Enero

Jesús ‘ohecha pe kuñakaraípe’ ha upéi “oiporiahuverekoiterei chupe” (Luc. 7:13). Péro Jesús ndahaʼéi ohechaukánteva ombyasyha pe kuñakaraípe, síno avei ohechauka umi mbaʼe ojapóva rupive oiporiahuverekoha chupe. Oime vaʼerã Jesús mborayhúpe oñeʼẽ pe kuñakaraípe ha heʼi chupe: “Anivéna nerasẽ”. Péro Jesús ndahaʼéi oñeʼẽnteva chupe, síno ojapo avei álgo oipytyvõ hag̃ua chupe. Omoingove jey pe imembýpe ha “ontrega isýpe” (Luc. 7:​14, 15). ¿Mbaʼépa ñaaprende ko milágrogui? Ñande avei ikatuha jahechauka ñambyasyha umi ihénte manóvape. Jesús ojapo haguéicha, ñande ikatu jahechauka jaiporiahuverekoha umi ihénte manóvape. Upearã ñepyrũrã tekotevẽ ñanembaʼerechakuaa ikatu hag̃uáicha jaʼe ha jajapo umi mbaʼe ikatu vaʼerã okonsola ha oipytyvõ umi ohasa asývape hína (Prov. 17:17; 2 Cor. 1:​3, 4; 1 Ped. 3:8). Jaʼe ha jajapóramo álgo ohechaukáva jahayhuha umi oñembyasývape, upéva tuichaiterei ikatu okonsola ha oipytyvõ chupekuéra. w23.04 5, 6 párr. 13-15

Jesús oikuaáramo jepe iñamígo Lázaro omano hague, odesidi opyta 2 día mas pe oĩháme. Upévare og̃uahẽrõ guare Betániape, ojapóma kuri 4 día Lázaro omano hague. Upérõ Jesús ojapose kuri peteĩ mbaʼe ovenefisiátava iñamigokuérape ha omombaʼeguasútava Jehovápe (Juan 11:​6, 11, 17). ¿Mbaʼépa ñaaprende pe amistágui ko rrelátope? María ha Marta oavisakárõ guare Jesúspe Lázaro hasyha, ndojeruréi kuri chupe oho hag̃ua Betániape. Haʼekuéra oipotánte kuri Jesús oikuaa iñamígo hasyha (Juan 11:3). Lázaro omanórõ guare, Jesús ikatu kuri mombyry guivénte orresusita chupe. Péro Jesús odesidi oho Betániape oĩ hag̃ua María ha Marta ndive, pórke haʼekuéra iñamíga vaʼekue. ¿Erekópa nde peichagua amígo nepytyvõtava ejerureʼỹre chupe? Oiméramo péicha, nde reikuaa upe ne amígo oĩtaha “nde ykére rehasa asy jave” (Prov. 17:17). Jasegíramo Jesús ehémplo, ñandehegui avei oikóta peichagua amígo. w23.04 10 párr. 10, 11

Jahasa jave peteĩ pruéva ningo ikatu voi ñapensa Jehová núnka ndoguerumoʼãiha pe múndo pyahu. ¿Heʼisépa upéva ñandejerovia kangyha? Ndahaʼéi katuete la upéichava. Ñamoĩmína peteĩ ehémplo, roʼy tiémpope, pe hoʼysãve jave, haʼete voi pe arahaku núnka nog̃uahẽmoʼãiva. Péro pe veráno siémpre og̃uahẽ. Upéicha avei ñañedesanima jave ikatu hína ñapensa pe múndo pyahu núnka voi nog̃uahẽmoʼãiha. Péro ñandejerovia mbaretéramo jaikuaa porãta umi mbaʼe Ñandejára oprometéva katuete oñekumplitaha (Sal. 94:​3, 14, 15; Heb. 6:​17-19). Péicha jajeroviáramo jasegíta ñamotenonde Jehová servísio. Avei tekotevẽ ñandejerovia mbarete japredika hag̃ua. Ñamombeʼu jave la héntepe koʼẽrõitéma Ñandejára oguerutaha peteĩ múndo pyahu, oĩ umi ndogueroviapáiva pórke iporãitereíma upe notísia (Mat. 24:14; Ezeq. 33:32). Aníkena núnka jaduda umi mbaʼe Jehová ñanemboʼévagui koʼã hénteicha. Ani hag̃ua upéva oiko ñanderehe jasegi vaʼerã ñamombarete ñande jerovia. w23.04 27 párr. 6, 7; 30 párr. 14

¿Algúna véspa reñeporandúmava Jehová okontestápa hína ne ñemboʼe? Oimérõ péicha, ndahaʼéi ndénte reikuaaséva upéva. Heta ermáno orrekonose oñeporandúma hague upéva, koʼýte ohasa jave umi provléma. Jahasa asy jave ikatu ijetuʼu jahechakuaa hag̃ua Jehová okontestaha ñane ñemboʼe. ¿Mbaʼérepa ikatu ñaĩ segúro Jehová okontestaha isiervokuéra ñemboʼe? La Biblia oasegura ñandéve Jehová ñandevalora ha ñanderayhuetereiha (Ageo 2:7; 1 Juan 4:10). Upévare haʼe oipota ñañemboʼe chupe jajerure hag̃ua ajúda (1 Ped. 5:​6, 7). Haʼe ñanepytyvõse siémpre ñaĩ hag̃ua ijykére ha ñaaguanta hag̃ua ñane provlemakuéra. La Biblia omombeʼu ñandéve Jehová okontesta hague heta vése isiervokuéra yma guare ñemboʼe. w23.05 8 párr. 1-4

