Ang mga Gradwado sang Gilead Ginpalig-on nga Palambuon ang Maayong mga Kalantip sa Pagkomunikar

SANG Domingo, Marso 4, 1990 kapin sa 4,100 ka tawo ang nagpuno sang Jersey City Assembly Hall of Jehovah’s Witnesses para sa gradwasyon sang ika-88 nga klase sang Watchtower Bible School of Gilead. Ang 24 ka gradwado naghalin sa 6 ka pungsod kag ipadala sa 13 ka pungsod tanan.

Nagsugod ang programa sang alas 10:​00 s.a. Sa tapos sang pag-amba, ginbuksan ini ni George Gangas, nga karon kapin na sa 90 anyos kag isa ka katapo sang Nagadumala nga Hubon, paagi sa isa ka mainiton nga pangamuyo kay Jehova. Nian, ginpaathag sa malip-ot sang tsirman, si C. W. Barber, isa man ka katapo sang Nagadumala nga Hubon, kag isa man ka gradwado sang ika-26 nga klase sang Gilead, ang pila sang madasig nga mga pagbalhin sa kalibutan. Naghinakop sia paagi sa pagsiling: “Karon pa lang natabo nga may kapin nga dalayawon nga kahigayunan nga mangin mga saksi sang pagkasupremo ni Jehova kag sang iya pagkamatarong.” Dayon ginpakilala niya ang nanuhaytuhay nga mga humalambal sa programa sang aga.

Ginpili ni Vernon Wisegarver, isa ka katapo sang Komite sang Pabrika sa Brook­lyn, ang tema nga “Mangin Lantip sa Inyo Hilikuton.” Ginagamit ang ilustrasyon tuhoy sa isa ka panday sa salsalon sang minuro nga nagapanday sing mabakod nga kadena nga, kon itabid sa angkla, nagaluwas sang kabuhi sang tanan sa barko sa tion sang unos, ginpaanggid niya ang mga gradwado sang Gilead sa panday sa salsalon. Paagi sa pagtudlo sa mga tawo sang Biblia, mabuligan nila sila sa pagtukod sing makaluwas-kabuhi nga kadena sang diosnon nga mga kinaiya, nga ginagamit ang mga kalantip nga napalambo nila sa tion sang ila paghanas sa Gilead. Ginpalig-on niya ang mga gradwado nga bairon pirme ang ila mga kalantip sa pagtudlo kag magtindog sa atubangan sang labing daku sa tanan nga mga Hari subong “lantip nga mga manugpangabudlay.”

Masunod, si John Barr, isa ka katapo sang Nagadumala nga Hubon, naghambal sa topiko nga “Tilawi kag Tan-awa nga Maayo si Jehova.” Ginpasad niya ang iya pamulongpulong sa Salmo 34:​8 nga nagasiling: “Tilawi kag tan-awa nga maayo si Jehova, kamo nga katawhan; malipayon ang mapagros nga tawo nga nagadangop sa iya.” Ginlaygayan niya sila: “Tilawi ang tanan sa inyo tulumuron bilang mga misyonero. Tilawi ang tanan. Indi kamo magkahadlok. Nian maeksperiensiahan ninyo ang pagkaayo ni Jehova sa isa ka paagi nga wala pa gid ninyo anay maeksperiensiahi. Indi mangin pilian. Indi gid magsiling, ‘Indi ko luyag ini.’ Tilawi ini.”

Si Charles Woody, isa ka katapo sang Service Department Committe sang Brooklyn, naghambal sa iya pinili nga tema nga “Paghupot sing Balanse nga Pagtamod sa Aton Kaugalingon.” Sia nagsiling: “Luyag naton makaupod ang mga tawo nga may balanse nga pagtamod sa ila kaugalingon, nga wala pirme nagapilit sang paagi nila, nga maabtik maghatag sing komendasyon kag magpalig-on sa iban, kag, bisan pa may ihibalo sila, wala nila ginapabatyag ang iban nga wala sila sini.” Nagdugang pa sia: “Subong mga misyonero luyag ninyo nga maganyat ang mga tawo sa kamatuoran, indi pagtabugon sila. Ang inyo mapainubuson nga paggawi mangin hamili gid sa pagbulig sa inyo nga mahimo ini.”

