Septiembre

Jesús ningo oporomboʼe porãiterei vaʼekue. Péro heta hénte itiémpope guare noñekontentái vaʼekue upévarente. Péro Jesús ndojaposéirõ guare pe milágro umi hénte ojeruréva, haʼekuéra oñepysanga ha orrechasa chupe (Mat. 16:4). ¿Mbaʼépa heʼi Ñandejára Ñeʼẽ? Oñeʼẽvo pe Mesíasre, proféta Isaías oskrivi vaʼekue: “Haʼe ndoikomoʼãi ohenduka iñeʼẽ umi kállere, ndosapukaimoʼãi ni noñeʼẽhatãmoʼãi” (Is. 42:1, 2). Jesús opredikárõ guare, haʼe ndoikói vaʼekue ojechaukase. Haʼe nomopuʼãi vaʼekue umi témplo tuichaicháva, nomondéi vaʼekue umi ao espesiál oipurúva umi rrelihióso, ni ndoipotái vaʼekue umi hénte oipuru umi título rrelihióso omoimportántetava chupe. Ojehusgárõ guare jepe ha hekove ojapeligra, haʼe ndojaposéi vaʼekue peteĩ milágro opyta porã hag̃uánte rréi Herodes ndive (Luc. 23:8-11). Jaikuaaháicha Jesús ojapo vaʼekue milágro, péro chupe g̃uarã iñimportantetereive vaʼekue opredika umi notísia porã. Haʼe heʼi voi idisipulokuérape: “Upearã che aju vaʼekue” (Mar. 1:38). w21.05 4 párr. 9, 10

Ñande ningo jaheka jaikóvo umi hénte “ipyʼaporãva ohupyty hag̃ua jeikove opaveʼỹva” (Hech. 13:48). Ikatu hag̃uáicha koʼã héntegui oiko disípulo, ñaipytyvõ vaʼerã chupekuéra 1) ontende, 2) oguerovia, ha 3) omoĩ hag̃ua en práktika umi mbaʼe oaprendéva la Bíbliagui (Col. 2:6, 7; 1 Tes. 2:13). Añetehápe enterove ñaiméva kongregasiónpe ikatu ñaipytyvõ umi ostudiávape la Biblia. Jajapo hína upéva jatratávo chupekuéra mborayhúpe, ha jarresivi porãvo chupekuéra rreunionhápe (Juan 13:35). Pe instruktór avei oipuru heta tiémpo ha imbaretekue oipytyvõ hag̃ua peteĩ estudiántepe. Por ehémplo, oheja hag̃ua umi mbaʼe vai ogueroviáva ha ojepokuaáva ojapo, koʼã mbaʼe imbaretéramo jepe “peteĩ tórreicha” iñakãme ha ikorasõme (2 Cor. 10:4, 5). Ikatu voi hína heta mésere ñañehaʼã pe persóna ojapo hag̃ua koʼã kámbio, ha tiémpo rire ojevautisa. Péro katuete nañañehaʼãreimoʼãi jajapóramo upéva. w21.07 3 párr. 6

¿Ñandépa ñaime segúro ñamboʼeha la verda? ¿Jagueroviápa ñande pyʼaite guive ñande testígo de Jehová jaadoraha hína Jehovápe haʼe oipotaháicha? Apóstol Pablo oĩ vaʼekue segúro umi mbaʼe ogueroviáva haʼeha la verda (1 Tes. 1:5). Haʼe ningo oĩ vaʼekue segúro, ndahaʼéi ogustáguinte chupe umi mbaʼe ogueroviáva, síno ostudia porã rupi Ñandejára Ñeʼẽ. Haʼe oguerovia vaʼekue ‘entéro mbaʼe oĩva Ñandejára Ñeʼẽme ouha Ñandejáragui’ (2 Tim. 3:16). ¿Mbaʼépa Pablo oaprende ostudiávo Ñandejára Ñeʼẽ? Upépe haʼe otopa umi pruéva ohechauka porãitereíva Jesús haʼeha pe Mesías oñepromete vaʼekue. Umi líder rrelihióso judío katu odesidi nopenamoʼãiha koʼã pruévare. Haʼekuéra hovamokõi ha ojapo umi mbaʼe Jehovápe ndogustáiva, heʼíramo jepe hikuái orrepresentaha Ñandejárape (Tito 1:16). Péro Pablo ndojoguaiete voi koʼã kuimbaʼépe. Haʼe ndoikói oiporavo mbaʼe pártepa ogueroviáta Ñandejára Ñeʼẽgui ha mbaʼe pártepa nahániri. Haʼe oĩ vaʼekue dispuésto omboʼe ha ojapóvo enteroite mbaʼe oĩva Ñandejára Ñeʼẽme (Hech. 20:27). w21.10 18 párr. 1, 2

Ñande ningo ñañotỹ ha jarrega pe semílla, péro ñarrekonose vaʼerã Jehová haʼeha “upe omongakuaáva” (1 Cor. 3:6, 7). Jehová ningo omombaʼeterei káda persónape. Haʼe omeʼẽ ñandéve pe priviléhio ñambaʼapóvo Itaʼýrandi ñambyaty hag̃ua umi hénte opa tetãyguápe oñehundi mboyve ko múndo (Ageo 2:7). Ñane predikasión ningo ojogua pe traváho ojapóvape umi ohóva opororreskata oiko jave peteĩ inséndio. Ikatu oime unos kuánto vombéronte la oikéva onohẽ umi héntepe upe lugárgui. Péro pe traváho ojapóva enterove vombéro iñimportanteterei hína. Ha ñande upéicha avei jajapo predikasiónpe. Ndajaikuaái ningo mboy héntepa ojesalváta Satanás múndogui, péro Jehová ikatu ojevale oimeraẽ isiervokuérare oipytyvõ hag̃ua chupekuéra. Peteĩ ermáno hérava Andrés, oikóva Bolíviape heʼi: “Peteĩ persóna oikuaa jave la verda ha ojevautisa, che aikuaa upéva ojehupyty hague oñembaʼapo rupi oñondivepa”. Ñañehaʼãkena ñande avei péicha ñandepositívo ha ñanekyreʼỹ predikasiónpe. Péicha jajapóramo Jehová ñanevendesíta ha javyʼaitereíta predikasiónpe. w21.05 19 párr. 19, 20

