Rreferénsia ojepurútava rreunionhápe Mbaʼéichapa Jaiko ha Japredika vaʼerã
© 2024 Watch Tower Bible and Tract Society of Pennsylvania
1-7 DE JULIO
TESÓRO OĨVA ÑANDEJÁRA ÑEʼẼME SALMOS 57-59
Jehová nopermitíri umi oñemoĩséva isiervokuérare osẽ ijidéape
“Umi lugár mombyryvehápe jepe ko yvy ape ári”
14 Esteban opredika vaʼekue pyʼaguasúpe, ojagarra mboyve ojuka chupe ikontrariokuéra (Hech. 6:5; 7:54-60). Oñepyrũrõ guare “ojepersegi mbarete” kristianokuérape, umi apóstol añoite la opyta vaʼekue Judéape, upéi entéro umi disípulo isarambipaite Judea ha Samaria tuichakuére. Péro upéva ndojokoiete voi chupekuéra osegi hag̃ua opredika porã. Felipe por ehémplo oho kuri Samáriape ha “oñepyrũ oñeʼẽ umi héntepe Cristo rehe”, upéicha rupi hetave hénte oñepyrũma avei ojerovia (Hech. 8:1-8, 14, 15, 25). Péro ndahaʼéi voi upévante, síno entéro umi isarambipa vaʼekue oho kuri “Fenicia, Chipre ha Antioquíape. Péro haʼekuéra omombeʼu umi notísia porã umi judíopente. Upéicharamo jepe, ijapytepekuéra oĩ umi kuimbaʼe Chipregua ha Cirenegua oúva Antioquíape ha oñepyrũ opredika umi hénte oñeʼẽvape griégope, ha omombeʼu chupekuéra umi notísia porã oñeʼẽva ñande Ruvicha Jesús rehe” (Hech. 11:19, 20). Amo ipahápe, ojepersegi rupi kristianokuérape, hetave héntepe ikatu ojepredika ha umi notísia oñeʼẽva Ñandejára Rréinore ojekuaave hetave hendápe.
15 Ñane tiémpope péicha lénto avei oiko kuri oĩrõ guare pe unión soviética. Áño 1950 rupi, hetaiterei testígo de Jehovápe oñemondopa kuri Sibériape. Oñemondo rupi chupekuéra diferénte lugárpe, haʼekuéra ikatu kuri opredika ha omosarambi umi notísia porã upe país tuichaitévape. Upérõ ningo hetaiterei ermánope oñemosarambi kuri Sibériare, péro la ndaupéichairire, entéro koʼã ermáno ndorekomoʼãi kuri la pláta oviaha hag̃ua 10.000 kilómetro ikatu hag̃uáicha opredika. Péicha pe goviérno voi oipytyvõ chupekuéra oho hag̃ua hikuái heta lugárpe. Peteĩ ermáno heʼi voi: “Amo ipahápe pe goviérno voi oipytyvõ hetaiterei hénte ipyʼaporãva oĩva Sibériape oikuaa hag̃ua pe añetegua”.
Óro kuʼi oĩva la Bíbliape
‘Jajepytaso mbaretékena ha ani jaheja mbaʼeve ñanemomýi’
16 Jahayhu Jehovápe ñane korasõ mbytete guive. Rréi David opurahéi vaʼekue: “Che korasõ mbytete guive ajerovia nderehe Ñandejára ha upéva nokambiamoʼãi”. Péicha haʼe ohechauka vaʼekue siémpre ohayhutaha Jehovápe (Sal. 57:7). Ñande avei ikatu jahayhu Jehovápe ha jajerovia hese ñande pyʼaite guive ha upéva nokambiamoʼãi (elee Salmo 112:7). Jahechami jeýna Robert ehémplo, ko ermánore ñañeʼẽma kuri ótro párrafope. Ojeʼe kuri chupe isiruhía aja orekotaha hikuái la tuguy peichahágui tekotevẽramo g̃uarã. Péro Robert upepete heʼi oiméramo okalkulánte jepe hikuái omoĩtaha chupe tuguy, haʼe osẽtaha oho pe ospitálgui. Tiémpo rire haʼe heʼi: “Che ni michĩmi ndadudái vaʼekue mbaʼépa la ajapótava ha ndajepyʼapýi vaʼekue la ikatúvare oiko upe rire”.
17 Robert ojepytaso mbarete vaʼekue Jehová ykére, pórke odesidíma kuri upéva heta tiémpo oho mboyve pe ospitálpe. ¿Mbaʼépa oipytyvõ raʼe chupe upearã? Primero, haʼe ombovyʼase vaʼekue Jehovápe. Segundo, haʼe ostudia porã vaʼekue la Biblia ha umi puvlikasión oexplikáva ñande rekove ha pe tuguy sagradoha. Tercero, haʼe oĩ vaʼekue segúro Jehová ovendesitaha chupe ojapo haguére iléi heʼíva. Ñande avei ikatu jajerovia ñane korasõ mbytete guive tahaʼe haʼéva la oikóva.
8-14 DE JULIO
TESÓRO OĨVA ÑANDEJÁRA ÑEʼẼME SALMOS 60-62
Jehová haʼete peteĩ tórre imbarete porãva ha ñaneinvita japyta hag̃ua hógape
Mbaʼéichapa nde reñemboʼe?
14 Umi mbaʼe jaʼéva ñañemboʼe jave ningo ohechauka avei mbaʼeichaitépa jajerovia Ñandejárare. David heʼivaʼekue Jehovápe: ‘Nde niko upe chemoʼãva, óga yvate imbaretévaicha umi cherayhuʼỹva renondépe. Akóinte ngaʼúraʼe nde rógape aiko, tañemoʼã ndepepo guýpe’ (Sal. 61:3, 4). La Biblia ningo ohechauka porã Ñandejára oñangarekoha ñanderehe (Rev. 7:15). Tuichaiterei ñandepyʼaguapy ñañemboʼe jave Jehovápe jaikuaágui Haʼe oĩha ñande ykére jahasa asy jave (jaleemína Salmo 118:5-9).
