¿Mbaʼépa ajapo vaʼerã oiko hag̃ua chehegui testígo de Jehová?

Mateo 28:19, 20-pe Jesús ohechauka porã vaʼekue mbaʼépa ojapo vaʼerã peteĩ persóna oiko hag̃ua chugui testígo de Jehová. Koʼã versíkulo ohechauka mbaʼépa ojapo vaʼerã peteĩ oikoséva Jesús disípuloramo. Ha ikatu jaʼe Jesús disipulokuéra haʼeha avei Jehová testígo pórke oñeʼẽ hese ha odefende chupe.

Páso 1: Eaprende mbaʼépa omboʼe la Biblia. Jesús heʼi vaʼekue isegidorkuérape omboʼe vaʼerãha umi héntepe oiko hag̃ua chuguikuéra idisípulo (Mateo 28:19, 20). Pe palávra disípulo ojepuru oñeñeʼẽ hag̃ua “peteĩ oaprendévare”. La Bíbliape oĩmbaite umi mbaʼe reikotevẽva revyʼa ha reipuru porã hag̃ua nde rekove, koʼýte umi párte oñeʼẽvape umi mbaʼe Jesús omboʼe vaʼekuére (2 Timoteo 3:​16, 17). Ore testígo de Jehová romboʼe umi hénte oaprendesevévape la Bíbliagui, ha rovyʼaitereíta ikatúramo rostudia nendive (Mateo 10:​7, 8; 1 Tesalonicenses 2:​13).

Páso 2: Ejapo umi mbaʼe reaprendéva. Jesús heʼi vaʼekue umi oaprendéva iñeʼẽ upe rire ojapo vaʼerãha “opa mbaʼe” haʼe omanda vaʼekue (Mateo 28:20). Upéicharõ, ndovaléi restudia la Biblia remombaʼapo hag̃uánte ne akã ni reikuaa hag̃ua heta mbaʼe, síno reheja vaʼerã umi mbaʼe reaprendéva nepytyvõ rekambia hag̃ua ne komportamiénto ha repensa lája (Hechos 10:42; Efesios 4:​22-​29; Hebreos 10:24, 25). Umi ojapóva Jesús omanda vaʼekue, ijeheguiete odesidi osegitaha chupe ha oñemeʼẽtaha Ñandejára Jehovápe (Mateo 16:24).

Páso 3: Ejevautisa (Mateo 28:19). La Biblia heʼi jajevautisa jave haʼeteha ku ñañeñotỹva (embojoja Romanos 6:​2-4 heʼívare). Haʼete ñamanóva, jahejaitéma rupi umi mbaʼe vai jajapo vaʼekue yma, ha upéi haʼete jaikove jeýva, jadesidíma rupi upe guive ñakumplitaha Ñandejára volunta. Rejevautisávo rehechauka opavave rovake rejapomaha umi mokõi páso ñamensiona vaʼekue, ha rejerure Ñandejárape omopotĩ hag̃ua ne konsiénsia (Hebreos 9:​14; 1 Pedro 3:​21).

¿Mbaʼéicha aikuaáta aĩmaha preparádo ajevautisa hag̃ua?

Eñeʼẽ vaʼerã umi ansiáno oĩvandi pe kongregasiónpe. Haʼekuéra oñemongetáta nendive ohecha hag̃ua rentende porãpa umi mbaʼe omboʼéva la Biblia. Ohecháta avei hikuái rejapópa hína umi mbaʼe reaprende vaʼekue ha reñemeʼẽmapa Jehovápe ndete redesidi rupi (Hechos 20:28; 1 Pedro 5:​1-3).

¿Ojapo vaʼerãpa avei koʼã mbaʼe umi Testígo família?

Si. La Biblia heʼi tuakuéra omongakuaa ha okorrehi vaʼerãha ifamília “Jehová oipotaháicha”, ha ore roñehaʼãmbaite rojapo upéva (Efesios 6:4). Péro umi mitã okakuaávo ohóvo, haʼekueraite odesidi vaʼerã oaprende, oasepta ha ojapo umi mbaʼe omboʼéva la Biblia. Péicha ojapóramo añoite ikatu ojevautisa (Romanos 12:2). Amo ipahápe, káda uno odesidi vaʼerã oadorátapa Ñandejárape haʼe oipotaháicha (Romanos 14:12; Gálatas 6:5).