Basɛ Ti Nɔŋerɛ Soŋɛ Hɔ Ti Ho Kelum Mɔɔla!

1. To yuun zamesɛ la bem yuun 2023 yuunɛ woo sɔsega la poan?

YUUN 2023 yuunɛ woo sɔsega la poan,a to yuun malum demese la to sakerɛ yɛla ase’a ge me wum teere ase’a to na’am mɔɔlegɔ tuuma la poan. Makerɛ, to yuun baŋɛ ti hali ba san ta sa’am Babilon Kãtɛ La ba’asɛ, nɛreba basɛba wan nyɛ yɔ’ɔ ti ba naɛ la Naayinɛ nɛreba. To yuun le baŋɛ ti kɔ’ɔn pɔsɛ November 2023, Na’am mɔɔlegɔdoma kan le gulesa ba na’am mɔɔlegɔ kãlɛ ase’a. Teere ana wa pa’alɛ ti na’am mɔɔlegɔ tuuma la yele ka le pakɛ? La daɣɛ bala la fii me!

2. Beni n sɔi ti na’am mɔɔlegɔ tuuma la dɛna atɔtɔ yele dabeserɛ woo poan? (Mark 13:10)

² Dabeserɛ woo, to na’am mɔɔlegɔ tuuma la kɔ’ɔn dɛna la atɔtɔ yele. Beni n sɔi? Se’ere n sɔi la sansɛka n gee la pɔ’ɛ mɛ. Bisɛ Yezu n yuun tɔɣɛ na’am mɔɔlegɔ tuuma la n wan ta ana se’em ba’asegɔ dabesa la poan. (Kaalɛ Mark 13:10.) Matu gɔŋɔ la poan, Yezu yuun yeti ba wan ta mɔɔlɛ yelesoma la tiŋa wa za’a poan ge ti ‘ba’asegɔ’ la nyaa wa’ana. (Mt. 24:14) Wana wa pa’alɛ ti Sitaana tingɔŋɔ wa kɔ’ɔn pɔ̃ra la sa’aŋɔ n bala. Yehowa puɣum mina dabese’ere bii se’em ma’a ti yele ana wa wan eŋɛ. (Mt. 24:36; 25:13; Tm. 1:7) Beere n yelegeri woo to kɔ’ɔn vuta du’ura dabeserɛ la mɛ. (Arom 13:11) Ge la nari ti to kelum mɔɔla ge ti dabeserɛ la nyaa paɛ.

3. Beni n sɔi ti to mɔɔla yelesoma la?

³ To san ti’isa to na’am mɔɔlegɔ tuuma la yele, to nari ti to geele sokere wa: Beni n sɔi ti to mɔɔla yelesoma la? La dela nɔŋerɛ n basɛ ti to mɔɔla. To san mɔɔla to iti pa’ala ti to nɔŋɛ yelesoma la, nɔŋɛ nɛreba ge ti sɛla n gaŋɛ za’a dela to nɔŋɛ la Yehowa la a yu’urɛ la. Basɛ ya ti to sɔsɛ yele ana wa ayima ayima.

TON NƆŊƐ YELESOMA LA N SƆI TI TO MƆƆLA

4. La ni ana hon la wani ho san wum yelesonɛ?

⁴ La ni ana hon la wani nɛra san yele ho yelesonɛ? Daanse’ere a yele ho ti, ya yire nɛra n dɔɣɛ bii ho nyɛ la tuuma. Nɔkpe’ene kai ti ho puurɛ wan pee ti ho bɔta ti ho tɔɣɛ yelesonɛ wa bo ho yire nɛreba la ho zɔdoma. La yuun ani hon la bala mea nɔɔ la hon yuun wum Naayinɛ Na’am la yelesoma la?

5. La yuun ani hon la wani hon yuun pɔsɛ zamesa Baabule la? (Bisɛ fɔɔra la.)

⁵ Ti’isɛ bisɛ la yuun ani ho se’em hon yuun pɔsɛ zamesa Baabule la. Ho yuun baŋɛ ti ho saazuo Sɔ la nɔŋɛ ho mɛ, bɔta ti ho naɛ la a nɛreba pu’usa en ge me pu’ulum biŋe ti a wan yese induuma la namesegɔ basɛ. Ho me yuun zamesɛ baŋɛ ti ho wan ta nyɛ ho nɛresɛba n ki la tinpaalega la poan, la yɛla ase’a me. (Mr. 10:​29, 30; Yon 5:​28, 29; Arom 8:​38, 39; Lil. 21:​3, 4) Yele ana wa yuun basɛ ti ho suure n sukɛ. (Lu. 24:32) Ho yuun nɔŋɛ hon zamesɛ sɛla la ge me kɔ’ɔn bɔta ti ho tɔɣɛ yelesoma wa bo nɛreba!—Dekɛ makɛ Yeremia 20:9.

