Rreferénsia ojepurútava rreunionhápe Mbaʼéichapa Jaiko ha Japredika vaʼerã
© 2025 Watch Tower Bible and Tract Society of Pennsylvania
5-11 DE MAYO
TESÓRO OĨVA ÑANDEJÁRA ÑEʼẼME PROVERBIOS 12
Ñambaʼapo jejopýramo oñemyengovia porãta ñandéve
Peteĩ mbaʼe ivaliosovéva pe diamántegui
Heta kristiánope g̃uarã sapyʼánte ijetuʼu okonsegi hag̃ua peteĩ traváho ikatutahápe ogana ohupytypa hag̃uáicha hemikotevẽ. Upéicharõ jepe, haʼekuéra ombaʼapo jejopy, oiko rangue ojapo álgo noĩporãiva okonsegi hag̃ua la oikotevẽva. Péicha ohechauka hikuái iñimportanteha chupekuéra g̃uarã iñonrrádo, ha ovaloraha umi kualida porãite Jehová orekóva. Ndaipóri ótra kósa ivaliosovéva upévagui (Prov. 12:24; Efes. 4:28).
¿Mbaʼéichapa ikatu revyʼa rembaʼapo pohýi jave?
Iñimportanteterei ñapensa mbaʼéichapa ovenefisia ótrope pe jajapóva, pórke upéva ñanepytyvõta javyʼa hag̃ua ñande travahohápe. Jesucristo heʼi vaʼekue voi: “Javyʼaiteve ñameʼẽvo, ñandéve oñemeʼẽ rangue” (Hechos 20:35). Jajapo porãramo ñane rembiapo jaikuaa oñevenefisiaha ñane patrón térã umi klientekuéra. Péro ndahaʼéi haʼekuérante, síno oñevenefisia avei ñane família ha avei ótra persóna oikotevẽva. ¿Mbaʼérepa jaʼe upéva?
Ñaipytyvõ ñane famíliape. Umi túva térã sy oñehaʼãva omantene ifamíliape, ojapo mokõi mbaʼe iñimportantetereíva. Primero, omeʼẽ ifamíliape umi mbaʼe oikotevẽva, por ehémplo, aliménto, ao ha peteĩ lugár oiko hag̃ua. Ha péicha okumpli pe rresponsavilida Ñandejára omeʼẽ vaʼekue chupekuéra omantenévo umi oĩvape ikargopekuéra (1 Timoteo 5:8). Ha segundo, iñehémplo rupive omboʼéta ifamiliakuérape iñimportanteha iguápo itravahohápe. Shane, ñañeʼẽma hague pe ótro artíkulope, omombeʼu: “Che túva ningo ehémplo porã chéve g̃uarã, pórke iñonrrádo ha itravahadór. Haʼe ningo karpintéro, ha chemboʼe ajapo hag̃ua umi mbaʼe ideprovéchotava umi héntepe”.
Ñaipytyvõ umi oikotevẽvape. Apóstol Pablo heʼi kristianokuérape: ‘Pembaʼapo pohýi [...] peguereko hag̃ua pemeʼẽ vaʼerã umi oikotevẽvape’ (Efesios 4:28). Ñambaʼapo jejopýramo ikatúta ñamantene ñane famíliape, ha ikatu voi ñanderupyty ñaipytyvõ hag̃ua umi oikotevẽvape (Proverbios 3:27). Jajapóramo upéicha javyʼavéta, jahechakuaágui upe jajapóva ovenefisiaha ótrope.
Óro kuʼi oĩva la Bíbliape
Jahejápa espíritu sánto ñanesãmbyhy?
6 La Biblia ohechauka Pablo ha Bernabé peichaháguinte “tuicha ojoavy” hague. Mbaʼépa ñanemboʼe upéva? Ñañemongeta jave peteĩ ermáno ndive ha jahechakuaáramo ñandepochymaha jahávo, iporãve jajapo Santiago 1:19, 20 heʼíva: “Penekyreʼỹvaʼerã pehendu hag̃ua ha penembegue peñeʼẽ ha pende pochy hag̃ua. Pe ipochýva niko ndojapói iporãva [Ñandejára] renondépe”. Upévare, ijáramo ñandéve ikatu ñañeʼẽnte ambue mbaʼére, jaʼe ótrope ñañemongeta jeytaha térã jaʼekuaa jarekoha jajapovaʼerã ha ñasẽ upégui oĩ mboyve huguyrakúva (Pro. 12:16; 17:14; 29:11).
7 Mbaʼéichapa ñanepytyvõta jajapóramo koʼã mbaʼe? Ñañehaʼãramo ñandepyʼaguapy raẽ, ñañemboʼe ha jajepyʼamongeta jaikuaa hag̃ua mbaʼépa jaʼéta, jahejañaína espíritu sánto ñanesãmbyhy (Pro. 15:1, 28). Upéicha ñanepasiénsiata ha ndajaikomoʼãi ñandepochy rei, avei ndahasymoʼãi ñakumpli heʼíva Efesios 4:26, 29: “Pendepochýramo, ani peʼa tembiapo vaípe. [...] Anive peneñeʼẽ [ivai]. Peiporu uvei ñeʼẽ iporãva, omombaretéva umi oikotevẽvape, ha oipytyvõva opa ohendúvape”. Ñanepasiénsia ha nañandepochyreíriramo oĩta pyʼaguapy kongregasiónpe ha ojeikóta peteĩ ñeʼẽme.
12-18 DE MAYO
TESÓRO OĨVA ÑANDEJÁRA ÑEʼẼME PROVERBIOS 13
Aníkena eheja nembotavy “pe iñañáva lámpara”
it-2 186, 187
Lámpara
Mbaʼéichapa jepi avei ojepuru ko palábra. Oñeñeʼẽ jepi peteĩ lámparare oñeñeʼẽ jave pe mbaʼe peteĩ persóna oipurúvare ohesape hag̃ua haperã. Upéva oreko enkuénta ko proverbio okompara hag̃ua pe ihústovape peteĩ iñañávare, heʼívo: “Pe ihústova lus omimbi ha ombovyʼa chupe, péro pe iñañáva lámpara oguéta” (Pr 13:9). Pe ihústova lus ningo kontinuadoite osegi omimbi. Péro umi iñañáva haʼetéramo jepe ohesapéva la ilámpara, oho porãitereívaicha hese hikuái, amo ipahápe Ñandejára ohejáta chupekuéra pytũmbýpe, ha katuete oñepysangapáta hikuái. Péva la ohaʼarõva umi omaldesívape isy ha itúape (Pr 20:20).
Álgiengui ‘oguéramo ilámpara’ heʼise avei ndorekoveimaha esperánsa. Ótro proverbio heʼi: “Umi iñañáva ndohopukumoʼãi, pe iñañáva lámpara oguéta” (Pr 24:20).
