¿Pamonae Jehová totsipaebapona pepo cristianowi?

Jehová patatotsipaebaponaewi pajinawanapajü pepo cristianowikuene. ¿Dej̈uajitsia? Paliwaisitaje yapütaenatsi j̈uajawanü pajumekowünütajü, pawünü ata paj̈ainajü itsamonaewekua. Yapütaenatsinua pakuenia namataenetsia panaasiwanü.

1. ¿Dejota rubena paliwaisianü jumekowünütabiaba Jehová petotsipaebaponaewi?

Jesús jumaitsi Diosojawabelia: “Nijumelivaisi cajena pexaniajailivaisi” (Juan 17:17). Jehová patatotsipaebaponaewi paitsinü tsabiabi pakuenia itsi Jesús: patajumekowünütabiabiliwaisijawanü rubena Dioso Pejumeliwaisibaj̈utota. Yapütaema Jehová petotsipaebaponaewi peliwaisi. Bejamatabükuene 1870 pawaita, tsikiribitsaütoyo Bibliabaj̈uto penakujarubiwi, taj̈uj̈uaba pekanaüjütsijawa büpünüaliwaisianü Dioso Pejumeliwaisi yabara. Jumekowünüta paliwaisianü rubena Bibliabaj̈utota, itsiata j̈ua itsaiglesianüjawa kujaruba aponajüpaebeje. Bajaraj̈uata nej̈ata tsipaebanajetarubena pej̈aniajailiwaisi itsamonaejawabelia.a

2. ¿Dej̈uajitsia payawünüj̈ainajü Jehová patatotsipaebaponaewi?

Jehová jumaitsi pamonae yaiyatanetsi, bajarapamonae petotsipaebaponaewi tsipaji kujaruba pej̈aniajailiwaisi bajaraponü yabara (Hebreos 11:​4–12:1). Bajayatami baja, Dioso jumaitsi pijajiwijawabelia: “Paj̈amü rabaja patanetotsipaebaponaewinej̈amü,” (lebare Isaías 43:10). Jesús ata, “pexaniajailivaisi, Dioso pejumelivaisi, jivi tsipaebabiaba” (Apocalipsis 1:5). Bajaraj̈uata nej̈ata 1931 pawaita payawünüj̈ainajü Jehová patatotsipaebaponaewi. Pabarüyanü bitso pataj̈ainaej̈ae bajarapawünü.

3. ¿Depakuenia Jehová patatotsipaebaponaewi Jesús pakuenejüpajü namataenetsia patanaasiwajawa?

Jesús baasiwa pijajiwi, bepijamonaekuenia batane. (lebare Marcos 3:35). Bajarapakuenia Jehová patatotsipaebaponaewi namataenetsia panaasiwanü, benakaemonaekuenia panataniji. Bajaraj̈uata ‘tajamonaenüʼ, ‘tajamonaewaʼ panajanü tsabiabi (Filemón 1, 2). Pajumekowünütajünua paliwaisije: “Pamonae Dioso pejumecovënëtsivi, pasivamëre” (1 Pedro 2:​17). Jehová patatotsipaebaponaewi panajamatabükueneitajübajü namataenetsia patanaasiwajawa. Itsa patajamonaewi daj̈itanakuapijiwi tokopiapatatsi pibisiakuene, nej̈ata payawenonabiabajü.

KANAÜJÜTSIANATSI

4. Patajumekowünütsi­liwaisianü rubena Bibliabaj̈utota

Jehová tajüwelia wajunupaeba pakuenia itsamonae yapütaenajetarubenaejitsia papej̈aniajailiwaisianü rubena Bibliabaj̈utota. Palebare Daniel 12:​4, panelebikujinae panabarükuaikuaijamü tsane paliwaisi yabaraje:

• ¿Dej̈ua meta Dioso pijajiwi yapütaejitsipa bitso kanaüjütsiaya itsa leba Dioso Pejumeliwaisi?

Taema pakuenia bajayata tsikiribitsaütoyo Dioso Pejumeliwaisi nakujaruba, Charles Russell bajarapamonae yajawaponaponatsi. Pataema VIDEOJAWA, panetaekujinae panabarükuaikuaijamü tsane paliwaisi yabaraje:

VIDEOJAWA: Kaj̈itajaraba papej̈aniajailiwaisi rubena Bibliabaj̈utota (7:​45)

• Pakuenia tanetsi pavideojawa, ¿depakuenia nej̈ata Charles Russell kanaüjütsiaya Dioso Pejumeliwaisi barünakujaruba?

¿Yapütaneme baja?

Itsajawata patajumekowünütsi­liwaisianü pajumej̈anebabiabajü. ­¿Dej̈uajitsia? Tsipaji Dioso pane­yapütaeyaej̈ana beaj̈ayokuenia Pejumeliwaisi, pakuenia juameto­kotia bayenejai­tsanajetarukae baja­yakunua (lebare Proverbios 4:18). Bibliabaj̈uto apoaitotjia tsanajetarubenae. Nej̈ata, itsa j̈aniawaetsia pajumeyapütaeponajü Dioso Peju­meliwaisi, nej̈ata j̈aniawaetsiakuenia paitsinü Dioso pejitsipaekuenia.

