KƆ’ƆN PIGERA!

Baabule La Yeti Bem La Pu’usegɔdoma N Dekɛ Bamea Pa’asɛ Ukraine Zaberɛ La Poan La?

Geele yele ana wa bisɛ pu’usegɔ nɛŋadoma n de nɛrezureba n dekɛ bamea pa’asɛ Ukraine zaberɛ la poan se’em:

“Faara Kirill n de Russia Ortodox Pu’usegɔ Nɛŋadaana la ka tɔɣɛ giisɛ Russia n isige zabera la Ukraine la. . . . A Pu’usegɔ la kɔ’ɔn parena la yɛla bɔ’ɔra Ukraine, ti Putin me tara yele aŋa pa’ala la nari se’em ti a isige zabɛ.”—EUobserver, March 7, 2022.
“Faara Kirill . . . yele la sɛla ti la pa’alɛ ti la kɔ’ɔn nara mɛ ti a tiŋa la isige zabɛ la Ukraine. A yeti zaberɛ wa wan laɣum soŋɛ ti ba gu be’em.”—AP News, March 8, 2022.
“Atenidaarɛ n tole wa, Epiphanius I n de Kyiv, Ukraine Ortodox Pu’usegɔ Nɛŋadaana la kã bo a nɛreba mɛ ti ‘ba zabɛ la Russiadoma n boti ba to’e ba tiŋa la’ . . . [A] le yeti, la daɣɛ be’em ti ho ku Russia soogɛpa.”—Jerusalem Post, March 16, 2022.
“Tomam [n de Ukrainian Council of Churches and Religious Organizations (UCCRO) la] kɔ’ɔn pa Ukraine Soogɛpa la sɛba woo n boti ba zabɛ soŋɛ to la poore mɛ. To me kɔ’ɔn zusa bɔ’ɔra ba mɛ ge me kã’ara bɔ’ɔra ba, la ba tiregeri ti ba zabɛ po’e Ukraine ti nɛreba da to’e tiŋa la.”—UCCROa Statement, February 24, 2022.

Hon puti’irɛ dela bem? Pu’usegɔdoma n yeti bamam doli la Yezu Krista la, nari ti ba kpemese ba pu’usegɔdoma giila ti ba keŋɛ zaberɛ? Baabule la yeti bem?

Kɔ’ɔn pɔsɛ diimi sa ti pu’usegɔdoma dekɛ bamea pa’asɛ zaberɛ poan

Diimi yɛla pa’alɛ ti hali la pu’usegɔdoma n iti wuu bamam boti la suma’asum la, ba kɔ’ɔn soŋera zaberɛ mɛ bii ba sakɛ ti nɛreba kena zaberɛ. Yuuma zo’e zo’e n wana ti Yehowa Sɛɛradoma basɛ ti ba nigum nigumtuuma wa niɛ peelum. Bisɛ makerɛ ana wa n boi to gɔnɔ la poan.

“Pu’usegɔ N Soŋɛ Zaberɛ Se’em Ti La Dɛna ‘Pumpɔreŋɔ N Tari Dabeem’” pa’alɛ la Roman Katolik Pu’usegɔ n ku nɛreba zo’e zo’e se’em ge yeti ba iti bala bɔ’ɔra la Naayinɛ la Krista.
“Katolik Pu’usegɔ N Boi Africa” bo la makerɛ n pa’alɛ pu’usegɔdoma n ka gu buuri zaberɛ basɛ se’em, hali la ba ni laɣesɛ nɛreba zo’e zo’e kuura la.
Zaseŋɔ yɛla wa zuo n de “La Nari Ti To Yeti Pu’usegɔdoma Ka Tari Buurɔ?,” “Pu’usegɔdoma N Soŋɛ Asaaleba Zaberɛ Se’em” la “Pu’usegɔdoma N Pa Bɔberɛ Deyima Poore” tɔɣɛ pa’alɛ la Katolik, Ortodox la Protestant pu’usegɔ nɛŋadoma n soŋɛ bɔba ayi la za’a se’em zaberɛ zo’e zo’e poan.

Kristakɔma nari ti ba soŋɛ zaberɛ?

Yezu n pa’alɛ sɛla: “Nɔŋɛ ho tadaana wuu hon nɔŋɛ homea se’em la.” (Matu 22:39) “Kɔ’ɔn nɔŋɛ ya dinedoma.”—Matu 5:44-47.

Ti’isɛ yele wa bisɛ: Pu’usegɔ wan ta’an nana Yezu n yeti to nɔŋɛ taaba la ge kelum kpɛmesa ba nɛreba giila ti ba ku nɛreba zaberɛ poan? Kaalɛ zaseŋɔ yɛla wa zuo n de “Yelemɛŋɛrɛ Kristakɔma La Zaberɛ” la “La Wan Ta’an Eŋɛ Ti Ho Nɔŋɛ Ho Dinedoma?” nyɛ lebesego la.