Jaservíkena Ñandejára oporomosãsóvape
3 Satanás oity mokõi yvypóra perféktope ha avei hetaiterei ánhelpe. Upéicharõ, koʼýte ñandéve ñanembotavykuaa avei. Ymaite guive haʼe oñehaʼã ogueroviauka Ñandejára ojopyetereiha ñanendive ha ndohejaiha voi javyʼa (1 Juan 5:3). Ñaimetereíramo umi tapicha opensáva ndive upéicha, ikatu ñandegueraha vai. Peteĩ ermána orekóva 24 áño hoʼavaʼekue tekovaípe, ha haʼe omombeʼu mbaʼéicha rupípa oiko hese upéva: “Aju chejúnta vai ha nañemoĩvaiséi rupi che amigokuérandi haʼa tekovaípe”. Oimevaʼerã ñandéve avei ñane amigokuéra ñandejopýmava upéicha.
w04 15/7 31 párr. 6
“Pe persóna iñarandúva ojasegura porã raẽ la ojapótavare”
Pe iñarandu ha ihústova ojapóva álgo orekógui konosimiénto, katuete oñevendesíta. Salomón heʼi porã vaʼekue: “Pe ihústova okaru hyg̃uatãha meve, péro pe iñañáva pyʼa katu nandi vera” (Proverbios 13:25). Jehová oikuaa la iporãvéva ñandéve g̃uarã entéro mbaʼépe: Ñande rogapýpe, mbaʼéichapa jatrata vaʼerã ñande rapichakuérape, predikasiónpe, ha oĩ jave ñandekorrehíva. Ñanearandu ha jasegíramo pe konsého oĩva la Bíbliape, katuete jaiko porãitereíta.
Óro kuʼi oĩva la Bíbliape
Mitãrusu, ehejákena Ñandejára Ñeʼẽ tanesãmbyhy
8 Heta vése tuvakuéra okorrehi jave ifamíliape heʼimantevaʼerã chupekuéra mbaʼépepa ojavy. Ha heʼiháicha Ñandejára Ñeʼẽ avavépe voínte nañandegustái ojeʼéramo ñandéve moõpa jajavy (Heb. 12:11). Upévare, mbaʼépa nepytyvõta ani hag̃ua ndepochy nde tuvakuérare ndekorrehi jave? Nemanduʼákena nderayhu rupínte oñemoñeʼẽha ndéve (Pro. 3:12). Haʼekuéra ndoipotái resẽ vai, oipota uvei oiko ndehegui peteĩ tapicha hekoporãva. Nde ru ha nde sy oikuaa porã nderejáramo reiko ne akãre nanderayhuihahína (elee Proverbios 13:24). Avei ani nderesarái nemitã rupi pyʼỹi rejavytaha. Upéicharõ, nde tuvakuéra oñemoñeʼẽ jave ndéve reñehaʼãvaʼerã rejapysaka porã hesekuéra. Upéichamante nearandúta ha heʼiháicha Ñandejára Ñeʼẽ ‘upéva iporãve pláta ha órogui’ (Pro. 3:13, 14, ÑÑB).
19-25 DE MAYO
TESÓRO OĨVA ÑANDEJÁRA ÑEʼẼME PROVERBIOS 14
Ñapensa porãkena la jajapótavare oiko jave peteĩ desástre
Ñamombaʼékena ñande rekove, pe rregálo porãite oúva Ñandejáragui
10 Heta vése ningo ndaikatúi jaevita umi mbaʼe ikatúva oapeligra ñande rekove. Upéva oiko jepi por ehémplo oiko jave peteĩ desástre naturál, epidémia térã umi mbaʼe ipeligróso ha ivioléntova. Oiko jave koʼã mbaʼe ñande ñañehaʼã ani hag̃ua jaapeligraiterei ñande rekove. Por ehémplo ñaneñeʼẽrendu umi autoridakuérape oiko jave koʼãichagua situasión (Rom. 13:1, 5-7). Heta vése ikatu voi ñaiméma preparádo oiko mboyve koʼã mbaʼe ijetuʼuetéva. Upévare iñimportánte ñahendu umi instruksión omeʼẽva umi goviérno térã umi autorida ikatu hag̃uáicha ñaime preparádo oiko jave koʼã mbaʼe. Por ehémplo ikatu jaguereko y térã tembiʼu noñembyaíriva ha peteĩ votikín de primeros auxílios ikatútava jaipuru oiko sapyʼárõ koʼã mbaʼe.
11 Oikóramo peteĩ epidémia pe lugár jaikohárupi, ¿mbaʼépa iporã jajapo upéicha jave? Iporãta ñaneñeʼẽrendu umi autoridakuéra heʼívape, por ehémplo jajepohéi meme, ñamantene pe distansiamiénto físiko, jaipuru tapavóka ha jajapo avei kuarenténa. Ñaneñeʼẽrendúramo koʼã mbaʼépe jahechaukáta ñamombaʼetereiha ñande rekove pe rregálo porãite Jehová omeʼẽva ñandéve.
12 Oiko jave peteĩ mbaʼe ijetuʼúva térã oĩ jave peteĩ pelígro, ñahendu jepi umi informasión japu térã ndasiertopáiva oñemombeʼúva ñane amigokuéra ha ñane vesinokuéra apytépe, térã téle ha rrádiope. Ñande jaguerovia rangue entéro mbaʼe ojeʼéva ñandéve, tekotevẽ ñahendu umi informasión ijexaktovéva omeʼẽva pe goviérno ha umi doktorkuéra (elee Proverbios 14:15). Avei ñande ñaneñeʼẽrenduse pe Kuérpo Governántepe ha avei pe sukursálpe heʼívo ñandéve mbaʼéichapa jajapo vaʼerã umi rreunión ha predikasión, pórke haʼekuéra oñehaʼãmbaite okonsegi umi informasión isegurovéva omeʼẽ mboyve ñandéve peteĩ instruksión (Heb. 13:17). Ñaneñeʼẽrendúramo chupekuéra ikatúta japrotehe ñande rekove ha avei ñande rapichakuéra rekove, ha péicha ikatúta oñeñeʼẽ porã pe kongregasión rehe ñane komunidápe (1 Ped. 2:12).
