Junio

Jehová ovendesi vaʼekue umi kristiáno ypykuépe ojadapta rupi ojepersegírõ guare chupekuéra, ha heta vése oiko vaʼekue upéva ohaʼarõʼỹete jave hikuái. Jahechamína la oiko vaʼekue Bernabé ha Páblore opredikárõ guare Listra territóriope. Primerorã, umi hénte upepegua ohendu ha orresivi porã chupekuéra. Péro upéi upe diaitépe voi, unos kuánto ndochaʼéiva hesekuéra “omboliga umi henteitápe” ojapi hag̃ua itápe Páblope, ha opensa voi hikuái omanóma hague (Hech. 14:19). Péro Bernabé ha Pablo osegínte opredika ótro hendápe. ¿Mbaʼépa ohupyty hikuái? Oipytyvõ heta héntepe “oiko hag̃ua chuguikuéra disípulo”. Avei omombarete umi ermanokuérape la heʼíva ha ojapóva rupive (Hech. 14:​21, 22). Ojepersegíramo jepe chupekuéra, Bernabé ha Pablo noñentregái, ha upéicha rupi oipytyvõ hetaiterei héntepe. Ñande avei nañañentregáiramo ha jasegíramo ñakumpli pe traváho Jehová omeʼẽ vaʼekue ñandéve, jarresivíta avei heta vendisión. w23.04 17 párr. 14

Rréi David oreko vaʼekue heta enemígo ipeligrósova oikove aja pukukue ha pyʼỹinte ojerure vaʼekue ajúda Jehovápe. David ndodudái vaʼekue ni michĩmi Jehová ohenduha iñemboʼe ha okontestaha chupe. Ñande avei ikatu ñaĩ segúro Jehová ñanerenduha. La Biblia oasegura Jehová ñanemoarandu ha ñanemombareteha jagueropuʼaka hag̃ua umi provléma. Avei Jehová ikatu ojevale ñane ermanokuérare ha umi hénte ndahaʼéivare Testígo jepe ñanepytyvõ hag̃ua. Jehová nokontestáiramo jepe ñandéve ñane ñemboʼe ñahaʼarõ hagueichaite, ikatu ñaĩ segúro si okontestataha. Haʼe omeʼẽta ñandéve pe ñaikotevẽva ha itiempoitépe voi. Upévare jasegíkena ñañemboʼe chupe ha ani jaduda okuidataha ñanderehe koʼág̃a ha pe múndo pyahúpe katu ‘omeʼẽtaha entérope opa mbaʼe oipotáva’ (Sal. 145:16). w23.05 8 párr. 4; 13 párr. 17, 18

Iñimportánte jajesareko umi vendisión jarresivítavare jahupytývo ñane méta. ¿Ha mbaʼérepa ikatu ejesareko? Por ehémplo, oimérõ la ne méta hína ejapo porãve nde lektúra de la Biblia térã ne ñemboʼe, ikatu epensa mbaʼéichapa upéva omombaretevéta ne amista Jehovándi (Sal. 145:​18, 19). Oiméramo erekose peteĩ kualida kristiána, ikatu epensa upéva nepytyvõtaha ejogueraha porãve hag̃ua nde rapichándi (Col. 3:14). ¿Mbaʼe ótra kósapa ikatu ejapo? Ikatu reskrivi mbaʼérepa rehupytyse peteĩ méta ha pyʼỹinte emaña hese. Avei ejeheʼa umi persóna nemokyreʼỹtavare (Prov. 13:20). Jaʼe porãsérõ g̃uarã oĩ jepi voínte día ndahaʼeihápe la ñanekyreʼỹmbáva. ¿Heʼisépa upéva jahejánte vaʼerãha ñane méta? Nahániri. Ñande avei ikatu jasegi ñañehaʼã ñakumpli hag̃ua ñane méta, nañanekyreʼỹiramo jepe. Siérto ningo, upéva ndahaʼemoʼãi la ifasilpáva péro javyʼaitereíta jahupytývo ñane méta. w23.05 27, 28 párr. 5-8

Jaikuaa káda uno ñaĩha rresponsávle la jadesidívare ha upéva ikatu ñanemomýi ñamombeʼu hag̃ua japeka hague, jakorrehi hag̃ua jajavy haguépe ha anivéma hag̃ua jajapo jey upéva. Jajapórõ koʼã mbaʼe ikatúta jasegi jadipara pe karréra jaikove hag̃ua pára siémpre. Oimérõ jadesidi vaíma raʼe ani japerde rei ñane tiémpo jajekulpávo ñandejupe térã ótrope, o jahechaukaségui mbaʼérepa jadesidi raʼe upéva. Síno jaasepta vaʼerã jajavy hague ha jajapo la ikatúva guive jaservi porã jey hag̃ua Jehovápe. Oimérõ ñañeñandu vai peteĩ mbaʼe jajapo vaʼekuére, ñañemboʼe Jehovápe, ñarrekonose jajavy hague ha jajerure chupe tañaneperdonami (Sal. 25:11; 51:​3, 4). Jajerure perdón umi persóna jafalla vaʼekuépe ha tekotevẽrõ jajerure umi ansianokuérape ñanepytyvõ hag̃ua (Sant. 5:​14, 15). Ñaaprende ñande fállagui ha ñañehaʼãmbaite ani hag̃ua jajapo jey upéva. Jajapórõ koʼã mbaʼe ikatu ñaĩ segúro Jehová ñandeporiahuverekotaha ha ñanepytyvõtaha ñaikotevẽhápe (Sal. 103:​8-13). w23.08 28, 29 párr. 8, 9

