Marzo

Apóstol Pedro, heʼi vaʼekue umi kristianokuérape oipuru hag̃ua umi avilida orekóva omokyreʼỹ hag̃ua iñermanokuérape. Haʼe heʼi vaʼekue voi: “Asegún pe rregálo perresivi vaʼekue káda uno Ñandejáragui, peipurúkena upéva peservi hag̃ua ótrope, pórke peẽ ningo siérvo ivaléva perresivi vaʼekue Ñandejára mbaʼeporã” (1 Ped. 4:10). Jajapo vaʼerã opa ikatúva jaipuru hag̃ua umi avilida jarekóva, ha ani jajepyʼapy oĩrõ g̃uarã ñaneenvidiáva térã oñedesanimáva upéva káusare. Péro ñañatende vaʼerã ani hag̃ua ñañemombaʼeguasu upévare (1 Cor. 4:6). Ñanemanduʼákena jarekóramo oimehaichagua avilida, umíva haʼeha rregálo oúva Jehovágui. Umi rregálo jaipuru vaʼerã ñamokyreʼỹ hag̃ua ermanokuérape, ndahaʼéi jajechauka hag̃ua (Filip. 2:3). Katuete javyʼáta ñañehaʼãmbaitéramo jajapo Jehová volunta, ha jaipurúramo umi avilida jarekóva iservísiope. Ñande jajapo upéva, ndahaʼéi jajechauka hag̃uánte térã ñapenságui ñaneimportanteveha umi ótrogui, síno jaipuruségui umi avilida jarekóva ñamombaʼeguasu hag̃ua Jehovápe. w22.04 11, 12 párr. 7-9

Jesús omombaʼeterei vaʼekue Ñandejára Ñeʼẽ, ha pe haʼe oñandúva Ñandejára Ñeʼẽre ojeprofetisa vaʼekue voi Salmo 40:​8-pe. Upépe heʼi: “Ñandejára, avyʼaiterei ajapo haguére ne rembipota, che areko nde léi che korasõme”. Upéicha rupi haʼe ovyʼa vaʼekue ha oservi porã Jehovápe. Ñande avei ikatu javyʼa ha jaservi Jehovápe jaleéramo la Biblia ha ñañehaʼãmbaite og̃uahẽ hag̃ua upéva ñane korasõme (Sal. 1:​1-3). Umi mbaʼe heʼi vaʼekue Jesús ha iñehémplo ñanepytyvõ ñamehorave hag̃ua jaleévo la Biblia. Ñantende porãve hag̃ua umi rreláto bíblico ikatu ñañemboʼe, jalee mbegueve, jajapo umi pregúnta ha ñaanota mbyky mimi umíva. Ikatu avei ñantende la jaleéva ñaanalisa porãvo pe informasión ha upearã ñanepytyvõta jaipurúramo umi ñane puvlikasión bíblica. Jahejáta avei Ñandejára Ñeʼẽ ñandegia jasegíramo ñande aktitu porã jalee jave. Ñande ñañehaʼãmbaitéramo jajapo koʼã mbaʼe, ideprovechovéta ñandéve la jaleéva la Bíbliape ha ñañemoag̃uivéta Jehováre (Sal. 119:17; Sant. 4:8). w23.02 13 párr. 15, 16

Iporãta jahecharamo mbaʼe ipyahúvapa ikatu ñaaprende, ha upéi jahecha mbaʼe mbaʼépa ikatu jajapo jahupyty hag̃ua upe méta. Ñamoĩ chupe ñañehaʼãseha ñamboʼe porãve hag̃ua ñande rapichakuérape. Upearã ikatu jastudia pe folléto Jalee ha ñamboʼe porãve hag̃ua. Ha oñemeʼẽ jave ñandéve peteĩ párte pe rreunión éntre semanaguápe, ikatu jajerure peteĩ ermáno iñexperiénsiavape tohendu de antemáno la ñande párte ha tañandekorrehi tekotevẽhápe. Ñañehaʼã vaʼerã japrepara voi reheve ñande partekuéra, péicha umi ótro ohechakuaáta ñanerresponsavleha ha ñañehaʼãha ñakumpli porã umi asignasión oñemeʼẽva ñandéve (2 Cor. 8:22). Ñamoĩ chupe jaikuaamaha mbaʼépepa ñamehorase, péro ni ñañehaʼãvéramo jepe nosẽi ñandéve. Upéicha jave, ¡aníkena eñentrega! La Biblia ndeʼíri mbaʼeichaite pevépa Timoteo ivale vaʼekue ojapo hag̃ua diskúrso ha omboʼe hag̃ua la héntepe. Péro si jaikuaa haʼe tuichaiterei oprogresa hague ha okumpli porãve hague umi rresponsavilida orekóva, osegi rupi pe konsého Pablo omeʼẽ vaʼekue chupe (2 Tim. 3:10). w22.04 24 párr. 8-11

¿Mávapepa orrepresenta pe animál salváhe 7 iñakãva? Péva pe animál salváhe ojogua peteĩ jaguaretépe, péro la ipy ojogua umi óso pýpe, ijuru umi león jurúpe ha avei oreko 10 hatĩ. Entéro koʼã mbaʼe ojogua avei umi ótro animál salváhe oñeñeʼẽha Daniel kapítulo 7-pe. Péro lívro de Apocalípsispe ndahaʼéi oĩva 4 animál salváhe orekóva apárte apárte koʼã mbaʼe síno peteĩnte. Ha ikatu jaʼe ko animál salváhe norrepresentaiha peteĩ goviérnopente térã peteĩ poténsia mundiálpente. Ojeʼe hese omandaha ‘entéro trívu, puévlo, ha umi oñeʼẽvare diferénte idióma ha oĩva entéro tetãme’. Upévare ikatu jaʼe ndahaʼeiha peteĩ goviérno omandáva peteĩ país rehe añónte (Apoc. 13:7). Upéicharõ, ¿mávapepa orrepresenta ko animál salváhe ohecha vaʼekue Juan? Orrepresenta hína entéro umi poténsia mundiál oexisti vaʼekue ymaite guive (Ecl. 8:9). La Bíbliape ojepuru jepi pe número 10 oñeñeʼẽ hag̃ua peteĩ mbaʼe haʼévare kompléto. w22.05 9 párr. 6

