Agosto

Ko téxto ñanemboʼe mokõi mbaʼe iñimportánteva: 1) Umi ivuénova ikatúnte avei iprovléma ha 2) Jehová ñaneguenohẽkuaa umi situasión vaígui. ¿Péro mbaʼéichapa Jehová ikatu ñaneguenohẽ umi provlémagui? Por ehémplo, haʼe ñanepytyvõ jaasepta hag̃ua oĩtanteha voi la provléma koʼã ára pahápe. Siérto, Jehová opromete ñandéve javyʼataha jaservírõ chupe, péro upéva ndeʼiséi koʼág̃ama voi jaikotaha provlemaʼỹre (Is. 66:14). Haʼe oipota ñañekonsentra pe múndo pyahúre, pórke upépe jaikóta vyʼápe pára siémpre haʼe oipotaháicha (2 Cor. 4:​16-18). Ñahaʼarõ aja pe múndo pyahu, Jehová ñanepytyvõ jasegi hag̃ua jaservi chupe káda día (Lam. 3:​22-24). ¿Mbaʼépa ñaaprende umi ehémplo yma guarégui ha umi oĩvagui ñane tiémpope? Jahecha ikatunteha voi oñepresenta ñandéve umi provléma ñahaʼarõʼỹva. Péro jajeroviáramo Jehováre haʼe núnka nañanderejamoʼãi (Sal. 55:22). w23.04 14, 15 párr. 3, 4

José ha María omoĩ vaʼekue ehémplo porã. Haʼekuéra kyreʼỹme iñeʼẽrendu umi autorida omandávape, ijetuʼúramo jepe chupekuéra sapyʼánte (Luc. 2:​1-6). María hyeguasuetérõ guare, okumplipotaitépema 9 mése, pe goviérno ojerure peteĩ mbaʼe hasýtava chupekuéra ojapo hag̃ua. Pe emperadór rrománo Augusto omanda enterove oho vaʼerãha oñanota ivállepe. Upévare José ha María oho vaʼerã kuri Belénpe, opytáva mas de 150 kilómetro, ha pe tape oreko heta arriváda ha vaháda. Upe viáhe ijetuʼúta, koʼýte Maríape g̃uarã, oiméne ojepyʼapy raʼe hikuái og̃uahẽ porãtapa. ¡Ajépa ijetuʼuetéta kuri María oñepyrũrire hasyete tapére imemby hag̃ua! Haʼekuéra oiméne oñekevranta pe mitãre, pórke haʼe pe Mesías oñepromete vaʼekue. ¿Mbaʼépa ojapóta hikuái? ¿Ikatúpa haʼekuéra nopenáinte pe goviérno omanda vaʼekuére? José ha María oñekevrantárõ jepe, okumpli pe léi. Jehová ovendesi chupekuéra iñeʼẽrendu haguére, María og̃uahẽ porã Belénpe, imemby hesãi ha hiʼarive oipytyvõ hikuái oñekumpli hag̃ua peteĩ profesía (Miq. 5:2). w23.10 8 párr. 9; 9 párr. 11, 12

Heta ermáno opensa haguénte voi okomentataha rreunionhápe ipyʼapererepáma voi. Peteĩ mbaʼe ikatúva ñanepytyvõ ningo haʼe hína jajeprepara porã (Prov. 21:5). Amáske jaikuaa porã pe informasión ojestudiátava, ifasilvéta ñandéve ñamopuʼã hag̃ua ñande po. Ótra kósa ikatúva avei jajapo haʼe ñakomenta mbykymínte (Prov. 15:23; 17:27). Mbykymíramo la ñane komentário menove avei ñandepyʼapererepáta. Ñakomentáramo mbykymi ha ñande própia palávrape, ojekuaáta ñanderehe jajeprepara hague ha ñantendeha pe informasión. Ñamoĩ chupe reĩha peteĩ kongregasión michĩvape ha reñehaʼãmbaite rejapo umi konsého jahecha vaʼekue. Péro lomímonte nenerviosoiterei ha upéicha rupi ikatu ekomenta una térã dos vésente. ¿Mbaʼépa ikatu rejapo péicha jave? Nemanduʼákena Jehová ovaloraha opa mbaʼe rejapóva rekomenta hag̃ua (Luc. 21:​1-4). Péro haʼe ndojeruréi ndehegui ejapo peteĩ mbaʼe ndeforsa rasapátava (Filip. 4:5). Upéicharõ, ekalkula mbaʼe mbaʼépa la nde ikatúva rejapo, eñehaʼãmbaite ehupyty upéva ha ejerure Jehovápe tanembopyʼaguapy. Primerorã ikatu remoĩ la méta ekomenta hag̃ua mbykymínte. w23.04 21 párr. 6-8

Apóstol Pablo heʼi vaʼekue umi kristiáno ojoguaha peteĩ soldádo orekóvape iñarmadúra kompletoite ha oñatende porãva. Oiko jave gérra peteĩ soldádo siémpre oĩ preparádo oñorairõ hag̃ua. Upéicha avei ñaime vaʼerã siémpre preparádo ‘Jehová árape’ g̃uarã. Jerovia ha mborayhúpe ñamoʼã vaʼerã ñande pytiʼa peteĩ soldádo armadúraicha, ha ñamoĩ ñane akãre peteĩ káskoicha pe esperánsa. Peteĩ soldádo omoʼã vaʼerã ipytiʼa oprotehe hag̃ua ikorasõ. Ñande avei jajerovia ha japorohayhúramo japrotehéta umi mbaʼe oĩva ñande pyʼapýpe. Koʼã kualida ñanepytyvõta jaservi hag̃ua Jehovápe ha jasegi hag̃ua Jesús gía. Jajeroviárõ, ndajadudamoʼãi Jehová omyengovia porãtaha ñandéve ñañehaʼãramo jaadora chupe (Heb. 11:6). Jajeroviárõ ñaneñeʼẽrendúta Jesúspe ijetuʼúrõ jepe sapyʼánte. Ñamombaretérõ ñande jerovia ñambohovái porãta umi provléma. Upearã ikatu jahecha mbaʼéichapa umi ermáno osegi ifiél ojepersegi térã orekórõ jepe provléma ekonómiko. Ha pono ñandeplatarayhu, ikatu jahecha mbaʼéichapa ermanokuéra oiko sensillove omotenonde hag̃ua Jehovápe ha ñañehaʼã avei jajapo péicha. w23.06 10 párr. 8, 9

