ZASEŊƆ 21
YUUNƐ 107 The Divine Pattern of Love (Tɔɣesa Yehowa Nɔŋerɛ La)
Hon Wan Eŋɛ Se’em Ta’an Nyɛ Luɣerɛ Kpɛ’a
‘Pɔɣesɛka n yisegɛ gani kuga mɔlebaɣenɛ, ti buraa nara ti a tara ka.’—MAG. 31:10.
YELEKPINE
To wan sɔsɛ Baabule naresum yelese’a n wan soŋɛ nɛra ti a nyɛ luɣerɛ kpɛ’a, la mabiisi n boi tansugere la poan n wan eŋɛ se’em ta’an soŋɛ nɛreyɔna sɛba n boti ba di pɔɣeba bii ele sireba.
1-2. (a) Kristakɔma n de nɛreyɔna nari ti ba geele la bem yɛla ge nyaa lɛɣɛ nɛra? (b) “Lɛka” vuurɛ? (Bisɛ “Yelebire Vuurɛ.”)
HON wan bɔta ti ho ele bii di pɔɣa? La boi bim ti daɣɛ pɔɣedire ma’a n wan basɛ ti nɛra tara pupeelum ge Kristakɔma nɛreyɔna zo’e zo’e wan bɔta ti ba ta tara lɔɣerɛ kpɛ’a. Yelemɛŋɛrɛ, ho san bɔta ti ho lɛɣɛ nɛra ta di en la nari ti ho tara bɔnsoŋa la Yehowa, mina homea soŋa soŋa ge me wan ta’an bisɛ ho luɣerɛ kpɛ’a la soŋa.a (1 Ko. 7:36) Ho san nyaŋɛ eŋɛ bala, ho pɔɣedire bii sire ele la wan ta ana soŋa.
2 Ge la daɣɛ naana ti ho nyɛ luɣerɛ kpɛ’a. (Mag. 31:10) Ho me san puɣum nyɛ nɛresɛka ti ho bɔta, la ta’an kpe’em bo ho ti ho lɛɣɛ en.b Zaseŋɔ wa poan, to wan sɔsɛ sɛla n wan ta’an soŋɛ Kristakɔma nɛreyɔna ti ba nyɛ luɣerɛ kpɛ’a. To me wan zamesɛ baŋɛ mabiisi n boi tansugere la poan n wan eŋɛ se’em ta’an soŋɛ sɛba n boti ba di pɔɣeba bii ele sireba la.
BEM N WAN SOŊƐ HƆ TI HO NYƐ LUƔERƐ KPƐ’A?
3. Kristabia n de nɛreyone nari ti a geele la bem yɛla a san ɛɛra luɣerɛ kpɛ’a?
3 Ho san bɔta ti ho lɛɣɛ nɛra ta di bii ele en, la wan ana soŋa ti ho mina hon boti ho luɣerɛ kpɛ’a la tara halese’a. San daɣena bala, ho ta’an ta nyɛ se’em n nari ge zaɣesɛ bii ho ta lɛɣɛ se’em n ka nari. Yelemɛŋɛrɛ, se’em woo ti ho bɔta ti ho lɛɣɛ en nari ti a dɛna Kristabia n muse ko’om. (1 Ko. 7:39) Ge daɣɛ Kristabia woo n muse ko’om n nari ti ho lɛɣɛ. Bala la, soke homea yeti: “Mam boti n eŋɛ la bem n vom poan? Mam wan bɔta ti n luɣerɛ kpɛ’a la tara la halɛ ani? Yelese’a ti mam ɛɛra la nari?’