¿Mávapepa oipytyvõta koʼã mbaʼe? Primeroite voi pe aty guasu osovrevivívape pe gérra de Armagedón, ha upe rire avei umi mitã onasévape pe múndo pyahúpe. Péro ndahaʼéi chupekuérante, pórke lívro de Apocalipsis kapítulo 20 omombeʼu avei ñandéve oĩtaha hetaiterei oñemoingove jeýva (Apoc. 20:​11-13). Koʼãva apytépe oĩ umi “ihústova”, ha avei umi ‘iñinhústova’ térã umi ndorekói vaʼekue la oportunida oikuaávo Jehovápe (Hech. 24:15; Juan 5:​28, 29). ¿Heʼisépa upéva enterovete umi omano vaʼekue oikove jeytaha pe Rreinádo de Mil áño aja? Nahániri. Umi iñañágui odesidi vaʼekue ndoservimoʼãiha Jehovápe omano mboyve, ndorresusitamoʼãi. Haʼekuéra orekóma kuri la iñoportunida oikuaa hag̃ua Jehovápe ha odesidi voi orrechasataha upéva. Upéicha rupi haʼekuéra ndorekói derécho oĩvo pe paraísope (Mat. 25:46; 2 Tes. 1:9; Apoc. 17:8; 20:15). w22.05 18 párr. 16, 17

Jesús ojevale ‘pe esklávo de konfiánsa ha iñarandúvare’ ikatu hag̃uáicha omoñepyrũ peteĩ organisasión ijojahaʼỹva ko yvy ape ári ojeadora hag̃ua Jehovápe haʼe oipotaháicha (Mat. 24:45). ¿Mbaʼépa nde repensa ko organisasiónre? Ikatu oime eñeñandu Pedro oñeñandu haguéicha, haʼe heʼi vaʼekue Jesúspe pe téxto koestediaguápe jatopáva. ¿Mbaʼépa oiko vaʼerãmoʼã ñandehegui ndajaikuaáirire Jehová organisasiónpe? Añetehápe péva rupive Jesús ojasegura omeʼẽ hag̃ua ñandéve entéro mbaʼe ñaikotevẽva jasegi hag̃ua ñaneñeʼẽrendu Ñandejárape. Ñanemboʼe ikatu hag̃uáicha ñandekatupyry ñaporomboʼekuaa hag̃ua. Avei ñanepytyvõ ñamonde hag̃ua “pe kondúkta pyahu” ikatu hag̃uáicha Jehová ñandeguerohory (Efes. 4:24). Jesús ñandedirihi porãiterei umi tiémpo ijetuʼúvape. Ha upéva ojekuaa porãiterei oñepyrũrõ guare pe pandémia de COVID-19. Upérõ heta hénte oĩva ko múndope ndoikuaái kuri mbaʼépa ojapóta, péro Jesús ojasegura ñande jarresivi hag̃ua pe gía ñaikotevẽva jajeprotehe hag̃ua. w22.07 12 párr. 13, 14

Jehová heʼi voi vaʼekue umi israelítape omboʼe meme vaʼerãha ifamiliakuérape oikuaa hag̃ua chupe (Deut. 6:​6, 7). Koʼã tuakuéra oreko vaʼekue heta oportunida ikatu hag̃uáicha oñemongeta ifamiliakuérandi, ha péicha omboʼe chupekuéra ohayhu hag̃ua Jehovápe. Por ehémplo, peteĩ mitãʼi israelita ikatu vaʼekue ohasa heta óra itúandi ombaʼapo aja kokuépe. Ha iñermaníta ikatu ohasa heta tiémpo isýndi ojapóvo umi tembiapo ogapypegua. Péicha umi tuakuéra ha umi mitãnguéra ombaʼapo rupi oñondive heta tiémpo, ikatu oñemongeta hikuái heta mbaʼe iñimportántevare. Por ehémplo, ikatu oñemongeta hikuái mbaʼeichaitépa Jehová imbaʼeporã ha okuida porã hesekuéra. Heta paíspe por ehémplo umi tuakuéra ndaikatúi ohasa heta tiémpo ifamíliandi, haʼekuéra oĩ rupi itravahohápe ha umi mitãnguéra katu oĩ eskuélape. Upévare tuakuéra tekotevẽ oheka peteĩ oportunida oñemongeta hag̃ua ifamíliandi (Efes. 5:​15, 16). w22.05 28 párr. 10, 11

Umi pekádo vai oñemoĩ Jehová heʼívare. Oĩramo ermáno hoʼáva koʼãichagua pekádope, tekotevẽ oñemboʼe Jehovápe ha ojerure operdonami hag̃ua chupe, avei tekotevẽta oñeʼẽ umi ansianokuérandi (Sal. 32:5; Sant. 5:14). ¿Mbaʼe rresponsavilidápa oguereko umi ansiáno? Añetehápe Jehová añoite ikatu operdona peteĩ opekávape, ha haʼe ojapo upéva Jesús sakrifísio rupive. Upéicharõ jepe Jehová omeʼẽ la rresponsavilida umi ansiánope oipurúvo Iñeʼẽ ohecha hag̃ua peteĩ pekadórpa oñemosẽta kongregasióngui térãpa nahániri (1 Cor. 5:12). Upearã umi ansiáno ogueraha enkuénta koʼã porandu: ¿Pe persónapa opeka raʼe oikuaa porãramo jepe ivaiha upe ojapóva? ¿Oñomisépa raʼe pe pekádo? ¿Opekápa hína oikóvo raʼe peteĩ tiémpore térãpa koʼág̃ante hoʼa upe pekádope? Ha la iñimportantevéva katu, ¿oñarrepentípa ipyʼaite guive? ¿Oĩpa pruéva ohechaukáva Jehová operdonáma hague chupe? (Hech. 3:19). w22.06 9 párr. 4