Jasegíkena Sadoc ehémplo ha ñandepyʼaguasu
11 ¿Mbaʼéichapa ikatu jasegi Sadoc ehémplo ha ñaipytyvõ ermanokuérape ipeligrósoramo jepe? Tekotevẽterei jajapo koʼã mbaʼe: 1) Jasegi umi instruksión. Oiko jave álgo ipeligrósova, tekotevẽterei ñaneñeʼẽrendu jasegi hag̃ua unído. Upévare, jajapókena umi mbaʼe heʼíva ñandéve pe sukursál ñande paispegua (Heb. 13:17). Umi ansiáno pyʼỹi olee jey vaʼerã umi instruksión heʼíva mbaʼéichapa jajeprepara vaʼerã oikóramo g̃uarã peteĩ desástre ha mbaʼépa jajapo vaʼerã oiko aja (1 Cor. 14:33, 40). 2) Ñandepyʼaguasúkena péro ñañatende porã (Prov. 22:3). Tekotevẽ ñapensa porã jajapo mboyve álgo ha ndovaléi avei jajapeligra rei. 3) Ñakonfiákena Jehováre. Ñanemanduʼákena Jehová oñeinteresaha enterovévare ha ndoipotaiha ojehu mbaʼeve ermanokuérape. Haʼe ñandeapojáta ñaipytyvõ hag̃ua umi ermánope ojehuʼỹre ñandéve mbaʼeve.
Óro kuʼi oĩva la Bíbliape
it-1 423
Jakalkula porã la jajapótava
Upéicharõ jepe, ikatu oĩ ndaijaʼéiva umi añetehápe okalkula porãvare la ojapótava. Ikatu hína ko idéa la ohechaukaséva Proverbios 14:17: “Umi hénte aña ndochaʼéi umi okalkula porãvare la ojapótava”. Pyʼỹinte umi nopensaporãiva la ojapótavare, ndaijaʼéi umi opensa porãvare odesidi mboyve. Umi okalkula porãva la ojapótava pórke ojapose Ñandejára volunta ohaʼarõkuaa voi ndojechaʼéi hesekuéra. Jesús heʼi vaʼekue: “Péro peẽ ndapeikói umi hénte ko mundopegua oikoháicha, pórke che poiporavóma ko múndogui, upévare umi hénte ko mundopegua ndaijaʼéi penderehe” (Jn 15:19). Añetehápe ningo pe palávra orihinál ojepurúva ojeʼe hag̃ua ‘okalkula porãva la ojapótava’ heʼíva Proverbios 14:17, ikatu avei ojepuru ojeʼe hag̃ua álgien ijidéa vaiha. Upévare, ko téxto ikatu avei heʼise ndojechaʼeiha umi okalkulávare ojapo hag̃ua ivaíva, ha heta traduksión oipuru upéicha: “Pe okalkulávare ojapo hag̃ua ivaíva, ndojechaʼemoʼãi hese” (DK, Mod; ehecha BAS, BJ, MK ha ótro).
26 DE MAYO AL 1 DE JUNIO
TESÓRO OĨVA ÑANDEJÁRA ÑEʼẼME PROVERBIOS 15
Eipytyvõramo ótrope ndepyʼarorýta
Ñanderekopotĩkena ha ñaneñeʼẽrendu Jehovápe
16 Job hory ha imbaʼeporãvaʼekue avei omog̃uahẽvo hógape hapichakuérape (Job 31:31, 32). Ha ñande ndajarekóiramo jepe heta mbaʼe Job oreko haguéicha, ikatu ‘torypápe ñamog̃uahẽ ñande rógape ñande rapichakuérape’ (Rom. 12:13, JMP). Ñainvitáramo chupekuéra okaru hag̃ua, natekotevẽi katuete jajapo hetaiterei hiʼupy, oimeraẽ mbaʼemínte ikatu jaʼu oñondivepa. Ñandejára Ñeʼẽ heʼi voi: “Iporãve jaʼu kumanda ñanderayhúva ndive jaʼu rangue soʼo kyra ñanderayhuʼỹva ndive” (Pro. 15:17). Upéicharõ nañaikotevẽi heta mbaʼére ñañomokyreʼỹ ha jahasa porã hag̃ua ñane ermanokuérandi.
Ñañomokyreʼỹkena, “koʼýte koʼág̃a”
16 Sapyʼánte ikatu ñapensa ijetuʼutaha ñandéve jaʼe hag̃ua álgo omokyreʼỹtava ótrope. Péro añetehápe ndahasýi hína jajapo upéva. Por ehémplo, jasaluda jave peteĩ ermánope ikatu japukavy chupe. Péro haʼe opytánterõ isério ikatu oindika ñandéve orekoha peteĩ provléma ha oñemongetaseha peteĩ persónandi. Jajapysaka porãramo la heʼívare, upévantema voi ikatu tuicha okonsola chupe (Sant. 1:19).
17 Peteĩ ermáno imitãva hérava Henri ou vaʼekue oñedesanima pórke unos kuánto ihénte oheja Jehovápe. Umíva apytépe oĩ kuri itúa, oservi vaʼekue kómo ansiáno. Peteĩ superintendénte de sirkuíto ohechakuaa Henri ndovyʼaveiha ha oinvita chupe oho hag̃ua peteĩ kafeteríape. Ko mitãrusu omombeʼu pe ermánope la ojopýva chupe ha haʼe ojapysaka porã hese. Henri oñemeʼẽ enkuénta osegíramo ifiél oipytyvõ porãvetaha ihentekuérape oservi jey hag̃ua Jehovápe. Avei umi mbaʼe heʼíva Salmo 46, Sofonías 3:17 ha Marcos 10:29, 30-pe okonsolaiterei chupe.
18 ¿Mbaʼépa ikatu ñaaprende Marta ha Henri ehémplogui? Oimeraẽva ikatuha oporokonsola ha oporomokyreʼỹ. Rréi Salomón oskrivi vaʼekue: “Igustoite peteĩ persóna oikuaáramo la heʼi vaʼerã oñekotevẽve jave. Peteĩ persóna ovyʼáramo nderecha jave, upéva nembovyʼa avei. Ñanemokyreʼỹete ningo ñahendúramo peteĩ notísia porã” (Prov. 15:23, 30). ¿Mbaʼépa ikatu jajapo jahecháramo peteĩ ñande rapicha ndovyʼaiha térã oñedesanima? Jaleekuaa chupe peteĩ artíkulo osẽ vaʼekue Ñemañaháme térã ñande sítiope oĩva Internétpe. Pablo heʼi vaʼekue avei japurahéiramo oñondive umi kántiko ikatuha ojapo porã ñanderehe. Haʼe oskrivi vaʼekue: “Pesegíkena pemboʼe ha pemokyreʼỹ pende rapichápe, upearã peipuru umi sálmo, umi músika ojepurúva ojepurahéi hag̃ua Ñandejárape, umi músika omombaʼeguasúva ha oagradeséva chupe. Pegueropurahéikena Jehovápe pende pyʼaite guive” (Col. 3:16; Hech. 16:25).
Óro kuʼi oĩva la Bíbliape
ijwbq artíkulo 39 párr. 3
¿Ikatúpa peteĩ kristiáno oasepta tratamiénto médiko?
2. ¿Iporãtapa akonsulta ótro doktorkuérandi? Jaikuaa ningo “heta omeʼẽva konsého porã” ideprovechotaha ñandéve, koʼýte jarekóramo peteĩ mbaʼasy igráveva (Proverbios 15:22).