6. Hon zamesɛ la bem Ernest la Rose yele la poan?

⁶ Geele zi’irego poan yele wa bisɛ. To mabia ayima yu’urɛ n de Ernestb yuun dela yuum pia ge ti a sɔ ki. Ernest yeti: “Mam yuun soke n mea yeti: ‘A zom la saazuo? Bii eŋa n ki la za’a n bala?’ Mam yuun san nyɛ kɔma n boi la ba sɔdoma, mam suure n ni sa’am.” Ernest yuun ni keŋɛ la a sɔ yɔɔ la zuo ta kpa duma zusɛ yeti: “Naayinɛ, soso mam boti la n baŋɛ la mam sɔ n boi zɛ’an.” A sɔ n yuun ki, yuum pia la ayopɔi pooren ti Ernest yuun sakɛ ti ba zamesɛ en Baabule la. A puurɛ n yuun pee la eŋa n zamesɛ baŋɛ ti kum ka mi sɛsɛla ge ba tuɣum gã’a gisa mɛ. A me yuun zamesɛ baŋɛ Baabule la n yeti beere sa’am kum isigere wan ta bɔna la. (Pa. 9:​5, 10; Tm. 24:15) Pooren, a yuun nyaa nyɛ a sokere wa lebesego! Ernest puurɛ n yuun pee la eŋa n zamesɛ sɛla Baabule la poan la. A pɔɣa Rose yuun naɛ la en zamesa ge me mɔɔla yelesoma la bɔ’ɔra nɛreba. Ba yuun muse ko’om la yuun 1978 poan. Ba suure n yuun sukɛ ti ba tara yelesoma wa mɔɔla bɔ’ɔra ba yidoma, ba zɔdoma la nɛra woo. Bala zuo la, Ernest la Rose yuun nyaŋɛ soŋɛ nɛreba n gaŋɛ 70 ti ba muse ko’om.

7. To san nɔŋɛ Baabule yelemɛŋɛrɛ la, to ni eŋɛ la bem? (Luke 6:45)

⁷ La niɛ peelumi ti ho san nɔŋɛ Baabule yelemɛŋɛrɛ la, ho kan ta’an sina. (Kaalɛ Luke 6:45.) La ani to wuu lan yuun ani Yezu podɔleba la se’em la. Ba yuun yeti: ‘To kan sina kan tɔɣɛ yelese’a ti to nyɛ ge wum la.’ (Tm. 4:20) Ton nɔŋɛ yelemɛŋɛrɛ la n sɔi ti to bɔta ti to mɔɔlɛ bo nɛreba zo’e zo’e la.

TON NƆŊƐ NƐREBA LA N SƆI TI TO MƆƆLA

8. Beni n sɔi ti to bɔta ti to mɔɔlɛ yelesoma la bo nɛreba? (Bisɛ daka la zuo n de “Nɔŋɛ Nɛreba—Ɛ Podɔleba.”) (Bisɛ foote la.)

⁸ To nɔŋɛ nɛreba wuu Yehowa la a Dayɔa la. (Mag. 8:31; Yon 3:16) To tari la giile bɔ’ɔra sɛba n ‘ka mi Naayinɛ,’ la sɛba n ‘ka tari beere sa’am puti’irɛ la.’ (Ep. 2:12) Yelese’a n paɛ ba, ba vom poan la basɛ ti la ana ba wuu ba boi la boko poan. Ge tomam tari yelese’a n wan soŋɛ ba ti ba doe na n de Naayinɛ Na’am yelesoma la. Ton tari nɔŋerɛ la giile la n soŋeri tɔ ti to bɔta ti to tiregɛ mɔɔlɛ yelesoma la bo ba. Ba san wum yelesoma wa la ni basɛ ti ba tara la beere sa’am puti’irɛ. Hali nananawa, ba wan tara pupeelum ge mina ti beere sa’am ba wan ta vɔna daarewoo Naayinɛ tinpaalega la poan.—1 Tim. 6:19.

