Makahulugan nga mga Miting Antes Magguwa sa Latagon
1 Ginarekord sa Lucas 10:1-11 ang pagsapol ni Jesus sa 70 ka disipulo sa paghanda sa ila sa pag-alagad sa latagon. Naghatag sia sing instruksion agod organisahon sila, ihanda ang inugsiling nila, kag atubangon ang mabudlay nga mga kahimtangan. Makatuon kita paagi sa pag-usisa sini nga kasaysayan.
2 Maathag nga ang tanan nga 70 ka disipulo nakigsapol kay Jesus. Daku nga tion ang mauyang sa mga miting sa pag-alagad kon ang pila kinabatasan na nga nagaabot sing ulihi. Bangod sang ila ulihi nga pag-abot, kinahanglan nga organisahon liwat ang mga grupo kag mga asaynment sa teritoryo. Nagapalantang ini sa bug-os nga grupo.
3 Ginhatagan ni Jesus ang grupo sing isa ka espesipiko nga topiko nga gamiton, nga amo, “ang ginharian sang Dios.” (Luc. 10:9) Ginapabantala sa aton ang amo man nga mensahe, kag masami naton ginaapresyar ang mga panugda sa kon ano ang isiling. Mahimo gamiton sang konduktor ang Reasoning nga libro, nga may kapin sa 40 ka introduksion nga magamit. Ang pagrepaso sa isa ukon duha sini magabulig sa aton sa paghambal nga may labi nga kompiansa sa mga ganhaan.
4 Indi lamang kon ano ang isiling ang ginsugid ni Jesus sa iya mga disipulo kundi kon paano man ini isiling. (Luc. 10:5, 6) Ang mga pasundayag ginahatag sa Miting sa Serbisyo kada semana nga nagapakita kon paano naton mapabutyag sing epektibo ang aton kaugalingon. Mahimo repasuhon sang konduktor ang ginpresentar sang nagligad nga miting. Ang malip-ot nga pasundayag sang isa ka simple nga presentasyon magabulig sa aton nga mahanda ang aton mga hunahuna kag mapabutyag ini sa mga tinaga.
5 Ginhatagan man ni Jesus sing instruksion ang iya mga disipulo nahanungod sa ila personal nga paggawi. (Luc. 10:7, 8) Ang konduktor mahimo man nga maghatag sa aton sing direkta nga mga panuytoy sa pagbulig sa aton nga likawan ang bisan ano nga mahimo makatublag sa aton hilikuton. Mahimo niya kita paandaman nahanungod sa pagtipon sa mga higad sang dalan ukon sa pag-uyang sing tion sa pagpakigbais sa mga nagapamatok. Mahimo niya kita pahanumdumon sang kinahanglanon nga maghupot sing husto nga house-to-house record. Ang mga ginikanan mahimo pahanumdumon nga bantayan sing maayo ang ila kabataan.
6 Ang 70 ka disipulo nakigkooperar sa mga instruksion ni Jesus kag pagkatapos “nagbalik nga may kalipay.” (Luc. 10:17) Kon maghulag kita sa panuytoy nga ginabaton naton sa mga miting sa pag-alagad, mapaabot man naton ang dugang nga kalipay sa pagbantala sang mensahe sang Ginharian.—Binu. 13:48, 49, 52.