Kon Paano Maghimo sing mga Disipulo Paagi sa Ihibalo nga Libro

¹ Ang isa ka halandumon nga tulumuron para sa tanan nga mga Cristiano amo ang pagtudlo sang kamatuoran sa iban kag ang paghimo sing mga disipulo sa sadtong “nahuyog sing matarong para sa kabuhi nga walay katapusan.” (Binu. 13:48; Mat. 28:19, 20) Gintan-ay sang organisasyon ni Jehova sa aton mga kamot ang isa ka matahom nga kasangkapan agod mahimo ini—ang libro nga Ang Ihibalo nga Nagadul-ong sa Kabuhi nga Walay Katapusan. Ginapadaku sang titulo sini ang importansia sang mga pagtuon sang Biblia sa puluy-an, kay ang kabuhi nga walay katapusan nasandig sa pagkuha sing ihibalo kay Jehova kag sa iya Anak, si Jesucristo.—Juan 17:3.

² Ang Ihibalo nga libro amo na karon ang pangunang publikasyon sang Sosiedad para gamiton sa pagdumala sing mga pagtuon sang Biblia sa puluy-an. Nagagamit sini, matudlo naton ang kamatuoran sing simple, maathag, kag malip-ot. Magabulig ini sa paglab-ot sang tagipusuon sadtong ginatudluan. (Luc. 24:32) Sa pagkamatuod, dapat gamiton sang nagadumala sing pagtuon ang maayong mga paagi sa pagtudlo. Ining suplemento ginhanda para sa sining katuyuan. Nagahatag ini sing mga panugda, kag nagabalay ini sang mga paagi sa pagtudlo nga napamatud-an nga epektibo sa sulod sang mga tinuig. Upod ang paghantop, kag nahisuno sa indibiduwal nga mga sirkunstansia, mahimo nimo magamit sing progresibo ang pila ukon ang tanan nga ginapresentar diri. Tagua ining suplemento, kag tan-awa ini pirme. Magabulig ini sa imo nga mangin labi pa ka epektibo sa paghimo sing mga disipulo, nga nagagamit sang Ihibalo nga libro.

³ Magdumala sing Progresibo nga Pagtuon sang Biblia sa Puluy-an: Magpakita sing tunay personal nga interes sa estudyante subong posible nga mangin Cristianong disipulo kag espirituwal nga utod nga lalaki ukon babayi. Mangin mainit, mainabyanon, kag mapagsik. Paagi sa pagpamati sing maayo, makilala mo sia—ang iya ginhalinan kag kahimtangan sa kabuhi—nga magabulig sa imo sa paghantop kon paano mo sia mabuligan sing labing maayo sa espirituwal. Mangin handa nga gamiton ang imo kaugalingon tungod sa estudyante.—1 Tes. 2:8.

⁴ Sa tion nga matukod na ang isa ka pagtuon, ginapakamaayo nga ang mga kapitulo sa Ihibalo nga libro pagatun-an sing pasunod suno sa numero. Magatugot ini sa estudyante sa pagtigayon sing progresibo nga paghangop sa kamatuoran, kay ginahinun-anunan sang libro ang mga tema sang Biblia sing pasunod. Hupti ang pagtuon nga simple kag makawiwili agod mapagsik ini kag nagauswag. (Roma 12:11) Depende sa sirkunstansia kag ikasarang sang estudyante, ayhan posible para sa imo nga tuptupan ang kalabanan nga mga kapitulo sa isa ka sesyon sa isa ka oras ukon kapin, nga wala ginadali ang pagtuon. Ang mga estudyante magauswag sing maayo pa kon ginasunod sang manunudlo kag sang estudyante ang iskedyul sang pagtuon kada semana. Sa amo, sa kalabanan nga mga tawo, posible matapos ang 19 ka kapitulo sang libro sa sulod lamang sang mga anom ka bulan ukon kapin.

