Julio

Jesús oñandu ha opensa vaʼekue Itúaicha, ha upéva ojekuaa porãiterei umi mbaʼe heʼi ha ojapóva rupive, por ehémplo ojapórõ guare umi milágro (Juan 14:9). ¿Mbaʼépa ikatu ñaaprende umi milágro Jesús ojapo vaʼekuégui? Jesús ha Itúa ñanderayhueterei. Jesús oĩrõ guare ko yvy ape ári ohechauka vaʼekue mbaʼeichaitépa ohayhu la héntepe. Upévare haʼe oipuru ipodér ojapo hag̃ua umi milágro ha péicha oipeʼa umi mbaʼe ombohasa asýva umi héntepe. Peteĩ jey, mokõi siégo osapukái Jesúspe ha ojerure chupe oipytyvõ hag̃ua chupekuéra (Mat. 20:​30-34). Pe rreláto heʼi ñepyrũrã Jesús “oiporiahuverekoiterei” hague koʼã siégope ha upéi omonguera hague chupekuéra. Jesús ohayhu rupi la héntepe oiporiahuvereko vaʼekue chupekuéra. Ha upéva la omomýi vaʼekue chupe ótra okasiónpe omongaru hag̃ua heta hénte iñembyahýivape, ha avei omonguera hag̃ua peteĩ leprósope (Mat. 15:32; Mar. 1:41). Upévare ñande ñaime segúro ñanderayhuetereiha Jehová, pe Ñandejára ‘imbaʼeporãitéva’, ha Itaʼýra. Avei hasy chupekuéra ohechávo jasufriha (Luc. 1:78; 1 Ped. 5:7). Chupekuéra g̃uarã ningo hiʼãitereíma hína ohundi opa mbaʼe ombohasa asýva yvyporakuérape. w23.04 3 párr. 4, 5

Por ehémplo ñañehaʼãmbaite vaʼerã ani hag̃ua jalee ni ñahendu umi mbaʼe vai ojagarrapáva Satanás múndo. Ñamyenyhẽ hag̃ua ñane akã umi pensamiénto iporãvagui jalee ha jastudia vaʼerã la Biblia, avei jaha vaʼerã rreunionhápe ha japredika meme. Ñanemanduʼáke Jehová oprometeha ndohejamoʼãiha jahasa mbaʼeve ndaikatumoʼãiva ñaaguanta (1 Cor. 10:​12, 13). Koʼã ára pahápe enterovéva tekotevẽ ñañemboʼe meme ikatu hag̃uáicha jasegi ñandefiél. Jehová oipota ‘ñamombeʼupaite chupe umi mbaʼe oĩva ñande pyʼapýpe’ (Sal. 62:8). Ñañemboʼe jave ñamombaʼeguasu ha jaagradese vaʼerã chupe opa mbaʼe ojapóvare. Jajerure chupe tañanembopyʼaguasu japredika hag̃ua. Avei tañanepytyvõ ñandepuʼaka hag̃ua kualkiér provlémare ha ani hag̃ua jaʼa umi tentasiónpe. Aníkena jaheja mbaʼeve ni avave ñandejoko ñañemboʼe hag̃ua Jehovápe. w23.05 7 párr. 17, 18

¿Mbaʼérepa jaha umi rreunionhápe? Primeroite voi ñamombaʼeguasu hag̃ua Jehovápe (Sal. 26:12; 111:1). Avei jaha jave umi rreunionhápe ñañomokyreʼỹ koʼã tiémpo ijetuʼuetévape (1 Tes. 5:11). Upéicharõ, ñande ñakomenta jave jahupyty koʼã mokõi mbaʼe. Péro ikatu hína oñepresenta umi mbaʼe ñandejokoséva. Ikatu ñanenerviosoiterei ha nañañanimái ñakomenta hag̃ua. Térã ikatu ñakomentase heta vése, péro noñemeʼẽi ñandéve káda ke jahupi ñande po. Apóstol Pablo heʼi mbaʼépa la iñimportantevéva: “Ñañomokyreʼỹ vaʼerã”. Jarekóramo enkuénta ikatuha ñamokyreʼỹ ñane ermanokuérape ñane komentário isensílloramo jepe saʼive ñanenerviósota. Ha ndaikatúiramo jepe ñakomenta heta vése ñandéve ñandegustaháicha, javyʼáta umi ótro ikatu haguére avei okomenta (1 Ped. 3:8). w23.04 20 párr. 1-3

¡Pe rréi oanunsiáma la notísia! Ojelivera oho jey hag̃ua hetãme umi judío oiko vaʼekue prisionéroramo Babilóniape amo 70 áñorupi (Esd. 1:​2-4). Jehová rupivémante ikatu kuri oiko upéva. Pórke umi babilonio nopermitíri vaʼekue umi iprisionéro oho jey ivállepe (Is. 14:​4, 17). Péro upérõ guare Babilonia oñehundíma ha pe governánte pyahu oanunsia umi judío ikatuha oho jey hetãme. Enterove umi judío odesidi vaʼerã kuri mbaʼépa ojapóta, ha koʼýte umi omoakãva ifamília odesidi vaʼerã osẽtapa oho Babilóniagui, térãpa nahániri. Oiméne ndahaʼéi vaʼekue la ifasilpáva ko situasión. Heta judío ningo ijedáma oviaha puku hag̃ua ha avei la majoría umi judío onaséma vaʼekue Babilóniape. Chupekuéra g̃uarã upépe la iválle ha opensa hikuái Israel haʼeha umi ihentekuéra yma guare válle. Oĩ vaʼekue avei umi judío ou vaʼekue ipláta heta Babilóniape, upévare oiméne ijetuʼu rakaʼe chupekuéra oheja hag̃ua umi hóga porã ha inegósio oho hag̃ua hikuái oiko ótro ládo. w23.05 14 párr. 1, 2