Jesús omokyreʼỹ vaʼekue isegidorkuérape oipota hag̃ua oĩ hustísia (Mat. 5:6). Upéva heʼise ñande tekotevẽha jareko pe deséo ñande pyʼaite guive voi jajapóvo pe oĩ porãva, ihústova ha ipotĩva Ñandejára renondépe. ¿Ndépa rehayhu pe añetegua ha umi mbaʼe oĩ porãva? Katuete upéicha hína. Ndéve nandegustaiete voi pe japu ha entéro mbaʼe oĩ vaíva ha oĩva hendapeʼỹ (Sal. 119:​128, 163). Pe japu ou Satanásgui, pe ogovernáva ko múndo (Juan 8:44; 12:31). Satanáspe hiʼãiterei omongyʼa Jehová réra. Upévare Satanás oñeʼẽ vai Ñandejárare ha omosarambi umi japu oheja vai hag̃ua chupe, ojapo upéva yma opuʼã ypy guive ikóntrape Edénpe. Haʼe opresenta voi Jehovápe haʼeramoguáicha peteĩ governánte opensáva ijehénte, naiñonrrádoiva, hakateʼỹva heta mbaʼe porãre ha heʼi nomeʼẽseiha voi yvyporakuérape umíva (Gén. 3:​1, 4, 5). Umi japu Satanás heʼíva káusare heta hénte opensa vaíma Jehováre. Umi hénte odesidi jave ndohayhumoʼãiha pe añetegua, Satanás ojapoka chupekuéra opaichagua inhustísia ha mbaʼe vai (Rom. 1:​25-31). w23.03 2 párr. 3

Ikatu hína nde reñehaʼãmbaite reheja hag̃ua peteĩ mbaʼe ndogustaietéva Jehovápe, péro sapyʼánte rejapo jey upéva. Avei ikatu repensa hetaiterei gueteri ofaltaha ndéve rejevautisa hag̃ua. Upéicha rupi reñandu nanepohãveimaha ha rejedesespera. ¿Mbaʼépa ikatu nepytyvõ rembohovái porã hag̃ua koʼã mbaʼe? Pe mborayhu reñandúva Jehováre. Pe mborayhu reñandúva Jehováre haʼe pe kualida iporãvéva erekóva (Prov. 3:​3-6). Rehayhúramo Jehovápe nde pyʼaite guive, rembohovái porãta umi provléma. La Biblia heʼi Jehová ohechaukaha mborayhu ifiélva isiervokuérare. Ko mborayhu ifiél ha núnka ndopái. Ndéve Jehová ndeapo vaʼekue ijoguaháramo (Gén. 1:26). Upéicharõ, ¿mbaʼéichapa nde ikatu rehechauka peichagua mborayhu? Ehechaukákena ndeagradesidoha (1 Tes. 5:18). Iporãta káda día eñeporandúramo: “¿Mbaʼéichapa koestedía Jehová ohechauka chéve cherayhuha?”. Ha upe rire eagradese Jehovápe káda uno umi mbaʼe ojapo vaʼekuére nderehehápe. Ehechakuaákena opa mbaʼe Jehová ojapóva guive nderehehápe ojapoha nderayhu rupi ha haʼeha ndéve g̃uarãite voi. w23.03 12 párr. 17-19

Jesús siémpre iñamávle ha otrata vaʼekue mborayhúpe umi 12 ijapóstolpe. ¿Mbaʼépa ñaaprende chugui? Jaiko rangue ñañesentra ñane ermanokuéra fállare, la iñimportánteva hína ñañatende mbaʼéichapa ñande ñarreaksiona haʼekuéra ojavy jave. Upévare, oiméramo ñandepochy hína peteĩ ñane ermánondi iporã ñañeporandumi: “¿Mbaʼérepa la chembopochyete pe ojapo vaʼekue? ¿Ohechaukápa hína chéve ko situasión tekotevẽha amehorave álgope? ¿Noiméipa pe ermáno ohasa hína peteĩ provlémare? ¿Ikatúpa ahechauka chupe ahayhuha ha ambohasa reínte umi mbaʼe ojapo vaʼekue apensáramo jepe arekoha la rrasón?”. Amáske jatrata mborayhúpe ñane ermanokuérape jahechauka hína ñande haʼeha kristiáno tee. Jesús ehémplo ñanemboʼe avei iporãha ñañehaʼã ñantende ñane ermanokuérape (Prov. 20:5). Ñande ndaikatúi jaikuaa la oĩva peteĩ persóna korasõme, Jesús ojapo haguéicha. Upévare tekotevẽterei jareko enkuénta ñane ermanokuéra iñimperfektoha ha upévare ñanepasiénsia vaʼerãha hesekuéra ojavy jave (Efes. 4:​1, 2; 1 Ped. 3:8). Ifasilvéta jajapo hag̃ua upéva ñañehaʼãramo jaikuaa porãve chupekuéra. w23.03 30 párr. 14-16

