Marzo

Jaikuaa pe múndo pyahu neʼirãha og̃uahẽ. Péro ñapensamíntena umi mbaʼe si oĩmavare koʼág̃a: Umi estrélla, umi yvyramáta, animalkuéra ha yvyporakuéra. Koʼã mbaʼe ndahaʼéi vaʼekue siémpre oexistíva, péro avave ndeʼimoʼãi ndoexistiriha koʼág̃a. Umíva oĩ pórke Jehová okrea vaʼekue (Gén. 1:​1, 26, 27). Añetehápe, Ñandejára opromete omoĩtaha peteĩ múndo pyahu. Ha haʼe katuete okumplíta upe promésa. Upépe jaikóta pára siémpre ha ñaneresãita. Itiempoitépe Ñandejára odesidíma haguéicha, oexistíta pe múndo pyahu oexistiháicha avei umi mbaʼe oĩva ko univérsope (Is. 65:17; Apoc. 21:​3, 4). Og̃uahẽ mboyve pe múndo pyahu ñañehaʼãmbaitékena jajapo opa ikatúva ñamombarete hag̃ua ñande jerovia. Siémprekena jaagradese pe rreskátere. Jajepyʼamongeta Jehová podér rehe, ha jajapo umi mbaʼe ñanemoag̃uivétava hese. Jajapóramo koʼã mbaʼe ñaiméta ‘entéro umi ojeroviáva ha ipasiénsia vaʼekue apytépe, umíva orresivi vaʼekue umi promésa porãite’ (Heb. 6:​11, 12). w23.04 31 párr. 18, 19

Jesús omaña yvága gotyo ha oñemboʼe enterovéva renondépe. Haʼe oipota kuri oñemombaʼe Jehovápe la oikótavare ha upéi hatã heʼi: “¡Lázaro, esẽ!” (Juan 11:43). Ha Lázaro osẽ pe sepultúragui. Upérõ guare Jesús ojapo peteĩ mbaʼe haʼetévaicha núnka ndoikomoʼãiva kuri. Ko rreláto ñanepytyvõ jajeroviave hag̃ua pe rresurreksiónre. Ñanemanduʼamína la Jesús opromete vaʼekuére Mártape, heʼi kuri chupe: “Ne ermáno opuʼã jeýta” (Juan 11:23). Itúaicha avei Jesús oreko pe deséo ha podér okumpli hag̃ua upe promésa. Hasẽrõ guare haʼe ohechauka ikorasõ mbytete guive orresusitaseha umi omano vaʼekuépe ha ndoipotaveimaha avave ohasa asy pe ñemano káusare. Lázaro oikove jeýrõ guare, Jesús ohechauka orekoha pe podér omoingove hag̃ua umi omano vaʼekuépe. Ñapensami pe Jesús omomanduʼa vaʼekuére Mártape, oñemensionáva pe téxto koestediaguápe. Jaguereko hetaiterei rrasón jaguerovia hag̃ua Ñandejára okumplitaha pe promésa omoingove jeývo umi omano vaʼekuépe. w23.04 11, 12 párr. 15, 16

Sapyʼánte tekotevẽta ñakambiaʼimi la jaʼéva ñane ñemboʼépe ñantende porãve rupi jahávo mbaʼépa Jehová volunta. Ñanemanduʼáke Jehová okumplitaha ivolunta pe tiémpo haʼe odesidíma vaʼekuépe. Okumpli vove ivolunta Jehová oipeʼapaitéta pára siémpre entéro umi mbaʼe ñanembosufríva, umíva apytépe umi desástre naturál, umi mbaʼasy ha pe ñemano. Ha igoviérno rupive Jehová okumplipaitéta la opromete vaʼekue (Dan. 2:44; Apoc. 21:​3, 4). Péro og̃uahẽ meve upe tiémpo Jehová opermiti gueteri hína Satanáspe ogoverna ko múndo (Juan 12:31; Apoc. 12:9). Upévare Jehová koʼag̃aite osolusionambaitérõ umi provléma, haʼetéta ku Satanás ogoverna porãva hína ko múndo. Péro tekotevẽramo jepe ñahaʼarõ Jehová okumpli peve umi promésa, upéva ndeʼiséi haʼe nañanepytyvõiha koʼág̃a. Jehová ojapo hína heta mbaʼe ñanderehehápe. w23.05 8 párr. 4; 9, 10 párr. 7, 8

¿Mbaʼéichapa ñaipytyvõkuaa umi héntepe oho hag̃ua konmemorasiónpe? Primero ikatu ñainvita chupekuéra. Upéva jajapo ñasẽ jave ñaporoinvita umi ogahárupi, péro ikatu avei jajapo peteĩ lísta ha ñamoĩ upépe mávapepa ñainvitase. Ñamoĩkuaa upépe ñane hentekuéra, kompañéro de traváho, kompañéro de eskuéla térã de koléhio, ha hetave persóna. Ndajarekóirõ jepe invitasión enterovetévape g̃uarã ñamondokuaa chupe peteĩ enláse ohecha hag̃ua pe invitasión ñane páhinape. ¡Ikatu ñanesorprende jahechávo heta hénte ohoha! (Ecl. 11:6). Umi persóna ñainvitáva ikatu oikuaase hína heta mbaʼe. Upévare ikatu ñapensáma voi umi mbaʼe oikuaasévare hikuái ha jajepreparáma ñakontesta hag̃ua chupekuéra. Umi ohóva primera ves konmemorasionhápe ikatu upéi oikuaase hetave mbaʼe. Tahaʼe pe konmemorasión mboyve upe aja ha opa rire avei jajapose opa ikatúva ñaipytyvõ hag̃ua umi ipyʼaporãvape (Hech. 13:48). Péicha ohechakuaáta mbaʼépepa ideprovécho chupekuéra pe konmemorasión. w24.01 12 párr. 13, 15; 13 párr. 16