Mbaʼéichapa ñanepytyvõ pe espíritu sánto
6 ¿Ñañemboʼémapa algúna ves Pablo ojapo haguéicha ha jajerure asy Jehovápe oipeʼami hag̃ua ñandehegui peteĩ provléma? Ikatu oime heta vése ñañemboʼe raʼe ñande pyʼaite guive peteĩ provlémare, péro lomímonte okontinua, térã katu oempeorave. Umícha jave ikatu hína ñapensa Jehová nañandeguerohoryiha. Péro ñanemanduʼa vaʼerã Pablo ehémplore. Jehová okontesta kuri iñemboʼe, ha katuete okontestáta avei ñanembaʼéva. Ikatu hína Jehová ndoipeʼái ñandehegui upe provléma, péro ikatu ñanemombarete ijespíritu rupive ñaaguanta hag̃ua upe mbaʼe ijetuʼúva (Sal. 61:3, 4). Ikatu voi peteĩ situasión ‘ñandepete yvýre’, péro Jehová ni mbaʼevéicharõ nañanderejamoʼãi (2 Cor. 4:8, 9; Filip. 4:13).
w02-S 15/4 16 párr. 14
Umi léi Jehová omoĩva ñande deprovechorã
14 Jehová léi núnka nokambiái ha upéva ñanembopyʼaguapy. Koʼã tiémpo ijetuʼuetévape Jehová haʼe peteĩ ita guasu imbarete ha isegúrova, haʼe ningo oĩma vaʼekue ymaite guive ha oĩta opa ára g̃uarã (Salmo 90:2). Haʼe heʼi vaʼekue voi: “Che hína Jehová, che nakambiái” (Malaquías 3:6). Umi léi omoĩva umi hénte ningo pyʼỹieterei okambia, péro umi léi Ñandejára omoĩva la Bíbliape ndaupeichaiete, upévare ikatu jajerovia hesekuéra (Santiago 1:17). Por ehémplo, heta áñore umi sikólogo heʼi tuakuéra oheja vaʼerãha ifamília ojapo la ojaposéva, péro upéi haʼekuéra okambia jey la opensa lája ohechakuaágui oĩ vai hague la heʼíva. Umi léi oñemoĩva ko múndope okambia peteĩ tesapirĩme, péro Jehová léi jatopáva la Bíbliape katu núnka nokambiái. Ojapóma heta áño la Biblia omeʼẽ hague konsého umi tuakuérape mborayhúpe omongakuaa hag̃ua ifamiliakuérape. Apóstol Pablo heʼi vaʼekue voi: “Peẽ tuakuéra, ani pedesahusia pene famíliape, síno pesegi pemongakuaa, pekorrehi ha peñemoñeʼẽ chupekuéra Jehová heʼiháicha” (Efesios 6:4). Ñandepyʼaguapy ningo jajeroviárõ Jehová léire, pórke umíva núnka nokambiái.
Óro kuʼi oĩva la Bíbliape
w06-S 1/6 11 párr. 6
Mbaʼe mbaʼépa ñanemboʼe Salmos (párte 2)
62:11. Ñandejára ipoderóso ijehegui voi, chugui osẽ hína pe podér. Haʼe nodependéi mbaʼevére ipoderóso hag̃ua. “Ñandejára mbaʼe hína pe podér”.
15-21 DE JULIO
TESÓRO OĨVA ÑANDEJÁRA ÑEʼẼME SALMOS 63-65
“Ne mborayhu ovaletereive” che rekovégui
Koʼág̃ama jajeprepara vaʼerã jaiko hag̃ua pe paraísope
16 ¿Ikatúpa jaʼe jajavyha heta mbaʼe iporãva jajepreparáramo koʼág̃ama jaiko hag̃ua pe paraísope? Nahániri. Ndaipóri ótra kósa ikatu vaʼerã ñanembovyʼave Ñandejára servísiogui. Ñande ningo ndajaservíri Jehovápe jajesalvaségui ou vove pe fin, térã oĩgui ñandeovligáva. Haʼe ñandeapo vaʼekue voi ñamombaʼeguasu hag̃ua chupe. Hiʼarive haʼe ñanderayhueterei ha ñandegia. Jaadoráramo chupe ha ñañehaʼãmbaitérõ siémpre ñaime porã hendive, katuete javyʼaitereíta (elee Salmo 63:1-3). Umi ermáno heta áñorema oservíva chupe, okomprováma javyʼaitereiveha jaservívo Jehovápe (Sal. 1:1-3; Is. 58:13, 14).
“Siémprekena pehechauka pendeagradesidoha”
Koʼýte ningo iñimportánte jaagradese Ñandejárape umi mbaʼe ojapóvare ñanderehehápe. Katuete oiméne ñande ñapensa jepi voi entéro umi rregálo porãite Jehová omeʼẽ vaʼekuére ñandéve ha osegíva omeʼẽ (Deut. 8:17, 18; Hech. 14:17; 1 Tes. 5:18). Péro jaiko rangue ñapensa a la apuráda umi mbaʼe porã oúvare Ñandejáragui, iporãta jajepyʼamongetáramo mbaʼeichaitépa Jehová ipojera ñanendive ha umi jahayhúvandi. Upéva ñanepytyvõta ikatu hag̃uáicha ñamombaʼeve ñande Apoharépe, ha avei jahechakuaa hag̃ua mbaʼeichaitépa haʼe ñanderayhu ha ñandevalora (1 Juan 4:9).
Jajepyʼamongetákena umi mbaʼe ñanemoag̃uívare Jehováre
7 Añetehápe ningo sapyʼánte ijetuʼu ñañekonsentra ha jajepyʼamongeta pe jastudiávare. Upéva ikatu oiko ñanekaneʼõ rupi térã oĩgui rruído ñande jerére. Upévare jaheka vaʼerã peteĩ lugár trankílo, ndaiporihápe mbaʼeve ñandedistrae vaʼerã. Por ehémplo, David ojepyʼamongeta vaʼekue pyharekue (Sal. 63:6). Jesús avei oho vaʼekue umi lugár itrankilohápe ojepyʼamongeta ha oñemboʼe hag̃ua (Luc. 6:12).
Eporomboʼékena mborayhúpe Jesús ojapo haguéicha
6 Enterovénte ningo ñañeʼẽse umi mbaʼe ñandegustávare. Jarekóramo peteĩ jahayhúva ningo ñande juru renyhẽ voi ñañeʼẽ hese ha ojekuaa ñande rováre. Jaipota enterovénte oikuaa mbaʼeichaguápa haʼe. Ha ñañeʼẽ porã hese ha oĩramo oñeʼẽ vaíva hese katu ñadefende voi chupe. Hiʼãiterei ñandéve enterovénte oguerohory ha omombaʼe chupe.
Óro kuʼi oĩva la Bíbliape
Ñañatendékena umi mbaʼe jaʼévare
Umi mbaʼe jaʼéva ikatu omoñeñandu porã térã omoñeñandu vai peteĩ persónape. Upévare ñapensa porã vaʼerã ñañeʼẽ mboyve (elee Proverbios 12:18). Heta hénte ningo ipyʼahatã ha heʼi umi mbaʼe omoñeñandu vaítava hapichápe. “Haʼete ohaimbeʼéva hína ijespáda” ha “oapuntáva iflécha” hese (Sal. 64:3, NM). Koʼãichagua persóna oaprende oñeʼẽ hag̃ua péicha umi pelíkulagui ha prográma de televisióngui. Péro ñande kristiáno ni guaʼuhápe ndajaikói ñaneñeʼẽ arhél, ni nañapensái mbaʼéichapa ñamoñeñandu vaíta ótrope. Ndaivaíringo añete ñañombojaru mimi ñañemongeta jave, péro núnka nañañembohorýi vaʼerã ñande rapicháre ñambopuka hag̃uánte ótrope. La Biblia heʼi porã ñandéve: “Aníkena osẽ pende jurúgui mbaʼeveichagua ñeʼẽ kyʼa, síno umi mbaʼe iporãva ha oporomombaretétava oñekotevẽ jave, péicha umi mbaʼe pejéva ideprovéchota umi penerendúvape” (Efes. 4:29, 31).