Sapyʼánte umi hénte oĩva Satanás poguýpe ñaneamenasa ñandejukataha nañañentregáiramo ha ndajahejáiramo ñande jerovia. Térã Satanás ojaprovecha ñanderehe jajecha vai jave ñanderasykatu rupi ha oñehaʼã oipuru upéva jaheja hag̃ua Jehovápe. Ikatu voi umi doktór térã ñane hentekuéra ndahaʼéiva Testígo ñandejopy ñamoĩka hag̃ua tuguy, péro jaikuaa Jehová léi heʼiha oĩ vaiha upéva. Térã ikatu oĩ umi ñandejopýva jaasepta hag̃ua peteĩ tratamiénto oñemoĩva la Biblia heʼívare. Ñande jaikuaa ñamanóramo jepe, Jehová osegitaha ñanderayhu, upéva ndojokomoʼãi chupe (Rom. 8:​37-39). Peteĩ Jehová amígo omanóramo, haʼe osegi imanduʼa hese, chupe g̃uarã haʼete voi ku osegíva oikove hína (Luc. 20:37). Jehová ohechaseterei jeýma chupekuéra oikove jeývo (Job 14:15). Jehová hepyeterei voi opaga ‘ikatu hag̃uáicha jaikove pára siémpre’ (Juan 3:16). Ñande jaikuaa mbaʼeichaitépa Jehová ñanderayhu ha ojepyʼapy ñanderehe. Upévare haʼe nañanderejamoʼãi asy ñanderasykatu jave térã ñaime mbaʼéramo ñamano hag̃uáicha. Upéicha jave jajerovia hese ikatu hag̃uáicha ñanekonsola, ñanemoarandu ha ñanemombarete (Sal. 41:3). w22.06 18 párr. 16, 17

La Biblia heʼi: “Nearandu hag̃ua, primeroite rerrespeta vaʼerã Jehovápe, ha neentendído hag̃ua, reikuaa porã vaʼerã pe Dios Santísimope” (Prov. 9:10). Upéicharõ jadesidíta jave peteĩ mbaʼe iñimportánteva jareko vaʼerã enkuénta la Jehová opensáva, térã ‘jaikuaa porã vaʼerã pe Dios Santísimope’. Upéva ikatu jajapo jahecháramo mbaʼépa heʼi la Biblia ha umi ñane puvlikasionkuéra. Jajapóramo upéicha jahechauka hína jaguerekoha pe arandu añeteguáva (Prov. 2:​5-7). Jehová añoite haʼe upe ikatúva omeʼẽ pe arandu añeteguáva (Rom. 16:27). ¿Mbaʼérepa ikatu jaʼe pe arandu añeteguáva ouha Jehovágui añoiténte? Primero, pórke Jehová okrea vaʼekue entéro mbaʼe ha haʼe oikuaa porã avei ikreasión (Sal. 104:24). Segundo, entéro mbaʼe Jehová ojapóva ohechauka haʼe iñaranduetereiha (Rom. 11:33). Tercero, umi konsého oúva Jehovágui siémpre ideprovechoiterei ñandéve ñamoĩramo en práktika (Prov. 2:​10-12). Jaguerekoséramo pe arandu añeteguáva, jahechakuaa vaʼerã Jehová añoite ikatuha omeʼẽ ñandéve upéva, ha ikatuha ñandegia jadesidi térã jajapóta jave peteĩ mbaʼe. w22.10 19 párr. 3, 4

Satanás operde pe ñorairõ oñemombeʼu haguéicha Apocalipsis kapítulo 12-pe, ha oñemombo chupe ha idemoniokuérape ko yvy ape ári. Satanás ipochyeterei operde haguére pe ñorairõ ha upévare ojapo heta mbaʼe vai ko yvy ape ári (Apoc. 12:​9-12). ¿Mbaʼéichapa ñanevenefisia koʼã profesía? Umi mbaʼe oikóva ko múndope ha umi hénte oñekomporta lája ohechauka porãiterei ñandéve Jesús ogovernamaha. Upévare ñande ñandepochy rangue jahechávo oĩha hetaiterei persóna opensáva ijehénte ha iñañaitereíva, ñanemanduʼa koʼã mbaʼe okumpliha hína umi profesía bíblica, ha Ñandejára Rréino ogovernamaha (Sal. 37:1). Upévare ñahaʼarõkuaa la situasión ivaive amáske hiʼag̃uive ohóvo Armagedón (Mar. 13:8; 2 Tim. 3:13). Ajépa jaagradesete ñande Ru ñanderayhuetévape oikuaauka haguére ñandéve mbaʼérepa oiko hetaite mbaʼe vai ko múndope. w22.07 3, 4 párr. 7, 8

Ikatu voi jajerure Jehovápe oipytyvõmi hag̃ua ñane ermanokuérape ikatu hag̃uáicha oaguanta oiméramo hasykatu, oiko umi desástre naturál, gérra, ojepersegi chupekuéra, térã ohasa ótra situasión ijetuʼúva. Ikatu avei ñañemboʼe umi ermanokuéra ojesakrifikávare oipytyvõ hag̃ua umi oikotevẽvape. Ikatu voi oime nde reikuaa hína álgien ohasávape peichagua situasión ijetuʼúvare. ¿Ikatúnepa nemanduʼami hese ne ñemboʼépe? Jajeruréramo Jehovápe oipytyvõmi hag̃ua chupekuéra oaguanta hag̃ua, jahechauka hína jahayhu añeteha ñane ermanokuérape. Umi ermáno ogiáva pe kongregasión oagradeseterei ñande ñanemanduʼa haguére hesekuéra ñane ñemboʼépe, ha umíva oipytyvõ voi chupekuéra. Por ehémplo, apóstol Pablo oikuaa vaʼekue oikotevẽha ótro oñemboʼe hesehápe. Haʼe oskrivi vaʼekue: “Peñemboʼe avei cherehe, ikatu hag̃uáicha aikuaa mbaʼépa haʼéta añeʼẽta vove ha péicha apredika hag̃ua pyʼaguasúpe umi notísia porã, haʼéva hína peteĩ sekréto sagrádo” (Efes. 6:19). Koʼág̃arupi avei oĩ heta ermanokuéra ñandegiáva hína ha ombaʼapo jejopýva ñande apytépe. Ha ñande jahechauka jahayhuha chupekuéra jajerurévo Jehovápe ovendesi hag̃ua umi mbaʼe ojapóva hikuái. w22.07 23, 24 párr. 14-16