La Bíbliape jatopa 8 rreláto oñeʼẽva umi hénte orresusita vaʼekuére ko yvy ape ári. ¿Ikatúpa ñamoĩ la méta jastudia porã hag̃ua koʼã rreláto? Jastudia aja jaheka mbaʼépa ikatu ñaaprende umi rrelátogui. Avei ñapensa vaʼerã mbaʼéichapa káda kásope ojehecha Jehová orekoha pe deséo ha podér omoingove jeývo umi omano vaʼekuépe. Ha aníkena ñanderesarái jajepyʼamongeta vaʼerãha pe rresurreksión iñimportantevévare, haʼéva Jesús rresurreksión. Hetaiterei hénte ohecha vaʼekue Jesús orresusita hague, ha upe rresurreksión omopyenda hína ñande jerovia (1 Cor. 15:​3-6, 20-22). Jaagradesete ningo Jehovápe omeʼẽ haguére ñandéve ko promésa porãite. Ñande ñaĩ segúro Jehová omoingove jeytaha umi omano vaʼekuépe, pórke haʼe oreko pe deséo ha podér okumpli hag̃ua upéva. Jajedesidíkena jasegitaha ñamombarete ñande jerovia pe rresurreksiónre. Jajapóramo péicha ñañemoag̃uivéta Ñandejárare ha haʼetéta voi ku heʼíva ñandéve: “Pe rehayhúva omano vaʼekue opuʼã jeýta” (Juan 11:23). w23.04 8 párr. 2; 12 párr. 17; 13 párr. 20

Pe persóna iñumíldeva orrekonose oĩha heta mbaʼe ndaikatumoʼãiva ojapo. Ñaneumílderõ ndajaikomoʼãi ñañembotuicha, síno ñañemeʼẽta enkuénta oĩha ótro ikatupyryvéva ñandehegui (Filip. 2:3). Gedeón iñumílde ha orrekonose vaʼekue la ndaikatúiva ojapo. Jehová ánhel heʼírõ guare Gedeónpe ojeporavoha chupe osalva hag̃ua Israélpe umi madianítagui, haʼe ohechauka iñumildeha. Upérõ haʼe heʼi: “Che família ningo pe michĩvéva Manasés trívupe, ha che katu ndahaʼeiete voi mbaʼeve che túa rogayguakuéra apytépe” (Juec. 6:15). Gedeón opensa vaʼekue ndaikatumoʼãiha okumpli porã pe asignasión, péro Jehová oikuaa vaʼekue ikatuha. Ñandejára oipytyvõ rupi Gedeónpe, haʼe okumpli porã la oñenkargáva chupe. Umi ansiáno avei oñehaʼã ohechauka iñumildeha entéro mbaʼépe (Hech. 20:​18, 19). Haʼekuéra ndoikói oñembotuicha ojapo porã haguére peteĩ mbaʼe ha ndojapoporãi jave álgo nopensái ndovaleiha mbaʼeverã. w23.06 3 párr. 4, 5

Ofalta gueteri mas de 1.000 áño oñembochipe hag̃ua Satanás akã (Apoc. 20:​7-10). Upe mboyve, la Biblia oprofetisa oikotaha koʼã mbaʼe: Primero, umi goviérno oanunsiáta: “¡Jaikóma pyʼaguapýpe ha segúro porã!” (1 Tes. 5:​2, 3). “Derrepentete” oñepyrũta pe jehasa asy guasu, umi nasionkuéra oataka vove entéro umi rrelihión fálsape (Apoc. 17:16). Upéi Jesús ohusgáta umi héntepe, oseparáta umi ovecha umi kavarágui (Mat. 25:​31-33, 46). Upe tiémpope Satanás osegíta ombaʼapo Jehová kóntrape. Satanás ndaijaʼéi rupi Jehová puévlore omomýita peteĩ grúpo de nasiónpe oataka hag̃ua umi oadorávape Jehovápe. Ko grúpo de nasiónpe la Biblia ohenói “Gog haʼéva Magog territoriopegua” (Ezeq. 38:​2, 10, 11). Upe tiémpope, en algún moménto, umi unhído hembýva gueteri ko yvy ape ári ohóta yvágape. Haʼekuéra omoirũta Crístope ha ijehérsito yvagapeguápe oñorairõ hag̃ua Armagedónpe, upépe opáta pe jehasa asy guasu (Mat. 24:31; Apoc. 16:​14, 16). Upéi Jesucristo goviérno de mil áño oñepyrũta ogoverna ko yvy ape ári (Apoc. 20:6). w23.10 20, 21 párr. 9, 10

Koʼág̃arupi oĩ heta oservíva Jehovápe oikóva umi país ojeproivihápe ojeadora chupe. Abdías ojapo haguéicha, koʼã ermáno osegi orrespeta umi governántepe péro omeʼẽ Ñandejárape la okorrespondéva chupe ha oadora Jehovápe añoite (Mat. 22:21). Koʼã ermáno ohechauka orrespetaha Ñandejárape iñeʼẽrendúvo chupe umi governántepe rangue (Hech. 5:29). Upévare osegi opredika ha oñembyaty hikuái kañyháme (Mat. 10:​16, 28). Avei oñenkarga entéro umi ermanokuéra osegi hag̃ua orresivi la oikotevẽva omombarete hag̃ua ijerovia. Jahechamína Henri ehémplo. Haʼe oiko Áfricape peteĩ país ojeproivi haguépe ñandehegui ñane rembiapo peteĩ tiémpore. Upérõ Henri ojeofrese vaʼekue omog̃uahẽ hag̃ua ermanokuérape umi puvlikasión bíblica. Haʼe heʼi: “Legálmente cheotĩeterei. Jehová la chembopyʼaguasu vaʼekue”. ¿Ikatúta piko ñande ñandepyʼaguasu péicha? Ikatúta la ñañehaʼãrõ jarrespeta Jehovápe ñande pyʼaite guive. w23.06 15, 16 párr. 9, 11

