Nabuksan Bala Karon sa Inyo ang Ganhaan sang Pagpayunir?
TULUMURON: 20,000 KA REGULAR PAYUNIR!
1 Ang aton 1999 tuigan nga teksto nagapahanumdom sa aton nga yara gihapon kita sa sulod sang “adlaw sang kaluwasan” ni Jehova. (2 Cor. 6:2) Apang ining adlaw sang kaluwasan matapos na sa dili madugay. Pagkatapos sini ang iya “adlaw sang paghukom” magasugod. (2 Ped. 2:9) Samtang padayon nga ginapalawig ni Jehova ang higayon para makalampuwas ang katawhan, makakulunyag gid nga makita ang reaksion sang madamo!
2 Ang katawhan ni Jehova nanikasog sing lakas nga atubangon ang hangkat nga tudluan ang mga nagapamati antes mangin ulihi na ang tanan. Para sa madamong manugbantala sing Ginharian, nagkahulugan ini sang pagsulod sa hilikuton nga pagpayunir. Nabuksan bala karon sa inyo ang ganhaan sang pagpayunir? Ngaa nagapamangkot kami?
3 Ginpabutyag nga Apresasyon: Subong sang ginpahibalo sa Enero 1999 nga Ang Aton Ministeryo sa Ginharian, ang lalab-uton nga oras para sa mga regular kag auxiliary payunir ginpanubuan. Agod makuha ang bag-o nga lalab-uton, ang mga regular payunir dapat maghinguyang sing 70 ka oras sa ministeryo kada bulan para sa kabug-usan nga 840 ka oras kada tuig sang pag-alagad. Ang mga auxiliary payunir magahinguyang sing 50 ka oras sa pag-alagad kada bulan. Yari ang pila sang madamong ginpabutyag nga apresasyon nga nabaton bangod sini nga pagbag-o:
“Isa gid ka makalilipay nga regalo halin sa aton langitnon nga Amay!”
“Wala sing tinaga nga makapaalinton sang kalipay, gugma, kag pasalamat nga nabatyagan tungod sini nga aman!”
“Mahapos na namon masunod ang amon mga iskedyul!”
“Ginapangamuyo namon nga madamo pa ang magasulod karon sa bug-os tion nga ministeryo kag magaagom sang mga kabulahanan bangod sang pag-alagad kay Jehova sing bugana.”
4 Samtang nagapalapit kita sa talipuspusan sang adlaw sang kaluwasan sang Dios, maathag gid nga luyag ni Jehova nga ang iya katawhan magahatag sing katapusan, mabaskog nga singgit sang pagdayaw. Ang kadakuon kag kabaskugon sining mensahe ginadugangan (1) paagi sa dalayon nga pagdamo sang mga manugbantala sing Ginharian kag (2) paagi sa pagtinguha sang isa nga dugangan ang masarangan niya nga himuon sa pagbantala sing Ginharian. Si Jehova, ang isa nga “nagapatubo sini,” naghatag sing kadalag-an sa sini paagi sa pagpakamaayo sa kinabubut-on nga espiritu sang tanan nga nagbaton sing kaluwasan.—1 Cor. 3:6, 7; Sal. 110:3.
5 Indi Pagwasiha ang Katuyuan Sini: May kaangtanan sa adlaw sang kaluwasan ni Jehova nga si Pablo naglaygay sa mga masigka-Cristiano: “Nagapangabudlay kaupod niya [ni Jehova], nagapakiluoy man kami nga dili ninyo pagbatunon ang di-bagay nga kaayo sang Dios kag wasihon ang katuyuan sini.” Indi naton ‘mawasi ang katuyuan sini’ kon ginatan-aw naton ini subong ang ‘tion nga labi na nga nahamut-an’ sa pagpanghikot para sa kaluwasan sang iban sa tanan nga kahigayunan. (2 Cor. 6:1, 2) Sa karon, ang pinamulong ni Pablo labi pa ka hilingagawon. Ginaisip nga pribilehiyo sang mga Cristiano nga nagapadayag sing tinagipusuon nga gugma kay Jehova ang pagpakigbahin sing bug-os kon mahimo sa ministeryo nga gintangdo niya sa ila. Makapakigbahin ka bala karon sing labi pa sa ministeryo subong regular payunir?