22-28 DE JULIO
TESÓRO OĨVA ÑANDEJÁRA ÑEʼẼME SALMOS 66-68
Jehová ogueraha ñande kárga pohýi káda día
¿Mbaʼéichapa Jehová okontesta ñane ñemboʼe?
15 Jehová ningo ndahaʼéi katuete okontestátava ñane ñemboʼe peteĩ milágro ndetuichapa jepéva rupive. Péro si omeʼẽta ñandéve la ñaikotevẽva jasegi hag̃ua ñandefiél chupe. Upévare ñañatende meme vaʼerã jahechakuaa hag̃ua mbaʼéichapa Jehová okontesta hína ñandéve. Jahechamína la ohasáva peteĩ ermána hérava Yoko. Chupe g̃uarã haʼetévaicha Jehová nokontestáiva kuri iñemboʼe, ha upémarõ oñepyrũ oanotapaite la ojeruréva guive Jehovápe. Tiémpo rire olee jey la oskrivi vaʼekue ha ohechakuaa Jehová okontesta hague la majoría umi iñemboʼe, oĩ voi umi ni haʼe naimanduʼavéimava. Péicha jahecha iporãtaha ñañemotiémporamo jepi ñapensa hag̃ua mbaʼéichapa Jehová okontesta hína ñane ñemboʼe (Sal. 66:19, 20).
Ñaipytyvõkena umi sy ha túva haʼeñóvape
Ijespíritu rupive Jehová ohaika heta purahéi oñemombaʼeguasu hag̃ua chupe. Mbaʼéichapa nde ere oñeñandúne hague umi viúda ha ityreʼỹva opurahéi jave? Oimevaʼerã ovyʼáraʼe omomanduʼágui chupekuéra Jehová haʼeha “ityreʼỹva ru” ha “imenaveʼỹva ñangarekohára” (Salmo 68:5; 146:9). Ñande avei ikatu ñamokyreʼỹ umi túva térã sy haʼeñóvape. Ha ikatu voi akóinte imanduʼa hikuái umi mbaʼe jaʼevaʼekuére chupekuéra. Upéicha oikovaʼekue Ruth rehe. Ojapóma 20 áño peteĩ ermáno omendáva ha omoakã porãva ifamília heʼi hague chupe: “Aikuaa ningo mbaʼeichaitépa reñehaʼã rehekomboʼe umi mokõi ne membýpe. Iporãiterei upéva, ejapo memékena upéicha”. Ruth heʼi: “Opokoite che korasõre ahendúvo peichagua túva omombaʼeha ajapóva”. Ñandejára Ñeʼẽ heʼi voi: ‘Ipyʼaguapýva juru ningo oporomoingove’ (Proverbios 15:4, ÑÑB). Upéicharõ, iporãitéta ñañehaʼãramo jaguerohory ñande pyʼaite guive umi túva térã sy haʼeñóvape.
Peteĩ túva umi ityreʼỹvape g̃uarã
HAʼE ningo umi ‘ityreʼỹva ru ha Ñandejára pe hóga marangatúpe’ (Salmo 68:5, S). Jaleévo ko téysto jahechakuaa mbaʼeichaitépa imbaʼeporã Ñandejára Jehová. Haʼe ojepyʼapy umi ohasa asývare, koʼãva apytépe oĩ umi ityreʼỹmíva. Pe léi omeʼẽvaʼekue umi Israelguápe ohechauka mbaʼeichaitépa ohayhu chupekuéra. Jahechamína Éxodo 22:22-24 heʼíva; ko téystope oñepyrũ oñeñeʼẽ ‘umi ityreʼỹvare’.
Jehová siémpre oĩta nde ykére ijetuʼu jave nendive
17 (Elee Salmo 40:5). Jajupi jave peteĩ sérro ningo ñande ñag̃uahẽsetereíma jepi pe yvate, pe huʼãitépe. Péro lomímonte pe tapére ikatu japyta mimi ha ñamaña jepi pe paisáhere. Upéicha avei jahasa jave peteĩ situasión ijetuʼúva pyʼỹinte jaipota opa. Péro opa mboyve ikatu avei japyta mimi ha ñapensa mbaʼéichapa Jehová ñanepytyvõ hína ñaaguanta hag̃ua upe situasión. Por ehémplo, káda pyhare ikatu ñapensa: ¿Mbaʼéichapa Jehová chepytyvõ raʼe koestedía aaguanta hag̃ua ko provléma? Ñakontesta hag̃ua ko pregúnta, ikatu ñapensa una o dos kósa ojapo vaʼekuére ñanderehehápe upe díape.
Óro kuʼi oĩva la Bíbliape
Ñanepytyvõ ñasolusiona hag̃ua umi provléma
Diana, ñañeʼẽma hague anteve, omombeʼu mbaʼéichapa oñeñandu kuri ohasa rire umi desgrásia: “Ahecha entéronte oikoha vyʼápe oñondivepa, péro che katu añeñandu cheaño peteĩ ha ndavyʼái”. Pe heʼíva Salmo 68:6 tuichaiterei oipytyvõ chupe: “Ñandejára omeʼẽ hogarã umi oĩvape haʼeño” (TNM). Diana heʼi: “Ahechakuaa ko téxto noñeʼẽiha peteĩ ógarente, síno heʼise avei Ñandejára omeʼẽha ñandéve peteĩ óga espirituál, ikatuhápe ñaime segúro ha ñañandu haʼe ñanemokunuʼũha. Upépe ikatu ñaime unído umi ohayhúvandi Jehovápe. Péro aikuaa avei ndaikatumoʼãiha añemoag̃ui umi ótrore, che voi nañemoag̃uíriramo Ñandejárare. Upévare Salmo 37:4 tuichaiterei chepytyvõ, upépe heʼi: ‘Evyʼa nde pyʼaite guive rejapóvo Jehová heʼíva, ha haʼe katuete omeʼẽta ndéve umi mbaʼe reipotáva nde pyʼaite guive’” (TNM).
