Mayo

Primer síglope ou kuri peteĩ ñembyahýi guasu “oparupiete ko yvy ape ári”, ha upe situasión oafekta vaʼekue avei umi kristiáno ypykuépe. Oiméne umi tuakuéra ojepyʼapy ha oikuaase kuri mbaʼéichapa omongarúta umi ifamília mimíme. Umi mitãrusu opredikaseve vaʼekue katu oiméne oñeporandu raʼe: “¿Ahaʼarõ vaʼerãpa omehora la situasión ajapo hag̃ua upéva?”. Tahaʼe haʼeháicha umi kristiáno ohecha mbaʼépa ikatu ojapo. Haʼekuéra osegi opredika isituasión opermitiháicha chupekuéra ha avei vyʼápe okomparti la orekomíva umi ermanokuéra Judeapegua ndive (Hech. 11:​29, 30). Oñemeʼẽ rupi chupekuéra la oikotevẽva, ohechakuaa hikuái Jehová siémpre oñangarekoha hesekuéra (Mat. 6:​31-33). Oiméne oñemoag̃uive avei umi ermanokuéra oipytyvõ vaʼekuére chupekuéra. Ha umi kristiáno omeʼẽ vaʼekue idonasión, térã ojapo vaʼekue ótra kósa oipytyvõ hag̃ua iñermanokuérape, oiméne ovyʼaite hikuái ojapo haguére upéva (Hech. 20:35). w23.04 16 párr. 12, 13

Sapyʼánte Jehová okontesta hag̃ua ñane ñemboʼe ikatu ojevale umi ndoadoráivare chupe. Por ehémplo omomýi vaʼekue rréi Artajérjespe omeʼẽ hag̃ua permíso Nehemíaspe oho jey hag̃ua Jerusalénpe. Péicha rupi Nehemías ikatu kuri oho omopuʼã jey hag̃ua pe siuda (Neh. 2:​3-6). Koʼág̃arupi avei Jehová ikatu ojevale umi ndahaʼéivare Testígo ñanepytyvõ hag̃ua ñaikotevẽ jave. Jehová ningo ndahaʼéi katuete okontestátava ñane ñemboʼe peteĩ milágro ndetuichapa jepéva rupive. Péro si omeʼẽta ñandéve la ñaikotevẽva jasegi hag̃ua ñandefiél chupe. Upévare ñañatende meme vaʼerã jahechakuaa hag̃ua mbaʼéichapa Jehová okontesta ñane ñemboʼe. Iporãta ñañemotiémporamo jepi ñapensa hag̃ua upévare (Sal. 66:​19, 20). Tekotevẽ ningo añete jajerovia Jehováre ñañemboʼe hag̃ua chupe. Péro avei jajerovia vaʼerã jaasepta hag̃ua tahaʼe haʼéva la irrespuésta (Heb. 11:6). w23.05 11 párr. 13; 12 párr. 15, 16

Ñañemeʼẽrõ guare Jehovápe ñapromete jaadorataha chupe ha jajapotaha ivolunta. Ñande jasegi vaʼerã ñakumpli ko promésa, ha upéva ndahaʼéi álgo ijetuʼuetereíva, pórke Jehová ñandeapo jajapo hag̃ua hembipota (Apoc. 4:11). Haʼe ñandekrea vaʼekue jaikuaase ha jaadorase hag̃ua chupe, ñandeapo ijoguaháramo. Upévare ikatu ñañemoag̃ui hese ha javyʼa jajapóvo haʼe heʼíva. Jajapo jave Jehová volunta ha jasegi Itaʼýrape ‘ñandepiroʼy’ (Mat. 11:​28-30). Amás día jahayhuve vaʼerã Jehovápe. Jajepyʼamongeta vaʼerã opa mbaʼe haʼe ojapóvare ñanderehehápe ha umi vendisión omeʼẽtavare ñandéve amo gotyove. Jahayhuvévo Jehovápe, ifasilvéta avei ñandéve ñaneñeʼẽrendu hag̃ua chupe (1 Juan 5:3). Jesús ojapo porã vaʼekue Itúa rembipota pórke oñemboʼe chupe ha opensa meme umi mbaʼe porã oñemoĩvare henonderãme (Heb. 5:7; 12:2). Ñande avei jajerure vaʼerã Jehovápe tañanemombarete ha siémpre ñapensa pe esperánsa jarekóvare jaikovetaha pára siémpre. w23.08 27, 28 párr. 4, 5

Ñamombaʼeterei umi hénte ipasiénsiavape ha umi ohaʼarõkuaávape orrenegaʼỹre. Jajavy jave katu jaagradeseterei ótro ipasiénsia haguére ñanderehe. Javyʼa avei pe ermáno térã ermána ñanemboʼe vaʼekue la Biblia ipasiénsia haguére ñanderehe ijetuʼúrõ guare ñandéve ñaaprende, jaasepta ha jajapo hag̃ua la Biblia omboʼéva. Ha koʼytevéntema jaagradese Jehovápe ipasiénsia haguére ñanderehe. Javyʼáramo jepe umi ótro ipasiénsia haguére, sapyʼánte ñandéve ikatu ijetuʼu ñanepasiénsia hag̃ua. Por ehémplo ikatu jajedesespera ñaiméramo hína peteĩ fíla pukúpe, koʼýte tárdemarõ ñandehegui. Ikatu avei japerde la pasiénsia oĩ jave ñanemorrenegáva, ha sapyʼánte katu ijetuʼu ñandéve jasegi ñahaʼarõ Jehová múndo pyahu. Péro entéro koʼã kásope, tekotevẽ ñanepasiensiave. w23.08 20 párr. 1, 2

