Hanyoyin Kyautata Yadda Muke Wa’azi—Yin Wa’azi a Wuraren Kasuwanci

Muhimmancinsa: Da yake mutane da dama suna daɗewa a wuraren kasuwancinsu, hanya mafi kyau da za mu yi masu wa’azi ita ce ta wajen zuwa inda suke aiki. Muna jin daɗin yin wa’azi a wuraren kasuwanci kuma hakan na kawo sakamako mai kyau. Me ya sa? Domin muna samun mutane da yawa kuma ’yan kasuwan suna yin fara’a don suna gani kamar mu kwastomomi ne. Masu shela suna bukatar nuna sanin yakamata da kuma yin shiga mai kyau idan suna so su sami sakamako mai kyau. (2 Kor. 6:3) Saboda haka, ya kamata mai kula da hidima ya riƙa lura da yadda ake yin wa’azi a wuraren kasuwanci da kuma masu shela da ke zuwa wuraren.

Yadda Za Mu Cim ma Hakan:

Ka shirya gajeriyar gabatarwa. Idan mun yi doguwar gabatarwa da ta ɓata ma mutumin lokaci, hakan zai sa ya ƙi sauraronmu a nan gaba.
Zai fi kyau mu ziyarce su a lokacin da kwastomominsu ba su fara zuwa ba tukun, kamar sa’ad da suke buɗe shagunansu.
Zai dace ka fara tattauna da mai shagon. Ka yi fara’a. Za ka iya cewa: “Mun lura cewa ba ma cika samun mutane a gida shi ya sa muke ziyartar su a wuraren aikinsu.” Ka ɗan tattauna da shi, bayan haka, sai ka ba shi warƙa ko mujallu ko kuma wani littafi. Ba zai dace ka ce ya ba da gudummawa ba, sai in ya tambaye ka yadda ake tallafa wa aikinmu domin kada ya ga kamar muna sayar da littattafai ne.
Idan mai shagon yana da fara’a, za ku iya neman izini daga wurinsa don ku tattauna da ma’aikatansa. A wasu wurare, zai fi kyau ka nemi izini don ka ajiye littattafai a inda ma’aikatan za su iya samu su karanta bayan sun kammala aiki.
Ka lura kuma ka nuna sanin yakamata. Alal misali, idan mai shagon yana magana da wani kwastoma, kada ka katse masa magana.

Ku Bi Shawarar Nan a Wannan Watan:

Sa’ad da kuke Ibada ta Iyalinku na gaba, ku gwada yadda za ku iya yin wa’azi a wuraren da ake kasuwanci a yankinku.