6 Isa Ini ka Makatarunganon nga Tulumuron: Sa Pilipinas, tulumuron naton nga makita ang 20,000 ka regular payunir nga magpalista sa Septiembre 1. Nagapati kami nga isa ini ka makatarunganon kag mahimo malab-ot nga tulumuron. Ngaa nakapat-od gid kami? Sang Abril 1997 nakita namon ang 22,410 ka kauturan nga lalaki kag babayi nga nag-auxiliary payunir, kag sang Abril 1998 ang 19,593 nga nagpayunir man. Ang kalabanan nagreport sing 60 ka oras—10 ka oras lamang ang kulang sa bag-ong lalab-uton para sa mga regular payunir! Bisan pa nga 4,000 lamang sang mga nag-auxiliary payunir ang magapalista subong mga regular payunir antes matapos ini nga tuig sang pag-alagad, masugdan naton ang Septiembre nga may 20,000 ukon kapin pa ka bug-os tion nga payunir!
7 Kinahanglan ang Isa ka Iskedyul: Daw indi bala ninyo masarangan ang 70 ka oras nga pag-alagad sa latagon sa isa ka bulan? Ayhan ang paghunahuna sing 17 ka oras lamang sa isa ka semana makabulig. Nagagamit sang sampol nga mga iskedyul sa masunod nga pahina, tilawi ang paghimo sing iskedyul sang isa ka regular payunir nga bagay sa inyo personal nga mga kahimtangan. Sa paghimo sang inyo iskedyul, makighambal sa eksperiensiado nga mga payunir agod matigayon ang ila opinyon sa kon paano nila ginabalanse ang pagpayunir sa personal kag pamilya nga mga responsabilidad. Pamangkuta ang inyo manugtatap sang sirkito kon paano ginaiskedyul sang mga payunir sa sirkito ang ila hilikuton sa pag-alagad kada semana. Nian magsalig nga pakamaayuhon ni Jehova ang inyo mga plano sa pagpayunir.—Hulu. 16:3.
8 Himua Ini nga Isa ka Proyekto sang Pamilya: Nabinagbinag na bala ninyo nga himuon ang pagpayunir nga isa ka proyekto sang pamilya? Mahimo kamo makalingkod subong isa ka pamilya kag hambalan kon paano—upod ang mahalungon nga pagplano kag maayo nga kooperasyon—ang isa ukon duha ka katapo sang pamilya mahimo makapayunir. Sing halangpunon, nasapwan sang iban nga ang bunayag nga pagtulutimbang sang ila kahimtangan wala nagatugot nga magregular payunir sila karon. Kon amo, himua ang pagpayunir nga isa ka tulumuron sa ulihi. Apang maghimo na sing mga plano nga mangabudlay padulong sa isa ka pat-od nga petsa nga makasugod sa pagpayunir. Ayhan makaauxiliary payunir kamo sing pila ka beses sa sulod sang isa ka tuig agod amat-amat nga malab-ot ang tulumuron nga magregular payunir.
9 Ang kapin sa 16,000 ka regular payunir sa listahan karon sang Pilipinas may yara nagakalainlain nga mga kahimtangan. Indi tanan maayo sing panglawas, kag ang kalabanan may yara mga obligasyon sa pamilya kag sa pinansial. Kapin sa 3,600 ka payunir ang lampas sa edad nga 50, kag mga 2,800 sa ila ang lampas sa edad nga 65. Mga 1,000 ang 20 anyos ang edad ukon bataon pa. Halos ikap-at nga bahin sang tanan nga payunir mga utod nga lalaki, madamo sa ila ang may mga responsabilidad sa pamilya kag sa kongregasyon. Sila tanan ‘nagbakal sang nagakaigo nga tion’ para makapayunir, nga sa madamo nga hitabo nagkahulugan sing mas simple apang mas kontento nga kabuhi.—Col. 4:5.