4. Mabiisi basɛba dekɛ la bem yɛla pa’asɛ ba zusega poan?
4 Ho san bɔta ti ho di pɔɣa bii ele sira, to mi ti ho puɣum yele Yehowa mɛ. (Flp. 4:6) La boi bim ti Yehowa ka yeti a wan basɛ ti ho nyɛ luɣerɛ kpɛ’a ge a fabeli ho yele ge me mina lan ani ho se’em. A wan ta’an soŋɛ hɔ ti ho nyɛ luɣerɛ kpɛ’a. Bala la, kɔ’ɔn yɛta en lan ani ho se’em. (Ym. 62:8) Zusɛ Naayinɛ ti a bo ho yɛm ti ho ta’an di’isa suure. (Yam. 1:5) John,c dela nɛreyone bɔna United States. A pa’alɛ la yelese’a ti eŋa ni dekɛ pa’asɛ a zusega poan. A yeti: “Mam ni yele Yehowa la mam boti n luɣerɛ kpɛ’a tara halese’a. Mam ni zusɛ en mɛ ti a basɛ ti n nyɛ luɣerɛ kpɛ’a. A basɛ ti n tara halese’a n wan basɛ ti n ta dɛna siresonkɔ.” Tanya dela mabipɔka n boi Sri Lanka. A yeti: “Mam san ɛɛra luɣerɛ kpɛ’a, mam ni yele la Yehowa ti a soŋɛ mam ti n kelum tara yelemɛŋɛrɛ bɔ’ɔra en ge me tara putɛsonɛ la pupeelum.” Hali ho san puɣum ka nyɛ luɣerɛ kpɛ’a nananawa, Yehowa wan kelum soŋera hɔ innaanɛ la ho suure yɛla poan.—Ym. 55:22.
5. Sankani ti Kristakɔma n de nɛreyɔna wan ta’an nyɛ nɛra n nɔŋɛ Yehowa? (1 Korint 15:58) (Bisɛ foote la.)
5 Baabule la kpemese to giila ti to ‘kɔ’ɔn tuna to Daana tuuma la zo’e zo’e.’ (Kaalɛ 1 Korint 15:58.) Ho san kɔ’ɔn mu’ɛ nini tuna Yehowa tuuma ge me naɛ la mabiisi to’ore to’ore sɔsa, ho wan ta’an nyɔɣɛ ba zɔtɔ ge me nyɛ nɛreyɔna n mu’ɛ nini tuna Yehowa tuuma wuu hon la. Ho san kɔ’ɔn tiregera ti ho basɛ ti Yehowa puurɛ pee, hon me wan tara pupeelum.
Ho san kɔ’ɔn mu’ɛ nini tuna Yehowa tuuma ge me naɛ la mabiisi to’ore to’ore sɔsa, ho wan ta’an nyɛ se’em me n boti a di pɔɣa bii ele sira (Bisɛ kaalegɔ zɛ’an 5)
6. Kristakɔma n de nɛreyɔna nari ti ba tɛ̃ra la bem ba san ɛɛra luɣerɛ kpɛ’a?
6 Tɛ̃ra yele wa: Da basɛ ti hon eeri luɣerɛ kpɛ’a la dɛna yia ho vom poan. (Flp. 1:10) Daɣɛ pɔɣedire bii sire ele n wan basɛ ti ho tara yelemɛŋɛrɛ pupeelum ge la dela hon tari bɔnsoŋa la Yehowa la. (Mt. 5:3) Hon de nɛreyone la wan basɛ ti ho nyɛ yɔ’ɔ zo’e zo’e yalegɛ ho na’am tuuma. (1 Ko. 7:32, 33) Tara ho saŋa la tuna soŋa soŋa. Jessica dela mabipɔka n boi United States. Eŋa n yuun gee fii la a paɛ yuun 30 la ti a ele. A yeti, “La boi bim ti mam yuun boti la n ele ge mam n yuun kɔ’ɔn mu’ɛ nini na’am mɔɔlegɔ la poan la n yuun soŋɛ mam ti mam ta’an ŋmibera.”
MA’Ɛ HOMEA BISƐ NƐRA LA N ANI SE’EM
7. Beni n sɔi ti yɛm bɔna bim ti ho ni ma’ɛ homea bisɛ nɛra la soŋa ge nyaa lɛɣɛ en? (Magaha 13:16)
7 Ho wan eŋɛ la wani ho san ti’isɛ ti nɛra wa wan ta’an dɛna ho luɣerɛ kpɛ’a? La wan nara ti ho kɔ’ɔn lɛɣɛ en buyina? Baabule la yeti yɛmdaana tari la mi’ilum tuna tuuma. (Kaalɛ Magaha 13:16.) Bala la, la wan ana soŋa ti ho ma’ɛ homea bisɛ nɛra la saŋa fii ge nyaa lɛɣɛ en. Aschwin n boi Netherlands yeti: “Ho ta’an ti’isa ti ho lɛɣɛ nɛra kalam ge hon ti’iseri se’em la me ta’an bɔregɛ kalam. Bala la, ho san ma’ɛ homea bisɛ nɛra la saŋa fii poan ho ta’an baŋɛ lan sirum ani ho se’em ge nyaa lɛɣɛ en.” Leyɛ’ɛsa, ho san ma’ɛ homea bisɛ nɛra la saŋa fii wa, daanse’ere ho wan baŋɛ ti a ka nari ti ho lɛɣɛ en.
