Baabule La Yeti Bem La Tingɔŋɔ Wa N Ba’ɛ Tuulegɛ Se’em Dabesa Ana Wa La?

Dabesa ana wa, tingɔŋɔ la n ba’ɛ tuulegɛ se’em la ta’asɛ la yeledi’ima zo’e zo’e n daani nɛreba. Bisɛ lasebaarɛ yɛla wa:

July 13, 2023 ti National Oceanic and Atmospheric Administration, U.S. Department of Commerce yeti: “Yuun 174 n wana ti tingɔŋɔ la ka ba’ɛ tuulegɛ wuu lan tuulegɛ se’em June ŋmarega la poan la.”
July 13, 2023 ti European Space Agency yeti: “Italy, Spain, France, Germany la Poland tisi ba’ɛ tuulegɛ mɛ ti la ka tana ita. Nɛreba me ti’isɛ ti Sicily la Sardinia tisi me wan tuulegɛ paɛ wuu 48°C [118°F]. Daanse’ere, Europe tiŋa ka boi n tabelɛ tuulegɛ paɛ bala.”
July 17, 2023 ti Stefan Uhlenbrook n de director of hydrology, water and cryosphere World Meteorological Organization la poan la yeti: “Tingɔŋɔ wa n kɔ’ɔn tuulegera se’em la zuo, nɛreba ti’isɛ ti bala wan basɛ ti sakãra niira tabela, sa’ana lɔɣɔrɔ.”

Lasebaarɛ yele ana basɛ ti ho paleŋa ɛ̃ɣera me yoi? Geele Baabule la n tɔɣɛ de yele se’em.

Baabule la tɔɣɛ tingɔŋɔ wa n tuulegeri se’em wa yele mɛ?

Ɛɛ. Tingɔŋɔ wa n tuulegeri se’em, la yɛla ase’a kɔ’ɔn makɛ mɛ la Baabule la n tɔɣɛ tomam saŋa wa yele se’em la. Makerɛ, Yezu yuun tɔɣɛ tomam saŋa wa yele ti, to wan nyɛta ‘dabeem yɛla.’ (Luke 21:11) Tingɔŋɔ wa n ba’ɛ tuulegera se’em la basɛ ti nɛreba zo’e zo’e paleŋa ɛ̃ɣera ti asaala wan malum sa’am tingɔŋɔ la gaŋɛ bala.

Tingɔŋɔ wa wan ta sa’am gaŋɛ ti asaala kan ta’an kɛ̃’ɛra bim?

Aayi. Naayinɛ yuun naam tingɔŋɔ wa mɛ ti to kɛ̃’ɛra bim daarewoo. A kan basɛ ti asaala sa’am tingɔŋɔ la. (Yooma 115:16; Pa’ala 1:4) Naayinɛ pu’ulum biŋe ti a wan ‘sa’am sɛba n sa’ani tingɔŋɔ la.’—Liligere 11:18.

Baabule la pa’alɛ ti Naayinɛ wan ta’an gu tingɔŋɔ wa ti la kan sa’am. A me wan eŋɛ bala.

‘Naayinɛ n go’e sabeokeŋɔ la ti ku lɔbera fula fula, ti kokãtɛ komi’isi kãra ma’ɛ za’a.’ (Yooma 107:29) Naayinɛ tari paŋa n wan gu yelese’a n wan ta’an sa’am tingɔŋɔ la. Naayinɛ wan ta’an gu yelese’a n basɛ ti tingɔŋɔ la ba’ɛ tuulegera ti nɛreba kan namesa.
‘Hon kaari tinparɛ wa bisa ge bɔ’ɔra ka ko’om. Hon bo’ori ka lɔɣɔrɔ.’ (Yooma 65:9) Naayinɛ wan basɛ ti tingɔŋɔ wa dɛna paradiisi.

Hon san bɔta ti ho zamesɛ baŋɛ Baabule la n pa’alɛ paradiisi yele se’em pa’asɛ, kaalɛ zaseŋɔ yele la zuo n de “Who Will Save the Earth?” (Ani N Wan Te’ele Tinparɛ La?)