María ningo Jehová amigaite vaʼekue, ha ijerovia nodependéi vaʼekue la José ojapóvare. Haʼe oikuaa porã vaʼekue Ñandejára Ñeʼẽ heʼíva ha oñemotiémpo ojepyʼamongeta hag̃ua umi mbaʼe oaprendévare (Luc. 2:​19, 51). María ohayhu vaʼekue ipyʼaite guive Jehovápe, upéicha rupi omoirũ porã iménape. Heta ermána koʼag̃agua oñehaʼã avei osegi María ehémplo. Jahechamína la heʼíva peteĩ ermána hérava Emiko, haʼe heʼi: “Chesoltéra tiémpope añehaʼã vaʼekue ajapo entéro mbaʼe tekotevẽva añemoag̃uive hag̃ua Jehováre. Péro amenda rire, che ména oñemboʼe mokõivéva rehehápe ha omoakã pe estúdio de família ha aju adependete hese ajapo hag̃ua koʼã mbaʼe. Upévare ahechakuaa ajapo vaʼerãha che párte asegi hag̃ua amombarete che amista Jehovándi. Koʼág̃a añemotiémpo ikatu hag̃uáicha añemboʼe cheañoháme, astudia Ñandejára Ñeʼẽ ha ajepyʼamongeta” (Gál. 6:5). Peẽ tembirekokuéra, pesegíramo pemombarete pene amista Jehovándi, pene ména pendeguerohory ha penderayhuvéta (Prov. 31:30). w23.05 21 párr. 6

Ñande ndahaʼéi ñanasérema jarrespetáva Ñandejárape, síno ñañehaʼã vaʼerã. ¿Mbaʼépa ñanepytyvõta upearã? Ñamañávo Ñandejára rembiapokuére jahechakuaáta haʼe ipoderóso, iñarandu ha ñanderayhuetereiha, ha upéva ñanepytyvõta jarrespeta ha jahayhuve hag̃ua chupe (Rom. 1:20). Jajepokuaáramo ñañemboʼe meme jarrespetavéta ñande pyʼaite guive Jehovápe. Pyʼỹi ñañemboʼéramo jaikuaa porãvéta chupe. Jahechakuaáta mbaʼeichaitépa haʼe ipoderóso jajerurévo chupe fuérsa ñaaguanta hag̃ua peteĩ pruéva. Jaagradesévo chupe Jesús sakrifísiore ñanemanduʼa mbaʼeichaitépa haʼe ñanderayhu. Ha ñañemboʼévo jajerure hag̃ua Ñandejárape igía, upéi jahechakuaáta haʼe iñaranduetereiha. Jajepokuaárõ ñañemboʼe ñanepytyvõta jarrespetave hag̃ua Jehovápe ha jajedesidíta ndajajapomoʼãiha mbaʼeve ikatúva ombyai ñane amista hendive. w23.06 15 párr. 6, 7

Jehová añoite oreko pe derécho omeʼẽvo ñandéve umi léi, ha umíva siémpre ifásil oñentende hag̃ua. Por ehémplo síglo primérope pe kuérpo governánte heʼi mbohapy mbaʼe tekotevẽhápe ojepytaso mbarete umi kristiáno: 1) Orrechasávo umi dios raʼanga ha oadorávo Jehovápe añoiténte, 2) orrespetávo pe léi heʼíva sagradoha pe tuguy, ha 3) ndoikóivo hekovai okumpli hag̃ua la Biblia heʼíva (Hech. 15:​28, 29). ¿Mbaʼéichapa kristianokuéra koʼag̃agua ikatu ñaneñeʼẽrendu Jehovápe koʼã mbohapy mbaʼépe? Jaadora ha ñaneñeʼẽrendúvo Jehovápe. Haʼe omanda vaʼekue umi israelítape oadora hag̃ua chupe añoiténte (Deut. 5:​6-10). Pe Diablo omoñuhãsérõ guare Jesúspe, haʼe derechoite heʼi chupe Jehovápe añoiténte jaadora vaʼerãha (Mat. 4:​8-10). Upéicha rupi ndajaadorái umi taʼanga ha nañamombaʼeguasúi peteĩ yvypórape. Nañamombaʼéi haʼeramoguáicha peteĩ dios umi líder rrelihiósope, umi polítikope, térã umi hugadór ha músiko ifamósovape. Jaadora Jehovápe añoiténte, pórke ‘haʼe ojapo vaʼekue entéro mbaʼe’ (Apoc. 4:11). w23.07 14, 15 párr. 3, 4

Jareko vaʼerã enkuénta Satanás múndo itavyeteha rrelasión sexuál ha pornografíare (Efes. 4:19). Upévare ñañehaʼã vaʼerã jarrespeta Jehovápe ha ñañemomombyry ivaívagui. Proverbios kapítulo 9-pe oñeñeʼẽ mokõi kuña rehe. Peteĩva orrepresenta pe “arandu” ha pe ótrare katu ojeʼe haʼeha peteĩ “kuña naiñarandúiva”. Koʼã mokõi kuña rehe ojeʼe ohenoiha umi ‘ndoikuaáivape mbaʼeve’ térã ‘ivýrovape’. Haʼete oinvitáva chupekuéra oike hag̃ua hógape ha hoʼu umi tembiʼu ojeprepara vaʼekue (Prov. 9:​1, 4-6). Péro idiferentete la oikóva umi oasepta vaʼekuére káda kuña invitasión. Jahechamína la heʼíva oporoinvita hag̃ua pe “kuña naiñarandúiva” (Prov. 9:​13-18). Pe “kuña naiñarandúiva” notĩri oinvita hag̃ua hógape oimeraẽ ndoikuaáivape mbaʼeve hoʼu hag̃ua umi tembiʼu ojeprepara vaʼekue. ¿Mbaʼépa oiko umi oaseptávare iñinvitasión? ‘Ohóva guive pe kuña rógape omano’. Por ehémplo kapítulo 2-pe oñeñeʼẽ pe ‘kuña iñañávare’ ha pe ‘kuña hekovaívare’. Ha ojeʼe voi la ohóva hógape haʼete derechoite ohóva omano hag̃ua (Prov. 2:​11-19). Avei Proverbios 5:​3-10-pe oñeñeʼẽ ótro ‘kuña iñañávare’ osegíva pe tape ‘ogueraháva chupe ñemanóme’. w23.06 21, 22 párr. 6, 7

