YUAV UA CAS THIAJ KOV YEEJ KEV SIB NTXUB

1 | Txhob Xaiv Ntsej Xaiv Muag

Phau Vajlugkub Qhia Tias:

‛Vajtswv tsis xaiv leej twg ntsej muag. Txawm yog haiv neeg twg los xij, Vajtswv lees yuav txhua tus uas hwm Vajtswv thiab ua haum Vajtswv siab.’—TES HAUJLWM 10:34, 35.

Nqe No Txhais Tias:

Yehauvasa tsis suav tias ib haiv neeg tseem ceeb dua ib haiv. Qhov uas tseem ceeb tshaj rau nws yog tus neeg sab hauv. Tib neeg ‛saib lub cev sab nraud xwb, tiam sis Yehauvas saib lub siab.’—1 Xamuyees 16:7.

Peb Xyaum Nqe No Li Cas:

Txawm peb tsis paub tib neeg lub siab los peb yeej xyaum tau Vajtswv es txhob xaiv ntsej xaiv muag. Txhua tus nyias yeej muaj nyias ib lub siab. Peb yuav tsum paub ib tug neeg kom zoo tso. Txhob maj suav tias lawv yog neeg phem. Yog tias koj tsis nyiam ib haiv neeg twg, thov Yehauvas pab koj tshem tawm txoj kev xav phem ntawd. (Phau Ntawv Nkauj 139:23, 24) Yog koj muaj lub siab dawb paug thov Vajtswv lawm, nws yeej yuav mloog koj thiab pab koj. —1 Petus 3:12.

a Vajtswv hu ua Yehauvas.—Phau Ntawv Nkauj 83:18.

“Kuv yeej tsis tau mus zaum hauv ib tug neeg tawv dawb tsev thiab nrog nws koom tsum . . . Nim no kuv muaj ib cuab kwv tij thoob ntiaj teb lawm.”—TITUS

TITUS—Piav Nws Lub Neej

Tso Txoj Kev Ntxub Tseg

Titus npau taws heev thaum nom tswv muab ib haiv neeg cais thiab faib ntawm ib haiv neeg. Yog li nws thiaj mus koom ib pab neeg sawv tawm tsam nom tswv. Nws hais tias, “Peb mus thab plaub thiab sib ntaus tom tej tsev haus cawv thiab chaw so uas tsis tos txais cov neeg tawv dub.” Titus txhob txwm ua li ntawd vim nws paub tias lwm tus ntxub nws. Titus hais ntxiv tias, “Kuv tsis quav ntsej yog poj niam los txiv neej. Thaum kuv nrog lawv sib ceg lawm ces kuv yeej yog tus xub xub ntaus lawv.”

Thaum Yehauvas Cov Tim Khawv mus qhia Vajlugkub rau Titus, nws pib hloov zuj zus. Ib yam uas raug nws siab heev yog thaum nws nyeem tias “kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.”—Tshwmsim 21:3, 4.

Thaum ntej yeej nyuaj kawg rau Titus tshem txoj kev ntxub tawm hauv nws lub siab. Nws hais tias, “Yeej tsis yooj yim hloov kuv tus cwj pwm thiab kuv txoj kev xav.” Qhov uas pab tau nws yog nqe Vajlugkub ntawm Tes Hauj Lwm 10:34, 35 uas qhia tias Vajtswv tsis xaiv leej twg ntsej muag.

Titus hais li no, “Kuv ntseeg tias Yehauvas Cov Tim Khawv txoj kev ntseeg thiaj yog txoj tseeb rau qhov kuv pom tias lawv tsis xaiv ntsej xaiv muag li. Txawm koj yog haiv neeg twg, yog neeg dub neeg dawb los xij. Ua ntej kuv ua kev cai raus dej, Yehauvas ib tug Tim Khawv uas yog neeg tawv dawb caw kuv mus noj ib pluag mov tom nws tsev. Qhov no tsis txaus ntseeg kiag li, rau qhov ib sim neej no kuv yeej tsis tau mus zaum hauv ib tug neeg tawv dawb tsev thiab nrog nws koom tsum. Nim no kuv muaj ib cuab kwv tij thoob ntiaj teb lawm uas muaj lub siab hlub tiag.”