2-8 DE JUNIO
TESÓRO OĨVA ÑANDEJÁRA ÑEʼẼME PROVERBIOS 16
Mbohapy porandu ñanepytyvõtava jadesidi porã hag̃ua
Mitãrusu ha mitãkuñanguéra, pedesidi porãkena
11 Añetehápe javyʼave jaservíramo Jehovápe (Prov. 16:20). Ha amalisia Baruc, Jeremías sekretário, hesarái kuri upévagui. Haʼe ndovyʼaguasuvéi Ñandejára servísiope, upévare Jehová heʼi chupe: “Nde reiko reheka ndejupe g̃uarã umi mbaʼe tuicháva. Ani reheka. Eñatende porãke, che aguerúta mbaʼe vai opa oikóvape [...] ha ndéve katu rosalváta reho rehohápe” (Jer. 45:3, 5, NM). ¿Mbaʼépa nde repensa? ¿Mbaʼépa ombovyʼavéne Barúcpe? ¿Oikóramo oheka umi mbaʼe tuicháva, térãpa iñeʼẽrendu Jehovápe ha ojesalva Jerusalén oñehundívo? (Sant. 1:12.)
12 Peteĩ ermáno hérava Ramiro, ovyʼa ikatu haguére oporopytyvõ. Haʼe heʼi: “Anase peteĩ família mboriahumíme ha roiko peteĩ puevlítope kordilléra de los Ándespe. Oñepresenta chéve peteĩ oportunida tuicháva che ermáno majór heʼírõ guare opagataha che estúdio universidápe. Upérõ ajevautisa ramoite kuri ha upe javete peteĩ prekursór cheinvita ava hag̃ua pe puevloʼi haʼe oservihápe. Upémarõ ava upépe, aaprende aporopelukea hag̃ua ha aavri peteĩ pelukería ikatu hag̃uáicha añemantene. Heta hénte ohendu porã pe mensáhe ha oñepyrũ ostudia la Biblia. Upe rire ava peteĩ kongregasión pyahúpe, oñeñeʼẽhápe peteĩ idióma indíhena. Koʼág̃a ohasáma 10 áño añepyrũ hague che prekursorádo, ha avyʼaiterei ikatu haguére aipytyvõ umi héntepe ontende hag̃ua pe marandu porã iñeʼẽtépe voi. Aikuaa porã ndaiporiha ambue mbaʼe peichaite peve chembovyʼátava”.
¿Ñañehaʼãmapa ñakambia?
OPAVAVE ningo jajepokuaa jaiko ñande tuvakuéra ñanemongakuaa haguéicha ha jasegi umi kostúmbre oĩva jaikohárupi. Pór ehémplo, ñañemonde ha ñañekomporta ñane hénte ha ñane amigokuéra ojapoháicha, ha ñandegusta umi tembiʼu ojejapóva ñane retãme.
2 Péro oĩ heta mbaʼe iñimportantevéva umi tembiʼu térã ñañemonde lájagui. Por ehémplo, ñanemitã guive ningo oĩ ñanemboʼéva mbaʼépa oĩ porã ha mbaʼépa oĩ vai. Péro la hénte nopensái peteĩchapa, hetápe g̃uarã umi mbaʼe iporãva, ótrope g̃uarã ivai. Heta vése katu ñane konsiénsia ñanemomýi jadesidi hag̃ua. La Biblia heʼi voi: “Umi [...] orekoʼỹva Ñandejára Léi, sapyʼánte ijeheguiete ojapo pe Léi heʼíva” (Rom. 2:14, NM). Péro ¿heʼisépa upéva ikatuha jasegi oimeraẽ kostúmbre ñaaprende vaʼekue ñanemitã guive térã ojesegíva jaikohárupi, la Biblia ndoproivíri haguérente?
3 Ñandejára Ñeʼẽme ningo jatopa mokõi mbaʼe ohechaukáva mbaʼérepa kristianokuéra ndosegíri vaʼerã oimehaichagua kostúmbre. Primero: “Oĩ tape ñaimoʼãva naikarẽiha, amo huʼãme katu jajuhu ñemano” (Prov. 16:25). Ñaneimperfékto rupi nañandekatupyrýi ñasẽ porã hag̃ua ñandejehegui reínte jajavyʼỹre (Prov. 28:26; Jer. 10:23). Segundo: Satanás ningo “ko múndo jára”, ha haʼe odesidi mbaʼépa iporã térã ivai, ha mbaʼépa ojejapo ha ojeguerohoryve vaʼerã (2 Cor. 4:4, NM; 1 Juan 5:19). Upéicharõ, jaipotáramo Jehová ñanderayhu ha ñanevendesi, ñañehaʼãmbaite vaʼerã jasegi pe konsého oĩva Romanos 12:2-pe (elee).
Óro kuʼi oĩva la Bíbliape
it-1 707 párr. 4
Disiplína
Ñaneñeʼẽrendu térã nahániri. Umi iñañáva, umi hénte ñembotavy ha umi hekovaíva ndochaʼéi Jehová disiplínare pórke nopenái hese hikuái (Sl 50:16, 17; Pr 1:7). Péro, umi mbaʼe vai ohupytýva chupekuéra oñembotavy haguére upéicha, umíva voi haʼéma peteĩ disiplína haʼéva jepi peteĩ kastígo ipohýiva. Ndareíri ko proverbio heʼi: “Umi itavýva vyrorei ojapo, haʼete haʼekuéra jeýnte ojekastigáva” (Pr 16:22). Upevakuére ikatu ou imboriahu, oñemotĩ, ojagarra chupe mbaʼasy ha ikatu voi ou omano voive. Umi israelita rehe oiko vaʼekue ohechauka tuichaiterei ojeperdeha ojejapóramo upéicha. Haʼekuéra nopenái pe disiplínare Ñandejára oakonseha térã okorrehírõ guare chupekuéra umi profetakuéra rupive. Nopenáinte vaʼekue avei hikuái Jehová odisiplinárõ guare chupekuéra oipeʼávo iproteksión ha ivendisión chuguikuéra. Amo ipahápe ohupyty chupekuéra pe disiplína ipohyietéva ojeʼéma vaʼekue: Ojegueraha chupekuéra ótro paíspe ha opyta nandi pe lugár oiko hague hikuái (Jer 2:30; 5:3; 7:28; 17:23; 32:33; Os 7:12-16; 10:10; Sof 3:2).
9-15 DE JUNIO
TESÓRO OĨVA ÑANDEJÁRA ÑEʼẼME PROVERBIOS 17
Eiko pyʼaguapýpe ne matrimóniope
g 9/14 11 párr. 2
¿Mbaʼépa ikatu jajapo pono ñandepyʼaro?