La Biblia ñanemokyreʼỹ jasegi hag̃ua ñaneaguánte, japoroporiahuvereko ha japorohayhu. Lucas 21:​19-pe heʼi: “Peẽ peaguantáramo pe fin peve, pesalváta pende rekove”. Colosenses 3:12 heʼi: ‘Pehechaukákena peiporiahuverekoha pende rapichápe’. Ha 1 Tesalonicenses 4:​9, 10 heʼi: ‘Ñandejára penemboʼéma voi pejoayhu vaʼerãha. Péro koʼág̃a rojerure jey jey peẽme pesegi hag̃ua pejoayhuve’. La heʼíva koʼã téxtope ojeʼe vaʼekue umi kristiáno ypykuépe. Haʼekuéra ohechaukáma voi kuri iñaguánte, oporoporiahuvereko ha oporohayhuha, péro osegi vaʼerã kuri ohechauka koʼã kualida. Ha nde rejapo vaʼerã avei upéicha. Umi kristiáno ohechauka vaʼekue koʼã kualida ha nde ikatu resegi iñehemplokuéra reĩ hag̃ua preparádo pe jehasa asy guasúpe g̃uarã. Upéi oñepyrũ vove pe jehasa asy guasu reikuaátama mbaʼéichapa reaguanta vaʼerã ha rejedesidíta voi resegitaha rejapo upéva. w23.07 3 párr. 4, 8

Ko tape ningo opermiti ñandéve koʼág̃a jaadora Jehovápe ñane ermanokuéra ndive pyʼaguapýpe ha en unida. Ha amo gotyove katu jahupytýta umi vendisión oguerútava pe Rréino. Upévare umi unhído ha umi “ótro ovechakuéra” osegi vaʼerã oguata ko ‘Tape Sagrádore’ (Juan 10:16). Áño 1919 guive hetaiterei kuimbaʼe, kuña ha mitã osẽ umi rrelihión fálsagui, térã Babilonia Guasúgui, ha oñepyrũ oguata pe ‘Tape Sagrádore’. Jehová oipeʼakapa vaʼekue umi judío raperãgui umi mbaʼe ikatúva ojoko chupekuéra osẽrõ guare oho Babilóniagui (Is. 57:14). ¿Ojapópa avei upéicha ko tiémpope ko ‘Tape Sagrádore’? Si, hetaiterei áño 1919 mboyve, Jehová ojevale vaʼekue umi kuimbaʼe orrespetávare chupe omopotĩ hag̃ua pe tape ha péicha oñesẽ hag̃ua Babilonia Guasúgui (ekompara Isaías 40:3 heʼívare). Jaʼe porãsérõ g̃uarã koʼã kuimbaʼe ombaʼapo pe tapére ikatu hag̃uáicha umi persóna ikorasõ porãva kon el tiémpo oheja pe rrelihión fálsa ha oadora Jehovápe ipuévlondi haʼe oipotaháicha. w23.05 15, 16 párr. 8, 9

Jehová oipota jaservi chupe vyʼápe ha ñande pyʼaite guive (2 Cor. 9:7). Upévare, oimérõ nañanekyreʼỹi hína, ¿mbaʼérepa jasegi vaʼerã ñañehaʼã jahupyty ñane méta? Jahechamína Pablo ehémplo. Haʼe heʼi vaʼekue: “Che akorrehi mbarete che rete ha areko che esklávoramo” (1 Cor. 9:​25-27, nóta). Avése Pablo ndahaʼéi vaʼekue la ikyreʼỹmbáva ojapo hag̃ua la Jehová oipotáva, péro lomímonte oñehaʼãmbaite vaʼekue. ¿Ovyʼápa rakaʼe Jehová Pablo servísio reheve? Si ovyʼa. Upévare Jehová ovendesi vaʼekue chupe oñehaʼã haguére (2 Tim. 4:​7, 8). Jehová ovyʼa avei ñañehaʼãmbaitéramo ñakumpli ñane méta, oiméramo jepe nañanekyreʼỹi. ¿Mbaʼérepa? Pórke ñande ñañehaʼãmbaite jajapo upéva jahayhúgui chupe, ndahaʼéiramo jepe la ñandegustáva upe jajapóva hína. Jehová ningo ovendesi vaʼekue Páblope ha ñandéve avei ñanevendesíta jasegírõ ñambaʼapo jejopy (Sal. 126:5). Ha jahechávo mbaʼéichapa Jehová ñanevendesi, upéva voi ñanemokyreʼỹ jeýta. w23.05 29 párr. 9, 10

Apóstol Pablo heʼi vaʼekue umi hénte oñehundítava ojoguaha umi okévape. Umi okéva noñandúi la oikóva ijerére ha ndopillái mboy tiémpomapa ohasa. Haʼekuéra ndohechakuaái oikópa álgo iñimportánteva ha ndaikatúi orreaksiona. Upéicha avei heta hénte oikóva ko tiémpope haʼete ku okéva hína (Rom. 11:8). Pórke haʼekuéra nopenái umi señál ohechaukávare ñaimemaha “umi ára pahápe” ha koʼẽrõitéma oñepyrũtaha pe jehasa asy guasu (2 Ped. 3:​3, 4). Péro ñande jaikuaa amás día iñimportanteveha japyta japayhápe (1 Tes. 5:6). Upévare tekotevẽ ñaime trankílo ha ñapensa porã la jajapótavare pórke nañañatendéirõ ikatu ñañentremete polítikare ha umi provléma oikóvare ko múndope. Ha amáske hiʼag̃ui ohóvo Ñandejára ára, la hénte ojopyvéta ñanendive jajapo hag̃ua koʼã mbaʼe. Péro natekotevẽi jajepyʼapy la jaʼétavare chupekuéra, pórke Ñandejára espíritu ñanepytyvõta ñaime hag̃ua trankílo, ñapensa hag̃ua hendaitépe ha péicha jadesidi porã hag̃ua (Luc. 12:​11, 12). w23.06 10 párr. 6, 7