Adán ha Eva opuʼã rire Jehová kóntrape haʼete núnka ndaikatumoʼãiva ko yvy henyhẽ hénte perfékto ha iñeʼẽrendúvagui Jehovápe. Ikatu oime Satanás opensa raʼe osẽ hague la ijidéape. Oiméne okalkula raʼe Jehová ohundíta hague Adán ha Évape ha okreáta hague ótra paréha perfékta ikatúva okumpli ivolunta. Péro Jehová ojapórire upéva, pe Diablo ikatúta kuri heʼi hese ijapuha. ¿Mbaʼérepa? Pórke jalee haguéicha Génesis 1:​28-pe Jehová heʼíma vaʼekue Adán ha Évape ifamiliare omyenyhẽtaha ko yvy. Avei ikatu oime Satanás opensa raʼe Jehová ohejáta hague Adán ha Évape ifamília, péro umíva núnka ndaikatumoʼãiha iperfékto (Ecl. 7:20; Rom. 3:23). Adán ha Eva familiakuéra núnka ndaikatúirõ iperfékto, pe Diablo heʼíta kuri Jehová nokumplíri hague ivolunta. Pórke upéicharõ ko yvy nahenyhẽmoʼãi hénte perféktogui. w23.11 6 párr. 15, 16

Umi instruksión Jehová omeʼẽva ñandéve Iñeʼẽ ha iñorganisasión rupive hesakã porãiterei, ha ñande natekotevẽi ñambojoʼave mbaʼeve umívape (Prov. 3:​5-7). Upéicha rupi ñande jajesegi Ñandejára Ñeʼẽ heʼívarente ha ndajaikói jakrea léi ñane ermanokuérape umi mbaʼe káda uno ikatúvare odesidi. Satanás oipuru umi ‘vyrorei’ ojeʼéva ha ‘umi mbaʼe oñepensáva ko múndope’ ikatu hag̃uáicha ombotavy ha odividipa la héntepe (Col. 2:8). Síglo primérope, Satanás ombotavy hag̃ua la héntepe ojevale vaʼekue umi omboʼévare ojesegi vaʼerãha Moisés léi, umi kreénsia orekóvare la hénte, ha umi enseñánsa omboʼévare umi judío noĩriva Ñandejára Ñeʼẽme. Koʼã mbaʼe ningo japu vaʼekue, ha umi hénte okreéva ndojesarekovéima Jehováre, pe omeʼẽva arandu añetegua. Koʼág̃arupi Satanás ojevale Internet ha umi rred sosiál rehe omosarambi hag̃ua informasión ha notísia japu umi polítiko oipotáva ojeguerovia. w23.07 16 párr. 11, 12

Satanás oiméne ni noimoʼãi raʼe la oikóva. Jehová osolusiona la provléma ikatu hag̃uáicha oñekumpli ivolunta opuʼãramo jepe ikóntrape Satanás, Adán ha Eva. Jehová ohechauka ndaijapuiha, upévare oheja Adán ha Eva ifamília ikatu hag̃uáicha oñekumpli la haʼe heʼíma vaʼekue. Avei Jehová ohechauka haʼe heʼíma guive oikotaha álgo ndaipóri ojokove vaʼerã chupe. ¿Mbaʼépa Jehová ojapo oasegura hag̃ua oñekumplitaha ivolunta? Opromete peteĩva umi “familiare” apytégui osalvataha entéro umi Adán ha Eva familiare iñeʼẽrendúvape (Gén. 3:15; 22:18). Jehová omeʼẽ Itaʼýrape omano hag̃ua yvyporakuéra rehehápe orreskata hag̃ua chupekuéra. Oiméne ni ndohasái kuri Satanás akãrupi la Jehová ojapóva, pórke Jehová ojapo kuri upe sakrifísio oporohayhueterei rupi (Mat. 20:28; Juan 3:16). Satanás katu ni michĩmi ndoporohayhúi, haʼe ijehénte opensa. ¿Mbaʼépa ojehupytýta pe rreskáte rupive? Cristo ogoverna rire 1.000 áño, ko yvýgui oikóta peteĩ paraíso ha upépe oikóta Adán ha Eva familiare iñeʼẽrendúva ha perféktotama hikuái. w23.11 6 párr. 17