Jajepyʼamongeta jahechakuaa hag̃ua mbaʼéichapa ñaime. La Biblia heʼi oĩha umi persóna pyaʼeterei ipochy reíva (Proverbios 29:22). ¿Ndépa upéicha avei? Eñeporandumína: “¿Apytápa chepyʼaro jepi? ¿Chepochy reípa? ¿Ambotuichasépa peteĩ mbaʼe vyroreínteva?”. La Biblia heʼi umi oñoamigoitéva jepe ikatuha ojesepara oimérõ osegi imanduʼa la oiko vaʼekuére (Proverbios 17:9; Eclesiastés 7:9). Umi omendávare ikatu avei oiko ko mbaʼe. Ehechakuaáramo ndepyʼaroha, eñehaʼãkena nepasiensiave ne ménare (prinsípio bíblico: 1 Pedro 4:8).
Ñasolusionákena umi provléma
1. Ere mbaʼe moméntopepa peñeʼẽkuaa pe témare.“Oĩ peteĩ tiémpo opa mbaʼerã [...]. Oĩ tiémpo ñakirirĩ hag̃ua ha tiémpo ñañeʼẽ hag̃ua” (Eclesiastés 3:1, 7). Jahecha haguéicha yvateve, jaiko vai jave ikatu ñandepochyeterei ha ñañeñandu vaieterei. Upéva ojehúramo ndéve, eñekontrolakuaa vaʼerã, ndereikói vaʼerã ejodiskutise. Eñeñandu vaieterei mboyve, ejejoko ha ejerure ne ména térã ne rembirekópe peñeʼẽ hag̃ua upéinte. Ha ndapepytavaimoʼãi oñondive esegíramo ko konsého bíblico: “Umi oikóva omoñepyrũ pléito haʼete oipeʼáva pe varréra ojokóva umi y. Repilláramo ojeiko vaitaha, upe mboyve rehóma vaʼerã upégui” (Proverbios 17:14).
Upéicharamo jepe, oĩ avei “tiémpo ñañeʼẽ hag̃ua”. Umi ñanáicha avei, umi provléma okakuaavéta ndapehekáiramo chupe solusión. Upévare naiporãmoʼãi peheja reínte la provléma ha pehaʼarõ oñesolusiona ijehegui rei. Ha eñeʼẽjokóramo ne ména térã ne rembirekópe, ehechaukákena errespetaha chupe erévo chupe mbaʼe moméntopepa ikatu peñemongeta jey upe témare ohasa mboyve heta tiémpo. Péicha pejapóramo penepytyvõta mokõivépe pesegi hag̃ua ko konsého bíblico: “Ani pesegi pendepochy kuarahy oike peve” (Efesios 4:26). Ha jaikuaaháicha, upe rire rekumpli vaʼerã la ere vaʼekue.
Óro kuʼi oĩva la Bíbliape
Ñasẽ porãta jarrespetárõ Ñandejárape
3 Ñande ningo ñañatende la oĩvare ñane korasõme pórke Jehová omaña hína mbaʼépa oĩ ñande pyʼapýpe. ¿Mbaʼépa heʼise upéva? Jehová ningo ohecha mombyryve la héntegui ha oikuaa porã opa mbaʼe jarekóva ñande pyʼapýpe (elee Proverbios 17:3). Jehová ñanderayhúta jasegíramo ñapensa umi konsého haʼe omeʼẽvare ha ñanepytyvõtava jaikove hag̃ua pára siémpre. Péicha jajapóramo núnka nañapermitimoʼãi ñandegueraha vai umi hénte rekovai ni ndajagueroviamoʼãi umi japu omosarambíva Satanás ha ko múndo aña (Juan 4:14; 1 Juan 5:18, 19). Jahayhu ha jarrespetavéta Jehovápe amáske ñañemoag̃ui hese, upéicha rupi ndajajaposemoʼãi voi mbaʼeve omoñeñandu vaítava ñande Ru yvagapeguápe ha ni noñantohamoʼãi ñandéve jajapo álgo ivaíva chupe g̃uarã. Oñepresentáramo ñandéve peteĩ tentasión ñapensátama voi: “Ñandejára ningo cherayhueterei ha ojapóma hetaiterei mbaʼe cherehehápe, ¿mbaʼéicha piko upéicharõ ajaposéta álgo ivaíva ikóntrape?” (1 Juan 4:9, 10).
16-22 DE JUNIO
TESÓRO OĨVA ÑANDEJÁRA ÑEʼẼME PROVERBIOS 18
Emokyreʼỹ umi hasykatúvape
Pe arandu añeteguáva oñeʼẽ enterove ohendu hag̃uáicha
17 Epensa eñeʼẽ mboyve. Nañañatendéiramo umi mbaʼe jaʼévare ikatu japerhudika vai ñande rapichápe. La Biblia heʼi: “Oĩ nopensáiva oñeʼẽ hag̃ua, ha umi mbaʼe heʼíva ñandekutu rasy peteĩ espádaicha, péro umi iñarandúva heʼíva haʼete peteĩ pohã ñanemongueráva” (Prov. 12:18). Ñande ningo siémpre jajogueraha porãta ñande rapichakuérandi ñañatendéramo ani hag̃ua ñamorasambi upérupi mbaʼépepa ojavy ñane ermanokuéra (Prov. 20:19). Ani hag̃ua operhudika ñande rapichápe umi mbaʼe jaʼéva, iporãitereíta jaleéramo la Biblia ha jajepyʼamongeta hese (Luc. 6:45). Ñande jajepyʼamongetáramo umi mbaʼe jaleévare la Bíbliape, ñane arandu “osyrýta voi peteĩ rríoicha”, ha upéva omoñeñandu porã ha omokyreʼỹta ñande rapichakuérape (Prov. 18:4).
mrt artíkulo 19, rrekuádro
¿Mbaʼépa ejapokuaa ejúramo nderasy ehaʼarõʼỹve jave?
Ehendukuaa vaʼerã. Peteĩ mbaʼe oikoitéva eipytyvõ hag̃ua ne amígope haʼe ehendu porã chupe omombeʼuse jave ndéve álgo. Natekotevẽi erresponde opa mbaʼe heʼíva. Sapyʼánte oikotevẽnte omombeʼu mbaʼéichapa oñeñandu. Ani ejepyʼapy la heʼívare ndéve ha ani ehusga chupe. Naiporãi avei epensa eikuaa porãha mbaʼéichapa oñeñandu, espesiálmente ndojehecháiramo físikamente mbaʼéichapa oafekta hína chupe imbaʼasy (Proverbios 11:2).