Jehoás imitãrõ guare “ojapo meme vaʼekue iporãva Jehová renondépe” Jehoiadá oipytyvõgui chupe. Péro Jehoiadá omano rire, Jehoás oñepyrũ opena la heʼívare umi prínsipe de Judá omboyke vaʼekue Jehovápe (2 Crón. 24:​4, 17, 18). Jehová ombyasýramo jepe la oikóva, ‘osegi omondo hendapekuéra umi profétape, ogueru jey hag̃ua chupekuéra Jehovápe, péro haʼekuéra nohenduséi’. Umi hénte nopenái vaʼekue ni Jehoiadá raʼy Zacaríasre, haʼéva proféta, saserdóte ha pe rréi Jehoás prímo. Upéi, Jehoás ojukauka Zacaríaspe (2 Crón. 22:11; 24:​19-22). Jehoás ou ndokyhyjevéi Ñandejáragui. Jehová heʼi vaʼekue: “Umi chedespresiávape katu che adespresiáta” (1 Sam. 2:30). Kon el tiémpo peteĩ ehérsito sirio ou Jehoás kóntrape, ha ko ehérsito “orekóramo jepe saʼieterei soldádo” ogana Jehoás ehérsitope tuichaitereíramo jepe, upevakuére Jehoás “opyta kuri hasyete”. Umi sirio oho jey rire, Jehoás siervokueraite voi ojuka chupe, pórke haʼe ojuka vaʼekue Zacaríaspe (2 Crón. 24:​24, 25). w23.06 18 párr. 16, 17

Apóstol Pablo opyta vaʼekue areʼi Éfesope ikatu hag̃uáicha opredika umi notísia porã ha oporomboʼe (Hech. 19:​1, 8-10; 20:​20, 21). Haʼe ohayhu vaʼekue iñermanokuéra upepeguápe ha oipytyvõse chupekuéra osegi hag̃ua ifiél Jehovápe. Koʼã kristiáno Efesogua oguerovia vaʼekue heta mbaʼe ndasiértoiva ha orahaiterei vaʼekue enkuénta umi aguería. Éfeso ikonosído vaʼekue pórke umi hénte upepegua hekovai ha notĩri ojapo hag̃ua ivaíva. Haʼekuéra naiprovlemaiete vaʼekue ijuru kyʼa hag̃ua, tahaʼe umi teátrope térã ojejapo jave umi fiésta rrelihiósa (Efes. 5:3). Koʼã hénte ndoikuaavéima vaʼekue “mbaʼépa iporã ha mbaʼépa ivai”. Griégope ko fráse heʼise voi “noñanduveimaha mbaʼeve” (Efes. 4:​17-19). Chupekuéra nomolestavéima kuri ikonsiénsia ojapo rire álgo ivaíva. Péicha vaʼekue hikuái oikuaa mboyve mbaʼépa oĩ porã ha mbaʼépa oĩ vai Jehová renondépe. Upévare Pablo heʼi haʼekuéra oĩ hague “pytũmbýpe ha oñemomombyry pe jeikove oúvagui Ñandejáragui”. Péro oĩ vaʼekue unos kuánto oikóva Éfesope osẽva pe pytũmbýgui. w24.03 20 párr. 2, 4; 21 párr. 5, 6

Gedeón ombaʼapo jejopy oservírõ guare de hués. Oñorairõrõ guare pyharepyte umi madianítandi, haʼekuéra osẽ okañy ha Gedeón omuña chupekuéra Jezreel Ñu guive rrío Jordán peve (Juec. 7:22). ¿Ojokópa rakaʼe upéva Gedeónpe? Nahániri. Ikaneʼõrõ jepe, Gedeón ha umi 300 soldádo okrusa pe rrío ha osegi omuña iñenemigokuérape. Ipahápe ohupyty hikuái umi madianítape ha ogana chupekuéra (Juec. 8:​4-12). Gedeón ndodudái Jehová omombaretéta hague chupe ha peichaite oiko (Juec. 6:​14, 34). Peteĩ jey Gedeón ha umi soldádo odipara ohóvo omuña hag̃ua mokõi rréi madianítape, ha koʼã rréi katu provávlemente oho kuri kaméllo ári (Juec. 8:​12, 21). Péro Ñandejára oipytyvõ umi israelítape ohupyty hag̃ua koʼã rréipe ha ogana hikuái pe ñorairõ. Péicha avei umi ansiáno ikatu okonfia Jehová omombaretetaha chupekuéra, pórke “haʼe arakaʼeve naikaneʼõi ni núnka naikangýi” (Is. 40:​28, 29). w23.06 6, 7 párr. 14, 16

