THAWJ ZAJ | KOJ PUAS XAV KAWM VAJLUGKUB?

Kev Kawm Vajlugkub Rau Txhua Tus

Tibneeg yeej paub zoo tias Yehauvas Cov Timkhawv yog cov uas tshaj tawm txoj xov zoo. Tiamsis koj puas paub tias thoob qab ntuj peb kuj muaj kev kawm Vajlugkub rau sawvdaws thiab?

Ib tug txivneej kawm Vajlugkub hauv nws qhov chaw ua haujlwm

Xyoo 2014 muaj tshaj 8,000,000 tus Timkhawv nyob rau 240 lub tebchaws tau nrog li 9,500,000 tus tibneeg kawm Vajlugkub txhua lub hlis.a Muaj li 140 lub tebchaws uas twb tsis muaj pejxeem coob npaum li cov neeg uas peb kawm Vajlugkub nrog no!

Yuav kom Yehauvas Cov Timkhawv kawm tau Vajlugkub nrog tibneeg, lawv yuav tsum luam tej ntaub ntawv ua ntau yam lus. Yog li ntawd, ib xyoos twg lawv thiaj luam tau li 1,500 plhom phau Vajlugkub, tej ntaub ntawv Vajlugkub, Phau Tsom Faj, phau Awake!, thiab lwm yam ntaub ntawv uas siv los kawm Vajlugkub ua li 700 yam lus! Tsis muaj lwm lub koom haum twg uas yuav luam tau ntaub ntawv ntau npaum li no los pab tibneeg kawm Vajlugkub ua lawv yam lus.

Katlego, uas nyob tebchaws Afikas Qab Teb hais li no: “Kuv ib txwm tsis nyiam kawm ntawv, tiamsis kawm Vajlugkub mas lomzem heev. Thiab tej uas kuv kawm nplig tau kuv siab heev.”

Bertha, uas nyob Mev Teb hais li no: “Kev kawm Vajlugkub teb tau kuv tej lus nug huvsi thiab tseem teb tau tej uas kuv twb nug tsis txog thiab.”

Eziquiel, uas nyob tebchaws Brazil hais li no: “Lawv tuaj kawm Vajlugkub nrog kuv hauv kuv tsev thiab rau lub sijhawm uas kuv khoom. Puas yuav muaj dabtsi yoojyim tshaj no lawd!”

Viniana, uas nyob tebchaws Australia hais li no: “Muaj tej zaug peb kawm 15 mus rau 30 feeb xwb, hos tej zaug peb kuj kawm ntev zog. Lawv tsuas nrog kuv kawm raws li kuv khoom xwb.”

Aimé, uas nyob tebchaws Benin hais li no: “Kuv kawm Vajlugkub dawb xwb thiab lomzem kawg li!”

Karen, uas nyob tebchaws Ireland sab qaum teb hais li no: “Tus uas tuaj qhia Vajlugkub rau kuv mas siab ntev thiab ua zoo heev. Qhov no pab tau wb muaj kev sib raug zoo.”

Denton, uas nyob tebchaws Askiv hais li no: “Muaj coob leej kawm Vajlugkub, tiamsis lawv tsis los ua Yehauvas Cov Timkhawv.”

LUS TEB RAU TEJ LUS NUG UAS TIBNEEG MUAJ TXOG KEV KAWM VAJLUGKUB

Kawm Vajlugkub yog kawm li cas tiag?

Peb muab phau Vajlugkub faib ua ntau lub ntsiab kawm ces mam li kawm cov nqe Vajlugkub uas tham txog lub ntsiab ntawd. Xws li, phau Vajlugkub teb tau cov lus nug no: Vajtswv yog leejtwg? Nws zoo li cas xwb? Nws puas muaj npe? Nws nyob qhovtwg? Peb puas txav tau ze nws? Qhov uas nyuaj rau tibneeg yog qhov uas lawv tsis paub nrhiav cov lus teb seb nyob rau hauv nqe Vajlugkub twg.

Yuav kom teb tau tibneeg cov lus nug, ntau zaus peb siv Phau Vajlugkub Qhia Txog Dabtsi Tiag?b uas muaj 256 sab. Phau ntawv no yog txhob txwm sau los pab tibneeg kawm txog tej yam uas tseem ceeb hauv phau Vajlugkub. Phau ntawv no muaj tej ntsiab lus uas qhia txog Vajtswv, Yexus Khetos, tibneeg tej kev txom nyem, qhov uas yuav tsa cov tuag sawv rov los, kev thov Vajtswv, thiab ntau yam ntxiv.

