Baabule La Yeti Bem La Tisi La N Naɛ Taaba Ti Ba Gu Tinparɛ Wa N Sa’ani Se’em La?

Alaserɛdaarɛ, November 20, 2022, ti ba daa ba’asɛ COP27 United Nations Climate Change Conference la. Tinparɛ wa n sa’ani se’em la zuo, nɛŋadoma la daa kɔ’ɛ puti’irɛ ti ba laɣesɛ ligeri soŋɛ tinse’a nɛreba n naseri la. Ge nɛreba zo’e zo’e daa sakɛ ti bala kan malum tee tinparɛ wa n sa’ani se’em la.

• November 19, 2022 poan ti António Guterres n de United Nations nɛŋadaana la daa yeti, “Mam puurɛ pee mɛ la ton kɔ’ɛ puti’irɛ ti to laɣesɛ ligeri soŋɛ sɛba ti tinparɛ wa n sa’ani se’em la basɛ ti ba namesa la. Ge to mi ti bala ma’a ka seke . . . Tinparɛ wa kelum bɔna la dɛŋa poan.”

• November 20, 2022 poan ti Mary Robinson n daa de Ireland tiŋa zuodaana, la UN High Commissioner for Human Rights daa yeti, “La kan yue, tinparɛ wa n sa’ani se’em la wan daam asaala woo.”

Bunbilipaalesi n ba’ɛ fabela tinparɛ wa n sa’ani se’em la yele. Ge tisi la wan ta’an naɛ taaba gu tinparɛ wa n sa’ani se’em la? Baabule la yeti bem?

Tisi la wan ta’an naɛ taaba tum soŋa soŋa?

Baabule la pa’alɛ ti tisi la san puɣum tiregɛ la se’em me ti ba gu tinparɛ wa n sa’ani se’em la, ba kan ta’an tee sɛla woo. Bisɛ yɛla ayi n sɔi:

• ‘Sɛla n ŋmɛlegɛ kan le tĩɛ.’​—Pa’ala 1:15.

  Vuurɛ: Gɔmɛtdoma kan ta’an tum sɛla woo ti ba bɔta se’ere n sɔi la, Naayinɛ ka naam asaaleba ti ba bisa bamea. (Yeremia 10:23) Tisi la san puɣum naɛ taaba ge tiregɛ la se’em me, ba kan ta’an maalɛ tingɔŋɔ wa yɛla.

• ‘Nɛreba wan nɔŋɛ bamesi, nɔŋɛ ligeri, ka tara nɔyinɛ.’​—2 Timoti 3:2, 3.

  Vuurɛ: Baabule la yuun kɔ’ɔn tɔɣɛ biŋe ti tomam dabesa wa poan, nɛreba wan ti’isa la ba ma’a yele ge kan naɛ taaba tuna ti yɛla kena soŋa bɔ’ɔra nɛreba.

Sɛla n sɔi ti to tara beere sa’am puti’irɛ

La daɣɛ asaala gɔmɛtdoma n wan basɛ ti tinparɛ wa ta ana soŋa beere sa’am. Naayinɛ loe la Yezu Krista ti a dɛna Bisegadaana. Yezu n wan ta’an bisɛ tingɔŋɔ wa soŋa soŋa. Baabule la tɔɣɛ a yele yeti:

• ‘Ge ti na’am la bisega paŋa wan bɔna a nu’usin. A yu’urɛ wan dɛna la Ka’aŋɔ Kiregadaana la Yinɛ Kãtɛ la Avɔi Wuusa Sɔ la Suma’asum Nabia.’​—Isaiah 9:6.

Yezu n de Naayinɛ Na’am la bii saazuo gɔmɛt la Naba. (Matu 6:10) A tari la paŋa la yɛm ge me bɔta ti a bisa tinparɛ wa la ku nɛreba. (Yooma 72:12, 16) A bisega la poan, saazuo gɔmɛt la wan sa’am sɛba n ‘sa’ani tinparɛ wa’ ge basɛ ti tinparɛ wa le ana soŋa.​—Liligere 11:18; Isaiah 35:1, 7.

Ho san bɔta ti ho baŋɛ sɛla n wan basɛ ti tinparɛ wa n sa’ani se’em la tee, kaalɛ zaseŋɔ yele la zuo n de “Climate Change and Our Future​—What the Bible Says” (Baabule La N Tɔɣɛ Tinparɛ Wa N Sa’ani Se’em, La To Beere Sa’am N Wan Ana Se’em).