Jajerure Jehovápe jajejokokuaa hag̃ua. Ko kualida ñanepytyvõ jajapo hag̃ua umi mbaʼe porã, koʼýte ijetuʼu jave ñandéve térã nañanekyreʼỹi jave. Ñanemanduʼákena pe jejokokuaa haʼeha peteĩva umi mbaʼe porã oúva Jehová espíritugui. Upévare jajerurékena Jehovápe ijespíritu sánto ikatu hag̃uáicha jajejokokuaa (Luc. 11:13; Gál. 5:​22, 23). Ani ñahaʼarõ entéro mbaʼe oĩ porã, osino núnka nañakumplimoʼãi ñane méta. Ko múndope siémpre oĩta álgo ijetuʼúva jahasáva. Avése ikatu nañanekyreʼỹi jahechávo ijetuʼutaha jahupyty ñane méta. Oikóramo nderehe upéva, ¿mbaʼérepa nereñehaʼãi michĩ mimi rehupyty rehóvo ne méta? Por ehémplo oiméramo erekose peteĩ kualida pyahu, ¿mbaʼérepa nereñepyrũi rehechauka upe kualida umi mbaʼe michĩvape? Térã oimérõ releese kompletoite la Biblia, ¿mbaʼérepa nereñepyrũi elee mbyky mimi káda día? w23.05 29 párr. 11-13

Koʼã ára pahápe Jehová ojevale iñorganisasiónre osegi hag̃ua ñanemboʼe la Biblia heʼíva. Péicha ñande ikatu ñakontinua jaguata pe ‘Tape Sagrádore’ (Is. 35:8; 48:17; 60:17). Ikatu jaʼe peteĩ persóna oñepyrũvo ostudia la Biblia orekoha la oportunida oguatávo pe ‘Tape Sagrádore’. Oĩ umi ndohopukúiva pórke ojei pe tapégui, péro ótro katu ojedesidi voi nosẽmoʼãiha pe tapégui og̃uahẽ meve pe lugár ohohápe. ¿Péro moõpa ñandegueraha ko tape? Umi orekóvape la esperánsa oikóvo yvágape, pe “Tape Sagrádo” ogueraha chupekuéra “Ñandejára paraísope” yvágape (Apoc. 2:7). Umi oikótavape g̃uarã ko yvy ape ári ko tape ogueraha chupekuéra opa peve Cristo goviérno de 1.000 áño. Upérõ g̃uarã enterove persóna perféktotama. Oimérõ nde reguata hína ko tapére aníkena remaña nde rapykue gotyo, síno esegi tenonde gotyo. w23.05 17 párr. 15, 16; 19 párr. 17, 18

Repensávo entéro mbaʼe Jehová ojapómavare nderehehápe reñemeʼẽsetereíta voi chupe (Sal. 116:​12-14). La Biblia heʼi voi “entéro mbaʼe porã ha rregálo iporãva” ouha Jehovágui (Sant. 1:17). Jehová omeʼẽ vaʼekue Itaʼýra Jesucristo nderehehápe. ¡Ndaipóri rregálo iporãvéva upévagui! Epensamíntena: Upe sakrifísio rupive koʼág̃a ikatúma reñamiga Jehováre. Upéicha rupínte avei Jehová omeʼẽ ndéve koʼág̃a pe esperánsa reiko hag̃ua pára siémpre (1 Juan 4:​9, 10). Ndaipóri ótro peichaite peve nderayhúva, ha ndaiporimoʼãi avei omeʼẽva ndéve hetaite mbaʼe ndaijojaháiva. Reagradesetereígui koʼã mbaʼére, nde voi reñemeʼẽséta Jehovápe (Deut. 16:17; 2 Cor. 5:15). w24.03 5 párr. 8

Jahechávo mbaʼeichaitépa koʼág̃arupi la hénte hekovai ñañeñandu Lot oñeñandu haguéicha. Haʼe oikuaa vaʼekue ñande Ru yvagapeguápe ndogustaieteha ojejapo mbaʼe vai, upévare “oñekevrantaiterei vaʼekue umi hénte aña notĩri haguére hembiapo vai hag̃ua” (2 Ped. 2:​7, 8). Lot ohayhu ha orrespeta rupi Jehovápe ndaijaʼéi vaʼekue umi mbaʼe vai ojapóvare umi hénte itiempopegua. Ñande kásope upéicha avei. Ñande jerére oiko hetaiterei hénte nomombaʼéiva térã ndorrespetaietéva Jehová léi. Upéicharõ jepe ñande ikatu ñanderekopotĩ ñañehaʼãramo jahayhu Jehovápe ha jarrespeta chupe. Jehová ñanepytyvõ jajapo hag̃ua upéva pe lívro de Proverbios rupive. Enterove tahaʼe kuña, kuimbaʼe, imitãva térã ijedáva ikatu oñevenefisia umi konsého oĩvagui upépe. Jarrespetárõ Jehovápe ñañatendéta ani hag̃ua ñanejúnta vai. w23.06 20 párr. 1, 2; 21 párr. 5