Ikatu jajerovia ñane korasõ mbytete guive tahaʼe haʼéva la oikóva. Jahechami mbaʼéichapa Barac osẽ porã vaʼekue ojerovia rupi Jehová heʼívare. Upe tiémpope umi israelita noĩri vaʼekue preparádo oñorairõ hag̃ua, ni ndorekói vaʼekue hikuái eskúdo ni lánsa. Péro Jehová heʼika Barácpe oho hag̃ua oñorairõ Sísara kóntrape omoakãva Canaán ehérsito, hiʼarive tuichaiterei vaʼekue la ijehérsito (Juec. 5:8). Upéi pe profetísa Débora heʼi Barácpe oho hag̃ua pe yvy iplanohápe oñorairõ hag̃ua Sísara kóntrape, orekóva 900 kárro de gérra. Pe yvy iplanohápe pyaʼetereivéntema ohóta umi kárro de gérra ha ijetuʼuvétantema kuri umi israelítape oñorairõ hag̃ua ikontrapekuéra. Upéi umi soldadokuéra oguejývo ohóvo sérro Tabórgui Jehová ombou ama guasu ha Sísara karrokuéra opaʼãmba pe tujúpe, péicha Jehová omogana Barácpe (Juec. 4:​1-7, 10, 13-16). Upéicha avei Jehová ñanepytyvõta ñasẽ porã hag̃ua jajeroviáramo hese ha pe gía omeʼẽvare iñorganisasión rupive. w23.07 19 párr. 17, 18

Tekotevẽ ñanepasiénsia jajesalva hag̃ua. Jehová siervokuéra yma guaréicha tekotevẽ ñanepasiénsia ha ñahaʼarõ haʼe okumplipa ipromesakuéra (Heb. 6:​11, 12). La Biblia ñanekompara voi peteĩ ombaʼapóvare kokuépe (Sant. 5:​7, 8). Peteĩ kokueséro ombaʼapo jejopy oñotỹ ha orrega hag̃ua iplantasión, péro haʼe ndoikuaái arakaʼetépa hiʼáta la oñotỹ vaʼekue. Upévare ipasiénsia ha ohaʼarõ pe kosécha tiémpo, pórke ndodudái okosechataha la oñotỹ vaʼekue. Upéicha avei ñande ñambaʼapo jejopy Jehová servísiope ‘ndajaikuaáiramo jepe mbaʼe díapa oúta ñande Ruvicha’ (Mat. 24:42). Ñanepasiénsia jajeroviágui Jehová okumplitaha itiempoitépe entéro mbaʼe opromete vaʼekue. Péro nañanepasiensiavéirõ ikatu ñanekaneʼõgui nañahaʼarõsevéi ha mbeguekatúpe jaheja Jehovápe. Avei ikatu ñañepyrũ jajapo umi mbaʼe ñaimoʼãva koʼag̃aite voi ñanembovyʼataha. Péro ñanepasiénsiaramo ikatu ñaaguanta ipahaite peve ha jajesalva (Miq. 7:7). w23.08 22 párr. 7.

Ñakomparárõ pe profesía oĩva Daniel 2:​41-43-pe umi ótra profesía oĩvare Daniélpe ha avei Apocalípsispe, ikatu jaʼe pe estátua py orrepresentaha Estados Unidos ha Gran Bretáñape. Koʼã país ombaʼapo oñondive ha koʼág̃a haʼe pe goviérno omanda guasuvéva. Daniel heʼi vaʼekue ko poténsia mundiál térã ‘ko rréino en párte imbaretetaha ha en párte ikangytaha’. ¿Mbaʼéicha rupípa ko goviérno ikangýta? Pórke umi hénte orrepresentáva pe ñaiʼũme omokangy ko poténsiape ha ndaikatúi imbarete pe iérroicha. Daniel oexplika vaʼekue la heʼiséva pe estátua tuichaitereíva osoña vaʼekue pe rréi. Ha ikatu ñaaprende heta mbaʼe la haʼe heʼi vaʼekuégui. Primero, pe poténsia mundiál Estados Unidos ha Gran Bretaña ohechaukáma ipoderosoha heta hendáicha. Por ehémplo koʼã país oĩ umi ogana vaʼekue apytépe pe primera ha segunda gérra mundiál. Péro ko poténsia mundiál ikangýma ha ikangyvéta ohóvo, pórke umi hénte oikóva ipoguýpe oñorairõ oñondive ha opuʼã pe goviérno kóntrape. Segundo, ko poténsia Estados Unidos ha Gran Bretaña haʼéta pe último goviérno omandátava ko múndope, ha upéi Ñandejára Rréino ohundítama entéro umi goviérno oĩva ko yvy ape ári. w23.08 10, 11 párr. 12, 13

Sapyʼánte David oñekevrantaiterei vaʼekue pórke heta iprovléma (Sal. 18:​4, 5). Péro Jehová ombopiroʼy chupe, pórke ohechauka ohayhuha Davídpe ha oñangarekoha hese. Jehová ogueraha voi pe iñamígo ikaneʼõitévape “umi kapiʼipe vérde asýva oĩháme” ha ‘arrójo kóstare opytuʼu hag̃ua’. Upéicha rupi David imbarete jey ha ikatu oservi Jehovápe vyʼápe (Sal. 18:​28-32; 23:2). Koʼág̃a avei ñambohovái jave umi provléma ha situasión ijetuʼúva, ‘Jehová imbaʼeporãiterei rupi nañañehundipái’ (Lam. 3:22; Col. 1:11). David pyʼỹinte ojapeligra vaʼekue ha oreko voi umi iñenemígo ipoderosoitereíva. Péro Jehová ohayhu rupi chupe, haʼe oñeñandu segúro porã. David oñandu vaʼekue Jehová oĩha ijykére opaichagua situasiónpe, ha haʼe ndodudái vaʼekue upévagui. Upéicha rupi haʼe ikatu vaʼekue heʼi: ‘Jehová chepytyvõ anivéma hag̃ua akyhyje’ (Sal. 34:4). Sapyʼánte David okyhyjérõ jepe, ikatu vaʼekue ogueropuʼaka la oñandúva, pórke oikuaa Jehová ohayhuha chupe. w24.01 30 párr. 15-17

