Bug-os Kalibutan nga Kalig-onan sa Idalom sang “Prinsipe sang Paghidait”: Kapitulo 16
Ang “Dakung Kadam-an” Nagasulod Karon sa “Daku nga Dalan” Padulong sa Organisasyon sang Dios
SA TION sang Milenyo nga Paghari sang “Prinsipe sang Paghidait,” madamo nga bahin sang Isaias kapitulo 35, nga karon nagakatuman sa wala pa ang kalaglagan sang Babilonia nga Daku, ang makita sa literal nga kahulugan sa katawhan. Kay ang natuman sa espirituwal nga paagi pat-od nga matuman man sa pisikal nga paagi. Ang daku nga espirituwal nga katumanan sining tagna nagakatabo karon gid, paagi sa pagbalik sang mga alagad sang Dios gikan sa pagkaulipon sa Babilonia nga Daku. Ginlaragway ini ni manalagna Isaias sa sining matahom nga mga pulong:
2 “Ang kamingawan kag ang duta nga kigas magakasadya, kag ang desyerto magakalipay kag magapamulak subong sang rosa. Magapamulak ini sing bugana, kag magakalipay gid nga may kasadya kag inamba. Ang himaya sang Libano ihatag sa iya, ang pagkahalangdon sang Carmelo kag Saron. Makita nila ang himaya ni Jehova.”—Isaias 35:1, 2.
3 Sa diin ang kamingawan kag ang duta nga kigas kag ang desyerto? Sang ikan-um nga siglo B.C.E., makita ini sa teritoryo sang ginharian sang Juda. Sang 537 B.C.E., yadto nga duta ginhapay kag nagpabilin nga wala sing mga pumuluyo sa sulod sang 70 ka tuig. Apang paano magkasadya ang kamingawan? Kinahanglan nga ang mga pumuluyo sini anay ibalik sa sini. Dapat ini bayawon gikan sa manubo nga kahimtangan sini kag hatagan sing kadungganan sang mataas nga mga bukid sang halangdon nga Libano.
Pagpatubas sing Malaragwayon nga Hardin sang Eden
4 Ang modernong-adlaw nga katumbas, sa espirituwal nga kahulugan, sining pagpasag-uli sang isa ka duta gikan sa biniyaan sang Dios nga dagway padulong sa isa ka kahimtangan nga nagapakita sing pamatuod sang napasag-uli nga kahamuot ni Jehova nagsugod sang 1919. Determinado ang napasag-uli nga katawhan ni Jehova nga himuslan sing bug-os ang panahon sang paghidait nga nagbukas sadto. Ang Daku pa nga Ciro, si Jesucristo, kag ang iya Amay, si Jehova nga Dios, nagtangdo sa nahilway nga nagkalabilin sang espirituwal nga mga Israelinhon sa paghimo sing dungganon nga hilikuton nga katumbas sa pagtukod liwat sang templo ni Jehova sang nagbalik nga nagkalabilin sang dumaan nga Israel pagligad sang 537 B.C.E. Ang mga hilikuton sa pagtukod liwat pagkatapos sang 1919 nagresulta sa pagpatubas sing malaragwayon nga hardin sang Eden.
5 Gintagna ini sa sining mga pulong sang Isaias 35: “Sa sadto nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa sadto nga tion ang piang magalumpat subong sang usa, kag ang dila sang apa magaamba. Kay ang mga tubig magaguwa sa kamingawan, kag ang mga ilig sa desyerto. Kag ang nagaigpat nga balas mangin linaw, kag ang kigas nga duta mga tuburan sang tubig. Sa puluy-an sang mga chacal diin sila nagaluko, mangin hilamon nga may mga tabun-ak kag mga bagaas.”—Isaias 35:5-7.