Ikatu oime ne hentekuéra oñemoĩ mbarete nderehe térã redesidi reiko sensillovetaha remotenonde hag̃ua Ñandejára Rréino (Mat. 6:33). Oimérõ upéicha, ikatu reĩ segúro Jehová orekoha enkuénta entéro umi mbaʼe rejapómava hesehápe (Heb. 6:10). Katuete rehecháma siertoha Jesús heʼi vaʼekue: “Umi cherehehápe, ha pe notísia porã rehehápe oheja vaʼekue hóga, iñermáno ha iñermanakuéra, isy ha itúa, itaʼyrakuérape térã ijyvy, umívape ojepersegíta, péro ko tiémpope voi oñemeʼẽta 100 vése mas upe oheja vaʼekuégui, tahaʼe óga, ermáno, ermána, sy, taʼyrakuéra ha yvy. Ha amo gotyove katu ohupytýta jeikove opaveʼỹva” (Mar. 10:​29, 30). Umi vendisión jarresivíva tuichaiteve oimeraẽ sakrifísio ikatúvagui jajapo (Sal. 37:4). w24.03 9 párr. 5

Umi kristiáno Judeaguáre ohasárõ guare peteĩ ñembyahýi guasu, umi ermáno Antioquiagua “odesidi káda uno oguerahakataha la ikatumíva oipytyvõ hag̃ua umi ermáno oikóvape Judéape” (Hech. 11:​27-30). Umi ermáno ohasáva pe ñembyahýi guasu oikóramo jepe mombyry, upéva ndojokói umi Antioquiaguápe oipytyvõ hag̃ua iñermanokuérape (1 Juan 3:​17, 18). Ñande avei ikatu jahechauka jaiporiahuverekoha ñane ermanokuérape. Jaikuaa jave ohasaha hikuái peteĩ desástre térã ótra situasión ijetuʼúva. Ñande pyaʼe voi jakuʼe: Ikatu jaʼe umi ansiánope ñaimeha ñaipytyvõ hag̃uáicha tekotevẽhápe, ñameʼẽ ñane kontrivusión térã ñañemboʼe umi ohasa asývare. Ikatu avei ifálta ñaipytyvõ ñane ermanokuérape ohupyty hag̃ua umi mbaʼe oikotevẽva. Ñande jaipota Jesús ou vove oporohusga hag̃ua ñandetopa ñaipytyvõha ñane ermanokuérape, ha teʼi ñandéve péicha: “Peju ha perresivi umi vendisión oguerúva Ñandejára Rréino” (Mat. 25:​34-40). w23.07 4 párr. 9, 10; 6 párr. 12

Jesús osegi Itúa ehémplo ha noñemohatãi haʼe heʼívapente. Péva ojekuaa vaʼekue hese okumplírõ guare iñasignasión ko yvy ape ári. Jesúspe ‘oñembou vaʼekue oipytyvõ hag̃ua umi Israelguápente, ojoguáva umi ovecha okañývape’. Péro peteĩ jey peteĩ kuñakarai ndahaʼéiva israelita ojerure asy chupe omonguera hag̃ua ‘imembykuña osufrietereívape pórke oñendemonia’. Jesús oiporiahuvereko upe kuñáme, upévare ojapo la ojeruréva chupe ha omonguera imembykuñáme (Mat. 15:​21-28). Jahechamína ótro ehémplo. Oñepyrũmíre iñasignasión, Jesús heʼi vaʼekue: ‘Peteĩ persóna onegáramo chekuaaha, che avei anegáta aikuaaha chupe’ (Mat. 10:33). Ñanemanduʼa Pedro onega hague chupe 3 vése voi, péro Jesús nonegái chupe upe rire. Upérõ Jesús oreko kuri enkuénta Pedro siémpre iñeʼẽrendu hague ha ombyasyeterei hague la ojapóva. Upéicha rupi oikove jey rire, Jesús ojaparese chupe ha oasegura Pédrope operdona ha ohayhuha gueteri chupe (Luc. 24:​33, 34). Jehová ha Jesús noñemohatãi haʼekuéra heʼívapente. Jehová oipota avei ñande jasegi iñehemplokuéra. w23.07 21 párr. 6, 7

¿Mbaʼépa ikatu jaʼe ótrope oguerovia hag̃ua ko yvýgui oikotaha peteĩ paraíso? Primero, Jehová voi la ojapóva ko promésa. Lívro de Apocalipsis heʼi: “Ñandejára oguapýva pe trónope heʼi: ‘Ambopyahu hína entéro mbaʼe’”. Haʼe ningo iñarandu, ipoderóso ha hiʼarive oipotaiterei ko promésa oñekumpli. Segundo, Jehová ni michĩmi ndodudái oikotaha la heʼíma vaʼekue, upévare oñeʼẽ oikopamarõguáicha voi. Haʼe heʼi: ‘Koʼã ñeʼẽ ningo siertoite ha umi hénte ikatu ojerovia hese. ¡Umi mbaʼe oikopáma!’. Tercero, Jehová oñepyrũma guive ojapo álgo, omohuʼã katuete. Upévare haʼe heʼi: “Che hína Alfa ha Omega” (Apoc. 21:6). Jehová ohechaukáta Satanás ijapuha ha ni mbaʼevéicharõ ndaikatuiha ojoko chupe okumpli hag̃ua ivolunta. Upéicharõ oĩramo heʼíva ndéve: “Iporãiterei ningo añete, péro ijetuʼu la oiko hag̃ua”, ikatu relee ha reexplika Apocalipsis 21:​5, 6. Jahechaukákena umi héntepe mbaʼéichapa Jehová ogarantisa okumplitaha ipromésa. Haʼete voi ofirmáva hese ikatu hag̃uáicha jajerovia ko promésa porãitére (Is. 65:16). w23.11 7 párr. 18, 19