Umi ansiáno ohechauka noñemohatãiha haʼekuéra heʼívapente, ha péicha omoĩ peteĩ ehémplo porã (1 Tim. 3:​2, 3). Por ehémplo peteĩ ansiáno ndoikomoʼãi ohaʼarõ ojejapo siémpre haʼe heʼíva ijedave haguérente umi ótro ansiánogui. Upéva rangue orrekonose Ñandejára espíritu ikatuha omomýi oimeraẽ ansiánope heʼi hag̃ua álgo oipytyvõtava ojedesidi porã hag̃ua. La majoría umi ansiáno peteĩ kongregasionpegua odesidíramo álgo ndohóiva la Biblia kóntrape, pe ansiáno noñemohatãiva haʼe heʼívapente, vyʼápe oapojáta la ojedesidíva oiméramo jepe ogusta raʼe chupe ótra kósa. Heta mbaʼe porã jahupyty ndajaikóirõ ñañemohatã ñande jaʼévapente. Por ehémplo jajogueraha porã ermanokuérandi, oĩ pyʼaguapy kongregasiónpe, javyʼa ñaĩ jave diferénte persónandi tahaʼe haʼéva ikultúra ha jadisfruta ikatu haguére jaadora Jehovápe oñondivepa peteĩ famíliaicha. Ha iñimportanteveha ñandepyʼarory voi jaikuaávo jasegiha hína ñande Ru yvagapegua ehémplo. w23.07 25 párr. 16, 17

Daniel ojasegura porã vaʼekue mbaʼérepa ostudia. Haʼe isinséro ha oikuaase vaʼekue la verda. Avei Daniel iñumílde, haʼe oikuaa Jehová oipytyvõta hague chupe ontende hag̃ua umi profesía siémpre oñemoag̃uírõ Ñandejárare ha oikórõ haʼe oipotaháicha (Dan. 2:​27, 28). Daniel ohechauka vaʼekue iñumildeha ojerurévo Jehovápe ajúda (Dan. 2:18). ¿Mbaʼe ótra kósapa ojapo? Haʼe ostudia porã. Daniel oinvestiga porã vaʼekue umi párte de la Biblia oĩma vaʼekue upe tiémpope (Jer. 25:​11, 12; Dan. 9:2). ¿Mbaʼéichapa ikatu jasegi iñehémplo? Jajasegura mbaʼérepa jastudia. ¿Jastudiápa umi profesía jaikuaaségui sinséramente la verda? Oimérõ upéicha Jehová ñanepytyvõta ñantende hag̃ua umi profesía (Juan 4:​23, 24; 14:​16, 17). Oĩ ostudiaséva otopaséguinte pruéva heʼi hag̃ua la Biblia ndouiha Ñandejáragui. Haʼekuéra oimoʼã péicha ikatutaha odesidi ijeheguíntema mbaʼépa iporã ha ivai. Upévare tekotevẽterei jajasegura mbaʼérepa ñantendese umi profesía. w23.08 9 párr. 7, 8

Jaikórõ ñañekompara ótrore ha jajapose la haʼekuéra ojapóva, ñañeñandu vaíta (Gál. 6:4). Ikatu jaju ñakompeti ha ñaneenvidióso (Gál. 5:26). Ñañehaʼãrõ jajapo la ótro ojapóva ñande posivilida nomeʼẽiramo jepe ñandéve, ikatu jaju jajeperhudika ñandejupe. “Ñanemokorasõ rasy ningo otarda jave álgo ñahaʼarõitereíva” ha koʼytevéntema ñanemokangýta oimérõ ñahaʼarõ álgo núnka ndajahupytymoʼãiva (Prov. 13:12). Oikórõ ñanderehe upéva ikatu ñanekaneʼõ ha ñandejoko jadipara hag̃ua pe karréra jaikove hag̃ua pára siémpre. Ani jajapose umi mbaʼe Jehová nohaʼarõiva ñandehegui. Haʼe núnka ndojeruremoʼãi ñandéve jajapo hag̃ua álgo ndaikatumoʼãiva (2 Cor. 8:12). Ikatu ñaime segúro Jehová nokomparaiha umi mbaʼe ñande jajapóva umi ótro ojapóvare (Mat. 25:​20-23). Haʼe omombaʼeterei jaservi haguére chupe ñande pyʼaite guive, ñandefiél ha ñaneaguánte haguére. w23.08 29 párr. 10, 11