⁵ Sugdi ang tagsa ka sesyon paagi sa malip-ot nga mga komento nga magapukaw sang interes sa materyal. Makita mo nga ang titulo sang tagsa ka kapitulo amo ang tema sini, nga kinahanglan ipadaku. Ginapain sang tagsa ka subtitulo ang isa ka pangunang punto, nagabulig sa imo nga huptan sa hunahuna ang tema sang kapitulo. Maghalong nga indi ikaw ang pirme lamang nga nagahambal. Sa baylo, tinguhai nga pahambalon ang estudyante. Ang pagpamangkot sing nagatuytoy nga mga pakiana sa estudyante, pasad sa kon ano na ang nahibaluan niya, magabulig sa iya sa pagpangatarungan kag sa pagdangat sa husto nga mga konklusion. (Mat. 17:24-26; Luc. 10:25-37; tan-awa ang School Guidebook, pahina 51, parapo 10.) Sunda sing suod ang gin-imprinta nga impormasyon sa Ihibalo nga libro. Ang paghatag sing dugang pa nga mga detalye mahimo nga magapahilayo ukon magatabon sa pangunang mga punto kag magapalawig sang pagtuon. (Juan 16:12) Kon mag-utwas ang pamangkot nga wala sing labot sa tema nga ginatun-an, sa kalabanan nga hitabo masabat mo ini pagkatapos sang pagtuon. Magatugot ini sa imo nga matuptupan ang leksion sa sina nga semana nga wala sing tublag. Ipaathag sa estudyante nga ang kalabanan niya nga personal nga mga pamangkot pagasabton sa ulihi nga mga pagtuon.—Tan-awa ang School Guidebook, pahina 94, parapo 14.

⁶ Kon ang estudyante malig-on nga nagapati sa Trinidad, pagkadimamalatyon sang kalag, kalayuhon nga impierno, ukon iban pa sining butig nga mga doktrina, kag indi sia kontento sa ginapresentar sa Ihibalo nga libro, mahimo nimo sia hatagan sing Reasoning nga libro ukon sing isa pa ka publikasyon nga nagahinun-anon sa tema. Silingi sia nga hambalan ninyo ini sa tapos niya matulutimbang kon ano ang iya mabasa.

⁷ Ang pagsugod kag pagtapos sang pagtuon paagi sa pagpangamuyo sing panuytoy kag pagpakamaayo ni Jehova nagahimo sang okasyon nga dungganon, nagapahamtang sa isa sa matinahuron nga panghunahuna, kag nagatawag sang igtalupangod kay Jehova subong ang matuod nga Manunudlo. (Juan 6:45) Kon ang estudyante nagapanigarilyo gihapon, ayhan dapat mo sia pangabayon sa ulihi nga indi manigarilyo sa tion sang pagtuon.—Binu. 24:16; Sant. 4:3.

⁸ Magtudlo sing Epektibo Paagi sa mga Kasulatan, mga Ilustrasyon, kag mga Pamangkot sa Repaso: Walay sapayan kon pila ka beses na niya natun-an ang materyal, ang isa ka lantip nga manunudlo magarepaso sang tagsa ka leksion nga ang ginahunahuna amo ang estudyante. Nagabulig ini sa pagpaabot sa pila sa mga pamangkot sang estudyante. Agod makatudlo sing epektibo, hangpa sing maathag ang pangunang mga punto sa kapitulo. Pangitaa ang mga kasulatan agod makita kon paano ini naaplikar sa materyal, kag pamat-uri kon diin ang dapat basahon sa tion sang pagtuon. Hunahunaa kon paano ka makatudlo nga nagagamit sang mga ilustrasyon kag mga pamangkot sa repaso pagkatapos sang kapitulo.

⁹ Paagi sa epektibo nga paggamit sa kasulatan, mabuligan mo ang estudyante sa paghangop nga Biblia gid ang ginatun-an niya. (Binu. 17:11) Nagagamit sang kahon “Mangin Hanas sa Imo Biblia,” sa pahina 14 sang Ihibalo nga libro, tudlui sia kon paano pangitaon ang mga kasulatan. Ipakita sa iya kon paano makilala ang ginbalikwat nga mga bersikulo sa leksion. Kon ginatugot sang tion, pangitaa kag basaha ang ginhinambitan nga mga kasulatan nga wala ginbalikwat. Pakumentuha ang estudyante kon paano ini nagasakdag ukon nagapaathag sang ginasiling sa parapo. Ipadaku ang yabi nga mga bahin sang teksto agod mahangpan niya ang mga rason sang pangunang mga punto sang leksion. (Neh. 8:8) Sa kabilugan, indi na kinahanglan nga magadugang pa ang manunudlo sing mga teksto nga wala sa libro. Magkomento tuhoy sa kapuslanan sang paghibalo sa mga ngalan kag pagpasunod sang mga tulun-an sa Biblia. Ayhan mabuligon para sa estudyante nga basahon ang pahina 27-30 sang Hunyo 15, 1991, Lalantawan. Kon nagakaigo, palig-una ang paggamit sa New World Translation. Mahimo mo mapasundayag sing progresibo kon paano gamiton ang nanuhaytuhay nga mga bahin sini, subong sang mga reperensia sa marhin kag indese sang mga tinaga sa Biblia.