Oñeñeʼẽ jave Sansón rehe, ¿mbaʼépa ou ñandéve ñane akãme? Oiméne ñapensa peteĩ kuimbaʼe imbaretetereívare, ha añetehápe upéicha vaʼekue. Péro Sansón odesidi vai vaʼekue ha upéva káusare heta osufri. Upéicharõ jepe Jehová ojesareko entéro umi mbaʼe Sansón ojapo vaʼekuére oservi hag̃ua chupe. Upévare Ñandejára omoĩka iñehémplo la Bíbliape. Jehová ojevale vaʼekue Sansón rehe osalva hag̃ua ipuévlo Israélpe. Heta tiémpo Sansón omano rire, Jehová ogia vaʼekue apóstol Páblope oskrivi hag̃ua Sansón réra umi kuimbaʼe ijerovia mbaretéva réra apytépe (Heb. 11:​32-34). Sansón ehémplo ikatu ñanemokyreʼỹ. Haʼe ojerovia vaʼekue Jehováre ombohováirõ guare umi situasión ijetuʼúva. Ñande ikatu ñaaprende Sansón ehémplogui ha upéva ikatu ñanemombarete. w23.09 2 párr. 1, 2

Ñañemboʼe memérõ Jehovápe ñande pyʼaite guive ñaneaguantevéta (1 Tes. 5:17). Ikatu koʼag̃aite ndajahasái peteĩ situasión ijetuʼuetereíva. Péro ñapensamína, ¿ñañemboʼépa Jehovápe nañandegustái jave álgo, ndajaikuaáirõ mbaʼépa jajapóta térã jajedesahusia jave? Koʼág̃ama ñañemboʼe memérõ Jehovápe umi provléma jarekóvare káda día, ifasilvétama ñañemboʼe chupe ou vove umi provléma tuichavéva. Ndajadudamoʼãi Jehová oikuaataha mbaʼéichapa ha arakaʼetépa ñanepytyvõta (Sal. 27:​1, 3). Koʼág̃ama voi ñaneaguánterõ ikatúta jagueropuʼaka ou vove pe jehasa asy guasu (Rom. 5:3). ¿Mbaʼérepa ikatu jaʼe upéva? Heta ermáno ohechakuaa oaguanta jave peteĩ situasión ijetuʼúva, upéi iñaguantevemaha ombohovái hag̃ua ótro provléma. Haʼekuéra ohecha mbaʼéichapa Jehová oipytyvõma chupekuéra ha upévare ojeroviave hese. Ha okonfia rupi hese osegi oaguanta umi pruéva oúva upe rire (Sant. 1:​2-4). w23.07 3 párr. 7, 8

Jehová iñumílde ha oiporiahuvereko enterovépe, upéicha rupi noñemohatãi haʼe heʼívapente. Jahechakuaa mbaʼeichaitépa iñumílde odesidírõ guare ohunditaha umi hénte aña oĩvape Sodómape. Umi ánhel rupive Jehová omanda vaʼekue Lótpe okañy hag̃ua umi montañaháre, péro Lot okyhyje oho hag̃ua. Upévare ojerure asy Jehovápe opermiti hag̃ua chupe ha ifamíliape oho Zóarpe, peteĩ puevloʼi Jehová odesidímava ohunditaha. Jehová ikatu kuri heʼi Lótpe ojapo hag̃ua la heʼi hagueichaite chupe, péro upéva rangue haʼe omeʼẽ Lótpe la ojerure vaʼekue ha nohundíri Zóarpe (Gén. 19:​18-22). Heta tiémpo rire Jehová oiporiahuvereko pe siuda héravape Nínive. Upérõ guare haʼe omondo iproféta Jonáspe oavisa hag̃ua umi hénte aña upepeguápe oñehunditaha isiuda ha haʼekuéra avei. Péro umi ninivita oñarrepenti ha Jehová ombyasy chupekuéra, upévare odesidi nohundimoʼãinte hague upe siuda (Jon. 3:​1, 10; 4:​10, 11). w23.07 21 párr. 5

