Ano ang Isiling Ninyo sa Isa ka Judiyo?
1 Sang unang siglo, madamo sa “mga anak ni Israel” ang naghulag sing mainapresyahon sa pagbantala ni Jesus kag sang iya mga apostoles. (Binu. 10:36) Subong sang nagligad, madamo man nga hanuot nga Judiyo karon ang bug-os tagipusuon nga nagabaton sang kamatuoran—indi lamang sa Israel kundi sa Rusya man, sa Estados Unidos, kag sa iban pa nga mga pungsod. Luyag bala ninyo mangin mas madinalag-on sa pagpanaksi sa mga Judiyo? Ang masunod nga mga panugda magabulig sa inyo sa pagpanaksi sing mataktikanhon sa relihioso kag indi relihioso nga mga Judiyo.
2 Pagpanaksi sa Relihioso nga mga Judiyo: Dapat mahangpan nga ang relihioso nga mga Judiyo masami nga mas nabalaka sa pagtuman sa mga tradisyon sang mga rabbi sangsa pagpaathag sa espesipiko nga mga doktrina. Sa pagkamatuod, kinaandan na nga ginatamod nila ang tradisyon subong may awtoridad nga kaangay sa Kasulatan. Gani, indi gid sila interesado sa paghinun-anon sa madalom nga mga topiko sa Biblia. Ginakabig man nila ang Biblia subong isa ka Cristiano nga libro. Bangod sina, masami nga labing maayo nga gamiton ang termino nga “Hebreo nga Kasulatan,” “Torah,” ukon “Kasulatan” kon nagapatuhoy sa Biblia. Ang isa ka maayo gid nga publikasyon nga ginhanda ilabi na para sa Judiyo nga pumuluyo amo ang brosyur nga Will There Ever Be a World Without War?
3 Anong mga topiko ang mahimo magawili sa relihioso nga mga Judiyo? Ti, nagapati sila nga may yara isa ka Dios, nga interesado gid sa tawo. Nagapati man sila nga ang Dios nagapasilabot sa mga hilikuton sang tawo. Mahimo ninyo gamiton ining mga punto sa pagtukod sing ginaugyunan nga sadsaran. Dugang pa, ang kalabanan nga mga Judiyo nakahibalo gid sang pag-antos sang ila katawhan sang Bug-os Kalibutan nga Inaway II. Nagapalibog sila kon ngaa gintugutan sang Dios ang subong sadto nga inhustisya kag kon san-o madula ang kalautan. Nasangkapan kita sing maayo sa pagsabat sa sining mga pamangkot, nagapatuhoy, halimbawa, sa naagom sang aton mga kauturan sa tion sang Holocaust.
4 Siempre pa, agod indi malas-ayan ang tagbalay, indi maayo nga sambiton naton dayon ang tuhoy sa pagkilala sa Mesias. Sa baylo, ayhan ipaathag ninyo ang papel nga gintungdan ni Moises sa maragtas sang Israel kag pamangkuton ang tagbalay kon nagapati sia nga ang mga panudlo ni Moises importante gihapon karon. Kon nagakaigo nga ipaathag ang tuhoy sa pagkilala sa Mesias, mahimo anay ninyo basahon ang Deuteronomio 18:15, nga nagasiling: “Isa ka manalagna gikan sa tunga mo, gikan sa imo mga utod, kaangay ko, ang bangunon ni Jehova nga imo Dios para sa imo—sa iya kamo dapat magpamati.” Pamangkuta ang tagbalay kon sin-o ang ginahunahuna ni Moises sang naghambal sia tuhoy sa isa ka manalagna kaangay niya. Nian tuptupi ang pangunang mga punto sa World Without War nga brosyur, pahina 14, parapo 17 kag 18.
5 Tuhay ang Pagtamod sang Indi Relihioso nga mga Judiyo: Indi tanan nga nagapakilala nga Judiyo ang nagabaton sang mga panudlo sang Judaismo. Madamo nga Judiyo ang indi relihioso sa ila pagtamod. Mas interesado sila sa pagpauswag sing tuhay nga pagkilala sa Judiyo, lakip ang kultura sini, tradisyon, kag edukasyon, sangsa mangin aktibo sa Judiyo nga relihion. Ang pila ka indi relihioso nga mga Judiyo indi mapinatihon—ang pila wala gani nagapati nga may Dios. Sa primero, diutay lang ang mahimo paagi sa pagbalikwat sing tul-id gikan sa Hebreo nga Kasulatan. Mas mapuslanon nga sugdan ang paghambalanay subong sang pagpakigsugilanon ninyo sa isa ka tawo nga indi relihioso. Halimbawa, mahimo ninyo mapaathag kon paano ang Biblia praktikal sa aton adlaw. Kon ang tagbalay wala nagapati nga ang Biblia gin-inspirar, ang pila ka punto sa World Without War nga brosyur mahimo makabulig, ilabi na yadtong makita sa seksion sa pahina 3 nga natig-uluhan “The Bible—Inspired by God?”
6 Kon nagapanaksi sa isa ka Judiyo, ayhan makasiling kamo:
◼ “Ang kalabanan sa aton nakaeksperiensia na sing kasubo nga mapatyan sing isa ka hinigugma. Ano sa banta mo ang nagakatabo sa aton kon mapatay kita?” Pasabta sia. Nian ipakita sa tagbalay ang kahon nga natig-uluhan “Death and the Soul—What Are They?” sa pahina 22 sang World Without War nga brosyur. Ginapaanggid sang kahon ang ginasiling sang Kasulatan tuhoy sa pihak nga kinabuhi sa ginatudlo sang mga rabbi. Dayon buksi ang parapo 17 sa pahina 23, kag ipakita nga suno sa Kasulatan, ang mga patay banhawon pa kabuhi sa paraiso nga duta. Itanyag ang brosyur. Sa paghanda para sa pagduaw liwat, mahimo ninyo sambiton nga si patriarka Job nagbinagbinag sing hanuot sang paglaum nga pagkabanhaw. Ipatalupangod ang mga kasulatan nga ginsambit sa katapusan sang parapo 17, kag magpanugda nga magabalik kamo kag magabinagbinag sini.
7 Ang mga tulun-an sang Mateo, Marcos, Lucas, Juan, kag Binuhatan nagarekord sang mga eksperiensia sang mga Judiyo nga nagpamati kag nagbaton sang kamatuoran. Ginabuksan gihapon ni Jehova ang dalan padulong sa kabuhi nga walay katapusan. Madamong sinsero nga Judiyo ang mahimo pa magtuon tuhoy kay Jehova, ang matuod nga Dios, agod mabuhi man sila sing dayon sa bag-ong kalibutan sang Dios.—Miq. 4:1-4.