Peteĩ kasadór ningo ojagarrase térã ojukase umi animál. Upearã ikatu voi oipuru diferénte ñuhã, heʼiháicha voi la Bíbliape (Sal. 140:5). ¿Mbaʼépa ojapo pe mariskadór ombotavy hag̃ua peteĩ animálpe ha oity chupe iñuhãme? Haʼe ojesareko ha okontrola pe animál ojapóva, por ehémplo moõpa oho jepi, mbaʼépa ogusta chupe, ha mbaʼeichagua ñuhãpa iporãvéta oipuru oity hag̃ua pe animálpe. Satanás ojogua hína upe mariskadórpe. Haʼe ojesareko ñanderehe ha ñanekontrola. Haʼe ohecha moõpa jaha jepi ha mbaʼépa la ñandegustáva. Upéi haʼe omoĩ ñandéve peteĩ ñuhã ikatu hag̃uáicha ñandereity pype ñaimoʼãʼỹetére. Upéicharõ jepe, la Biblia oasegura ñandéve jaʼa mbaʼéramo iñuhãme, ikatuha gueteri ñasẽ upégui. Avei ñanemboʼe mbaʼépa ikatu jajapo ani hag̃ua voi jaʼa umi iñuhãme. Oĩ mokõi ñuhã oikoitéva Satanáspe: Pe orgúllo ha pe taryrýi. Hetaiterei áñorema Satanás oipuru koʼã mbaʼe vaiete ha osẽ porã voi chupe. Haʼe ojogua umi opeskávape hína oity hag̃ua ñuhãme guyra (Jer. 5:26). Péro natekotevẽi ningo jaʼa raẽ Satanás ñuhãme. ¿Mbaʼérepa? Pórke Jehová oikuaaukáma ñandéve umi mbaʼe oipurúva Satanás ñanemoñuhã hag̃ua (2 Cor. 2:11). w21.06 14 párr. 1, 2

Ñane ermanokuéra ijedáva ojogua peteĩ tesóro ijojahaʼỹvape. Ñandejára Ñeʼẽ ombojoja voi umi ijedáva akãrangue morotĩ peteĩ korónare (Prov. 20:29). Péro jajedeskuidáramo, ikatu hína ndajahechái chupekuéra peteĩ tesóroicha. Umi imitãva ohechakuaáramo mbaʼeichaitépa ivalióso umi ijedáva, irrikoitéta hikuái pórke okonsegíta peteĩ mbaʼe ivaliosovéva umi tesóro ha rrikésagui. Ñandejára Jehová ningo omombaʼeterei umi ijedávape. Haʼe oikuaa porã umi ermáno ha ermanakuéra pyʼapy, ha ovaloraiterei umi kualida porãite orekóva hikuái. Haʼe ovyʼaiterei umi ijedáva okomparti jave umi imitãvandi la oaprende vaʼekue oservívo Jehovápe hekove pukukue (Job 12:12; Prov. 1:1-4). Jehová omombaʼeterei avei chupekuéra oaguantáma rupi heta mbaʼe (Mal. 3:16). Haʼekuéra ningo ohasáma heta mbaʼe ijetuʼúva, upéicharõ jepe osegi ojerovia mbarete Jehováre. Iñesperansakuéra imbareteve koʼág̃a upe oikuaárõ guarégui la verda. Ha Jehová ohayhu chupekuéra, pórke osegi oikuaauka hikuái héra “ijedáramo jepe” (Sal. 92:12-15). w21.09 2 párr. 2, 3

Káda siérto tiémpo ningo iporãta jahecha mbaʼépa ñanemomýi jaservi hag̃ua Jehovápe. Upearã ikatu ñañeporandu: “¿Chépa añekomparámante vaʼerã ótrore añeñandu porã hag̃ua? ¿Ambaʼapo jejopýpa Jehová servísiope aikose rupi pe ivalevévaramo kongregasiónpe, térã ahasase rupi peteĩ ermáno térã ermánape? ¿Térãpa ambaʼapo jejopy hína ameʼẽségui Jehovápe pe iporãvéva?”. ¿Mbaʼérepa ñañeporandu vaʼerã koʼã mbaʼe? La Biblia heʼi ñandéve ani hag̃ua ñañekompara ótrore. ¿Mbaʼérepa ndajajapói vaʼerã upéva? Pórke ñapensáramo ñandevaleveha ñane ermanokuéragui ikatu hína jaju ñandeorgullóso. Péro ikatu avei ñañedesanima ñapensáramo umi ermanokuéra ivaleveha ñandehegui (Rom. 12:3). Ñanemanduʼa vaʼerã Jehová nañanemoag̃uíri hague ijehe ñaneporã, ñañeʼẽkuaa térã ñaneamígo heta haguére, síno jahayhúgui chupe ha ñaneñeʼẽrenduségui Itaʼýrape (Juan 6:44; 1 Cor. 1:26-31). w21.07 14, 15 párr. 3, 4