¿Mbaʼépa ñaaprende la oiko vaʼekuégui Jehoás rehe? Haʼe ojogua kuri peteĩ yvyramáta ndahapopypukúivape oikotevẽva peteĩ estáka ani hag̃ua hoʼa. Jaʼe porãsérõ g̃uarã pe estáka kuri Jehoiadá, ha haʼe omanórõ guare Jehoás oñepyrũ ohendu umi oheja vaʼekuépe Jehovápe, ha amo ipahápe naiñeʼẽrenduvéima Ñandejárape. Péicha ñaaprende ñaneñeʼẽrendu hag̃ua Jehovápe ndaikatuiha ñadepende ñane hentekuéra térã ermanokuérarente. Ani hag̃ua jaheja Jehovápe tekotevẽ jahayhuve ha jarrespetave chupe, ha upearã jastudia, jajepyʼamongeta ha ñañemboʼe meme vaʼerã (Jer. 17:​7, 8; Col. 2:​6, 7). Jehová ndojeruréi mbaʼeve ndaikatumoʼãiva jajapo. La haʼe oipotáva ñakumpli oñemombeʼu Eclesiastés 12:​13-pe. Upépe heʼi: “Rerrespeta vaʼerã Ñandejárape ha ejapo imandamiénto heʼíva. Péva hína pe ovligasión entéro persóna orekóva”. Jarrespetáramo Jehovápe jagueropuʼakáta entéro situasión ijetuʼúva, ha jasegíta ñandefiél Jehovápe. Upéicha ndaiporimoʼãi mbaʼeve ikatútava ombyai ñane amista Ñandejárandi. w23.06 18, 19 párr. 17-19

Ñandejára garantía jatopa oñepyrũvo pe versíkulo 5. Upépe heʼi: “Ñandejára oguapýva pe trónope heʼi” (Apoc. 21:5a). Koʼápe heʼíva ningo ndaijojahái, pórke en totál 3 vésente Jehová oñeʼẽ lívro de Apocalípsispe. Upéicharõ ndahaʼéi peteĩ ánhel ni Jesús la omeʼẽva hína ko garantía, síno Jehovaite voi. Upéva ohechauka ikatuha jajerovia ñande pyʼaite guive la heʼívare upe rire. ¿Mbaʼérepa? Pórke Jehová haʼe hína “Ñandejára ikatuʼỹva ijapu” (Tito 1:2). Upévare ikatu ñakonfia ñane korasõite guive la heʼívare Apocalipsis 21:​5, 6. Avei Ñandejára heʼi: “Ambopyahu hína entéro mbaʼe”. Jaikuaa ningo Jehová oñeʼẽha umi mbaʼe oikótavare amo gotyove. Péro chupe g̃uarã la oprometéva katuete oñekumplíta, upévare haʼe oñeʼẽvo koʼã mbaʼére, oñeʼẽ oñekumplipamarõguáicha (Is. 46:10). w23.11 3 párr. 7, 8

Apóstol Pedro olucha vaʼekue idevilida kóntrape. Por ehémplo, Pedro ojere ojaʼo Jesúspe, haʼe omombeʼúrõ guare ohasa asy ha omanotaha ojeprofetisa haguéicha la Bíbliape (Mar. 8:​31-33). Avei heta vése Pedro ha umi ótro apóstol ojodiskuti vaʼekue mávapa la iñimportantevéva ijapytepekuéra (Mar. 9:​33, 34). Pe pyhare Jesús omano mboyve, Pedro derrepentete oataka peteĩ kuimbaʼépe ha onambiʼo chupe (Juan 18:10). Upe pyharépe avei Pedro okyhyje rupi la héntegui, onega 3 vése oikuaaha Jesúspe (Mar. 14:​66-72). Upévare Pedro osẽ upégui ha hasẽ soro. Jesús nopensái vaʼekue Pedro naipohãveimaha. Upévare orresusita rire omeʼẽ la oportunida Pédrope heʼi hag̃ua ohayhuha gueteri chupe. Avei Jesús ojerure vaʼekue Pédrope oñangareko hag̃ua ijovechakuérare (Juan 21:​15-17). Ha haʼe kyreʼỹme ojapo vaʼekue la Jesús heʼíva chupe ojapo hag̃ua. Jerusalénpe pe Pentekostés díape, Pedro oĩ kuri umi primeroite oñeunhi vaʼekue apytépe espíritu sánto rupive. w23.09 22 párr. 6, 7

Apóstol Pedro heʼi vaʼekue umi ansiánope: “Ojapoháicha peteĩ pastór, peñangarekóke Ñandejára ovechakuérare” (1 Ped. 5:​1-4). Oimérõ nde peteĩ ansiáno, katuete rehayhu ermanokuérape ha ekuidase hesekuéra ojapoháicha peteĩ pastór. Péro oiméne sapyʼánte heta nerembiapo térã nekaneʼõ ha repensa ndaikatumoʼãiha rekumpli porã ne asignasión. Emombeʼupaitékena Jehovápe umi mbaʼe ndepyʼapýva. Pedro oskrivi vaʼekue: “Oĩramo oservíva ótrope, tojerovia pe fuérsa Ñandejára omeʼẽvare” (1 Ped. 4:11). Umi ermáno ikatu ombohovái umi provléma noñesolusionamoʼãiva jaiko aja ko múndo añáme. Péro nemanduʼákena “pe pastór prinsipál” Jesucristo ikatuha oipytyvõ porãve chupekuéra oimeraẽ ótrogui. Ha ikatu ojapo upéva koʼág̃ama voi ha avei pe múndo pyahúpe. Jehová oipota umi ansiáno ohayhu umi ermánope, oñangareko hesekuéra ha ‘omoĩ ehémplo pe ovecha atýpe g̃uarã’. w23.09 29, 30 párr. 13, 14