Jehová ojapo ko promésa Abrahánpe orekórõ guare 75 áño, péro haʼe ndohechái vaʼekue oñekumplipaitévo upe promésa. Abrahán ohasa rire pe Rrío Éufrates ohaʼarõ jey vaʼekue 25 áño ohecha hag̃ua peteĩ mbaʼe ijojahaʼỹva: Onase itaʼýra Isaac. Ha 60 áño haguépe onase umi iniéto Esaú ha Jacob (Heb. 6:15). Péro Abrahán núnka ndohechái vaʼekue ifamiliarégui oikóvo peteĩ nasión tuichaitereíva ha ojagarráva pe Tiérra Prometída. Upéicharõ jepe, Abrahán oreko vaʼekue peteĩ amista imbaretéva Jehovándi (Sant. 2:23). Abrahán orresusita rire ovyʼaitereíta oikuaávo haʼe ojerovia ha ipasiénsia rupi oñevendesi hague entéro oĩvape ko yvy ape ári (Gén. 22:18). ¿Mbaʼépa ñaaprende? Ikatu ñande ndajahechái koʼag̃aite voi oñekumplipávo umi promésa Jehová ojapo vaʼekue. Péro ñanepasiénsiaramo Abrahán ojapo haguéicha, ñaĩ segúro Jehová ñanevendesitaha koʼág̃ama voi ha koʼytevéntema pe múndo pyahúpe (Mar. 10:​29, 30). w23.08 24 párr. 14

Rréi Uzías imitãrõ guare iñumílde vaʼekue. Chupe oñehekomboʼe vaʼekue “okyhyje ha orrespeta hag̃ua Ñandejára teépe”. Jehová heta tiémpore ovendesi chupe ha upéi omano orekópe 68 áño (2 Crón. 26:​1-4). Uzías ohundi heta enemígo oñemoĩ vaʼekuépe ipuévlo kóntrape, ha ojapo la tekotevẽva guive Jerusalén isegúro hag̃ua (2 Crón. 26:​6-15). Oiméne ovyʼaite raʼe Uzías la ojapóvare Ñandejára oipytyvõ rupi chupe (Ecl. 3:​12, 13). Rréi Uzías ojepokuaa vaʼekue omanda ótrope la ojapo vaʼerã. Ikatu oime upévare kon el tiémpo ou opensa haʼe ikatuha ojapo la ojaposéva guive. Peteĩ jey oho oike Jehová témplope ha oñemombaʼeguasúgui ohapyse insiénso pe altárpe. Péro upéva noñepermitíri kuri ojapo umi rréipe (2 Crón. 26:​16-18). Pe saserdóte Azarías oñehaʼã okorrehi chupe péro Uzías ipochyeterei. Péicha Uzías naiñeʼẽrenduvéi Jehovápe, ha haʼe okastiga hag̃ua chupe onohẽmba hese lépra (2 Crón. 26:​19-21). ¡Idiferentete vaʼerãmoʼã Uzías rekove osegírire iñumílde! w23.09 10 párr. 9, 10

Apóstol Pédrope oñeunhi rire jepe osegi vaʼerã kuri olucha idevilida kóntrape. Áño 36-pe Ñandejára omondo Pédrope peteĩ kuimbaʼe ndahaʼéiva judío rendápe, hérava Cornelio. Upérõ Jehová ounhi vaʼekue Cornéliope espíritu sánto rupive. Upéva ohechauka porã “Ñandejára otrataha enterovépe peteĩchante” ha umi ndahaʼéiva judío ikatuha oĩ avei pe kongregasiónpe (Hech. 10:​34, 44, 45). Upe rire Pedro naiprovlémai okaru hag̃ua umi ndahaʼéivandi judío, upéva haʼe ni núnka ndojapomoʼãi kuri anteve. Péro oĩ vaʼekue umi kristiáno judío opensáva peteĩ judío ndokarúi vaʼerãha umi ótro paisguándi. Algúno koʼãva apytégui ohórõ guare Antioquíape, Pedro ndokaruvéi umi kristiáno ndahaʼéivandi judío. Oiméne haʼe okyhyje raʼe umi kristiáno judío ipochýrõ g̃uarã hendive. Apóstol Pablo ohechakuaárõ guare Pedro hovamokõiha, okorrehi chupe enterove renondépe (Gál. 2:​13, 14). Péro Pedro noñentregái vaʼekue ojavýramo jepe. w23.09 22 párr. 8

Pejepyʼamongeta ha penesinsérokena pehecha hag̃ua mbaʼépepa tekotevẽ pemehora. Ijetuʼúrõ peẽme álgo, ani peñentrega. “Ñande Ruvicha imbaʼeporã” ha haʼe ñanepytyvõta ñamehora hag̃ua (1 Ped. 2:3). Apóstol Pedro heʼi: ‘Ñandejára omohuʼãta pene entrenamiénto. Haʼe penemombaretéta’. Ñepyrũrã Pedro opensa vaʼekue nomereseiha ni oĩ Jesús ypýpe (Luc. 5:8). Péro Jehová ha Jesús mborayhúpe oipytyvõ rupi chupe, Pedro osegi vaʼekue omoirũ Crístope. Upévare Jehová oheja vaʼekue Pédrope oike “ñande Ruvicha ha Salvadór Jesucristo Rréino etérnope” (2 Ped. 1:11). ¡Tuichaite rregálo oñemeʼẽ chupe! Ñande avei nañañentregáirõ ha jahejáramo Jehová ñanentrena, haʼe omeʼẽta ñandéve pe vída etérna. Péicha ‘vyʼápe jarresivíta pe salvasión jajerovia rupi’ (1 Ped. 1:9). w23.09 31 párr. 16, 17