Yezu n yele sɛla: “Mam Na’am la ka pa’asɛ tingɔŋɔ wa poan. Mam Na’am la san pa’asɛ ni tingɔŋɔ wa poan, mam tuuntuneba la wan zabɛ ni ti [ba] kan nyɔkɛ mam.” (Yon 18:36) “Sɛba woo n foe su’usi la, su’usi mea n wan ku ba.”—Matu 26:47-52.

Ti’isɛ yele wa bisɛ: Kristakɔma yuun san ka nari ni ti ba zabɛ po’e Yezu, la wan nara ti ba isige zabɛ sɛla zuo? Kaalɛ zaseŋɔ yele wa zuo n de “Kristabia Nari Ti A Dekɛ Amea Pa’asɛ Zaberɛ Poan?” bisɛ diimi yelemɛŋɛrɛ Kristakɔma n yuun doli Yezu pa’alegɔ ge me tɔɣesa en se’em.

Bem n wan paɛ pu’usegɔdoma sɛba n soŋeri zaberɛ la?

Baabule la pa’alɛ ti Naayinɛ zaɣesɛ pu’usegɔdoma sɛba n iti wuu bamam tɔɣeseri la Yezu ge ka dɔla a pa’alegɔ la.—Matu 7:21-23; Titus 1:16.

Liligere gɔŋɔ la pa’alɛ ti Naayinɛ wan basɛ ti “sɛba woo ti ba ku ba tingɔŋɔ wa poan la” taalɛ dɔla pu’usegɔdoma wa. (Liligere 18:21, 24) Ho san bɔta ti ho zamesɛ baŋɛ sɛla n sɔi, kaalɛ zaseŋɔ yele wa zuo n de “Bem N De Babilon Kãtɛ La?”
Yezu yuun basɛ ti la niɛ peelum ti pu’usegɔdoma sɛba woo ti Naayinɛ zaɣesɛ ba la wan nyɛ sa’aŋɔ ba tuumbe’ero la zuo, wuu ba ni “ŋmaɛ tisɛka woo n ka wɔni wɔla soma basɛ bugum poan” se’em la. (Matu 7:15-20) Kaalɛ zaseŋɔ yele wa zuo n de “Pumpɔreŋɔ Pu’usegɔ Sa’aŋɔ Kɔ’ɔn Pɔ̃ra Mɛ!” zamesɛ baŋɛ yele wa n wan tum tuuma se’em.

Yehowa Sɛɛradoma Kɔ’ɔn Bɔna La Ba To’ore

Wuu Yehowa Sɛɛradoma n boi tingɔŋɔ wa poan ana se’em la, Sɛɛradoma n boi Russia la Ukraine, kɔ’ɔn nana Yezu n yuun bo nɔɔrɛ ti to da dekɛ tomesi pa’asɛ nalɛɣerɛ la zaberɛ yɛla poan la mɛ. Wana wa zuo la, to ka soŋeri bii to dekɛ tomesi pa’asɛ zaberɛ poan. Tomam n kɔ’ɔn bɔta ti to dɔla Baabule la n yele sɛla la zuo la, ba mɛleseri Sɛɛradoma basɛba mɛ. (Yon 15:19, 20; 2 Timoti 3:12) Makerɛ, Russia gɔmɛt la paɣɛ Sɛɛradoma zo’e zo’e mɛ sarega ge me mɛlesa basɛba. Ba me le to’e to pu’usegɔ zɛ’ɛsi mɛ. Ho san bɔta ti ho baŋɛ yɛla pa’asɛ, bisɛ www.jw-russia.org.

Bisɛ vidiyo wa zuo n de Pulisi N Kɔ Kɛ̃ Yehowa Sɛɛradoma N Boi Irkutsk Tiŋa Yɛa Poan Ta Mɛlesa Ba Ge Ti Ba Kelum Zɛ’a Kankaŋi, baŋɛ ba mɛleseri Yehowa Sɛɛradoma se’em Russia tiŋa poan ba sakerɛ la zuo.
Nɛreba mi ti, kɔ’ɔn pɔsɛ diimi sa, Yehowa Sɛɛradoma ka dekɛ bamea pa’asɛ tingɔŋɔ wa yɛla poan. Bisɛ vidiyo wa zuo n de Zɛ’a Kankaŋi Giisegɔ Poan, baŋɛ ba yuun kelum tara ba birikinte la se’em hali la Nazi Germany gɔmɛt la, la diimi Soviet Union la n yuun mɛleseri ba la.

Soso bisɛ to intanɛt tuuma zɛ’an la zamesɛ to sakerɛ yɛla pa’asɛ, la Baabule la n pu’ulumbiŋe ti beere sa’am zaberɛ kan le bɔna la. (Isaiah 2:4; Yeremia 29:11) To beem ho ti ho nyɛ tɔ ta’an zamesɛ yɛla zo’e zo’e pa’asɛ.

To nyɛ fɔɔra wa zɛ’an, gɔbega ta paɛ zuɔ: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO la bii Ukrainian Council of Churches and Religious Organizations, dela pu’usegɔ pia la banuu ti Ortodox, Greek la Roman Katolik, Protestant, Yudadoma, Maalamdoma la Evangelical pu’usegɔdoma nɛreba bɔna bim.