Jehová heʼi Gedeónpe omondopa lénto hag̃ua isoldadokuéra hógape. Ikatu oime Gedeón opensa: “¿Ojejapómante vaʼerã piko péicha? ¿Oikóta piko hína?”. Tahaʼe haʼeháicha Gedeón ojapo la ojeʼéva chupe. Koʼág̃a umi ansiáno osegi Gedeón ehémplo. Haʼekuéra iñeʼẽrendu Jehová organisasión ojerurérõ chupekuéra okambia hag̃ua álgo ojejapo lája (Heb. 13:17). Gedeón iñeʼẽrendu vaʼekue ipeligrósorõ jepe iñasignasión ha okyhyjérõ jepe (Juec. 9:17). Jehová oasegura rire Gedeónpe oĩtaha hendive, haʼe ndodudavéima Ñandejára oipytyvõta hague chupe ha ipuévlope. Oĩ umi país ojeproivihápe Testigokuéra rembiapo, péro umi ansiáno uperupigua osegi Gedeón ehémplo. Haʼekuéra pyʼaguasúpe odirihi umi rreunión ha predikasión oĩramo jepe oamenasáva chupekuéra ojeguerahataha kárselpe, oñeinterrogataha, operdetaha itraváho ha oñemaltratataha. Pe jehasa asy guasu aja umi ansiáno ipyʼaguasúmante vaʼerã osegi hag̃ua umi instruksión ipeligrósotaramo jepe. w23.06 5, 6 párr. 12, 13

Jehová oskrivika vaʼekue Iñeʼẽme umi mbaʼe porã ojapo vaʼekue pe saserdóte Jehoiadá ikatu hag̃uáicha ñaaprende chugui (Rom. 15:4). Ha Jehoiadá omanórõ guare ojejapo álgo espesiál oñemombaʼe hag̃ua chupe. Oñeñotỹ Jehoiadápe “oñeñotỹháme umi rréi, pórke haʼe ojapo vaʼekue heta mbaʼe iporãva Israélpe, Ñandejára tee rehehápe ha Ñandejára róga rehehápe” (2 Crón. 24:​15, 16). Jehoiadá istória ñanepytyvõ ikatu hag̃uáicha jarrespetave Ñandejárape. Umi ansiáno ikatu osegi Jehoiadá ehémplo ohechávo siémpre mbaʼéichapa ikatu oprotehe pe kongregasiónpe (Hech. 20:28). Umi ermáno ijedáva ikatu oaprende osegíramo orrespeta Ñandejárape ha ifiél chupe, haʼe ojevaletaha hesekuéra okumpli hag̃ua ivolunta. Umi imitãva ikatu ojesareko Jehová otrata lájare Jehoiadápe ha oñehaʼã avei péicha omombaʼe umi ermáno ijedávape, koʼýte umi heta áñorema oservíva Jehovápe (Prov. 16:31). Ñande avei ikatu jajapo upéicha ‘ñaneñeʼẽrendúvo umi ñandegiávape’ (Heb. 13:17). w23.06 17 párr. 14, 15

Umi rreunión aja, ñanembaʼerechakuaákena jadesidíta jave mboy vésepa ñamopuʼãta ñande po ñakomenta hag̃ua. Pyʼỹieterei jahupíramo ñande po, ikatu jajopy pe ermáno odirihívape omeʼẽ hag̃ua ñandéve hetave komentário, oĩramo jepe umi neʼĩrava gueteri okomenta. Avei ikatu oĩ umi opensáva oñehaʼã reitamaha okomenta (Ecl. 3:7). Oĩramo heta ermáno omopuʼãva ipo okomenta hag̃ua, ikatu hína nañakomentái ñandéve ñandegustaháicha, ikatu voi opáma la rreunión ha ni una ves nañakomentajepéi. Legálmente upéva ikatu ñanemoñeñandu vai, péro ndovaléi ñandepochy (Ecl. 7:9). Oimérõ ndaikatúi raʼe rekomenta ndegustahaichaite, ¿mbaʼépa rejapokuaa? Ikatu ejapysaka porã umi ótrore okomenta jave ha efelisita chupekuéra opa rire la rreunión. Eipurúramo umi ñeʼẽ ijukýva efelisita hag̃ua umi ermánope, tuicha emokyreʼỹta chupekuéra nde emeʼẽrõguáicha peteĩ komentário. w23.04 23, 24 párr. 14-16

Jastudia Ñandejára Ñeʼẽ ha jajepyʼamongeta hese. Peteĩ yvyramáta imbarete hag̃ua hapo pypuku vaʼerã, upéicha avei ñande jajerovia mbaretéramo Jehováre ikatúta jajepytaso mbarete. A medída ke pe yvyramáta okakuaa ha imbarete, ipypukuve la hapo. Péicha avei ñande jastudia ha jajepyʼamongeta jave, ñande jerovia imbaretevéta ha ñañekonvensevéta Ñandejára heʼíva iporãveha (Col. 2:​6, 7). Jajepyʼamongeta mbaʼéichapa Jehová omboʼe, ogia ha oprotehe vaʼekue isiervokuéra yma guarépe. Por ehémplo, Ezequiel oñatende porã vaʼekue mbaʼéichapa peteĩ ánhel omedi porã pe témplo haʼe ohecha vaʼekue peteĩ visiónpe. Ko visión omombarete vaʼekue Ezequiélpe ha ñanepytyvõ ñandéve jaadora hag̃ua Jehovápe haʼe oipotahaichaite (Ezeq. 40:​1-4; 43:​10-12). Ideprovéchota ñandéve ñañemotiémporõ jastudia ha jajepyʼamongeta hag̃ua umi mbaʼe hypyʼũvévare oĩva Ñandejára Ñeʼẽme. Ñande ikatu jahayhu Jehovápe ha jajerovia hese ñande pyʼaite guive ha upéva nokambiamoʼãi (Sal. 112:7). w23.07 18 párr. 15, 16

