Lub 3 Hlis Tim 1 Pib Caw Tibneeg Tuaj Ua Kevcai Nco Txog Yexus
1. Peb yuav pib caw tibneeg tuaj ua kevcai nco txog Yexus rau hnub twg? Thiab vim li cas xyoo no peb siv sijhawm ntev zog mus caw tibneeg?
1 Peb yuav ua kevcai nco txog Yexus rau lub 3 Hlis, tim 26. Yog li, pib Hnub 5 (Friday) lub 3 Hlis, tim 1, peb yuav caw tibneeg tuaj nrog peb koom. Xyoo no txawv mentsis yav tas los, rau qhov peb teem sijhawm ntev zog mus caw tibneeg. Qhov uas peb teem sijhawm ntev zog, yuav pab kom peb caw tau coob leej ntau tus tuaj nrog peb ua kevcai nco txog Yexus. Thiab cov uas muaj tej koog loj, yuav muaj sijhawm mus caw cov uas nyob deb.
2. Yuav nqa cov ntawv caw li cas, thiab yuav mus caw tibneeg li cas thiaj caw thoob?
2 Yuav Mus Qhia Li Cas? Cov txwj laus mam li qhia seb yuav mus caw tibneeg hauv koj koog li cas, thiab seb puas zoo tseg ib daim ntawv caw rau ntawm qhov rooj yog tias tus tswv tsev tsis nyob lawm. Thaum lub koom txoos qhia thoob lawv koog lawm, yog tias tseem tshuav cov ntawv caw seem ces mam li coj mus tseb rau tibneeg tom tej kev. Tus kwvtij uas saib xyuas kev qhia Vajlugkub mam li npaj ib co ntawv caw uas twb sau chaw nyob rau lawm, tseg rau ntawm qhov chaw uas sawvdaws mus nqa ntawv thiab nqa cov The Watchtower thiab Awake! Tiamsis tsis txhob muab cov ntawv caw ua tib txhij thau tawm. Txhua tus nyias nqa kom txaus nyias siv rau lub lim tiam ntawd xwb, lwm lub lim tiam mam nqa dua.
3. Thaum peb mus tseb daim ntawv caw peb yuav tsum nco ntsoov li cas?
3 Yuav Hais Li Cas? Qhov zoo tshaj peb yuav tsum nrog lawv tham ib pliag xwb, peb thiaj mus caw tau lwm tus thiab. Thaum peb mus caw tibneeg, peb hais tau raws li tus qauv ntawm sab 6. Yog tias peb ntsib tej tug uas nyiam nrog peb tham, lossis muaj lus nug ntau ces, peb tsis txhob maj mus, peb nrog lawv tham los tau. Thaum peb mus qhia rau Hnub 6 (Saturday) thiab Hnub 7 (Sunday), zoo rau peb tseb phau ntawv Qhov Tseeb Txog Yexus Khetos lossis tseb phau The Watchtower thiab Awake! ua ke nrog daim ntawv caw. Thaum txog lub 3 Hlis, tim 2, peb yuav tsis caw kom tibneeg kawm Vajlugkub li txhua hli, tiamsis hnub ntawd peb yuav muab siv los caw tibneeg tuaj ua kevcai nco txog Yexus.
4. Vim li cas peb yuav tsum kub siab mus caw tibneeg tuaj nrog peb koom?
4 Peb vam thiab cia siab tias coob leej ntau tus yuav tuaj nrog peb ua kevcai nco txog Yexus. Zaj lus qhia rau hmo ntawd yuav qhia tias Yexus yog leejtwg tiag. (1Khl. 11:26) Peb yuav kawm tias nws txojkev tuag pab tau peb li cas. (Loos 6:23) Thiab peb yuav kawm tias vim li cas tseem ceeb ua luaj rau peb nco txog Yexus. (Yh. 17:3) Thov kom peb txhua leej txhua tus kub siab lug mus caw tibneeg tuaj nrog peb koom!