Pe tavernákulo oreko vaʼekue peteĩ korapy, haʼéva peteĩ lugár aviérto oñemongoráva télape, umi saserdóte okumpli vaʼekue itraváho upépe. Pe korapýpe oĩ vaʼekue pe altár de kóvre ojehapyha ofrénda ha avei pe palangána guasu de kóvre. Umi saserdóte oipuru vaʼekue pe palangána oñemopotĩ hag̃ua oñepyrũ mboyve itraváho sagrádo (Éx. 30:​17-20; 40:​6-8). Umi unhído oĩva gueteri ko yvy ape ári oservi fiélmente pe korapy hyepypeguápe oĩva pe témplo espirituálpe. Pe palangána guasu orekóva y omomanduʼa umi unhídope álgo iñimportántevare ha entéro kristiáno oreko vaʼerã avei enkuénta. ¿Mbaʼépa hína? Tekotevẽha jasegi ñanderekopotĩ ha jaadora Jehovápe haʼe oipotahaichaite. ¿Péro moõpa oservi Jehovápe pe “aty guasu”? Apóstol Juan ohecha vaʼekue chupekuéra ‘oñemboʼývo pe tróno renondépe’. Upéva hína ko yvy ape ári, pe témplo korapy okapeguápe, upépe haʼekuéra oservi Ñandejárape “ára ha pyhare itémplope” (Apoc. 7:​9, 13-15). ¡Ajépa javyʼaite Jehová omeʼẽ haguére ñandéve pe oportunida porãite jaadorávo chupe itémplo espirituál tuichaitévape! w23.10 28, 29 párr. 15, 16

Jehová omeʼẽ ñandéve umi ansiáno ñanemombarete ha ñanemokyreʼỹ hag̃ua (Is. 32:​1, 2). Upévare jajepyʼapy jave, ñamombeʼúkena umi ansiánope. Ha haʼekuéra ñanepytyvõse jave, jaaseptákena vyʼápe pe ajúda. Jehová ikatu hína ojevale hesekuéra ñanemombarete hag̃ua. Pe esperánsa jatopáva la Bíbliape jaikotaha pára siémpre, tahaʼe yvágape térã ko yvy ape ári, ñanemombarete ha omeʼẽ ñandéve podér (Rom. 4:​3, 18, 19). Ñane esperánsa ñanepytyvõ ñaaguanta hag̃ua umi situasión ijetuʼúva, japredika hag̃ua umi notísia porã ha ñakumpli hag̃ua umi asignasión jarekóva kongregasiónpe (1 Tes. 1:3). Upe esperánsa omombarete vaʼekue avei apóstol Páblope. Haʼe omombeʼu vaʼekue umi provléma ‘ojeliapaha hese’, ‘sapyʼánte ndoikuaaiha mbaʼépa ojapóta’, ‘oĩha opersegíva chupe’ ha ‘oipetéva chupe yvýre’. Avése ‘ojapeligra vaʼekue voi ha haimete mete omano’ (2 Cor. 4:​8-10). Apóstol Pablo imbarete jey vaʼekue opensa meme rupi pe esperánsa orekóvare: Ikatutaha oikove pára siémpre yvágape (2 Cor. 4:​16-18). Pablo ojepyʼamongeta rupi ko esperánsa rehe “ipyahuve ohóvo káda día”. w23.10 15, 16 párr. 14-17

Ñañemboʼe jave, ñañeporandu vaʼerã: “¿Koʼág̃apa haʼe Jehová tiémpo omeʼẽ hag̃ua chéve la ajeruréva?”. Ikatu ensegídama jaipota oñekontesta la ñane ñemboʼe, péro Jehová oikuaa mbaʼe moméntopepa opyta porãve (Heb. 4:16). Jehová nokontestáirõ ensegída, ikatu ñapensa haʼe nomeʼẽseiha ñandéve la jajeruréva chupe. Péro la irrespuésta ikatu hína: “Koʼag̃aitérõ ndaikatumoʼãi gueteri”. Por ehémplo, peteĩ ermáno imitãva hasykatúva, ikatu ojerure Jehovápe omonguera hag̃ua chupe, péro ndoikói upéva. Jehová omonguerárire chupe peteĩ milágro rupive, Satanás ikatu heʼi pe ermáno osegiha oservi Jehovápe omonguera rupínte chupe (Job 1:​9-11; 2:4). Avei Jehová omoĩma pe tiémpo oipeʼatahápe opaichagua mbaʼasy (Is. 33:24; Apoc. 21:​3, 4). Ha og̃uahẽ mboyve upe tiémpo ndaikatúi ñahaʼarõ Jehová ojapo peteĩ milágro ñanemonguera hag̃ua. Upévare pe ermáno ikatu ojerure Jehovápe tomombarete ha tombopyʼaguapy chupe ikatu hag̃uáicha ogueropuʼaka imbaʼasy ha osegi oservi chupe fiélmente. w23.11 23 párr. 13

