Ton Soŋeri Nɛreba Se’em Tinsɛka Ti “Zaberɛ La Zaberɛ Yɛla” Bɔna Bim

Ba’asegɔ dabesa wa poan, to kɔ’ɔn wuna “zaberɛ la zaberɛ yɛla.” (Matu 24:6) Ge susa’aŋɔ yɛla san paɛ mabiisi, ba ni nyɛ soŋerɛ mɛ. Yuun 2022 Tigere Zuo Bisegadoma Lasebaarɛ #3 yuun tɔɣɛ pa’alɛ la mabiisi n boi Europe dapɔya bɔba ti Ukraine zaberɛ la daam ba la n nyɛ soŋerɛ se’em. Zaberɛ san puɣum bɔna, mabiisi iti la wani ta’an soŋera taaba? Mabiisi n boi Ukraine n nyɛ soŋerɛ la soŋɛ ba la wani?

Yele Ani N Pakɛ? Ba Eŋɛ La Wani Ta’an Soŋɛ?

February 24, 2022 ti zaberɛ yuun kɔ Ukraine tiŋa la, Coordinators’ Committee yuun maasum la nutatum ti ba tari ta soŋɛ mabiisi n boi Ukraine la. Ukraine tigere yile la yuun eŋɛ la kalam da lɔɣɔrɔ tiŋa la poan ge loe Disaster Relief Committees pisiyi la buyopɔi ti ba tɔ̃rɛ lɔɣɔrɔ la.

Leyɛ’ɛsa, mabiisi n boi Yehowa Sɛɛradoma Tigere Zuo la yuun eŋɛ la kalam ti’isɛ ba wan eŋɛ se’em ta’an soŋɛ. Coordinators’ la Publishing committees n soŋeri Tigere Zuo Bisegadoma la yuun yele Global Purchasing Department la ti bamam la mabiisi n boi Ukraine la Poland tigere yila la naɛ taaba tum ti ba bisɛ ban wan eŋɛ se’em ta’an soŋɛ mabiisi la. Mabiisi n boi Purchasing, Shipping, la Legal departments n boi tigere yila la woo la Ukraine Branch Committee nɛra ayima la nɛresɛba n boi Global Purchasing Department la, yuun ni seke taaba mɛ daarewoo bisɛ ba wan eŋɛ se’em ta’an soŋɛ.

Jay Swinney n tuni la Global Purchasing Department la yeti, “Yia la, la daa nari ti to baŋɛ yelese’a n pakɛ la. To daa boti to bo mabiisi la dia la bɛɣesegɔ lɔɣɔrɔ. Ge yeledaaŋɔ ayima daa dela ton wan baŋɛ yelese’a n pakɛ ba la. La daa le nara ti to le baŋɛ ton wan eŋɛ se’em ta’an dekɛ lɔɣɔrɔ kɛ̃ Ukraine tiŋa zaberɛ saŋa la poan ta bo mabiisi la kalam ti daaŋɔ kan wa’ana.”

Ge ti March 9, 2022 paɛ la, lɔɣɔseto woo ti mabiisi n boi Ukraine ɛɛra la, to daa baŋɛ mɛ. Dise’a ti to daa dekɛ eŋɛ daɣesi poan dela nɛnɔ, kareyɛɛna, mui la tɛa. Lɔɣeseto ti to daa le dekɛ pa’asɛ dela bɛɣesegɔ lɔɣɔrɔ n de wuu ki’ibɔ la nama dɔbelegɔ lɔɣɔrɔ. Sankaŋa la to daa baŋɛ ti to san bo nɛra ayina woo lɔɣɔrɔ wa ti la paɛ bakwai anaasi, to wan eŋɛ sanɛ paɛ la Amerika dɔla 65. To mabiisi zo’e zo’e ti la daa nara ti to bo ba lɔɣɔrɔ wa. Bala la, Coordinators’ Committee la yuun sakɛ mɛ ti ba dekɛ ligekãtɛ ta soŋɛ ba. Ge mabiisi wan eŋɛ la wani dekɛ lɔɣɔrɔ la keŋɛ ti dɛŋa kan paɛ ba?