Ñambopyahu hag̃ua ñapensa lája tekotevẽ ñañemboʼe, jastudia Ñandejára Ñeʼẽ ha jajepyʼamongeta. Upévare jasegíkena jajapo koʼã mbaʼe, ha jajerure Jehovápe tañanemombarete. Ijespíritu sánto ñanepytyvõta ani hag̃ua ñañekompara ótrore. Jehová ñanepytyvõta avei jaikuaa hag̃ua ñañepyrũmapa hína ñaneenvidióso térã ñañembotuicha, ha pyaʼe porã jahapoʼoite hag̃ua ñane korasõgui koʼã mbaʼe vai (2 Crón. 6:29, 30). Jehová ningo oikuaa mbaʼépa jareko ñane korasõme. Haʼe oikuaa avei ñañehaʼãmbaiteha ani hag̃ua ñapensa ko múndope oñepensaháicha, ha ani hag̃ua jajapo umi mbaʼe vai ñaneimperfékto káusare. Jehová ohechávo mbaʼeichaitépa ñañorairõ hína koʼã mbaʼe vai kóntrape, haʼe ñanderayhuvéntema. Ñantende hag̃ua mbaʼeichaitépa Jehová ñanderayhu, haʼe okompara upe mborayhu oñandúva ñanderehe pe mborayhu oñandúvare peteĩ sy iveveʼíre (Is. 49:15). Ajépa ñanembovyʼaite jaikuaávo Jehová ñanderayhuetereiha ohechávo ñañehaʼãmbaiteha jaservi chupe ñande pyʼaite guive. w21.07 24, 25 párr. 17-19

Ñande ikatu javyʼave ñambaʼapo jejopýramo ñakumpli hag̃ua oimeraẽ asignasión oñemeʼẽva ñandéve Jehová servísiope. Jaipurupaitékena ñane tiémpo predikasiónpe, ha jajapo ikatúva guive japartisipa hag̃ua opa mbaʼe ojejapóvape kongregasiónpe (Hech. 18:5; Heb. 10:24, 25). Jajeprepara porãkena rreunionrã ikatu hag̃uáicha ñamokyreʼỹ ótrope ñane komentariokuéra rupive. Jajagarra ensério oimeraẽ asignasión oñemeʼẽva ñandéve pe rreunión éntre semanaguápe. Umi ansiáno ojeruréramo ñandéve jajapo hag̃ua peteĩ traváho kongregasiónpe, ñanepuntuál ha ñakumpli porã vaʼerã upéva. Aníkena ñapensa naiñimportanteguasuiha peteĩ traváho oñemeʼẽva ñandéve, ha ndovaleiha la péna japerde hese ñane tiémpo. Ñañehaʼãmbaitékena ñandevaleve hag̃ua umi mbaʼe jajapóvape (Prov. 22:29). Amáske ñambaʼapo jejopyve Jehovápe g̃uarã, pyaʼeve japrogresáta ha javyʼaitevéta (Gál. 6:4). Avei ifasilvéta ñandéve javyʼa hag̃ua oñemeʼẽramo ótrope pe priviléhio ñande jaipotaite vaʼekue (Gál. 5:26). w21.08 22 párr. 11

Ani ñandeorgullóso ha jaheja Jehová tañanemboʼe. Ñanderasýrõ del korasón, ijetuʼúta ñane korasõme ombaʼapo porã hag̃ua. Ha ñandeorgullósorõ, ijetuʼúta ñaneñeʼẽrendu hag̃ua Jehovápe. Umi fariséo oñemohatã vaʼekue la haʼekuéra heʼívapente, ha upévare norrekonoseséi Jesús haʼeha Ñandejára Raʼy ni ojapoha umi milágro espíritu sánto rupive (Juan 12:37-40). Péro haʼekuéra okambia vaʼerã kuri oikosérõ pára siémpre (Mat. 23:13, 33). Upévare iñimportanteterei jaheja Jehová tañandegia Iñeʼẽ rupive ha ijespíritu rupive. Oipurúvo koʼã mokõi mbaʼe, haʼe ikatu ñanepytyvõ jadesidi porã hag̃ua ha ñakambia hag̃ua jaiko lája ha ñapensa lája. Santiago iñumílde rupi, oheja vaʼekue Jehová omboʼe chupe, ha oporomboʼekuaaiterei vaʼekue avei. w22.01 10 párr. 7

‘Ñañemboʼe meme’ jave, ñaimekuaa segúro ñande Ru yvagapegua ohenduha ñane ñemboʼe (Col. 4:2). Haʼetéramo jepe otardáva oñekontesta hag̃ua ñandéve, Jehová opromete ojapotaha upéva “ñaikotevẽ jave”, térã itiempoitépe (Heb. 4:16). Upévare núnka nañapensái vaʼerã Jehová ojavyha hína nokontestapyaʼéi jave ñandéve ñane ñemboʼe ñahaʼarõ haguéicha. Por ehémplo, oĩ umi oñemboʼémava heta áñore ou hag̃ua Ñandejára Rréino ha ohundi ko múndo aña. Jesús heʼi vaʼekue voi jajerure vaʼerãha upéva ñane ñemboʼépe (Mat. 6:10). Péro ajépa ñandevyroitéta jajúramo ndajajeroviavéi Jehováre, pórke pe fin ndoúi pe tiémpo ñande ñahaʼarõ vaʼekuépe (Hab. 2:3; Mat. 24:44). Iporãvéta ñahaʼarõkuaánte Jehovápe, jasegi ñañemboʼe chupe ha jajerovia hese okontestataha ñandéve. Pe fin oúta itiempoitépe, pórke ogueru hag̃ua upéva Jehová orekóma voi ‘pe día ha pe óra’. Ha ág̃a oiko vove upéva, jahechakuaáta upe día haʼe hague pe moménto iporãvéva enterove ohayhúvape g̃uarã Jehovápe (Mat. 24:36; 2 Ped. 3:15). w21.08 10 párr. 10, 11