29 DE JULIO AL 4 DE AGOSTO
TESÓRO OĨVA ÑANDEJÁRA ÑEʼẼME SALMO 69
Mbaʼe mbaʼépa ojeprofetisa Salmo 69-pe oikotaha Jesús rehe
Ohaʼarõjoa hikuái og̃uahẽ pe Mesías
17 Umi hénte reiete ndaijaʼemoʼãi hese (Sal. 69:4). Juan omombeʼu mbaʼépa heʼi Jesús: ‘Ndajapói rire hudiokuéra apytépe umi mbaʼe avave ojapoʼỹva, ndoʼaivaʼerãmoʼã hembiapo vaikue hiʼarikuéra. Haʼekuéra katu, ohecháramo jepe umi mbaʼe, ndaijaʼéi cherehe ha ndaijaʼéi che Rúre. Koʼã mbaʼe ningo ojehu oiko hag̃ua Ileikuérape heʼíva: “Reiete ndaijaʼéi cherehe hikuái”’ (Juan 15:24, 25). Ko profesía oĩ Sálmope, mbaʼérepa upéicharõ Jesús heʼi oĩha “Léipe”? Umi hudío pyʼỹinte ohenói “Léi” Escrituras Hebréaspe (Juan 10:34; 12:34). Mateo, Marcos, Lucas ha Juan kuatiañeʼẽme oñemombeʼu oĩ hague heta ndaijaʼéiva Jesús rehe, koʼýte umi omoakãva hudiokuéra rrelihión. Haʼe voi heʼi umi ohendúvape chupe: “Yvyporakuéra niko ndoguerekói mbaʼérepa ndaijaʼéivo penderehe. Cherehe katu ndaijaʼéi, ahechaukágui chupekuéra hembiapo vaikue” (Juan 7:7).
Jaservíkena ñande pyʼaite guive Jehovápe
7 Omoñepyrũ riremi ipredikasión, pe Pascua aja áño 30-pe, Jesús ohechauka ohayhu ha omombaʼeha ipyʼaite guive Jehovápe. Og̃uahẽvo Jerusalénpe hemimboʼekuérandi ‘ohecha pe témplope oĩ umi ovendéva tóro, ovecha ha palóma. Ohecha avei oguapyhína upépe umi okambiáva pláta’. Mbaʼépa ojapo, ha mbaʼépa opensa hemimboʼekuéra upévare? (Elee Juan 2:13-17.)
8 Jesús heʼi ha ojapovaʼekue upérõ omomanduʼa hemimboʼekuérape ko profesía rréi David ohaivaʼekuére: ‘Cherakateʼỹetereígui nde róga guasu rehe, tatáicha okaru cherehe’ (Sal. 69:9, ÑÑB). Mbaʼérepa imanduʼa hikuái ko profesíare? Imboʼeharakuéra ojapógui peteĩ mbaʼe ombopochýtava umi mburuvichakuéra templopeguápe. Umíva apytépe oĩvaʼekue umi saserdóte ha mboʼeharakuéra leipegua. Jesús omosarambi chuguikuéra inegósio, ha ohechauka ivaiha pe ojapóva hikuái. Hemimboʼekuéra ohechakuaa Haʼe ojapo hague upéicha hakateʼỹgui Jehová rógare, térã ohayhu ha omombaʼetereígui Ñandejárape. Koʼág̃a jahecháta mbaʼépa heʼise ñanerakateʼỹ peteĩ mbaʼére, ha mbaʼéichapa upéva ñanepytyvõta ñambaʼapo kyreʼỹ hag̃ua Jehová servísiope.
g95-S 22/10 31 párr. 4
¿Ikatúpa ñamano ñañembyasyeterei rupi?
Jesús ningo oñembyasyeterei vaʼekue omano mboyve, upévare oĩ algúno heʼíva pe tristésa haʼe hague peteĩva umi mbaʼe ojuka vaʼekue chupe. Salmo 69:20-pe la Biblia heʼi hese: “Pe che korasõ ja nomeʼẽvéima, pórke umi mbaʼe vai heʼíva hikuái chekutu rasy, ndaipóri pohã ikatúva chemonguera”. ¿Mbaʼéichapa ikatu ñantende ko téxto heʼíva? Jesús omano mboyvemi hetaiterei osufri vaʼekue, ndahaʼéi físikamente añónte síno avei emosionálmente (Mateo 27:46; Lucas 22:44; Hebreos 5:7). Upévare ikatu avei ñantende mbaʼérepa osẽ raʼe “tuguy ha y” Jesúsgui ojekutúrõ guare chupe lánsape ikostádope omano riremi. Ñañekevrantaitereírõ ningo ñane korasõ ikatu ojedesgarra térã peteĩva umi ñande váso sangíneo ikatu osoro, ha upéva oiko jave ñande retepy henyhẽ tuguy ha ótro líkidogui. Upévare, tahaʼe haʼéva la oiko vaʼekue Jesúsre ojekutúrõ guare chupe, la osẽ vaʼekue chugui ojogua ‘tuguy ha ýpe’ (Juan 19:34).
it-2-S 669
Plánta venenósa
Ojeprofetisa vaʼekue pe Mesíaspe oñemeʼẽtaha “peteĩ plánta venenósa” hoʼu hag̃ua (Sl 69:21, nóta). Upéva oñekumpli Jesús omano mboyvemi. Upérõ oñemeʼẽ kuri chupe víno oñembojeheʼáva plánta iróvare, péro Jesús otantea rire ndoʼuséi vaʼekue upe vevída. Upéva posívlemente oipytyvõta kuri ani hag̃ua hasyeterei chupe ojeklavátarõ guare pe yvyráre. Tiémpo rire, Mateo oskrivírõ guare ko profesía kumplimiénto oipuru pe palávra griega kjo·lḗ heʼiséva plánta iróva (Mt 27:34). Ha ko palávra ojepuru avei pe Septuagíntape Salmo 69:21-pe. Péro pe lívro de Márcospe katu oñeñeʼẽ mírrare (Mr 15:23). Upévare oñepensa avei pe plánta venenósa térã plánta iróva haʼe hague mírra. Péro ikatu avei upe vevída oreko raʼe plánta iróva ha mírra.
Óro kuʼi oĩva la Bíbliape
Jehová ñandeguerohorýramo jaikovéta opa ára g̃uarã
16 Ymaite guive Ñandejára siervokuéra omombaʼeguasu chupe hapichakuéra renondépe. Pe salmístape g̃uarã iñimportantetereivaʼekue ko mbaʼe, upévare oñemboʼévo heʼi: “Ajerure ndéve che Ruete, toʼa porãite ndéve umi [sakrifísio] osẽva che jurúgui” (Sal. 119:108, ÑÑB). Mbaʼépa jaʼekuaa ñane tiémpore? Proféta Isaías heʼivaʼekue Jehová rembiguaikuérare: ‘Ombotuicháta Ñandejárape, vyʼapópe oikuaveʼẽta pe altárpe’ (Isa. 60:6, 7, ÑÑB). Koʼág̃a ñaiméma hetaiterei ‘ñamombaʼeguasúva Jehovápe ñamombeʼúvo héra’ ha péicha ñakumpli ko profesía (Heb. 13:15).
17 Ha nde, remombaʼeguasúpa Jehovápe ne ñeʼẽ rupive? Oiméramo nderejapói gueteri upéva, reñehaʼãtapa rejapo opa mbaʼe oñekotevẽva resẽma hag̃ua repredika? Upéicha rehechaukáta nde jerovia, ha umichagua sakrifísio ‘ombovyʼavéta Ñandejárape reikuaveʼẽ rangue chupe peteĩ tóro’ (elee Salmo 69:30, 31). Jehová katuete ndeguerohorýta ha umi mbaʼe reikuaveʼẽva haʼéta chupe g̃uarã ku “mbaʼe ryakuã porãicha” (Eze. 20:41). Ajépa revyʼaitéta upéicharõ!