Sansón ojerure asy ajúda Jehovápe, ha Jehová okontesta chupe onohẽvo y peteĩ yvykuágui. Sansón hoʼu rire pe y “imbarete jey ha oñepyrũ oñeñandu porã” (Juec. 15:​19, nóta). Amalisia ko ykua oĩ vaʼekue gueteri heta áño upe rire, proféta Samuel oskrivírõ guare lívro de Jueces. Umi israelita ohechávo upe ykua oiméne imanduʼa ojeroviáramo Jehováre, haʼe ikatuha oipytyvõ umi isiérvo ifiélvape oikotevẽ jave. Ñande avei jajerovia vaʼerã Jehováre ha jajerure chupe ajúda, oimérõ jepe ñandevale térã jajapóma heta mbaʼe Jehová servísiope. Tekotevẽ ñaneumílde ha ñarrekonose ikatuha jajapo la Jehová ojeruréva ñandéve jajeroviárõ añoite hese. Sansón hoʼu vaʼekue pe y Jehová omeʼẽva chupe ha imbarete jey. Péicha avei ñande tekotevẽ jaasepta entéro mbaʼe Jehová omeʼẽva ñandéve ñamombarete hag̃ua ñande jerovia ha jasegi hag̃ua ñandefiél chupe (Mat. 11:28). w23.09 4 párr. 8-10

¿Mbaʼépa ikatu jajapo oĩ jave ñanembopochyséva? Oĩrõ oñeʼẽ vaíva Jehováre térã oñembohorýva la Bíbliare, tekotevẽ jajerure Jehovápe ijespíritu sánto ha tañanemoarandu ñarreaksiona porã hag̃ua. Ha jahechakuaárõ ñarreaksiona vai hague, ñañemboʼe jey vaʼerã la oiko vaʼekuére ha ñapensa mbaʼéichapa iporãvéta ñarreaksiona ótra vuéltape. Upéicha Jehová katuete omeʼẽta ñandéve ijespíritu sánto ñandepyʼaguapy ha jajejoko hag̃ua. Oĩ heta téxto bíblico ñanepytyvõkuaáva jajoko hag̃ua ñande juru ijetuʼu jave peteĩ situasión. Ñandejára espíritu sánto ikatu voi ñanemomanduʼa ñaikotevẽ jave umi téxtore (Juan 14:26). Por ehémplo umi konsého jatopáva pe lívro de Provérbiospe ikatu ñanepytyvõ ñandepyʼaguapy hag̃ua (Prov. 15: 18). Ko lívro ohechauka mbaʼeichaitépa ñasẽ porãta trankílonte ñarreaksionárõ haku jave la yvy (Prov. 10:19; 17:27; 21:23; 25:15). w23.09 15, 16 párr. 6, 7.

Apóstol Pedro oservi vaʼekue fiélmente Jehovápe heta tiémpore. Haʼe omoirũ Jesúspe pe predikasiónpe, oñepyrũ opredika umi ndahaʼéivape judío ha tiémpo rire oservi pe kuérpo governántepe. Péro Pedro oikuaárõ guare omanotamaha, Jehová omeʼẽve chupe hembiaporã. Áño 62 al 64 rupi, Ñandejára ojevale hese oskrivi hag̃ua umi mokõi kárta hérava Primera ha Segunda de Pedro (2 Ped. 1:​13-15). Pedro oskrivírõ guare umi kárta umi ermanokuéra ‘oñembyasy ohaságui heta mbaʼe ijetuʼúva’ (1 Ped. 1:6). Umi kuimbaʼe iñañáva oñehaʼã kuri omoinge kongregasiónpe umi enseñánsa japu ha tekokyʼa (2 Ped. 2:​1, 2, 14). Umi kristiáno oikóva Jerusalénpe ombohovái potaite kuri álgo ijetuʼúva, pórke hiʼag̃uimbaitéma kuri pe tiémpo “entéro mbaʼe oñemohuʼã hag̃ua”. Umi rrománo ohundítama kuri pe siuda ha pe témplo (1 Ped. 4:7). Katuete umi kárta Pedro oskrivi vaʼekue oipytyvõ umi kristiánope oaguanta hag̃ua umi mbaʼe ohasáva ha oprepara chupekuéra amo gotyove g̃uarã. w23.09 26 párr. 1, 2.

Jesúsre oiko haguéicha, pyʼỹinte ñaaprende ñaneñeʼẽrendu hag̃ua jahasa jave umi situasión ijetuʼúva. Por ehémplo oñepyrũrõ guare pe pandémia del COVID-19, ojejerure ponove jajapo umi rreunión Salón del Réinope ha anive hag̃ua japredika ogahárupi. ¿Ijetuʼúpa raʼe ñandéve upérõ ñaneñeʼẽrendu? Ikatu oime upéicha, péro ñaneñeʼẽrendu rupi jajeprotehe, ñaipytyvõ ñane ermanokuéra oĩ hag̃ua en unida ha ñambovyʼa Jehovápe. Upévare ikatu jaʼe koʼág̃a ñaĩmeveha preparádo jasegi hag̃ua umi instruksión jarresivítava pe jehasa asy guasu aja. Jajapóramo upéva ikatu jajesalva hína (Job 36:11). Ñande jadesidi ñaneñeʼẽrendutaha Jehovápe prinsipálmente jahayhúgui chupe ha ñaime porãségui hendive (1 Juan 5:3). Ndaikatumoʼãi arakaʼeve japagapa Jehovápe la ojapo vaʼekuére ñanderehehápe (Sal. 116:12). Péro si ikatu ñaneñeʼẽrendu chupe ha umi omeʼẽ vaʼekuépe autorida. Péicha jahechaukáta ñanearanduha ha ñambovyʼáta Jehovápe (Prov. 27:11). w23.10 11 párr. 18, 19