Umi ermáno ijedáva ha iñumíldeva ohechakuaa ndaikatuveimaha ojapo heta mbaʼe yma guaréicha. Ñapensamíntena por ehémplo umi superintendénte de sirkuítore. Haʼekuéra ningo ohupytývo 70 áño oñemeʼẽ chupekuéra ótra asignasión, ha upéva oiméne ijetuʼu chupekuéra. Haʼekuéra ningo ovyʼaiterei kuri ikatu haguére oservi péicha umi ermánope, péro ontende iporãveha umi imitãva ojapo koʼág̃a upéva. Koʼã ermáno ijedáva osegi umi levita Israel tiémpope guare ehémplo, umíva ningo ohupytývo 50 áño ojerretiráma ha nombaʼapovéima vaʼekue pe tavernákulope. Péro koʼã levita ijedáva nodependéi vaʼekue peteĩ priviléhiore ovyʼa hag̃ua. Haʼekuéra kyreʼỹme ojapo la ikatumíva ha oipytyvõ umi imitãvévape (Núm. 8:25, 26). Koʼág̃arupi umi oĩ vaʼekue de superintendénte de sirkuíto ndovisitavéima umi kongregasión, péro tuicha oipytyvõ ha omokyreʼỹ ikongregasionkuérape. w21.09 8, 9 párr. 3, 4

Lucas 15:11-32-pe Jesús omombeʼu vaʼekue peteĩ istória opokoitereíva ñanderehe, oñeʼẽva peteĩ taʼýra ofalla vaʼekuére. Jesús heʼi peteĩ mitãkariaʼy opuʼã hague itúare, osẽ hógagui ha “oho mombyry ótro paíspe”. Upépe haʼe oho hekovai ha oiko iñakãre. Péro ojecha vaírõ guare, haʼe oñemoĩ ojepyʼamongeta la ojapóvare ha oñemeʼẽ enkuénta oiko porãiteve hague itúa rógape. Jesús heʼi haguéicha, “pe kuimbaʼe ohechakuaa ivyroiterei hague”. Upévare odesidi oho jeytaha hógape ha ojerure itúape operdonami hag̃ua chupe. Iñimportánte vaʼekue pe taʼýra ohechakuaa odesidi vai hague heta mbaʼe. ¡Ha tekotevẽ kuri okambia hekove! Pe taʼýra ofalla vaʼekue ohechauka ombyasyha ipyʼaite guive la ojapóva. Kóva ningo ndahaʼéi peteĩ istória opokónteva ñanderehe, síno ideprovechoiterei umi ansianokuérape. Ikatu hína oipytyvõ chupekuéra ohechakuaa hag̃ua oimépa oñarrepenti hína ipyʼaite guive peteĩ persóna opeka vai vaʼekue. w21.10 5 párr. 14, 15

¿Mbaʼépa hína pe noñemonguʼemoʼãiva, térã noñembokachamoʼãiva? Apóstol Pablo heʼi: “Jaikuaágui jarresivitaha peteĩ Rréino ndaikatúiva oñemonguʼe, jasegíkena jaservi Ñandejárape haʼe oipotaháicha, jarrespeta ha ñamombaʼévo chupe” (Heb. 12:28). Ág̃a opa rire pe último ñembokacha, Ñandejára Rréino añoite noñemonguʼemoʼãi (Sal. 110:5, 6; Dan. 2:44). ¡Ndaiporivéima tiémpo japerde vaʼerã! Umi hénte tekotevẽ odesidi mbaʼépa ojapóta: Haʼekuéra odesidíramo osegitaha oapoja ko múndope, oñehundíta hikuái. Péro odesidíramo oservitaha Jehovápe ha oñepyrũ oiko haʼe oipotaháicha, oikovéta hikuái pára siémpre (Heb. 12:25). Pe predikasión rupive ñande ikatu ñaipytyvõ umi héntepe odesidi hag̃ua ko mbaʼe iñimportantetéva. Ha ñanemanduʼákena siémpre la heʼi vaʼekuére ñande Ruvicha Jesús: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mat. 24:14). w21.09 19 párr. 18-20

Ansianokuéra, peẽ pereko la rresponsavilida pekonsolávo umi ermáno orekóvape ihénte oheja vaʼekue Jehovápe (1 Tes. 5:14). Peẽ voi peñemotenonde vaʼerã pemokyreʼỹ hag̃ua chupekuéra oñepyrũ mboyve ha opa rire umi rreunión. Pevisitákena chupekuéra ha peñemboʼe hendivekuéra. Pepredikákena avei hendivekuéra, térã peinvita mimi chupekuéra pende estúdio de famíliape. Umi ansiáno ningo oñangareko vaʼerã Jehová ovechakuéra mimi oñekevrantávare. Avei ombyasy ha ohechauka vaʼerã ohayhuha chupekuéra (1 Tes. 2:7, 8). Jehová ningo “ndoipotái avave oñehundi, síno oipota enterove oñarrepenti” (2 Ped. 3:9). Peteĩ persóna opeka vaietereíramo jepe, pe hekove ivaliosoiterei gueteri Ñandejárape g̃uarã. Ñanemanduʼákena Jehová hepyeterei opaga hague enterove pekadór rehehápe: Omeʼẽ voi Itaʼýra ohayhuetéva rekove sakrifísioramo. Jehová ningo mborayhúpe oñehaʼã oipytyvõ umi oheja vaʼekuépe chupe ikatu hag̃uáicha oñemoag̃ui jey hese. Haʼe oreko la esperánsa haʼekuéra odesiditaha ojapo upéva, ohechaukaháicha pe ehémplo oñeʼẽva pe taʼýra ofalla vaʼekuére (Luc. 15:11-32). w21.09 30, 31 párr. 17-19