Eñeʼẽ eporomokyreʼỹ hag̃uáicha. Sapyʼánte ikatu ndereikuaái mbaʼépa eréta, péro eréramo ne amígope reikuaaha mbaʼeichaitépa ijetuʼu pe situasión ohasávare hína iporãvéta ke la ekirirĩnteramo. Ndoúiramo mbaʼeve neakãme, ikatu ere peteĩ mbaʼe isensillomínteva péro nde pyʼaite guive. Por ehémplo: “Ndaikuaáingo mbaʼépa haʼéta ndéve, péro aipotánte eikuaa rohayhuetereiha”. Ha koʼã mbaʼe anínte ere: “Ikatu kuri ivaive la situasión”, térã: “Por lo méno nandejagarrái katu kóa térã amoichagua mbaʼasy”.
Ikatu avei einvestiga ne amígo mbaʼasy. Katuete haʼe oagradesetereíta péicha reñehaʼãramo rentende porã la ohasávare hína, ha upéicha avei umi mbaʼe eréva katuete oipytyvõvéta chupe (Proverbios 18:13). Eñatendénte ani emeʼẽ umi konsého ndojejeruréi vaʼekue ndéve.
Eime eipytyvõ hag̃uáicha. Eporandu mbaʼépa ikatu ejapo repensa rangue reikuaa porãha la oikotevẽva ne amígo. Ikatu hína haʼe ndoikoséi peteĩ kárgaramo ótrope g̃uarã, ha upévare norrekonoséi oikotevẽha ajúda. Upévare, ¿mbaʼe ere ejeofreséramo eho hag̃ua supermerkádope ejogua hag̃ua umi mbaʼe oikotevẽtava, térã emopotĩ hag̃ua hóga ha umícha? (Gálatas 6:2).
Ani eñentrega. Sapyʼánte ne amígo okanseláta umi mbaʼe peplanea vaʼekue pejapo oñondive, térã heʼíta ndahetiaʼeiha ha noñeʼẽseiha. Upévare nepasiénsia ha rentende vaʼerã avei, péro esegi eñeinteresa hese ha ehecha mbaʼépa oikotevẽ hína (Proverbios 18:24).
Ñaipytyvõkena umi orekóvape provléma emosionál
“Peñeʼẽkena pekonsola hag̃uáicha umi oñedeprimívape” (1 TESALONICENSES 5:14).
Ikatu hína pe ñane amígo ojepyʼapy ha opensa naiñimportanteguasuiha. Jaasegura vaʼerã chupe jajepyʼapyha hese, ha jaʼe umi mbaʼe omokyreʼỹ ha okonsolátava chupe. Ani jajepyʼapyeterei ndajaikuaáirõ g̃uarã mbaʼépa jaʼéta, ani jaheja upéva ñandejoko.
“Peteĩ amígo verdadéro nderayhúta tódo el tiémpo” (PROVERBIOS 17:17).
Ñapensánte rangue ñande jaikuaaha voi la oikotevẽva ñane amígo, iporãvéta ñaporandúramo mbaʼéichapa ikatu ñaipytyvõ chupe. Oiméramo ijetuʼu ñane amígope heʼi hag̃ua mbaʼépa la oikotevẽva, ikatu jaʼe chupe jajapo hag̃ua álgo oñondive. Por ehémplo ñasẽ jaguata, jaha ñambaʼejogua, ñamopotĩ térã ñaipytyvõ chupe ótra kósa oikotevẽvape (Gálatas 6:2).
“Penepasiénsiakena” (1 TESALONICENSES 5:14).
Ikatu hína sapyʼánte ñane amígo térã amíga noñeʼẽséi, upéicha jave jaʼénte vaʼerã oñeʼẽse vove ñahendutaha chupe. Tekotevẽ ñanepasiénsia ha ñañemoĩ ilugárpe. Aníkena ñandepochy heʼíramo álgo heʼiʼỹ vaʼerã, osuspendérõ ñandehegui algún plan térã sapyʼánte ipire vai léntorõ, umíva ningo pe mbaʼasy káusarente (Proverbios 18:24).
Óro kuʼi oĩva la Bíbliape
it-2 1063
Suérte
Pe suérte térã sortéo ningo haʼe peteĩ kostúmbre yma guare ojejapóva ojedesidi hag̃ua álgo. Upearã oñemoĩ peteĩ ao ruguáipe, algúno “rypaʼũme”, térã peteĩ mbaʼyrúpe yvyra pedasoʼi térã ita michĩva ha oñembokacha. Pe sortéope osẽva, upéva la ojeporavóva. Pe juraménto ojejapoháicha avei, pe sortéo ojejapo jave oñeñemboʼe jepi. Ko ñemboʼe ojejapo hatã porã oñehendu hag̃uáicha térã avave nohendúiramo jepe raʼe ojekuaáma ojejapo hague, péicha ojejeruréma Jehovápe oipytyvõ hag̃ua. Pe palávra hebrea “suérte” (goh·rál) ojepuru literálmente térã avei oñeñeʼẽ hag̃ua pe “párte” térã “erénsia” rehe (Jos 15:1; Sl 16:5; 125:3; Is 57:6; Jer 13:25).
Mbaʼéichapa ojepuru jepi. Proverbios 16:33 heʼi: “Ojeity suérte ojekuaa hag̃ua mbaʼépa la oikótava, ha Jehová hína upe odesidíva la osẽ vaʼerã”. Israélpe ojeity jave suérte ojejapo anivéma hag̃ua ojeiko vai: “Ojeitýramo suérte opa la pléito, ha mokõi ipoderósova ojesepara pyʼaguapýpe” (Pr 18:18). Ndojepurúiva umi depórtepe g̃uarã, umi diversionrã, térã plátare ojehuga jave. Ndaipóriva umi apuésta ni umi pérdida ni ganánsia. Ndojejapóiva pe témplo henyhẽ hag̃ua rrikésagui ni oñemborríko hag̃ua umi saserdóte, ni oñembyaty hag̃ua pláta oñepytyvõ hag̃ua umi imboriahúvape. Péro umi soldádo rrománo katu osorteárõ guare Jesús ao, ojapo upéva opensávo ogana hag̃uáicha hikuái hese, ojeprofetisa haguéicha Salmo 22:18-pe (Mt 27:35).
23-29 DE JUNIO
TESÓRO OĨVA ÑANDEJÁRA ÑEʼẼME PROVERBIOS 19
Jahechaukákena ñane ermanokuérape ñande haʼeha iñamígo
¿Mbaʼéichapa ikatu jajoayhu ñande pyʼaite guive?
16 Jajesareko vaʼerã umi mbaʼe porã orekóvare ñane ermanokuéra ha ani idefektokuérarente. Ñamoĩmi peteĩ ehémplo, ñapensami ñañembyatyha ermanokuérandi ñande rógape. Upéi ohopotápe hikuái ñasẽ oñondivepa la fótope ha ñanohẽ voi unos kuánto oĩrõ g̃uarã nosẽporãiva. Upe rire jarrevisa ha jatopa peteĩva umi fótope peteĩ ermáno nosẽporãi hague. ¿Mbaʼépa jajapóta? Ñaeliminánte, pórke jareko hetave fóto enterovéva osẽ porã haguépe ha pe ermáno avei opukavy haguépe.