8. Nɛreyone wan eŋɛ la wani ta’an ma’ɛ amea bisɛ nɛra ti a bɔta ti a lɛɣɛ? (Bisɛ foote la.)
8 Ho wan eŋɛ la wani ta’an ma’ɛ homea bisɛ nɛra ti ho bɔta ti ho lɛɣɛ? Ya san bɔna tansugere zamesegɔ poan bii mabiisi n naɛ taaba sɔsera ho wan baŋɛ nɛra la n tari halese’a, eŋa n bi kãsegɛ vo’osum poan se’em la eŋa n iti a yɛla se’em. Bani n de a zɔdoma? Bem yɛla ti a ni tɔɣera de yele? (Lu. 6:45) Eŋa me boti a eŋɛ la mam boti n eŋɛ sɛla n vom poan la? Ho ta’an sɔsɛ la a tansugere keendoma bii mabisɛba n mi en soŋa. (Mag. 20:18) Ho ta’an soke baŋɛ nɛra la n ani se’em. (Arut 2:11) Ho san ma’ɛ homea bisa nɛra la, da basɛ ti la ana en bura. Bɔ’ɔra en gilema ge da bɔta ti ho baŋɛ sɛla woo bii naɛ la en bɔna saŋa woo.
Ma’ɛ homea bisɛ nɛra la saŋa fii ge nyaa lɛɣɛ en (Bisɛ kaalegɔ zɛ’ɛsi 7-8)
9. La nari ti ho sakɛ la bem ho suuren ge nyaa lɛɣɛ nɛra?
9 Ho wan ma’ɛ homea bisɛ nɛra la paɛ la wani ge nyaa lɛɣɛ en? Ho san kɔ’ɔn nyɛ nɛra zina zina ge lɛɣɛ en, a wan baŋɛ ti ho ni ka ti’isɛ soŋa ge kɔ’ɛ ho puti’irɛ. (Mag. 29:20) Ge nɛra la me san baŋɛ ti ho boti en mɛ ge ti ho kelum yuura, a ta’an ti’isa ti ho ka mi hon eeri sɛla. (Pa. 11:4) Tɛ̃ra ti, la ka nari ti ho sakɛ ho suuren ti ho wan di bii ele nɛrekaŋa ge nyaa lɛɣɛ en. Ge la nari ti ho sakɛ ho suuren ti hon maasum ya ti ho di pɔɣa bii ele sira, ti se’em ti ho bɔta ti ho lɛɣɛ la me nari hɔ.
10. Bem n nari ti ho eŋɛ ho san baŋɛ ti nɛra n boti ho ge ti hon ka bɔta en?
10 Ho wan eŋɛ la bem ho san baŋɛ ti nɛra n boti ho? Ho san ka bɔta en, basɛ ti a baŋɛ kalam. La kan ana soŋa ti ho basɛ ti nɛra la ti’isa ti ho boti en ge ti homea mina fii ti ho ka boti en.—1 Ko. 10:24; Ep. 4:25.
11. Ho san bɔta ti ho ɛ luɣerɛ kpɛ’a bo nɛra, bem yɛla n nari ti ho tɛ̃ra?
11 Tisi sise’esi poan, dɔɣereba bii bunkureba n ni ɛ luɣerɛ kpɛ’a bo ba yidoma. Tisi sise’esi poan me, deodoma bii zɔdoma n ni ɛ luɣerɛ kpɛ’a bo nɛreyone ti a bisɛ nyaa a wan ta’an di bii ele en. Ba san yele ho ti ho ɛ luɣerɛ kpɛ’a bo nɛra, mina bamam bayi la n boti sɛla. Ho san nyɛ nɛra n makɛ, tiregɛ viisɛ baŋɛ nɛra la n ani se’em, yele yele wuu eŋa n bi vo’osum poan se’em. Nɛra san tara bɔnsoŋa la Yehowa bala gani ligeri, mi’ilum bii yu’urɛ. Tɛ̃ra ti, sɛba n boti ba di taaba la ma’a n wan kɔ’ɛ ba puti’irɛ nyaa ba wan di taaba.—Ga. 6:5.
HO WAN EŊƐ LA WANI LƐƔƐ NƐRA?