¿Mbaʼéichapa reñeñandu vaʼerã ndaikatuvéiramo epredika ha emboʼe umi notísia porã anteve guaréicha, tahaʼe nderasykatu térã ndeedáma rupi? Nde ningo lomímonte evyʼakuaa upe ikatúvare ejapo. Jahechamína rréi David ha isoldadokuéra ehémplo. Peteĩ vuéltape, umi amalequita ou vaʼekue osakea chupekuéra ha oguerahapa hembireko ha ifamiliakuéra mimi jepe. Péro David ha isoldadokuéra ohórõ guare orrekupera entéro mbaʼe ojepeʼa vaʼekue chuguikuéra, 200 kuimbaʼe ikaneʼõitereíma kuri ha opytánte oñatende la ikosakuérare. Ogana rire umi amalequítape, David ha isoldadokuéra oipeʼa chuguikuéra heta mbaʼe iporãva. Péro David omanda umi soldádo oho vaʼekue oñorairõ ha umi opyta vaʼekue, ojorreparti vaʼerãha koʼã mbaʼe peteĩchapaite (1 Sam. 30:21-25). Upeichaite avei oiko jajapo jave disípulo. Enterove jajapo hína opa ikatúva ñakumpli porã hag̃ua ko tembiapo, upévare ikatu javyʼa oñondivepa peteĩ persóna oikuaa jave Jehovápe ha ojevautisa. Jehová ohecha mbaʼeichaitépa ñañehaʼã, jajapoha ñane rembiapo jahayhúgui chupe, ha ñanepremia upévare. Haʼe ñanemboʼe avei mbaʼépa ikatu jajapo javyʼa hag̃ua predikasiónpe, tahaʼe haʼéva pe ikatúva jajapo (Juan 14:12). Upévare ikatu ñaime segúro Jehová katuete ñandeguerohorytaha ñande nañañentregáiramo. w21.10 27, 28 párr. 15-17

Amáske ñandeeda ikatu hína jakyhyje nañandedeprovechovéirõ g̃uarã Jehovápe yma ñanemitãvérõ guaréicha. Ikatu oime nañanembaretevéima anteve guaréicha, péro jaipurukuaa pe arandu ha experiénsia jarekóva ñamboʼe hag̃ua umi imitãvévape. Péicha ideprovéchota hikuái Jehová organisasiónpe ha ikatúta ojagarra hetave rresponsavilida. Umi ijedáva ningo iñumílde vaʼerã oipytyvõséramo umi imitãvape. Peteĩ persóna iñumíldeva ohecha umi ótrope tuichavévaramo chugui (Filip. 2:3, 4). Umi ijedáva ohechaukáva ko kualida ontende peteĩ mbaʼe ikatuha ojejapo porã heta hendáicha, ha oĩ porãtanteha avei la Biblia heʼiháicha. Upévare haʼekuéra nohaʼarõi ojejapo entéro mbaʼe haʼekuéra ojapo haguéicha ymave (Ecl. 7:10). Umi ijedáva ikatu oipytyvõ umi imitãvape omombeʼúvo chupekuéra umi mbaʼe oaprende vaʼekue. Péro haʼekuéra ontende avei ‘la oikóva ko múndope okambiaha hína’ ha upévare tekotevẽha ojadapta umi kámbiore (1 Cor. 7:31, nóta). w21.09 8 párr. 1, 3

Jehová núnka ndojeruremoʼãi isiervokuérape ojapo hag̃ua álgo omongyʼátava chupekuéra, pórke jaʼéma haguéicha haʼe sánto entéro mbaʼépe. Ha omomanduʼa hag̃ua upéva umi israelítape, Jehová omanda vaʼekue umi súmo saserdótepe omoĩ hag̃ua isyváre peteĩ pláka de óro heʼíva hese: “Jehová mbaʼe hína pe santida” (Éx. 28:36-38). Entéro umi israelita ohecháva upe pláka imanduʼáta kuri Jehová santoha. ¿Péro mbaʼépa jaʼekuaa umi israelita ndaikatúivare ohecha upe pláka, pórke oĩ mombyry pe súmo saserdótegui? Haʼekuéra ningo lomímonte ikatúta imanduʼa Jehová santoha, pórke pe léi ojelee vaʼekue enterove renondépe, ha upépe orekóta hikuái la oportunida ohendu hag̃ua upéva (Deut. 31:9-12). Ñande ñaimérire upépe pe léi ojelee aja, ñahendúta kuri ojeʼévo: ‘Peẽ penepotĩ vaʼerã, pórke che Jehová sánto hína’ (Lev. 11:44, 45; 20:7, 26). w21.12 3 párr. 6, 7

Algúnope ikatu hína okevranta umi mbaʼe oikotevẽva káda día. Ikatu hína oipyʼapy chupekuéra upéva oiko rupi peteĩ país imboriahúvape. Ha ivaiveha, ikatu omano raʼe anga pe persóna ombaʼapóva ha omantenéva pe famíliape. Jaiko rangue jajepyʼapyeterei ñane provlemakuérare, iporãvéta jajeroviáramo Jehováre. Haʼe ningo oasegura nombofaltamoʼãiha ñandéve umi mbaʼe ñaikotevẽva ñande ñamotenondéramo Irréino (Mat. 6:32, 33). ¡Ha haʼe siémpre okumpli upe promésa! (Deut. 8:4, 15, 16; Sal. 37:25). Ñapensamíntena, Jehová ningo oñangareko umi yvoty ha guyraʼi mimíre jepe. Upévare ikatu ñaĩ segúro haʼe koʼýte oñangarekotaha ñanderehe (Mat. 6:26-30; Filip. 4:6, 7). Umi tuakuéra ningo omeʼẽta ifamiliakuérape enteroite mbaʼe oikotevẽva, ha ojapóta upéva ohayhu rupi chupekuéra. Ha Jehová ningo upeichaite avei. Ikatu ñaĩ segúro haʼe núnka nombofaltamoʼãiha ñandéve mbaʼevete asy, pórke haʼe ñanderayhueterei. w21.12 16, 17 párr. 4, 5; 18 párr. 8