Si Lyman Swingle, isa ka katapo sang Nagadumala nga Hubon, masunod nga naghambal sa tema nga “Ang Masunod nga mga Kapitulo, Ano ang Isugid Nila sa Aton?” Nagsugod sia paagi sa pagsiling: “Ginasugdan ninyo karon ang isa ka bag-o nga kapitulo sa inyo kabuhi. Ano ang inyo isulat sa sining mga kapitulo kutob karon kag tubtob sa palaabuton?” Ginpahanumdom niya sila: “Ang tanan nga ginahimo ninyo dapat magdala sing kadungganan kag himaya kay Jehova,” kag nagdugang pa sia: “Pat-ura nga ang inyo mga desisyon napasad sa Pulong sang Dios. Dumduma ang Hulubaton 3:​7 nga nagasiling: ‘Dili ka magpakaalam sa imo kaugalingon.’ Kabay nga masapwan ka nga matutom sa pagtuman sang imo hilikuton.” Naghinakop sia paagi sa pagsiling: “Nagasalig kami nga indi gid kamo makatapos sa pagsulat sang inyo biograpiya, nga kamo mabuhi sing dayon.”

Masunod, ginlaygayan ni Jack Redford, isa sang mga instruktor sang eskwelahan, ang mga gradwado: “Mangin Buhi nga mga Halad.” Nagsugod sia paagi sa pagsiling: “Ang pagmisyonero isa ka kabuhi sang paghalad. . . . Ginahigugma namon kamo bangod sang inyo nagasakripisyo sang kaugalingon nga espiritu.” Nagabalikwat sang Filipos 2:​17, nga sa diin si apostol Pablo nagsiling nga gin-ula sia kaangay sang ilimnon nga halad, nga nagakahulugan nga handa sia sa paggamit sang iya kaugalingon subong isa ka buhi nga halad, sia namangkot: “Apang paano ang mga misyonero masami nga kaangay sang ilimnon nga mga halad?” Nian nag-asoy sia sing duha ka eksperiensia tuhoy sa mga misyonero nga naggamit sang ila kaugalingon sing labaw sa ginakinahanglan. Ang isa naghimo sing 16,000 ka tisa paagi sa iya kaugalingon nga mga kamot kag nagpatindog sang una nga Kingdom Hall sa iya teritoryo. Ang isa ka eksperiensia amo ang tuhoy sa isa ka utod nga babayi nga nag-upod sa iya bana sa kagulangan, nga sa diin ang kahimtangan sang pagkabuhi tuman ka sinadto. Gin-apresyar sia sang tanan nga lokal nga kauturan nga babayi bangod nahibaluan nila nga ginaula niya ang iya kaugalingon subong isa ka ‘buhi nga halad.’ Apang nian ginpahanumdom sang humalambal ang mga estudyante nga ang halad wala sing pulos kon wala ini ginaupdan sang pagkamatinumanon. Ginagamit ang kasaysayan tuhoy kay Hari Saul kag sa mga Amalekinhon, sia naglaygay: “Dumduma pirme nga ang pagtuman maayo pa sa halad. Indi gid mag-ayo kay Jehova. Himua pirme ang ginapahimo niya sa imo.”

Nian ginpakilala sang tsirman ang isa pa ka instruktor sa eskwelahan, si Ulys­ses ­Glass. Si Utod Glass nagsugod paagi sa pagsiling: “Ang ika-88 nga klase isa anay kag isa gihapon ka malipayon nga klase. Ang iban nga mga klase malipayon man. Apang, ngaa, talalupangdon gid ang inyo kalipay?” Ginpakita niya nga ang kalipay “indi isa ka tulumuron kundi resulta sang matarong nga mga buhat. Ang paagi sa paglambot didto amo ang nagadala sang padya.” Ginbalikwat niya ang isa ka awtor nga nagbag-o ang iya kabuhi sang makita niya ang prase nga: “Ang kadalag-an isa ka paglakbay, indi isa ka destinasyon.” Nanumpa ang awtor nga indi na niya pagtakson ang kalipay pasad sa pag-abot sa mga destinasyon sa baylo nga tamdon ang iya bug-os nga kabuhi subong isa ka dalayon nga paglakbay. “Wala sing dalan padulong sa kalipay,” siling niya. “Ang kalipay amo ang dalan.” Nian nagkomento si Utod ­Glass nga nakuha sini nga klase ang kahulugan sini nga mga pulong. Naghinakop sia paagi sa mga pulong gikan sa ika-84 sang Salmo kag nagsiling: “Magpadayon sa paglakat sa tubigon nga mga duog. Ano man nga mga problema ang masumalang ninyo, kabay nga ang kalipay nga iya sang mga nagahigugma kag nagakahadlok kay Jehova padayon nga mangin inyo.”