La Bíbliape henyhẽ umi ehémplo porã mitãrusukuéra ikatúva osegi. Umi kuimbaʼe yma guare ohayhu Ñandejárape ha oreko umi rresponsavilida tuicháva pe puévlondi. Petopáta avei ehémplo porã pene famíliape ha kongregasiónpe (Heb. 13:7). Ha pereko Jesús ehémplo iporãitéva (1 Ped. 2:21). Pestudiávo koʼã kuimbaʼe ehémplo pepensa umi kualida porã oreko vaʼekuére ha pendegustavévare (Heb. 12:​1, 2). Ha pehecha mbaʼéichapa pesegíta iñehemplokuéra. Pe kuimbaʼe opensa porãva ndaipyʼaʼapurádoi odesidi hag̃ua peteĩ mbaʼe. Upévare pejepokuaa vaʼerã pepensa porã pedesidi mboyve álgo ha pesegi pejapo upéicha. Primero peaprende la Bíbliape mbaʼéichapa Jehová opensa ha mbaʼépa haʼe oñandu. Upéi pejepyʼamongeta mbaʼérepa iporãve pejapo la haʼe heʼíva. Upe rire peipuru umi mbaʼe peaprende vaʼekue pedesidi hag̃ua umi mbaʼe ogustátava Jehovápe (Sal. 119:9). Upéva penepytyvõta oiko hag̃ua pendehegui kristiáno ijerovia mbaretéva (Prov. 2:​11, 12; Heb. 5:14). w23.12 24, 25 párr. 4, 5

Tuakuéra ikatu omboʼe porã ifamíliape okontesta hag̃ua pyʼaguapýpe oñeporandu jave chupekuéra álgo irrelihiónre (Sant. 3:13). Oĩ tuakuéra oñensajáva umi mitãndi ijestúdio de famíliape. Haʼekuéra ostudia umi téma ikatúvare oñeñeʼẽ eskuéla térã koléhiope, oñensaja mbaʼéichapa okontesta porãta, ha omboʼe ifamíliape oñeʼẽ hag̃ua pyʼaguapýpe og̃uahẽ hag̃ua hapichakuéra korasõme. Peteĩ família oñensajáramo oñondivepa, umi mitã oñekonvenséta mbaʼérepa oguerovia álgo, ha oexplikakuaáta ótrope la oaprendéva. Ñande sítio jw.org-pe oĩ peteĩ párte hérava “Los jóvenes preguntan”. Upépe oĩ jepi umi óha ikatúva okompleta ohóvo umi mitãrusukuéra. Koʼã mbaʼe oipytyvõ umi imitãvape ojerovia mbareteve ha okontesta hag̃ua ijeheguiete la oñeporandúva chupekuéra. Peteĩ família ostudiáramo koʼã artíkulo oñondivepa, enterove oaprendéta odefende hag̃ua la ogueroviáva pyʼaguapýpe, ha og̃uahẽ hag̃ua umi hénte korasõme. w23.09 17 párr. 10; 18 párr. 15, 16.

¿Ndépa remoĩmava peteĩ méta upéi ijetuʼúva ndéve rehupyty hag̃ua? Oiméramo péicha, ndahaʼéi nderehénte la oikóva upéva. Por ehémplo Philip omehorase vaʼekue iñemboʼe ha pyʼỹive oñemboʼese, péro ijetuʼu kuri chupe oñemotiémpo hag̃ua upearã. Erika katu omoĩ la méta og̃uahẽ hag̃ua órape umi rreunión ojejapóvape oñesẽ hag̃ua predikasiónpe, upéicharõ jepe og̃uahẽ tárde haimete káda rreuniónpe. Oiméramo ereko peteĩ méta ha neʼĩra rehupyty, ani reñentrega. Umi méta isensíllova jepe oraha la itiémpo ha tekotevẽ ñañehaʼãmbaite jahupyty hag̃ua. Nde ningo rehupytyse gueteri ne méta, ha upéva ohechauka emombaʼeha ne amista Jehovándi ha emeʼẽseha chupe pe iporãvéva. Jehová ovalora la reñehaʼãva rejapo ha ndojeruremoʼãi ndehegui peteĩ mbaʼe imposívleva (Sal. 103:14; Miq. 6:8). Upévare emoĩ vaʼerã umi méta ikatútava rehupyty ha oĩva nde posivilidápe. w23.05 26 párr. 1, 2

Umi persóna ipyʼaguasúva okyhyje jepi avei, péro upéva ndojokói chupekuéra ojapo hag̃ua iporãva. Daniel ningo peteĩ mitãrusu ipyʼaguasueterei vaʼekue. Haʼe ostudia vaʼekue Ñandejára profetakuéra oskrivi vaʼekue, umíva apytépe Jeremías profesía. Upéicha rupi Daniel ohechakuaa umi judío opyta potaitemaha lívre ha osẽtaha Babilóniagui (Dan. 9:2). Upéi Daniel ohecha mbaʼéichapa oñekumpli umi profesía, ha upéva katuete omombareteve ijerovia Jehováre. Ñande avei jajeroviáramo Ñandejárare ñande pyʼaite guive ikatu ñandepyʼaguasu (ekompara Romanos 8:​32, 37-39 heʼívare). Ha iñimportanteveha, Daniel siémpre oñemboʼe vaʼekue Jehovápe (Dan. 6:10). Haʼe okonfesa ipekádo, omombeʼu Jehovápe entéro mbaʼe oñandúva ha ojerure chupe ajúda (Dan. 9:​4, 5, 19). Daniel haʼe vaʼekue peteĩ persóna ñandeichaguánte, upévare ikatu jaʼe ndaipyʼaguasúi hague onasérema voi, síno upearã ostudia, oñemboʼe ha ojerovia vaʼekue Jehováre. w23.08 3 párr. 4; 4 párr. 7

