Pamangkot

◼ Tubtob san-o dapat tun-an ang nagauswag nga estudyante sa Biblia?

Maayo gid nga padayunon ang pagtuon sa nagauswag nga estudyante sa Biblia tubtob makompleto ang duha ka libro nga Ano Gid ang Ginatudlo sang Biblia? kag “Magpabilin Kamo sa Gugma sang Dios.” Amo ini ang himuon bisan pa nabawtismuhan na sia. Puede gihapon naton mareport ang oras, pagduaw liwat, kag ang pagtuon sa iya. Kon may upod kita nga manugbantala sa pagtuon sa iya, puede man sia makareport sang oras.—Tan-awa ang Marso 2009 nga Ang Aton Ministeryo sa Ginharian, pahina 2.

Importante gid nga may maayo nga pundasyon sa kamatuoran ang mga bag-uhan antes naton untatan ang pagtuon sa ila. Dapat “nagapanggamot” sila kay Cristo kag “napabakod sa pagtuo” para masarangan nila ang mga pagtilaw nga ila pagaatubangon. (Col. 2:6, 7; 2 Tim. 3:12; 1 Ped. 5:8, 9) Isa pa, para makatudlo sila sing epektibo sa iban, dapat sila mismo may “sibu nga ihibalo tuhoy sa kamatuoran.” (1 Tim. 2:4) Kon kompletuhon naton ang duha ka libro, mabuligan naton ang aton estudyante nga magpabilin sa “dalan nga nagapadulong sa kabuhi.”—Mat. 7:14.

Antes aprobahan ang isa para sa bawtismo, dapat siguruhon sang mga gulang nga nahangpan niya sing maayo ang panguna nga mga panudlo sang Biblia kag nagakabuhi nahisuno sa sini. Dapat nila ini binagbinagon sing maayo ilabi na kon wala pa matapos sang estudyante ang una nga libro. Kon ang isa indi pa handa para sa bawtismo, siguruhon sang mga gulang nga makabaton sia sing personal nga bulig para mangin kalipikado sa bawtismo sa ulihi.—Tan-awa ang Organisado sa Paghimo sang Kabubut-on ni Jehova, sa pahina 217-218.

[Blurb sa pahina 2]

Importante gid nga may maayo nga pundasyon sa kamatuoran ang mga bag-uhan