Peteĩ soldádo omoĩ iñakãre pe kásko. Ñande avei ñañorairõ Satanásndi, ha japrotehe vaʼerã ñane akã umi atáke opoívagui ñane kóntrape. Haʼe oipuru diferénte mbaʼe ñanemoñuhã hag̃ua, ojevale umi tentasiónre térã idéa naiporãivare ombyai hag̃ua umi ñane pensamiénto. Pe kásko oproteheháicha peteĩ soldádo akã, ñane esperánsa avei oprotehe umi ñane pensamiénto jasegi hag̃ua ñandefiél Jehovápe. Péro jajúramo ñapensa ñameʼẽvo gústo ñandejupénte, ñane esperánsa ikatu ou ikangy. Ñapensamíntena unos kuánto kristiáno oiko vaʼekuére siuda de Coríntope. Haʼekuéra ou vaʼekue ndojeroviavéi pe esperánsa de la rresurreksiónre, haʼéva peteĩ promésa iporãitereíva Ñandejára omeʼẽva (1 Cor. 15:12). Pablo heʼi vaʼekue entéro umi ndogueroviáiva oikotaha pe rresurreksión oikoha omeʼẽ hag̃ua gústo ijupénte (1 Cor. 15:32). Koʼág̃arupi avei oĩ heta ndojeroviáiva Ñandejára promesakuérare, upévare ojapo chupekuéra ogustávante ha ojapo la ojaposéva. Péro ñande ñanediferénte, pórke jajerovia Ñandejára promesakuérare oñekumplítava amo gotyove. w22.10 25, 26 párr. 8, 9

Jehová oipotaiterei voi ñañemboʼe chupe. Haʼe ohecha umi provléma ñande jarekóva ha oasegura ñandéve ohendutaha ñane ñemboʼe oimeha órape. Haʼe ipyʼarory voi ohendúvo isiervokuéra oñemboʼeha chupe (Prov. 15:8). ¿Mbaʼépa ikatu jaʼe Jehovápe ñañeñandu jave ñaneaño? Ikatu ñamombeʼu Jehovápe mbaʼéichapa ñañeñandu (Sal. 62:8). Emombeʼúkena Jehovápe umi mbaʼe nekevrantáva ha mbaʼéichapa reñeñandu. Ejerure avei Jehovápe tanepytyvõ eikuaa hag̃ua mbaʼépa ikatu ejapo eñeñandu jave neaño térã nderevyʼái jave. Ha ikatu ejerure chupe tanembopyʼaguasu ha tanemoarandu eexplika porãnte hag̃ua umi mbaʼe regueroviáva (Luc. 21:​14, 15). ¿Ha mbaʼépa ikatu ejapo oiméramo eñedeprimi térã eñedesanima? Ikatu ejerure Jehovápe tanepytyvõ eñanima hag̃ua eñemongeta peteĩ kristiáno iñexperiénsiavandi, ha oipytyvõmi hag̃ua upe persónape ontende hag̃ua mbaʼéichapa nde eñeñandu. Ehecha avei mbaʼéichapa haʼe orresponde umi ne ñemboʼe ha easepta oĩ jave álgien nepytyvõséva. Ejapóramo entéro koʼã mbaʼe, katuete menove reñeñandúta neaño. w22.08 10 párr. 6

Oñeforma riremi pe kongregasión de Tesalónica, umi ermáno pyahu ombohovái peteĩ persekusión imbaretetereíva. Peteĩ hénte aty iñañaitereíva ojagarra ombotyryry umi “ermanokuérape umi governánte upe siudapegua renondépe” (Hech. 17:6). Ikatu ñañeimahina mbaʼeichaitépa oiméne oñemondýi raʼe koʼã kristiáno pyahu. Haʼekuéra ikatu kuri menovénte ikyreʼỹ Jehová servísiope, péro apóstol Pablo ndoipotái kuri upéva oiko. Upévare haʼe ojasegura oñeñangareko porã hag̃ua pe kongregasión pyahúre. Pablo omomanduʼa voi umi Tesalonicaguápe: ‘Romondo pene rendápe Timotéope penemombarete ha penekonsola hag̃ua ha pende jerovia imbareteve hag̃ua, ani hag̃ua avave ikangy umi jehasa asy káusare’ (1 Tes. 3:​2, 3). Timoteo oiméne ohecha vaʼekue mbaʼéichapa Pablo omombarete iñermanokuérape Lístrape. Timoteo ohecha vaʼekue mbaʼéichapa Jehová oipytyvõ chupekuéra. Upévare haʼe oasegura vaʼekue umi ermanokuéra pyahúpe osẽ porãtaha avei entéro mbaʼépe (Hech. 14:​8, 19-22; Heb. 12:2). w22.08 21 párr. 4

Áño 1870-rupi, Charles Taze Russell ha unos kuánto omoirũva chupe oñepyrũ ostudia porã la Biblia. Haʼekuéra ojapo upéicha ontende porã hag̃ua mbaʼépa ojehupyty Jesús sakrifísio rupive ha mbaʼéichapa ojegueromanduʼa vaʼerã upéva. Koʼag̃aite peve ideprovécho ñandéve la oaprende vaʼekue hikuái. Koʼág̃a ñantende porãvéma maʼerãpa Jesús ojesakrifika rakaʼe ha mbaʼépepa ñanepytyvõ upéva (1 Juan 2:​1, 2). Koʼág̃a jaikuaáma avei oĩha mokõi esperánsa. Oĩ umi ohótava yvágape oikove hag̃ua pára siémpre ha upépe la hetekuéra noñembyaimoʼãi arakaʼeve. Ha oĩ umi opytátava ko yvy ape ári oiko hag̃ua avei pára siémpre. Tuicha jahayhuve Jehovápe ñantende porãvo mbaʼeichaite pevépa Haʼe ñanderayhu ha mbaʼéichapa ñanepytyvõ Jesús sakrifísio (1 Ped. 3:18). Upévare, ojapo haguéicha ñane ermanokuéra yma guare, ñande avei ñainvita la héntepe ou hag̃ua pe Konmemorasiónpe ogueromanduʼa hag̃ua Jesús sakrifísio haʼe oipota hagueichaite. w23.01 21 párr. 6, 7