¹⁰ Ang Study 34 sa Theocratic Ministry School Guidebook nagapaathag nga ang mga ilustrasyon nagapukaw sang proseso sa paghunahuna sang isa kag nagapahapos sang paghangop sa bag-ong mga panghunahuna. Gintingob sini ang makagalanyat sa hunahuna sa may epekto sa balatyagon, agod ang mensahe mapaalinton nga may puwersa nga indi sa masami posible paagi sa simple nga mga paghinambit sa katunayan. (Mat. 13:34) Ang Ihibalo nga libro may madamong simple, apang epektibo, nga mga ilustrasyon. Halimbawa, ang ilustrasyon nga gingamit sa kapitulo 17 nagapabakod sang apresasyon sa kon paano si Jehova sa espirituwal nga kahulugan nagaaman sing pagkaon, panapton, kag puluy-an paagi sa Cristianong kongregasyon. Ang matahom nga mga larawan sang Ihibalo nga libro sarang magamit sing epektibo sa pagpukaw sa mga balatyagon. Sa ubos sang subtitulo nga “Ang Makalilipay nga Pagkabanhaw” sa pahina 185, ang epekto sang parapo 18 mapabakod paagi sa pagpatan-aw liwat sa estudyante sang larawan sa pahina 86. Mahimo ini magpahulag sa iya nga hunahunaon ang pagkabanhaw subong isa ka katunayan sa idalom sang Ginharian sang Dios.

¹¹ Ang mga estudyante sang Biblia dapat maghimo sing espirituwal nga pag-uswag sa tagsa ka leksion. Bangod sini, indi pagkalimti nga ipakiana ang mga pamangkot sa repaso sa “Tilawi ang Imo Ihibalo” nga kahon nga makita sa katapusan sang tagsa ka kapitulo. Pamatii indi lamang ang husto nga sabat sa kon ano ang natun-an. Ang pila sining mga pamangkot gindesinyo agod mahibaluan ang personal nga sabat gikan sa tagipusuon. Halimbawa, tan-awa ang pahina 31, diin ang estudyante ginapamangkot: “Anong mga kinaiya ni Jehova nga Dios ang nagaganyat gid sa imo?”—2 Cor. 13:5.

¹² Hanasa ang mga Estudyante sa Paghanda Para sa Pagtuon: Ang estudyante nga nagabasa sing abanse sang leksion, nagatanda sang mga sabat, kag nagahunahuna kon paano ini mapabutyag sa iya kaugalingon nga mga tinaga magahimo sing mas madasig nga pag-uswag sa espirituwal. Paagi sa imo halimbawa kag pagpalig-on, mahanas mo sia sa paghanda para sa pagtuon. Ipakita sa iya ang imo libro, diin ginmarkahan mo sing highlighter ukon ginkuritan mo ang yabi nga mga tinaga kag mga prase. Ipaathag kon paano makita ang direkta nga mga sabat sa gin-imprinta nga mga pamangkot. Ang paghanda sing dungan sa isa ka kapitulo mahimo nga makabulig sa estudyante. Palig-una sia nga ipabutyag ang iya kaugalingon sa iya kaugalingon nga mga tinaga. Sa sini lamang nga paagi nga mangin maathag kon bala nahangpan niya ang materyal. Kon ginabasa niya ang iya sabat gikan sa libro, sarang mo mapukaw ang iya panghunahuna, paagi sa pagpangabay sa iya kon paano niya ipaathag sa iban ang punto sa iya kaugalingon nga mga tinaga.