Ani jaju ñapensa opensa lája umi hénte ndorrespetáiva Jehovápe. Ñapensáramo umi hénte ko mundopegua opensaháicha, ikatu jaju nañapenavéi Jehováre ni ileikuérare (1 Cor. 3:19). “Ko mundopegua arandu” omomýi la héntepe omboyke hag̃ua Ñandejárape. Yma unos kuánto kristiáno oĩva Pérgamo ha Tiatírape oñepyrũ vaʼekue ojogua umi hénte oikóvape ijerére, hekovai ha oadoráva taʼangápe. Jesús oñemoñeʼẽ mbarete mokõive kongregasiónpe opermiti rupi oĩ tekovai ijapytepekuéra (Apoc. 2:​14, 20). Koʼág̃arupi umi hénte oĩva ñande jerére oipota jaasepta umi mbaʼe oĩ vaíva. Ñane hentekuéra ha umi ñane konosído ikatu heʼi ñandéve ñandeexaheradomaha ha natekotevẽiha ñakumpli umi Jehová léi. Haʼekuéra opensa ndaivairiha jaiko ñane akãre ha ñanderekovai ha heʼi la Biblia ndovaleveimaha ko tiémpope g̃uarã. Sapyʼánte ikatu ñapensa umi instruksión Jehová omeʼẽva nahesakãporãiha. Upévare ikatu voi ‘ndajajesegiséi Ñandejára Ñeʼẽ heʼívarente’ (1 Cor. 4:6). w23.07 16 párr. 10, 11

María, haʼéva Jesús sy, oikotevẽ kuri oñemombarete chupe. Haʼe nomendáiva gueteri ha núnka nomongakuaáiva peteĩ mitã, péro koʼág̃a okuida vaʼerã pe mitã haʼétavare pe Mesías. María ndorekóiva gueteri rrelasión sexuál, péro koʼág̃a omombeʼu vaʼerã imenarã Josépe mbaʼéicha rupípa hyeguasu. ¡Ijetuʼueténe raʼe chupe upéva! (Luc. 1:​26-33). ¿Mbaʼépa ojapo María okumpli hag̃ua ko asignasión espesiál ha ijetuʼuetéva? Haʼe oheka ajúda ha ojapo unas kuánta pregúnta ánhel Gabriélpe ontende hag̃ua iñasignasión (Luc. 1:34). Upéi oviaha oho hag̃ua Elisabet rendápe, hiʼarive haʼe oiko “peteĩ puévlo oĩva sérrope, Judápe”. Elisabet ofelisita chupe, ha Jehová ojevale hese heʼi hag̃ua peteĩ profesía oñeʼẽva pe mitã oĩvare María retepýpe (Luc. 1:​39-45). María heʼi Ñandejára ojapoha “heta mbaʼe tuichaitereíva ipodér rupive” (Luc. 1:​46-51). Jahechaháicha, Jehová ojevale ánhel Gabriel ha Elisabet rehe omombarete hag̃ua Maríape. w23.10 14, 15 párr. 10-12

Unos kuánto Cristo disípulopente oñeunhi pe espíritu rupive. Péicha Jehová oadopta chupekuéra itaʼýraramo. Koʼãva hína umi 144.000 oservítava Jesús ndive yvágape saserdóteramo (Apoc. 14:1). Pe Sánto orrepresenta Jehová oadopta hague koʼã unhídope itaʼýraramo oĩ aja gueteri hikuái ko yvy ape ári (Rom. 8:​15-17). Pe Santísimo orrepresenta pe yvága Jehová oĩháme. Ha “pe kortína” odividíva pe Sánto ha pe Santísimo orrepresenta Jesús rete oĩ aja gueteri ko yvy ape ári. Haʼe oreko aja pe kuérpo umáno ndaikatúi vaʼekue oike yvágape oservi hag̃ua de súmo saserdóte pe témplo espirituálpe. Jesús omeʼẽrõ guare hete sakrifísioramo yvyporakuéra rehehápe, oavri peteĩ tape opermitítava umi unhídope oiko yvágape. Umi unhído kásope avei oreko aja ikuérpo umáno ndaikatúi oike pe yvágape (Heb. 10:​19, 20; 1 Cor. 15:50). w23.10 28 párr. 13

Gedeón ndaipochýi umi kuimbaʼe Efraingua okritikárõ guare hese (Juec. 8:​1-3). Haʼe nokontestavaíri kuri chupekuéra, síno ohechauka iñumílde ha iñakãguapyha. Haʼe ohendúnte umi efraimita ojeplageárõ guare, ha oñeʼẽ chupekuéra trankílo porã. Umi ansiáno iñarandúva osegi avei Gedeón ehémplo ojapysaka porãvo umi ermánore ha oñeʼẽvo akãguapýpe porãnte oĩ jave okritikáva hesekuéra (Sant. 3:13). Péicha oipytyvõ hikuái oĩ hag̃ua pyʼaguapy kongregasiónpe. Gedeón oganárõ guare umi madianítape oĩ kuri heta omombaʼetereíva chupe, péro haʼe heʼi oñemombaʼeguasu hag̃ua Jehovápe (Juec. 8:​22, 23). ¿Mbaʼéichapa umi ansiáno ikatu osegi Gedeón ehémplo? Haʼekuéra orrekonose vaʼerã ojapoha entéro mbaʼe Jehová rupivénte (1 Cor. 4:​6, 7). Por ehémplo oñemombaʼéramo peteĩ ansiánope ivaleterei haguére oporomboʼe hag̃ua, haʼe ikatu heʼi la Bíbliagui oguenohẽ hague pe enseñánsa, térã heʼi Ñandejára organisasión la ombokatupyrýva enterovépe. Iporãta káda tánto umi ansiáno oñeporandúrõ omboʼépa oñemombaʼe hag̃uáicha Jehovápe térãpa haʼekuéra ojechaukase hína. w23.06 4 párr. 7, 8