Jesús omboʼe vaʼekue umi héntepe heta mbaʼe porã ojapótava Ñandejára Rréino. ¡Ajépa ñamombaʼete Jesús sakrifísio! Péicha rupínte ikatu oiko ñandehegui Jehová ha Jesús amígo. Jajeroviáramo Jesús sakrifísiore ikatúta jaikove opa árare, avei ikatúta jahecha jey umi persóna jahayhúva omano vaʼekuépe (Juan 5:​28, 29; Rom. 6:23). Ñande ndajajapói mbaʼevete asy ñamerese hag̃ua koʼã mbaʼe porã, ha hiʼarive arakaʼeve ndaikatumoʼãi japaga Jehová ha Jesúspe entéro umi mbaʼe ojapo vaʼekuére ñanderehehápe (Rom. 5:​8, 20, 21). ¿Mbaʼéichapa ikatu jahechauka jaagradesetereiha chupekuéra? Jaipurúvo umi mbaʼe jarekóva jaapoja hag̃ua umi traváho ojejapóva Jehová organisasiónpe. Por ehémplo, ikatu jajeofrese ñambaʼapo hag̃ua konstruksiónpe térã jajapo hag̃ua mantenimiénto umi lugár ojepurúvape oñemombaʼeguasu hag̃ua Jehovápe. w23.01 26 párr. 3; 28 párr. 5

Umi unhído oipytyvõta Jesúspe ogoverna hag̃ua ko múndo tuichakuére, ha miles de millones de persóna oĩ oikótava ipoguypekuéra. Umi 144.000 haʼéta rréi ha saserdóte haʼeháicha avei Jesús (Apoc. 5:10). Umi saserdóte Israélpe guare oipytyvõ vaʼekue pe puévlope ikatu hag̃uáicha hesãi ha oñemoag̃ui Jehováre. Ha heʼiháicha la Biblia “pe léi ohechaukánte umi vendisión oútava”. Upéicha rupi ikatu jaʼe umi 144.000 ñanepytyvõtaha avei ñandéve ikatu hag̃uáicha ñaneresãi ha ñañemoag̃ui Jehováre (Heb. 10:1). ¿Mbaʼéichapa oñekomunikáta hikuái ñanendive? En rrealida ndajaikuaái upéva, péro si ikatu ñaime segúro haʼekuéra ñandegiataha ha siémpre jarekotaha la ñaikotevẽva guive (Apoc. 21:​3, 4). w22.12 11 párr. 11-13

¿Mbaʼérepa jaipotaite la hénte oho Konmemorasionhápe? Pórke jaipotaiterei haʼekuéra oikuaa la Jehová ha Jesús ojapo vaʼekue ñanderehehápe (Juan 3:16). Ha hiʼã avei ñandéve la oaprendéva hikuái upe pyharépe, toipytyvõ chupekuéra oservise hag̃ua Jehovápe. Ñande ñainvita avei umi aréma ndoservivéivape Jehovápe, péicha haʼekuéra ohechakuaáta Jehová ohayhuitiha chupekuéra. Ha ajépa ñanembovyʼaite jahechávo haʼekuéra ouha pe Konmemorasiónpe. Umi mbaʼe ohecháva ha ohendúva rupive, haʼekuéra imanduʼa jey mbaʼeichaitépa ovyʼa vaʼekue ymave oservírõ guare Jehovápe (Sal. 103:​1-4). Tahaʼe la hénte ñanerendu porã térã nahániri, lomímonte ñañehaʼã ñainvita chupekuéra pórke jaikuaa Jehová ovyʼaha káda persóna oho vaʼekuére (Luc. 15:7; 1 Tim. 2:​3, 4). w23.01 20 párr. 1; 22, 23 párr. 9-11

Pe pyhare Jesús omano mboyve haʼe ojerure asy vaʼekue peteĩ mbaʼe Itúa yvagapeguápe. Haʼe ojerure Jehovápe oprotehe hag̃ua isegidorkuérape (Juan 17:​15, 20). Jehová siémpre omaña ipuévlore térã oñangareko ha oprotehe chupe. Péro Jesús oikuaa porã Satanás oñemoĩ mbaretetaha isegidorkuérare. Haʼe oikuaa vaʼekue avei isegidorkuéra oikotevẽtaha Jehová oipytyvõ chupekuéra ombohovái hag̃ua Satanáspe oataka vaipaite jave chupekuéra. Ko múndo oĩva Satanás poguýpe henyhẽte provlémagui. Upévare heta kristiáno koʼag̃aguápe ojejopy vaipaite heta hendáicha. Heta vése ñambohovái umi situasión ñanedesanimaséva ha tekotevẽhápe jahechauka ñandefiélpa Jehovápe. Péro ndaipóri mbaʼérepa jakyhyje hag̃ua. Jehová omaña hína ñanderehe ha ohecha umi provléma ñambohováiva. Ha haʼe ñanepytyvõseterei voi jagueropuʼaka hag̃ua umíva. Ani jaduda Jehová siémpre ‘omañaha’ umi orrespetávare chupe (Sal. 33:​18-20). w22.08 8 párr. 1, 2