Eaprende Jehoás desisión vaígui. Pe saserdóte Jehoiadá omano rire, Jehoás oiporavo vai iñamigorã (2 Crón. 24:​17, 18). Haʼe odesidi ojegia umi konsého omeʼẽvare chupe umi prínsipe de Judá ndohayhúiva Jehovápe. Haʼe oñemomombyry vaʼerã kuri chuguikuéra pórke ojapo hikuái ivaíva. Péro upéva rangue haʼe osegi koʼã prínsipe konsého. Upéi iprímo Zacarías oñehaʼã okorrehi Jehoáspe, péro haʼe omanda ojejuka hag̃ua chupe (2 Crón. 24:​20, 21; Mat. 23:35). ¡Ajépa ivaiete la ojapóva rréi Jehoás! Haʼe oñepyrũ porãite kuri, péro ñambyasýramo jepe upéi oñemoĩ Jehová kóntrape ha oiko chugui peteĩ asesíno. Amo ipahápe isiervokuéra opuʼã hese ha ojuka chupe (2 Crón. 24:​22-25). Idiferentete vaʼerãmoʼã Jehoás osegírire iñeʼẽrendu Jehovápe ha umi oadorávape chupe. w23.09 9 párr. 6

Jesús ndodudái vaʼekue apóstol Pedro ikatuha ifiél. Upévare Jesús mborayhúpe heʼi vaʼekue chupe anivéma hag̃ua okyhyje. Upéva oiméne ojapo porã raʼe Pédrore pórke ohecha Jesús okonfiaha hese. Tiémpo rire, Pedro ha iñermáno Andrés oheja inegósio de péska ha oipurupaite itiémpo omoirũ hag̃ua Jesúspe. Upévare orresivi vaʼekue hikuái heta vendisión (Mar. 1:​16-18). Pedro ohasa vaʼekue heta mbaʼe ijojahaʼỹva omoirũ haguére Jesúspe. Haʼe ohecha vaʼekue Jesúspe omonguera umi hasývape, omosẽ umi demóniope ha omoingove jey umi omano vaʼekuépe jepe (Mat. 8:​14-17; Mar. 5:​37, 41, 42). Pedro ohecha vaʼekue avei Jesúspe peteĩ visión rupive ogovernamaha Ñandejára Rréinope ha haʼe núnka ndahesaráiri upévagui (Mar. 9:​1-8; 2 Ped. 1:​16-18). Pedro ohasa heta mbaʼe ni noimoʼãi vaʼekue ohasataha. Oiméne ovyʼaite rakaʼe osupera haguére umi mbaʼe vai opensáva ijehe, ha péicha orresivi koʼã vendisión porãite. w23.09 21 párr. 4, 5

Pe primera kárta apóstol Pedro oskrivi vaʼekuépe heʼi avei: “Pejoayhu vaʼerã pende pyʼaite guive”. Péicha japorohayhúrõ nañaperdonamoʼãi unas kuánta vésente, síno ‘siémpre ñaĩta ñaperdona hag̃uáicha ñande rapichápe’ (1 Ped. 4:8). Oiméne Pedro imanduʼa raʼe Jesús omboʼe hague chupe oporoperdona vaʼerãha. Upérõ guare oiméne Pedro oimoʼã ivuenoitereimaha operdonáta haguére hapichápe “siete vése”. Péro Jesús omboʼe chupe oporoperdona vaʼerãha “77 vése voi”, heʼiséva siémpre oĩ vaʼerãha operdona hag̃uáicha ótrope (Mat. 18:21). Ijetuʼúrõ ñandéve jasegi ko konsého, aníkena ñañentrega. Entéro Jehová siérvo iñimperfékto ha upévare sapyʼánte ijetuʼu ñaperdona hag̃ua ótrope. La iñimportánteva jajapo ikatúva guive ñaperdona hag̃ua ñane ermanokuérape ha jaiko porã jey hendivekuéra. w23.09 29 párr. 12

Oĩ aja pe pira ryépe, Jonás iñumílde ha oñemboʼe oñarrepentígui. Haʼe ndodudái Jehová ohendu ha oipytyvõta hague chupe. Upe rire Jehová osalva chupe ha Jonás oĩma okumpli hag̃uáicha pe asignasión orresivi vaʼekue (Jon. 2:10–3:4). Jahasa jave peteĩ mbaʼe ijetuʼúva, ñañekevranta ha upévare ndajaikuaái ni mbaʼépa jaʼéta ñañemboʼe jave. Ikatu avei ñanekaneʼõ ha ndaikatúi ni jastudia. Péicha jave ñanemanduʼákena Jehová ontende porãitereiha ñane situasión. Upévare ñañemboʼe sensillomíramo jepe ikatu ñaĩ segúro Jehová omeʼẽtaha ñandéve la ñaikotevẽva (Efes. 3:20). Oimérõ ñanekaneʼõ térã ñañekevrantaiterei ha upéicha rupi ndaikatúi jastudia, ikatu hína ñahendu umi puvlikasión ha la Biblia gravasión. Ideprovechoitereíta avei ñandéve ñahendúramo umi puraheikuéra térã jahecháramo umi vidéo oĩva jw.org-pe. Jahechaukáta jaipotaha Ñandejára ñanemombarete ñañemboʼéramo ha ñañehaʼãramo jahecha irrespuésta la Biblia ha umi puvlikasión rupive. w23.10 13 párr. 6; 14 párr. 9

