Russia N Isige Zabera La Ukraine

Hali la tingɔŋɔ wa zuodoma n kɔ’ɔn tiregera ti zaberɛ da bɔna la, February 24, 2022 bulika yu’unyu’uŋɔ, ti Russia dekɛ soogɛpa zabera la Ukraine. Soogɛpa wa n isige zabera la tiŋa wa la, wan ta’an daam tingɔŋɔ wa la wani? Dabesa fii n tole poan, António Guterres n de United Nations nɛŋadaana la yeti: “Nɛreba n wan namesɛ se’em, ba wan sa’am Europe tisi se’em la nɛreba n kan le bɔna fai se’em la dela yelekãtɛ paa.”

Yele ana wa makɛ Baabule yetɔɣebiŋa la wani?

• Yezu Krista yuun tɔɣɛ biŋe ti saŋa keni na ti “tiŋa wan isige zabɛ la tiŋa ti sɔ’ɔlum kayima me isige zabɛ la sɔ’ɔlum kayima.” (Matu 24:7) Kaalɛ zaseŋɔ yele wa zuo n de “Bem Yɛla N Wan Ita Pa’ala Ti To Boi La ‘Ba’asegɔ Dabesa La’ Bii ‘Ba’asegɔ Saŋa La’ Poan?” bisɛ Baabule la n pa’alɛ ti, zaberɛ se’a n boi zina beere wa la dela Yezu yetɔɣebire la n tuni tuuma.

• Liligere gɔŋɔ la dekɛ zaberɛ makɛ mɛ la nɛra n bã “yeho mɔlega” ge nyaa “sa’ahɛ zaberɛ tiŋa wa zuo.” (Liligere 6:4) Kaalɛ zaseŋɔ yele wa zuo n de “Bani N De Yibã’areba Banaasi La?” ta’an baŋɛ yetɔɣebiŋere wa n tɔɣɛ zaberɛ yele se’em zina beere wa.

• Daniel gɔŋɔ la tɔɣɛ biŋe ti “saazuo bɔba naba la” la “tiŋanɔɔrɛ bɔba naba la” wan isige zabera la taaba. (Daniel 11:25-45) Bisɛ vidiyo la zuo n de Yetɔɣebiŋere N Tum Tuuma​—Daniel A Zuo 11 zamesɛ baŋɛ sɛla n sɔi ti to yeti Russia la a tinbibisi la dela saazuo bɔba naba la.a

• Liligere gɔŋɔ la le tɔɣɛ la “Naayinɛ n de Paŋa Za’adaana la dabeserɛ kãtɛ la zaberɛ” yele. (Liligere 16:14, 16) Ge zaberɛ kana wa daɣɛ zaberɛ se’a ti tisi zabera la taaba zina beere wa la. Kaalɛ zaseŋɔ yele wa zuo n de “Bem N De Armagedon Zaberɛ La?” ta’an baŋɛ beere sa’am yɛla wa zo’e zo’e.

Beni n sɔi ti ho wan ta’an tara suure lua ti beere sa’am wan ta ana soŋa?

• Baabule la yeti Naayinɛ “wan yese zaberɛ basɛ tingɔŋɔ wa zuo.” (Yooma 46:9) Kaalɛ zaseŋɔ yele wa zuo n de “Tara Puti’irɛ Ti Beere Sa’am Wan Ta Ana Soŋa” ta’an zamesɛ Naayinɛ beere sa’am pu’ulumbiŋa la zo’e zo’e.

• Yezu yuun pa’alɛ a podɔleba ti ba zusa ti Naayinɛ Na’am la wa’ana. (Matu 6:9, 10) Na’am la dela saazuo gɔmɛt n wan tum Naayinɛ puti’irɛ n boti sɛla tingɔŋɔ wa zuo, Naayinɛ me boti la suma’asum bɔna tingɔŋɔ wa zuo. Bisɛ vidiyo la zuo n de Naayinɛ Na’am La Dela Bem? ta’an zamesɛ baŋɛ Na’am wa n wan tara nyuurɔ se’em bɔ’ɔra hɔ.

Yehowa Sɛɛradoma n gaŋɛ 129,000 n boi Ukraine tiŋa. Wuu Sɛɛradoma n boi tiŋa woo poan ana se’em la, ba tɔɣeseri la Yezu ka dekɛ bamea pa’asɛ nalɛɣerɛ la zaberɛ yɛla poan. (Yon 18:36) Tingɔŋɔ wa za’a waabi poan, Yehowa Sɛɛradoma kɔ’ɔn mɔɔla “Na’am la yelesoma” la mɛ ti Na’am la ma’a n wan ta’an maalɛ asaala yɛla la zaberɛ za’a. (Matu 24:14) To beem ho ti ho nyɛ tɔ ta’an zamesɛ Baabule beere sa’am puti’irɛ wa zo’e zo’e pa’asɛ.