Káda áño pe Konmemorasión tiémpope, ñande ñañemotiémpo jajepyʼamongeta hag̃ua Jesús sakrifísiore ha la ojehupytývare upéva mediánte. Avei ñañehaʼãmbaite ñainvita ikatúvape guive oho hag̃ua avei pe Konmemorasionhápe ñanendive. Ha ñande si o si ñaĩse pe Konmemorasiónpe toiko la oikóva. Pe Konmemorasionhápe ñaaprende mbaʼérepa ñaikotevẽ peteĩ ñanderreskata vaʼerã, ha mbaʼéichapa la peteĩ persóna ojapo vaʼekue ikatu osalva hetaitereípe. Ñantende porãve avei mbaʼépa orrepresenta pe pan ha pe víno ha máva mávapa la hoʼu vaʼerã umíva (Luc. 22:​19, 20). Pe diskúrso aja umi orekóva esperánsa oikóvo ko yvy ape ári ikatu ojepyʼamongeta iñesperánsare (Is. 35:​5, 6; 65:​17, 21-23). Koʼã mbaʼe ñaaprendéva iñimportanteterei, ndahaʼeiete hína vyrorei. w23.01 20 párr. 2; 21 párr. 4

Jehová ningo omeʼẽ vaʼekue Itaʼýra omano hag̃ua ñanderehehápe ikatu hag̃uáicha ñande jajei pe pekádo poguýgui. Upéicha haʼe omeʼẽ ñandéve la oportunida jaiko hag̃ua pára siémpre (Mat. 20:28). Apóstol Pablo heʼi: “Pe ñemano ningo oñepyrũ peteĩ kuimbaʼe rupive, upéicha avei umi omanóvape oñemoingove jey peteĩ kuimbaʼe rupive. Adán káusare enterove omano, upéicha avei Cristo rupive enterovépe oñemoingove jeýta” (1 Cor. 15:​21, 22). Jesús omboʼe vaʼekue isegidorkuérape ojerure hag̃ua tou Ñandejára Rréino ha oñekumpli hag̃ua ivolunta ko yvy ape ári (Mat. 6:​9, 10). Por ehémplo, haʼe oipota ñande jaikove pára siémpre ko yvy ape ári. Okumpli hag̃ua upéva, Jehová onombra vaʼekue Itaʼýra Jesucrístope Rréi upe Rréinope. Avei Jehová ombyaty oikóvo 144.000 persónape oipytyvõ hag̃ua Jesúspe okumpli hag̃ua ivolunta (Apoc. 5:​9, 10). w22.12 5 párr. 11,12

Omano jave peteĩ jahayhúva, ñañeñandu vaieterei. Ñapensa jave umi mbaʼe ohasa vaʼekuére ikatu hasyeterei ñandéve, koʼýte oimérire hetaiterei anga osufri omano mboyve. Péro kon el tiémpo ikatúma javyʼa jey ñanemanduʼa jave umi mbaʼe ojapo vaʼekuére, por ehémplo ñanemanduʼávo álgo ñanemboʼe vaʼekue, álgo heʼi ha ojapóva ñanemokyreʼỹ hag̃ua térã ñanembopuka hag̃ua. Péicha avei ñañembyasy jepi jalee jave umi mbaʼe Jesús ohasa vaʼekue omanórõ guare. Ha og̃uahẽvo ohóvo pe Konmemorasión, ñamboyke jepi tiémpo jajepyʼamongeta hag̃ua Jesús sakrifísio porãitére (1 Cor. 11:​24, 25). Javyʼaiterei ñapensa jave umi mbaʼe Jesús heʼi ha ojapo vaʼekuére oĩrõ guare ko yvy ape ári. Avei ñanemombarete umi mbaʼe ojapóva koʼág̃a ha umi mbaʼe ojapótava amo gotyove. w23.01 26 párr. 1, 2

Jesús omanórõ guare, idisipulokuéra opyta yvýre. Umi disípulo operde peteĩ amígo ohayhuetereíva, péro ndahaʼéi upévante, operde avei hikuái la esperánsa (Luc. 24:​17-21). Péro upe rire Jesús ojaparese chupekuéra, ha oñemotiémpo oexplika hag̃ua idisipulokuérape haʼe okumpliha hína umi profesía oĩva la Bíbliape. Avei onkarga chupekuéra peteĩ tembiapo iñimportantetereíva (Luc. 24:​26, 27, 45-48). Upéi, Jesús ojupi yvágape, upérõ g̃uarã idisipulokuéra noñembyasyvéima, síno ovyʼaiterei. Ovyʼa hikuái oikuaávo Jesús oikove jeymaha ha oipytyvõtaha chupekuéra okumpli hag̃ua pe asignasión pyahu. Ovyʼaitereígui hikuái, omombaʼeguasu Jehovápe kaneʼõʼỹre (Luc. 24:​52, 53; Hech. 5:42). Jasegi hag̃ua Jesús disipulokuéra ehémplo ñamotenonde vaʼerã Ñandejára Rréino. Sapyʼánte tekotevẽ jajesakrifika jasegi hag̃ua jaservi Jehovápe, péro haʼe opromete tuichaiterei ñanevendesitaha jasegíramo jajapo upéva (Prov. 10:22). w23.01 30, 31 párr. 15, 16

Katuete ningo ndajafallaséi Adán ha Eva ojapo haguéicha. Upéva ndoikomoʼãi ñanderehe jasegíramo jaikuaave Jehovápe, ñamombaʼeve umi ikualida ha ñañehaʼã ñantende mbaʼéichapa haʼe opensa. Jajapóramo upéicha, amás día jahayhuvéta Jehovápe. Ñapensamíntena Abrahán ehémplore. Haʼe añetehápe ohayhu vaʼekue Jehovápe, ha noñemoĩri vaʼekue ikóntrape ijetuʼúrõ guare chupe ontende hag̃ua umi mbaʼe Jehová odesidíva. Upéva rangue haʼe oñehaʼã oikuaa porãve Jehovápe. Por ehémplo, Abrahán oikuaárõ guare Jehová odesidi hague ohunditaha Sodoma ha Gomorra, ñepyrũrã okyhyje vaʼekue ‘pe Hués ohusgáva ko yvy kompletoite ndojapóirõ g̃uarã iporãva’ ha ohundipa umi ihústovape umi iñañávandi. Abrahánpe g̃uarã upéva naisentidoiete vaʼekue. Péro haʼe iñumílde ha oporandu Jehovápe heta mbaʼe upe kásope. Jehová katu ipasiénsia ha okontesta chupe umi porandu. Amo ipahápe, Abrahán ontende Jehová ohechakuaaha mbaʼépa oĩ káda persóna korasõme, ha haʼe núnka ndokastigamoʼãiha peteĩ persóna inoséntepe pe iñañávandi (Gén. 18:​20-32). w22.08 28 párr. 9, 10

