Pamangkot

◼ Daw ano kadugay dapat dumalahan ang isa ka pormal nga pagtuon sa Biblia upod sa isa ka indibiduwal sa Ihibalo nga libro?

Ginapakamaayo ni Jehova ang iya organisasyon karon. Makita naton ang ebidensia sini kada tuig samtang linibo ka bag-uhan ang nagatindog dampig sa kamatuoran. Ang Ihibalo nga libro isa gid ka epektibo nga kagamitan agod mahimo ini. Ginpakita sang Enero 15, 1996, nga guwa sang Ang Lalantawan nga ining libro gindesinyo agod buligan ang isa ka estudyante sang Biblia sa pag-uswag sa espirituwal sing madasig, ayhan tubtob sa punto sang bawtismo sa sulod sang pila lamang ka bulan.

Bangod sini, ini man nga Lalantawan, sa pahina 17, naglaygay: “Kon natapos na sang isa ka indibiduwal ang iya pagtuon sa Biblia sa Ihibalo nga libro kag nabawtismuhan na, ayhan indi na kinahanglan ang isa ka pormal nga pagtuon upod sa iya sa ikaduha nga libro.”

Kamusta ang isa ka tawo nga wala mabawtismuhan sang natapos ang Ihibalo nga libro? Ang Hunyo 1996 nga Ang Aton Ministeryo sang Ginharian, pahina 6, parapo 23, nagapahanumdom sa aton kon ano ang ginsiling sang Ang Lalantawan nahanungod sa indi pagtuon sing dugang pa nga mga libro sa estudyante kon matapos na ang Ihibalo nga libro. Nagakahulugan bala ini nga indi na kita interesado sa pagbulig sa estudyante sang Biblia pagkatapos sini? Indi. Luyag naton makabaton ang mga tawo sing sadsaran nga ihibalo sang kamatuoran. Apang, ginapaabot nga sa sulod sang halos malip-ot nga tion, mabuligan sang isa ka epektibo nga manunudlo ang hanuot nga estudyante sa pagtigayon sing bastante nga ihibalo agod makadesisyon sa pag-alagad kay Jehova. Ayhan ang pila ka estudyante sang Biblia maluyag pa gani magtuon sing kapin sa makaisa sa isa ka semana.

Matuod nga ang iban nga mga estudyante mas mahinay ang pag-uswag sangsa iban. Apang kon sa tapos matun-an ang Ihibalo nga libro, nga ayhan gintun-an sing mas madugay sangsa kinaandan, wala pa sia nakapamat-od nga luyag niya makig-upod sa kongregasyon, maayo nga hambalan ini sang manugbantala sa isa sang mga gulang sa Komite sa Pag-alagad sang Kongregasyon. Kon nadalahig ang dikinaandan nga mga sirkunstansia, ang pila ka dugang pa nga bulig mahimo nga kinahanglanon. Nahisuno ini sa prinsipio nga ginhinambitan sa parapo 11 kag 12 sa pahina 17 sang Enero 15, 1996, Lalantawan.

Ang pagpabili bisan sa sadsaran nga ihibalo sang kamatuoran dapat magapahulag sa estudyante sa pagtambong sa Cristianong mga miting. Magadul-ong ini sa paghatag sang estudyante sing maathag nga ebidensia sang iya handum nga alagaron si Jehova. Kon ining espirituwal nga pagpabili indi makita sa tapos matun-an ang Ihibalo nga libro sa mas malawig nga tion, ayhan maayo nga untaton ang pagtuon.