5. Barüyaya Jehová patotsipaebaponajü

VIDEOJAWA: Patawünü yapütaeyaej̈ana j̈ua paitsinü tsabiabi (2:​40)

• ¿Dej̈uajitsia j̈anepana pej̈ainaejawa pewünü Jehová petotsipaebaponaewi?

¿Dej̈uajitsia Jehová itapeta jiwimonae petotsipaebinej̈a bajaraponü yabara? Tsipaji Jehová yabara itsamonae kujarubanajetarubena penajumetsünütsiliwaisi, nej̈ata Jehová petotsipaebaponaewi kujarubapona pej̈aniajailiwaisi Jehová yabara. Pakueniaje:

Itsaiglesianüjawa kujaruba Dioso petsitaj̈anepanaekuenetsi pejumapekataenüanüjawabelia penawajükaejawa. ¿Bajaraj̈ua meta nej̈ata j̈aniajai? Palebare Éxodo 20:​4, panelebikujinae panabarükuaikuaijamü tsane paliwaisibeje yabaraje:

• Pakuenia baja lebatsi, ¿dej̈ua meta pej̈aniajailiwaisi? ¿Dej̈ua meta Dioso siwanajamatabüj̈aina pejumapekataenüanü yabara?

Itsaiglesianüjawa kujaruba Jesús pepo Diosonükuenia. ¿Bajaraj̈ua meta nej̈ata j̈aniajai? Palebare Juan 20:​17, panelebikujinae panabarükuaikuaijamü tsane paliwaisibeje yabaraje:

• Pakuenia baja lebatsi, ¿dej̈ua meta pej̈aniajailiwaisi? ¿Jesús meta nej̈ata Dioso?

• ¿Dejamatabüitsimü Jehová pitorobij̈ae petotsipaebaponaewi pej̈aniajailiwaisi peyapütaeyaej̈anaenej̈a bajaraponü yabara, pej̈ünato ata yabara?

6. Namataenetsia panaasiwanü

Bibliabaj̈uto yapütaeyaej̈ana cristianowi bepeperabütokuenia. Palebare 1 Corintios 12:​25, 26, panelebikujinae panabarükuaikuaijamü tsane paliwaisibeje yabaraje:

• ¿Deitsi nej̈ata pepo cristianowi itsayajuwünü nabejiobiatane?

• ¿Yapütaneme meta pakuenia Jehová petotsipaebaponaewi namataenetsia penaasiwajawa?

Itsa Jehová petotsipaebaponaewiyajuwünüwi tokopiapatatsi pibisiakuene, kaekuenia Jehová pijajiwi daj̈itanakuapijiwi nayawenona. Paneyapütaenej̈a bajaraj̈ua yabara, pataema VIDEOJAWA. Panetaekujinae panabarükuaikuaijamü tsane paliwaisi yabaraje:

VIDEOJAWA: Haitípijiwi piayaijowibo siyanakuapatsi atatsi yasipitsapa (5:​29)

• Jehová petotsipaebaponaewi namataenetsia nayawenona, ¿nasiwa meta nej̈ata bajarapamonae? ¿Dej̈uajitsia bajarapakuenia jumaitsimü?

PALIWAISI BAJA YAPÜTANETSI

Jehová raja patatotsipaebaponaewi pepo pacristianowinü. Daj̈itanakuajawa namataenetsia panaasiwanü, daj̈ita Jehová patatonakuenebiwi. Patajumekowünütsiliwaisijawanü rubena Bibliabaj̈utota, patsipaebanajetarubenajünua pej̈aniajailiwaisi Jehová yabara.

Najamatabünapire

• ¿Dej̈uajitsia payawünüj̈ainajü Jehová patatotsipaebaponaewi?

• ¿Depakuenia panakueneitajübajü namataenetsia patanaasiwajawa?

• ¿Jehová meta nej̈ata petotsipaebaponaewi pepo cristianowi? ¿J̈amü dejumaitsimü?

YAPÜTAENAME ITSALIWAISI

Yapütaema j̈aniawaetsia patajaliwaisi.

Jehová petotsipaebaponaewi: pejumej̈aniataeliwaisi. Kopiayavideojawa: Tsitekaeya baja apoajamatabükueneitakiri (1:​00:53)

Yapütaema pakuenia Jehová petotsipaebaponaewi yapütaeyaej̈ana pej̈aniajailiwaisi penajumetsünütsiliwaisiwekua.

Dioso pijajiwi Dioso wünüyaiyataeyaej̈ana (7:​08)

Yapütaema papeyanijobiliwaisianü j̈ainame Jehová petotsipaebaponaewi yabara.

Papeyanijobiliwaisijawanü jiwi itsi tsabiabi petotsipaebaponaewi Jehová yabara” (Ruka Internet-jawata jw.org)

Pitoyajamatabükuene pej̈ainaej̈ae Stephen pibisiakuene ej̈ana. Yapütaema pakuenia najamatabükuenepünüyorota pakujinae yapütane Jehová petotsipaebaponaewi.

“Kaematakabi kanakujitsia ajamatabükuenebejenü tsaponae bitso” (Peyajiwitaebo, 1 de julio, 2015)