12. Ho san bɔta ti ho lɛɣɛ nɛra, ho wan eŋɛ la wani ta’an yele en?
12 Ho san bɔta ti ho lɛɣɛ nɛra, ho wan eŋɛ la wani ta’an yele en?d Ho ta’an yele en ti ho boti la hon la eŋa sɔsɛ. Ya ta’an zi’ire zɛ’an ti nɛreba bɔna bii ya sɔsɛ fon poan. Basɛ ti a baŋɛ ti ho suure n kɛ̃ en ti ho bɔta ti ya sɔsɛ baŋa taaba soŋa. (1 Ko. 14:9) La yele san pakɛ, bo nɛra la yɔ’ɔ ti a ta’an ti’isɛ de yele soŋa ge nyaa bo ho lebesego. (Mag. 15:28) Nɛra la san ka bɔta hɔ, bo en gilema ge sakɛ eŋa n yele sɛla la.
13. Nɛra san yele ho ti a boti la a lɛɣɛ hɔ, ho wan ta’an eŋɛ la bem? (Kolose 4:6)
13 Nɛra san yele ho ti a boti la a lɛɣɛ hɔ, ho wan ta’an eŋɛ la bem? Daanse’ere la daa kpe’em bo nɛra la mɛ ti a yele ho, bala la bo en gilema. (Kaalɛ Kolose 4:6.) Ho san bɔta ti a bo ho yɔ’ɔ ti ho ta ti’isɛ de yele, basɛ ti a baŋɛ. Ge tiregɛ la ho bo en lebesego kalam. (Mag. 13:12) Ho san ka bɔta en, doose gilema sore poan yele en ti la niɛ peelumi. Bisɛ mabia Hans n ze’ele Austria, n yuun lebese se’em mabipɔka n yuun yele en ti a boti en la: “Mam yuun doose la gilema sore poan lebese en ti la niɛ peelumi. Mam yuun kɔ’ɔn eŋɛ la kalam yele en, la wan eŋɛ se’em ti a kan ti’isa buyi buyi. Mam yuun nyaa biseri la n mea soŋa la mam wan sɔsera la en se’em.” Ge ho san bɔta nɛra la, basɛ ti a baŋɛ lan ani ho se’em ti ya nyaa lɛɣɛ taaba. Ho buuri malema yɛla la yɛla ase’a ta’an basɛ ti hon lɛɣeri nɛra se’em la bɔna de to’ore.
MABIISI WAN EŊƐ LA WANI TA’AN SOŊƐ KRISTAKƆMA N DE NƐREYƆNA?
14. To wan tɔɣera la wani ti la soŋɛ Kristakɔma n de nɛreyɔna?
14 To za’a waabi wan eŋɛ la wani ta’an soŋɛ Kristakɔma sɛba n boti ba ele bii di pɔɣeba la? Sore deyima dela to wan bisɛ tomea soŋa la yelese’a ti to tɔɣera. (Ep. 4:29) To ta’an soke tomea yeti: ‘Mam iti nɛresɛba n boti ba ele bii di pɔɣeba la sia sia? Mam san nyɛ mabia la mabipɔka n sɔseri, mam ni kɔ’ɔn ti’isa ti ba boti la taaba?’ (1 Tim. 5:13) Leyɛ’ɛsa, la ka nari ti to ita Kristakɔma sɛba n de nɛreyɔna wuu ba koŋe la sɛla la ban ka ele bii di pɔɣeba la. Hans ti to puɣum tɔɣɛ a yele la yeti: “Mabiisi basɛba ni soke mam yeti, ‘Beni n sɔi ti hon nan ka di pɔɣa? Ho kuregeri mɛ.’ Yetɔɣum ana wa ni basɛ ti nɛreyɔna ti’isa ti ba yele ka pakɛ. La me ni basɛ ti la dɛna la pɛ̃regerɛ bɔ’ɔra ba ti ba ele bii di pɔɣeba.” Tuɣum bisɛ hon wan yele sɛla ti la kpemese Kristakɔma n de nɛreyɔna giila!—1 Tes. 5:11.
15. (a) To san bɔta ti to soŋɛ nɛra ti a nyɛ luɣerɛ kpɛ’a, naresum yele la n boi Arom 15:2 la wan soŋɛ tɔ ti to geele la bem yele? (Bisɛ foote la.) (b) Hon nyɛ la bem yɛla vidiyo la poan?