6 Ang pagluntad sang antitipiko nga modernong-adlaw nga Edom wala magpugong sa pagpasag-uli sang espirituwal nga Israel sa isa ka paraiso nga kahimtangan sa katumanan sang Isaias kapitulo 35. Gani ang modernong mga Edominhon wala sing rason sa pagkasadya subong sang napasag-uli nga nagkalabilin sang espirituwal nga Israel, upod sa nagadamo nga “dakung kadam-an.” Ang “dakung kadam-an” may daku nga bahin sa paghupot sa espirituwal nga paraiso sang modernong-adlaw nga mga Saksi ni Jehova.
7 Sa wala pa matapos ang Panag-on sang mga Gentil ang mga mata sang paghangop sang espirituwal nga mga Israelinhon wala mabuksan sa paghangop nga ang kagamo sa kalibutan nga matabo sang 1914 matapos nga may nagkalabilin sa ila nga yari pa sa duta. Wala man nila mahangpan nga sila kag ang “dakung kadam-an” sang “iban nga mga karnero” hatagan sing pribilehiyo sa paghatag sing bug-os kalibutan nga panaksi nga ang Mesianikong Ginharian sang Dios natukod na. Gani natabo nga sang 1919 ang bulag sa espirituwal nga mga mata sang nagkalabilin ginpamuklat, kag daw ano nga palanan-awon sa malapit nga palaabuton ang nakita sadtong ginpamuklat nga mga mata!
8 Sa ila mga kombension sa Cedar Point, Ohio, sang 1919 kag 1922, nakabaton sila sing ideya sa hilikuton nga yara sa unhan. Ginbaton nila ang hilikuton nga yara sa atubangan nila. Ang ila espirituwal nga mga dulunggan nabuksan sa pagpamati sa makatalandog nga mensahe sang Ginharian sang Dios kag sang kinahanglanon nga ibantala ini. Kaangay sang usa, naglumpat sila sa pag-alagad subong mga saksi para sa madugay na ginapangamuyo nga Ginharian. Ang ila mga dila, nga antes sini nangin apa, nag-amba sa kalipay nahanungod sa Mesianikong Ginharian nga nagagahom sa mga langit.—Bugna 14:1-6.
9 Huo, daw subong bala nga ang tubig nag-ilig sa espirituwal nga duog nga sang una kigas kag nahapay, amo kon ngaa karon ang tanan berde kag madabong—handa sa pagpamunga sing bugana. Indi katingalahan nga ang napasag-uli nga katawhan ni Jehova nagkasadya sing daku kag napalig-on kaangay sang usa nga nagalumpat sa mataas nga mga duog! Sa pagkamatuod, ang mga tubig sang kamatuoran nahanungod sa Ginharian sang Dios, nga gintukod sa mga kamot ni Jesucristo sang 1914, nagguwa nga may daku nga kusog, kag nagresulta sa daku nga pagpaumpaw.—Isaias 44:1-4.
Ang “Daku nga Dalan” sang Pagkabalaan
10 Ano ang ginapahangop sini? Amo ini: Una amo ang nagkalabilin kag sang ulihi ang “dakung kadam-an” sang “iban nga mga karnero” nagguwa gikan sa Babilonia nga Daku kag nangin mga saksi sang Ginharian sang Dios. Apang sa diin sila nag-agi pabalik sa kahamuot sang Dios kag pasulod sa sining espirituwal nga paraiso? Daw subong bala nga ang isa ka malapad kag masangkad nga dalan nabuksan sa ila agod ang mga panong sang nauna nga mga Israelinhon magmartsa sing tingob padulong sa duta nga hinatag sang Dios. Ang makalilipay nga tagna ni Isaias nagapakita sini:
11 “Kay mangin may daku nga dalan didto, kag tawgon ini nga Alagyan sang Pagkabalaan. Ang dimatinlo indi makaagi sa sini. Kag ini mangin sa manlalakat nga mga tawo, kag ang mga buangbuang indi makadalang sa sini. Mangin walay leon didto, ukon bisan anong sapat nga manunukob nga magataklad sa sini.”—Isaias 35:8, 9.