Jarrespeta pe léi heʼíva sagradoha ñande rekove ha pe tuguy. ¿Mbaʼérepa? Pórke Jehová heʼi pe tuguy orrepresentaha ñande rekove haʼéva peteĩ rregálo iporãitereíva oúva chugui (Lev. 17:14). Pe primera ves Jehová heʼírõ guare yvyporakuérape ikatuha hoʼu umi animál roʼokue, omanda chupekuéra ani hag̃ua hoʼu huguykue reheve (Gén. 9:4). Ha omanda jey upéva omeʼẽrõ guare Moiséspe pe léi Israélpe g̃uarã (Lev. 17:10). Síglo primérope katu Jehová odirihi pe kuérpo governántepe heʼi hag̃ua entéro kristiáno osegi vaʼerãha ‘omboykete pe tuguy’ (Hech. 15:​28, 29). Koʼág̃a peve jajepytaso mbarete ñakumpli hag̃ua ko léi jadesidíta jave mbaʼe tratamiéntopa jasegíta. Ndajaikói ñanderekovai pórke ñakumplise la Biblia heʼíva. Apóstol Pablo ñaneakonseha vaʼekue ‘jajuka hag̃ua umi mbaʼe vai oĩva ñande pype’. Upéva heʼise jaipeʼaite vaʼerãha ñandejehegui opaichagua deséo vai. Ni mbaʼevéicharõ ndajahechái ni ndajajapói mbaʼeve ikatúva ñandereity tekovaípe (Col. 3:5; Job 31:1). w23.07 15 párr. 5, 6

Oiméne Sansón ohayhueterei raʼe Dalílape, upévare ndopillái mbaʼépa la ojapose vaʼekue. Tahaʼe haʼeháicha Dalila kontinuadoite oporandu Sansónpe mbaʼérepa imbaretete, ha ipahápe Sansón omombeʼu chupe. Ñambyasýramo jepe, Sansón odesidi vai rupi ou ikangy ha opyta vai Jehová renondépe peteĩ tiémpore (Juec. 16:​16-20). Sansón ojeroviave vaʼekue Dalílare, ojerovia rangue Jehováre ha upévare heta ohasa asy. Umi filisteo ojagarra Sansónpe ha ohesaʼo chupe. Upéi oreko chupe préso Gázape, péro ko vuéltape omoĩ hikuái Sansónpe omolina hag̃ua semílla kárselpe. Upe rire umi filisteo oñembyaty ojapo hag̃ua heta sakrifísio idioskuéra Dagónpe ha ofesteha hag̃ua. Upe fiéstape ogueraha hikuái Sansónpe ‘oñembohory hag̃ua hese’ (Juec. 16:​21-25). w23.09 5, 6 párr. 13, 14

Ikatu ñane kompañéro de traváho o de koléhio oporandu ñandéve mbaʼérepa jajegia la Bíbliare. Ñañehaʼãmbaitéta jaexplika mbaʼérepa iporãve la Biblia heʼíva, péro avei jahechauka vaʼerã jarrespetaha káda persóna opensáva (1 Ped. 3:15). Ñapensa rangue pe persóna okritikase térã ojodiskutisenteha, jaaprovecha vaʼerã pe oportunida jaikuaa hag̃ua mbaʼépa iñimportánte chupe g̃uarã. Tahaʼe haʼéva la omomýiva upe persónape ñaneamávle ha ñanderory vaʼerã. Asegún ñakontesta lája upe persónape ikatu omopensa chupe la haʼe ogueroviávare. Siémpre ñakontesta vaʼerã pyʼaguapýpe porãnte. Por ehémplo, ñande travahohápe peteĩ ñane kompañéro ikatu oporandu ñandéve mbaʼérepa ndajafestehái kumpleáño. Péicha jave iporãta ñañeporandu: “¿Nopensáipa hína haʼe Testigokuéra ndaikatuiha voi ojediverti?”. Primeroite jaagradese vaʼerã pe persónape ojepyʼapy haguére ótrore. Upéicha ikatu oñepresenta la oportunida ñañemongeta trankílo porã hag̃ua ñane kompañérondi, ha jaexplika chupe la Biblia omombeʼúva umi kumpleáñore. w23.09 17 párr. 10, 11

Javyʼaite jaaprovecha porã haguére pe tiémpo hembýva japredika hag̃ua umi hénte oĩvape ko múndo tuichakuére. Apóstol Pedro ñanemokyreʼỹ ‘ñanemanduʼa meme hag̃ua Jehová árare’ (2 Ped. 3:​11, 12). Upearã iporãta jajepyʼamongeta káda día umi vendisión jadisfrutátavare pe múndo pyahúpe. Ñañeimahinamína ñaimemaha upépe: Ñandepejuha pe yvytu piroʼy asy, jaʼuha umi tembiʼu porã porã, jarresiviha ñane hénte ha ñane amígo oikove jeývape ha ñamboʼeha umi hénte yma guarépe mbaʼéichapa oñekumpli umi profesía oĩva la Bíbliape. Péicha jajepyʼamongetárõ, jasegíta ñahaʼarõ Jehová ára ha ñaiméta segúro koʼẽrõitéma og̃uahẽtaha pe fin. Ñande ‘jaikuaáma de antemáno’ mbaʼépa oikóta amo gotyove, upévare umi mboʼehára japu ndaikatúi ‘ñandegueraha tape vaíre’. w23.09 27 párr. 5, 6.

Umi mitãrusu ha mitãkuña oreko heta hapichakuéra ‘naiñeʼẽrendúiva ituakuérape’ (2 Tim. 3:​1, 2). Oĩ opensáva ituakuéra hovamokõiha, pórke heʼi chupekuéra ojapo hag̃ua peteĩ mbaʼe, péro haʼekuéra voi ndojapói. Ótro katu opensa ituakuéra konsého yma guaremaha, ndahaʼeveimaha ko tiémpope g̃uarã, térã ojopyetereimaha hendivekuéra. Oimérõ nde nemitã, ¿reñeñandúmavapa péicha? Hetápe ijetuʼu okumpli hag̃ua Jehová mandamiénto jatopáva pe téxto koestediaguápe. ¿Mbaʼépa penepytyvõta pejapo hag̃ua upéva? Jesús omoĩ vaʼekue pe ehémplo iporãvéva ha ikatu peaprende chugui peneñeʼẽrendu hag̃ua (1 Ped. 2:​21-24). Jesús perfékto vaʼekue, péro la ituakuéra iñimperfékto. Upéicharõ jepe Jesús omombaʼe vaʼekue ituakuérape, sapyʼánte ojavýramo jepe, térã ojagarra vai chugui álgo (Éx. 20:12). w23.10 7 párr. 4, 5