Ñaneñeʼẽrendúvo umi goviérnope ñañevenefisia ñande ha avei ótro. Pórke primero voi ndajaikemoʼãi provlémape nañakumplíri haguére umi léi (Rom. 13:​1, 4). Avei jajapóvo umi autorida omandáva oñeñeʼẽ porãta testígo de Jehováre. Por ehémplo, ojapóma unos kuánto áño Nigériape, umi soldádo oike hague Salón del Réinope rreunión aja. Haʼekuéra oheka hína kuri umi ojapóvape manifestasión ndopagaséigui impuésto. Péro pe ofisiál oñenkargáva umi soldádore omanda chupekuéra osẽ hag̃ua pe Salóngui ha heʼi: “Umi testígo de Jehová siémpre opaga iñimpuésto”. Upéicharõ, ñakumpli jave peteĩ léi ñaipytyvõ oñeñeʼẽ porã hag̃ua testígo de Jehováre. Ha upéva algún día ikatu hína oprotehe ñane ermanokuérape. w23.10 9 párr. 13

Oĩ umi Jehová siervokuéra heta áñorema ohaʼarõva oñehundi ko múndo aña. Oĩ avei umi hénte opensáva otardaitereimaha pe fin oúma hag̃ua. Jehová ningo ontende la oñandúva isiervokuéra. Upévare oasegura vaʼekue proféta Habacúcpe: “Pe visión oñekumplíta ág̃a pe tiémpo ojedesidi vaʼekuépe oikotaha, ha pyaʼe og̃uahẽta pe tiémpo oñekumpli hag̃ua, katuete oikóta upéva. Ha haʼetéramo jepe otardáva, esegínte ehaʼarõ pórke katuete oñekumplíta. Ni mbaʼevéicharõ ndotardamoʼãi” (Hab. 2:3). ¿Koʼã mbaʼe piko ojeʼe vaʼekue Habacúcpente, térãpa ikatu avei ñanemokyreʼỹ koʼág̃arupi? Apóstol Pablo rupive, Jehová ohechauka vaʼekue koʼã mbaʼe ojeʼéva oafektaha avei umi kristianokuéra ohaʼarõvape pe múndo pyahu (Heb. 10:37). Ñapensáramo jepe Jehová otardaha hína, ñanemanduʼákena la haʼe oprometéva ‘katuete oñekumplitaha, ni mbaʼevéicharõ ndotardamoʼãi’. w23.04 30 párr. 16

Umi israelita norrekonoseséi umi pruéva ohechauka porãva Jehová ojevale hague Moisésre ogia hag̃ua chupekuéra (Núm. 14:​10, 11). Haʼekuéra heta vése norrekonoseséi kuri upéva. Upévare Jehová nopermitíri chupekuéra oike pe yvy oñepromete vaʼekuépe (Núm. 14:30). Péro oĩ vaʼekue unos kuánto israelita osegíva Jehová gía. Por ehémplo Jehová heʼi vaʼekue: ‘Caleb osegi iñeʼẽrendu chéve ipyʼaite guive’ (Núm. 14:24). Ñandejára ovendesi vaʼekue Calébpe ha opermiti chupe oho oiko pe lugár ogustavehápe chupe Canaánpe (Jos. 14:​12-14). Umi israelita oikéva pe Tiérra Prometídape omoĩ avei ehémplo porã osegívo Jehová gía. Josuépe oñemoĩrõ guare odirihi hag̃ua umi israelítape Moisés rekovia, haʼekuéra ‘orrespeta chupe ipyʼaite guive haʼe oikove aja entéro’ (Jos. 4:14). Upéicha rupi Jehová ovendesi ha opermiti chupekuéra oike pe Tiérra Prometídape (Jos. 21:​43, 44). w24.02 21 párr. 6, 7

Peteĩ doktór ikatu oikuaa mbaʼéichapa oĩ ñane korasõ orrevisa rupi ñande púlso. Ñande kásope avei ikatúta jaikuaa mbaʼeichaite pevépa jahayhu Ñandejárape jahechárõ mbaʼeichaite pevépa jahayhu ñane ermanokuérape. Oimérõ ndajahayhuvéi ñane ermanokuérape yma guaréicha, upéva ikatu heʼise ikangyha ohóvo ñane mborayhu Ñandejárare. Péro oimérõ jahechauka meme jahayhuha ñane ermanokuérape, péva heʼise jahayhuetereiha avei hína Jehovápe. Oimérõ ndajahayhúi ñane ermanokuérape yma guaréicha, upéva peteĩ provléma isériova pórke ohechauka ikangyha ohóvo ñane amista Jehová ndive. Apóstol Pablo heʼi voi: “Pe ndohayhúiva iñermáno ohechávape, ndaikatúi ohayhu Ñandejára ndohecháivape” (1 Juan 4:20). Jahechakuaa Jehová ñandeguerohorytaha jahayhúrõ añoite ñane ermanokuérape (1 Juan 4:​7-9, 11). w23.11 8 párr. 3; 9 párr. 5, 6

