Febrero

Rréi Ezequías ou vaʼekue hasyete ha ojerure asy Jehovápe oipytyvõmínte hag̃ua chupe. Upéicha rupi Jehová omonguera ko rréipe (2 Rey. 20:​1-6). Apóstol Pablo ojerure vaʼekue avei Jehovápe oipeʼamínte hag̃ua chugui ‘peteĩ ñuatĩ oikutu’ rasýva chupe. Péro upe kásope Jehová nosolusionái la provléma (2 Cor. 12:​7-9). Avei ñanemanduʼa rréi Herodes ojukase hague apóstol Santiago ha Pédrope. Upéi Santiágope ojejuka ha Pédrope katu osalva peteĩ ánhel (Hech. 12:​1-11). ¿Mbaʼére Jehová oprotehe Pédrope ha ndosalvái Santiágope? La Biblia ndeʼíri mbaʼeve, péro ikatu ñaĩ segúro Jehová ‘arakaʼeve naiñinhustoiha’ (Deut. 32:4). Sapyʼánte Jehová ikatu nokontestái ñandéve ñahaʼarõhaichaite. Péro ndajadudái entéro mbaʼe Jehová ojapóva ohechaukaha oporohayhu ha ihustoha. Upévare ndajaikói ñakuestiona mbaʼéichapa okontesta ñane ñemboʼe (Job 33:13). w23.11 21 párr. 6

La Bíbliape Santiago heʼi umi iñarandúva ‘ikyreʼỹha iñeʼẽrendu hag̃ua’. ¿Mbaʼépa heʼise upéva? Ñande pyʼaite guive ñaneñeʼẽrenduse vaʼerãha umi orekóvape autorida Jehová omeʼẽ rupi chupekuéra. Péro jaikuaa Jehová nohaʼarõiha ñaneñeʼẽrendu oĩrõ ojeruréva ñandéve pono ñakumpli la haʼe omandáva (Hech. 4:​18-20). Ñandéve g̃uarã ikatu ifasilve hína ñaneñeʼẽrendu Jehovápe yvypórape rangue, pórke la haʼe omandáva siémpre iporã, perfékto voi (Sal. 19:7). Péro umi yvypóra orekóva autorida iñimperfékto. Upéicharõ jepe ñande Ru yvagapegua omeʼẽ siérta autorida tuakuérape, umi oĩvape pe goviérnope ha ansianokuérape (Prov. 6:20; 1 Tes. 5:12; 1 Ped. 2:​13, 14). Añetehápe, ñaneñeʼẽrendúvo chupekuéra ñaneñeʼẽrendu hína Jehovápe. w23.10 6 párr. 2, 3

Jajepyʼamongetáramo pe podér Jehová orekóvare ñamombaretéta ñande jerovia. Haʼe oreko la podér okumpli hag̃ua entéro mbaʼe opromete vaʼekue. Jaikuaaháicha haʼe hína pe Todopoderóso (Job 42:2; Mar. 10:27; Efes. 3:20). Jehová heʼi vaʼekue Abrahán ha Sárape orekotaha peteĩ mitã ijedaitereíramo jepe hikuái (Gén. 17:​15-17). Avei oasegura vaʼekue Abrahánpe omeʼẽtaha ifamiliarépe Canaán yvy. Péro heta tiémpore umi israelita esklávo vaʼekue Egíptope. Ha jaikuaa haʼekuéra haʼe hague Abrahán familiare, upévare oiméne opensa raʼe hikuái upe promésa núnka noñekumplimoʼãiha. Péro si oñekumpli vaʼekue. Avei Jehová oasegura vaʼekue Maríape hyeguasutaha vírhenramo jepe, ha upe mitã haʼetaha Ñandejára raʼy. Upéva okumplíta kuri peteĩ promésa Jehová ojapo vaʼekue miles de áño upe mboyve pe hardín de Edénpe (Gén. 3:15). Entéro umi kásope Jehová nopyrũi vaʼekue iñeʼẽre. Upéva ningo omombarete ñande jerovia haʼe katuete oguerutaha pe múndo pyahu (Jos. 23:14; Is. 55:​10, 11). w23.04 28 párr. 10-12

Jehová okontesta vaʼekue Davídpe ha osalva chupe (1 Sam. 19:​10, 18-20; 2 Sam. 5:​17-25). Ñande avei ikatu ñaĩ segúro upévare (Sal. 145:18). Sapyʼánte ikatu Jehová nokontestái ñandéve ñahaʼarõ hagueichaite. Pablo heʼi vaʼekue oreko hague peteĩ ‘ñuatĩ oikutu rasýva’ chupe. Upévare 3 vése ojerure asy Jehovápe oipeʼami hag̃ua chugui upe provléma. ¿Okontestápa rakaʼe Jehová Páblope? Si, péro ndahaʼéi haʼe ohaʼarõ hagueichaite. Oipeʼa rangue Páblogui upe provléma, Jehová omeʼẽ chupe pe fuérsa oikotevẽva osegi hag̃ua oservi chupe fiélmente (2 Cor. 12:​7-10). Ñande kásope avei ikatu sapyʼánte Jehová okontesta ñandéve péro ndahaʼéi la rrespuésta ñande ñahaʼarõ vaʼekue. Péicha jave ikatu ñaĩ segúro Jehová oikuaa porãha mbaʼépa la okonvenivéva ñandéve. Añetehápe haʼe ikatu voi “ojapo hetaitereive mbaʼe ñande ikatúvagui jajerure térã ñañeimahina” (Efes. 3:20). Upéicharõ Jehová ikatu hína okontesta ñandéve ñaimoʼãʼỹháicha ha ñaimoʼãʼỹve jave. w23.05 8, 9 párr. 4-6