March 13 poan la, mabiisi bayi n ze’ele Poland yuun dekɛ la lɔɣɔrɔ ze’ele Poland tigere yile la keŋɛ lɔɣɔrɔ biŋeri zɛ’an n lɛm Lviv, Ukraine. Ge ti ba nyaa keŋɛ la, mabiisi n boi Poland la Ukraine tigere yila la yuun soŋɛ ba mɛ ti ba maasum ba kenɛ la. Tigere yile la yuun maasum la gɔnɔ ti la nara ti mabiisi la tara la wan eŋɛ se’em ti ba ta’an dekɛ soŋerɛ ta bo. Ba daa le gulesɛ labelɛ ba lɔa la inya n pa’alɛ ti ba yeti ba ta soŋɛ la nɛreba. Tigere yile la daa le sɔsɛ la mabiisi n boi Ukraine ti ba baŋɛ sore sɛka ti ba wan doose paɛ zɛ’an la poan kalam. Maasum soŋɔ wa la Yehowa soŋerɛ zuo, dabeserɛ ayima poan la, ba daa nyaŋɛ dekɛ lɔɣɔrɔ la ta boi Disaster Relief Committees n boi Lviv la ge ti mabiisi la daa le lebe Poland la imma’asum.

La boi bim ti lɔɣɔseto ti ba daa tari keŋɛ la daa paɛ soŋa soŋa mɛ ge mabiisi la daa nyaŋɛ tari la soŋerɛ lɔɣɔrɔ n de wuu bɔra 23 (1 U.S. ton) ma’a keŋɛ. Sɛla n daa gee la daa paɛ la bɔra 4,600 (220 U.S. tons) ti la daa nara ti ba dekɛ keŋɛ! La wan eŋɛ la wani ti ba tari lɔɣɔrɔ n zo’e wana wa ta bo mabiisi la kalam?

“Ho Nɛreba Wan Pee Puurɛ Tum”

Mabiisi n boi tingole wa za’a n daa kaalɛ yelese’a n boi jw.org n tɔɣɛ mabiisi n boi Ukraine ti zaberɛ la paɛ ba la yele la, ba zo’e zo’e daa boti la ba soŋɛ. Mabiisi n boi zɛse’esi n zãa la daa boi la bo’olum ti ba dekɛ soŋɛ Yehowa Sɛɛradoma na’am tuuma la tingole wa za’a waabi poan. Ba daa mi soŋa soŋa ti ba wan dekɛ ligeri wa tum tuuma soŋa soŋa. Sɛba me n daa lɛm la daa dekɛ la ba saŋa, ba paŋa la ba lɔɣɔrɔ ta soŋɛ. Basɛ ti to bisɛ makerɛ ase’a.

Poland tiŋa poan, sɛba n daa pee puurɛ ti ba soŋɛ la daa laɣesɛ la lɔɣɔrɔ zo’e zo’e ti kɔma la me gulesɛ sɛla eŋɛ kaatɛ zuto. Bartosz Kościelniak n pa’asɛ Purchasing Department n boi Poland tigere yile la yeti, “Mam kaalɛ Yooma 110:3 sugumnɔɔrɛ zo’e zo’e mɛ. Bilam n pa’alɛ ti Yehowa ‘nɛreba wan pee ba puurɛ tum’. Ge nananawa, mam mea nyɛ mabiisi la n soŋeri se’em. Mam nyɛ mabiisi zo’e zo’e n pee ba puurɛ ti ba soŋɛ tuuma wa. Wana basɛ ti mam nyɛ Baabule kaalegɔ zɛ’an wa n tum tuuma se’em.”

Yehowa Sɛɛradaana ayima tari la company n karegɛ paa. A daa dekɛ la a loore kãra bo ge da petrol pa’asɛ ti ba tari ta tum tuuma. A yeti: “La dela yɔ’ɔ bo mam ti n eŋɛ pa’alɛ ti n nɔŋɛ Yehowa la mabiisi. Mam puurɛ pee mɛ la mam n daa soŋɛ la.” Petrol ti a daa da eŋɛ loore la poan la gaŋɛ 7,700 liters (2,034 gal). To mabiisi me daa dekɛ la ba saŋa la ba paŋa keŋɛ kilomita 48,000 (30,000 mi) tari lɔɣɔrɔ la ta bo mabiisi la!