Nian nag-abot ang nagapanguna nga diskurso sang aga, nga ginhatag sang isa pa ka katapo sang Nagadumala nga Hubon, si Karl ­Klein, nga nagpili sang tema nga “Pagpalambo sang Cristiano nga Komunikasyon.” Nagsugod sia paagi sa pagpahanumdom sa tanan nga si Jehova amo ang labing daku sa tanan nga komunikador. Ang iya bugtong nga Anak, ang Logos, gingamit subong Puno nga Humalambal ni Jehova, kag ginkomunikar niya ang kabubut-on kag mga instruksion sang Dios sa mga tinuga sa duta. Sang yari pa si Jesus sa duta, ang kadam-an natingala sa iya pagpanudlo. Wala pa gid sila makabati sing tawo nga nagahambal kaangay niya. Sa Mateo 28:​19, 20, ginpalig-on ni Jesus ang iya mga disipulo nga mangin maayong mga komunikador paagi sa pagkadto sa kalibutan, kag tudluan ang iban sang iya mga sugo kag himuon man sila nga mga disipulo.

Nian, nagahambal sing direkta sa palaabuton nga mga misyonero, nagsiling si Utod ­Klein nga apat ka paagi ang dapat kabalak-an sang mga misyonero sa pagpalambo sang maayong mga kalantip sa pagkomunikar: sa ulot sang bana kag asawa, sa iban sa puluy-an sang mga misyonero, sa mga utod sa sanga talatapan nga sa diin naasayn sila, kag sa mga tawo nga makilala nila sa pag-alagad sa latagon. “Nagasugod ka sa pagkomunikar sa wala mo pa matikab ang imo baba,” siling ni Utod Klein. “Ang imo panagway kag pagpamustura nagakomunikar sing mga impresyon sa tagbalay.” Nian naghatag sia sing pila ka ilustrasyon agod pamatud-an ang iya punto kag naghinakop paagi sa sining laygay: “Mangin mapainubuson sa hunahuna. Hupti nga bukas ang linya sang komunikasyon. Tinguhai nga mangin maayo pa nga mga komunikador.”

Sa tapos mabasa ang mga panamyaw, ang mga diploma sang pagkatakus ginpanghatag sang tsirman sa tagsatagsa sang mga gradwado. Nian ginpresentar sang klase ang isa ka resolusyon para sa Nagadumala nga Hubon kag sa pamilya Bethel, nga ginbasa ni Paul Angerville sang Guadeloupe.

Ang sesyon sang Hapon nagsugod paagi sa Pagtinuon sa Lalantawan. Sa tapos sini, ang mga estudyante nagpakita sing programa nga naghatag sa tumalambong sing kahigayunan nga makita kon ano ang atmospera sang ila hulot-klasehan, sang ila di-pormal nga pagsinalusalo sa ila mga kuwarto, kag mabatian ang madamo sang ila mga naeksperiensiahan sa pag-alagad sa latagon sugod sang mag-abot sila sa Gilead sang nagligad nga lima ka bulan. Bilang katapusan, amo ang isa ka matahom nga drama nga may tema Paghimo sang Matarong sa Panulok ni Jehova nga gindrama sang mga manugbantala gikan sa Kongregasyon sang Lynd­hurst, New Jersey. Natapos ang adlaw paagi sa nagahinakop nga ambahanon, nga ginsundan sang pangamuyo ni Fred ­Franz, ang 96 anyos nga presidente sang Sosiedad.

[Kahon sa pahin 27]

ESTADISTIKA SANG KLASE:

Kadamuon sang pungsod nga gintiglawas: 6

Kadamuon sang pungsod nga ginpadalhan: 13

Kadamuon sang mga soltero: 2

Kadamuon sang mga mag-asawa: 11

Kadamuon sang mga estudyante: 24

Promedyo nga edad: 32.7

Promedyo nga tinuig sa kamatuoran: 14

Promedyo nga tinuig sa bug-os-tion nga ministeryo: 9

[Piktyur sa pahina 26]

Ika-88 nga Manuggradwar nga Klase sang Watchtower Bible School of Gilead

Sa listahan sa ubos, ang mga raya nanumerohan gikan sa una padulong sa likod kag ang mga ngalan nalista gikan sa wala pa tuo sa tagsa ka raya. (1) Magney, D.; Rogers, L.; Foster, S.; Foley, R.; Untch, L.; Jonasson, G. (2) Buri, H.; Buri, B.; Krammer, M.; Hudson, D.; Underkoffler, J. (3) Angerville, P.; Olsson, M.; Jones, A.; Untch, R.; Krammer, A.; Hudson, C. (4) Foley, L.; Magney, J.; Jones, A.; Jonasson, H.; Foster, M.; Rogers, M.; Underkoffler, R.