48 ESTEBAN
Haʼe ‘ijerovia mbarete ha henyhẽ espíritu sántogui’
ESTEBAN ohasa peteĩ situasión ijetuʼuetereíva. Ojeakusa chupe ojapoha peteĩ mbaʼe vai ha ojeraha voi chupe pe trivunál judío iñimportantevéva renondépe. Hiʼarive péva haʼe pe trivunál ramoiténte okondena vaʼekue Jesúspe omano hag̃ua. Esteban oiméne oikuaáma raʼe la ikáso opataha Jesúicha avei. Upéicharõ jepe haʼe oĩ trankílo. La Biblia heʼi voi la hova haʼete hague “peteĩ ánhel rova”. Esteban ningo ñandeichaguánte vaʼekue avei, ¿mbaʼéicha upéicharõ la itrankiloite? Pórke haʼe ipyʼaguasu vaʼekue.
La Biblia heʼi Esteban haʼe hague “peteĩ kuimbaʼe ijerovia mbaretéva ha henyhẽva espíritu sántogui”. Umi apóstol oĩva Jerusalénpe ojerovia vaʼekue hese. Upévare onkarga chupe omeʼẽ hag̃ua umi ermánope la oikotevẽva. Péro peteĩ día, unos kuánto judío oñomoirũ ha ou ojodiskuti Estébandi. Upéicharõ jepe, haʼekuéra ndaipuʼakái hese pórke Esteban iñarandueterei. Péva ombopochyve rei chupekuéra ha ojagarra oraha hikuái Estébanpe pe Sanedrín renondépe. Upévare koʼág̃a ijetuʼu hendive, pórke haʼekuéra ikatu odesidi ojejukátapa chupe térã ojepoi jeýtapa chugui.
Esteban oiméne oikuaa raʼe la Jesús opromete vaʼekue idisipulokuérape heʼírõ guare: “Ani pejepyʼapy ndapeikuaáirõ g̃uarã mbaʼépa pejéta. Upe moméntope peje vaʼerã pe espíritu sánto penemomanduʼáva. Pórke ndahaʼemoʼãi peẽ la peñeʼẽtava, síno Ñandejára penepytyvõta peñeʼẽ hag̃ua ijespíritu rupive” (Mar. 13:11). Esteban imanduʼávo upévare oime vaʼerã ipyʼaguasuvéntema raʼe. Pe espíritu sánto oipytyvõ rupi chupe haʼe oĩ kuri trankílo pe Sanedrín renondépe ha la hova haʼete voi peteĩ ánhel.
Pe trivunálpe oĩ vaʼekue 71 hués orekóva tuicha autorida umi judiokuéra apytépe. Haʼekuéra ohusgáta jave peteĩ persónape oñembyatypámi peteĩ koty guasúpe. Pe persóna ojehusgátava oñemboʼy mbytetépe ha umi hués ojerepa hese. Haʼekuéra oguapy ikostádope ha henondépe peteĩ gradería de 3 fílape ha hapykuépe oĩ mokõi kuimbaʼe oskrivipaitéva la oikóva. Estébanpe ojeraha kuri ko trivunálpe pórke ojeakusa reiete chupe oñeʼẽ vaiha Moisés léire ha pe témplore. Upéva ivaieterei kuri ha ikatu voi ojejuka chupe upévare. Upéi pe súmo saserdóte Caifás oporandu Estébanpe siértopa la ojeʼéva hese.
Esteban oñepyrũ oñeʼẽ chupekuéra Israel istóriare ha primeroite voi oñeʼẽ Abrahánre. Upéi oñeʼẽ Josére ha mbaʼéichapa iñermanokuéra opersegi vaʼekue chupe, hiʼarive haʼekuéra omoakã vaʼekue umi trívu de Israel. Upéi katu oñeʼẽvo Moisésre ohechauka orrespetaitereiha chupe ha omombeʼu mbaʼeichaitépa umi israelita nopenaséi vaʼekue hese. Oñeʼẽvo Moisésre haʼe omombeʼu voi umi mbaʼe ndajatopáiva umi Escrituras Hebréaspe.
Entéro mbaʼe Esteban heʼi vaʼekuére ohechauka orrespetaitereiha pe léi, pe tavernákulo ha pe témplo. Péro avei ohechauka porã ymaite guive voínte Ñandejára puévlo ndorrespetaiha umi haʼe omoĩvape ogia hag̃ua chupekuéra.