Apóstol Pablo oexplika umi sakrifísio ojejeruréva upe léipe ndaikatúi hague oipeʼapaite umi pekádo, ha upévare “oñemboyke” hague upe léi. Upéi haʼe omboʼe chupekuéra unas kuánta enseñánsa hypyʼũva. Por ehémplo heʼi umi kristiánope orekoha peteĩ “esperánsa iporãvéva” Jesús sakrifísio rupive. Ha upéva oipytyvõtaha chupekuéra ‘oñemoag̃ui hag̃ua Ñandejárare’ (Heb. 7:19). Pablo oexplika umi ermánope mbaʼérepa oiko guive chuguikuéra kristiáno oadora porãveha Ñandejárape oĩrõ guarégui umi judío rrelihiónpe. Umi judío oadora vaʼekue Ñandejárape pe léi heʼiháicha. Péro upéva haʼe vaʼekue “peteĩ sómbrante umi mbaʼe oútavagui”. “Añetehápe umíva Cristo sómbra hína” (Col. 2:17). Por ehémplo peteĩ yvyramáta sómbra ohechauka vai vai mbaʼeichaguápa pe yvyramáta. Péicha avei umi judío oadora lája Ñandejárape ñepyrũrã, ohechaukánte mbaʼépa la añetehápe oútava upe rire. Tekotevẽ ñantende umi mbaʼe Jehová ojapo vaʼekue oñeperdona hag̃ua ñandéve ñande pekádo, upéicha ikatúta jaadora chupe haʼe oipotahaichaite. w23.10 25 párr. 4, 5

Proféta Daniel oñeʼẽ mokõi rréi térã goviérnore oñokontráriova, pórke mokõivévante omandase ko múndope. Ñakomparárõ ko profesía umi ótra profesía oĩvare la Bíbliape ikatu jahechakuaa pe “rréi del nórte” orrepresentaha Rusia ha iñirũnguérape ha pe “rréi del sur” katu pe poténsia mundiál oĩháme Estados Unidos ha Gran Bretaña. Jehová siervokuéra oikóva pe “rréi del nórte” omandahápe ojepersegi hína. Oĩ umi oñemaltratáva ha ojegueraháva kárselpe oadora haguére Jehovápe. Umi ermáno oikóva koʼã lugárpe ni michĩmi naikangýi. Upéva rangue ojerovia mbareteve hikuái Jehováre ha Iñeʼẽre, pórke ohechakuaa pe persekusión okumpliha ohóvo pe profesía Daniel oskrivi vaʼekue (Dan. 11:41). Ñande avei jahecha rupi oñekumpliha ko profesía ñane esperánsa imbareteve ha jasegi ñandefiél Jehovápe. w23.08 11 párr. 15, 16

Jehová ñanderayhu rupi ontende umi mbaʼe ñañandúva ha hiʼãiterei chupe ñandeprotehe. Chupe hasy asy ñande jasufri jave. Upévare ñaimekuaa segúro okontestataha ñandéve jajerure jave chupe: “Eñangarekomína cherehe reñangarekoháicha nde resaʼỹire” (Sal. 17:8). Jehová ñanekompara voi hesaʼỹire, ha jaikuaa la ñande resaʼỹire ñanerakateʼỹ ha helikadoitereiha. Haʼete voi Jehová heʼíva hína: “Oimeraẽ olastimáva che siervokuérape, olastima hína álgien ivaliosoitereívape chéve g̃uarã”. Jehová oipota ñaime segúro haʼe ñanderayhuha. Péro haʼe oikuaa avei umi mbaʼe vai jahasa vaʼekue káusare ikatuha ñapensa: “¿Sera piko la Jehová chéve cherayhu?”. Térã jahasa rupi koʼág̃a peteĩ situasión ijetuʼúva, jaduda Jehovápa ñanderayhu hína. ¿Mbaʼépa ñanepytyvõta anivéma hag̃ua jaduda? Ñanepytyvõta ñantendéramo mbaʼéichapa Jehová ohechauka ohayhuha Jesucrístope ha ñandéve avei. w24.01 27 párr. 6, 7

Esdras ohecha vaʼekue mbaʼéichapa Jehová oipytyvõ ipuévlope ijetuʼúrõ guare la situasión. Antevéma voi áño 484-pe a.C., Esdras oiméne oiko raʼe Babilóniape, rréi Asuero omandárõ guare oñehundipaite hag̃ua umi judío oikóvape pe goviérno persa poguýpe (Est. 3:​7, 13-15). Upérõ Esdras ojapeligra ombohovái rupi upe situasión ijetuʼuetéva. Umi judío ‘káda distritopegua oajuna, hasẽ ha ojaheʼo’ ha katuete oñemboʼe rakaʼe hikuái Jehovápe ogiami hag̃ua chupekuéra (Est. 4:3). Péro upéi umi ojukase vaʼekue chupekuéra nosẽi la ijidéape ha ojere hesekuéra la oplanea vaʼekue ojapo. Ñañeimahinamína mbaʼéichapa oiméne oñeñandu raʼe Esdras ha umi ótro judío (Est. 9:​1, 2). Upe oiko vaʼekue opreparáne rakaʼe Ésdraspe ombohovái hag̃ua umi situasión ijetuʼúva oñepresentátava chupe upéi. Ha oiméne opyta ojeroviavéntema Jehová oñangarekotaha ipuévlore. w23.11 17 párr. 12, 13