Iñimportánte jajepyʼamongeta jepi pe rresurreksiónre. ¿Mbaʼérepa? Ñande ndajaikuaái rupi mbaʼépa la ñaneraʼarõva, ikatu hína jaju tuicha ñanderasy térã omano peteĩ jahayhúva (Ecl. 9:11; Sant. 4:​13, 14). Pe esperánsa de la rresurreksión ñanepytyvõ ikatu hag̃uáicha jagueropuʼaka koʼãichagua situasión (1 Tes. 4:13). La Biblia heʼi ñandéve ñande Túa yvagapegua ñandekuaa porãitereiha ha ñanderayhuha (Luc. 12:7). Tekotevẽ voi oikuaa porã mbaʼeichagua persónapa ñande ha umi mbaʼe jahasa vaʼekue ikatu hag̃uáicha ñanemoingove jey. Ha ñanderayhu rupi omeʼẽ ñandéve la oportunida jaikove hag̃ua pára siémpre. Ñamanóramo jepe haʼe ñanemoingove jeýta. ¿Mbaʼérepa ikatu jaguerovia oikotaha pe rresurreksión? Pórke ñaime segúro pe persóna oprometéva ñandéve orekoha pe deséo ha podér, térã pe kapasida okumpli hag̃ua. w23.04 8, 9 párr. 2-4

José ha María oñehaʼãmbaite vaʼekue oñondive omombarete hag̃ua iñamista Jehovándi. Haʼekuéra oikuaa porã vaʼekue iñimportanteha jaadora Jehovápe en família (Luc. 2:​22-24; 4:16). Haʼekuéra oheja peteĩ ehémplo iporãitereíva umi omendávape. Oimérõ penefamília, ikatu sapyʼánte ijetuʼu peho hag̃ua rreunionhápe oñondivepa ha peñemotiémpo pejapo hag̃ua pende estúdio de família. Oiméne ijetuʼuvéntema peẽme peñemboʼe ha pestudia hag̃ua oñondive kómo matrimónio. Péro aníkena penderesarái peñehaʼãramo peadora Jehovápe oñondive, pemombaretevetaha pene amista hendive ha peñemoag̃uivetaha ojuehe. Upévare pemotenonde memékena Jehovápe pene matrimóniope. Oimérõ peneprovléma hína pene matrimóniope, ikatu epensa haguérente pejapotaha pende estúdio de família oñondive, ja ndaigustovéima ndéve mbaʼeve. Oimérõ upéicha, primerorã ikatu pestudia mbykymínte peteĩ informasión. Upéva penepytyvõta pejoayhuve hag̃ua ha upéi igústotama peẽme peadora Jehovápe oñondive. w23.05 22 párr. 7, 8

Orrespeta rupi Jehovápe Abdías iñonrrádo ha haʼe vaʼekue peteĩ persóna de konfiánsa. Upéicha rupi pe rréi onombra chupe oñenkarga hag̃ua pe palásiore (ekompara Nehemías 7:2 heʼívare). Avei Abdías orrespeta rupi Jehovápe ipyʼaguasu. Upéva ifálta kuri pórke Abdías oiko vaʼekue pe rréi Acab iñañaitéva ogovernaha tiémpope (1 Rey. 16:30). Hiʼarive Acab omenda vaʼekue Jezabel rehe, ko rréina oadora vaʼekue Baálpe ha ndaijaʼeiete Jehováre. Upévare oñehaʼã vaʼekue anivéma hag̃ua avave oadora Jehovápe umi 10 trívu de Israélpe. Ha ivaiveha Jezabel ojukauka heta Ñandejára profétape (1 Rey. 18:4). Jezabel oñepyrũrõ guare opersegi umi profétape ojukauka hag̃ua chupekuéra, Abdías ‘omokañy 100 Jehová profétape, omokañy 50 peteĩ kuévape ha 50 ótro kuévape, ha osegi omeʼẽ chupekuéra pan ha y’ (1 Rey. 18:​13, 14). Ñapensamíntena mbaʼépa ojapo vaʼerãmoʼã Jezabel opillárire Abdíaspe. Katuete ojukáta kuri chupe. Ha Abdías peteĩ persóna ñandeichaguánte avei, upévare oiméne okyhyje raʼe ha nomanoséi. Péro Abdías ohayhueterei Jehovápe ha isiervokuérape, upévare oĩ vaʼekue omano hag̃uáicha jepe hesehapekuéra. w23.06 15, 16 párr. 9, 10

