Pek Misakwan Tsalø Kui Asik

¿Pek pek misakmerape chukutri amtruik kø?

“Inchen Adánbe nui srawane Eva munchi pasrøbig køn, kaguende Evabe maya misagwei usrin kønrrabig kuimba” (Génesis 3:20).

NØTRØ KUSREPELØ CHI ISUPELØ KØ:

Organizacion de las naciones Unidas para la Educacion, la Ciencia y la Cultura (UNESCO) trenchipik køn: “Maya misakmerape truyukutrintøwai amtrupelø køn cha” (Declaracion sobre la Raza y los Prejuicios Raciales, de 1978).

BIBLIAPE MANCHIPIK KØ:

Tiuspe Adánwanpa Evanpa mara pønsra trencha karuik køn: “Srøig larrøbitchabig yellmera tøgagøb, srøitø srøitø larrø nørrø nemisrtrigay cha” (Génesis 1:28). Treekkutri, maya misakmerapa Adán Evawainukkutri amtruar ker. Yanasrømpe latrø mur sre pua pi pulapik atrupikpe latrø nu misakmeran pinisaik køn. Inchentø, trattrø pøn misakmeratø øsik puraampik køn: Noépa, nui sraimpa, nui pøn nusrkaløpa, nui yernamerapa. Bibliape tør kusrenanøpik køn, maya misakmerapa Noéwai nusrkalainukkutri amtruar kui (Génesis 9:18, 19).

¿Misak utu más tap raza kø chintera?

“Kan møkkurrindø truyugurri chi misaatø larrøbichib inrrabigwan [Tius] marig købig køn cha, pirø muba kuimburab warønrrai cha” (Hechos 17:26).

MØILØPE TRENCHIPELØ KØN:

Siglo 20srø møiløpe peksrelan tsalø kui aship mentik køn. Nazismera trenchipelø kuik køn, tru ciencia kenamarik køn cha namui razape más tapik kui. Inchen UNESCO 1978 pilasrø trentaik køn: “Maya misakmera kal-lainuikkutri treektø kui, inchawai møilø misakmerape katøkan misakmeran mas purap nøtreløpe kaakøn cha”.

BIBLIAPE MANCHIPIK KØ:

Hechos 10:34, 35 trenchipik køn: “Tiusbe møilane ørømara katøganelandø tab inchimøtø lata isubig [køn]. Misaamera nørrø pønrrabig chu pirausreeløtøgucha nun køriibala marøb, sølgandø tabig marøbigwane Tiusbe kashmíig køn cha”. Treekkutri, misak utu kan raza más latrø nuikpe kaakøn.

Cristoi wentautø ampupelø, Jesús maik karuikwan møra marøpelø køn: “Ñimbe søteeløba nunelø latailø køn” (Mateo 23:8). Cristope nui Møskawan trencha miaik køn, nui wentautø ampupelaimpurap “trumaybe newan ke kanbalatø pønrramigwan nebua tøgagønrrain cha”. Trenchippe, munken kaashmø nømui utu más nøørøtø inchip tarømisramik kaantrai (Juan 17:20-23; 1 Corintios 1:10).

¿Manakøpen pek misakmeran tsalø kui asikpe patsøntrauta?

“Srape kualømmerawansrømpe, Jeupawai ya pasrik tunpe, nøtrø tunmera palasrø kønøntrapkeik pasrik køntrun, incha Pirø mupa kuimpurap misakmerape trusrømay nepamtrun” (Isaías 2:2).

MØILØPE TREEK ISUPELØ KØN:

Pek misakmeran tsalø kui asikpe, latrø yana atrun, møyankatik patsøkøntrap intinkucha kaima køncha.

BIBLIAPE MANCHIPIK KØ:

Jeupape pek misakmeran tsalø asikwan más treek kømøntrai tamartrun. Tius Nø Aship Karup Wainukpe møkeløpa ishumpurmerapa chu Pirausrelø køpen pek pek waminchipik misakmera køpen, kanpalatø warap ampumay imay untak kenamartrun cha (Apocalipsis 7:9). Tius Nø Aship Karup Waikpe namui mantrau pasrapik kømøtø, srømpalasrønkutri aship karup pasrapik køn. Yanayutø, ik Pirøwankucha aship karup pasramisra srøtøkutri Jeupa maik isuikwan martrun, yantø pek misakmeran tsalø asamikpe kaantrun.a