12 Ang katapusan sang Inaway Kalibutanon I wala sing awtomatiko magbukas sang modernong-adlaw nga “daku nga dalan.” Walo ka katapo sang hubon sa talatapan sang Watch Tower Society ang bilanggo sa gihapon kag ang hilikuton sa pagpanaksi naghinay. Sang Enero 4, 1919, sa tuigan nga miting sang Watch Tower Society sa Pittsburgh, Pennsylvania, si J. F. Rutherford, presidente sadto sang Sosiedad, ginpabalik sa iya palangakuan, walay sapayan nga nabilanggo sia, bangod sang kapat-uran nga sia wala sing sala nga alagad sang Labing Mataas nga Dios.
13 Sang Marso 25, 1919, sia kag ang iya pito ka kaupod nga mga bilanggo ginpaguwa kag sang ulihi bug-os nga napamatud-an nga wala sing sala. Ang The Watch Tower sang Septiembre 15, 1919, pahina 283, nag-unod sing makapalig-on nga balita nga ang mga opisina sang Sosiedad, halinon sa Oktubre 1, 1919, halin sa Pittsburgh pabalik sa Brooklyn Bethel sa 124 Columbia Heights. Nian, sa Disiembre 15, 1919, nga guwa sang The Watch Tower, ining makaduha sa bulan nga publikasyon ginpahibalo nga ibalhag liwat sa Brooklyn, Nueva York.
14 Gani natabo nga sang 1919 ang malaragwayon nga daku nga dalan nabuksan sa malipayon nga mga alagad sang Dios. Ang mga luyag mangin balaan sa panulok ni Jehova amo ang mga nag-agi sa sadtong “daku nga dalan,” “ang Alagyan sang Pagkabalaan.” Ang bisan sin-o nga wala sing husto nga tulumuron, isa ka matinlo nga motibo, wala mag-agi sa sadtong malaragwayon nga “Alagyan sang Pagkabalaan” kag wala mapasag-uli sa balaan nga pabor.
15 Sang Hunyo 1, 1935, sa kombension sa Washington, D.C., 840 sang “dakung kadam-an” ang ginbawtismuhan sa tubig, nga nagahatag sing kitaon nga pamatuod nga sila nagsugod sa pagsulod sa “daku nga dalan.” Karon, nagadugang nga minilyon sa ila ang nagsulod sa sinang daku nga dalan, nga nagabuylog sa nagadiutay nga hinaplas nga nagkalabilin. Sa mahidaiton kag makalilipay nga pag-updanay, sila karon nagalakat sing tingob sa “daku nga dalan,” determinado nga, sa bulig sang Labing Gamhanan nga Dios sa langit, wala sing makabungkag sang ila paghiusa.
16 Sa malaragwayon nga paghambal, wala sing leon ukon bisan anong sapat nga manunukob ang makita sa sining daku nga dalan. Kon sayoron, wala sing makapugong ukon makapahadlok sa hinaplas nga nagkalabilin kag sa “dakung kadam-an.” Masinaligon sila nga nagaagi sa alagyan nga karon ginbuksan sa ila sang ila Manughilway, ang Daku pa nga Ciro, padulong sa Sion nga ila kaladtuan.
17 Sa karon, nga malapit na gid kita sa “katapusan sang sistema sang mga butang,” inang “daku nga dalan” nga gin-aman sang Dios nagapabilin nga bukas. Ang mainapresyahon nga mga tawo nagapanong sa paghikot sa impormasyon nga ang Babilonia nga Daku napukan na sa wala pa ang pagsalakay sang Daku nga Ciro, si Jesucristo. Kag nagapalagyo sila gikan sa sini kag nagasulod sa alagyan sang espirituwal nga paraiso, “ang Alagyan sang Pagkabalaan.”—Jeremias 50:8.
