Pamangkot

◼ Karon nga may libro na kita nga Ang Ihibalo nga Nagadul-ong sa Kabuhi nga Walay Katapusan, daw ano kalawig dapat dumalahan ang isa ka pagtuon sa Biblia sa puluy-an?

Ang Aton Ministeryo sang Ginharian sang Septiembre 1993 nagrekomendar nga ang pagtuon sa Biblia sa puluy-an dapat padayunon upod sa bag-ong mga interesado tubtob matun-an ang duha ka libro nga Mahimu Ka Mabuhi sing Dayon sa Paraiso sa Duta kag Nahiusa sa Pagsimba sa Lamang Matuod nga Dios. Karon nga may Ihibalo nga libro na kita, nagakaigo nga maghimo sing pagbag-o sa sining paagi, subong sang ginbalay sa pahina 13 kag 14 sang Enero 15, 1996, nga guwa sang Ang Lalantawan.

Ang Ihibalo nga libro gindesinyo agod buligan nga matun-an sang mga “nahuyog sing matarong para sa kabuhi nga walay katapusan” ang dapat nila mahibaluan agod magdedikar sila kay Jehova kag mabawtismuhan. (Binu. 13:48) Busa, kon matapos na ining bag-ong publikasyon, indi kinahanglan nga tun-an pa ang ikaduha nga libro upod sa amo gihapon nga estudyante. Samtang nagauswag ang imo mga estudyante sa Biblia, mapalig-on mo sila nga dugangan ang ila ihibalo paagi sa pagtambong sa mga miting subong man sa pagbasa sang Biblia kag sang nanuhaytuhay nga Cristianong mga publikasyon.

Kon pamilyar ikaw sa mga pamangkot sa pahina 175 tubtob 218 sang libro nga Organisado sa Pagtuman sang Aton Ministeryo, mahimo ini mangin mabuligon. Walay sapayan nga indi mo dapat patuhuyan ining mga pamangkot ukon repasuhon ini upod sa estudyante sang Biblia, ayhan maayo nga padakuon mo ang mga punto sa Ihibalo nga libro nga magabulig sa estudyante nga mapabutyag ang nagakaigo nga paghangop sa sadsaran nga mga kamatuoran sang Biblia kon ginarepaso sang mga gulang ang mga pamangkot upod sa mga kandidato sa bawtismo.

Indi kinahanglan nga dugangan pa ang impormasyon sang Ihibalo nga libro, nagalakip sang dugang pa nga mga argumento agod pamatud-an nga sayop ang butig nga mga doktrina. Magapalawig lamang ini sang pagtuon. Sa baylo, ginalauman nga ang libro sarang matuptupan sing mas madasig, ayhan sa sulod sang mga anom ka bulan. Ginapadaku sini ang kinahanglanon nga tun-an naton ini sing abanse agod mapresentar naton ini sing maathag kag sing malip-ot. Ang estudyante dapat man palig-unon nga magtuon sing abanse, ginapangita ang ginhinambitan nga mga kasulatan, kag ginatinguhaan nga mahantop kon ano ang ginatudlo sa tagsa ka kapitulo.

Ginpadaku sang Lalantawan ang kinahanglanon nga magdumala kita sing mas epektibo nga mga pagtuon sa Biblia sa mas malip-ot nga tion.​—Isa. 60:22.