Peteĩ ánhel oñeʼẽtaramo ñandéve, katuete jajapysakáta hese. Koʼág̃a oĩ hína peteĩ ánhel heʼíva álgo “entéro tetã, trívu, puévlo ha umi oñeʼẽvape diferénte idióma”. Haʼe heʼi: ‘Perrespeta Ñandejárape ha pembotuicha chupe. Peadora Ñandejárape, upe ojapo vaʼekue yvága ha yvy’ (Apoc. 14:​6, 7). Enterove jaadora vaʼerã Jehovápe añoite, pórke haʼe hína pe Dios verdadéro. Ajépa jaagradesete chupe omeʼẽ haguére ñandéve pe oportunida porãite jaadorávo chupe itémplo espirituál tuichaitévape. ¿Mbaʼépa hína pe témplo espirituál? ¿Mbaʼéichapa ikatu jaikuaa umi mbaʼe oĩ vaʼekue ko témplope? Nañañeʼẽi hína peteĩ konstruksión oñemopuʼã vaʼekuére, síno ko témplo orrepresenta opa mbaʼe Jehová ojapo vaʼekue ojeadora hag̃ua chupe haʼe oipotaháicha, koʼã mbaʼe haʼe ojapo itaʼýra Jesucristo sakrifísio rupive. Apóstol Pablo oexplika vaʼekue ko téma pe kárta omondo vaʼekuépe umi kristiáno hebreo oikóvape Judéape. w23.10 24 párr. 1, 2

Áño 522-pe a.C. umi judío enemigokuéra okonvense vaʼekue pe goviérno pérsape oproivi hag̃ua chuguikuéra osegi omopuʼã pe témplo. Péro Zacarías oasegura pe puévlope Jehová oipurutaha ijespíritu pono ojoko chupekuéra mbaʼeve, ha péicha osegi hag̃ua hikuái pe traváho. Upéi áño 520-pe a.C. rréi Darío opermiti jey umi judíope osegi omopuʼã pe témplo. Upearã omeʼẽ chupekuéra pláta, ha ojerure umi governadorkuérape oapoja hag̃ua umi judíope (Esd. 6:​1, 6-10). Jehová opromete ipuévlope oipytyvõtaha chupekuéra omotenondéramo pe témplo traváho (Ageo 1:​8, 13, 14; Zac. 1:​3, 16). Umi proféta omokyreʼỹ rupi chupekuéra, umi judío oñepyrũ jey ombaʼapo pe témplore áño 520-pe a.C. Ha ménos de 5 áñope otermina hikuái la traváho. Umi judío omotenonde meme jey Jehová volunta iprovléma hetáramo jepe. Upéicha rupi Jehová oipytyvõ chupekuéra ha vyʼápe oservi chupe hikuái (Esd. 6:​14-16, 22). w23.11 15 párr. 6, 7

Heta hénte ohendúmava oñeñeʼẽha Abrahánre, péro la majoría ndoikuaaporãi chupe. Ñande katu si jaikuaa porã Abrahánpe. Por ehémplo jaikuaa ojeʼeha hese “entéro umi ojeroviáva túa” (Rom. 4:11). Ikatu ñañeporandu: “¿Ikatúne piko che ajogua Abrahánpe ha ajerovia che pyʼaite guive Jehováre?”. Javyʼaite jaikuaávo ikatuha. ¿Mbaʼéichapa ikatu ñamombarete ñande jerovia Abrahán ojapo haguéicha? Upéva jajapóta jastudiávo iñehémplo. Abrahán siémpre ojapo vaʼekue la ojeruréva chupe Ñandejára. Por ehémplo, haʼe oheja vaʼekue hóga ha oho mombyry oiko hag̃ua óga kárpape heta áñore, ha hiʼarive oĩ vaʼekue osakrifika hag̃uáicha pe itaʼýra ohayhuetéva Isaácpe. Umi mbaʼe ojapo vaʼekue ohechauka ijerovia mbareteha. Upéva ombovyʼaiterei Jehovápe, ha Abrahángui oiko iñamigoite (Sant. 2:​22, 23). Koʼág̃a avei Jehová oipota enterove jaiko iñamígoramo ikatu hag̃uáicha ñandeguerohory. Upévare Jehová ojevale vaʼekue Pablo ha Santiágore oñeʼẽ hag̃ua Abrahán ehémplore. w23.12 2 párr. 1, 2

Ermanakuéra, peaprendékena peñemongetakuaa hag̃ua, entéro kristiáno tekotevẽ oaprende upéva. Santiago omeʼẽ vaʼekue pe konsého iporãitéva jatopáva pe téxto koestediaguápe. Mitãkuñanguéra, pejapysaka porãrõ ótro oñeʼẽ aja pehechaukáta ‘peñemoĩha pende rapicha lugárpe’ (1 Ped. 3:8). Oimérõ napentendeporãi mbaʼépa álgien heʼise térã oñandu, peporandukuaánte vaʼerã chupe ha upéi pepensa porã raẽ peñeʼẽ mboyve (Prov. 15:28). Káda uno oñeporandu vaʼerã: “¿Siértopa la haʼéva ha oporomokyreʼỹtapa? ¿Ahechaukátapa apororrespeta ha chembaʼeporãha?”. Ou porãita peẽme pesegírõ pe ehémplo omoĩva umi ermána ojapysakakuaáva ha oñeʼẽva mborayhúpe (Prov. 31:26). Peñatende porã mbaʼéichapa oñeʼẽ koʼã ermána ha mbaʼépa heʼi hikuái. Amedída ke peñemongetakuaa pende rapichándi, ifasilvéta peẽme pejogueraha porã hag̃ua hendivekuéra. w23.12 21 párr. 12