Apóstol Pablo oñeʼẽ vaʼekue prinsipálmente umi mbaʼe ojapóvare ‘umi okumplíva pe léi’, upéva hína pe léi oñemeʼẽ vaʼekue Moiséspe sérro Sinaípe (Rom. 3:​21, 28). Amalisia Pablo tiémpope oĩ vaʼekue umi kristiáno judío opensáva osegi vaʼerãha okumpli Moisés léi. Upévare Pablo oipuru Abrahán ehémplo ohechauka hag̃ua peteĩ persóna natekotevẽiha okumpli pe léi ikatu hag̃uáicha Ñandejára heʼi hese ihustoha. Pablo heʼi upéva rangue tekotevẽha jajerovia. Upéva ñanemokyreʼỹeterei, pórke ñanemboʼe jajeroviáramo Ñandejárare ha Jesucrístore, Ñandejára ikatuha ñandeguerohory. Péro Santiago kapítulo 2-pe noñeñeʼẽi umi mbaʼe ojejapo vaʼerãre oñekumpli hag̃ua Moisés léi, síno Santiago oñeʼẽ umi mbaʼe porã ojapo vaʼerãre umi kristiáno káda día (Sant. 2:24). Umi mbaʼe ojapóva umi kristiáno ohechauka ojeroviápa Ñandejárare ipyʼaite guive térãpa nahániri. w23.12 3 párr. 8; 4, 5 párr. 10, 11

Umi ermána opensárõ omenda, oiporavo porã vaʼerã imenarã, pórke oñemoĩta ipoguýpe omenda rire (Rom. 7:2; Efes. 5:33). Upévare tekotevẽ peñeporandu: “¿Ko ermánopa ijerovia mbarete? ¿Omotenondépa Jehová servísio? ¿Ohechaukápa iñaranduha la odesidívape? ¿Orrekonosépa ofalla jave? ¿Omombaʼépa kuñanguérape? ¿Chepytyvõtapa añemoag̃uive hag̃ua Jehováre? ¿Ikatútapa omoĩ chéve umi mbaʼe aikotevẽva? ¿Oikótapa chugui che amigoite cheapojátava siémpre?”. Ermanakuéra, petopasérõ peteĩ ména penemoirũ porãtava, peẽ voi pejeprepara vaʼerã oiko hag̃ua pendehegui peteĩ tembireko ikatupyrýva. Pe tembireko haʼe pe ‘omoirũva iménape ha oipytyvõva chupe’ (Gén. 2:18). Ohayhu rupi Jehovápe, pe tembireko ojapo ikatúva guive ótro ohecha hag̃ua umi mbaʼe porã ojapóva iména (Prov. 31:​11, 12; 1 Tim. 3:11). Koʼág̃ama ikatu pejeprepara pemoirũ porã hag̃ua pene ménape ág̃a pemenda vove. Upearã tekotevẽ pehayhuve Jehovápe ha pejepokuaa peporopytyvõ pene famíliape ha kongregasiónpe. w23.12 23 párr. 18, 19

Jehová opromete ñandéve ñanemoarandutaha jadesidi porã hag̃ua, koʼýte ñaikotevẽ upéva ñambohovái jave álgo okambiaitétava ñande rekove. Jehová omombarete haguéicha Páblope, ñanemombaretéta avei ñandéve jagueropuʼaka hag̃ua umi situasión ijetuʼúva (Filip. 4:13). Por ehémplo haʼe ojevale ñane ermáno ha ermanakuérare ñanepytyvõ hag̃ua. Pe pyhare omano mboyve, Jesús oñemboʼe ipyʼaite guive Jehovápe. Haʼe ojerure asy ani hag̃ua oñepensa opuʼãha Itúare ha oñekondena chupe upévare. Jehová oipeʼa rangue Jesúspe upe situasióngui ombou peteĩ ánhel omombarete hag̃ua chupe (Luc. 22:​42, 43). Péicha avei Jehová ikatu ojevale peteĩ ermáno térã ermánare ñanerenói o ñandevisita hag̃ua ha péicha ñanemokyreʼỹ. Enterovéva ikatu jaheka umi oportunida ñamombarete ha ñamokyreʼỹ hag̃ua ñane ermanokuérape (Prov. 12:25). w23.05 10, 11 párr. 9-11

Umi inaktívo ohóva konmemorasiónpe ikatu okyhyje ndojerresiviporãirõ g̃uarã chupekuéra. Upévare, aníkena ñaporandu umi mbaʼe omotĩtava chupekuéra ni jaʼe álgo omoñeñandu vaítava chupekuéra. Haʼekuéra ningo ñane ermáno ha ñane ermána, upévare javyʼa ikatu haguére jaadora jey Jehovápe hendivekuéra (Sal. 119:176; Hech. 20:35). Javyʼaite Jesús omanda haguére ojegueromanduʼa pe konmemorasión káda áño, pórke jahávo ñañevenefisia ñande ha avei umi ótro (Is. 48:​17, 18). ¿Mbaʼéichapa? Jahayhuve Jehová ha Jesúspe, jahechauka ñamombaʼeha la haʼekuéra ojapo vaʼekue ñanderehehápe, ñañemoag̃uive ñane ermanokuérare, ha ñaipytyvõ ótrope odisfruta hag̃ua umi vendisión jahupytýva pe rreskáte rupive. Upéicharõ, jajapókena opa ikatúva ñaime hag̃ua konmemorasiónpe, haʼéva hína pe día iñimportantevéva ko áñope. w24.01 14 párr. 18, 19