17 Ñakomparamína umi fóto umi mbaʼe jahasávare ñane ermanokuérandi. Ñande ningo jareko heta rrekuérdo porã hendivekuéra, péro ñamoĩ chupe upeichahágui peteĩ ermáno térã ermána ojapoha álgo nañandegustapáiva. ¿Jasegítapa ñapensa upévare térã jaipeʼáta ñane akãgui ñaeliminarõguáicha ñande selulárgui peteĩ fóto osẽ vai haguépe álgien? (Prov. 19:11; Efes. 4:32). Ikatúta ningo ñanderesarái ñane ermanokuéra fálla mimígui, pórke jahasáma hetaiterei mbaʼe porã hendivekuéra ha ñanemanduʼave umívare ke la idefektokuérare. Upévare, ñañehaʼãkena siémpre ñanemanduʼa umi mbaʼe porã jahasávare ñane ermanokuérandi.
Jasegíkena japorohayhuve
10 Ñande jaheka jepi mbaʼépepa ikatu ñaipytyvõ ñane ermanokuérape (Heb. 13:16). Jahechamína Ana ojapo vaʼekue, pe ermána ñañeʼẽ vaʼekuére pe ótro artíkulope. Peteĩ torménta vai rire Ana ha iména ovisita peteĩ famíliape. Upépe ohechakuaa hikuái umi ermáno róga técho oñehundi hague ha upévare ijaokuéra ikyʼapaite chuguikuéra. Ana heʼi: “Rogueraha ijaokuéra, rojohéi, roplancha ha rodovla porã asy rogueraha jey hag̃ua chupekuéra. Oréve g̃uarã ningo sonseraite kuri la rojapóva, péro rojapo rupi upéva ropyta oñoamigoite upe famíliandi”. Ana ha iména ohayhu rupi umi ermanokuérape ohecha mbaʼépa oikotevẽ hikuái oipytyvõ hag̃ua chupekuéra (1 Juan 3:17, 18).
11 Ñanembaʼeporã ha jahechauka jave japorohayhuha, ñande rapichakuéra ohechakuaa ñañehaʼãha hína jasegi Jehová ehémplo. Núnka ndajaikuaapamoʼãi mbaʼeichaite pevépa oapresia umi ermanokuéra la jajapóva hesehapekuéra. Karen, pe ermána ñamensionáma vaʼekue, imanduʼa mbaʼeichaitépa oipytyvõ chupe umi ermanokuéra. Haʼe omombeʼu: “Che aagradeseterei umi ermána chegueraha vaʼekuépe predikasiónpe. Haʼekuéra ou vaʼekue chereka che rogaitépe voi, upéi cheinvita roʼu hag̃ua álgo ha upéi chegueru jey hikuái ógape. Koʼág̃a apensávo ahechakuaa mbaʼeichaitépa ojesakrifika hikuái cherehehápe ha ojapo upéva cherayhúgui”. Ñarrekonose vaʼerã ndahaʼeiha enterovéva ikatútava ojapo álgo oagradese hag̃ua ñandéve la jajapóvare. Karen heʼi voi: “Chéngo apagapase voi umi ermánape la umi mbaʼe porã ojapo vaʼekuére cherehehápe, péro ni ndaikuaái moõpa oiko hikuái, Jehová katu si, upévare añemboʼe chupe oipytyvõ hag̃ua káda ermánape che vése”. Siertoite la heʼíva Karen, Jehová ohechapaite umi mbaʼe michĩvéva jepe jajapóva ótro rehehápe. Ha chupe g̃uarã haʼete voi opytáva odeve ñandéve pe jajapóvare (elee Proverbios 19:17).
Jasegíkena jahechauka ojupe mborayhu ifiélva
6 Ñaanalisáramo mbaʼépa oiko vaʼekue Pablo ha iñirũnguérare oñehundírõ guare ivarkokuéra, jahechakuaáta mbaʼépa heʼise pe mborayhu jahechaukáva umi persónape en henerál. Upérõ guare, umi oláda ogueraha chupekuéra pe ísla de Máltape. Umi hénte ko islapegua ningo ndoikuaái vaʼekue Pablo ni iñirũnguérape, ha noĩri avei ovligádo oñangarekóvo hesekuéra. Upéicharõ jepe koʼã hénte orresivi porãiterei chupekuéra ha mborayhúpe oñatende hesekuéra (Hech. 28:2, 7). Umi hénte Maltapegua ningo imbaʼeporãiterei, péro ojapo upéva Pablo ha iñirũnguéra ojecha vaíguinte, ha hiʼarive ni ndoikuaái voi chupekuéra. Upéicharõ koʼã hénte ohechaukánte pe mborayhu ojechaukáva umi persónape en henerál, ha ndahaʼéi mborayhu ifiélva.
7 La odiferensiáva pe mborayhu ifiélva pe mborayhu jahechaukávagui umi persónape en henerál haʼe hína pe motivasión jarekóva. ¿Mbaʼérepa Ñandejára siervokuéra yma guare ohechauka vaʼekue mborayhu ifiélva? Umi ohechauka vaʼekue mborayhu ifiélva ningo ndojapói upéva ojapo vaʼerãgui reínte térã oñeñandúgui ovligádo, síno pórke ikorasõite guive ojapose kuri upéva. Jahechamína rréi David ehémplo. Haʼe ningo ikorasõite guive ohechaukase vaʼekue mborayhu ifiélva iñamígo Jonatánpe, jepe itúa ojukase kuri Davídpe. Heta áño omano rire jepe Jonatán, David osegi vaʼekue ohechauka chupe mborayhu ifiélva otrata porãvo itaʼýra Mefibósetpe (1 Sam. 20:9, 14, 15; 2 Sam. 4:4; 8:15; 9:1, 6, 7).
Óro kuʼi oĩva la Bíbliape
it-1 545
Konsého, konsehéro
Jehová hína pe iñaranduvéva entéro mbaʼépe (Is 40:13; Ro 11:34). Itaʼýra ikatu ñandegia, haʼe ningo pe “Konsehéro Katupyry” orresivi ha osegi vaʼekue Itúa konsého ha oreko Ijespíritu sánto (Is 9:6; 11:2; Jn 5:19, 30). Péva ohechauka pe konsého ideprovécho hag̃ua ojeguereko vaʼerãha enkuénta Jehovápe. Oimeraẽ konsého oñemõiva Jehová kóntrape, ndovalemoʼãi mbaʼeverã ha ndaikatúi voi oñehenói konsého (Pr 19:21; 21:30).
30 DE JUNIO AL 6 DE JULIO
TESÓRO OĨVA ÑANDEJÁRA ÑEʼẼME PROVERBIOS 20
Noviásgo ñanepytyvõtava jadesidi porã hag̃ua
¿Mbaʼéichapa pene noviásgo ikatu omombaʼeguasu Jehovápe?