Pe tavernákulo ha umi témplo upéi oñemopuʼãva Jerusalénpe ojojogua vaʼekue hyepýpe. Koʼã lugár ojedividi vaʼekue en 2 párte hérava: Pe “Lugár Sánto” ha pe “Santísimo”. Peteĩ kortína oservi vaʼekue de divisória éntre pe “Lugár sánto” ha pe “Santísimo” (Heb. 9:​2-5; Éx. 26:​31-33). Pe Sántope oĩ vaʼekue peteĩ kandelávro de óro, pe altár ojehapyha insiénso ha pe mesa oñemoĩháme pe pan. Umi “oñenombra vaʼekue oservi hag̃ua de saserdóte” añoite ikatu vaʼekue oike pe Lugár Sántope ojapo hag̃ua umi traváho sagrádo orekóva hikuái (Núm. 3:​3, 7, 10). Pe Santísimope oĩ vaʼekue pe Árka del Pákto de óro orrepresenta vaʼekue Jehová oĩha upépe (Éx. 25:​21, 22). Pe súmo saserdóte añoite ikatu vaʼekue ohasa pe kortína ha oike pe Santísimope una ves al áño, pe Día Oñeperdonahápe umi Pekádo (Lev. 16:​2, 17). Pe súmo saserdóte opresenta vaʼekue umi animál ruguykue oñeperdona hag̃ua ipekádo ha pe puévlo kompletoite pekádo. Kon el tiémpo Jehová omyesakã mbaʼépa orrepresenta vaʼekue umi mbaʼe oĩva pe tavernákulope (Heb. 9:​6, 7). w23.10 27 párr. 12

Ñandejára Ñeʼẽ heʼi jey jey ñandéve jajoayhu vaʼerãha (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Péro pe mborayhu haʼe peteĩ kualida ñañandúva ñande pyʼaite guive ha ni peteĩ persóna ndaikatúi ohecha. Upévare, ¿mbaʼéichapa ikatu jahechauka japorohayhuha? Upéva ojekuaáta jaʼéva ha jajapóvare. Heta hendáicha ikatu jahechauka jahayhuha ñane ermanokuérape. Koʼãva hína unos kuánto ehémplo: “Peje vaʼerã ojupe siertoguáva” (Zac. 8:16). ‘Peiko pyʼaguapýpe oñondivepa’ (Mar. 9:50). “Púntape pehechauka vaʼerã pemombaʼeha pende rapichápe” (Rom. 12:10). “Pejorresivi porãkena” (Rom. 15:7). ‘Pesegíkena peñoperdona pende pyʼaite guive’ (Col. 3:13). “Pesegíkena peñopytyvõ pegueraha hag̃ua ojupe pende kárga pohýi” (Gál. 6:2). “Pesegíkena peñokonsola” (1 Tes. 4:18). ‘Pesegíkena peñomombarete’ (1 Tes. 5:11). “Peñemboʼe ojuehe” (Sant. 5:16). w23.11 9 párr. 7, 8

Káda día jadesidi vaʼerã heta mbaʼe, upévare tekotevẽ ñandejerovia mbarete. Por ehémplo jadesidi vaʼerã mávarepa ñañamigáta, mbaʼéichapa jajedivertíta, mbaʼépa jastudiáta, mávarepa ñamendáta, mbaʼépa jajapóta ñane família rehehápe ha mbaʼépepa ñambaʼapóta. Iporãta ñañeporandúramo: “¿Ojekuaapa ahechakuaaha ko múndo koʼẽrõitéma oñehunditaha ha Ñandejára múndo pyahu omyengoviataha chupe? ¿Térã umi mbaʼe adesidívare ajogua umi hénte opensávape ndoikomoʼãiha pára siémpre?” (Mat. 6:​19, 20; Luc. 12:​16-21). Jadesidi porãta heta mbaʼépe jajerovia mbaretéramo koʼẽrõitéma pe múndo pyahu og̃uahẽtaha. Ñambohovái avei umi pruéva tekotevẽhápe ñandejerovia mbarete. Por ehémplo pe persekusión, mbaʼasy igravéva térã oimeraẽ ótra situasión ikatúva ñandereja yvýre. Ñepyrũrã ikatu ndajakyhyjéi ñambohovái hag̃ua pe provléma. Péro sapyʼánte koʼãichagua provléma ikatu ipuku, ha tekotevẽta ñandejerovia mbarete jagueropuʼaka hag̃ua ha jasegi hag̃ua jaservi vyʼápe Jehovápe (1 Ped. 1:​6, 7). w23.04 27 párr. 4, 5

Ñañemboʼe rire Jehová oipota jajapo ñande párte. Por ehémplo peteĩ ermáno ikatu okonsegise permíso itravahohápe oho hag̃ua asambleahápe, ha ojerure Jehovápe oipytyvõ hag̃ua chupe. Jehová ikatu oipytyvõ pe ermánope ipyʼaguasu hag̃ua oñeʼẽ hag̃ua ipatróndi. Péro pe ermáno ojapo vaʼerã ipárte ha oho vaʼerã ojerure la permíso. Sapyʼánte tekotevẽta oñeʼẽ heta vése ipatróndi, ojeofrese ombaʼapo hag̃ua ótro día térã heʼi anínte hag̃ua ojepaga chupe upe asambléa díape ikatu hag̃uáicha ilívre. Jehová oipota ñañemboʼe chupe kontinuadoite umi mbaʼe ñandepyʼapývare. Jesús heʼi vaʼekuére jahechakuaa oĩha umi mbaʼe jajeruréva noñemeʼẽmoʼãiva ñandéve ensegidaite (Luc. 11:9). ¡Upévare aníkena ñañentrega! Ñañemboʼéke ñande pyʼaite guive ha kontinuadoite (Luc. 18:​1-7). Péicha jahechauka Jehovápe iñimportanteha ñandéve g̃uarã la jajeruréva ha jajeroviaha hese ikatuha ñanepytyvõ. w23.11 22 párr. 10, 11

