Si Cristo Subong Huwaran Para sa mga Pamatan-on
1 Pagkatapos sang isa ka paghambalanay sa Biblia ang isa ka kalibutanon nga pamatan-on nagsiling: “Naganyat ako sa mapagsik nga personalidad ni Jesucristo. Yari ang isa ka lider nga mahimo ko mapatihan.” Indi ini masiling sa bisan sin-o nga pungsudnon nga tawo ukon mga baganihan sa hampang kag kalingawan. Ang ila kalibutanon nga mga talaksan kag dicristianong estilo sang pagkabuhi wala nagakalipikar sa ila subong mga huwaran para sa aton.—Sal. 146:3, 4.
2 Ang mga pamatan-on ginapasalig nga kon magtuo sila kay Jesucristo, mga karnero sila sang Dios kag ginakilala kag ginaatipan ni Jesus. (Juan 10:14, 15, 27) Ang mga pamatan-on nga nagasunod kay Cristo subong ang ila Huwaran ginapakamaayo.
3 Sugod pa sang walo ka tuig ang edad, handum gid sang isa ka utod nga lalaki nga nagaalagad na karon sa Brooklyn Bethel ini nga pribilehiyo sa pag-alagad. Ginpalig-on sia nga tamdon ang pag-alagad sa Bethel subong isa ka praktikal nga paagi sa pagsunod sa halimbawa ni Cristo kon magdaku sia. Ginbutang sang iya mga ginikanan, subong man sang mga nagalakbay nga manugtatap, ini nga tulumuron sa atubangan niya. Agod buligan sia sa paghanda, ginpalig-on nila sia sa pagkabuhi sing makugi kaangay gid sang isa ka taga-Bethel, nagahimo sang mga ulubrahon sa balay, nagabulig sa pagmentinar sa Kingdom Hall, kag nagapalambo sing mga kalantip sa ministeryo. Pagligad sang mga tinuig na karon nga pag-alagad sa Bethel, nagapasalamat sia nga ginpanikasugan niya nga ilugon ang halimbawa ni Cristo samtang nagadaku sia.
4 Si Jesus wala maghimud-os sing kalibutanon nga karera; ginpili niya ang ministeryo. Isa ka lamharon nga utod nga babayi ang luyag magpayunir paggradwar niya sa eskwelahan apang nangalag-ag bangod wala sia sing nagakaigo nga part-time nga palamugnan. Pirme sia naghunahuna: ‘Mangita anay ako sing trabaho, ugaling ko ihatag ang akon aplikasyon sa pagpayunir.’ Ginpakita sa iya sang isa ka gulang nga kon maghulat sia sing mas madugay, ang bug-os tion nga trabaho mahimo nga mangin mas maayo tan-awon, kay wala sing butang nga nagapugong sa iya sa pagbaton sini. Sia nagpanaysayon: “Nangamuyo ako kay Jehova nga tuytuyan ako sang iya espiritu.” Gilayon sia nga nagpalista subong auxiliary payunir kag sang ulihi nangin regular payunir. Wala madugay pagkatapos sadto, nakakita sia sing nagakaigo nga palamugnan nga nagakabagay sa iya iskedyul sa pagpayunir.
5 Masidla nga ginwali ni Jesus ang mensahe sang Ginharian sa tanan. (Mat. 4:23) Ang lamharon nga mga Cristiano mahimo man makatuon nga mangin masidla sa pagbantala, nga indi mahadlok sa iban. Ang isa ka 14-anyos nga Saksi nagreport: “Nakahibalo ang tanan sa eskwelahan sang akon panindugan subong isa ka Cristiano. . . . Nakahibalo gid sila sa sini nga kon masugilanon ko ang isa ka kabutho samtang nagapakigbahin ako sa ministeryo, wala ako nagakahuya. Ang mga kabutho masami nagapamati, kag sa madamong beses nagabaton sila sing literatura.”
6 Ang pagbinagbinag sa halimbawa ni Cristo makabulig sa mga pamatan-on sa paghimo sing maalamon nga mga desisyon nahanungod sa ila palaabuton. Ang iya halimbawa nagapalig-on sa ila nga ‘dumdumon ang ila Dakung Manunuga’ paagi sa pagpakita sing kakugi sa pag-alagad kay Jehova. (Manugw. 12:1) Kaangay ni Cristo Jesus, ginapalambo nila “ang gugma sang Amay,” nga nagahatag sing mga pagpakamaayo nga maayo pa sangsa bisan anong butang nga mahatag sang kalibutan. Sa baylo sang “pagtaliwan,” makapaabot sila nga ‘magpabilin sing dayon.’—1 Juan 2:15-17.