18 May yara sila indi malaragway nga kalipay kag kasadya, subong ginapabutyag sang nagahingapos nga bersikulo sang Isaias kapitulo 35: “Ang mga tinubos ni Jehova magabalik kag magaabot nga may inamba sa Sion; kag ang dayon nga kalipay mangin sa ila mga ulo. Magaagom sila sing kasadya kag kalipay, kag ang kasubo kag ang panghayhay magapalagyo.” Ang ila kasubo kag panghayhay bangod sang una wala sila nahisanto kay Jehova nga Dios nagpalagyo kutob sang 1919. Kag ang kasubo kag panghayhay wala magbalik sa matutom kag malipayon nga mga saksi ni Jehova. Dapat pasalamatan ang maminatud-on nga Dios, si Jehova, nga sing dalayawon nagtuman sa makalilipay nga tagna sang Isaias kapitulo 35!
[Mga Pamangkot sa Pagtinuon]
1, 2. San-o natabo ang espirituwal nga katumanan sang Isaias kapitulo 35, kag anong paglaragway ang ginahatag sang una nga duha ka bersikulo?
3. Sang ikan-um nga siglo B.C.E., sa diin ang mamingaw nga duta, kag paano ini nagkasadya?
4, 5. (a) San-o, sa modernong mga tion, natabo ang kaanggid nga pagpasag-uli sa biniyaan nga duta, kag ngaa? (b) Sa ano nagresulta ang mga hilikuton sa pagtukod liwat sang hinaplas nga nagkalabilin? (c) Paano ginlaragway sang Isaias 35:5-7 ang ila bag-o nga espirituwal nga kahimtangan?
6. Ano ang wala mapunggan sang padayon nga pagluntad sang antitipiko kag modernong adlaw nga Edom, kag sin-o sa karon ang nagaamba sing masinadyahon upod sa napasag-uli nga nagkalabilin?
7. Ano ang wala gid mapanan-aw sang mga mata sang paghangop sang nagkalabilin sa wala pa ang 1914, apang ginpamuklat bala ang ila “bulag” nga mga mata?
8. Ano ang epekto sang duha ka kombension sa Cedar Point, Ohio, sa espirituwal nga mga dulunggan kag mga dila sang napasag-uli nga nagkalabilin?
9. Sa espirituwal, paano ang tubig nagguwa sa kamingawan?
10, 11. (a) Ano ang ginapahangop sining makapaumpaw nga pagbalhin? (b) Sa ano nag-agi ang nagkalabilin padulong sa ila espirituwal nga paraiso, kag paano ini ginalaragway sang Isaias 35:8, 9?
12. Awtomatiko bala nga ginbuksan sang katapusan sang Inaway Kalibutanon I ang “daku nga dalan” para sa nagkalabilin, kag ano ang natabo sang ikap-at nga adlaw sang tuig 1919?
13, 14. Anong mga hitabo sang 1919 ang nagpakita nga ang malaragwayon nga daku nga dalan nagbukas sa nagkalabilin, kag sin-o ang nag-agi sa sadtong “daku nga dalan”?
15. Ano ang nagahatag sing kitaon nga pamatuod nga ang “dakung kadam-an” nagsulod sa malaragwayon nga daku nga dalan?
16. Sa malaragwayon nga paghambal, paano nga wala sing leon ukon iban pa manunukob nga sapat sa sining daku nga dalan?
17. (a) Bisan pa malapit na gid kita sa “katapusan sang sistema sang mga butang,” bukas pa bala gihapon ang “daku nga dalan”? (b) Sin-o ang nagasulod sa “Alagyan sang Pagkabalaan,” kag paano nila ginhimo ini?
18. Paano ginalaragway sang katapusan nga bersikulo sang Isaias 35 ang kahimtangan karon sang matutom nga mga saksi ni Jehova, kag sin-o ang pasalamatan sa katumanan sining tagna?