9. Bem beere sa’am yele ti to tara kaɣera nɛreba ge beni n sɔi? (Ezekiel 33:​7, 8)

⁹ Ton nɔŋɛ nɛreba la zuo, to kɔ’ɔn bɔta la to yele ba ti tingɔŋɔ wa pɔ̃ri la ba’asegɔ. (Kaalɛ Ezekiel 33:​7, 8.) To tari la nɛra woo giile, yele yele wuu to deodoma sɛba n nan ka pu’useri Yehowa la nɛreba zo’e zo’e n puɣum ka mina ti sɛla wan eŋɛ la. Ba ka mi ti ‘mɛlesekãtɛ wan bɔna ti ka taaba nan ka wa’ana tinparɛ wa pi’ileŋɔ poan ta paɛ nananawa ge me kan le wa’ana.’ (Mt. 24:21) To boti la ba baŋɛ sɛla n wan ta eŋɛ gãkerɛ daarɛ la. Ba mina ti ba wan ta sa’am pumpɔreŋɔ pu’usegɔ ge nyaa sa’am tingɔŋɔ be’o wa Armagedon poan. (Lil. 16:​14, 16; 17:​16, 17; 19:​11, 19, 20) To kɔ’ɔn zusa la Yehowa ti a basɛ ti nɛreba zo’e zo’e kelese kaka wa ta’an naɛ la tɔ ti to pu’usa en. Ge bem n wan paɛ nɛresɛba n zaɣesɛ kaka la nananawa, hali la to yidoma?

10. Beni n sɔi ti la yele pakɛ ti to kɔ’ɔn kaɣera nɛreba?

¹⁰ Wuu ban puɣum pa’alɛ to sɛla zaseŋɔ seko n tole la poan la, nɛreba basɛba san nyɛ ti ba sa’ani Babilon Kãtɛ La ge eŋɛ teere, daanse’ere Yehowa wan faaɛ ba basɛ. La san dɛna bala, la yi nari ti to eŋɛ kalam kaɣɛ ba. Geele yele wa bisɛ: Ton yeti ba sɛla nananawa la ta’an basɛ ti ba ta tiɛ sɛla. (Dekɛ makɛ Ezekiel 33:33.) Daanse’ere ba ta’an ta tiɛ ton yuun kaɣɛ ba se’em la ge nyaa naɛ la to pu’usa Naayinɛ ge ti sa’aŋɔ la nyaa wa’ana. Wuu ‘tinmiiŋo kãtɛ n yuun miim’ ti sarega gu’ura la tee a puti’irɛ se’em la, daanse’ere nɛreba basɛba san ta nyɛ ban sa’ani Babilon Kãtɛ La se’em la, ti ba nyaa wan tee ba puti’irɛ.—Tm 16:​25-34.

TON NƆŊƐ YEHOWA LA A YU’URƐ LA N SƆI TI TO MƆƆLA

11. To wan eŋɛ la bem pa’alɛ ti to bo’ori Yehowa gilema, na’asegɔ la paŋa? (Liligere 4:11) (Bisɛ fɔɔra la.)

¹¹ Yele deyima n sɔi ti to mɔɔla yelesoma la dela to nɔŋɛ la Yehowa Naayinɛ la a zilam yu’urɛ la. Na’am mɔɔlegɔ tuuma la dela sarɔseko ti to ita pa’ala ti to nɔŋɛ la Naayinɛ ge pɛɣera en. (Kaalɛ Liligere 4:11.) Tomam me wan pɛɣera Yehowa ti: Ho nari mɛ Yehowa Naayinɛ ti ho toe gilema la na’asegɔ la paŋa, se’ere n sɔi la hon naam sɛla woo. To san basɛ ti nɛreba baŋɛ ti Naayinɛ n naam sɛla woo ge me basɛ ti to vɔna, bala pa’alɛ ti to bo’ori en la gilema la na’asegɔ. To me san tara to saŋa, to paŋa la to nutatum tiregera mɔɔla yelesoma la bɔ’ɔra nɛreba, bala pa’alɛ ti Yehowa tari la paŋa. Yele la gi’a gi’a dela, ton nɔŋɛ Naayinɛ la zuo ti to bɔta ti to tɔɣera a yele bɔ’ɔra nɛreba. (Mt. 6:33; Lu. 13:24; Kol. 3:23) To me ni bɔta la to pa’alɛ nɛreba a yu’urɛ la, la de vuurɛ. Beni n sɔi?