5-11 DE AGOSTO
TESÓRO OĨVA ÑANDEJÁRA ÑEʼẼME SALMOS 70-72
Emombeʼúkena “pe henerasión oúvape” mbaʼéichapa ipoderóso Ñandejára
w99-S 1/9 18 párr. 17
Mitãrusukuéra: peipuru porãkena pene akã
17 Tekotevẽ ningo reñatende porã ha avei ndepyʼaguasu ani hag̃ua reʼa Satanás ñuhãme. Sapyʼánte avei tekotevẽta rembohovái heta mbaʼe ijetuʼúva ha ndahaʼéi ne kompañerokuérapente, síno ko múndope avei. David heʼi vaʼekue peteĩ ñemboʼépe: “Ñandejára, nde hína la che esperánsa. Jehová, nde hína Ñandejára ogovernáva opa mbaʼe, chemitã guive nderehe che ajerovia. Ñandejára, nde ningo cherekomboʼe chemitã guive, ha koʼág̃a peve che asegi amombeʼu umi mbaʼe porã nde rejapóva” (Salmo 71:5, 17). Davídpe ningo ojekuaa vaʼekue ipyʼaguasu haguére, péro ¿arakaʼe guive piko haʼe upéicha? Imitã guive haʼe ohechaukáma vaʼekue ipyʼaguasuha. Por ehémplo ojuka mboyve Goliátpe, haʼe ojukáma vaʼekue voi peteĩ león ha peteĩ ósope oñangarekórõ guare itúa ovechakuérare (1 Samuel 17:34-37). Péro David ohechakuaa Jehová ombopyʼaguasu hague chupe, upévare heʼi kuri “chemitã guive nderehe che ajerovia”. Haʼe ojerovia rupi Jehováre ikatu kuri ombohovái oimeraẽ mbaʼe ijetuʼúva. Nde avei ikatúta ehechakuaa mbaʼéichapa Jehová nembopyʼaguasu ha nemombaretéta ‘ndepuʼaka hag̃ua ko múndore’ rejeroviárõ hese (1 Juan 5:4).
g04-S 8/10 23 párr. 3
¿Mbaʼéichapa jatrata vaʼerã umi ijedávape?
Pe salmísta heʼi vaʼekue iñemboʼépe: “Anína chereja rei ko chetuja rire, anína chereja cheaño koʼág̃a nachembaretevéimarõ” (Salmo 71:9). Ñandejára ningo nomboykéi isiervokuéra iñeʼẽrendúvape chupe, haʼekuéra opensáramo jepe ndaideprovechoveimaha ijedáma rupi. Pe salmísta ndeʼiséi vaʼekue Jehová oheja rei hague chupe, síno haʼe ohechakuaa itujavévo ohóvo tekotevẽha ojeroviave Ñandejárare. Jehová núnka ndohejareíri umi isiérvo ifiélvape ha oipytyvõ chupekuéra oikove aja pukukue (Salmo 18:25). Ha pyʼỹinte oipytyvõ hag̃ua chupekuéra ojevale umi ermánore.
Eservi Jehovápe og̃uahẽ mboyve umi ára ijetuʼúva
4 Oiméramo nanemitãvéima ha reguereko experiénsia heta mbaʼépe, iporã reñeporandu: “¿Mbaʼépa ikatu ajapove koʼág̃a, cheresãi ha chembarete aja gueteri?”. Reservi rupi Jehovápe heta áñorema, reguereko oportunida heta ermáno ndorekóiva. Por ehémplo, ikatu remboʼe mitãrusukuérape umi mbaʼe reaprende vaʼekue Jehovágui, ha remombarete ambue ermanokuérape remombeʼúvo umi mbaʼe rehasa vaʼekue nde servísiope. Rréi David ojerure vaʼekue Jehovápe tomeʼẽmi chupe peichagua oportunida. Haʼe ohai: “Nde, ore Ruete, chemboʼe vaʼekue chemitãrusu ára guive [...]. Chetujáma ningo ha che akãrague morotĩmbámarõ jepe, Nde, che Ruete, ani chereja rei, amombeʼu peve nde puʼaka ha ne mbaretekue che ñemoñarenguérape ha mayma ou vaʼerãme” (Sal. 71:17, 18, ÑÑB).
5 ¿Mbaʼéichapa ikatu reiporu umi mbaʼe reaprende vaʼekue heta áñore reipytyvõ hag̃ua ótrope? ¿Ikatu piko reinvita nde rógape umi ermáno imitãvape pekomparti hag̃ua oñondive ha peñomokyreʼỹ? ¿Ikatúpa resẽ hendivekuéra predikasiónpe ohecha hag̃ua hikuái mbaʼeichaitépa revyʼa reservívo Jehovápe? Elihú ningo heʼi vaʼekue: “Toñeʼẽ umi hetave mbaʼéma ohasa vaʼekue. Haʼekuéra tohechauka iñaranduha” (Job 32:7). Apóstol Pablo katu omokyreʼỹ umi ermána orekóvape experiénsia oipytyvõ hag̃ua umi kristiána imitãvévape, tahaʼe heʼíva térã iñehémplo rupive. Haʼe ohai vaʼekue: “Umi kuña ijedavéva [...] omboʼe vaʼerã [...] iporãva” (Tito 2:3).
Óro kuʼi oĩva la Bíbliape
it-1-S 883
Éufrates
Israel território frontéra. Ñandejára opromete vaʼekue Abrahánpe omeʼẽtaha chupe ha ifamiliarépe pe yvy oñepyrũva “pe rrío de Egipto guive, rrío guasu Éufrates peve” (Gé 15:18). Ko promésa oñemeʼẽ jey vaʼekue umi israelítape (Éx 23:31; Dt 1:7, 8; 11:24; Jos 1:4). Primero de Crónicas 5:9-pe heʼi David oñepyrũ mboyve ogoverna, unos kuánto Rubén familiare ombotuichave hague iterritório “oñepyrũha meve pe desiérto ohóva Rrío Éufrates peve”. Upéicharõ jepe, pe rrío Éufrates opyta gueteri amo 800 km. “Galaad territóriope éste gotyo” (1Cr 5:10). Upévare pe téxto oiméne ontendekase raʼe umi rubenita ombotuichave hague iterritório Galaad éste guive, oñepyrũha meve pe desiérto de Siria, ha upe desiérto ohupyty pe Éufrates (“oñepyrũha meve pe desiérto ohóva Rrío Éufrates peve”, FS; “ohupyty pe desiérto ohóva Éufrates guive koʼa peve”, Ga). Upévare ikatu jaʼe Jehová promésa oñekumpli hague David ha Salomón ogovernaha tiémpope. Upérõ guare Israel território tuichaitereive ha ohupyty pe rréino arameo de Zobá, oñeg̃uahẽva pe rrío Éufrates rembeʼýpe, upe pártepe amalisia ohasa vaʼekue Síriarupi nórte gotyo (2Sa 8:3; 1Re 4:21; 1Cr 18:3-8; 2Cr 9:26). Iñimportanteterei rupi, heta hendápe oñehenói pe Éufratespe “pe Rrío” (Jos 24:2, 15; Sl 72:8).