Jehová opromete vaʼekue iñamígo Abrahánpe itaʼyrataha, ha ifamília rupive oñevendesitaha entéro nasión oĩva ko yvy ape ári (Gén. 15:5; 22:18). Abrahán ojeroviaiterei rupi Ñandejárare, ndodudái vaʼekue oñekumplíta hague upe promésa. Upéicharõ jepe Abrahán orekórõ guare 100 áño ha Sara katu 90, haʼekuéra neʼĩra gueteri ifamília (Gén. 21:​1-7). Péro la Biblia heʼi Abrahán rehe: “Abrahán ohaʼarõkuaa ha ojerovia hetaiterei nasión outaha chugui. Ojeʼe haguéicha chupe” (Rom. 4:18). Ñande jaikuaa la Abrahán ohaʼarõ vaʼekue oñekumpli hague ha ou ifamília. Péicha onase Isaac, upe mitã haʼe ohaʼarõite vaʼekue. ¿Mbaʼérepa Abrahán ojeroviaite vaʼekue? Abrahán oikuaa porã rupi Jehovápe “ndodudái haʼe okumplitaha katuete entéro mbaʼe oprometéva” (Rom. 4:21). Jehová oguerohory vaʼekue Abrahánpe ha heʼi hese ihustoha pórke Abrahán ojerovia hese (Sant. 2:23). w23.12 8 párr. 1, 2

Peteĩ mitãrusu de konfiánsa okumpli porã umi rresponsavilida orekóva. Jahechamína Jesús ehémplo. Haʼe irresponsávle vaʼekue ha okumpli porã itraváho. Jesús ojapo entéro mbaʼe Itúa ojerure vaʼekue chupe, sapyʼánte ijetuʼúramo jepe. Haʼe ohayhu vaʼekue umi héntepe, koʼýte idisipulokuérape ha omano vaʼekue voi hesehapekuéra (Juan 13:1). Peẽ avei mitãrusukuéra ikatu pesegi Jesús ehémplo pembaʼapo jejopývo pekumpli porã hag̃ua oimeraẽ asignasión oñemeʼẽva peẽme. Oimérõ ndapeikuaaporãi mbaʼéichapa pejapo vaʼerã peteĩ traváho, peneumíldekena ha pejerure ajúda umi ermáno ijerovia mbaretévape. Aníkena pendekaigue ha upévare pejapo tekotevẽkueténte (Rom. 12:11). Upéva rangue pekumpli porã pene asignasión “peserviramoguáicha Jehovápe ha ndahaʼéi kuimbaʼekuérape” (Col. 3:23). Péro penemanduʼa avei pejavytaha, upévare peneumíldekena ha perrekonose pejavy jave (Prov. 11:2). w23.12 26 párr. 8

Enterove javyʼa jajevautisárõ guare ha jaike Jehová famíliape. Ñamombaʼeterei pe amista jarekóva Jehovándi ha ñapensa David opensa haguéicha. Haʼe heʼi vaʼekue: “Ovyʼa pe persóna nde reiporavóva oñemoag̃ui hag̃ua nderehe, oúva oiko hag̃ua nde róga korapýpe” (Sal. 65:4). Jehová ndohejái oimeraẽvapente oĩ ifamília apytépe. Haʼe odesidi oñemoag̃ui umi ohechaukávare oikoseha iñamigoitéramo (Sant. 4:8). Ñañemeʼẽvo Jehovápe ha jajevautisávo ikatu ñaĩ segúro Jehová ‘ohykuavotaha ñande ári peteĩ vendisión ndofaltavéi peve ñandéve mbaʼeve’ (Mal. 3:10; Jer. 17:8). Jajevautisa vove ñañepyrũnte hína ñande servísio Jehovápe. Upe guive ñañehaʼãmbaitéta jasegi hag̃ua ñandefiél Jehovápe oñepresentáramo jepe umi tentasión ha jahasárõ jepe umi mbaʼe ijetuʼúva (Ecl. 5:​4, 5). Avei jasegi porãta Jesús ehémplo ha ñañehaʼãmbaitéta jajapo umi mbaʼe haʼe heʼi vaʼekue (Mat. 28:​19, 20; 1 Ped. 2:21). w24.03 8 párr. 1-3