¹³ Palig-una ang estudyante nga pangitaon ang wala mabalikwat nga mga kasulatan subong bahin sang iya semanal nga paghanda, kay mahimo nga wala sing tion nga mabasa ini tanan sa tion sang pagtuon. Hatagi sia sing komendasyon tungod sa panikasog nga ginahimo niya sa iya mga leksion. (2 Ped. 1:5; tan-awa ang Agosto 15, 1993, Lalantawan, pahina 13-14, para sa dugang nga mga panugda sa kon ano ang himuon sang manunudlo kag estudyante agod madugangan ang ihibalo sa isa ka pagtuon sa Biblia.) Sa sining paagi, ang estudyante ginahanas sa paghanda kag sa pagkomento sa mga miting sa kongregasyon. Nagatuon sia kon paano mapalambo ang maayong mga batasan sa personal nga pagtuon nga magasangkap sa iya sa pagpadayon sa pag-uswag sa kamatuoran sa tapos niya matapos ang iya personal nga pagtuon sa Ihibalo nga libro.—1 Tim. 4:15; 1 Ped. 2:2.

¹⁴ Tuytuyi ang mga Estudyante sa Organisasyon ni Jehova: Katungdanan sang isa ka manughimo sing disipulo nga tuytuyan ang interes sang estudyante sa organisasyon ni Jehova. Ang estudyante mas madasig nga magauswag sa espirituwal nga pagkahamtong kon makilala niya ang organisasyon kag mahantop ang kinahanglanon nga mangin bahin sini. Luyag naton nga makasapo sia sing kalipay sa pagpakig-upod sa katawhan sang Dios kag sa pagkalangkag nga makaupod kita sa Kingdom Hall, diin makabaton sia sing espirituwal kag emosyonal nga pagsakdag nga ginahatag sang Cristianong kongregasyon.—1 Tim. 3:15.

¹⁵ Ang brosyur nga Mga Saksi ni Jehova—Nahiusa nga Nagahimo sang Kabubut-on sang Dios sa Bug-os nga Kalibutan ginbalhag agod mangin pamilyar ang mga indibiduwal sa lamang dikitaon nga organisasyon nga ginagamit karon ni Jehova sa paghimo sang iya kabubut-on. Sa tion nga matukod ang pagtuon, ngaa indi hatagan sing isa ka kopya ang estudyante? Kutob gid sa umpisa, agdaha pirme ang estudyante sa mga miting. Ipaathag sa iya kon paano ini ginahimo. Masugid mo sa iya ang titulo sang masunod nga pamulongpulong publiko ukon mapakita sa iya ang artikulo nga pagahinun-anunan sa Pagtinuon sa Lalantawan. Ayhan mahimo nimo ipakita ang Kingdom Hall samtang wala sing miting agod mapakanay ang bisan ano nga kabalaka niya tuhoy sa pagkadto sa isa ka bag-ong lugar sa nahauna nga tion. Ayhan matan-ayan mo sia sing transportasyon pakadto sa miting. Kon magtambong sia, pabatyaga sia nga ginaabiabi kag komportable. (Mat. 7:12) Ipakilala sia sa iban nga mga Saksi, lakip sa mga gulang. Ginalauman gid nga mangin amo ini ang panugod agod tamdon niya ang kongregasyon subong iya espirituwal nga pamilya. (Mat. 12:49, 50; Mar. 10:29, 30) Mahimo ka magtalana sing tulumuron para sa iya, subong sang pagtambong sa isa ka miting kada semana, kag mainuswagon nga dugangi ang tulumuron.—Heb. 10:24, 25.

¹⁶ Samtang nagapadayon ang pagtuon sang Biblia sa puluy-an paagi sa Ihibalo nga libro, ipadaku ang mga bahin nga nagapatalupangod sang kinahanglanon nga makig-upod sing tayuyon sa kongregasyon sa mga miting. Talupangda labi na ang mga pahina 52, 115, 137-9, 159, subong man ang kapitulo 17. Ipabutyag ang imo kaugalingon tudok nga mga balatyagon sang apresasyon sa organisasyon ni Jehova. (Mat. 24:45-47) Magpamulong sing positibo tuhoy sa lokal nga kongregasyon kag tuhoy sa kon ano ang natun-an mo sa mga miting. (Sal. 84:10; 133:1-3) Mas maayo kon makatan-aw ang estudyante sang mga video sang Sosiedad, sugod sa Jehovah’s Witnesses—The Organization Behind the Name. Para sa dugang nga mga ideya kon paano tuytuyan ang interes sa organisasyon, tan-awa ang Abril 1, 1985, Lalantawan, pahina 14-18, kag ang Abril 1993 nga suplemento sang Ang Aton Ministeryo sang Ginharian.