12-18 DE AGOSTO
TESÓRO OĨVA ÑANDEJÁRA ÑEʼẼME SALMOS 73, 74
¿Ñaenvidiápa hína umi iñañávape?
Jehová osalva umi oñeñandúvape yvýre
14 Pe Salmo 73 ningo oskrivi vaʼekue peteĩ levita. Upéicha rupi haʼe oreko vaʼekue pe priviléhio ombaʼapóvo pe lugár ojeadorahápe Jehovápe. Upéicharõ jepe, peteĩ moméntope haʼe jepe oñedesanimaiterei vaʼekue. ¿Mbaʼérepa? Haʼe oñepyrũ oenvidia umi iñaña ha oñemombaʼeguasúvape, ndahaʼéi haʼe ojaposégui umi mbaʼe vai, síno haʼete rupi haʼekuéra oiko porãvéva chugui (Sal. 73:2-9, 11-14). Haʼetévaicha haʼekuéra orekopaitéva: Ipláta heta, oiko porã ha ndojepyʼapýi mbaʼevére. Pe levita ohechakuaárõ guare upéva, oñedesanimaiterei ha heʼi: “Maʼerã rei piko che añehaʼã chekorasõ potĩ ha ajepohéi ahechauka hag̃ua cheinosenteha”. Jahechakuaa upevakuére haʼe ojapeligra hague ikatu rupi oheja Jehovápe.
Jehová osalva umi oñeñandúvape yvýre
15 (Elee Salmo 73:16-19, 22-25). Pe levita oho “Ñandejára rógape, pe lugár sagrádope”. Upépe haʼe oĩ kuri umi ótro oadorávandi Jehovápe, oĩma trankílo opensa porã hag̃ua isituasiónre, ha oñemboʼe. Upéicha rupi, haʼe ohechakuaa umi mbaʼe opensáva vyroreiha ha oñepyrũma hague oho peteĩ tape ipeligrósovare, ikatúva omomombyry chupe Jehovágui. Haʼe ohechakuaa avei umi iñañáva oĩha “peteĩ lugár isỹivape hoʼa hag̃ua”, ha ‘ivaietereiha la ohaʼarõva hína chupekuéra’. Anivéma hag̃ua oporoenvidia ni oñedesanima, pe levita tekotevẽ kuri ohecha opa mbaʼe Jehová ohechaháicha. Ojapo rire upéva, haʼe ipyʼaguapy jey ha ovyʼa. Haʼe heʼi: ‘Ko yvy ape ári, nderehénte aikotevẽ Ñandejára’.
16 ¿Mbaʼépa ñaaprende? Aníkena arakaʼeve ñaenvidia umi hénte añáme, haʼetévape oiko porãva hína. Pe vyʼa orekóva hikuái sapyʼami g̃uarãnte ha opáta, pórke haʼekuéra ndoikovemoʼãi pára siémpre (Ecl. 8:12, 13). Ñande ñaenvidiáramo chupekuéra, ñañedesanimáta ha ikatu voi japerde ñane amista Jehovándi. Upéicharõ, sapyʼánte ñañeñandúramo pe levita oñeñandu haguéicha jajapo vaʼerã upe haʼe ojapo vaʼekue. Jasegi umi konsého mborayhúpe omeʼẽva ñandéve Ñandejára, ha jajeheʼa umi ótro oadorávare avei chupe. Jahayhuvéramo Jehovápe oimeraẽ mbaʼégui jarekóta pe vyʼa añetetéva. Ha ikatúta jahupyty ‘pe jeikove añetetéva’ (1 Tim. 6:19).
Jajeroviákena Moisés ojerovia haguéicha
5 ¿Mbaʼépa nepytyvõta ani hag̃ua reʼa pekádope ‘revyʼaségui sapyʼami’? Nemanduʼákena pe pekádo sapyʼamínte nembovyʼataha. Péro rejerovia mbaretéramo, rehecháta “ko múndo ha umi mbaʼe oipotáva, [ohasaha] ohóvo” (1 Juan 2:15-17). Repensa vaʼerã mbaʼépa ojehúta umi opekáva ha noñarrepentírivape. Haʼekuéra oĩma “hoʼa hag̃uaichaite” ha “oñehundipáta” (Sal. 73:18, 19, NM). Oñepresenta jave peteĩ tentasión, reñeporandu vaʼerã: “¿Mbaʼépa oikóta chehegui ajapóramo ko mbaʼe vai?”.
Jahejákena Ñandejára tañanembotuicha
3 Pe kuimbaʼe ohaivaʼekue Salmo 73, oikuaa porã Jehová omombaʼe ha orekotaha chupe ipo akatúagui oisãmbyhy hag̃ua chupe (elee Salmo 73:23, 24). ¿Mbaʼéichapa Ñandejára ombotuicha hembiguaikuéra hekomirĩvape? Heta hendáicha. Pór ehémplo, ñanepytyvõ jaikuaa hag̃ua hembipota (1 Cor. 2:7). Upéi, ñahendúramo iñeʼẽ ha ñaneñeʼẽrendu chupe, ikatu jaiko iñamígoramo (Sant. 4:8).
4 Jehová omeʼẽ avei ñandéve peteĩ mbaʼe ovaletereíva: ñamombeʼu pe marandu porã (2 Cor. 4:1, 7). Japredikávo, ñamombaʼeguasu ñande Ru yvagayguápe ha ñaipytyvõ ñande rapichakuérape, ha upéicha Ñandejára ñanembotuicha. Haʼe opromete: ‘Che amombaʼéta chemombaʼévape’ (1 Sam. 2:30, ÑÑB). Ha upévare ikatu ñaime porã henondépe ha avei kongregasiónpe (Prov. 11:16; 22:1).
5 Jajeroviáramo Jehováre ha jaiko hapére, haʼe omeʼẽta ñandéve heta mbaʼe porã ñane renonderãme. La Biblia heʼi: “Ñandejára [...] yvate nemopuʼãne ha omeʼẽne ndéve ko yvy. Ndete voi rehecháne iñañáva oñehundíramo” (Sal. 37:34). Upéicha ñahaʼarõ Jehová ñanembotuichataha omeʼẽvo ñandéve tekove opaʼỹva (Sal. 37:29).