Peẽ pemendáva, ¿mbaʼépa oikóta oimérõ ndaigústoi peẽme pehasa tiémpo oñondive? ¿Mbaʼépa ikatu pejapo? Epensami pe tatáre. Oñepyrũre ojepota michĩmínte hendy, péro amedída ke ñamoĩ la jepeʼa tuichavéma hendy. Péicha avei ñepyrũrã ikatu peñehaʼã pehasa tiémpo oñondive michĩ mimi jepe káda día. Upearã ikatu peheka pejapo álgo mokõivévape pendegustáva (Sant. 3:18). Peñepyrũ jeýrõ mbeguekatúpe ha michĩ mimi, kon el tiémpo pejoayhuve jeýta. Pe tata hendy hag̃ua ningo oikotevẽmante pe oxíhenore, péicha avei peteĩ matrimónio oho porã hag̃ua hese mokõivéva oñomombaʼe ha ojorrespeta vaʼerã. Pe tata ogueháicha oxihenoʼỹre, péicha avei umi omendáva ojotrata vaírõ mbeguekatúpe pe mborayhu opáta ohóvo. Péro osegíta ojoayhu pe ména ha tembireko ojorrespeta ha oñomombaʼéramo. Nemanduʼáke ndahaʼeiha ndénte la repensa vaʼerã rerrespetaha ne ména térã ne rembirekópe, síno la iñimportánteva hína haʼe oñandu ojerrespetaha chupe. w23.05 22 párr. 9; 23 párr. 14; 24 párr. 15

La Biblia omombeʼu oĩ hague Ñandejára siérvo oñekevrantáva, okyhyjéva ha oryrýi osusũva peteĩ iñenemígo térã ótro provléma káusare (Sal. 18:4; 55:​1, 5). Koʼág̃a avei ikatu oĩ oñemoĩva ñanderehe eskuélape, koléhiope, travahohápe, ñane hentekuéra apytépe térã pe goviérno voi. Avei ikatu jakyhyjeterei jaikuaágui ikatuha ñamano ñanderasyete rupi. Péicha jave ikatu ñañeñandu ñaneaño ha jakyhyjeterei peteĩ mitãmi okañývaicha. ¿Mbaʼéichapa Jehová ñanepytyvõ péicha jave? Haʼe ñanekonsola ha ñanetrankilisa. Upévare tekotevẽ jahasa tiémpo Jehovándi ñañemboʼévo chupe ha jaleévo Iñeʼẽ (Sal. 77:​1, 12-14). Jajepokuaárõ jajapo upéva, káda ves ke ñañeñandu vai ensegídama voi jajeruréta ajúda chupe. Ñamombeʼúkena Jehovápe mbaʼépa ñanemongyhyje ha ñandepyʼapy. Upéi ñahendu chupe jaleévo Iñeʼẽ, pépe jahecháta mbaʼeichaitépa haʼe ñanekonsola (Sal. 119:28). w24.01 24, 25 párr. 14-16

Iñimportanteterei ñanekyreʼỹ jahupyty hag̃ua umi méta jarekóva. ¿Mbaʼérepa? Pórke jahupytyséramo ñande pyʼaite guive ñane méta, katuete ñañehaʼãmbaitéta. Ha amáske ñanekyreʼỹ, jarekovéta avei la posivilida jahupytývo ñane méta. Upéicharõ, ¿mbaʼépa ñanepytyvõta ñanekyreʼỹve hag̃ua? Jajerure Jehovápe tañanepytyvõ upearã, haʼe ikatu ñanemokyreʼỹ ijespíritu sánto rupive jahupyty hag̃ua ñane méta. Sapyʼánte ñamoĩ umi méta jaikuaáguinte jajapo vaʼerãha upéva, péro añetehápe ndahaʼéi la jajaposepáva. Upévare jajepyʼamongetákena la Jehová ojapo vaʼekuére ñanderehehápe (Sal. 143:5). Jehová imbaʼeporãiterei vaʼekue apóstol Pablo ndive ha haʼe ojepyʼamongeta vaʼekue upévare. Upéva omomýi chupe ombaʼapo jejopy hag̃ua Jehová servísiope (1 Cor. 15:​9, 10; 1 Tim. 1:​12-14). Ñande avei ñapensa meméramo la Jehová ojapóvare ñanderehehápe, ñanekyreʼỹvéta jahupyty hag̃ua umi méta ñamoĩva (Sal. 116:12). w23.05 27 párr. 3-5

Jehová, ñande Ru yvagapegua, oipota oñemombaʼeguasu héra (Sal. 119:108). Jaikuaa Ñandejára ipoderosoitereiha, ¿péro haʼe piko ñandéicha avei oikotevẽ oñemombaʼe chupe oñeñandu porã hag̃ua? Nahániri. Ñamombaʼeguasu jave chupe jahechauka japuha la Satanás heʼi vaʼekue ñanderehe. Haʼe heʼi vaʼekue ndaiporimoʼãiha ni peteĩ persóna ohasa asy jave osegítava ifiél Ñandejárape ha odefende chupe. Satanás heʼi vaʼekue enterove jahejataha Ñandejárape jahechakuaáramo upéva ñanevenefisiataha (Job 1:​9-11; 2:4). Péro por ehémplo Job ifiél vaʼekue ha ohechauka Satanás ijapuha. ¿Ha ndépa esegíta avei ndefiél? Remombaʼeguasu jave Jehovápe rehechauka avei hína Satanás ijapuha. Káda uno ikatu ñambovyʼa Jehovápe, jadesidíramo ñamombaʼeguasutaha héra ha jaservi chupe fiélmente (Prov. 27:11). ¡Tuichaiterei mbaʼe la ikatúva jajapo! w24.02 8, 9 párr. 3-5