¹⁷ Palig-una ang mga Estudyante sa Pagpanaksi sa Iban: Ang aton tulumuron sa pagtuon upod sa mga tawo amo ang paghimo sing mga disipulo nga magasaksi para kay Jehova. (Isa. 43:10-12) Nagakahulugan ina nga dapat palig-unon sang manunudlo ang estudyante nga isugid sa iban kon ano ang ginatun-an niya gikan sa Biblia. Sarang ini mahimo paagi lamang sa simple nga pamangkot: “Paano mo mapaathag ining kamatuoran sa imo pamilya?” ukon “Anong kasulatan ang gamiton mo agod pamatud-an ini sa isa ka abyan?” Ipadaku ang pangunang mga bahin sa Ihibalo nga libro diin ginapalig-on ang pagpanaksi, subong sang mga pahina 22, 93-5, 105-6, subong man ang kapitulo 18. Ang estudyante mahimo hatagan sing pila ka tract nga magamit sa dipormal nga pagpanaksi sa iban. Magpanugda nga agdahon niya ang mga katapo sang iya pamilya sa pagbuylog sa iya pagtuon. May mga abyan bala sia nga luyag man magtuon? Pangabaya sia nga ipakilala niya ikaw sa mga interesado.

¹⁸ Paagi sa pagtambong sa Teokratikong Eskwelahan sa Pagministro kag Miting sa Serbisyo, ang isa nga posible mangin disipulo mahimo makabaton sing dugang nga paghanas kag pangpapagsik nga magabulig sa iya nga mangin isa ka manugbantala sang maayong balita. Kon magpabutyag sia sing interes sa pagpalista sa eskwelahan ukon mangin dibawtismado nga manugbantala, ang mga prinsipio nga ginahatag sa pahina 98 kag 99 sang Aton Ministeryo nga libro naaplikar. Kon ang isa ka bahin sang iya kabuhi nagapugong sa iya agod makalipikar, makapanalawsaw ka sa mga publikasyon sang Sosiedad para sa mabuligon nga materyal nga may kaangtanan sini kag mapaambit ini sa iya. Halimbawa, ang estudyante mahimo nabudlayan sa paglandas sa pagkagiyan sa tabako ukon sa iban pa nga mga droga. Ang Reasoning nga libro nagahatag sing makusog Makasulatanhon nga mga rason kon ngaa likawan sang mga Cristiano ining makahalalit nga mga batasan, kag sa pahina 112 ginabalay sini ang paagi nga nakabulig sing madinalag-on sa iban sa pag-untat. Ipangamuyo ini upod sa iya, nagatudlo sa iya sa pagpabakod sang iya pagsalig nga buligan sia ni Jehova.—Sant. 4:8.

¹⁹ Ang paagi nga dapat sundon sa paghibalo kon bala ang isa kalipikado sa pagpakigbahin sa publiko nga ministeryo ginabalay sa Enero 15, 1996, Lalantawan, pahina 16, parapo 6. Kon ang estudyante kalipikado, mangin mabuligon ang paghimo sing sesyon sa pag-ensayo sa paghanda sa iya para sa iya nahaunang adlaw sa pag-alagad sa latagon. Sa positibo nga paagi, hinun-anuni ang mga reaksion kag mga pamatok sang mga tawo nga kinaandan sa inyo teritoryo. Kon posible magsugod sia anay sa pamalaybalay nga hilikuton, kag amat-amat sia nga hanason sa iban nga mga bahin sang ministeryo. Kon ginahuptan mo ang imo presentasyon nga malip-ot kag simple, mas mahapos niya ini mailog. Mangin makapabakod kag makapalig-on, nagapakita sing kalipay sa hilikuton, agod mabatyagan niya ang imo espiritu kag mapabanaag ini. (Binu. 18:25) Ang tulumuron sang isa ka bag-ong disipulo dapat amo ang mangin isa ka regular, makugi nga manugbantala sang maayong balita. Ayhan mabuligan mo sia sa paghimo sing praktikal nga iskedyul para sa pag-alagad. Agod mag-uswag sia sa iya ikasarang sa pagpanaksi sa iban, mahimo nimo mapanugda nga basahon niya ang mga guwa sang Lalantawan sang Pebrero 15, 1985, pahina 15-25; Hulyo 15, 1988, pahina 9-20; Enero 15, 1991, pahina 15-20; kag Enero 1, 1994, pahina 20-5.

