ginti

5 yahova ne moosa se yah bhi kaha, 2 “israeliyon ko aagya de ki woh apni chhaavni mein se aise har insan ko baahar bhej dein, jise kodh hai+ ya jise risav hota hai+ ya jo kisi ki laash ko chhoone ki vajah se ashuddh ho gaya hai.+ 3 chahe aadmi ho ya aurat, aise insan ko tum zaroor chhaavni se baahar bhej dena. tumhein aisa isliye karna chahiye taaki uski vajah se chhaavni ke baaki log dooshit na ho jaayen,+ jinke beech main nivas* karta hoon.”+ 4 tab israeliyon ne aisa hi kiya. unhonne aise logon ko chhaavni se baahar bhej diya, theek jaise yahova ne moosa ko bataya tha.

5 yahova ne moosa se yah bhi kaha, 6 “israeliyon se kehna, ‘agar koi aadmi ya aurat aisa paap kare jo aam taur par insan karte hain aur is tarah yahova ka vishvasyogya rehne se chook jaaye, to woh doshi thehrega.+ 7 use apna paap kabool karna hoga+ aur woh jis nuksan ke liye doshi hai uski poori bharpai karni hogi. aur uski keemat ka paanchvaan hissa jodkar dena hoga.+ use yah sab us insan ko dena chahiye jiske khilaf usne paap kiya hai. 8 lekin agar woh insan mar gaya hai aur uska koi kareebee rishtedar bhi nahin hai jise muavza diya jaa sake, to doshi ko yah muavza yahova ko dena chahiye. us rakam par yaajak ka hak hoga. saath hi, woh prayashchit ke liye jo medha arpit karega, us par bhi yaajak ka hak hoga.+

9 israeli jo bhi pavitra cheezen daan karte hain+ aur laakaar yaajak ko dete hain woh yaajak ki ho jaayengi.+ 10 har insan ki di hui pavitra cheezen yaajak ki hongi. jo kuch yaajak ko diya jaata hai us par yaajak ka hi hak hoga.’”

11 yahova ne moosa se yah bhi kaha, 12 “israeliyon se kehna, ‘agar ek aadmi ki patni sahi raah se bhatak jaati hai aur apne pati se bevafai karti hai, to aise maamle ko nipatne ka tareeka yah hai. 13 ho sakta hai kisi doosre aadmi ne us aurat ke saath yaun-sambandh rakha ho,+ magar yah baat pati ko nahin maaloom aur yah baat chhipi rehti hai. woh aurat vaakai khud ko bhrasht kar chuki hai, magar pakdi nahin gayi hai aur uske apradh ka koi gavah bhi nahin hai. 14 maan lo aisi aurat ke pati ke man mein jalan paida hoti hai aur use apni patni ki vafadari par shak hota hai. ya ho sakta hai ek aurat ne khud ko bhrasht nahin kiya hai, fir bhi uske pati ke man mein jalan paida hoti hai aur use apni patni ki vafadari par shak hota hai. 15 in donon haalaat mein pati ko chahiye ki woh apni patni ko yaajak ke paas le aaye. saath hi, woh epa ke dasvein bhaag* jau ka aata bhi laaye. yah uski patni ka chadhava hoga. us aadmi ko chadhave par tel nahin daalna chahiye, na hi us par loban rakhna chahiye, kyonki yah jalan ke maamle mein diya jaanevala anaj ka chadhava hai. yah isliye diya jaata hai taaki agar aurat doshi hai to uske paap par dhyan diya jaaye.

16 yaajak us aurat ko aage laayega aur yahova ke saamne khada karega.+ 17 yaajak mitti ke ek bartan mein taaza paani* lega aur pavitra dere ki zameen se thodi mitti lekar us paani mein daalega. 18 yaajak jab us aurat ko yahova ke saamne khada karega, to uske baal khulva dega aur uski hatheliyon par yaadgar ka chadhava yaani jalan ke maamle mein diya jaanevala anaj ka chadhava rakhega.+ yaajak ke haath mein woh kadva paani hoga jo shaap laata hai.+

19 fir yaajak us aurat se yah kehkar shapath khilayega: “agar tu, jis par tere pati ka adhikar hai,+ sahi raah se nahin bhatki aur toone khud ko bhrasht nahin kiya hai aur kisi paraye aadmi ne tere saath yaun-sambandh nahin rakha hai to tu shaap laanevale is kadve paani ke asar se bach jaaye. 20 lekin agar toone, jis par tere pati ka adhikar hai, sahi raah se bhatakkar khud ko bhrasht kiya hai aur kisi doosre aadmi ke saath yaun-sambandh rakha hai—”+ 21 fir yaajak us aurat ko shapath dilayega ki agar usne yah paap kiya hai to us par shaap pade. yaajak usse kahega, “yahova teri jaangh* sada de* aur tera pet fula de. yahova aisa kare ki log shapath lete vakt aur shaap dete vakt teri misal dein. 22 aur yah paani jo shaap laata hai, teri antadiyon mein jaayega jisse tera pet fool jaayega aur teri jaangh* sad jaayegi.”* tab aurat ko kehna chahiye: “aameen! aameen!”*

23 fir yaajak ko chahiye ki woh shaap ke ye shabd kitab mein likhe aur kadve paani se dho daale. 24 fir yaajak aurat ko yah kadva paani pilayega jo shaap laata hai aur paani uske andar jaayega aur uska anjam bahot kadva hoga. 25 iske baad yaajak aurat ke haath se jalan ke maamle mein diya gaya anaj ka chadhava+ lega aur use yahova ke saamne aage-peechhe hilakar vedi ke paas laayega. 26 fir yaajak anaj ke chadhave mein se mutthi-bhar aata prateek ke taur par lega aur use vedi par jalayega taaki uska dhuaan uthe.+ iske baad woh aurat ko paani pilayega. 27 agar us aurat ne vaakai khud ko bhrasht kar liya hai aur apne pati ke saath bevafai ki hai, to jab yaajak us aurat ko shaap laanevala paani pilayega tab woh paani uske andar jaakaar kadvahat paida karega, uska pet fool jaayega aur uski jaangh* sad jaayegi.* aur log shaap dete vakt us aurat ki misal deinge. 28 lekin agar us aurat ne khud ko bhrasht nahin kiya aur woh bedag hai, to use yah saza nahin milegi. woh garbhvati hokar santan paida kar paayegi.

29 yah jalan ke baare mein niyam hai+ jo aise maamlon mein laagoo hota hai jab ek aurat, jis par uske pati ka adhikar hai, sahi raah se bhatak jaati hai aur khud ko bhrasht kar leti hai, 30 ya agar ek aadmi ko jalan hoti hai aur use apni patni ki vafadari par shak hota hai. aise maamlon mein pati ko chahiye ki woh apni patni ko yahova ke saamne laakaar khada kare aur yaajak us aurat par is niyam mein likhi baatein laagoo kare. 31 aise maamlon mein pati nirdosh hoga, lekin agar patni doshi saabit hoti hai to use saza bhugatnee hogi.’”