Rréi Jehoás imitãrõ guare omano vaʼekue itúa. Upévare pe saserdóte Jehoiadá omongakuaa Jehoáspe ha oipytyvõ chupe oñemoag̃ui hag̃ua Jehováre. Jehoás iñarandu vaʼekue ha ohendu umi konsého omeʼẽva chupe Jehoiadá. Upéicha rupi odesidi oadorataha Jehovápe ha oipytyvõ avei pe puévlope ojapo hag̃ua upéva. Rréi Jehoás oñenkarga avei oñemyatyrõ hag̃ua Jehová témplo (2 Crón. 24:​1, 2, 4, 13, 14). Oimérõ nde tuakuéra térã ótra persóna nepytyvõ hína rehayhu hag̃ua Jehovápe ha rejapo hag̃ua haʼe heʼíva, rerresivi hína peteĩ rregálo ndaijojaháiva (Prov. 2:​1, 10-12). Nde tuakuéra ikatu ojapo heta mbaʼe nemboʼe hag̃ua. Resegíramo umi konsého oúva la Bíbliagui, embovyʼáta nde tuakuérape, avei embovyʼáta Ñandejárape ha ne amista hendive imbaretevéta (Prov. 22:6; 23:​15, 24). Koʼã mbaʼe iñimportanteterei, upévare iporãta resegíramo umi konsého ojapo haguéicha rréi Jehoás imitãme. w23.09 8, 9 párr. 3-5

Jehová opromete ohendutaha ñane ñemboʼe. Ñande jaservi Ñandejárape fiélmente, upévare haʼe ñanderayhu ha ohendu ñane ñemboʼe (Sal. 10:17; 37:28). Péro upéva ndeʼiséi haʼe omeʼẽtaha ñandéve jajeruréva guive chupe. Oĩ heta kósa Jehová omeʼẽtava ñandéve pe múndo pyahúpe ae, upévare ñahaʼarõmante vaʼerã upe tiémpo. Jehová oreko enkuénta ivolunta ohendu jave ñane ñemboʼe (Is. 55:​8, 9). Jehová oipota ko yvy ape ári oiko umi oaseptáva vyʼápe chupe igovernánteramo ha iñeʼẽrendúva chupe. Péro Satanás heʼi yvyporakuéra ovyʼavetaha oñegovernáramo ijupe (Gén. 3:​1-5). Ojehechauka hag̃ua Satanás ijapuha, Jehová oheja yvyporakuéra oñegoverna ijupe, ha heta umi provléma ñambohováiva koʼág̃arupi oĩ la umáno ogoverna rupi (Ecl. 8:9). Upéicharõ Jehová oipeʼaitérõ umi provléma koʼag̃aite voi, oĩta opensáva yvyporakuéra osolusiona hague entéro mbaʼe. w23.11 21 párr. 4, 5

Jehová opromete vaʼekue Abrahángui osẽtaha “hetaiterei nasión” ha haʼe rupive oñevendesitaha chupekuéra. Péro Abrahán orekórõ guare 100 áño ha Sara 90 neʼĩrante ifamília hikuái. Oiméne ijetuʼuete rakaʼe Abrahánpe, pórke haʼetévaicha núnka ndaikatumoʼãiva ifamília hikuái. Péro “Abrahán ohaʼarõkuaa ha ojerovia hetaiterei nasión outaha chugui” (Rom. 4:​18, 19). Tiémpo rire oñekumpli la Abrahán ohaʼarõitéva ha onase itaʼýra Isaac (Rom. 4:​20-22). Ñandejára ikatu avei ñandeguerohory ha ikatu heʼi ñanderehe ñandehustoha ha haʼeha iñamígo. Pablo heʼi vaʼekue: “Ndahaʼéi Abrahán rehehápente la ojeskrivíva Ñandejára Ñeʼẽme: ‘Upéicha rupi ojeʼe hese ihustoha’. Síno ojeskrivi avei ñanderehehápe. Ñandejára heʼi avei ñanderehe ñandehustoha pórke jajerovia hese. Haʼe hína upe omopuʼã vaʼekue ñande Ruvicha Jesúspe omanóva apytégui” (Rom. 4:​23, 24). Abrahán ojapo haguéicha, ñande avei tekotevẽ jajerovia Jehováre, jajapo umi mbaʼe iporãva ha jareko la esperánsa Jehová katuete okumplitaha umi mbaʼe opromete vaʼekue. w23.12 7 párr. 16, 17

Oimérõ jahasa hína peteĩ situasión ijetuʼúva ha jakyhyje, ñanemanduʼákena Jehová ohechapaiteha la jahasáva ha oikuaaha mbaʼéichapa ñañeñandu. Por ehémplo, Jehová ndahaʼéi oikuaánteva umi israelita oñemaltrata hague Egíptope, síno oñandu avei “mbaʼeichaite pevépa ohasa asy” hikuái (Éx. 3:7). Ikatu hína jahasa peteĩ situasión ijetuʼúva ha ndajahechái mbaʼéichapa Jehová ñanepytyvõ. Upévare jajerurekuaa Jehovápe tohechauka ñandéve mbaʼéichapa Haʼe ñanepytyvõ (2 Rey. 6:​15-17). Upéi ikatu jajepyʼamongeta: ¿Oĩpa peteĩ diskúrso térã peteĩ komentário chemombarete vaʼekue? Térã jaleévo peteĩ puvlikasión, ñahendúvo peteĩ kántiko o jahechávo peteĩ vidéo, ¿mbaʼéichapa upéva ñanepytyvõ raʼe? Ikatu voi peteĩ ermáno omeʼẽ ñandéve peteĩ konsého térã ñanekonsola umi mbaʼe heʼíva rupive, ¿mbaʼéichapa ñanepytyvõ avei raʼe upéva? Koʼã mbaʼégui ndahasyiete ñanderesarái hag̃ua, upéva oikóramo ndajahechamoʼãi mbaʼeichaitépa ñanderayhu ñane ermanokuéra ha Jehová. Péro añetehápe koʼã rregálo porãite ou hína Jehovágui (Is. 65:13; Mar. 10:​29, 30). Umíva ohechauka Jehová ojepreokupaitereiha ñanderehe ha ikatuha jajerovia hese (Is. 49:​14-16). w24.01 4, 5 párr. 9, 10