Koʼág̃arupi Jehová ogia ipuévlope ojapo haguéicha ymave. Haʼe ojapo upéva la Biblia ha Jesús rupive, pe omoakãva pe kongregasión. ¿Mbaʼépa ohechauka Jehová ojevaleha unos kuánto kuimbaʼére ogia hag̃ua ipuévlope koʼág̃a? Por ehémplo áño 1870 rire, Charles Russell ha iñirũnguéra ohechakuaa kuri 1914 haʼetaha peteĩ áño iñimportantetereíva. Haʼekuéra ontende upe áñope Ñandejára Rréino ikatuha oñepyrũ ogoverna (Dan. 4:​25, 26). Haʼekuéra ontende upéva ostudia porã rupi umi profesía. Upérõ ojekuaa porã vaʼekue Jehová ogia hague chupekuéra. Umi mbaʼe oiko vaʼekue 1914-pe ohechauka Ñandejára Rréino oñepyrũma hague ogoverna. Upe áñope oñepyrũ kuri pe primera gérra mundiál ha avei oĩ opaichagua mbaʼasy, yvyryrýi tuicháva ha ñembyahýi guasu (Luc. 21:​10, 11). Ojekuaa porãiterei Jehová ojevale hague koʼã kuimbaʼe ipyʼaporãvare oipytyvõ hag̃ua ipuévlope. w24.02 22 párr. 11

Ñande ñaĩva Jehová puévlope jaikuaa haʼe ñanderayhuha, ha oipotaha javyʼa (Rom. 8:​35-39). Ndajadudái avei umi konsého oĩva la Bíbliape siémpre ideprovechotaha ñandéve (Is. 48: 17, 18). ¿Péro mbaʼéichapa ñarreaksionáta oñepresentárõ ñandéve peteĩ provléma nañahaʼarõietéva? Por ehémplo, ikatu peteĩ ñane hénte ojapo térã heʼi álgo ñanemoñeñandu vaíva. Ikatu oime ñanderasy ha ndaikatúi jaservi Jehovápe ñandegustahaichaite. Ikatu avei jasufri peteĩ desástre naturál káusare, térã oĩ rupi ñandepersegíva jaservi haguére Jehovápe. Oiko jave koʼã mbaʼe ikatu ñañeporandu: “¿Mbaʼére piko cherehe oiko koʼã mbaʼe? ¿Mbaʼe ivaíva mbaʼe piko ajapo raʼe? ¿Péva piko heʼise Jehová nachevendesiveimaha?”. Oimérõ nde reñeñandúma péicha algúna ves, ani reñedesanima. Heta Jehová siérvo oñeñandúma vaʼekue avei péicha (Sal. 22:​1, 2; Hab. 1:​2, 3). w23.04 14 párr. 1, 2

Oñepresenta jave ñandéve peteĩ mbaʼe vai ñandestiráva, upepete voi ñamboyke, nañapensavéi hese ni ndajajapói mbaʼeve ikatúva ombyai ñane amista Jehovándi. Jehová oipota ‘ñaneñeʼẽrendu chupe ñande pyʼaite guive’ (Rom. 6:17). Umi mbaʼe Jehová omandáva siémpre iporã ñandéve g̃uarã ha ndaikatúi ñakambia umi iléi (Is. 48:​17, 18; 1 Cor. 6:​9, 10). Pe Diablo ñandeataka ha ñandejopy pono ñaneñeʼẽrendu Jehovápe jadesidíma haguéicha. Haʼe ohundise ñane amista Ñandejárandi, ‘haʼete voi peteĩ león oñehaʼãva omokõ oimeraẽvape’ (1 Ped. 5:8). Umi kristiáno síglo primérope guare ojedesidi ojepytaso mbaretetaha Jehová ykére, upévare oñeamenasa, oñembyepoti ha ojejuka vaʼekue chupekuéra (Hech. 5:​27, 28, 40; 7:​54-60). Koʼág̃a Satanás opersegi Jehová siervokuérape. Por ehémplo umi oñemoĩva Jehováre omaltrataiterei ñane ermanokuérape Rusia ha umi ótro paíspe, ha oataka chupekuéra de algúna fórma. Satanás ndahaʼéi ñandepersegínteva derechoite síno ‘ñanemoñuhãse’ avei (Efes. 6:11). w23.07 15, 16 párr. 6-9

