BUNBILIPAALESI SOKE YETI
Baabule La Wan Ta’an Soŋɛ Mam La Wani?—Bɔberɛ 1: Baŋɛ Ho Baabule La Soŋa
“Mam ni kɔ’ɔn tiregɛ ti n kaalɛ Baabule la mɛ ge mam san ni nyɛ ku zo’e se’em la, mam giila n ni kɔ’ɔsɛ!”—Briana, 15.
La me ani hon la bala? Yele ana wa wan ta’an soŋɛ hɔ!
Beni n sɔi ti la nara ti ho kaala Baabule la?
Ho nyɛta nɛŋa kaala Baabule la dela zinyaŋerɛ bɔ’ɔra hon? La san dɛna bala, bɔkerɛ boi bim mɛ. Ho ta’an ti’isɛ ti Baabule la dela gɔŋɔ n tari gɔnlaɣesi n gaŋɛ tusa ti fɔɔra puɣum ka bɔna bim. Wana wa ta’an basɛ ti ho bɔta ti ho bisa TV bii vidiyodoma gana ho kaala Baabule la!
Ge ti’isɛ yele wa bisɛ: Ho san nyɛ daka ti tuulum lɔɣɔrɔ bɔna bim, ho inya kan kita ti ho bɔta ti ho baŋɛ lɔɣɔse’a n boi bim?
Baabule la me ani wuu tuulum lɔɣɔrɔ daka la. Ku tari la yɛm pa’alegɔ n wan soŋɛ hɔ ti ho
Kɔ’ɛ ho puti’irɛ soŋa
Sɔsa la ho dɔɣereba
Nyɔɣɛ zɔsonɔ
Ŋmibe yeledaaŋɔ poan
Beni n sɔi ti gɔnkɛka wa wan ta’an soŋɛ to zina beere wa? Se’ere n sɔi la, “Naayinɛ vo’osum la n basɛ ti Gulesegɔ woo bɔna.” (2 Timoti 3:16) Bala pa’alɛ ti ka’aŋɔ la n boi Baabule la poan la ze’ele la Naayinɛ zɛ’an na.
Baabule la dela tuulum lɔɣɔrɔ daka n tari yɛm pa’alegɔ
N wan kaala Baabule la, la wani?
Sore deyima dela ho pɔsɛ kaala Pin’ileŋɔ ta paɛ Liligere. Bala wan soŋɛ hɔ ti ho baŋɛ Baabule la n tɔɣeri sɛla yele. Sarɔtɔ zo’e zo’e boi mɛ ti ho wan ta’an doose kaalɛ Baabule la. Geele makerɛ ayi wa bisɛ:
Ho ta’an kaalɛ gɔnɔ piyoobe la buyoobe (66) la za’a wuu bo tigese gã’a se’em la, Pin’ileŋɔ ta paɛ Liligere.
Ho ta’an kaalɛ Baabule la wuu yɛla n yuun eŋɛ doose taaba makɛ ma’a se’em la.
Sɛla n wan soŋɛ hɔ: New World Translation Appendix A7 pa’alɛ la yelese’a n yuun eŋɛ Yezu n yuun boi tingɔŋɔ wa zuo la ti la doose taaba nima nima.
Sore se’ere n pa’asɛ buyi ti ho wan ta’an kaalɛ Baabule la dela ho kaalɛ yelese’ere n yuun eŋɛ ti la makɛ la yeledaaŋɔ sɛka n paari ho la. Makerɛ:
Hon wan bɔta ti ho nyɔɣɛ zɔsonɔ? Kaalɛ Yonatan la David yele la. (1 Samuel, a zuo 18-20) Nyaa dekɛ yelese’a n boi “Hon Wan Eŋɛ Se’em Nyɔɣɛ Zɔsonɔ” la poan baŋɛ hon wan ta’an zamesɛ sɛla gulesegɔ la poan.
Hon wan bɔta ti ho kumesɛ homea ta’an gu homea gurebisɛ poan? Kaalɛ Yosef n yuun eŋɛ se’em gu amea gurebisɛ poan. (Pin’ileŋɔ, a zuo 39) Nyaa dekɛ yelese’a n boi “Hon Wan Eŋɛ Se’em Gu Homea Gurebisɛ Poan . . . Yosef—Bɔberɛ 1” la “Ba Yuun Parum Bo En Mɛ! Yosef—Bɔberɛ 2” la poan baŋɛ hon wan ta’an zamesɛ sɛla gulesegɔ la poan.
Hon wan bɔta ti ho baŋɛ zusega n wan ta’an soŋɛ ho se’em? Kaalɛ Nehemia yele la. (Nehemia, a zuo 2) Nyaa dekɛ yelese’a n boi “Naayinɛ Yuun Lebese A Zusega La Mɛ” la poan baŋɛ hon wan ta’an zamesɛ sɛla gulesegɔ la poan.
Sɛla n wan soŋɛ hɔ: Ho san kaala Baabule la, basɛ ti hon boi zɛ’an la ana sim ti ho puti’irɛ ta’an bɔna kaalegɔ la poan.
Sore se’ere n pa’asɛ butã ti ho wan ta’an doose kaalɛ Baabule la dela ho kaalɛ gulesegɔ ayima bii yuuma gɔnɔ la ayima ge nyaa ti’isɛ bisɛ la wan soŋɛ ho se’em. Ho san kaalɛ ba’asɛ, soke homea sokere ana wa:
Beni n sɔi ti Yehowa basɛ ti ba gulesɛ yele wa?
Yele wa basɛ ti Yehowa hala la niɛ peelum la wani?
Mam wan eŋɛ la wani dekɛ tum tuuma n vom poan?
Sɛla n wan soŋɛ hɔ: Dekɛ New World Translation study edition la bisɛ vidiyodoma, maps, la yɛla ase’a n wan soŋɛ hɔ ti ho bɔkɛ Baabule la soŋa.