²⁰ Pahulaga ang mga Estudyante Padulong sa Dedikasyon kag Bawtismo: Posible para sa bunayag sing tagipusuon nga estudyante nga makatuon sing tuman paagi sa pagtuon sa Ihibalo nga libro agod makahimo sing dedikasyon sa Dios kag makalipikar para sa bawtismo. (Ipaanggid ang Binuhatan 8:27-39; 16:25-34.) Apang, antes pahulagon ang isa sa paghimo sing dedikasyon, kinahanglan niya mapalambo ang debosyon kay Jehova. (Sal. 73:25-28) Sa bug-os nga kurso sang pagtuon, mangita sing mga kahigayunan nga mapabakod ang apresasyon para sa mga kinaiya ni Jehova. Ipabutyag ang imo kaugalingon tudok nga mga balatyagon para sa Dios. Buligi ang estudyante sa paghunahuna may kaangtanan sa pagpalambo sing mainit, personal nga kaangtanan kay Jehova. Kon nakilala kag ginahigugma gid niya ang Dios, nian alagaron Niya sia sing matutom, kay ang diosnon nga debosyon may labot sa kon ano ang aton balatyagon kay Jehova subong isa ka persona.—1 Tim. 4:7, 8; tan-awa ang School Guidebook, pahina 76, parapo 11.

²¹ Panikasugi nga malab-ot ang tagipusuon sang estudyante. (Sal. 119:11; Binu. 16:14; Roma 10:10) Dapat niya mahangpan kon paano ang kamatuoran personal nga nagaapektar sa iya kag pamat-uran kon ano ang dapat niya himuon sa iya natun-an. (Roma 12:2) Nagapati gid bala sia sa kamatuoran nga ginapresentar sa iya kada semana? (1 Tes. 2:13) Sa sina nga katuyuan, sarang mo mapahambal ang estudyante paagi sa pagpamangkot sing mahinantupon nga punto-de-vista nga mga pamangkot, subong sang: Ano ang imo balatyagon tuhoy sini? Paano mo ini maaplikar sa imo kabuhi? Paagi sa iya mga komento mahantop mo kon diin kinahanglanon ang dugang pa nga bulig agod malab-ot ang iya tagipusuon. (Luc. 8:15; tan-awa ang School Guidebook, pahina 52, parapo 11.) Ang mga kapsion para sa mga larawan sa pahina 172 kag 174 sang Ihibalo nga libro nagapamangkot: “Nadedikar mo na bala ang imo kaugalingon sa Dios paagi sa pangamuyo?” kag “Ano ang nagapugong sa imo sa pagpabawtismo?” Mahimo ini epektibo nga magapahulag sa estudyante sa pagpanghikot.

²² Ang paagi nga dapat sundon kon ang isa ka dibawtismado nga manugbantala nagahandum nga mabawtismuhan ginabalay sa Enero 15, 1996, Lalantawan, pahina 17, parapo 9. Ang Ihibalo nga libro ginsulat sa tuyo nga masangkapan ang isa sang sabat sa “Mga Pamangkot Para sa mga Maluyag Magpabawtismo,” nga masapwan sa apendise sang Aton Ministeryo nga libro, nga repasuhon sang mga gulang upod sa iya. Kon ginpadaku mo ang mga sabat sa gin-imprinta nga mga pamangkot sa Ihibalo nga libro, ang estudyante masangkapan sing maayo para sa mga sesyon sang pamangkot nga pagadumalahan sang mga gulang bilang paghanda para sa iya bawtismo.