Sansón tuicha ojavýramo jepe, haʼe noñentregái. Haʼe oheka jey vaʼekue la oportunida oñorairõ hag̃ua umi filisteo kóntrape, ha péicha okumpli Jehová volunta (Juec. 16:​28-30). Sansón oñemboʼe asy vaʼekue Jehovápe ha heʼi chupe: “Epermitimína chéve tañevenga umi filistéore”. Ñandejára okontesta vaʼekue chupe iñemboʼe ha peteĩ milágro rupive omombarete jey Sansónpe. Ko vuéltape Sansón ojuka hetave filistéope anteve guarégui. Sansón heta ohasa asy vaʼekue odesidi vai haguére, péro lomímonte oñehaʼã jey ojapo Jehová volunta. ¿Mbaʼépa ñaaprende? Jajavýrõ ha tekotevẽrõ jepe jajekorrehi térã japerde peteĩ priviléhio, aníkena ñañentrega. Ñanemanduʼákena Jehová oĩha ñaneperdona hag̃uáicha (Sal. 103:​8, 9). Jajavýramo jepe Jehová ikatu omeʼẽ ñandéve pe fuérsa ñaikotevẽva ñakumpli hag̃ua ivolunta, ojapo haguéicha Sansón rehe. w23.09 6 párr. 15, 16

Jehová ñandeguerohorýta ñaaguantakuaáramo. Upéva ndeʼiséi haʼe ovyʼaha jahasa asy térã ñaneprovléma heta jave, síno ovyʼa ñaaguanta haguére fiélmente. ¡Ñandepyʼarory jaikuaávo ñane aguánte ombovyʼaha Jehovápe! (Sal. 5:12). Ñanemanduʼa Abrahán oaguanta hague heta mbaʼe ijetuʼúva ha Jehová oguerohory hague chupe upévare. Ñandejára heʼi vaʼekue voi hese haʼeha iñamígo ha ihustoha (Gén. 15:6; Rom. 4:​13, 22). Ñande kásope avei, Ñandejára ñandeguerohory hag̃ua nodependéi jajapópa heta mbaʼe iservísiope térã mbaʼe priviléhiopa jareko. Haʼe ovyʼa ñandereheve jaservíma guive chupe fiélmente jahasáramo jepe heta provléma. Ñanemitã térã ñandeedáramo, tahaʼe haʼéva ñane situasión térã pe kapasida jarekóva, ikatu ñaneaguánte. ¿Jahasápa koʼag̃aite peteĩ situasión ijetuʼúva tekotevẽhápe ñaneaguánte? Oimérõ upéicha, ñanemanduʼáke ñambovyʼaha hína Jehovápe. Jaikuaa rupi Jehová ñandeguerohoryha, jajeroviave rei ñane esperánsare. w23.12 11 párr. 13, 14

Tekotevẽterei umi ermáno oaprende oñemongetakuaa hag̃ua ótrondi. Upéva heʼise oporohendukuaa vaʼerãha ha ontende vaʼerãha ótro opensáva ha oñandúva (Prov. 20:5). Peteĩ ermáno opillakuaa vaʼerã mbaʼéichapa oñeñandu peteĩ persóna oñeʼẽ lájare, hováre ha ihéstore. Koʼã mbaʼe peaprendéta sólamente pehasárõ tiémpo la héntendi. Peipuruetereírõ umi aparáto elektróniko upéi ijetuʼuvéta peẽme peñemongeta hag̃ua en persóna pende rapichándi. Upévare pehekákena oportunida peñemongeta hag̃ua pende rapichándi peipuruʼỹre umi aparáto elektróniko (2 Juan 12). Avei peteĩ kuimbaʼe ijerovia mbaretéva oñemantenekuaa vaʼerã ijupe ha ifamíliape (1 Tim. 5:8). Iñimportánte peaprende pejapokuaa hag̃ua álgo petopa hag̃ua traváho (Hech. 18:​2, 3; 20:34; Efes. 4:28). Pembaʼapo jejopýkena ha petermina umi traváho pemoñepyrũva. Umi hénte katuete ohechakuaáta upéva ha opensa porãta penderehe. Pendeguáporõ ifasilvéta peẽme pekonsegi hag̃ua pende travahorã ha ndapeperdereimoʼãi pende traváho. w23.12 27 párr. 12, 13

¿Mbaʼépa heʼise la Bíbliape oñeñeʼẽ jave ‘Jehová árare’? Upéva hína pe tiémpo Ñandejára ohunditahápe iñenemigokuérape ha osalvatahápe ipuévlope. Yma Jehová ojapóma vaʼekue voi upéva (Is. 13:​1, 6; Ezeq. 13:5; Sof. 1:8). “Jehová ára” oñepyrũta umi governánte ohundi vove Babilonia Guasu ha opáta Armagedónpe. Jajesalva hag̃ua jajeprepara vaʼerã koʼág̃ama voi upe árape g̃uarã. Jesús heʼi vaʼekue tekotevẽha ‘siémpre ñaime preparádo’ pe ‘jehasa asy guasúpe’ g̃uarã. Upéicharõ ndahaʼéi una vénte jajapo vaʼerã upéva, síno kontinuadoite (Luc. 12:40; Mat. 24:21). Oskrivírõ guare 1 Tesalonicenses, apóstol Pablo oipuru unos kuánto ehémplo omboʼe hag̃ua umi kristiánope mbaʼéichapa ojeprepara vaʼerã ‘Jehová árape’ g̃uarã. Upérõ haʼe oikuaa ofaltaha gueteri og̃uahẽ hag̃ua “Jehová ára” (2 Tes. 2:​1-3). Upéicharõ jepe, haʼe heʼi vaʼekue umi kristiánope iñimportanteha ojeprepara ku “Jehová ára” outarõguáicha al día sigiénte. Ñande avei ikatu jasegi upe konsého. w23.06 8 párr. 1, 2