Oho mboyvemi yvágape, Jesús omomanduʼa vaʼekue idisipulokuérape opredika vaʼerãha “Jerusalénpe, oparupiete Judéape, Samáriape ha umi lugár mombyryvehápe jepe ko yvy ape ári” (Hech. 1:8; Luc. 24:​46-48). Tiémpo riremínte, umi líder judío ogueraha apóstol Pedro ha Juánpe pe Sanedrín renondépe. Omanda koʼã apóstolpe anivéma hag̃ua opredika ha oamenasa voi chupekuéra (Hech. 4:​18, 21). Pedro ha Juan heʼi: “Oiméramo peẽ pepensa oĩ porãha Ñandejárape g̃uarã rojapo peẽ pejéva rojapo rangue Ñandejára heʼíva, upéva peẽma peikuaáta. Péro ore ndaikatúi roguerokirirĩ umi mbaʼe rohecha ha rohendu vaʼekue” (Hech. 4:​19, 20). Ojepoi rire Pedro ha Juángui, haʼekuéra oho umi ótro disípulo rendápe. Oñondivepa oñemboʼe hikuái Jehovápe osegi hag̃ua ojapo ivolunta. Haʼekuéra oñemboʼe ipyʼaite guive ha Jehová okontesta chupekuéra (Hech. 4:31). w23.05 5 párr. 11, 12

Jehová ha itaʼýra hetaiterei tiémpo ohasa vaʼekue oñondive, ndaipóri voi ótro haʼekuéraicha. Hetaiterei áñore oĩ vaʼekue hikuái oñondive yvágape, upéicha rupi ojogueraha porã ha ojoayhueterei hikuái. Pe téxto koestediaguápe jatopa Jehová heʼi hague ohayhuha Jesúspe. Jehová ikatúnte vaʼekue heʼi: ‘Kóva hína pe aguerohorýva’. Péro haʼe oipota vaʼekue jaikuaa mbaʼeichaitépa haʼe ohayhu Jesúspe, ha upévare heʼi voi: “Che Raʼy ahayhuetéva”. Jehová ijorgullóso vaʼekue Jesús reheve ha koʼýte oĩ haguére dispuésto omeʼẽvo hekove ótro rehehápe (Efes. 1:7). Jesús katu ndodudái vaʼekue ni michĩmi Itúa ohayhuha chupe. Upévare heʼi jey jey vaʼekue la Itúa ohayhuha chupe (Juan 3:35; 10:17; 17:24). w24.01 28 párr. 8

Ñañeimahinamína peteĩ persóna jahayhúva oñeʼẽ vaiha ñanderehe. Jaikuaa japuha la heʼíva, péro oĩ la ogueroviáva chupe. Ha ivaiveha katu, umíva oñepyrũma omosarambi upe japu ha hetavéntema oĩ la ogueroviáva. Katuete ñandepyʼapýta la hénte oñeʼẽ vaíta haguére ñanderehe ha ñañeñandu vaíta voi. Ko ehémplo ikatu ñanepytyvõ ñantende hag̃ua mbaʼéichapa Jehová oñeñandu vaʼekue peteĩva umi itaʼýra oĩva yvágape oñepyrũrõ guare ijapu ha oñeʼẽ vai hese. Eva oguerovia vaʼekue upe japu, upéicha rupi umi ñande túa ypykue opuʼã Jehová kóntrape. Upéva káusare enterove ñande japeka ha kon el tiémpo ñamano (Gén. 3:​1-6; Rom. 5:12). Hiʼarive umi japu Satanás omosarambíva la omoñepyrũ vaʼekue entéro provléma oĩva ko múndope, por ehémplo ñemano, gérra ha sufrimiénto. Katuete Jehová oñeñandu vai umi japu ojeʼe vaʼekuére, péro upéicharõ jepe haʼe ndopytái vaʼekue oñamarga ha ipyʼaro. La Biblia heʼi voi hese haʼeha ‘Ñandejára ovyʼáva’ (1 Tim. 1:11). w24.02 8 párr. 1, 2

¿Mbaʼéichapa ikatu ndefiél Jehovápe Joséicha? Upearã koʼág̃ama redesidi vaʼerã mbaʼépa rejapóta oñepresentáramo ndéve peteĩ tentasión. Ejepokuaa vaʼerã pyaʼe porã errechasa umi mbaʼe ombojeguarúva Jehovápe ha ani voi ni epensa umívare (Sal. 97:10; 119:165). Katuete repilláma retopa hague pe añetegua ha oiméne reservise Jehovápe nde pyʼaite guive. Upéicharõ jepe, ikatu oime redudáiti reñemeʼẽ hag̃ua Jehovápe ha rejevautisa. Oimérõ upéicha, ejapomína la rréi David ojapo vaʼekue. Haʼe ojerure vaʼekue Jehovápe: “Ñandejára, ejesarekóna cherehe reikuaa hag̃ua mbaʼépa areko che korasõme. Emañána pe che pyʼapýpe oĩvare reikuaa hag̃ua mbaʼépa la chekevrantáva. Ehechána noiméipa aha hína tape vaíre, ha chegiána ikatu hag̃uáicha aiko opa árare” (Sal. 139:​23, 24). Jehová ovendesi umi “oñehaʼãvape ipyʼaite guive oadora chupe”, ha nde ningo rejapose upéva. Upévarente reñehaʼãmbaite ikatu hag̃uáicha reñemeʼẽ Jehovápe ha rejevautisa (Heb. 11:6). w24.03 6 párr. 13-15