Amedída ke restudia la Biblia rehayhuve Ñandejárape. Ha rehayhu rupi chupe rejapo umi mbaʼe reaprendéva, rejegia la Biblia heʼívare ha redesidi porãve. Avei repensa Ñandejára oipotaháicha ha rejapo umi mbaʼe iporãva ikatu hag̃uáicha haʼe ndeguerohory. Peteĩ mitã okopiaháicha itúape, nde avei resegi nde Ru yvagapegua ehémplo (Efes. 5:​1, 2). Iporãta enterovéva ñañeporandúramo: “¿Ahayhuvépa Jehovápe koʼág̃a añepyrũrõ guarégui aservi chupe? Ajevautisa guive, ¿añehaʼãpa ajoguave Jehovápe espesiálmente ahechaukávo ahayhuha che ermanokuérape?”. Ndovaléi ñañeñandu vai oimérõ jahechakuaa ndajahayhuveimaha Ñandejárape ni ñande rapichápe yma guaréicha. Upéva oiko vaʼekue umi kristiáno síglo primérope guarére, péro Jesús nopensái vaʼekue hesekuéra naipohãveimaha ha ñanderehe avei nopensái upéicha (Apoc. 2:​4, 7). Jesús oikuaa porã ñande ikatuha japorohayhu jey ñañepyrũrõ guaréicha jastudia la Biblia. w23.07 8 párr. 2, 3

Apóstol Pedro heta vése ofalla. Primero haʼe ojeroviaiterei vaʼekue ijehe, oasegura voi haʼe osegitaha ifiél umi ótro apóstol ohejapáramo jepe Jesúspe (Mar. 14:​27-29). Upéi, ojejeruréramo jepe chupe oñatende porã hag̃ua, jey jey opyta oke (Mar. 14:​32, 37-41). Peteĩ hénte aty oúrõ guare ojagarra hag̃ua Jesúspe, haʼe oheja rei chupe (Mar. 14:50). Amo ipahápe onega oikuaaha Jesúspe 3 vése, ha ohura voi 3 vése upéva (Mar. 14:​66-71). Pedro ohechakuaárõ guare tuichaiterei opeka hague yvýre opyta, oñeñandu vaieterei ha hasẽ soro (Mar. 14:72). Upe rire Jesús ndahaʼéi vaʼekue okulpáva Pédrope la ojapo vai vaʼekuére, síno heʼi ko iñamígope orekotaha hetave rresponsavilida (Juan 21:​15-17). Pedro oikuaa vaʼekue tuichaiterei opeka hague. Upéicharõ jepe haʼe noñentregái pórke haʼe oĩ vaʼekue segúro Jesús nopensaiha hese haʼe naipohãveimaha. ¿Mbaʼépa ñaaprende? Jehová oipota ñande ñaime segúro haʼe ñanderayhu ha oĩha ñaneperdona hag̃uáicha (Rom. 8:​38, 39). w24.03 18, 19 párr. 13-15

Umi hekovaíva ikatu opyta otĩ, oñandu ndovaleiha mbaʼeverã, ombyai ifamília ha oĩ umi hyeguasu reíva. Péicha jahechakuaa ñanearandutaha ha mombyry ñaganataha jarrechasáramo pe “kuña naiñarandúiva” invitasión. Umi hekovaíva ombyai iñamista Jehovándi, péro ikatu avei ojagarra chupekuéra mbaʼasy hekovai haguére ha upéi omano upéva káusare (Prov. 7:23). Proverbios 9:18 opakuévo heʼi: “Umi iñinvitádo ningo oho opyta pe Sepultúrape”. ¿Mbaʼérepa upéicharõ hetaite oasepta pe kuña invitasión opa vaietétarõ? (Prov. 9:​13-18). Peteĩ mbaʼe ojagarrapáva opárupi ha tekotevẽva ñamboykete haʼe pe pornografía. Oĩ umi opensáva ndojapomoʼãiha hesekuéra mbaʼeve ohecháramo pornografía, péro ndahaʼeiete upéicha. Pe pornografía ombyaiete umi héntepe. Umi ohecháva ikatu ou noñemombaʼevéi ijupe voi ni ndorrespetavéi ótrope, ha ijetuʼueterei oheja hag̃ua ko vísio. Umi taʼanga tieʼỹ ndojeíri péicha péichante ñane akãgui ha ijetuʼueterei ñanderesarái hag̃ua chugui. Avei pe pornografía noipytyvõi umi héntepe omboykete hag̃ua umi deséo vai, síno omoakãrakuve rei chupekuéra (Col. 3:5; Sant. 1:​14, 15). Amo ipahápe umi ohecháva pornografía upéi ou jepi hekovai. w23.06 23 párr. 10, 11

Oĩrõ jepe heta ótro país odesafiáva ko poténsia mundiálpe, ndojupimoʼãi hikuái hekovia. Jaʼekuaa upéva pórke “pe ita” orrepresentáva Ñandejára Rréinope ombetíta pe estátua pýre, pe párte orrepresentáva pe poténsia mundiál oĩháme Estados Unidos ha Gran Bretaña (Dan. 2:​34, 35, 44, 45). ¿Reĩpa segúro siertoha Daniel profesía oñeʼẽva pe estátua pýre? Oimérõ upéicha ojekuaáta umi mbaʼe redesidívare. Por ehémplo ndereikomoʼãi pláta rapykuéri ni nerembyatymoʼãi heta mbaʼe ndejupe g̃uarã reikuaágui ko múndo aña oñehundi potaitemaha (Luc. 12:​16-21; 1 Juan 2:​15-17). Rentende porãrõ ko profesía nepytyvõta avei rehechakuaa hag̃ua iñimportanteha japredika ha ñamboʼe la héntepe (Mat. 6:33; 28:​18-20). Restudia rire ikatu eñeporandu: “¿Ojekuaápa la adesidívare ndadudaiha koʼẽrõitéma Ñandejára Rréino ohundipataha umi goviérno ko mundopegua?”. w23.08 11 párr. 13, 14

