Mam Wan Ta’an Nyɛ Subuɣelegɔ Yɛla Baabule La Poan?
Baabule la lebesego
Ɛɛ. (Arom 15:4) Bisɛ Baabule kaalegɔ zɛ’ɛsi n soŋɛ nɛreba zo’e zo’e ti yeledaaŋɔ paara ba bii ba suure n sa’am.
Zaseŋɔ yele wa poan
Daaŋɔ yɛla
Yooma 23:4: “Mam nɔɔ keni la bɔ̃’ɔ poan ti la ana gbareti ge mam ka zoti dabeem ti sɛla wan daam mam, se’ere n sɔi la ho boi la mam mɛ.”
Vuurɛ: Ho san zusa Naayinɛ ge dɔla a Yelesum n de Baabule la, daaŋɔ yɛla san puɣum paɛ hɔ, ho wan ta’an kelum tara sukpe’ene.
Filipi 4:13: “Sɛla woo poan mam tari paŋa mɛ doose la se’emdaana n bo’ori mam paŋa la zuo.”
Vuurɛ: Naayinɛ wan bo ho paŋa ti ho ta’an ŋmibe yeledaaŋɔ woo poan.
Ho nɛra san ki
Pa’ala 9:10: “Tuuma bii maaseŋɔ bii mi’ilum bii yɛm ka boi Yɔɔ poan.”
Vuurɛ: Sɛba n ki la ka nameseri, ba me kan ta’an daam tɔ. Ba ka mi sɛsɛla.
Tooma 24:15: ‘A wan isige nɛreba kum poan.’
Vuurɛ: Naayinɛ wan ta’an isige to nɛresɛba n ki la, lebe vom poan na.
Ho san ba’ɛ ti’isa ho be’em la yele
Yooma 86:5: “O Yehowa,a ho dela nɛresonkɔ ge kɔ’ɔn maasum ti ho di sugeri bo; ho tari la yelemɛŋɛrɛ nɔŋerɛ n zo’e bɔ’ɔra sɛba woo n yi’iri ho la.”
Vuurɛ: Naayinɛ diti sugeri bɔ’ɔra sɛba n eŋɛ pa’alɛ ti ba tee mɛ ge lu ba suure ti ba kan le eŋɛ bala.
Yooma 103:12: ‘A dekɛ tomam be’em lobe zãɛ mɛ wuu dapɔya bɔba n zãɛ la zaɣenɔya bɔba se’em la.’
Vuurɛ: Naayinɛ san di sugeri bo to, a ni dekɛ to be’em la lobe zãɛ mɛ. A ni ka dekɛ to be’em seto ti to tum kurum la, zɛregera tɔ bii dɔlegera to tuberɛ.
Susa’aŋɔ
Yooma 31:7: “Ho nyɛ la wuni mam se’em mɛ; ho mi mam suure n sa’am se’em mɛ.”
Vuurɛ: Naayinɛ mi hon nameseri se’em la mɛ. A bɔkɛ lan ani ho se’em mɛ, hali se’em ma’a ti nɛreba ka mina lan ani ho se’em.
Yooma 34:18: “Yehowa ani la du’a du’a la sɛba suure n sa’am la; a faari la sɛba giila n kɔ’ɔsɛ la basera.”
Vuurɛ: Naayinɛ pu’ulum biŋe ti a wan soŋɛ hɔ, ho suure san sa’am. A wan bo ho paŋa ti ho ta’an ŋmibe ho daaŋɔ la poan.
Bã’asi
Yooma 41:3: “A san bɛ̃’ɛra gã a gɔregɔ zuo, Yehowa wan bisɛ en.”
Vuurɛ: Ho san bɛ̃’ɛra, Naayinɛ wan soŋɛ hɔ ti ho ta’an ŋmibe. A wan basɛ ti la ana ho buɣa buɣa ge bo ho paŋa la ŋmibega la yɛm ti ho ta’an kɔ’ɛ ho puti’irɛ soŋa.
Isaiah 33:24: “Nɛra ka boi n wan ta yeti: ‘Mam bɛ̃’ɛri mɛ.’”
Vuurɛ: Naayinɛ pu’ulum biŋe ti saŋa keni na ti asaaleba za’a wan ta tara imma’asum.
Putɛyiila
Yooma 94:19: “Se’em ma’a ti putɛyiila ni gaŋɛ mam la, ho ni buɣelɛ mam suure ge basɛ ti la ana mam lama lama.”
Vuurɛ: To san tara putɛyiila ge dekɛ tomea delum Naayinɛ, a wan soŋɛ tɔ ti la ana to lama lama.
1 Peter 5:7: “Dekɛ ya putɛyiila bo en, se’ere n sɔi la a fabeli ya yele mɛ.”
Vuurɛ: Naayinɛ mi lan ani to se’em mɛ. A yeti to yele en yelese’a n daani tɔ.
Zaberɛ
Yooma 46:9: “A wan yese zaberɛ basɛ tingɔŋɔ wa zuo.”
Vuurɛ: Naayinɛ Na’am la poan, a wan yese zaberɛ woo basɛ.
Yooma 37:11, 29: “Sirege n meadoma la n wan sɔna tingɔŋɔ la, Ba me wan tara pupeelum la suma’asum zo’e zo’e. . . . Tontɔɔdoma la n wan sɔna tingɔŋɔ la, ba wan bɔna ka poan daarewoo.”
Vuurɛ: Tontɔɔdoma la wan tara pupeelum la suma’asum tingɔŋɔ wa zuo daarewoo.
Fabela beere sa’am n wan ana se’em
Yeremia 29:11: “Yehowa yeti, ‘mam mi putɛse’a ti n ti’isa bɔ’ɔra ya mɛ, n ti’iseri la suma’asum yɛla bɔ’ɔra ya ge daɣɛ daaŋɔ yɛla ti n basɛ ti la beere ta ana soŋa bɔ’ɔra ya.’”
Vuurɛ: Naayinɛ basɛ ti a nɛreba tara suure lua ti beere sa’am n ani soŋa n gã gura ba.
Liligere 21:4: “A wan duuse ba nintam ba nini poan basɛ, ti kum kan le bɔna, susa’aŋɔ la kaasega la induuma kan le bɔna. Yelekɛɣesi la toli ya.”
Vuurɛ: Naayinɛ pu’ulum biŋe ti a wan yese tuunfɛ̃’ɛsa ti to nyɛta zina wa la woo basɛ.
a Yehowa dela Naayinɛ yumɛŋɛrɛ. (Yooma 83:18) Bisɛ zaseŋɔ yele la zuo n de “Ani N De Yehowa?”