10 Kinahanglan Bala Ninyo nga Magpasimple? Ang pagpasimple sang inyo kabuhi mahimo nga amo ang yabi nga nagabukas sang ganhaan agod makapayunir kamo. Ang inyo bala kabuhi subong sang isa ka daku nga balay nga may di-kinahanglanon nga mga hulot kag mga kasangkapan, nga nagakinahanglan sing madamo nga tion, kuwarta, kag trabaho agod maatipan? Kon amo, ang pagpakigbagay sa mas kubos nga mga kahimtangan mahimo magpahanugot nga makapayunir. Mabuhinan bala ninyo ang tion nga inyo ginahinguyang sa sekular nga palamugnan? Makabakal bala kamo sing tion gikan sa di-kinahanglanon nga hilikuton ukon makapakita sing daku pa nga pagkatimbang sa kadamuon sang tion nga ginahinguyang sa paglingawlingaw?
11 Ang Biblia, sa 1 Timoteo 6:8, nagalaygay sa aton: “Kon may pagkaon kag panapton, mangin kontento na kita sa sining mga butang.” Ang pagkakontento sa diutay isa ka importante nga butang sa paghimo sang aton bug-os nga masarangan sa pag-alagad kay Jehova kag nagapahapos ini sang pag-una sa espirituwal nga mga intereses. (Mat. 6:22, 33) Sa pahina 104 sang 1998 Yearbook sa report tuhoy sa Japan, ginhatag ang pila ka panugda kon ngaa may maayong espiritu sang pagpayunir sa sina nga pungsod. Binagbinaga ang isa: “Matuod gid nga ang mga puluy-an sa Japan indi tanto kadaku, busa nagakinahanglan sing diutay lamang nga tion sa pag-atipan, kag sa masami, ang pangabuhi simple gid katama.” Indi bala nga amo sina ang kahulugan sang 1 Timoteo 6:8?
12 Sa bug-os nga kalibutan, ang mga alagad sang Dios nagabantala sing maayong balita sing makugi antes matapos ang adlaw sang kaluwasan ni Jehova. Sing dalayawon, sang nagligad nga tuig may promedyo nga halos 700,000 ang nakigbahin sa pila ka porma sang pagpayunir kada bulan. Mapasibu bala ninyo ang inyo kabuhi agod makabuylog kamo sa ila? Ginaagda namon kamo nga usisaon sing maayo kag sing mapangamuyuon ang inyo mga kahimtangan samtang ginasabat ninyo ang pamangkot: “Nabuksan bala karon sa inyo ang ganhaan sang pagpayunir?”
[Blurb sa pahina 4]
Sampol nga mga Eskedyul sang Regular Payunir
Kinahanglanon: 17 ka oras sa isa ka semana
Isa ka Ordinaryo nga Adlaw kag Talipuspusan sang Semana
Adlaw Oras
Biernes 8
Sabado 6
Dominggo 3
Kabug-usan nga Oras: 17
Duha ka Ordinaryo nga Adlaw kag Sabado
Adlaw Oras
Martes 7
Huebes 7
Sabado 3
Kabug-usan nga Oras: 17
Tatlo ka Ordinaryo nga Adlaw kag Domingo
Adlaw Oras
Lunes 5
Mierkoles 5
Biernes 5
Domingo 2
Kabug-usan nga Oras: 17
Duha ka Gab-i kag Talipuspusan sang Semana
Adlaw Oras
Lunes 3
Mierkoles 3
Sabado 8
Domingo 3
Kabug-usan nga Oras: 17
Maghimo sang Kaugalingon nga Iskedyul sang Regular Payunir
Adlaw Oras
Lunes
Martes
Mierkoles
Huwebes
Biernes
Sabado
Domingo
Kabug-usan nga Oras: 17