Jehová ikatu ojevale ñane héntere, ñane amígore térã ansianokuérare ñanepytyvõ hag̃ua. Upéicharõ jepe, ñañeñandu vai jave ikatu oime japytasénte ñaneaño. Oikose jepi voi upéva. ¿Mbaʼépa ikatu jajapo péicha jave Jehová ñanepytyvõ hag̃ua? Ñañehaʼãmbaite vaʼerã ani hag̃ua ñañemomombyry ótrogui, pórke jajapo jave upéva ndahasyiete ñapensa hag̃ua ñandejehénte ha umi provléma jarekóvare. Ha upéva nañanepytyvõmoʼãi jadesidi porã hag̃ua. Jaikuaa enterovéva ñaikotevẽha peteĩ tiémpo ñaĩ hag̃ua ñaneaño, koʼýte oimérõ jahasa raʼe álgo ivaietereíva. Péro ñañemohaʼeño pukuetereírõ, jarrechasa hína pe ajúda Jehová omeʼẽséva ñandéve ótro rupive. Upévare jaaseptákena la ojaposéva ñanderehehápe ñane hentekuéra, ñane amígo ha umi ansiáno. Iporã ñapensa Jehová ojevaleha hesekuéra ñanepytyvõ hag̃ua (Prov. 17:17; Is. 32:​1, 2). w24.01 24 párr. 12, 13

Umi nazareo opromete vaʼekue noikytĩmoʼãiha iñakãrangue, péicha ohechauka vaʼekue hikuái mbaʼeichaite pevépa iñeʼẽrendu Jehovápe. Ñambyasýramo jepe, heta vése Israélpe oĩ vaʼekue umi nomombaʼéiva umi nazaréope. Upévare sapyʼánte umi nazareo tekotevẽmante ipyʼaguasu okumpli hag̃ua ipromésa ha ohechauka hag̃ua idiferenteha umi ótro israelítagui (Amós 2:12). Jajapo rupi Jehová heʼíva, la hénte oĩva ñande jerére ohechakuaa avei ñanediferenteha chuguikuéra. Upévare ñandepyʼaguasu vaʼerã jaʼe hag̃ua ñande haʼeha testígo de Jehová, tahaʼe ñande traváho, eskuéla térã koléhiope. Jaikuaaháicha umi hénte amás día oho vaive hese oiko lája ha oñekomporta lájape hikuái. Upévare ikatu ijetuʼu ñandéve jasegi hag̃ua la Biblia heʼíva, ha ñaipytyvõ hag̃ua la héntepe predikasiónpe (2 Tim. 1:8; 3:13). Upéicharõ ñanemanduʼa vaʼerã ñambovyʼaha Jehovápe ñandepyʼaguasu jave ñanediferénte hag̃ua umi ótrogui (Prov. 27:11; Mal. 3:18). w24.02 16 párr. 7; 17 párr. 9

Ñapensami pe kongregasión oĩ vaʼekuére Rómape. Umi kristiáno upepegua idiferentete vaʼekue ojuehegui. Oĩ judío okakuaáva Moisés léi poguýpe. Ótro katu ndahaʼéi vaʼekue judío ha ikultúra idiferentete. Oiméne oĩ vaʼekue umi haʼéva esklávo, umi orekóva liverta, ha umíva apytépe umi orekóva esklávo ipoguýpe. ¿Mbaʼéichapa koʼã kristiáno idiferentetéramo jepe ojuehegui ikatúta raʼe ojoayhuve? Apóstol Pablo omokyreʼỹ chupekuéra ‘ojorresivi porã’ hag̃ua. Pe palávra ojetradusíva “pejorresivi porãkena”, heʼise ñanembaʼeporãha peteĩ persónandi, por ehémplo ñamog̃uahẽ chupe ñande rógape térã ñañemoamígo hese. Pablo heʼi vaʼekue Filemónpe ‘torýpe orresivi hag̃ua’ Onésimope, pe ijesklávo okañy vaʼekue (Filem. 17). Priscila ha Áquila orresivi porã vaʼekue Apólospe, haʼe saʼive ontende vaʼekue chuguikuéra la Jesús omboʼéva. Upévare haʼekuéra ‘ogueraha chupe hendivekuéra’ (Hech. 18:26). Umi kristiáno ypykue opensa rangue mbaʼépepa idiferénte hikuái, oñehaʼãmbaite ikatu hag̃uáicha ojorresivi porã ha oiko porã oñondive. w23.07 6 párr. 13

¿Mbaʼépa nemomýi vaʼerã reñemeʼẽ hag̃ua Jehovápe? Prinsipálmente rehayhúgui chupe. Péro upéva ndahaʼéi vaʼerã peteĩ sentimiénto reínte. Upéva rangue, reñehaʼã vaʼerã rehayhu Jehovápe ‘reikuaa porãgui hembipota’, ha ‘rentendégui opa mbaʼe ijespíritu sánto rupive’ (Col. 1:9). Restudia porã rupi la Biblia nderedudái vaʼerã: 1) Jehová añetehápe oexistiha, 2) la Biblia haʼeha Iñeʼẽ, ha 3) haʼe oipuruha iñorganisasión okumpli hag̃ua ivolunta. Umi oñemeʼẽva Jehovápe oikuaa umi enseñánsa iñimportantevéva oĩva la Bíbliape ha oñehaʼãmbaite oiko heʼiháicha Ñandejára Ñeʼẽme. Haʼekuéra ojapo avei ikatúva entéro omombeʼu hag̃ua ótrope umi mbaʼe oaprende vaʼekue (Mat. 28:​19, 20). Ha káda día ohasáva ohayhuve rei Jehovápe, upévare chupe añoiténte oadorase. ¿Ndépa upéicha avei? w24.03 4, 5 párr. 6-8