¿Ojapómapa raʼe ñanderehe peteĩ mbaʼe ivaietereíva peteĩ ermáno térã ermána kongregasionpegua? Por ehémplo, José ermanokuéra ojapóramo jepe hese inhustísia, haʼe osegi vaʼekue ojapo pe iporãvéva oservi hag̃ua Jehovápe, ha Haʼe omeʼẽ chupe heta mbaʼe porã ipasiénsia ha oaguanta haguére. Tiémpo rire, José ikatu vaʼekue operdona iñermanokuéra ombosufri vaʼekuépe chupe, ha ohecha mbaʼéichapa Jehová ovendesi chupe (Gén. 45:5). José rehe oiko haguéicha, ñandéve avei ikatu ñanekonsola ñañemoag̃uíramo Jehováre, ha jahejáramo haʼe osolusiona umi inhustísia itiempoitépe (Sal. 7:17; 73:28). Oiméramo jahasa asy hína peteĩ inhustísia káusare térã ojejapo haguére ñanderehe peteĩ mbaʼe ivaíva, ñanemanduʼa vaʼerã ‘Jehová ag̃ui oĩha umi osufrívagui’ (Sal. 34:18). Haʼe ñanderayhu ñanepasiénsia haguére ha ñamoĩ rupi ipópe umi mbaʼe ñandepyʼapýva (Sal. 55:22). Haʼe hína pe Hués ohusgáva ko yvy kompletoite. Jehová ohecha voi opa mbaʼe oikóva (1 Ped. 3:12). Upévare, jahasa jave umi provléma ijetuʼúva ha ndaikatúiva ñasolusiona, ñanemanduʼa vaʼerã iñimportanteha ñahaʼarõkuaa ha jareko esperánsa Jehováre. w21.08 11 párr. 14; 12 párr. 16

Jadesidíramo iñarandúvaicha jadesidíta jajapo umi mbaʼe ombovyʼátava Jehovápe. Jahechakuaákena mbaʼépa la iñimportantevéva. Sapyʼánteko jareko heta mbaʼe jajapo vaʼerã, péro umívagui jaelehi vaʼerã pe iñimportantevéva. Upéva ndeʼiséi umi mbaʼe ñambotapykue vaʼekue ivaiha, ndahaʼéinte la iñimportantevéva. Péicha jadesidíramo jaaprovecha porãta pe tiémpo jarekóva. Ñantende porã hag̃ua ko téma ñañeʼẽta Marta rehe. La Biblia omombeʼu Jesús oho hague ovisita Marta ha Maríape, ha katuete Marta ovyʼaitereíne raʼe Jesús ou haguére ovisita chupekuéra. Upévare haʼe oñepyrũ okosina heta mbaʼe. Péro haʼe okosina aja, iñermána María oho oguapy Jesús renondépe ha ojapysaka hese. Marta ningo imbaʼeporãsénte kuri Jesúndi ha ndaivaíri upéva, péro María “oelehi pe párte iporãvéva” (Luc. 10:38-42). Kon el tiémpo oiméne María ni naimanduʼavéima mbaʼépa hoʼu raʼe upe díape, péro ñaĩkuaa segúro núnka ndahesarái hague umi mbaʼe Jesús omboʼe vaʼekuégui chupe. María omombaʼe vaʼekue pe tiémpo ikatúva ohasa Jesúndi, ha ñande ñamombaʼe avei pe tiémpo ikatúva jahasa Jehovándi. w22.01 27 párr. 5, 6

Acab oñemomirĩramo jepe Jehová renondépe, umi mbaʼe ojapo vaʼekue upe rire ohechauka noñarrepentíri hague ipyʼaite guive. Por ehémplo, haʼe noñehaʼãi ohundi pe adorasión oñemeʼẽva Baálpe, ni nomokyreʼỹi umi héntepe oadora hag̃ua Jehovápe. Acab omano rire, Jehová oikuaauka vaʼekue mbaʼépa opensa hese. Proféta Jehú rupive heʼi vaʼekue hese ‘iñañaha’ (2 Crón. 19:1, 2). Ñapensamína ko mbaʼére: Oiméramo Acab oñarrepenti raʼe ipyʼaite guive, pe proféta ndeʼimoʼãi kuri hese iñañaha ha ndaijaʼeiha Jehováre. Jahechakuaa upéicharõ Acab núnka noñarrepentíri hague ipyʼaite guive, ombyasyʼíramo jepe la ojapo vaʼekue. ¿Mbaʼépa ñanemboʼe Acab ehémplo? Elías heʼírõ guare Acábpe ojekastigataha chupe ha ifamíliape, haʼe ñepyrũrã oñemomirĩ, ha upéva oĩ porã kuri. Péro upéi umi mbaʼe ojapóva ohechauka haʼe noñarrepentíri hague ipyʼaite guive. Upéicharõ ñañarrepenti ndeʼiséi ñambyasynteha sapyʼaitemi la jajapo vaʼekue. w21.10 3 párr. 4, 5, 7, 8

Isaías ningo haʼe vaʼekue Jehová proféta ha provávlemente hembireko oreko vaʼekue avei peichagua asignasión. Upéicha rupi ojeʼe hese “pe profetísa” (Is. 8:1-4). Isaías ha hembireko omotenonde vaʼekue oñondive Jehová servísio. ¿Mbaʼéichapa koʼág̃arupi avei umi matrimónio ikatu osegi Isaías ha hembireko ehémplo? Ojapóvo opa ikatúva Jehová servísiope. Haʼekuéra ikatu omombarete ijerovia Jehováre ostudiávo oñondive umi profesía bíblica, ha ohechávo mbaʼéichapa umíva siémpre oñekumpli (Tito 1:2). Ikatu ojepyʼamongeta hikuái ha ohecha mbaʼéichapa ikatu opartisipa oñekumpli hag̃ua umi profesía, por ehémplo pe profesía Jesús omeʼẽ vaʼekue heʼíva ojepredika vaʼerãha ko yvy tuichakuére og̃uahẽ mboyve pe fin. Amáske peteĩ matrimónio ohecha mbaʼéichapa oñekumpli umi profesía bíblica, ikyreʼỹvétantema hikuái ojapo hag̃ua opa ikatúva Jehová servísiope. w21.11 16 párr. 9, 10