Pe súmo saserdóte oñepresenta vaʼekue Jehová renondépe pe puévlo rehehápe. Israélpe, pe primer súmo saserdóte haʼe vaʼekue Aarón. Jehová onombra vaʼekue chupe oñeinagurárõ guare pe tavernákulo. Péro apóstol Pablo heʼi haguéicha, yma “umi saserdóte omanóvo, ótro opyta hekovia ha osegi ojapo upe tembiapo” (Heb. 7:​23-26). Umi súmo saserdóte iñimperfékto vaʼekue, upévare oofresémante vaʼerã sakrifísio oñeperdona hag̃ua chupekuéra. Upéva peteĩ diferénsia tuichaitereíva éntre umi súmo saserdóte oĩ vaʼekue Israélpe ha pe súmo saserdóte iñimportantevéva haʼéva Jesús. Jesucristo ñane súmo saserdóte ha haʼe oservi “pe tavernákulope, upéva Jehová voi omopuʼã vaʼekue ha ndahaʼéi peteĩ yvypóra” (Heb. 8:​1, 2). Pablo oexplika vaʼekue ‘Jesús oikove rupi opa árare, natekotevẽiha ótro oservi de saserdóte hekovia’. Avei heʼi Jesús ‘ipotĩha entéro mbaʼépe, ndojoguaiha ni michĩmi umi pekadórpe’ ha natekotevẽiha omeʼẽ sakrifísio káda día ipekádore, ojapo haguéicha umi súmo saserdóte oĩva Israélpe. w23.10 26 párr. 8, 9

Heʼívo ‘pe yvága yma guare’ oñeñeʼẽ hína umi goviérno oĩvare Satanás ha idemoniokuéra poguýpe (Mat. 4:​8, 9; 1 Juan 5:19). La Bíbliape ojeʼévo “pe yvy” ikatu avei oñeñeʼẽ hína yvyporakuérare (Gén. 11:1; Sal. 96:1). Upéicharõ “pe yvy yma guare” heʼise hína umi hénte aña oikóva ko tiémpope. Jehová ndahaʼéi oarregla térã omyatyrõtanteva pe yvága ha yvy oĩva koʼág̃a, síno ohundietéta ha omyengoviáta voi chupekuéra. Upéi haʼe omoĩta hekoviakuéra peteĩ yvága pyahu, upéva hína peteĩ goviérno pyahu, ha peteĩ yvy pyahu, haʼéva hína umi hénte ihústova oikótava pe goviérno poguýpe. Jehová ombopyahúta la oĩmava, haʼetéta voi Jehová ombopyahútava ko yvy ha yvyporakuéra pórke entéro mbaʼe perféktotama. Isaías oprofetisa haguéicha, Jehová ojapóta ko yvy tuichakuégui peteĩ lugár iporãitereíva ojoguáva pe hardín de Edénpe. Ñandéve avei haʼe ñanembopyahúta, pórke káda únope ñanemongueraitéta entéro mbaʼégui. Okueráta umi ndaikatúiva oguata, umi ndohecháiva ha nohendúiva ha umi omano vaʼekue jepe oikove jeýta (Is. 25:8; 35:​1-7). w23.11 4 párr. 9, 10

Pe “jehasa asy guasu” oúta derrepentete (Mat. 24:21). Umi desástre oikóva jepi ou avavete opillaʼỹre, péro ñande jaikuaáma outaha pe jehasa asy guasu. Ojapóma 2.000 áñorupi Jesús heʼi hague idisipulokuérape tekotevẽha oĩ preparádo upe díape g̃uarã. Jasegíramo ikonsého, ifasilvéta ñandéve jajesalva hag̃ua ha ñaipytyvõ hag̃ua ótrope (Luc. 21:36). Upe moméntope ñaneaguánte vaʼerã ikatu hag̃uáicha ñaneñeʼẽrendu Jehovápe ha ñakonfia haʼe ñandeprotehetaha. ¿Mbaʼépa jajapóta ñane ermanokuéra operdepa léntoramo la orekóva térã opytáramo mbaʼeveʼỹre? (Hab. 3:​17, 18). Tekotevẽta jaiporiahuvereko chupekuéra ikatu hag̃uáicha ñaipytyvõse umi ermánope. ¿Mbaʼépa oikóta ñandeataka vove pe grúpo de nasión? ¿Mbaʼéichapa ñarreaksionáta tekotevẽramo jaha ñakañy ñane ermanokuérandi ha jaiko hendivekuéra peteĩ lugár michĩvape un tiémpore? (Ezeq. 38:​10-12). Tekotevẽta jahayhu ñane ermanokuérape jagueropuʼaka hag̃ua upe situasión ijetuʼuetéva. w23.07 2 párr. 2, 3