15 To wan eŋɛ la bem to san ti’isa ti abunɔ la abunɔ wan ta’an lɛɣɛ taaba? Baabule la yele to ti to ti’isa basɛba yele. (Kaalɛ Arom 15:2.) Nɛreyɔna zo’e zo’e ka boti nɛreba ɛ luɣerɛ kpɛ’a bo ba, bala la, la dela to nam ban boti sɛla ge bo ba gilema. (2 Tes. 3:11) Basɛba me wan bɔta ti to soŋɛ ba ge ba san ka yele ho ti ho soŋɛ ba, da kabela ti ho eŋɛ bala.e (Mag. 3:27) Nɛreyɔna basɛba ka boti ho ni kɔ’ɔn keŋɛ ta yele nɛra la ti abunɔ n boti ho. Lydia dela nɛreyone bɔna Germany. A yeti: “Ho ta’an beem mabia la, la mabipɔka la ti ba naɛ la yamam la nɛreba sɔsɛ bii de’em. Yeen bisɛ hon wan eŋɛ se’em ti mabia la, la mabipɔka la nyaŋɛ nyɛ taaba sɔsɛ ge nyaa basɛ sɛla n gee la bo ba.”
Mabiisi san laɣesɛ taaba, la ni dɛna la yɔ’ɔ bɔ’ɔra Kristakɔma n de nɛreyɔna ti ba ta’an sɔsɛ baŋɛ taaba (Bisɛ kaalegɔ zɛ’an 15)
16. Kristakɔma n de nɛreyɔna nari ti ba tɛ̃ra la bem yele?
16 To san dɛna nɛreyɔna bii to tari la luɣerɛ kpɛ’a, to za’a waabi wan ta’an tara pupeelum to vom poan! (Ym. 128:1) Ho san nan ka nyɛ luɣerɛ kpɛ’a, kelum tiregera ti ho basɛ ti hon la Yehowa zɔtɔ nyɔka la kpe’em. Mabipɔka ayima yu’urɛ n de Sin Yi ze’ele Macao yeti: “Hon de nɛreyone la ka yuuri la fii me ho san ti’isa hon la ho luɣerɛ kpɛ’a n wan ta naɛ taaba bɔna Paradiisi poan wuusa se’em la. Basɛ ti ho puurɛ pee la hon nan de nɛreyone la ge tara ho saŋa la tuna soŋa.” Ge ho wan eŋɛ la bem ho san nyɛ nɛra ti ya nyaa lɛɣera taaba? Zaseŋɔ seko n taɣelɛ la poan, to wan baŋɛ hon wan eŋɛ se’em nyaŋɛ lɛɣɛ nɛra ta di bii ele en.
YUUNƐ 137 Faithful Women, Christian Sisters (Kristakɔma Pɔɣesi N Tari Sakerɛ)
a Ho san bɔta ti ho baŋɛ nyaa ho maasum ya, kaalɛ zaseŋɔ yele la zuo n de “Lɛka—Bɔberɛ 1: Mam Seke Ti N Lɛɣɛ Pɔka Bii Buraa?” n boi jw.org.
b YELEBIRE VUURƐ: Zaseŋɔ wa la zaseŋɔ seko n taɣelɛ la poan, “lɛka” vuurɛ dela sansɛka ti buraa la pɔka sɔsera ti ba baŋɛ taaba nyaa ba wan ta’an dɛna nɛra la a pɔɣa. Tisi sise’esi poan, ba ta’an yeti pɔɣebɔrɛ, zaba lɛkɛ bii ba suure n kɛ̃ taaba. Buraa la pɔka san yele taaba ti ba suure n kɛ̃ taaba, ba lɛɣeri la taaba n bala. Ba wan lɛɣɛ taaba la bala ta paɛ se’em ma’a ti ba wan yeti ba boti ba di bii basɛ taaba.
c Ba tee yu’ura ase’a mɛ.
d Tisi sise’esi poan, mabiburaa n ni lɛɣɛ mabipɔka ge la me daɣɛ be’em ti mabipɔka lɛɣɛ mabiburaa. (Arut 3:1-13) Ho san bɔta ti ho baŋɛ yɛla zo’e zo’e, kaalɛ zaseŋɔ yele la zuo n de “Young People Ask . . . How Can I Tell Him How I Feel?” (Bunbilipaalesi Soke Yeti . . . Mam Wan Eŋɛ La Wani Ta’an Yele En Lan Ani Mam Se’em?) n boi Awake! October 22, 2004.
e Bisɛ vidiyo la zuo n de Nɛresɛba N Zabɛ Nyaŋɛ La Tari La Sakerɛ—Kristakɔma Nɛreyɔna, n boi jw.org.