Jesús ojepyʼapy vaʼekue isýre, pórke amalisia haʼe viúdama vaʼekue upérõ. Haʼe ohayhu vaʼekue isýpe, ha ojasegurase ojesegitaha oñeñangareko hese. Upévare ojerure Juánpe okuidami hag̃ua Maríare, pórke haʼe oikuaa Juan oipytyvõtaha chupe osegi hag̃ua oservi Jehovápe. Upe día guive Juan oiko María membýicha, ha oñangareko hese haʼeramoguáicha isy. ¡Ajépa ohayhuete Jesús isýpe, mborayhúpe oñangareko vaʼekue hese michĩete guive, ha koʼág̃a oĩva hína ijykére pe haʼe omanotahápe! ¿Mbaʼépa ikatu ñaaprende pe Jesús heʼi vaʼekuégui? Pe amista jarekóva ñane ermáno ha ermanakuérandi ikatu voi imbareteve pe amista jarekóvagui ñane parientekuérandi. Ñane parientekuéra ningo ikatu oñemoĩ ñanderehe, térã ñandereja rei jepe. Péro Jesús opromete vaʼekue jasegíramo ñañemoag̃ui Jehováre ha iñorganisasiónre, oñemeʼẽtaha ñandéve “100 vése mas” upe jaheja vaʼekuégui. Ha oĩta voi umi haʼétava ñandéve g̃uarã peteĩ taʼýra, tajýra, sy térã túa (Mar. 10:29, 30). ¿Mbaʼéichapa ñañeñandu ñaime haguére ko família tuichaitévape, oĩva en unida ojoayhu rupi ha avei ojerovia ha ohayhu rupi Jehovápe? (Col. 3:14; 1 Ped. 2:17). w21.04 9-11 párr. 7, 8

Pe mborayhu ifiélva ñanemomýi jajapo hag̃ua hetave mbaʼe upe oñehaʼarõvagui. Oiko haguéicha yma, ñane tiémpope avei Ñandejára siervokuéra odesidi ohechaukataha mborayhu ifiélva iñermáno ha iñermanakuérape, ndoikuaáiramo jepe chupekuéra. Por ehémplo, oikuaa jave oiko hague peteĩ desástre naturál, umi ermáno pyaʼe voi oporandu mbaʼépa ikatu ojejapo oñepytyvõ hag̃ua chupekuéra. Ha kongregasiónpe oĩ jave ojejopy vaíva ekonómikamente, umi ermáno pyaʼe voi ohecha mbaʼe mbaʼépa ofalta upe persónape ha oipytyvõ chupe. Ojapo haguéicha síglo primérope umi kristiáno Macedoniagua, ñane ermanokuéra ojapo hetave mbaʼe upe oñehaʼarõvagui chuguikuéra. Haʼekuéra ningo ojesakrifika iñermanokuéra oikotevẽva rehehápe omeʼẽvo chupekuéra itiémpo ha imbaʼerepy. Añetehápe “omeʼẽve voi upe orekóvagui” (2 Cor. 8:3). Koʼág̃arupi avei umi ansianokuéra ohechakuaa la ojapóva umi ermáno oipytyvõ hag̃ua umi oikotevẽvape ajúda, ha oguerohory chupekuéra. Péicha mborayhúpe oñeñeʼẽramo chupekuéra, haʼekuéra katuete ikyreʼỹ ha imbaretéta osegi hag̃ua oipytyvõ ótrope (Is. 32:1, 2). w21.11 11 párr. 14; 12 párr. 21

Enterovéva ningo ñaikotevẽ káda siérto tiémpo oñemeʼẽ ñandéve konsého. Sapyʼánte ikatu ñande voi jajerure peteĩ ermánope ojapo hag̃ua upéva, osino katu álgien ojepyʼapýgui ñanderehe omeʼẽ ñandéve peteĩ konsého pono jaha “tape vaíre” (Gál. 6:1). Avése katu oñemeʼẽmante vaʼerã ñandéve peteĩ konsého pórke jajavy peteĩ mbaʼépe. Tahaʼe haʼeháicha, iñimportanteterei jajapo la ojeʼéva ñandéve pórke upéva ikatu hína ñandesalvaite (Prov. 6:23). Pe téxto koestediagua heʼi: “Ehendu porãkena umi konsého omeʼẽva ndéve umi iñarandúva”. Ndaipóri ningo peteĩ persóna oikuaáva entéro mbaʼe, siémpre jatopáta álgien ikatupyryvéva ñandehegui térã iñexperiensiavéva ñandehegui (Prov. 12:15). Upévare ñahendúramo umi konsého oñemeʼẽva ñandéve jahechaukáta hína ñaneumildeha, ñarrekonoseha umi mbaʼe ndaikatúiva jajapo, ha ñaikotevẽha álgien ñanepytyvõ jajapo hag̃ua umi mbaʼe jahupytyséva Jehová servísiope. Rréi Salomón heʼi vaʼekue voi: “Oĩhápe heta omeʼẽva konsého porã, ojehupyty heta mbaʼe” (Prov. 15:22). w22.02 8 párr. 1, 2