Noñekontestáirõ la jajeruréva ñane ñemboʼépe ikatu ñañeporandu: “¿Oĩ porã piko la ajeruréva che ñemboʼépe?”. Ñande ñaimoʼã jepi jaikuaaha mbaʼépa la iporãvéva ñandéve g̃uarã. Péro ikatu umi mbaʼe jajeruréva ñane ñemboʼépe ndahaʼéi la okonvenivéva ñandéve. Ñamoĩ chupe ñañemboʼeha peteĩ provlémare ha ñapensáma la solusiónre, péro ikatu hína oñesolusiona porãve ótra fórma. Ha ikatu oĩ umi mbaʼe jajeruréva noiporãiva Ñandejára voluntándi (1 Juan 5:14). Por ehémplo tuakuéra ojerure jepi Jehovápe ifamília osegi hag̃ua oservi chupe. Iporãitereívaicha upéva, péro Jehová ndoovligamoʼãi avavépe oservi hag̃ua chupe. Haʼe oipota enterove, ha ñane familiakuéra avei odesidi ijeheguiete oservitaha chupe (Deut. 10:​12, 13; 30:​19, 20). Upéicharõ umi tuakuéra ojerurekuaa Jehovápe oipytyvõmi hag̃ua chupekuéra og̃uahẽ hag̃ua ifamília korasõme, ha péicha ohayhu hag̃ua Jehovápe ha oiko iñamígoramo (Prov. 22:6; Efes. 6:4). w23.11 21 párr. 5; 23 párr. 12

¿Mbaʼérepa ikatu jaʼe ñakonsoláramo ótrope jahechaukaha jahayhuha chupe? Peteĩ lívro oexplika pe palávra “peñokonsola” oipurúva Pablo heʼiseha ñaĩha peteĩ persóna ykére ñamokyreʼỹ hag̃ua chupe ohasa asyeterei jave. Upéicharõ ñakonsola jave peteĩ ermánope, ñaipytyvõ chupe opuʼã jey hag̃ua ha osegi hag̃ua oservi Jehovápe fiélmente. Ñaporokonsola jave jahechauka hína ñane ermanokuérape jahayhuha chupekuéra (2 Cor. 7:​6, 7, 13). Ñakonsola hag̃ua ótrope, tekotevẽ jaiporiahuvereko chupe. Peteĩ persóna oiporiahuverekóva hapichápe oñehaʼã okonsola chupe ha ojapo álgo oipytyvõ hag̃ua pe ohasa asývape. Upéicharõ, ñaporokonsola hag̃ua tekotevẽ jaiporiahuvereko raẽ ñande rapichápe. Apóstol Pablo oexplika Jehová ombyasyha umi héntepe ha upéva omomýi chupe okonsola hag̃ua chupekuéra. Pablo heʼi Jehová haʼeha ñande “Túa ñanderayhúva ha ñandeporiahuverekóva, ha peteĩ Dios omeʼẽva konsuélo” (2 Cor. 1:3). w23.11 9, 10 párr. 8-10

Entéro Jesús segidór ohasáta heta mbaʼe ijetuʼúva. Jahechamína apóstol Pablo ohasa vaʼekue. Umi ermáno oĩvape Tesalónicape haʼe heʼi vaʼekue: “Roimérõ guare penendive, roʼéma vaʼekue voi peẽme jahasa asy vaʼerãha, ha upéva voi la oiko vaʼekue” (1 Tes. 3:4). Ha umi ermáno Corintoguápe heʼi: ‘Roipota peikuaa ermanokuéra mbaʼéichapa rohasa asy. Ore ropensáma voi ikatuha romano’ (2 Cor. 1:8; 11:​23-27). Koʼág̃a avei entéro kristiáno ikatu ñahaʼarõ jahasataha opaichagua provléma (2 Tim. 3:12). Ikatu oime oĩ ñandepersegíva ñañepyrũ haguére jajerovia Jesúsre ha jajapo haguére haʼe heʼíva. Ñane amigokuéra térã ñane hénte oñembohory ñanderehe ha ñandetrata vai. Térã ñande travahohápe ikatu ñane patrón térã ñane kompañerokuéra ipochy ñanendive ñaneonrrádo haguére entéro mbaʼépe (Heb. 13:18). Ikatu avei umi goviérno oñemoĩ ñane kóntrape japredika haguére. Tahaʼe haʼéva la jahasáva, Pablo heʼi vaʼekue javyʼa vaʼerãha. w23.12 10, 11 párr. 9, 10

Jacob ombohovái vaʼekue heta provléma. Umi itaʼýra Simeón ha Leví tuicha omotĩ kuri ihentekuérape ha Jehovápe. Hiʼarive ou omano Jacóbgui hembireko ohayhuetéva, Raquel, imembykuévo pe segundoha. Kon el tiémpo, Jacob ijeda riréma ovámante Egíptope, pórke hetãme ou peteĩ ñembyahýi guasu (Gén. 35:​16-19; 37:28; 45:​9-11, 28). Ivaive paʼũme la isituasión, Jacob osegi ojerovia Jehováre ha umi ipromesakuérare. Jehová avei ohechauka vaʼekue Jacóbpe oguerohoryha chupe. Por ehémplo, Jehová ovendesi Jacóbpe oreko hag̃ua heta mbaʼe. Ha ñañeimahinamína mbaʼeichaitépa oiméne Jacob oagradese raʼe Ñandejárape ohecha jeýrõ guare Josépe, pe itaʼýra haʼe oimoʼã vaʼekue omanóma hague. Jacob oaguanta kuri entéro umi mbaʼe oreko rupi Jehovápe iñamigoitéramo (Gén. 30:43; 32:​9, 10; 46:​28-30). Ñande avei jarekóramo Jehovápe ñane amigoitéramo ikatúta ñaaguanta opaichagua provléma oñepresentáva ñandéve ñahaʼarõʼỹetére. w23.04 15 párr. 6, 7