Ban daa deŋɛ nɛŋa tari lɔɣɔrɔ keŋɛ la, dabesa pia la anuu pooren, March 28 poan la, ba daa nyaŋɛ tari dia, bɛɣesegɔ lɔɣɔrɔ la tiim n paɛ bɔra 2,300 (110 U.S. tons) ta bo mabiisi n boi Ukraine. Mabiisi la n daa pee puurɛ dekɛ nɔŋerɛ tum tuuma la zuo ti to daa nyaŋɛ eŋɛ bala. Mabiisi n daa yese ba suure poan dekɛ lɔɣɔrɔ soŋɛ ti basɛba me daa dekɛ lɔɣɔrɔ la ta bo la daa basɛ ti tigere la n dekɛ ligese’a ti ba dekɛ soŋɛ la sige tiŋa. Ta paɛ zina, Yehowa Sɛɛradoma dekɛ la soŋerɛ lɔɣɔrɔ n paɛ bɔra 4,370 (209 U.S. tons) keŋɛ Ukraine. La soŋɛ mabiisi n boi Ukraine la wani?

“Ya Nɔŋerɛ Me Boi Bim Mɛ!”

Lɔɣɔrɔ n daa paɛ Lviv tiŋa la, Disaster Relief Committees n boi Ukraine la za’a daa tɔ̃rɛ lɔɣɔrɔ la mɛ bo sɛba woo n eeri soŋerɛ. Ba daa tɔ̃rɛ lɔɣɔrɔ boi tisi zo’e zo’e mɛ. Ho san ze’ele tisi ase’a yɛ’ɛsa Lviv tiŋa la ta’an paɛ kilomita 1,300 (800 mi) mɛ. La boi bim ti ba daa tum tuuma wa soŋa soŋa mɛ ge la daa kelum dekɛ saŋa mɛ.a

Markus Reinhardt n pa’asɛ Ukraine Branch Committee la poan yeti: “Biɣi biɣi saŋa wa poan, mabiisi baŋɛ ti Yehowa sirum nɔŋɛ ba mɛ. Ba baŋɛ ti la yele pakɛ mɛ ti ba kɛlesa pa’alegɔ n ze’ele tigere la zɛ’an ge ti yeledi’ire nyaa paɛ. Makerɛ dela, ba kpemese nɛra woo giila ti ba tara dia la ko’om ba yɛa poan. Anton n de keema bɔna Kyiv tɔɣɛ pa’alegɔ wa yele yeti: ‘Yehowa tigere la maasum to mɛ gura biɣi biɣi saŋa. To puurɛ pee mɛ la ban eŋɛ bala la. Ton daa tari dia, ko’om la walesi la daa faaɛ to vom basɛ mɛ.’ To puurɛ pee mɛ la mabiisi la n daa kelese pa’alegɔ wa se’ere n sɔi la, la daa basɛ ti tigere yile la nyɛ saŋa maasum soŋa soŋa ta’an wa’an soŋɛ tɔ.”

La daa ani mabiisi la wani ban daa nyɛ soŋerɛ la? Mykola la Zinaida n boi Kharkiv yuun tɔɣɛ lan ani bamam se’em mɛ. Ba yeti: “To suure sukɛ mɛ la ya ti’iseri to yele se’em la. To pu’usɛ ya la dia la tiim la. Yelemɛŋɛrɛ, to sirum baŋɛ ti Yehowa fabelɛ to yele mɛ.” Valentyna me boi la bilam. A yeti: “Zaberɛ la n daa pɔsɛ la, nɛreba daa nari ti ba ze’ele poole poan yue ge nyaa paa lɔɣɔrɔ da. La daa kpe’em mɛ ti ho nyɛ hon boti sɛla da. Ge Yehowa daa bisɛ nyɛ de za’a. A daa basɛ ti ba loe mabiisi ti ba tari dia dɔla yɛa poan bɔ’ɔra tɔ. Lɔɣɔse’a ti ba daa tari wa’ana la daa dela lɔɣɔse’a ti to daa kɔ’ɔn ɛɛra ge ka nyɛta! Biɣi biɣi saŋa poan ti la ana woo soŋerɛ ka boi la, nɛra woo nyaa ni zɛ’a gura la Yehowa la tigere la ti ba doose sarɔɔ n boi de to’ore poan soŋɛ tɔ. . . . La dela pupeelum ti to nyɛ Yehowa soŋerɛ sansɛka n nari poan.”