Ñaneumíldekena ha jaasepta ndaikatumoʼãiha jajapo opa mbaʼe jajaposéva ñandeeda rupi, ñanderasykatu rupi térã ñane situasión káusare. Iporãta jasegíramo Barzilái ehémplo, ha anínte jaasepta peteĩ rresponsavilida ndaikatumoʼãiva ñakumpli ñandeeda térã ñanderasykatu rupi (2 Sam. 19:​35, 36). Avei Moisés ojapo haguéicha, jaasepta ajúda ha opyta porã jave ñameʼẽ ótrope umi rresponsavilida (Éx. 18:​21, 22). Ñaneumílderamo ndajaikomoʼãi jajapose umi mbaʼe ndaikatúiva jajapo. Ndaikatúi avei ñañeñandu vai ótro odesidi vai haguére, pórke ñande ndaikatúi jadesidi ótro rehehápe, ha ndaikatúi japrotehe chupekuéra umi mbaʼe ikatúvare ohasa odesidi vai haguére. Tuakuéra, oimérõ peteĩva pene família oheja raʼe Jehovápe, upéva oiméne hasyeterei peẽme. Péro pejekulpáramo, pejagarra hína peteĩ kárga ipohyietereíva Jehová nohaʼarõiva pegueraha. w23.08 29 párr. 11-12

Sansón ñandéichante avei iñimperfékto vaʼekue, upévare haʼe sapyʼánte odesidi vai. Peteĩ jey la odesidi vaʼekuére oiko heta mbaʼe vai. Sansón oservi rire peteĩ tiémpore de hués Israélpe, upéi ou “iñakãvaiete peteĩ kuñataĩre, oikóva Sorec Ñúme, upe kuñataĩ ningo héra vaʼekue Dalila”. Anteve Sansón oñekompromete peteĩ kuñataĩ filistéandi, péro Jehová voi odirihi kuri Sansónpe ojapo hag̃ua upéva ikatu hag̃uáicha oreko “peteĩ oportunida oñorairõ hag̃ua umi filistéondi”. Tiémpo rire, Sansón opyta peteĩ prostitúta rógape pe siuda filistea héravape Gaza. Upérõ guare Ñandejára omombarete Sansónpe oipeʼa ha ogueraha hag̃ua pe siuda rokẽ, upévare ikatu kuri ojehu oimeraẽ mbaʼe pe siudápe (Juec. 14:​1-4; 16:​1-3). Péro Dalila káso idiferénte vaʼekue, pórke haʼe provávlemente israelita ha hendive Sansón ndorekomoʼãi kuri peteĩ oportunida oñorairõ hag̃ua umi filisteo kóntrape. Dalílape ojeofrese kuri heta pláta otraisiona hag̃ua Sansónpe, ha haʼe oasepta upéva. w23.09 5 párr. 12, 13

Tuicha ñanepytyvõta ñañehaʼãrõ ñantende porã la situasión. Peteĩ persóna iñarandúva ojejokokuaa oĩ jave okuestionáva chupe umi mbaʼe ogueroviávare. Peteĩ persóna heʼi térã oporandu jave álgo nomombeʼúi jepi ñandéve mbaʼérepa legálmente oñeʼẽse hína upévare. Upéicharõ ñakontesta mboyve, iporãta jajasegura raẽrõ mbaʼépa la omomýiva upe persónape oporandu hag̃ua upe témare (Prov. 16:23). Jahechamína Gedeón ehémplo. Umi kuimbaʼe Efraingua ipochy kuri hendive ha iñeʼẽ arhél chupe. Haʼekuéra oikuaase mbaʼérepa ántema voi Gedeón ndoavisái chupekuéra oho hag̃ua oñorairõ hendive Israel enemigokuéra kóntrape. Haʼekuéra oiméne orrenega pórke ijorgullóso, tahaʼe haʼeháicha Gedeón ohechauka vaʼekue iñaranduha. Haʼe oñehaʼã ontende chupekuéra ha okontesta porãnte. La Biblia heʼi upéi umi kuimbaʼe ‘oñetrankilisa hague’ (Juec. 8:​1-3). w23.09 16 párr. 8, 9