Áño 1978-pe oñemopuʼã peteĩ edifísio ijyvatetereíva Tokio, Japónpe. Umi hénte oñeporandu ko edifísiopa oaguantáta umi terremóto pyʼỹi oikóva pe siudápe. ¿Mbaʼéichapa ojapo raʼe umi inheniéro ko edifísio pono hoʼa? Haʼekuéra omopuʼã mbarete porã ko edifísio, péro ikatu hag̃uáicha ojahustaʼimi oiko jave umi terremóto. Ñande kristianokuéra jajogua upe edifísiope. ¿Mbaʼérepa? Entéro kristiáno tekotevẽ jajepytaso mbarete, péro ndovaléi ñañemohatã ñande jaʼévapente síno jajahustaʼimi jepi. ‘Ndajahejái mbaʼeve ñanemomýi ñande jeroviágui’ ha jajedesidi siémpre ñaneñeʼẽrendutaha Jehová léipe. Ñande ‘ñanekyreʼỹ ñaneñeʼẽrendu hag̃ua’ ha ndajajapói mbaʼeve oapeligrátava ñane amista Jehovándi. Péro avei ‘nañañemohatãi ñande jaʼévapente’, síno jajahustaʼimi ikatu jave ha tekotevẽrõ (Sant. 3:17). Peteĩ kristiáno oñehaʼãva ijekilivrádo ndoikói ijestriktoiterei ni noimportairõguáicha chupe mbaʼeve. w23.07 14 párr. 1, 2

Jesús oñemoĩ mbarete vaʼekue Satanás kóntrape, pórke haʼe ojopy chupe opeka hag̃ua ha heʼi chupe diréktamente anivéma hag̃ua iñeʼẽrendu Ñandejárape (Mat. 4:​1-11). Satanás oñehaʼãmbaite vaʼekue ombopeka hag̃ua Jesúspe pono opaga pe rreskáte. Jesús oservírõ guare Jehovápe ko yvy ape ári, ombohovái hetave mbaʼe ijetuʼúva. Iñenemigokuéra opersegi chupe ha oñehaʼã voi ojuka chupe (Luc. 4:​28, 29; 13:31). Isegidorkuéra iñimperfékto ha ojavy vaʼekue, ha upéva oiméne ijetuʼu vaʼekue chupe (Mar. 9:​33, 34). Ojehusgárõ guare, heta ojetortura chupe ha oñembohory hese la hénte. Upéi ojejuka chupe peteĩ mbaʼe vai apoháicha ha hasyveháicha (Heb. 12:​1-3). Omano potaitérõ guare pe yvyráre, haʼe añoite oaguanta vaʼerã pe sufrimiénto oproteheʼỹre chupe Jehová (Mat. 27:46). Jahechaháicha, Jesús tuichaiterei osufri vaʼekue opaga hag̃ua pe rreskáte. Ñapensávo umi mbaʼe Jesús ohasa vaʼekuére ñanderehehápe, jahayhuve chupe ñande pyʼaite guive. w24.01 10, 11 párr. 7-9

Ñanepasiénsiarõ jajogueraha porãta ñande rapichakuérandi. Por ehémplo jajapysaka porãta oĩ jave oñeʼẽva (Sant. 1:19). Avei ñanepytyvõta jaiko hag̃ua pyʼaguapýpe ñande rapichakuérandi, ha ndajaikomoʼãi ñarreaksiona pyaʼeterei oĩ jave nañandetrataporãiva térã jajejopy vai jave. Avei nañandepochyreimoʼãi oĩrõ ñanemoñeñandu vaíva. Jaiko rangue jajedeskita ‘jasegíta ñañoaguanta ha ñañoperdona ñande pyʼaite guive’ (Col. 3:​12, 13). Ñanepasiénsiaramo ñanepytyvõta jadesidi porãve hag̃ua. Jaiko rangue ñandepyʼa apurádo ñañemotiémpota ñainvestiga hag̃ua mbaʼépa la iporãvétava jadesidi káda situasiónpe. Ñamoĩ chupe jahekaha hína ñande travahorã, nañanepasiénsiairõ ikatu jajagarra pe primeroite ojeofreséva. Péro ñanepasiénsiaramo jakalkula porãta mbaʼéichapa oafektáta ñane famíliape ha ñane amista Jehovándi. Ñanepasiénsiaramo ñanepytyvõta ani hag̃ua jadesidi vai. w23.08 22 párr. 8, 9

Ikatu sapyʼánte reñedesanima pórke resegímante vaʼerã regerrea ani hag̃ua ipuʼaka nderehe umi mbaʼe ndestiráva. Péro nemanduʼárõ la repromete vaʼekuére Jehovápe reñemeʼẽrõ guare chupe, katuete nemombaretéta rerrechasa hag̃ua umi tentasión. ¿Mbaʼérepa jaʼe upéva? Reñemeʼẽvo Jehovápe reñembyesaráima ndejehegui. Upéva heʼise redesidimaha remboyke umi mbaʼe ndegustáva térã rehupytyséva oimérõ umíva ndogustamoʼãi Jehovápe (Mat. 16:24). Upéicha rupi, oñepresenta jave peteĩ tentasión natekotevẽmoʼãi repensa puku reikuaa hag̃ua mbaʼépa rejapóta. Reñemeʼẽma rupi Jehovápe edesidíma ndefieltaha chupe, ni ndohasamoʼãi ne akãrupi ejapo ótra kósa pórke rembovyʼase Jehovápe. Péicha rejoguáta Jóbpe, haʼe ohasa vaʼekue heta mbaʼe vai ha upéicharõ jepe heʼi vaʼekue: “Amano meve asegíta cheñeʼẽrendu” (Job 27:5). w24.03 9 párr. 6, 7