Abigaíl omenda vaʼekue Nabal rehe. La Biblia heʼi Nabal haʼe hague peteĩ kuimbaʼe ijarhél ha oporotrata vaíva (1 Sam. 25:3). Oiméne ijetuʼu rakaʼe Abigaílpe oiko hag̃ua peichagua persónandi. ¿Orekópa raʼe Abigaíl oportunida oheja hag̃ua iménape? Si. Peteĩ jey David, haʼétava upéi Israel rréi, oho ojuka hag̃uáicha Nabálpe ijarhél haguére chupe ha umi kuimbaʼe omoirũvape chupe (1 Sam. 25:​9-13). Upérõ Abigaíl ikatúnte kuri osẽ oho, ha oheja Davídpe ojuka Nabálpe. Upéva rangue, haʼe okonvense Davídpe ani hag̃ua ojuka la iménape (1 Sam. 25:​23-27). ¿Mbaʼérepa Abigaíl ojapo rakaʼe upéicha? Abigaíl ohayhu vaʼekue Jehovápe ha orrespeta la opensáva pe matrimóniore. Haʼe oikuaa porã vaʼekue Jehovápe g̃uarã sagradoha pe matrimónio. Upévare oñehaʼãmbaite osalva iménape ha enterove umi hogayguápe. Haʼe pyaʼe ohecha mbaʼépa ikatu ojapo ani hag̃ua David ojuka Nabálpe. w24.03 16 párr. 9, 10

¿Oĩpa hína ne kongregasiónpe peteĩ ermáno oñehaʼãva oiko sensillove itiempove hag̃ua Jehová servísiope? ¿Reikuaápa peteĩ mitãrusu térã mitãkuña pyʼaguasúpe idiferénteva eskuéla térã koléhiope ijetuʼúramo jepe? ¿Oĩpa algúno oñehaʼãva hína ifiél Jehovápe, ojopýramo jepe chupe ihentekuéra? Jaaprovechákena oimeraẽ oportunida ñamokyreʼỹ hag̃ua ñane ermanokuérape. Upearã ikatu jaʼe chupekuéra mbaʼeichaitépa ñamombaʼe pe sakrifísio ojapóva hikuái pyʼaguasúpe (Filem. 4:​5, 7). Jehová ndodudái ñambovyʼaseha chupe ha jajapotaha oimeraẽ sakrifísio ñakumpli hag̃ua pe promésa jajapo vaʼekue ñañemeʼẽrõ guare chupe. Haʼe omeʼẽ la oportunida káda únope jahechauka hag̃ua jahayhuha chupe (Prov. 23:​15, 16). Upévare jasegíkena jaservi Jehovápe ñande pyʼaite guive ha ñameʼẽ chupe iporãnguete. w24.02 18 párr. 14; 19 párr. 16

Ñañeimahinamína ñaimeha hína pe áño 29 opakuévo, upérõ Jesús oñepyrũ ramo hína opredika. Haʼe ha isy María oho peteĩ kasamientohápe Canápe. María amalisia oñatende hína kuri umi invitádore. Upeichahágui oumi opa pe víno. Upévare María pyaʼe porã oho imemby rendápe ha heʼi chupe: “Opángo chuguikuéra la ivíno” (Juan 2:​1-3). ¿Mbaʼépa ojapo upémarõ Jesús? Ojapo ýgui peteĩ “víno iporãva” (Juan 2:​9, 10). Jesús ningo oĩrõ guare ko yvy ape ári ojapo vaʼekue hetaitereive milágro. Haʼe oipuru ipodér ikatu hag̃uáicha oipytyvõ hetaiterei héntepe. Por ehémplo, peteĩ jey haʼe omongaru vaʼekue 5.000 kuimbaʼépe, ha ótra okasiónpe katu 4.000 kuimbaʼépe. Koʼã mokõi milágrope omongaru vaʼekue mas de 27.000 persónape ñakontapátaramo umi mitã ha kuña oĩ vaʼekue avei upépe (Mat. 14:​15-21; 15:​32-38). Avei upérõ guare, haʼe omonguera vaʼekue umi hasývape (Mat. 14:14; 15:​30, 31). w23.04 2 párr. 1, 2

Jahasa rire peteĩ situasión ivaietereíva, ikatu oĩ umi día nañanderetiaʼeihápe ha ñanekangypa voi. Elíasre oiko haguéicha yma, ikatu ñande kásope avei nañañanimái ni ñapuʼã ha jakesénte voi (1 Rey. 19:​5-7). Ñande ikatu ñaikotevẽ ajúda jasegi hag̃ua jakuʼe Jehová servísiope. Umícha jave Jehová oasegura ñandéve ñanepytyvõtaha heʼiháicha pe téxto koestediagua. Por ehémplo, Ñandejára oipytyvõ vaʼekue rréi Davídpe. Haʼe ombohováirõ guare umi situasión ijetuʼúva heʼi vaʼekue Jehovápe: “Nde chesalva nde podér rupive” (Sal. 18:35). Pyʼỹinte Jehová ojevale ótrore ñanepytyvõ hag̃ua. David ikangýrõ guare, iñamígo Jonatán oho vaʼekue hendápe omokyreʼỹ hag̃ua chupe (1 Sam. 23:​16, 17). Jehová ojevale vaʼekue avei Eliséore oipytyvõ hag̃ua Elíaspe (1 Rey. 19:​16, 21; 2 Rey. 2:2). w24.01 23, 24 párr. 10-12