Áquila ha Priscila ehémplo porã umi omendávape g̃uarã. Haʼekuéra peteĩ matrimónio síglo primérope guare, ha umi ermáno upe tiempopegua oapresiaiterei vaʼekue chupekuéra (Rom. 16:​3, 4). Haʼekuéra ombaʼapo, opredika ha oipytyvõ ótrope oñondive (Hech. 18:​2, 3, 24-26). La Biblia oñeʼẽ jave Áquila ha Priscílare, katuete omensiona chupekuéra oñondive. ¿Mbaʼéichapa umi omendáva ikatu osegi iñehémplo? Ikatu pepensa umi mbaʼe pejapo vaʼerãre káda uno. ¿Ndaikatuichéne piko pejapo umi mbaʼe oñondive, pejapo rangue peneañónte? Áquila ha Priscila opredika vaʼekue oñondive. Ha peẽ, ¿pejepokuaápa pepredika oñondive? Áquila ha Priscila ombaʼapo vaʼekue avei oñondive. Siérto, ikatu káda uno pembaʼapo diferénte lugárpe péro oĩ avei umi tembiapo ogapypegua. ¿Ndaikatuichénepa umíva pejapo oñondive? (Ecl. 4:9). Peñopytyvõramo pehecháta igustoha pembaʼapo oñondive ha ikatúta peñemongeta porã. w23.05 22, 23 párr. 10-12

Enterove ningo jakyhyje sapyʼánte. Por ehémplo rréi Saúl opersegi ha ojukasérõ guare Davídpe, haʼe odipara ha oho umi filisteokuéra siuda héravape Gat. Og̃uahẽrõ guare, ensegída pe rréi Akís oikuaa David haʼeha pe gerréro ojegueropurahéiva ‘ojuka haguére mas de 10.000 filistéope voi’. Upévare David “okyhyjeterei rréi Akísgui” (1 Sam. 21:​10-12). Chupe oipyʼapyeterei vaʼekue la ikatúva ojapo hese rréi Akís. ¿Péro mbaʼépa oipytyvõ Davídpe ipyʼaguapy hag̃ua? Salmo 56-pe, David omombeʼu vaʼekue mbaʼéichapa oñeñandu oĩrõ guare Gátpe. Upe Sálmope David omombeʼu mbaʼépa la omongyhyjéva chupe. Péro avei omombeʼu mbaʼépa la oipytyvõva chupe anivéma hag̃ua okyhyje. David heʼi okyhyjéramo guare osegi hague ojerovia Jehováre (Sal. 56:​1-3, 11). Haʼe oikuaa porã Jehová oipytyvõtaha chupe. Upémarõ David odesidi ojapo peteĩ mbaʼe irraroitereíva: Haʼe oñembotavyrai guaʼu. Ha osẽ porã chupe upe ojapo vaʼekue, pórke Jehová ovendesi chupe. Upévare rréi Akís ohechávo péicha Davídpe, ojukase rangue chupe, haʼe oipotántema oho upégui. Péicha David ojesalva (1 Sam. 21:13–22:1). w24.01 2 párr. 1-3

¿Mávapa umi oñemensionáva pe téxto koestediaguápe? Umi unhído orresusitámava yvágape. Upéicharõ pe último unhído oho vove yvágape, ág̃a opa potápe pe jehasa asy guasu, peteĩva umi asignasión primeroite orekótava hikuái haʼéta oñorairõ. Ohopaite rire yvágape, umi unhído omoirũta Jesucristo ha umi ánhelpe oñorairõ hag̃ua pe última gérrape Ñandejára enemigokuéra kóntrape. Ñapensamína ko mbaʼére: Umi unhído oĩva ko yvy ape ári apytépe oĩ umi ijedámava ha naimbaretevéimava. Péro oho vove hikuái yvágape ipoderosoitereíta, nomanomoʼãvéima ha oñorairõta hikuái ñande Rréi ipoderosoitéva Jesucristo ykére. Armagedón rire, oipytyvõta hikuái umi héntepe oiko hag̃ua chuguikuéra perfékto. Ndajadudái umi unhído oipytyvõ porãvetaha iñermanokuérape yvága guive, opytánte rangue ko yvy ape ári peteĩ persóna imperféktaicha. w24.02 6, 7 párr. 15, 16

Ikatu oime reĩma preparádo reñemeʼẽ hag̃ua Jehovápe ha rejevautisa. Upéicharõ jepe, ikatu oime reduda gueteri. Oĩ opensáva péicha: “¿Mbaʼe piko oikóta chehegui upéi ajúramo apeka vaieterei ha añemosẽ kongregasióngui?”. Oiméramo nde repensa upéicha, nemanduʼákena Ñandejára ikatuha nepytyvõ reiko hag̃ua “oikoháicha umi oservíva” chupe ikatu hag̃uáicha ‘haʼe ndeguerohory entéro mbaʼépe’ (Col. 1:10). Haʼe oipytyvõma hetaiterei persónape ojapose hag̃ua pe iporãva, ha ndéve avei ikatu nepytyvõ (1 Cor. 10:13). Jehová oipytyvõ ipuévlope ifiél hag̃ua chupe. Upéicha rupínte ndahetaguasúi la oñemosẽva kongregasióngui. Enterovéva ningo ñaneimperfékto, upévare ñandestirátante voi la ivaíva (Sant. 1:14). Ha ndofaltamoʼãi avei oportunida jajapo hag̃ua ivaíva. Upéicharõ jepe, nemanduʼákena peteĩ mbaʼére: Nde ikatu redesidi mbaʼépa rejapóta ha mbaʼéichapa reikóta. Oĩ heʼíva ndaikatuiha jajoko umi deséo vai, péro upéva japu. w24.03 5, 6 párr. 11, 12