Moisés ha Josué tiémpo rire, Jehová omoĩ vaʼekue umi hués ogia hag̃ua ipuévlope. Ha umi rreikuéra tiémpope omoĩ vaʼekue umi profétape. Umi rréi ifiélva Jehovápe osegi vaʼekue umi profetakuéra konsého. Por ehémplo, rréi David iñumílde vaʼekue ha oasepta proféta Natán okorrehírõ guare chupe (2 Sam. 12:​7, 13; 1 Crón. 17:​3, 4). Rréi Jehosafat ojapo vaʼekue la proféta Jahaziel heʼi vaʼekue chupe ha omokyreʼỹ pe puévlo de Judápe ‘ojerovia hag̃ua Jehová profetakuérare’ (2 Crón. 20:​14, 15). Rréi Ezequías oñekevrantaitereírõ guare ojerure vaʼekue ajúda proféta Isaíaspe (Is. 37:​1-6). Umi rréi osegírõ guare Jehová gía haʼe ovendesi chupekuéra ha oprotehe pe puévlope (2 Crón. 20:​29, 30; 32:22). Hesakã porãiterei vaʼekue Jehová ojevale hague umi profétare ogia hag̃ua ipuévlope. w24.02 21 párr. 8

Satanás oipota jajeheʼa umi nañanepytyvõmoʼãivare ñaneñeʼẽrendu hag̃ua Jehovápe. Ñanemanduʼa vaʼerã ikatuha jahasa tiémpo algúnondi umi rred sosiál rupive, ha ndahaʼéi katuete en persóna añónte. Ko múndo osegíta heʼi pe tekovai ndahaʼeiha mbaʼeve ivaíva. Péro jalucha vaʼerã ani hag̃ua ñanembotavy pórke jaikuaa japuha upéva (Efes. 4:​19, 20). Iporãta ñañeporandúrõ: “¿Ajeheʼápa tekotevẽkueténte che kompañéro de eskuéla, de koléhio térã che travahopeguáre? ¿Ndaikóipa ahasaiterei tiémpo peteĩ persóna ndorrespetáivandi Jehová heʼíva? ¿Chepyʼaguasúpa ha adefende pe añetegua umi hénte heʼírõ jepe chefanatikoitereimaha?”. Avei jareko vaʼerã enkuénta ótra kósa. La Biblia heʼi 2 Timoteo 2:​20-22-pe ñañatende vaʼerãha mávarepa jajeheʼa kongregasiónpe voi. Ñanemanduʼákena naenterói ñanepytyvõtaha jasegi hag̃ua jaservi Jehovápe fiélmente. w24.03 22, 23 párr. 11, 12

¿Ñañeimahinámava mbaʼeichaguápa Jehová? Ndajahecháiramo jepe Jehovápe, la Biblia heʼi hese heta mbaʼe. Por ehémplo heʼi Jehová ojoguaha peteĩ eskúdope ha kuarahýpe, avei ‘tatarendy oporohundívape’ (Sal. 84:11; Heb. 12:29). Ezequiel ohecha rire peteĩ visión heʼi Jehováre ojoguaha safírope, umi metál overapávape ha peteĩ árko íris omimbipávape (Ezeq. 1:​26-28). Ndajahechái rupi Jehovápe ikatu ijetuʼu ñandéve jaguerovia hag̃ua haʼe ñanderayhuha. Oĩ umi opensáva Jehová núnka ndohayhumoʼãiha chupekuéra, pórke ohasa vaʼekue heta mbaʼe vai ymave. Jehová ontende umi mbaʼe ñañandúva ha oikuaa ikatuha ijetuʼu ñandéve ñañemoag̃ui hag̃ua hese. Upévare la Biblia rupive haʼe oikuaauka ñandéve haʼeha peteĩ Dios ñanderayhuetereíva. Jehová mborayhu memete. La Biblia heʼi voi: “Ñandejára ningo mborayhu” (1 Juan 4:8). Haʼe ojapo entéro mbaʼe pórke oporohayhu. Ñandejára oporohayhu rupi imbaʼeporã enterovéndi, ha ndahaʼéi otratáva mborayhúpe umi ohayhúvapente chupe (Mat. 5:​44, 45). w24.01 26 párr. 1-3

Jehová oiporavo vaʼekue Moiséspe oguenohẽ hag̃ua umi israelítape Egíptogui. Jehová ojevale peteĩ araíre ogia hag̃ua chupekuéra de diakue ha tatarendýre ogia hag̃ua chupekuéra pyharekue (Éx. 13:21). Ojegia rupi koʼã mokõi mbaʼére, Moisés ha umi israelita og̃uahẽ pe mar Rójope. Og̃uahẽrõ guare hikuái upépe, umi israelita ndoikuaavéi moõ gotyopa ojapíta. Upévare oñepyrũ ojedesesperapa hikuái oimoʼãgui umi egipcio ojukapataha chupekuéra. Péro upépe voi kuri la Jehová oipota oho umi israelita (Éx. 14:2). Upéi haʼe osalva chupekuéra oñeimoʼãʼỹ haguéicha (Éx. 14:​26-28). Upe guive, 40 áñore Moisés ojegia pe arai ha pe tatarendýre ogia hag̃ua umi israelítape pe desiértore (Éx. 33:​7, 9, 10). Pe arai guive Jehová oñeʼẽ Moisésndi ha omeʼẽ chupe umi instruksión umi israelítape g̃uarã. Oĩ vaʼekue heta mbaʼe ohechauka porãva umi israelítape Jehová ojevale hague Moisés rehe ogia hag̃ua chupekuéra. w24.02 21 párr. 4, 5