Áño 455 a.C., oñemopuʼãmba rire umi murálla de Jerusalén, pe governadór Nehemías oheka vaʼekue peteĩ kuimbaʼe de konfiánsa ikatúva oñangareko pe siudáre. Nehemías oiporavo unos kuánto apytégui pe prínsipe Hananíaspe oĩva pe kastíllope. La Biblia heʼi Hananíasre ‘haʼe hague peteĩ kuimbaʼe ikatúvare jajerovia ha hetágui haʼe okyhyjeve ha orrespetaveha Ñandejára teépe’ (Neh. 7:2). Hananías ohayhueterei vaʼekue Jehovápe, ha oipota voi siémpre oguerohory chupe. Upévare ombaʼapo jejopy okumpli hag̃ua oimeraẽ asignasión oñemeʼẽva chupe. Koʼã kualida ideprovechoitereíta avei ñandéve oiko hag̃ua ñandehegui peteĩ persóna de konfiánsa jaservívo Jehovápe. Jahechamína koʼág̃a Tíquico ehémplo. Apóstol Pablo ojeroviaiterei vaʼekue hese. Pablo okonfia vaʼekue Tíquicore ha heʼi hese ‘oserviha ipyʼaite guive ñande Ruvichápe’ (Efes. 6:​21, 22). Pablo okonfia rupi hese, onkarga vaʼekue chupe ontrega hag̃ua umi kárta umi ermanokuéra oĩvape Éfeso ha Colósaspe. Péro ndahaʼéi upearãnte la ojeroviáva hese, síno avei omokyreʼỹ ha okonsola hag̃ua umi ermáno upepeguápe. Tíquico ehémplo ñanemomanduʼa umi kuimbaʼe ifieletévare ha ikatúvare jajerovia ñane tiempopegua. Koʼã ermánope oñenkarga omog̃uahẽ hag̃ua ñandéve umi informasión ñanepytyvõtava ñamombarete hag̃ua ñande jerovia (Col. 4:​7-9). w22.09 9, 10 párr. 5, 6

José 13 áñore ohasa asyeterei vaʼekue. Upe tiémpope haʼe ikatu kuri opensa Jehová ndohayhuiha chupe ha oheja rei hague chupe. Péro haʼe ndojapói upéva. Jepe la isituasión ijetuʼueterei vaʼekue, haʼe lomímonte osegi trankílo ha oñehaʼã ohecha pe situasión Jehová ohechaháicha. Upévare orekórõ guare la oportunida oñevenga hag̃ua la iñermanokuérare, haʼe ndojapói upéva. Upéva rangue haʼe operdona chupekuéra ha ohechauka ohayhuha chupekuéra (Gén. 45:​4, 5). ¿Mbaʼérepa José ojapo vaʼekue upéva? Pórke haʼe osegi kuri ipositívo. Oiko rangue oñekonsentraiterei iprovlemakuérare, haʼe oñehaʼã ohecha mbaʼérepa Jehová opermiti haʼe ohasa umichagua mbaʼe (Gén. 50:​19-21). ¿Mbaʼépa ñanemboʼe iñehémplo? Oiméramo peteĩ ermáno ñanemoñeñandu vai raʼe, ani ñandepochy Jehovándi ni ñapensa haʼe ñandereja rei hague. Upéva rangue iporãvéta ñapensa mbaʼéichapa koʼág̃a haʼe ñanepytyvõ hína ñaaguanta hag̃ua upe situasión. Avei ñanemanduʼa vaʼerã jahayhu vaʼerãha ñane ermanokuérape, pórke upéicha ndajaikomoʼãi ñañekonsentraiterei la idefektokuérare. w22.11 21 párr. 4

Proféta Daniel ohecha vaʼekue umi visión omyesakã porãva Jehová haʼeha pe Ñandejára Ijojahaʼỹva ha orekóva tuichave podér enterove autoridágui. Primerorã Daniel ohecha vaʼekue 4 animál tuichaitereíva orrepresentáva umi poténsia mundiál yma guarépe. Por ehémplo Babilonia, Medopersia, Grecia ha Roma. Ha avei pe poténsia mundiál oĩva koʼág̃a haʼéva hína Gran Bretaña ha Estados Unidos, térã pe poténsia angloamericana (Dan. 7:​1-3, 17). Upéi Daniel ohecha vaʼekue Jehovápe oguapyha itrónope pe trivunál yvagapeguápe (Dan. 7: 9, 10). Ñandejára oipeʼa kompletoite pe podér ha autorida umi goviérno umánogui ha omeʼẽ umi ótro omeresevéva ha orekovévape podér. ¿Mávapepa? Peteĩ ‘ojoguávape yvypóra raʼýpe’ haʼéva Jesucristo, ha umi ipotĩvape “Ñandejára Ijojahaʼỹva mbaʼéva”, haʼéva umi 144.000 ogovernátava “opa ára g̃uarã” (Dan. 7:​13, 14, 18). Upéicharõ hesakã porãiterei Jehová haʼeha pe “Ñandejára Ijojahaʼỹva”. Umi mbaʼe Daniel ohecháva pe visiónpe okonfirma ko mbaʼe haʼe heʼi vaʼekue Ñandejárape: “Nde reipeʼa umi rréipe ipuéstogui ha remoĩ avei umi rréipe ogoverna hag̃ua” (Dan. 2:​19-21). w22.10 14, 15 párr. 9-11