Yevhen, Iryna, la Mykyta n zɔ yese Mariupol tiŋa poan la yeti: “To puurɛ pee mɛ la yan soŋɛ to deodoma wa se’em la. Yelemɛŋɛrɛ, ya soŋerɛ la wa’an la sansɛka n nari poan. Tomam n daa to’e lɔɣɔrɔ la daɣesi la poan la, to daa ti’isɛ ti dia ma’a n boi bim. Ge ton daa yu’ɛ la, to daa baŋɛ ti ya nɔŋerɛ me boi bim mɛ!”

Nɔkpe’ene kai ti, Yehowa ni dekɛ a vo’osum la soŋɛ a nɛreba mɛ ti ba doose nɔŋerɛ poan dekɛ soŋerɛ boi “zaberɛ la zaberɛ yɛla” saŋa. Ya zo’e zo’e daa yese ya suure poan bo bo’olum dekɛ soŋɛ tingole wa za’a na’am tuuma la. Ya sɛba me daa doose la donate.jw.org bo bo’olum, Bala n daa basɛ ti to ta’an tum yele ana wa za’a. To pu’usɛ ya zo’e zo’e la yan yese ya suure poan bo la!

Ton Dekɛ Soŋerɛ Boi Kalam Kalam Se’em Ti Daaŋɔ Ka Paɛ Tɔ

1. 

   February 24, 2022: Coordinators’ Committee la daa maasum la ligeri ti ba tari ta soŋɛ Ukraine. Wana n daa basɛ ti tigere yile la pɔsɛ da lɔɣɔrɔ ti ba wan dekɛ soŋɛ

2. 

   February 24–March 8, 2022: Ukraine tigere yile la daa da la lɔɣɔrɔ ge pɔsɛ dekɛ bo Disaster Relief Committees la ti ba tɔ̃rɛ. Tigeri yile la daa le maasum ti ba wan tɔ̃rɛ lɔɣɔse’a n ze’ele Poland wa’ana la

3. 

   March 9, 2022: Coordinators’ Committee la daa sakɛ ti ba dekɛ lɔɣɔrɔ ta bo mabiisi n boi Ukraine la

4. 

   March 10–12, 2022: Ba daa eŋɛ la maaseŋɔ ti ba dekɛ dia la lɔɣɔrɔ ze’ele Poland keŋɛ Lviv, Ukraine tiŋa poan

5. 

   March 13, 2022: Ba daa dekɛ la dia la lɔɣɔrɔ ze’ele Poland keŋɛ Lviv, Ukraine tiŋa poan

6. 

   March 14–16, 2022: Ton iti laɣesegɔ zɛ’an n lɛm Poznan, Poland tiŋa ti mabiisi n boi Local Design/Construction la laɣesa dia la bɛɣesegɔ lɔɣɔrɔ

7. 

   March 17, 2022: Ban daa dekɛ lɔɣɔrɔ la keŋɛ la dabesa anaasi pooren, mabiisi la dekɛ la lɔɣɔrɔ n paɛ bɔra 299 (14 U.S. tons) yakɛ keŋɛ Ukraine tiŋa ta bo mabiisi la

8. 

   March 21–27, 2022: Ba daa doose la sore kaŋa nɔɔ poan dekɛ lɔɣɔse’a n gee la ze’ele Poland keŋɛ Ukraine ta tɔ̃rɛ bo mabiisi n eeri soŋerɛ la dabeserɛ ayina poan

9. 

   March 28, 2022: Ban daa bo yɔ’ɔ dabesa 20 pooren la, ba daa nyaŋɛ tari la dia, bɛɣesegɔ lɔɣɔrɔ la tiim n paɛ bɔra 2,300 (110 U.S. tons) keŋɛ Ukraine tiŋa ta boi mabiisi la

Ta paɛ zina, Yehowa Sɛɛradoma dekɛ la soŋerɛ lɔɣɔrɔ n paɛ bɔra 4,370 (209 U.S. tons) keŋɛ Ukraine tiŋa ta soŋɛ mabiisi la.