbaʼeichaitépa ideprovécho umi konsého oĩva pype. Por ehémplo, ymaitereíma la Biblia ñandeavisa hague ikatuha jajeperhudika ñandeplatarayhúramo, ha upéva ogueruha ‘opaichagua akã rasy ha heta jehasa asy’ (1 Tim. 6:9, 10; Prov. 28:20; Mat. 6:24). ¡Ha ajépa ideprovechoite ko konsého omeʼẽva la Biblia! ¿Oúpa ñandéve ñane akãme ótro konsého bíblico ñanepytyvõma vaʼekue? Jajepyʼamongetáramo entéro umi konsého porãite oĩvare la Bíbliape, jahechakuaáta ñande Apohare oikuaaha mbaʼépa iporãve ñandéve g̃uarã, ha upévare ñande siémpre jahekáta ikonsého (Sant. 1:5). Jajapóramo upéicha katuete javyʼaitevéta (Is. 48:17, 18). w21.08 17, 18 párr. 12, 13

Oiméramo nde ndeedáma rehóvo, ikatu reime segúro Jehová imanduʼaha umi mbaʼe rejapo vaʼekuére ymave. Nde ningo kyreʼỹme repredika vaʼekue. Reaguantáma avei heta provléma, umíva apytépe umi nemoñeñandu vaieterei vaʼekue. Nde ningo neñeʼẽrendu ha redefendéma umi mandamiénto ihústova oĩva la Bíbliape. Rembokatupyry ótrope ha rekumplíma avei heta rresponsavilida iñimportánteva Jehová organisasiónpe. Nde reñehaʼãmbaitéma resegi hag̃ua rejadapta umi kámbio ojejapóvare Jehová organisasiónpe. Hetáma avei reapoja ha remokyreʼỹ umi oservívape de tiémpo kompléto. Ñandejára Jehová ningo nderayhueterei, pórke nde siémpre ndefiél ha neñeʼẽrendu chupe, ha haʼe opromete voi ‘ndohejareimoʼãiha umi iñeʼẽrendúvape chupe’ (Sal. 37:28). Avei haʼe oasegura umi ijedávape: “Ág̃a peẽ peneakãrangue morotĩmba vove, che asegíta pende ykére” (Is. 46:4). Upévare, aníkena repensa ndeedáma haguére nandedeprovechoveimaha. ¡Añetehápe nde neimportanteterei hína Jehová organisasiónpe! w21.09 3 párr. 4

Jehová ñandeporiahuvereko iñarandueterei rupi. La Biblia heʼi voi ‘pe arandu oúva yvágagui oporoporiahuverekoha ha ojapoha heta mbaʼe iporãva’ (Sant. 3:17). Ojapoháicha peteĩ túa ohayhuetereíva ifamiliakuérape, Jehová oikuaa ideprovechoitereitaha itaʼyrakuérape oiporiahuverekóramo chupekuéra (Is. 49:15). Ñaneimperféktoramo jepe, Jehová omeʼẽ ñandéve peteĩ esperánsa iporãitereíva ñandeporiahuverekógui. Jehová iñarandueterei rupi ñandeporiahuvereko ijáma guive chupe ojapo hag̃ua upéva. Péro haʼe oikuaa avei mbaʼe moméntopepa ñandeporiahuvereko vaʼerã ha mbaʼe moméntopepa nahániri. Haʼe ningo iñarandueterei, upévare haʼe ndaiflóhoi ni naipermisívoi. Ñamoĩ chupe peteĩ ermáno odesidiha ipyʼapýpe voi opekataha. ¿Mbaʼépa ojejapo vaʼerã péicha jave? Jehová heʼi Páblope oskrivi hag̃ua pe kongregasiónpe: “Anive pejeheʼa hese” (1 Cor. 5:11). Umi pekadór noñarrepentírivape oñemosẽ kongregasióngui. Upéva ojejapómante vaʼerã ikatu hag̃uáicha ojeprotehe umi ermáno ha ermanakuéra ifiélvape, ha oñekumpli hag̃ua umi léi ihústova Jehová omeʼẽva. w21.10 9, 10 párr. 7, 8

Ñande jaadora Jehovápe ñameʼẽvo ñane kontrivusión. Umi israelita ningo yma noñepresentái vaʼerã kuri Jehová renondépe po nandi (Deut. 16:16). Umi mbaʼe haʼekuéra ogueraháva Jehovápe, ogueraha vaʼerã hikuái pe iposivilida omeʼẽmiháicha. Péicha haʼekuéra ohechauka vaʼekue oagradeseha entéro mbaʼe Jehová ojapo vaʼekue hesehapekuéra. ¿Ha mbaʼéichapa ñande ikatu jaagradese avei Jehovápe entéro mbaʼe ojapo vaʼekuére ñanderehehápe? Upearã ñande ikatu ñakontrivui ñande posivilida omeʼẽmiháicha, ha ikatu ñameʼẽ upéva ñane kongregasiónpe voi ha avei pe óvra mundiálpe g̃uarã. Apóstol Pablo ningo heʼi vaʼekue voi: “Ñandejára oguerohoryeterei umi hénte omeʼẽramo umi rregálo ipyʼaite guive. Pórke haʼe ohaʼarõ peteĩ persóna omeʼẽ pe ikatúva, ndahaʼéi pe ikatuʼỹva” (2 Cor. 8:4, 12). Jehová ningo ovaloraiterei umi kontrivusión ñameʼẽva ñande pyʼaite guive, tamichĩ jepe raʼe upéva (Mar. 12:42-44). w22.03 22 párr. 13

Umi ansiáno ningo ndaikatúi añete oipeʼapa ñandehegui umi provléma jarekóva, péro Jehová oipota haʼekuéra ñanemokyreʼỹ ha ñanepytyvõ. ¿Mbaʼéichapa umi ansiáno ikatu okumpli porã upe asignasión Jehová omeʼẽva chupekuéra, jepe hembiapo heta hikuái? Osegívo Pablo ehémplo. Pablo ningo oheka vaʼekue voi oportunida ofelisita hag̃ua ermanokuérape ha omokyreʼỹ hag̃ua chupekuéra. Ha iporãta avei umi ansiáno osegíramo iñehémplo, ha otrata avei péicha mborayhúpe la ermanokuérape (1 Tes. 2:7). Pablo ningo oasegura vaʼekue umi ermánope ohayhuetereiha chupekuéra, ha Jehová avei ohayhuetereiha chupekuéra (2 Cor. 2:4; Efes. 2:4, 5). Haʼe oñamiga vaʼekue avei ermanokuérare ha ohechauka ojeroviaha hesekuéra. Por ehémplo siémpre ohasa vaʼekue tiémpo hendivekuéra, ha ndokyhyjéi vaʼekue avei omombeʼu hag̃ua chupekuéra umi mbaʼe oipyʼapýva chupe ha avei umi defékto haʼe orekóva (2 Cor. 7:5; 1 Tim. 1:15). Péro haʼe iprovléma hetáramo jepe, ndoikói vaʼekue opensa ijehénte, síno ojepyʼapy ermanokuérare ha oipytyvõse chupekuéra. w22.03 28 párr. 9, 10