¿Mboy testígo de Jehovápa oĩ ko múndo tuichakuére?

¿Mbaʼéichapa pekonta mboy Testígopa oĩ?

Ore rokonta umi opredikávape pe notísia porã oñeʼẽva Ñandejára Rréinore káda mes (Mateo 24:14). Upépe oike umi ojevautisámava oiko hag̃ua chugui testígo de Jehová ha avei umi neʼĩrava ojevautisa péro osẽmava opredika.

¿Omeʼẽ vaʼerãpa pláta umi oikoséva chugui testígo de Jehová?

Nahániri. Oĩ okontrivuíva pláta oipytyvõ hag̃ua ore organisasiónpe, péro nodependéi hína upévare oñekonta hag̃ua chupe kómo testígo de Jehová térã oñenkarga hag̃ua chupe peteĩ traváho térã priviléhio (Hechos 8:​18-​20). Añetehápe hetave vése umi okontrivuíva nomombeʼúi voi héra. Káda Testígo oipuru itiémpo, imbaretekue ha umi mbaʼe orekóva oipytyvõ hag̃ua pe traváho rojapóvape opárupi. Ojapo upéva asegún ija chupe ha haʼete odesidiháicha (2 Corintios 9:7).

¿Mbaʼéicha peikuaa mboýpa oĩ umi opredikáva?

Ore testígo de Jehová romoĩ peteĩ kuatiáre káda mes mbaʼetekópa oho raʼe oréve ropredikávo. Upéi rontrega pe infórme pe kongregasiónpe, péro ndojeovligái avavépe ojapo hag̃ua upéva.

Upéi oñesuma umi infórme ha oñemondo upéva pe sukursálpe. Upépe oñesumamba umi infórme káda kongregasionpegua ha oñemondo pe sentrál mundiálpe.

Opávo pe áño de servísioa, ojehecha mboy Testígopa oĩ káda país ha territóriope. Upéi oñesumamba umíva ojekuaa hag̃ua mboy Testígopa oĩ ko múndo tuichakuére. Pe seksión héravape “Testígo de Jehová oĩva ko yvy tuivhakuére” osẽ pe infórme káda paispegua ha oñemombeʼu avei umi mbaʼe porã ohasa vaʼekue opredika jave umi testígo de Jehová. Umi kristiáno yma guare omombeʼúrõ guare iñirũnguérape umi mbaʼe ohasáva tuicha omokyreʼỹ vaʼekue chupekuéra, ha upeichaite avei roñeñandu koʼág̃a rolee jave koʼã infórme (Hechos 2:​41; 4:4; 15:3).

¿Pekontápa avei umi ndopredikáivape péro ohóva pene rreunionhápe térã ostudiáva penendive?

Norokontáiramo jepe umichaguápe, lomímonte kyreʼỹme rorresivi chupekuéra ore rreunionhápe. Umíva oñembyaty jepi orendive rogueromanduʼa hag̃ua Jesús omano hague ára. Áño 2024-pe por ehémplo oho kuri pe Konmemorasiónpe 21.119.442 persóna. Ha rokalkula hag̃ua mboýrupipa oĩ ohóva ore rreunionhápe térã ostudiáva orendive la Biblia péro ndopredikáiva, roipeʼa pe kantidágui pe totál de testígo de Jehová oĩva.

Ore rovisita hogaitépe umi ostudiasévape la Biblia, ha ndorokovrái chupekuéra mbaʼeve. Ha heta oĩ ndohóiva ore rreunionhápe péro ostudiáva orendive. Áño 2024-pe kómo promédio rojapo 7.480.146 estúdio bíblico káda mes, ha sapyʼánte umi estúdiope oĩ mas de una persóna ostudiáva.

Pe kantida de Testígo ojekuaáva umi sénso ojapóvape pe goviérno hetave jepi pe kantida peẽ pejévagui, ¿mbaʼérepa upéva?

Umi goviérno ojapo jave sénso oporandu jepi umi héntepe mbaʼe rrelihiónpepa oho, ha upégui onohẽ pe kantida. Por ehémplo, Estados Unídospe pe grúpo oñenkargáva umi sénsore oikuaasénte “umi oñesensávapa heʼi operteneseha peteĩ rrelihiónpe”. Upe grúpo heʼi avei pe sénso ndohechaukaiha mbaʼe rrelihionguápa añete umi hénte, síno ohechaukánte mbaʼépa heʼi hikuái. Péro ore rokonta kómo testígo de Jehová umi opredikáva añoite ha ontregáva káda mes peteĩ infórme, norokontái umi heʼívante haʼeha testígo de Jehová.