Óro kuʼi oĩva la Bíbliape
w06-S 15/7 11 párr. 2
Jehová Ñeʼẽ ningo oikove
Mbaʼe mbaʼépa ñanemboʼe Salmos (párte 3 ha párte 4)
74:13, 14. ¿Arakaʼépa Jehová omonguʼi ‘umi animál tuichaitereívape oikóva márpe’ akãnguéra ha ‘ombochipe Leviatán akã’? ‘Faraón rréi de Egíptope’ oñehenói “pe animál ypegua tuichaitéva oĩva Rrío Nilo arrojokuérape” (Ezequiel 29:3). Pe palávra Leviatán ikatu hína orrepresenta Faraón ha ijehérsitope (Salmo 74:14). Upévare ojeʼévo Ñandejára omonguʼi hague iñakãnguéra ikatu hína oñeñeʼẽ Jehová ohundietérõ guare Faraón ha ijehérsitope ha onohẽ ipuévlope Egíptogui.
19-25 DE AGOSTO
TESÓRO OĨVA ÑANDEJÁRA ÑEʼẼME SALMOS 75-77
¿Mbaʼérepa ndovaléi ñañemombaʼeguasu?
Mbaʼépepa idiferénte umi oservíva Jehovápe ha umi ndoservíriva chupe
4 Pablo heʼi kuri umi hénte ijehénte ojepyʼapytaha ha iplatarayhúta. Upéi heʼi avei hesekuéra oñembotuichataha, ijejapóta ha oñemombaʼeguasúta. Peichagua persóna opensa iñimportanteveha hapichakuéragui, tahaʼe ivaleve rupi, iporãvégui, ipláta térã ijestúdio porãgui. Haʼekuéra oipota umi ótro ombotuicha chupekuéra. Peteĩ expérto heʼi umi oñemombaʼeguasúvare: “Peichagua persóna haʼete voi orekóva iméntepe peteĩ altár ijupe g̃uarã, ha haʼe voi oñesũ henondépe”. Oĩ heʼíva peteĩ persóna ijorgullósovape jepe omolestaitereiha ohecha jave ótro oñemombaʼeguasuha.
5 Jehovápe ndogustái umi persóna ijorgullósova. La Biblia heʼi voi haʼe ndochaʼeiha pe oñemombaʼeguasúvare (Prov. 6:16, 17). Ko mbaʼe vaiete ningo ñanemomombyry Ñandejáragui (Sal. 10:4). Ha jaikuaaháicha, pe orgúllo ou Satanásgui (1 Tim. 3:6). Péro ñambyasýramo jepe, Ñandejára siervokuéra ifiélva jepe ikatu ou oñemombaʼeguasu. Por ehémplo, rréi Uzías Judagua iñeʼẽrendu vaʼekue Jehovápe heta áñore. Péro la Biblia heʼi hese: “Imbaretemírente, ou oñemombaʼeguasu ha upéva ohundiete chupe, ha nopenái Ijára Jehová heʼívare ha oike Jehová témplope ohapy hag̃ua insiénso pe altár ojehapyhápe insiénso”. Uzías ndorekói kuri derécho ojapóvo upéva. Tiémpo rire rréi Ezequías ou avei oñemombaʼeguasu, péro haʼe okambia jey kuri (2 Crón. 26:16, TNM; 32:25, 26).
¿Mbaʼépa ñaaprende umi milágro Jesús ojapo vaʼekuégui?
11 ¿Mbaʼépa ñanemboʼe ko milágro Jesús ojapo vaʼekue? Ñaneumílde vaʼerãha. Jesús núnka ndoikói vaʼekue oñemombaʼeguasu umi milágro ojapo vaʼekuére. Upéva rangue, haʼe iñumílde vaʼekue, siémpre omombaʼeguasu Itúape, ha orrekonose opa mbaʼe ojapo hague Itúa rupivénte (Juan 5:19, 30; 8:28). Ñande avei jasegíramo Jesús ehémplo ñaneumíldeta ha ndajaikomoʼãi ñañemombaʼeguasu umi mbaʼe jajapóvare. Tahaʼe haʼéva la jajapóva Jehová servísiope, ndovaléi ñañemombaʼeguasu upévare, síno siémpre ñamombaʼeguasu vaʼerã ñande Túa ijojahaʼỹvape (Jer. 9:23, 24). Siémprekena ñamombaʼeguasu chupe haʼe omereseháicha, pórke heseʼỹ ñande ndaikatumoʼãi mbaʼevete jajapo (1 Cor. 1:26-31).
12 Jahechamína mbaʼéichapa ikatu jasegi Jesús ehémplo ha jahechauka ñaneumildeha. Eñeimahinamína peteĩ ansiáno oipuruha heta itiémpo oipytyvõ hag̃ua peteĩ siérvo ministeriál imitãvape oprepara hag̃ua iprimér diskúrso. Upéicha rupi pe mitãrusu ojapo porãiterei la idiskúrso ha umi ermanokuérape ogustaiterei. Opa rire pe rreunión oĩ heʼíva pe ansiánope: “¡Ajépa fuláno ojapo porãite pe diskúrso!”. Heʼínepa pe ansiáno: “Si, che aipytyvõ rupínte chupe ojapo porã”, o iñumíldeta ha heʼíta: “Si, ojapo porãiterei, avyʼaiterei heseve”. Peteĩ persóna iñumíldeva noñemombaʼeguasúi ótro ojapo porãramo peteĩ traváho haʼe oipytyvõ rupi chupe. Upéva rangue haʼe ovyʼáma oikuaa haguére Jehová ohecha ha ovaloraitereiha umi mbaʼe ojapo vaʼekue (ekompara Mateo 6:2-4; Heb. 13:16 heʼívare). Jehová ningo ovyʼaiterei ohecha jave jasegiha Jesús ehémplo ha ñaneumílde (1 Ped. 5:6).
Óro kuʼi oĩva la Bíbliape
w06-S 15/7 11 párr. 4
Mbaʼe mbaʼépa ñanemboʼe Salmos (párte 3 ha párte 4)
76:10. ¿Mbaʼéichapa Jehová ‘enemigokuéra ojapóva pochy reheve’ ikatu ombotuicha chupe? Sapyʼánte ikatu jahupyty heta mbaʼe porã Jehová opermiti jave umi héntepe ipochyeterei ñanderehe ha ñandeataka. Umi mbaʼe vai jahasáva ikatu ñanentrena térã ñandekorrehi. Péro avei Jehová nopermitimoʼãi jahasa asy mas de la kuénta ñamohuʼã hag̃ua upe entrenamiénto (1 Pedro 5:10). ‘Pe última kósa ojapóva umi iñenemigokuéra jepe, haʼe oipurúta oñembotuicha hag̃ua’. Péro ikatu hína jahasa asy ñamano meve, ha upéva ombotuichakuaa avei Jehovápe, pórke ikatu oĩ oñepyrũva oservi chupe ohecha rupi mbaʼeichaitépa ñande ñandefiél ha ñaaguanta.
26 DE AGOSTO AL 1 DE SEPTIEMBRE
TESÓRO OĨVA ÑANDEJÁRA ÑEʼẼME SALMO 78
Aníkena jasegi umi israelita rrevélde ehémplo
w96-S 1/12 29, 30
¿Mbaʼérepa ‘ñapensa vaʼerã umi mbaʼe Jehová ojapo vaʼekuére’?