Esteban oñedefende vaʼerã peteĩ trivunál renondépe, oikuaárõ jepe haʼekuéra odesidimaha ojukataha chupe
Esteban oiméne oikuaáma raʼe pe Sanedrín ndopoimoʼãveimaha chugui. Upérõ guare pe espíritu sánto ombopyʼaguasu Estébanpe ipahaitépe heʼi hag̃ua chupekuéra ‘ikaprichosoha’ hikuái ha ‘siémpre oñemoĩha pe espíritu sántore’ ituakuéra ypykue ojapo haguéicha. Moisés heʼi vaʼekue outaha peteĩ proféta iñimportantevéva chugui ha upévape la haʼekuéra ramoiténte ‘otraisiona ha ojuka’. Ivaíma voi kuri la isituasionkuéra péro ojukápe pe Mesíaspe ivaivéntema.
Ohendúvo upéva umi oĩva pe Sanedrínpe “ipochyeterei okapu hag̃uáicha voi ha ombyepotise” Estébanpe. Upépe Jehová ohechauka peteĩ visión Estébanpe omokyreʼỹ hag̃ua chupe. Upévare Esteban heʼi: “¡Pemañami! Ahecha pe yvága ojeavri ha pe Yvypóra Raʼy oñemboʼyha Ñandejára deréchape”. Upépe ae ningo la umi hués orrenegaiterei ha ojepoipa hiʼári. ¿Mbaʼéreiko la peichaite voi ipochy hikuái? Pórke ojapo unos kuánto mésente Jesús voi heʼi hague chupekuéra ohechataha hikuái “pe Yvypóra Raʼýpe oguapyha Ñandejára Ipoderósova po deréchape” (Mat. 26:64). Ha la Esteban heʼíva chupekuéra koʼág̃a, ohechauka upéva oñekumplimaha. Jesucristo koʼág̃a oĩma Ñandejára ykére.
Upépe ojagarra hikuái Estébanpe ha oguenohẽ chupe pe siudágui ojuka hag̃uáicha chupe. Ojapi aja hikuái Estébanpe itápe, oiméne haʼe ohecháiti raʼe Jesúspe pe visiónpe. Upévare heʼi chupe: “Che Ruvicha Jesús, antrega ndéve che rekove”. Ha upéi katu heʼi Jehovápe: “Ani rekastiga chupekuéra ko pekádore”. Heʼipamírente upéva Esteban omano ha péicha oiko chugui pe primer kristiáno ojejukáva ojerovia haguére. Koʼã mbaʼe oikopárõ guare, oĩ hína kuri upépe peteĩ mitãkariaʼy ohechapaitéva la oikóva. Haʼe núnka ndahesaráiri umi mbaʼe Esteban heʼi vaʼekuégui omano mboyvemi. ¿Mávapa raʼe upe mitãkariaʼy? Ñañeʼẽvéta hese kapítulo 50, 51, ha 53-pe.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Esteban ipyʼaguasu hague?
Einvestigamína
1. Umi apóstol orrepartisérõ guare tembiʼu umi oikotevẽvape, ¿mbaʼérepa oipota raʼe umi ermáno “henyhẽva espíritugui ha arandúgui” ojapo upéva? (Hech. 6:3-5; bt 46, 47 párr. 17, 18). A
Taʼanga A
2. ¿Mbaʼe mbaʼépa Esteban heʼi raʼe Moisésre ndajatopáiva umi Escrituras Hebréaspe? (bt 54 párr. 13, nóta).
3. ¿Mbaʼérepa Esteban itrankiloite raʼe ojepersegírõ guare? (w18.10 32).
4. ¿Hechos 7:59 piko ontendeka Esteban oñemboʼe hague Jesúspe? (w08 1/5 29 párr. 8).
Ejepyʼamongetamína ndejehe
Esteban haʼe vaʼekue “peteĩ kuimbaʼe ijerovia mbaretéva”, “henyhẽva espíritu sántogui”, “Ñandejára oguerohoryetereíva ha henyhẽva podérgui”. Upéicharõ jepe naiprovlémai orreparti hag̃ua tembiʼu (Hech. 6:2, 5, 8). ¿Mbaʼépa ikatu oaprende chugui umi ermáno ivaléva heta mbaʼépe térã orekóva heta rresponsavilida kongregasiónpe? B
Taʼanga B
Esteban oñemboʼe vaʼekue umi opersegívare chupe. ¿Mbaʼéichapa ñande avei ikatu jahechauka jahayhuha umi ñandepersegívape? (Mat. 5:44-48).
¿Mbaʼéichapa ikatu ndepyʼaguasu Esteban ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼérepa reagradese Jehovápe oiporavo haguére Estébanpe ogoverna hag̃ua Jesúsndi yvágape?
Reikuaave hag̃ua
¿Mbaʼéichapa ikatu rehechauka ndepyʼaguasuha ha nderrespetuosoha Estébancha edefende jave umi mbaʼe egueroviáva?
Esteban: “Peteĩ kuimbaʼe Ñandejára oguerohoryetereíva ha henyhẽva podérgui” (bt 53-56 párr. 9-19).
¿Mbaʼéichapa ikatu ñandepyʼaguasu Estébancha oĩ jave ñandepersegíva?