Salmo 23 ningo peteĩ purahéi, David omombeʼuhápe oĩha segúro Jehová ohayhuha chupe, ha oñangarekoha hese. Upe Sálmope David omombeʼu Jehová haʼeha iñamigoite ha ohenói voi chupe Ipastór. David oñeñandu vaʼekue segúro Jehová ogia haguére chupe ha odependete vaʼekue hese. Haʼe oikuaa vaʼekue Jehová ohayhutaha chupe káda día oikove aja pukukue. ¿Mbaʼérepa haʼe okonfiaite vaʼekue hese? David oñandu vaʼekue Jehová oñangareko porãha hese, pórke Haʼe siémpre omeʼẽ vaʼekue chupe opa mbaʼe oikotevẽva. Avei David oikuaa vaʼekue Jehová haʼeha iñamígo ha oguerohoryha chupe. Upévare David ndodudái vaʼekue toiko la oikóva amo gotyove, Jehová osegitaha oñangareko hese. David ndoikói vaʼekue ojepyʼapyháre, síno ovyʼa ha oñekontenta la orekóvare (Sal. 16:11). w24.01 29 párr. 12, 13

Opa rire pe segunda gérra mundiál, Jehová siervokuéra opredika pyʼaguapýpe ha lívremente heta paíspe. Upévare ojepredikáma opárupi ha hetáma oĩ la oñepyrũva oikuaa Jehovápe. Koʼag̃aite peve pe Kuérpo Governánte odepende Jesús gíare. Haʼekuéra omeʼẽ jave umi instruksión oipota ojekuaa porã upéva haʼeha la Jehová ha Jesús oipotáva. Haʼekuéra ojevale umi superintendénte de sirkuíto ha umi ansiánore omog̃uahẽ hag̃ua koʼã instruksión umi kongregasionkuérape. Umi ansiáno ohótava yvágape oĩ hína Jesús po deréchape (Apoc. 2:1). Péro jaikuaaháicha, entéro koʼã ansiáno iñimperféktonte avei ha ikatu ojavy oiko haguéicha Moisés, Josué ha umi apóstol rehe (Núm. 20:12; Jos. 9:​14, 15; Rom. 3:23). Upéicharõ jepe jaikuaa porã Jesús ogiaha pe esklávo de konfiánsape ha umi ansiánope. Haʼe osegíta ojapo upéva. Upévare ndaipóri jaduda hag̃ua Jesús ñandegiaha hína koʼã ermáno rupive. w24.02 23, 24 párr. 13, 14

Koʼág̃arupi ñamombaʼeguasu Jehovápe umi mbaʼe jaʼéva rupive jahechaukáramo jahayhu ha jaagradeseha chupe. Japredika jave, ñaipytyvõse la héntepe oñemoag̃ui hag̃ua Jehováre ohayhu hag̃ua avei chupe (Sant. 4:8). Jahechaukaseterei chupekuéra la Biblia rupive umi kualida porã Jehová orekóva. Por ehémplo mbaʼéichapa haʼe oporohayhu, ihústo, iñarandu, ha ipoderóso. Avei ñamombaʼeguasu Jehovápe ha ñambovyʼa chupe jajapóramo opa ikatúva jasegi hag̃ua iñehémplo. Jajapo jave upéicha la hénte ikatu ohechakuaa ñanediferenteha ha oikuaase hikuái mbaʼérepa (Mat. 5:​14-16). Avei jatrata jave hendivekuéra káda día ikatu jareko la oportunida jaexplika hag̃ua chupekuéra mbaʼérepa ñanediferénte. Péicha jajapóvo umi persóna ipyʼaporãva oñemoag̃uiséta katuete Ñandejárare. Jajapóramo koʼã mbaʼe ñamombaʼeguasu hag̃ua Jehovápe katuete ñambovyʼáta chupe (1 Tim. 2:​3, 4). w24.02 10 párr. 7

Oiko hag̃ua pendehegui kristiáno ijerovia mbaretéva, tekotevẽ peaprende umi mbaʼe ideprovéchotava. Péicha oñemeʼẽta peẽme rresponsavilida kongregasiónpe. Avei pekonsegíta pende travahorã ikatu hag̃uáicha peñemantene pendejupe térã pene famíliape, ha pejogueraha porãta ótrondi. Por ehémplo peaprende peskrivi ha peleekuaa hag̃ua. La Biblia heʼi peteĩ kuimbaʼe ovyʼa ha oho porãva hese oleeha Ñandejára Ñeʼẽ ha ojepyʼamongetaha hese káda día (Sal. 1:​1-3). Peleéramo la Biblia káda día peikuaáta mbaʼéichapa Jehová opensa ha upéva penepytyvõta pepensa porã hag̃ua la pejapótavare ha peipurukuaa hag̃ua la Biblia heʼíva (Prov. 1:​3, 4). Umi ermáno ha ermána kongregasionpegua ojerure jepi ajúda umi ermáno ivalévape oporomboʼe ha omeʼẽ hag̃ua konsého oñenohẽva la Bíbliagui. Peẽ peskrivi ha peleekuaárõ ikatúta peprepara umi diskúrso ha komentário ideprovéchotava ermanokuérape. Avei ikatúta peanota umi mbaʼe penepytyvõtava pendejerovia mbareteve hag̃ua ha pemokyreʼỹ hag̃ua ótrope. w23.12 26, 27 párr. 9-11