²³ Buligi Yadtong Nakatapos sa Pagtuon sang Biblia sa Puluy-an: Ginapaabot nga sa tion nga matapos na sang isa ang pagtuon sa Ihibalo nga libro, ang iya sinsero kag hanuot nga interes sa pag-alagad sa Dios makita. (Mat. 13:23) Amo ina kon ngaa ang katapusan nga subtitulo sang libro nagapamangkot, “Ano ang Himuon Mo?” Ang katapusan nga mga parapo nagapangabay sa estudyante nga talupangdon ang kaangtanan nga dapat na niya napalambo upod sa Dios, ang kinahanglanon nga iaplikar ang ihibalo nga natun-an niya, kag ang kinahanglanon nga maghulag sing maabtik agod mapakita ang iya gugma kay Jehova. Wala na sing dugang nga publikasyon nga pagatun-an upod sa nakatapos sang Ihibalo nga libro. Ipaathag sing malulo kag sing maathag sa isa ka estudyante nga napaslawan sa paghulag sa ihibalo sang Dios kon ano ang dapat niya himuon sa pag-uswag sa espirituwal. Mahimo nimo sia mapakig-angutan sa pulupanag-on, nagabilin sang dalan nga bukas para sa iya sa paghimo sing mga tikang nga nagadul-ong sa kabuhi nga walay katapusan.—Manugw. 12:13.

²⁴ Ang bag-ong disipulo nga nagabaton sang kamatuoran kag nagapabawtismo may madamo pa nga pag-uswag nga himuon sa iya ihibalo kag paghantop agod mangin bug-os nga malig-on sa pagtuo. (Col. 2:6, 7) Sa baylo nga padayunon ang iya pagtuon sang Biblia sa puluy-an pagkatapos ninyo matapos ang Ihibalo nga libro, mahimo ka mangin handa nga buligan sia sing personal agod maghamtong sia sa espirituwal. (Gal. 6:10; Heb. 6:1) Sa bahin niya, sarang niya mabug-os ang iya paghangop paagi sa pagbasa sa Biblia adlaw-adlaw, personal nga pagtuon sa Ang Lalantawan kag iban pa nga mga publikasyon sang matutom nga ulipon, paghanda kag pagtambong sa mga miting, kag paghinun-anon sang kamatuoran upod sa mga masigkatumuluo. (Mat. 24:45-47; Sal. 1:2; Binu. 2:41, 42; Col. 1:9, 10) Ang pagbasa niya sa Aton Ministeryo nga libro kag pag-aplikar sa kaundan sini may daku nga papel agod mangin organisado sia sing teokratiko sa pagtuman sang iya ministeryo sing bug-os.—2 Tim. 2:2; 4:5.

²⁵ Palambua ang Arte sa Pagpanudlo: Ginsugo kita nga “maghimo sing mga disipulo sang mga tawo . . . , nagatudlo sa ila.” (Mat. 28:19, 20) Sanglit ang arte sa pagpanudlo naangot gid sa paghimo sing disipulo, luyag naton manikasog agod mag-uswag subong mga manunudlo. (1 Tim. 4:16; 2 Tim. 4:2) Para sa dugang nga mga panugda kon paano mapalambo ang arte sa pagpanudlo, ayhan luyag mo basahon: “Developing the Art of Teaching” kag “Reaching the Heart of Your Listeners” sa School Guideboook, study 10 kag 15; “Teacher, Teaching” sa Insight, Tomo 2; kag mga artikulo sa Lalantawan “Pagtukod Paagi sa Indi Masunog nga mga Materyalis” kag “Kon Ikaw Nagatudlo, Lab-ota ang Tagipusuon,” Pebrero 1, 1985; “Epektibo Ka Bala nga Nagapangatarungan Gikan sa Kasulatan?” Marso 1, 1986; kag “Kon Paano Ka Makasapo sing Kalipay sa Paghimo sing Disipulo,” Pebrero 15, 1996.

²⁶ Samtang nagapanikasog ka sa paghimo sing mga disipulo, nga ginagamit ang Ihibalo nga libro, mangamuyo pirme kay Jehova, ang isa “nga nagapatubo,” nga pakamaayuhon niya ang imo mga panikasog sa paglab-ot sa tawhanon nga mga tagipusuon paagi sa maayong balita sang Ginharian. (1 Cor. 3:5-7) Kabay nga maeksperiensiahan mo ang kalipay sang pagtudlo sa iban sa paghangop, sa pag-apresyar, kag sa pagpanghikot sa ihibalo nga nagadul-ong sa kabuhi nga walay katapusan!