Jehová ha Jesús ojoayhueterei, ndaipóri túa ha taʼýra ojoayhúva peichaite peve. Katuete hasýne raʼe Jehovápe ohecha Itaʼýrape oñemaltrata, ojerrechasa ha oñembosufri. Umi tuakuéra omanóma vaʼekue chugui peteĩ ifamília, oikuaa mbaʼeichaitépa hasy asy upéva. Jajeroviáramo jepe ñande pyʼaite guive pe rresurreksiónre, lomímonte jasufrieterei omano jave ñandehegui peteĩ jahayhúva. Ko ehémplo ñanepytyvõ ñantende hag̃ua mbaʼéichapa oiméne Jehová oñeñandu rakaʼe ohechárõ guare Itaʼýrape hetaite osufri ha omano áño 33-pe (Mat. 3:17). ¿Mbaʼetekópa ñañepyrũramo jajeprepara koʼág̃a guive pe konmemorasionrã? Upearã ikatu jastudia porã pe rreskáte tahaʼe ñaneañoháme térã ñande estúdio de famíliape. Ha aníkena ñanderesarái jahecha hag̃ua pe adorasión matutína ojepreparáva pe konmemorasión díape g̃uarã. Japreparárõ ñane korasõ konmemorasionrã, ñaipytyvõ porãvéta ótrope ohose hag̃ua avei (Esd. 7:10). w24.01 11 párr. 10-12

Jehová ikatu ñanemombarete ñañemboʼéramo chupe. Haʼe okontestáta ñane ñemboʼe omeʼẽvo ñandéve “pe podér umi ótra hénte ndorekóiva” (2 Cor. 4:7). Avei ikatu jarresivi Jehová ajúda jaleéramo Iñeʼẽ ha jajepyʼamongetárõ hese (Sal. 86:11). La Bíbliape oĩ Ñandejára mensáhe ñandéve g̃uarã, ha upéva “oreko podér” (Heb. 4:12). Ñañemboʼérõ ha jaleérõ Iñeʼẽ, ikatúta jasegi ñaaguanta ha ñakumpli umi asignasión ijetuʼúva. Jahechamína mbaʼéichapa Jehová omombarete vaʼekue proféta Jonáspe. Haʼe okyhyje kuri oho hag̃ua pe asignasión Jehová omeʼẽ vaʼekuépe chupe. Upéicha rupi ojupi peteĩ várkope ha oho ótro ladoite. Upéi peteĩ torménta káusare haimete omano haʼe ha umi ótro oĩva pe várkope. Upémarõ umi oviaháva pe várkope omombo Jonáspe pe márpe. Upéi oiko hese álgo omongyhyjevéva chupe: Peteĩ pira tuichaitereíva omokõ chupe. ¿Mbaʼépa ojapo Jonás ipyʼaguasu hag̃ua oĩrõ guare haʼeñomi pe pira ryépe? Haʼe oñemboʼe Jehovápe (Jon. 2:​1, 2, 7). w23.10 13 párr. 4-6

Apóstol Pedro oskrivi vaʼekue umi kárta umi kristiáno oikóvape g̃uarã síglo primérope. Jehová omoĩka rupi umíva la Bíbliape ideprovécho avei ñandéve koʼág̃a (Rom. 15:4). Umi hénte oikóva ñande jerére ndojeroviái umi profesía oĩvare la Bíbliape. Umi oñemoĩva testígo de Jehováre oñembohory ñanderehe pórke heta tiémporema jaʼe outaha pe fin. Oĩ heʼíva núnka nog̃uahẽmoʼãiha upe día (2 Ped. 3:​3, 4). Ñahendúramo koʼã mbaʼe heʼiha umi ñane vesíno, ñane kompañéro de traváho térã ñane hentekuéra, ikatu ñandejerovia kangy. Péicha jave tuicha ñanepytyvõta la Pedro heʼi vaʼekue. Heta persóna ikatu opensa Jehová otardaitereiha ohundi hag̃ua ko múndo aña. Péro umi mbaʼe Pedro heʼi vaʼekue ñanemomanduʼa Jehová ndohechaiha pe tiémpo ñande jahechaháicha (2 Ped. 3:​8, 9). Jehovápe g̃uarã 1.000 áño haʼete un díante. Haʼe ipasiénsia ha ndoipotái avave oñehundi. Péro og̃uahẽ vove pe día haʼe omoĩ vaʼekue ohundi hag̃ua ko múndo aña, katuete ojapóta upéva. w23.09 26, 27 párr. 2-5