3 Peteĩ mbaʼe iporãitereíva ningo la oñeñepyrũ peteĩ noviásgo. Péro avei iñimportanteterei, pórke ikatu oñepyrũ hína peteĩ matrimónio. Pe omendaha díape umi nóvio opromete Jehová renondépe ojoayhu ha ojorrespetataha hikuái oikove aja entéro. Upévare pepensa porã vaʼerã pejapo mboyve ko kompromíso (elee Proverbios 20:25). Pe noviásgo ningo penepytyvõta mokõivépe pejokuaa porã hag̃ua ha pedesidi porã hag̃ua. Upe tiémpope pehecháta pemendátapa térãpa pejedeháta. Pedesidíramo pejedehataha, upéva ndeʼiséi hína osẽ vai hague la noviásgo. Penemanduʼa vaʼerã maʼerãpa pe noviásgo: Penepytyvõta pedesidi porã hag̃ua.
4 ¿Mbaʼérepa iñimportantete umi oĩva soltéro ontende porã maʼerãpa la noviásgo? Pórke peteĩ soltéro ontende porãramo upéva, nomoñepyrũmoʼãi mbaʼeve avavéndi nopensáiramo hína omenda. Péro ndahaʼéi umi soltéro añónte ontende vaʼerã maʼerãpa peteĩ noviásgo, síno iñimportánte enterove ñantende porã upéva. Por ehémplo oĩ umi opensáva umi oĩva de nóvio omenda vaʼerãha katuete. ¿Ha mbaʼéichapa upéva ikatu oafekta umi oĩvape soltéro? Peteĩ ermána soltéra Estados Unidosgua hérava Melissa heʼi: “Oĩ ningo umi ermáno oipotaitereíva omenda umi oĩva de nóvio. Upéicha rupi oĩ algúno ndojedeháiva ohechakuaáramo jepe ndahaʼeiha ojupe g̃uarã. Ha oĩ avei umi odesidíva ndorekomoʼãiha mbaʼeve avavéndi, péicha ndoikomoʼãi ojepyʼapy mbaʼevére”.
¿Mbaʼéichapa ikatu retopa ne irũrã?
8 ¿Péro mbaʼéichapa ikatu restudia la káso mombyry guivénte? Por ehémplo, umi rreunionhápe térã ojejapo jave umi fiestitaʼi ikatu rehechakuaa mbaʼeichaguápa hína pe persóna, mbaʼéichapa oñekomporta ha ohayhúpa hína Jehovápe. Eñeporandumína: “¿Mávapa iñamigokuéra? ¿Mbaʼe rehepa oñemongeta jepi? (Luc. 6:45). ¿Orekópa umi méta che arekóva avei?”. Ikatu avei eporandu hese umi ansiáno ikongregasionpeguápe térã ótro ermáno iñakãguapývape oikuaa porãva chupe (Prov. 20:18). Ikatu eporandu mbaʼépa ojeʼe hese ha mbaʼe kualidápa oreko (Rut 2:11). Péro estudiaʼi aja upe persónape siémpre ehechauka vaʼerã repororrespetaha. Aníkena eiko hapykuéri tódo el tiémpo, emotĩ chupe ni neentremetído.
¿Mbaʼéichapa pene noviásgo ikatu omombaʼeguasu Jehovápe?
7 ¿Mbaʼépa penepytyvõta peikuaa porã hag̃ua mbaʼeichagua persónapa mokõivéva? Upearã ikatu peporandu ojupe heta mbaʼe ha pejapysaka porã ojuehe. Mokõivéva tekotevẽ pemombeʼu porã ojupe mbaʼéichapa peñeñandu ha penesinséro oñondive (Prov. 20:5; Sant. 1:19). Ikatu pejapo oñondive umi mbaʼe ifasiltahápe peẽme peñemongeta. Por ehémplo pekaru oñondive, pesẽ peguata hetahápe hénte ha pepredika oñondive. Avei penepytyvõta pejokuaa porãve hag̃ua pehasáramo tiémpo pene amigokuéra ha pene famíliandi. Ikatu peorganisa diferénte mbaʼe pejapo hag̃ua ha diferénte persónandi, péicha pehecháta mbaʼéichapa peñekomporta káda uno umícha jave. Péicha ojapo vaʼekue peteĩ ermáno Países Bajosgua hérava Albert oĩrõ guare de nóvio Alicia ndive. Haʼe heʼi: “Rohecha vaʼekue rojapo umi mbaʼe orepytyvõtava rojokuaa porã hag̃ua. Rojapo umi mbaʼe isensíllovante, por ehémplo rokosina oñondive ha rojapo umi tembiapo ogapypegua. Koʼã mbaʼe orepytyvõ rohechakuaa hag̃ua umi mbaʼe porã rorekóva ha avei umi ore defékto”.
8 Avei penepytyvõta pejokuaa porãve hag̃ua pestudiáramo oñondive la Biblia. Pedesidíramo pemenda, peñemotiémpomante vaʼerã upéi pejapo hag̃ua pende estúdio de família, péicha Jehová oĩ hag̃ua pene matrimóniope (Ecl. 4:12). Upévare, ¿mbaʼérepa ndapehechái koʼág̃ama guive pestudia hag̃ua oñondive? Ñanemanduʼákena umi oĩva de nóvio ndahaʼeitiha peteĩ família, ha pe ermáno neʼĩraha gueteri omoakã pe ermánape. Upéicharõ jepe iporãta pejepokuaáramo pestudia oñondive pehechakuaa hag̃ua mbaʼeichagua amistápa pereko káda uno Jehovándi. Max ha Liza, Estados Unidosgua, omombeʼu mbaʼéichapa oipytyvõ vaʼekue avei chupekuéra ostudia oñondive. Pe ermáno omombeʼu: “Roñemoĩ guive de nóvio rostudia umi puvlikasión oñeʼẽva noviásgo, matrimónio ha famíliare. Upéicha rupi ikatu vaʼekue roñemongeta umi mbaʼe iñimportántevare, pórke péicha péichante noroñeʼẽmoʼãi kuri umívare”.
Óro kuʼi oĩva la Bíbliape
it-2 187 párr. 5
Lámpara
Proverbios 20:27 heʼi: “Umi mbaʼe heʼíva umi hénte, Jehovápe g̃uarã haʼete peteĩ lámpara, umíva ohechauka mbaʼépa oreko hikuái ikorasõ ruguaitépe”. Peteĩ persóna “heʼíva” térã oikuaaukáva ótrope, tahaʼe iporãva térã ivaíva ohechauka mbaʼeichagua persónapa haʼe térã mbaʼépa oreko ipyaʼpýpe (ekompara heʼívare Hch 9:1).