Zaberɛ N Boi Middle East Tisi—Baabule La Yeti Bem?

Zaberɛ n boi Israel la Iran ti United States dekɛ ba nɛŋa kɛ̃’ɛsɛ bim la basɛ ti dabeem kɛ̃ la nɛreba n boi tingɔŋɔ wa za’a poan. Zaberɛ wa wan paɛ tisi za’a? Gɔmɛtdoma wan ta’an gu zaberɛ wa ge basɛ ti suma’asum bɔna?

Nɛresɛba n mi Baabule yetɔɣebiŋ’a ta’an ti’isa ti Middle East zaberɛ la dela Armagedon zaberɛ la ti Liligere gɔŋɔ la tɔɣɛ de yele la.

Baabule la yeti bem?

Gɔmɛtdoma wan ta’an gu Middle East zaberɛ la?

Baabule la yeti: “Da dekɛ ho mɛŋa delom nabiihe. Da delom nɛresaala n kan ta’an fan hɔ.”—Yooma 146:3.

To ka mi nyaa gɔmɛtdoma wan ta’an basɛ ti suma’asum bɔna Middle East poan. Ge Baabule la basɛ ti la niɛ peelumi ti nalɛɣerɛdoma, asaala gɔmɛt bii tiga kan ta’an gu zaberɛ ge basɛ ti suma’asum bɔna wuusa. Naayinɛ ma’a n wan ta’an ‘yese zaberɛ basɛ tingɔŋɔ wa zuo.’—Yooma 46:9.

• Ho san bɔta ti ho zamesɛ yɛla pa’asɛ, kaalɛ Watchtower la zuo n de “An End to War—How?”

Zaberɛ n boi Middle East la basɛ ti yetɔɣebiŋere n tum tuuma?

Baabule la yeti: “Ya wan wom zaba yɛla ge sɔnha zaba sɔnhega. . . . Teŋa kayema wan ihege zabɛ la teŋa kayema, te sɔ’ɔlom me deyema wan ihege zabɛ la sɔ’ɔlom deyema.”—Matu 24:6, 7.

Yelese’a n iti Middle East la pa’alɛ ti to boi la ‘tingɔŋɔ wa ba’asegɔ’ poan ge me pa’alɛ ti to boi la “ba’ahegɔ dabeha la” poan. (Matu 24:3; 2 Timoti 3:1) Ton nyɛti zaberɛ zina beere wa la pa’alɛ ti la kan yue Naayinɛ wan yese zaberɛ, la yelese’a woo n basɛ ti nɛreba namesa la.

• Ho san bɔta ti ho zamesɛ yɛla pa’asɛ, kaalɛ zaseŋɔ yele la zuo n de “What Is the Sign of ‘the Last Days,’ or ‘End Times’?”

Armagedon wan pɔsɛ la Middle East?

Baabule la yeti: ‘Ba laɣesɛ ba keŋɛ zɛsɛka ti ba yi’ira Hebru poan ti Armagedon.’—Liligere 16:16.

Armagedon zaberɛ la daɣɛ asaala gɔmɛtdoma n wan zabɛ la taaba ti la wan pɔsɛ Middle East. La dela tingɔŋɔ wa za’a zaberɛ ti asaala gɔmɛtdoma la Naayinɛ wan zabɛ.

• Ho san bɔta ti ho zamesɛ yɛla pa’asɛ, kaalɛ zaseŋɔ yele la zuo n de “Bem N De Armagedon Zaberɛ La?”

Bem n wan soŋɛ tɔ ti to ta’an gu tomea putɛyiila poan sankana wa?

Baabule la yeti: “Da fabele ya sɛsɛla, ge sohɛ ya Yenɛ ya po’ohegɔ poan sɛla te ya bɔta. Ya sohora en daarɛ woo la popeelom.”—Filipi 4:6.

Yehowaa Naayinɛ boti la to zusa en. Naayinɛ n fabeli to yele la zuo, a wan kelese to zusega ge soŋɛ tɔ ti to ta’an ŋmibe putɛyiila poan. (1 Peter 5:7) Sore deyima ti a ita bala dela, a ni soŋɛ to mɛ ti to bɔkɛ sɛla n sɔi ti zaberɛ bɔna, zaberɛ n kan le bɔna se’em, la eŋa n wan eŋɛ se’em yese to namesegɔ la basɛ.—Liligere 21:3, 4.

• Ho san bɔta ti ho zamesɛ baŋɛ Naayinɛ n soŋeri to se’em, kaalɛ zaseŋɔ yele la zuo n de “Mam Wan Ta’an Nyɛ Subuɣelegɔ Yɛla Baabule La Poan?”