Oimérõ ñañepyrũ jakyhyje, iporãta jajepyʼamongeta la Jehová ojapótavare Satanás ndaiporivéi vove. Peteĩ aty guasu tres diaguápe, áño 2014-pe, ojehechauka peteĩ demostrasiónpe mbaʼéichapa peteĩ túa oñemongeta ifamíliandi mbaʼéichapa jaikóta pe paraísope oñekambiáramo umi mbaʼe ojeʼéva 2 Timoteo 3:​1-5-pe. Upépe heʼíta: “Pe múndo pyahúpe siémpre ojevyʼaitereíta. Pórke umi hénte ojepyʼapýta ojuehe, omombaʼéta pe añetegua, noñembotuichamoʼãi, iñumíldeta, omombaʼeguasúta Ñandejárape, iñeʼẽrendúta ituakuérape, ijagradesídota, nombotavymoʼãi hapichápe, ohayhuetereíta ihéntepe, oiko porãséta ótrondi, oñeʼẽ porãta ótrore, ojejokokuaáta, ivuénota, ohayhúta umi mbaʼe iporãva, ikatúta ojejerovia hese, oñeñeʼẽkuaáta hendive, nopensamoʼãi haʼe iñimportanteveha ótrogui, ohayhúta Ñandejárape ojapo rangue chupe ogustávante, añetehápe oservíta Ñandejárape, ha esegíkena ejeheʼa koʼãichagua héntere”. ¿Reñemongetámapa ne famíliandi térã ermanokuérandi mbaʼéichapa jaikóta múndo pyahúpe? w24.01 6 párr. 13, 14

¡Javyʼaite jaikuaávo Jehová oguerohoryha ipuévlope! La Biblia heʼi voi: “Jehová oguerohory ipuévlope” (Sal. 149:4). Péro sapyʼánte oĩ umi oñedesanimáva ha oñepyrũva oduda Jehovápa oguerohory hína chupe. Yma oĩma vaʼekue Jehová siervokuéra oñeñandu vaʼekue avei péicha (1 Sam. 1:​6-10; Job 29:​2, 4; Sal. 51:11). La Biblia ohechauka ñaneimperféktoramo jepe, Jehová ikatuha ñandeguerohory. Upearã jajerovia vaʼerã Jesucrístore ha jajevautisa (Juan 3:16). Péicha jahechauka umi hénte renondépe ñañarrepentíma hague ñande pekadokuéragui ha ñaprometéma hague Ñandejárape jajapotaha ivolunta (Hech. 2:38; 3:19). Jehová ovyʼaiterei ñandereheve ohechávo jajapoha koʼã mbaʼe jaiko hag̃ua iñamigoitéramo. Jasegírõ ñakumpli pe promésa jajapo vaʼekue ñañemeʼẽrõ guare chupe, Jehová ñandeguerohorýta ha ñandeguerekóta iñamigoitéramo (Sal. 25:14). w24.03 26 párr. 1, 2

Ñande ikatu jakopia umi disipulokuéra ehémplo jasegívo japredika umi autorida oproivíramo jepe ñandehegui. Ikatu ñaĩ segúro Jehová ñanepytyvõtaha japredika hag̃ua. Upévare jajerurekuaa chupe ñanembopyʼaguasu ha ñanemoarandu hag̃ua. Avei jajerure Jehovápe ñanepytyvõ hag̃ua ñaneprovléma jave. Heta ñande apytépe ohasa asy hína. Ikatu hasy térã oreko peteĩ provléma emosionál, oĩ ihénte manóva, iprovlémava hogapýpe, ojepersegíva ha umícha. Ha koʼã situasión ijetuʼuvéntema oĩ rupi umi pandémia ha gérra. Upévare ñamombeʼúkena Jehovápe ñane korasõite guive mbaʼéichapa ñañeñandu. Jaʼe chupe umi mbaʼe jahasáva ñañeʼẽramoguáicha peteĩ ñane amigoitépe. Ha ani jaduda Jehová ‘katuete ñanepytyvõtaha’ (Sal. 37:​3, 5). Ñañemboʼe meméramo ikatúta ‘ñaaguanta jahasa asy jave’ (Rom. 12:12). Jehová ningo oikuaa porãiterei mbaʼépa ohasa hína isiervokuéra, ha haʼe ohendu umi iñemboʼe “ojerure jave ajúda” (Sal. 145:​18, 19). w23.05 5, 6 párr. 12-15

Jadesidíta jave álgo iñimportánteva, jahecha vaʼerã ‘mbaʼépa hína Jehová oipota jajapo’ ha upéi ñañehaʼãmbaite jajapo upéva (Efes. 5:17). Jaheka jave umi konsého oĩva la Bíbliape jahechauka jaikuaaseha mbaʼépa Ñandejára opensa la jajapótavare. Ha jasegívo umi konsého katuete jadesidi porãvéta. “Pe aña” haʼéva Satanás, oipotaiterei ñanerembiapo heta ko múndope pórke ndoipotái jareko tiémpo jaservi hag̃ua Ñandejárape (1 Juan 5:19). Ñañemeʼẽʼỹre enkuénta ikatu hína jaiko pláta, umi estúdio térã traváho rapykuérintema ha ndajahekavéi mbaʼéichapa ikatu jaservi porãve Jehovápe. Jaikóramo upéicha, jahechaukáta ñapensaha umi hénte ko mundopegua opensaháicha. Añetehápe, umi mbaʼe ndaivaíri katuete, péro ndaikatúi jaiko ñamotenonde umíva. w24.03 24 párr. 16, 17