Pe ehémplo oñeʼẽva pe kuña orrepresentávare pe “arandu” ohechauka Jehová imbaʼeporã ha omeʼẽha ñandéve heta mbaʼe. Ko rreláto omombeʼu ko kuña ojapo hague peteĩ karu guasu, peteĩ víno espesiál ha oprepara hague pe mesa (Prov. 9:2). Avei umi versíkulo 4 ha 5 heʼi: “Pe arandu heʼika umi ivýrovape: ‘Peju koʼápe peʼu pe tembiʼu ojeprepara vaʼekue’”. ¿Mbaʼérepa jaasepta vaʼerã ko kuña iñarandúva invitasión? Pórke Jehová oprotehese ifamiliakuérape ha oipota iñarandu. Haʼe ndoipotái ñaaprende mbaʼeve ñande kostíllare ni jajapo umi mbaʼe ñandeperhudikátava ha ñambyasýtava upéi. Upévare “Ñandejára oñongatu voi pe arandu omeʼẽ hag̃ua umi oñehaʼãvape ojapo iporãva” (Prov. 2:7). Jarrespetárõ Jehovápe, jajaposéta chupe ogustáva, jasegíta ikonsého ha upéva ñanembovyʼáta (Sant. 1:25). w23.06 23, 24 párr. 14, 15

Oimérõ ndaikatuvéima jajapo heta mbaʼe Jehová servísiope, ñaĩ vaʼerã segúro Jehová ovyʼaha ñañehaʼãmbaite haguére jajapo la ikatumíva. ¿Mbaʼérepa jaʼekuaa upéva? Zacarías tiémpope Jehová ojerure iprofétape ojapo hag̃ua peteĩ koróna, ha upearã oipuru vaʼerã pe pláta ha óro omondo vaʼekue umi judío oĩva Babilóniape (Zac. 6:11). Upe “koróna ojajaipáva” omomanduʼáta kuri umi judíope umi kontrivusión oñemeʼẽ vaʼekuére chupekuéra (Zac. 6:​14, nóta). Jehová ni mbaʼevéicharõ ndahesaraimoʼãi ñañehaʼã hague jaservi chupe ñande pyʼaite guive ijetuʼúrõ guare la situasión. Katuete jahasáta gueteri heta situasión ijetuʼúva, ha ikatu voi ivaive ohóvo (2 Tim. 3:​1, 13). Péro natekotevẽi ñañekevranta rasapa. Ñanemanduʼa Jehová heʼi hague ipuévlope Ageo tiémpope: ‘Che aime penendive. Aníkena pekyhyje’ (Ageo 2:​4, 5). Ñande ikatu ñaĩ segúro Jehová oĩtaha ñanendive ñañehaʼãmbaitéma guive jajapo ivolunta. w23.11 19 párr. 20, 21

Jehová ikatu kuri ndoskrivikáinte la Bíbliape Pedro fallakuéra, péro haʼe oskrivika ikatu hag̃uáicha ñaaprende iñehémplogui (2 Tim. 3:​16, 17). Jaikuaávo Pedro oreko hague umi devilida ha oñeñandu hague ñandéicha, jahecha Jehová nohaʼarõiha ñandehegui ñandeperfékto. Haʼe oipotánte jasegi jalucha jarekóramo jepe umi devilida ha ani ñañentrega. ¿Mbaʼérepa tekotevẽ jasegi ñañehaʼã jaservi Jehovápe? Ikatu oime ñapensa jasuperáma hague peteĩ devilida, péro upéi jaʼa jey. Péicha jave jasegi vaʼerã ñañehaʼã ikatu hag̃uáicha ñamehora. Enterove ningo jaʼe térã jajapo jepi umi mbaʼe ñambyasýva upe rire. Péro nañañentregáirõ, Jehová katuete ñanepytyvõta jasegi hag̃ua ñamehora (1 Ped. 5:10). Jaikuaávo Jesús oiporiahuvereko hague Pédrope ojavýramo jepe heta vése, ñanemokyreʼỹta jasegi hag̃ua jaservi Jehovápe. w23.09 20, 21 párr. 2, 3

Jesús ikatu kuri omonguera Lázarope, Marta heʼi haguéicha pe téxto koestediaguápe. Péro haʼe ojapose kuri peteĩ mbaʼe tuichavéva. Jesús opromete Mártape: “Ne ermáno opuʼã jeýta”. Ha heʼi avei chupe: “Che hína pe omoingove jeýva umi héntepe ha pe omeʼẽva vída chupekuéra” (Juan 11:​23, 25). Ha upéva ningo siertoite. Ñandejára omeʼẽ Jesúspe pe podér oporomoingove jey hag̃ua. Anteve Jesús omoingove jey kuri peteĩ mitãkuñaʼi omano ramoitévape, ha avei peteĩ mitãrusúpe omanoha díape (Luc. 7:​11-15; 8:​49-55). Péro Lázaro ningo ojapóma 4 día omano hague ha oiméne oñepyrũma raʼe oñembyai. ¿Ikatúne piko upéicharõ oñemoingove jey chupe? María, haʼéva avei Lázaro ermána, oñemboja Jesúsre ha heʼi avei chupe: “Che Ruvicha, reimérire koʼápe, che ermáno nomanomoʼãi kuri” (Juan 11:32). Jesús ohechávo ha ohendúvo hasẽha María ha umi ótrope, opokoiterei hese. Ombyasyeterei rupi iñamigokuérape oñepyrũ avei hasẽ. Haʼe ningo ontende porãiterei mbaʼéichapa ñañeñandu omano jave ñandehegui peteĩ jahayhúva. Upévare oipotáma voi opa pe ñemano anivéma hag̃ua ñanembohasa asy. w23.04 10, 11 párr. 12, 13