¿Mbaʼéichapa ñandegia Jehová? Prinsipálmente la Biblia rupive. Péro avei ojevale unos kuánto kuimbaʼére ñandegia hag̃ua. Por ehémplo, oipuru ‘pe esklávo de konfiánsa ha iñarandúvape’ omeʼẽva ñandéve pe aliménto hiʼoraitépe ñanepytyvõva jadesidi porã hag̃ua (Mat. 24:45). Haʼe ojevale avei umi superintendénte de sirkuíto ha umi ansiáno oĩvare kongregasiónpe. Haʼekuéra ñanemokyreʼỹ ha ñandegia ijetuʼu jave la situasión. Jaagradeseterei ningo Jehovápe ñandegia porãite haguére koʼã ára paha ivaietévape. Jasegíramo igía haʼe ñandeguerohorýta ha jasegíta pe tape ñandeguerahávare pe jeikove opaveʼỹvape. Upéicharõ jepe, sapyʼánte ikatu hína ijetuʼu jasegi Jehová gía, koʼýte og̃uahẽ jave ñandéve kuimbaʼe imperfékto rupive. Upéicha jave, tekotevẽ jajerovia Jehová ogiaha hína ipuévlope ha siémpre iporãvetaha jasegi la igía. w24.02 20 párr. 2, 3

Jastudia porãrõ la Biblia jahayhuvéta Jehovápe. Jalee aja jahecha vaʼerã mbaʼépa káda párte ñanemboʼe Jehovágui. Ikatu ñañeporandu: “¿Mbaʼéichapa ko téxto ohechauka Jehová cherayhuha? ¿Mbaʼéichapa ko aleéva chepytyvõ ahayhuve hag̃ua Jehovápe?”. ¿Mbaʼe ótra kósapa jajapokuaa jahayhuve hag̃ua Jehovápe? Ikatu ñañemboʼe Ñandejárape káda día ha ñamombeʼupaite chupe la ñañandúva (Sal. 25:​4, 5). Jehová katuete okontestáta umi ñane ñemboʼe (1 Juan 3:​21, 22). Ñande avei ñañehaʼã vaʼerã jahayhuve ñande rapichakuérape. Unos kuánto áño oiko rire apóstol Páblogui kristiáno, ou oikuaa Timotéope haʼéva peteĩ mitãkariaʼy ivuenoitereíva. Timoteo ohayhu vaʼekue Jehovápe ha iñermanokuérape. Tiémpo rire Pablo oñeʼẽ vaʼekue Timotéore umi filipénsespe ha heʼi hese: ‘Ndarekói avave haʼéicha ijaktitu porãva, Timoteo ipyʼaite guive oñangarekóta penderehe’ (Filip. 2:20). Pablo ohecharamo mbaʼeichaitépa Timoteo ohayhu iñermanokuérape. Katuete umi kongregasión ovyʼa vaʼekue Timoteo ovisitáta jave chupekuéra (1 Cor. 4:17). w23.07 9 párr. 7-10

Moisés omano vaʼekue umi israelita oike mboyvemi pe Tiérra Prometídape. ¿Hesaráipa Jehová chuguikuéra? Nahániri. Haʼekuéra iñeʼẽrendu aja Jehovápe, haʼe okuida porã vaʼekue hesekuéra. Upévare Moisés omano mboyve, Jehová heʼíma vaʼekue chupe ombokatupyry hag̃ua Josuépe odirihikuaa hag̃ua pe puévlope. Ha Moisés ojapo kuri upéva hetaiterei áñore (Éx. 33:11; Deut. 34:9). Upéva ári jey, oĩ vaʼekue avei Israélpe heta kuimbaʼe ikatupyrýva odirihi hag̃ua pe puévlope. Ha umívape oñemoĩ vaʼekue omoakã hag̃ua umi “grúpo de 1.000, de 100, de 50 ha de 10” (Deut. 1:15). Jahechaháicha, Jehová okuida porã vaʼekue la ipuévlore. Upeichaite oiko vaʼekue avei Elías tiémpope. Hetaiterei áñore, haʼe oipytyvõ vaʼekue umi israelítape oadora hag̃ua Jehovápe haʼe oipotaháicha. Péro ohasa rire un tiémpo, Jehová heʼi chupe oho hag̃ua oservi Judápe sur gotyo (2 Rey. 2:1; 2 Crón. 21:12). Elías oho rire oservi ótro lugárpe, ¿mbaʼépa oiko raʼe pe rréino de 10 trívugui oĩva nórte gotyo? ¿Hesaráipa chuguikuéra Jehová? Nahániri. Heta áñore Elías ombokatupyrýma voi kuri oikóvo Eliséope. Upéicha Jehová volunta osegi oñekumpli ha upe aja ojekuida porã avei isiervokuérare. w24.02 5 párr. 12

