YUAV UA CAS THIAJ KOV YEEJ KEV SIB NTXUB

3 | Tshem Kev Ntxub Tawm Hauv Koj Lub Siab

Phau Vajlugkub Qhia Tias:

“Hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab.”—LOOS 12:2.

Nqe No Txhais Tias:

Vajtswv yeej tshuaj saib tej uas neeg xav. (Yelemis 17:10) Tsis yog peb yuav tsum hais los sis ua phem rau ib tug tso mam qhia tias peb ntxub lawv. Nco ntsoov tias txoj kev ntxub pib hauv nruab siab tuaj. Yog peb muaj ib pluaj siab ntxub luag, peb yuav tau maj nroos muab rho tawm. Thaum peb ua li no peb thiaj yuav ‘hloov tau lub siab’ ntxub luag.

Peb Xyaum Nqe No Li Cas:

Ua tib zoo tshuaj koj tus kheej seb koj puas muaj ib pluaj siab ntxub lwm haiv neeg. Nug koj tus kheej li no: ‘Kuv xav li cas txog lwm haiv neeg xwb? Qhov uas kuv xav txog lwm haiv neeg puas muaj tseeb tiag? Puas yog kuv twb tsis paub lawv es kuv lam xav phem xwb?’ Kuj zoo rau peb zam tej yeeb yaj kiab, tej vej xaij thiab tej kev lom zem uas qhia kom peb ntxub lwm tus los sis ua phem rau lawv.

Vajtswv Txoj Lus yuav pab peb kov yeej lub siab ntxub luag

Feem ntau thaum peb ntsuam xyuas peb tus kheej peb yeej xav tias peb zoo txaus lawm. Tiam sis Vajtswv Txoj Lus yuav pab kom peb pom tias tus neeg sab hauv zoo li cas tiag. (Henplais 4:12) Yog li, nrhiav sij hawm los kawm Vajtswv Txoj Lus. Tshuaj seb koj txoj kev xav puas thooj li Vajtswv txoj. Yog tsis thooj no, rau siab xyaum kom koj coj tau li nws. Vajtswv Txoj Lus yeej muaj peev xwm rhuav tau lub siab qub uas peb ib txwm muaj.—2 Kauleethaus 10:4, 5.

XITIVEES (STEPHEN)—Piav Nws Lub Neej

Hloov Txoj Kev Xav

Cov neeg tawv dawb tau ntxub thiab ua phem rau Xitivees thiab nws tsev neeg. Nws thiaj mus koom ib pab neeg sawv tawm tsam nom tswv kom muaj vaj huam sib luag. Tsis ntev xwb, nws cia li koom lwm cov ua phem rau cov neeg tawv dawb. Xitivees hais tias, “Thaum kuv cov phooj ywg peb mus saib tej yeeb yaj kiab ntsig txog cov neeg dawb muab cov neeg dub yuam ua qhev hauv Mikas teb, ua rau peb chim heev. Peb thiaj muab ib co tub hluas dawb ntaus kiag tam sid hauv lub tsev saib yeeb yaj kiab. Ces peb kuj mus rau tej thaj tsam uas muaj neeg tawv dawb nyob mus nrhiav neeg ntaus ntxiv.”

Thaum Yehauvas Cov Tim Khawv mus qhia Vajlugkub rau Xitivees, nws txoj kev xav hloov lawm ntau. Nws hais tias: “Ib txwm kuv tsuas pom cov dub thiab cov dawb sib ntxub tas li xwb. Tiam sis thaum kuv pom Yehauvas cov tib neeg ib leeg pab ib leeg, ua rau kuv tsis pom qab xav li. Xws li muaj ib zaug, thaum ib khub niam txiv dawb mus txawv teb chaws, nkawv tseg nkawv cov me nyuam rau ob niam txiv dub zov. Tsis tas li ntawd, thaum ib tug me nyuam tawv dub tsis muaj tsev nyob los ib tse neeg dawb tseem coj nws los nrog lawv nyob thiab.” Xitivees yeej ntseeg tias Yehauvas Cov Tim Khawv thiaj yog Yexus cov tseem thwj tim uas muaj kev hlub tiag raws li Yexus tau hais.—Yauhas 13:35.

Dab tsi pab tau Xitivees tso nws lub siab ntxub luag tseg? Nqe Vajlugkub ntawm Loos 12:2. Nws hais li no, “Kuv paub tias kuv yuav tau hloov kuv txoj kev xav thiab tso kev ua nruj ua tsiv tseg. Hauv kuv lub siab kuv yuav tsum ntseeg tias kev haum xeeb nrog lwm tus yog lub neej uas zoo tshaj.” Xitivees twb tso txoj kev ntxub luag tseg tau 40 xyoo lawm.