¿Mbaʼérepa oskrivi vaʼekue Pablo umi kristiáno hebreo oikóvape Judéape? Provávlemente mokõi mbaʼére. Primero omokyreʼỹ hag̃ua chupekuéra. Oiko mboyve chuguikuéra kristiáno, la majoría oĩ vaʼekue umi judío rrelihiónpe. Ikatu oime umi omoakã vaʼekue chupekuéra irrelihiónpe oñembohory hesekuéra haʼe haguére koʼág̃a kristiáno. Pórke umi kristiáno ndorekói vaʼekue peteĩ témplo neporãmba jepéva oadora hag̃ua Jehovápe. Ndorekói vaʼekue avei umi altár ojapo hag̃ua sakrifísio ha ndaipóri vaʼekue saserdóte oipytyvõ vaʼerã chupekuéra. Upéva ikatu kuri omokangy ijeroviakuéra (Heb. 3:​12, 14). Ikatu oĩ algúno opensáva oho jeývo umi judío rrelihiónpe. Segundo, Pablo ohechaukase kuri umi kristiáno hebréope, tekotevẽha oñehaʼãve hikuái ontende hag̃ua umi enseñánsa pyahu ha hypyʼũvéva, péva hína pe “tembiʼu iñaliméntova” oĩva Ñandejára Ñeʼẽme (Heb. 5:​11-14). Umi kristiáno apytépe oĩ vaʼekue umi osegíva gueteri ojegia Moisés léire. w23.10 24, 25 párr. 3, 4

Oĩ ermána odesidíva nomendái (Mat. 19:​10-12). Jehová ha Jesús ndoapoʼíri umi nomendáivape. Ko múndo tuichakuére oĩ umi ermána soltéra tuichaiterei oipytyvõva umi kongregasiónpe. Haʼekuéra oporohayhu ha oñeinteresa ótrore, upévare hetápe g̃uarã haʼekuéra haʼetévaicha voi iñermána térã isy tee (Mar. 10:​29, 30). Ikatu hína reservi de tiémpo kompléto. La majoría opredikáva ko múndo tuichakuére haʼe ñane ermanakuéra (Sal. 68:11). ¿Ikatúpa avei reservi de tiémpo kompléto? Ermanakuéra, peẽ ikatu peservi de prekursóra, pembaʼapo konstruksiónpe térã Betélpe. Peñemboʼékena umi mbaʼe pehupytysévare Jehová servísiope. Peñeʼẽ umi oservívandi de tiémpo kompléto ha pehecha mbaʼépa pejapo vaʼerã peñepyrũ hag̃ua peservi de tiémpo kompléto. Upéi pekalkula mbaʼépa pejapótama pehóvo. Peservírõ de tiémpo kompléto perekóta hetave oportunida pejapo hag̃ua umi mbaʼe ijojahaʼỹva Jehová servísiope. w23.12 22 párr. 16, 17

Pe jehasa asy guasu hiʼag̃uimbaitéma. Upévare iñimportanteterei ñaneñeʼẽrendu Ñandejárape ha jasegi japredika. Upéicharamo jepe ikatu ijetuʼu ñandéve ñamotenonde pe predikasión oimérõ jahasa peteĩ provléma ekonómiko, térã oĩ oñemoĩva ñanderehe japredika haguére. Ñamotenonde hag̃ua Jehová volunta jasegi vaʼerã jajerovia “Jehová, umi ehérsito yvagapegua ruvicha” oĩha ñande ykére. Haʼe siémpre ñanepytyvõta ñamotenondéramo ivolunta, upévare ndaipóri mbaʼérepa jakyhyje vaʼerã (Ageo 2:4). Jehová oipota ñamotenonde pe predikasión ikatu hag̃uáicha umi hénte ojesalva. Ageo omokyreʼỹ vaʼekue umi judíope omoñepyrũ jey hag̃ua pe traváho sagrádo orekóva. Jehová opromete haʼekuéra ojapóramo upéva ovendesitaha chupekuéra (Ageo 2:​18, 19). Ñande avei ikatu ñaime segúro Jehová ñanevendesitaha, ñañehaʼãmbaitéramo ñamotenonde pe traváho onkarga vaʼekue ñandéve. w23.11 16 párr. 8; 17 párr. 11

Pe kárta oskrivi vaʼekuépe apóstol Pablo umi rrománope heʼi vaʼekue enterove persóna pekadorha. Upéicharõ, ¿mbaʼéichapa Ñandejára ikatu ovyʼa ñandereheve ha heʼi ñanderehe ñandehustoha? Pablo oipuru vaʼekue Abrahán ehémplo okontesta hag̃ua upe pregúnta umi kristiánope. Jehová heʼíma vaʼekue Abrahán rehe ihustoha oikórõ guare Canaánpe. ¿Mbaʼérepa? Ndeʼíri vaʼekue hese upéicha okumpli haguére Moisés léi. ¿Mbaʼérepa jaikuaa upéva? (Rom. 4:13). Pórke pe léi oñemeʼẽ umi israelítape mas de 400 áño Ñandejára heʼi rire Abrahán rehe ihustoha. ¿Mbaʼérepa upéicharõ Jehová heʼi rakaʼe hese ihustoha? Jehová imbaʼeporãiterei vaʼekue Abrahán ndive ha heʼi hese ihustoha pórke Abrahán ojerovia hese (Rom. 4:​2-4). w23.12 3 párr. 4, 5