“Ñandejára oporohayhúva” oĩ hína ñande ykére (2 Cor. 13:11). Haʼe oñeinteresa káda únore. Upévare ñaimekuaa segúro ‘haʼe oporohayhu ha ndofallaiha avavéndi’ (Sal. 32:10). Amáske ñapensa mbaʼeichaitépa haʼe ñanderayhu, jahechakuaavéta haʼe ojepyʼapyha ñanderehe ha ñañemoag̃uivéta hese. Ikatu ñañemboʼe Jehovápe ñande pyʼaite guive, ha jaʼe chupe jaipotaitereiha haʼe ñanderayhu. Ikatu ñamombeʼu chupe umi mbaʼe ñanekevrantáva, pórke jaikuaa haʼe ontendeha la ñane situasión ha ñanepytyvõsetereiha (Sal. 145:19). Roʼy jave igustoiterei ñañemboja pe tatáre jajepeʼe hag̃ua, upéicha avei igustoiterei ñañemoag̃ui Jehováre, pórke haʼe ñanderayhúgui ñanekonsola jahasa asy jave. Upévare jahejákena Jehovápe tohechauka ñandéve ñanderayhuha. Upéva ñanekonsola ha ñanembopyʼaguapýta katuete. Ha hiʼãite ningo enterove jaʼe: “Che ahayhu Jehovápe” (Sal. 116:1). w24.01 31 párr. 19, 20

Jesús ndahaʼéi omombeʼúnte vaʼekue la héntepe Ñandejára heraha Jehová, upéva umi judío oikuaáma vaʼekue voi. Upéva rangue Jesús ‘oikuaauka vaʼekue chupekuéra mávapa Ñandejára’ (Juan 1:​17, 18). Por ehémplo pe Escrituras Hebreas heʼi vaʼekue Jehováre oporoporiahuvereko ha oporombyasyha (Éx. 34:​5-7). Péro Jesús omyesakã porãve vaʼekue upéva omombeʼúvo pe ehémplo oñeʼẽva pe taʼýra ofalla vaʼekuére. Pe túa ohechávo la itaʼýra oñarrepenti vaʼekue ouha, odipara ohug̃uaitĩ chupe oĩramo jepe ‘mombyry gueteri’, ha og̃uahẽvo hendápe oañuã ha operdona chupe ipyʼaite guive. Jaleévo upéva jahechakuaa mbaʼeichaitépa Jehová oporombyasy ha oporoporiahuvereko (Luc. 15:​11-32). Jahechaháicha Jesús oipytyvõ vaʼekue la héntepe oikuaa porãve hag̃ua Jehovápe. w24.02 10 párr. 8, 9

Jehová ombopiroʼy ha okonsola umi ohasa asývape. ¿Mbaʼéichapa ikatu jasegi iñehémplo? Ikatu ñañehaʼã jareko umi kualida ñanepytyvõtava jaiporiahuvereko ha ñakonsola hag̃ua. ¿Mbaʼe mbaʼépa hína umi kualida? ¿Mbaʼépa ñanepytyvõta jasegi hag̃ua jahayhu ñane ermanokuérape ha ñakonsola chupekuéra? (1 Tes. 4:18). Upearã tekotevẽ ñañehaʼã jareko unas kuánta kualida iporãva. Por ehémplo ñanembaʼeporã ha jajoayhu oñoermánoicha (Col. 3:12; 1 Ped. 3:8). ¿Mbaʼéichapa koʼã kualida ñanepytyvõta? Jaiporiahuvereko jave ñande rapichápe ha sinséramente jajepyʼapýrõ hesekuéra ñande pyʼaite guive, ñakonsolaséta umi ohasa asývape. Jesús heʼi vaʼekue voi: “Umi mbaʼe omyenyhẽva ñane korasõ osẽ ñande jurúrupi. Pe persóna ivuénova oñeʼẽ iporãvare, pórke ikorasõ henyhẽ mbaʼe porãgui” (Mat. 12:​34, 35). Ñakonsola jave ñane ermanokuéra ohasa asývape, jahechauka hína jahayhuha chupekuéra. w23.11 10 párr. 10, 11

Ñantendesérõ umi profesía bíblica tekotevẽ jajerure ajúda. Epensamína reviahaha primera ves peteĩ lugár ndereikuaaihápe, péro haʼetépe oho nendive peteĩ ne amígo oikuaa porãitereíva. Haʼe opillapaite moõitépa peime ha moõpa oporogueraha káda tape oĩva. Oiméne revyʼaite ne amígo nemoirũ haguére ko viáhepe. Péicha avei Jehová ojogua pe ñane amígope. Haʼe oikuaa porã mbaʼépa ñaneraʼarõ amo gotyove. Upéicharõ ñantende porãséramo umi profesía bíblica tekotevẽ ñaneumílde ha jajerure Jehovápe tañanepytyvõ (Dan. 2:28; 2 Ped. 1:​19, 20). Peteĩ túa imbaʼeporãva oipota ifamília ovyʼa, péicha avei Jehová oipota la iporãvéva ñandéve g̃uarã (Jer. 29:11). Péro Jehová idiferénte peteĩ túa imperféktogui, pórke haʼe ikatu oprofetisa mbaʼépa oikóta amo gotyove ha siémpre ojaserta. Jehová oskrivika umi profesía oĩva la Bíbliape ikatu hag̃uáicha ñande jaikuaa umi mbaʼe iñimportánteva oiko mboyve jepe (Is. 46:10). w23.08 8 párr. 3, 4