Peteĩ oñarrepentíva ipyʼaite guive ndahaʼéi ombyasýnteva pe mbaʼe vai ojapo vaʼekue. Haʼe okambia vaʼerã avei umi mbaʼe opensáva ha oñandúva. Ohejaite vaʼerã umi mbaʼe vai ojapo vaʼekue ha oñepyrũ jey oiko Jehová oipotaháicha (Ezeq. 33:14-16). Pe pekadórpe g̃uarã la iñimportantevéva hína oñemoĩ porã jey Jehovándi ha oreko hendive peteĩ amista iporãva. Péro ñamoĩ chupe peteĩ ñane amígo jahayhuetereíva opeka vai hague. ¿Mbaʼépa jajapo vaʼerã upéicha jave? Ñande ningo katuete japerhudikáta ñane amígope ñañehaʼãramo ñamoʼã pe mbaʼe vai ojapo vaʼekue. Péro rei voi ñañehaʼãta jajapo upéva, pórke Jehová ohechapaite hína la oikóva (Prov. 5:21, 22). Ñande ñaipytyvõséramo upe ñane amígope jaʼe vaʼerã chupe oñeʼẽ hag̃ua umi ansiánondi. Péro haʼe noñeʼẽséiramo umi ansiánondi, ñandete jaha vaʼerã ñamombeʼu chupekuéra la oiko vaʼekue. Upéicha jajapóramo jahechaukáta añetehápe ñaipytyvõseha ñane amígope. w21.10 7 párr. 19-21

Enterovéva ikatu jasegi Jesús ehémplo. La Biblia heʼi voi hese oiko hague “peteĩ esklávoicha” (Filip. 2:7). Peteĩ esklávo ivaliósova ningo oheka voi oportunida ojapo hag̃ua umi mbaʼe ogustáva ipatrónpe. Ha ñande ningo haʼe Jehová esklávo ha jaservise avei ñane ermanokuérape. Upévare jajapose opa ikatúva Jehová servísiope ha ñane ermanokuéra rehehápe. Eñeporandumína koʼã mbaʼe: “¿Aimépa dispuésto ajapóvo umi mbaʼe ndachegustáiva? ¿Añemotiémpopa aipytyvõ hag̃ua che ermanokuérape? ¿Ajeofresépa ambaʼapo hag̃ua de voluntário umi asambleahápe térã ojejapóta jave mantenimiénto Salón del Réinope?”. Ñamoĩ chupe rehechakuaaha tekotevẽha remehora koʼã mbaʼépe, péro ndahaʼéi la nekyreʼỹetereíva rejapo hag̃ua umi kámbio tekotevẽva. ¿Mbaʼépa ikatu rejapo upe kásope? Eñemboʼe Jehovápe nde pyʼaite guive. Emombeʼu porã chupe eikotevẽha haʼe omeʼẽ ndéve “pe deséo ha pe podér” eipytyvõ hag̃ua ermanokuérape (Filip. 2:13). w22.02 23 párr. 9-11

Jesús ningo imbaʼeporãiterei vaʼekue enterovéndi (Mat. 11:29, 30). Avei noñemohatãi vaʼekue haʼe heʼívape ha ojadapta umi héntere, sapyʼánte ijetuʼúramo jepe la situasión. Por ehémplo, peteĩ kuñakarai fenicia ojerurérõ guare chupe omonguerami hag̃ua imembýpe, primerorã haʼe heʼi porãnte chupe ke no. Péro ohechakuaávo pe kuñakarai ojeroviaitereiha Ñandejárare, ojapo la ojerure vaʼekue chupe ha omonguera la imemby (Mat. 15:22-28). Péro Jesús sapyʼánte ohechauka vaʼekue avei imbaʼeporãha okorrehívo umi ohayhúvape. Por ehémplo, peteĩ vuéltape Pedro oñehaʼã kuri ojoko Jesúspe ani hag̃ua ojapo Jehová volunta, péro upepete Jesús okorrehi chupe umi ótro apóstol rovake (Mar. 8:32, 33). Haʼe ndojapói upéva omotĩ hag̃ua Pédrope, síno omboʼe hag̃ua chupe peteĩ mbaʼe iñimportánteva, ha oipytyvõ hag̃ua umi ótro apóstolpe ani hag̃ua oñemombaʼeguasu. Katuete ningo Pedro otĩne raʼe, péro upéi tuichaiterei oipytyvõ chupe la Jesús heʼi vaʼekue. Ñanembaʼeporãramo umi jahayhúvandi, sapyʼánte tekotevẽta ñaakonseha chupekuéra ha ñanesinséro porã hendivekuéra. Péro iporãitereíta jasegíramo Jesús ehémplo, ha jareko enkuénta la Biblia heʼíva ñameʼẽta jave chupekuéra konsého. w22.03 11 párr. 12, 13

Ñande jaadora Jehovápe japredika jave (Sal. 34:1). Ñamombaʼeguasu chupe jaʼévo ñande rapichakuérape mbaʼeichaitépa ñande jahayhu ha jaguerohory umi mbaʼe Jehová ojapo vaʼekue, ha umi kualida porãite haʼe orekóva. Ñañemotiémporamo jajepyʼamongeta hag̃ua umi mbaʼe Jehová ojapóma vaʼekuére ñanderehehápe, siémpre jarekóta álgo iporãva jaʼe hag̃ua hese ótrope. Pe predikasión rupive ningo jareko peteĩ oportunida iporãitereíva ñameʼẽ hag̃ua Jehovápe peteĩ sakrifísio, ‘jaipurúvo ñande juru jaikuaauka hag̃ua héra enterove renondépe’. Ha ñañemotiempoháicha ñapensa porã hag̃ua umi mbaʼe jaʼétavare ñañemboʼe jave Jehovápe, upéicha avei ñapensa porã vaʼerã umi mbaʼe jaʼétavare umi hénte japredikávape. Ñande ningo ñameʼẽ jave ñande sakrifísio Jehovápe ñameʼẽse hína pe iporãvéva, upévare ñande ñanekyreʼỹeterei voi predikasiónpe. w22.03 21 párr. 8