Ñambyasýramo jepe umi israelita heta vése hesarái umi mbaʼe oiko vaʼekuégui. ¿Ha mbaʼépa oiko upe haguére? “Pyʼỹieterei odesafia hikuái Ñandejárape. Haʼekuéra pyʼỹinte omoñeñandu vai Israel Járape. Haʼekuéra hesarái Ñandejára ipoderosoha, naimanduʼái hikuái Ñandejára oguenohẽ hague chupekuéra umi iñenemígo poguýgui” (Sl 78:41, 42). Tiémpo rire Jehová orrechasa chupekuéra hesarái haguére imandamientokuéragui (Mateo 21:42, 43).
Pe salmísta omoĩ vaʼekue peteĩ ehémplo iporãitereíva, haʼe oskrivi: “Péro koʼág̃a apensáta umi mbaʼe Jehová ojapo vaʼekuére. Ñandejára, che chemanduʼáta umi mbaʼe porãita rejapo vaʼekuére yma. Ajepyʼamongetáta ne rembiapokuére, ha siémpre apensáta umi mbaʼe rejapóvare” (Salmo 77:11, 12). Ñande avei ñanemanduʼa ha jajepyʼamongetárõ umi mbaʼe jajapo vaʼekuére Jehová servísiope ha mbaʼeichaitépa Jehová ñanderayhu, katuete ñanekyreʼỹta ha ñamombaʼevéta entéro mbaʼe. Avei ‘ñapensárõ umi mbaʼe Jehová ojapo vaʼekuére’ ñanepytyvõta ani hag̃ua ñanekaneʼõ, ha jajapo hag̃ua la ikatumíva guive ñaaguantávo fiélmente.
w06-S 15/7 17 párr. 16
‘Jasegíkena jajapo opa mbaʼe jajeplageaʼỹre’
16 Jaikóramo jajeplagea ñapensáta ñandejehe ha ñane provlémarente ha ñanderesaráita umi mbaʼe porãita jarresivívagui jaservi rupi Jehovápe. Anivéma hag̃ua jajeplagease, tekotevẽ ñanemanduʼa meme umi vendisión jahupytýmavare. Ñapensamína unos kuántore: Jehová voi ñandeporavo jaiko hag̃ua Itestígoramo (Isaías 43:10). Ikatu ñañeʼẽ hendive oimeha óra, pórke haʼe ‘ohendu ñane ñemboʼe’ ha ikatu jareko chupe ñane amigoitéramo (Salmo 65:2; Santiago 4:8). Ñande rekove isentído jaikuaa rupi Jehová añoite orekoha derécho ogoverna hag̃ua, ha avei ikatu haguére jahechauka chupe ñandefielha (Proverbios 27:11). Ikatu japredika meme umi notísia porã oñeʼẽva Ñandejára Rréinore (Mateo 24:14). Ñane konsiénsia ipotĩ jajerovia rupi pe sakrifísio Jesucristo ojapo vaʼekuére ñanderehehápe (Juan 3:16). Tahaʼe haʼéva la ñaaguantáva hína, koʼág̃ama voi jadisfruta koʼã vendisión iporãitéva.
w11-S 1/7 10 párr. 3, 4
¿Orekópa Jehová sentimiénto?
Pe salmísta heʼi vaʼekue: “Hetaiterei vése ningo ojerrevela hikuái Ñandejárare pe desiértope” (versíkulo 40). Heʼi avei: “Pyʼỹieterei odesafia hikuái Ñandejárape” (versíkulo 41). Ohechaukaháicha ko salmísta, umi israelita hetaiterei vése ojerrevela vaʼekue Ñandejára kóntrape. Osẽ riremínte Egíptogui, haʼekuéra oñepyrũma ndorrespetavéi Ñandejárape. Pe desiértope oñepyrũ ojeplagea hikuái ha ndogueroviavéi Jehová ikatuha oipuru ipodér oñangareko hag̃ua hesekuéra (Números 14:1-4). Peteĩ informasión oipurúva jepi umi otradusíva la Biblia, heʼi pe fráse “ojerrevela hikuái Ñandejárare” ikatuha avei heʼise “oñembopyʼahatã hikuái Ñandejára kóntrape” térã “orrechasa hague hikuái Ñandejárape”. Upéicharõ jepe, Jehová oiporiahuvereko umi israelítape ha operdona chupekuéra oñarrepenti jave hikuái. Péro tiémpo riremínte haʼekuéra oñepyrũ jeýma ojapo umi mbaʼe vai (Salmo 78:10-19, 38).
¿Mbaʼéichapa Jehová oñeñandu vaʼekue umi israelita ojerrevela jave péicha ikóntrape? Salmo 78:40-pe heʼi Jehová ‘oñeñandu vaiha ikausakuérare’. Peteĩ traduksión de la Biblia heʼi ko versíkulope haʼekuéra “omoñeñandu vaietereiha” Ñandejárape. Peteĩ informasión heʼi ko versíkulore: “Koʼápe ningo ojehechaukase mbaʼeichaitépa hasy asy Ñandejárape umi hebreo oñekomporta vai jave, oñeñandu voi peteĩ túa oñeñanduháicha ifamília ojerrevela jave hese”. Peteĩ taʼýra naiñeʼẽrendúi jave, hasy asy upéva itúape, upeichaite avei umi israelita “omoñeñandu vai Israel Járape” (versíkulo 41).
Óro kuʼi oĩva la Bíbliape
Ñandejára ningo Todopoderóso, péro imbaʼerechakuaa
11 Mas de 3 millón israelita osẽ vaʼekue Egíptogui áño 1513-pe Jesús ou mboyve. Umíva apytépe oĩ vaʼekue imitãva, ijedáva ha avei hasykatúva térã orekóva diskapasida. Peteĩ persóna omoakã hag̃ua peichagua grúpo tekotevẽ imbaʼerechakuaa ha oporotrata porã. Ha Jehová ohechauka ipuévlope koʼã mbaʼe Moisés rupive. Upéicha rupi umi israelita noñeñandúi haʼeño osẽrõ guare pe lugár oiko haguégui hetaiterei tiémporema (Sal. 78:52, 53).
12 ¿Mbaʼépa ojapo Jehová ani hag̃ua umi israelita okyhyje? Por ehémplo, onohẽ vaʼekue chupekuéra Egíptogui “peteĩ ehérsitoicha, grúpo por grúpo” (Éx. 13:18). Oñeorganisa porã rupi hikuái osẽ hag̃ua, katuete umi israelita ohechakuaa Ñandejára omanehaha pe situasión. Avei Ñandejára ogia chupekuéra, ha “upearã oipuru de diakue peteĩ arai ha pyharekue katu peteĩ tatarendy” (Sal. 78:14). Péicha haʼete ku Jehová heʼíva chupekuéra: “Ani pekyhyje. Koʼápe aime pogia ha añangareko hag̃ua penderehe”. Umi israelita oikotevẽ vaʼekue Jehová ombopyʼaguapy chupekuéra, pórke upe rire oñepresentáta kuri peteĩ situasión ijetuʼúva.