Yuav kawm nyob qhov chaw twg thiab lub sijhawm twg?

Kawm nyob rau qhov chaw uas zoo rau koj thiab rau lub sijhawm uas koj khoom.

Ib zaug kawm hov ntev?

Muaj coob tus kawm ntev li 1 txoos teev, thiab ib lim tiam kawm ib zaug. Tiamsis muaj ib txhia tsuas kawm tau li 10 lossis 15 feeb xwb. Yuav kawm ntev npaum li cas los nyob ntawm koj khoom xwb. Peb mam hloov peb lub sijhawm kom haum koj.

Puas tau them nqe?

Kev kawm Vajlugkub yog kawm dawb xwb thiab tej ntaub ntawv uas peb siv los kawm Vajlugkub los peb kuj pub dawb thiab xwb. Peb ua raws nraim li Yexus tau qhia rau nws cov thwjtim: “Nej tau dawb dawb, cia li pub dawb dawb xwb.”—Mathai 10:8.

Yuav kawm hov ntev mam li tiav?

Qhov ntawd nyob ntawm koj. Phau ntawv Phau Vajlugkub Qhia Txog Dabtsi Tiag? muaj 19 tshooj. Koj xav kawm qho tshooj xwb lossis kawm txhua tshooj huvsi los nyob ntawm koj. Thiab txhua zaus koj kawm, koj xav kawm ob peb nqes xwb lossis kawm ib tshooj zuj zus los nyob ntawm koj.

Yog kuv kawm no, puas yog kuv yuav tsum los ua Yehauvas Cov Timkhawv ib tug?

Tsis yog. Peb yeej paub tias txhua tus nyias yuav tau txiav txim seb nyias yuav ntseeg li cas. Tiamsis cov uas kawm Vajlugkub yeej siv tau tej uas lawv kawm lawd los pab lawv txiav txim seb lawv yuav coj txojkev ntseeg twg.

Yog kuv xav paub ntxiv, kuv yuav mus nug leejtwg?

Lub Vej xaij (Web site) jw.org/hmn qhia qhov tseeb txog Yehauvas Cov Timkhawv txojkev ntseeg thiab txog tej haujlwm uas lawv ua.

Yog kuv xav rau npe kawm Vajlugkub, kuv yuav tau ua li cas?

Rau npe kawm Vajlugkub hauv lub Vej xaij no: www.pr418.com/hmn.
Sau ntawv mus rau qhov chaw nyob ze koj uas nyob rau sab 2 hauv phau ntawv no.
Mus nrhiav Yehauvas Cov Timkhawv uas nyob ze koj. Nrhiav lub npe “Jehovah’s Witnesses” hauv phau ntawv xov tooj.

a Thaum kawm Vajlugkub nrog tibneeg, peb qhia tau ib tug lossis ob peb tug ua ke.

b Yehauvas Cov Timkhawv luam tawm. Phau no tau luam tawm tshaj li 230 plhom phau thiab luam ua tshaj li 260 yam lus.

KEV PAB RAU TSEV NEEG

Eziquiel hais li no: “Thaum kuv tus pojniam pib kawm Vajlugkub, kuv pom tias nws hloov lawm hov ntau. Qhov no pab tau peb tsev neeg heev. Rau qhov kuv xav paub seb kuv tus pojniam kawm txog dabtsi, kuv thiaj pib kawm Vajlugkub lawm thiab. Tej kuv kawm pab kuv ua ib tug neeg zoo. Kawm Vajlugkub tau pab peb tsev neeg kom sib raug zoo.”

Karen hais tias: “Tom qab kuv pib kawm Vajlugkub, kuv txiav tsis haus yeeb haus tshuaj, tsis haus dej haus cawv, thiab kuv tswj tau kuv lub siab heev. Kuv lub vaj lub tsev los, kuv kuj tu tau du lug. Kuv nco kuv tsev neeg txiaj ntsig dua thiab kuv kuj nyiam ua tej uas yuav ua rau lawv zoo siab xyiv fab. Zaum no kuv zoo siab lawm ntau.”

Viniana hais li no: “Muaj ib txhia thuam kuv thaum lawv paub tias kuv kawm Vajlugkub. Tiamsis kuv tus txiv txhawb kom kuv rau siab kawm. Nws thiaj hais li no: ‘Txawm luag yuav hais li cas los kuv tsis quav ntsej. Qhov uas tseem ceeb tshaj rau kuv ces yog qhov uas kuv pom koj hloov ua ib tug neeg zoo. Rau siab ntso kawm kam tiag.’ Tsis tau muaj dua ib zaug uas peb tsev neeg zoo siab npaum li no!”