Umi kristiáno Efesogua osẽ rire pytũmbýgui, oñepyrũ oiko Jehová Ñeʼẽme heʼiháicha. Upéva haʼete vaʼekue peteĩ lus ogiáva haperãkuéra (Sal. 119:105). Avei omboyketéma pe tekovai ha ndogueroviavéima umi mbaʼe oaprende vaʼekue pe rrelihión japúpe. Koʼã kristiáno oipota vaʼekue Jehová oguerohory chupekuéra, upévare oadora chupe añoiténte ha oñehaʼã ‘ohaʼanga chupe’ (Efes. 5:1). Jaikuaa mboyve pe añetegua, pe rrelihión japu ha pe tekovai hetápe ñandereko vaʼekue pytũmbyetépe. Heta oĩva ñande apytépe ymave orrespeta vaʼekue umi arete oúva pe rrelihión japúgui ha avei umi hekovaíva. Péro jaikuaa rire pe añetegua, ñañepyrũ ñakambia, jaikóma Jehová oipotaháicha ha upéi jahecháma la venefísio (Is. 48:17). Upearã jasegi vaʼerã ñañemomombyry umi mbaʼe ñandereko vaʼekuégui pytũmbýpe. Péichamante ikatúta ‘jaiko umi oĩva lus rendýpe oikoháicha’. Upéva sapyʼánte ijetuʼu hína. w24.03 21, 22 párr. 6, 7

Ikatu oime repensa nereimeitiha preparádo reñemeʼẽ hag̃ua Jehovápe ha rejevautisa. Ikatu rehechakuaa ofaltaitiha ndéve rekambia reiko hag̃ua Jehová oipotaháicha, térã ofaltaitiha ndéve remombareteve nde jerovia (Col. 2:​6, 7). Enterovéva ñanediferénte ojuehegui. Oĩ la pyaʼe oñepyrũva ohayhu Jehovápe ha oñemeʼẽva chupe, ha oĩ avei la orahamiéva chupe tiémpo ojapo hag̃ua upéva. Oĩ umi imitã reheve ojevautisáva ha oĩ la odesidíva ohaʼarõmie. Upévare, eñehaʼãmbaitékena ani eñekompara ótrore. Upéva rangue, iporãvéta repensa mbaʼépepa ikatu emehora ha upéi eñehaʼã embaʼapo ndejehe (Gál. 6:​4, 5). Oiméramo rehechakuaa nereimeitiha preparádo reñemeʼẽ hag̃ua Jehovápe, ani reñentrega ha eñehaʼã ehupyty upéva amo gotyove. Eñemboʼe avei Jehovápe tanepytyvõ rekambia hag̃ua tekotevẽhápe ha eñehaʼã nde voi avei ndejehe (Filip. 2:13). Jehová ningo katuete ohendúta la ne ñemboʼe ha nepytyvõta (1 Juan 5:14). w24.03 5 párr. 9, 10

Peteĩ vuélta Sara ohasa kuri peteĩ situasión ijetuʼúvare ha rreniégore okulpa Abrahánpe la oikóvare. Abrahán oikuaa porã vaʼekue mbaʼeichaguápa hembireko, Sara siémpre orrespeta vaʼekue chupe ha oapoja la haʼe odesidíva. Upévare haʼe ohendu chupe ha oñehaʼã osolusiona la provléma (Gén. 16:​5, 6). ¿Mbaʼépa ñaaprende? Menakuéra, peẽ pemoakã pende rogapy ha ikatu pedesidi la ojejapótava pene famíliape (1 Cor. 11:3). Péro pehayhu rupi pene rembirekópe, pejapysaka porãta ha perekóta enkuénta la haʼe opensáva, koʼýte oafektátarõ chupe la ojedesidíva (1 Cor. 13:​4, 5). Peteĩ vuéltape Abrahán odesidi orresivi hógape umi kuimbaʼe og̃uahẽvape oñehaʼarõʼỹre chupekuéra. Upérõ guare haʼe heʼi Sárape oheja hag̃ua la ojapóva oho hag̃ua oprepara heta pan (Gén. 18:6). Sara ensegída oapoja Abrahánpe ha ojapo la ojeruréva chupe. Tembirekokuéra, peẽ avei ikatu pesegi Sara ehémplo ha peapoja la odesidíva pene ména. Pejapórõ péicha katuete pene matrimónio imbaretevéta ohóvo (1 Ped. 3:​5, 6). w23.05 24, 25 párr. 16, 17

Oñenombra rire Gedeónpe odirihi hag̃ua Israélpe ijetuʼu kuri chupe iñeʼẽrendu ha ipyʼaguasu. Oñemanda chupe ohundi hag̃ua pe altár oipurúva itúa oadora hag̃ua Baálpe, ha upéva peteĩ asignasión ipeligrósova (Juec. 6:​25, 26). Ótra vuéltape, Gedeón ombyaty isoldadokuérape oñorairõ hag̃ua, péro Jehová heʼi chupe 2 vése omomichĩve hag̃ua ijehérsito (Juec. 7:​2-7). Upéi ojeʼe chupe oataka hag̃ua iñenemigokuérape pyharepyte (Juec. 7:​9-11). Iñimportánte umi ansiáno “ikyreʼỹ iñeʼẽrendu hag̃ua”. Peteĩ ansiáno iñeʼẽrendúva pyaʼe osegi pe gía oĩva la Bíbliape ha umi instruksión oúva Jehová organisasióngui. Péicha omoĩ hikuái ehémplo porã. Péro sapyʼánte ikatu ijetuʼu peteĩ ansiánope iñeʼẽrendu hag̃ua. Por ehémplo og̃uahẽrõ heta instruksión térã okambiárõ pyaʼeterei umíva, ikatu ijetuʼu chupe osegipa hag̃ua. Avése ikatu oduda ideprovéchotapa térã oikótapa upe lugárpe peteĩ instruksión. Ikatu avei oñemeʼẽ chupe peteĩ asignasión oĩháme la posivilida ohóvo préso. ¿Mbaʼéichapa umi ansiáno ikatu osegi Gedeón ehémplo péicha jave? Tekotevẽ oñatende porã umi instruksión oñemeʼẽvare ikatu hag̃uáicha okumpli. w23.06 4, 5 párr. 9-11