Mga Tip Para Mangin Epektibo ang Miting sa Pag-alagad sa Latagon

Pareho sa tanan nga miting sang kongregasyon, gin-aman man ni Jehova ang miting sa pag-alagad sa latagon para mapahulag naton ang isa kag isa sa gugma kag sa maayong mga buhat. (Heb 10:24, 25) Dapat lima asta pito ka minuto lang ang kalawigon sini, kag nalakip na sa sini ang pagpares-pares sa grupo, pag-asayn sang teritoryo, kag pagpangamuyo. (Kon himuon ini sa tapos sang miting, dapat malip-ot pa gid ini.) Ang nagadumala dapat maghanda sing pila ka punto nga makabulig sa mga utod nga magabantala sa sina nga adlaw. Halimbawa, kon madamo nga utod ang ara sa sina nga miting sa pag-alagad ang wala nakabantala sang nagligad nga Sabado, mas maayo nga binagbinagon lang kon ano ang ihambal sa tagbalay. Ano pa ang puede binagbinagon?

• Sampol nga pag-istoryahanay nga makita sa Ang Aton Cristianong Pagkabuhi kag Pagministeryo—Workbook Para sa Miting

• Kon paano gamiton ang mga balita subong para makasugod sa pag-istoryahanay

• Kon paano sabton ang pagpamatok nga kinaandan sa inyo teritoryo

• Kon ano ang ihambal kon makaistorya sang atiesta, ebolusyonista, nagahambal sing lain nga lenguahe, ukon miembro sang isa ka relihion nga indi kinaandan sa inyo teritoryo

• Kon paano gamiton ang jw.org nga website, ang JW Library^® nga app, ukon ang Biblia

• Kon paano gamiton ang isa sa aton mga galamiton sa Teaching Toolbox

• Kon paano himuon ang iban pa nga paagi sang pagministeryo, pareho sang pagpanaksi paagi sa telepono ukon sulat, pagpanaksi sa publiko, pagduaw liwat, ukon pag-Bible study

• Mga pahanumdom kon paano maghalong, mangin mapasibusibuon, mapakita ang maayo nga pamatasan, mangin positibo, kag iban pa

• Isa ka leksion ukon video sa Mag-ukod Ka sa Pagbasa kag Pagpanudlo nga brosyur

• Kon paano palig-unon kag buligan ang imo partner sa pagbantala

• Isa ka teksto nga may labot sa pagministeryo ukon makapalig-on nga eksperiensia parte sa pagbantala