12. To wan eŋɛ la bem pa’alɛ ti to basɛ ti Yehowa yu’urɛ la ana la zilam na’am mɔɔlegɔ poan?

¹² Ton nɔŋɛ Yehowa la n sɔi ti to bɔta ti a yu’urɛ la ana kasi. (Mt. 6:9) Bala zuo, to boti la to yele nɛreba ti Sitaana n tɔɣɛ Yehowa yele se’em la daɣɛ yelemɛŋɛrɛ. (Pin. 3:​1-5; Yob 2:4; Yon 8:44) To san bɔna na’am mɔɔlegɔ poan, to ni kɔ’ɔn bɔta la to yele nɛreba Yehowa n ani se’em. To boti la nɛra woo baŋɛ ti Yehowa dela nɔŋerɛ, ita a sɛla woo tontɔɔ ge ti la me kan yue, a Na’am la wan yese namesegɔ ge basɛ ti nɛresaaleba tara pupeelum la suma’asum tingɔŋɔ wa zuo. (Ym. 37:​10, 11, 29; 1 Yo. 4:8) To san tɔɣera yele ana wa bɔ’ɔra nɛreba, to basɛ ti a yu’urɛ la ana la zilam. Tomam me puurɛ ni pee mɛ, se’ere n sɔi la to tuni la to zugbere tuunɛ la ton de Yehowa Sɛɛradoma la. Wani wani?

13. Beni n sɔi ti to zuo zɛkɛ la ban yi’iri to Yehowa Sɛɛradoma la? (Isaiah 43:​10-12)

¹³ Yehowa yi’iri to la a ‘Sɛɛradoma.’ (Kaalɛ Isaiah 43:​10-12.) Yuuma fii n tole, Tigere Zuo Bisegadoma la gulesɛ la gɔŋɔ ti la yeti: “Ton de Yehowa Sɛɛradoma la dela yɔ’ɔ n ka tari makerɛ.”c Beni n sɔi? Makɛ bisɛ ti ba parum bo ho mɛ ti ho tum la be’em. Ho eeri la nɛra tɔɣɛ po’e ho ti nɛreba la baŋɛ ti ban tɔɣɛ sɛla la daɣɛ yelemɛŋɛrɛ. Hon wan loe la nɛrekani taaba? Nɔkpe’ene kai ti ho wan loe la se’em ti nɛra woo mina ti a tari la halesoma ge me tara yelemɛŋɛrɛ. Yehowa n loe tɔ ti to dɛna a Sɛɛradoma la pa’alɛ ti, a mi to mɛ soŋa soŋa ge me sakɛ ti to wan ta’an tɔɣɛ po’e en ti eŋa n de yelemɛŋɛrɛ Naayinɛ la. La dela yɔ’ɔ bɔ’ɔra tɔ ti to dɛna a Sɛɛradoma. Bala zuo la, to boti la to basɛ ti nɛreba baŋɛ a yu’urɛ la ge me basɛ ti nɛreba baŋɛ ti Sitaana n tɔɣɛ a yele se’em la dela pumpɔreŋɔ. To san ita bala, to kɔ’ɔn tuna mɛ ti la makɛ la to yu’urɛ la n de Yehowa Sɛɛradoma la!—Ym. 83:18; Arom 10:​13-15.

TO WAN KƆ’ƆN MƆƆLA LA BALA TA PAƐ BA’ASEGƆ

14. Bem yelesoma n gã gura to beere sa’am?

¹⁴ Yelesoma n kɔ’ɔn gã gura to beere sa’am! To mi ti Yehowa wan kã bo to ti nɛreba zo’e zo’e naɛ la tɔ ge ti mɛlesekãtɛ la nyaa pɔsɛ. Leyɛ’ɛsa, to suure n sukɛ la ton baŋɛ ti hali la mɛlesekãtɛ la poan, daanse’ere nɛreba zo’e zo’e wan yese Sitaana tingɔŋɔ wa poan ge naɛ la tɔ pɛɣera Yehowa!—Tm. 13:48.

15-16. To wan kelum ita la bem ge to wan ita bala ta paɛ la sankani?

¹⁵ Sankaŋa n nan ka paɛ la, to kelum tara la tuuma ti to tum. To kan le tum tuundena wa beere sa’am. To tari la yɔ’ɔ ti to mɔɔlɛ Naayinɛ Na’am yelesoma la tingɔŋɔ wa poan ge me kaɣera nɛreba yelese’a n wan ta eŋɛ beere sa’am la. Nɛreba nari ti ba baŋɛ ti Sitaana tingɔŋɔ be’o wa kɔ’ɔn pɔ̃ra la ba’asegɔ. Gãkerɛ daarɛ la me san paɛ, ba wan mina ti yelese’a ti to yuun tɔɣera la ze’ele la Yehowa Naayinɛ zɛ’an na.—Eze. 38:23.

¹⁶ Wana wa basɛ ti ho lu ho suure ti ho eŋɛ la bem? Ton nɔŋɛ yelesoma la, nɔŋɛ nɛreba ge me nɔŋɛ Yehowa la a yu’urɛ la zuo, to wan kelum tuulegera, mɔɔla bɔ’ɔra nɛreba ta paɛ se’em ma’a ti Yehowa wan yeti ‘la seke ya!’