Natán heʼi riremi rréi Davídpe la jaleéva pe téxto koestediaguápe, ensegidamínte avei Jehová heʼi Natánpe David nomopuʼãmoʼãiha chupe g̃uarã pe témplo (1 Crón. 17:​3, 4, 11, 12). ¿Mbaʼéichapa upémarõ orreaksiona David? David oñepyrũ ombyaty pe pláta ha umi materiál oikotevẽtava itaʼýra Salomón ojapo hag̃ua pe traváho tuichaitéva (1 Crón. 29:​1-5). Ojeavisamírente Davídpe haʼe nomopuʼãmoʼãiha pe témplo, Jehová ojapo peteĩ kompromíso hendive. Ñandejára opromete Davídpe peteĩva ifamiliare ogovernataha pára siémpre (2 Sam. 7:16). Ñapensamíntena pe múndo pyahúpe Jesús ogoverna vove umi mil áño aja mbaʼeichaitépa ovyʼáta David oikuaávo pe rréi haʼeha peteĩva ifamiliare. ¿Mbaʼépa ñanemboʼe ko ehémplo? Ndaikatúiramo jepe jajapo entéro mbaʼe jajaposéva Jehová servísiope, Ñandejára ikatu hína ñanevendesi ha omeʼẽ ñandéve ótra kósa iporãitereíva ni nañaimoʼãi vaʼekue. w23.04 15, 16 párr. 8-10

Oĩ unas kuánta párte la Bíbliape tuichaiterei ñanekonsolátava oĩ jave álgo ñanemongyhyjéva, por ehémplo lívro de Job, Salmos, Proverbios ha la Jesús heʼi vaʼekue Mateo kapítulo 6-pe. Amáske ñañemboʼe Jehovápe ha jalee Iñeʼẽ, jahecháta mbaʼéichapa haʼe ñanekonsola. Ikatu jajerovia Jehová oĩtaha ñande ykére ojere vaipaite jave ñandéve. Ni núnka nañaimemoʼãi ñaneaño (Sal. 23:4). Jehová opromete oñangarekotaha ñanderehe, ñanembopyʼaguapytaha, ndohejamoʼãiha mbaʼeve ñanembokacha vaipa ha ñanekonsolataha. Isaías 26:3 heʼi voi: “Ñandejára, nde ningo reprotehéta umi ojeroviávape nderehe ipyʼaite guive, nde reipytyvõta chupekuéra oiko hag̃ua pyʼaguapýpe, pórke haʼekuéra okonfia nderehe”. Upévare jajeroviákena Jehováre, ha jajapo la ñande párte haʼe ñanepytyvõ hag̃ua. Upéicharõ nañandereitymoʼãi ni umi situasión ijetuʼuvéva. w24.01 25 párr. 16, 17

Ko versíkulo heʼíva oñekumpli hína koʼág̃arupi. Ñanembopyʼaguapy jahechávo mbaʼéichapa oñekumpli avei la Isaías heʼi vaʼekue koʼã versíkulope: ‘Che, Jehová, ahekomboʼéta entéro ne familiakuérape, ha haʼekuéra oikóta pyʼaguapýpe. Nde territóriope siémpre ojejapóta hustísia, péva haʼetéta voi peteĩ simiénto nemopyenda porãva. Nderekyhyjemoʼãi mbaʼevete asýgui. Nderekyhyjemoʼãi pórke umi mbaʼe nemongyhyjéva, mombyry oĩta ndehegui’ (Is. 54:​13, 14). Satanás haʼéramo jepe “ko múndo jára”, ndaikatúi ojoko Jehová puévlope (2 Cor. 4:4). Upéicha rupi jasegi ñaipytyvõ la héntepe oikuaa porãve hag̃ua Jehovápe. Koʼág̃arupi oĩ jeýma oadoráva Jehovápe haʼe oipotaháicha ha avave ndaikatumoʼãvéima ombyai upéva, ni koʼág̃a ni amo gotyove. Upévare, tahaʼe haʼéva pe árma ojepurúva ñane kóntrape nosẽporãmoʼãi núnka. w24.02 4 párr. 10

Ñande ñakumpli porãse pe promésa jajapo vaʼekue ñañemeʼẽrõ guare Jehovápe. Ha upéva jareko enkuénta umi mbaʼe jadesidívape ha jajapóvape ñane família rehehápe. Ñañehaʼãmbaite ñakumpli ñane rresponsavilida ñane famíliandi la Biblia heʼiháicha, péro siémpre ñamotenonde Jehová oipotáva (Mat. 10:​35, 36; 1 Tim. 5:8). Upévare sapyʼánte ikatu ipochy ñanendive ñane parientekuéra, péro péicha jave jajesakrifikámante japyta porã hag̃ua Jehovándi. Haʼe omoñepyrũ vaʼekue pe família ha oipota enterovéva javyʼa ñane famíliape (Efes. 3:​14, 15). Javyʼa añetéramo, jajapo vaʼerã entéro mbaʼe Jehová oipotaháicha. Haʼe ohecha ñañehaʼãmbaiteha jaservi chupe, ñañangareko ñane famíliare mborayhúpe ha jarrespetaha chupekuéra. Aníkena jaduda Jehová ovaloraha la jajapóva (Rom. 12:10). w24.02 18 párr. 11, 13