Jesúspe katøle srømpalasrømay yaik køn

Jesúspe nui kusrenanøp pera uniløpa Galileasrø tuluntsuna ikwan martrai karuik køn: “Tru yu Pirau maya misakmeran muntøkucha na kusrenanikwan kusrenanøp, piu umpu ulsrøp amtray”. Incha trentaik køn: “Nabe naimburappe kwalømmørig srabe kwalømgatig ñimba pasramønrrun— cha”.

Katøle øsirawa, Jesúspe 40 kualømmera nui kusrenanøp pera unilan Galileasrø Jerusalénsrø kenamisra, latrø tap wammera kusrenanøp, marampurap mariløkucha marik køn. Yantø srapepe, nøaship karua øriløpatø Olivos tunsrø tuluntsuna trentaik køn: “Jerusalénsrønkutrimpe ammøntrikay. Nai Møskai trantrap misra køtrømisrikwan treek pumnekatik munirantrikay cha”.

Nøaship karua øriløpe Jesús maik taikwan tap nepua ashmø paik køn: “¿Israelsrø rey køntrap køtitru cha?”. Jesúspe trentaik køn: “Jeupape katøkucha rey køntraimpe muniramøn. Inchentø espíritu santo ñimuim pala atrupen, marampurap marikwan uta, Jerusalénsrø, Judeasrø, Samariasrø, Pirø mupa kuimpurap purø yapsrønken naimpurap maik kuikwan waminchap amtrikay cha”.

Inchen Jesús srømpalasrømay ipen, kan wañi kasrøpen, nui kusrenanøp pera uniløpe neeship pøntramne kenamuptinchipik køn.

Nui kusrenanøp pera uniløpe Olivos tunsrøkutri katøle Jerusalénsrømay ampa, kan ya pa pisu tøkaiksrø nepampa tuluntsunapelø kuik køn tru Tiuspa waminchap, incha Jesús maik maramikwan eshkantrai munirapelø kuik køn.