Tib Neeg Puas Muaj Peev Xwm Ua Kom Txhob Muaj Kev Tsov Kev Rog?

NOM TSWV XAV KOM PEJ XEEM MUAJ NOJ MUAJ HAUS

Hom phiaj: Nom tswv xav kom pej xeem sawv daws muaj txaus noj txaus haus. Ua li no thiaj tsis muaj kev tawm tsam vim cov muaj ho muaj dhau lawm, cov pluag ho pluag dhau lawm.

Nyuaj ua li no: Vim nom tswv yuav tau hloov lawv txoj kev siv nyiaj. Nyob rau xyoo 2022, nom tswv kam tau siv txog li 34.1 txhiab plhom nyiaj duas las (U.S.A.) mus pab tib neeg thoob ntiaj teb. Tiam sis cov nyiaj no tsuas yog ib qho me me xwb, yog muab piv rau cov nyiaj lawv siv mus ua tsov rog.

Lub koom haum ntiaj teb UN tus thawj coj Athauni-aus Nkutheles (António Guterres) hais tias, “Peb siv nyiaj los ua tsov rog ntau tshaj qhov uas peb siv nyiaj los kho kom txhob muaj tsov rog.”

Phau Vajlugkub qhia tias: Txawm yuav muaj tej koom haum thiab tej nom tswv sib zog pab cov neeg txom nyem npaum li cas los, lawv yeej yuav kho tsis tau kom kev txom nyem ploj mus.​—2 Kevcai 15:11; Mathais 26:11.

NOM TSWV SIB COG LUS

Hom phiaj: Sib tham thiab sib cog lus kom tu tau teeb meem.

Nyuaj ua li no: Vim yuav muaj ib co tsis kam hais kom sib haum. Thiab txawm muaj kev sib cog lus lawm los muaj ib txhia tsis ua li lawv hais.

Ib tug kws sau xov xwm hu ua Lamees Xamiv (Raymond F. Smith) hais li no tias, “Txawm ob tog twb sib cog lus kom txhob sib ntaus sib tua lawm los, tej thaum rov qab muaj tsov rog vim ib tog xav tias cov lus cog tseg tsis ncaj.”​—Xov Xwm American Diplomacy.

Phau Vajlugkub qhia tias: Tib neeg yuav tsum ‘nrhiav kev nrog luag sib haum xeeb.’ (Phau Ntawv Nkauj 34:14) Tiam sis niaj hnub nim no, tib neeg pheej tsis ua li lawv hais, tsis zam txim, thiab pheej ntxeev siab. (2 Timautes 3:1-4) Vim li no thiaj nyuaj rau nom tswv los sib kho kom sib haum.

NOM TSWV COG LUS YUAV TSO CUAB YEEJ UA ROG TSEG

Hom phiaj: Nom tswv xav kom sawv daws tso txhua yam cuab yeej ua rog tseg, xws li tej hoob pob nus qhias (nuclear), tej tshuaj lom, thiab tshuaj khes mis (chemical) uas siv tua neeg.

Nyuaj ua li no: Vim ntau lub teb chaws ntshai tsam yog lawv tso lawv tej cuab yeej ua rog tseg ces lawv yuav tiv thaiv tsis tau lawv lub teb chaws lawm. Thiab txawm lawv muab tej cuab yeej ua rog tshem los, lawv tseem tshem tsis tau qhov uas tib neeg xav ua tsov rog.

“Nyob rau xyoo 1991 muaj ntau lub teb chaws cog lus hais tias lawv yuav tso lawv tej cuab yeej ua rog tseg thiab txhawb kom txhua lub teb chaws nyob sib haum xeeb. Txawm lawv cog lus li ntawd los, lawv twb tsis ua li lawv hais.”​—Phau ntawv “Securing Our Common Future: An Agenda for Disarmament.”

Phau Vajlugkub qhia tias: Tib neeg yuav tsum tso tej cuab yeej ua tsov ua rog tseg thiab “muab lawv tej ntaj thiab riam los ntaus ua khais.” (Yaxayas 2:4) Tiam sis yuav kom tsis txhob muaj kev tsov kev rog li lawm, tib neeg yuav tsum hloov lawv lub siab kom txhob xav mus ua phem.​—Mathais 15:19.

NOM TSWV SIB KOOM TES

Hom phiaj: Cov teb chaws uas sib koom tes vam tias qhov uas lawv ua li no yuav pab kom lawv cov yeeb ncuab ntshai tuaj ua rog rau lawv.

Nyuaj ua li no: Vim qhov no yeej txwv tsis tau lub teb chaws uas xav tuaj ua rog rau lawv. Tsis tas li ntawd xwb, tej teb chaws uas sib koom tes tsis ua raws li lawv tau cog lus tias lawv yuav ua. Thaum muaj tsov rog los, lawv hais tsis sib haum tias yuav mus pab li cas thiab thaum twg mam pab.

“Txawm lub koom haum Lis Au Neseem (League of Nations) thiab lub koom haum ntiaj teb UN sib zog los pab kom tej teb chaws sib koom tes los yeej tseem muaj tsov rog qees.”​—“Encyclopedia Britannica.”

Phau Vajlugkub qhia tias: Thaum muaj tib neeg sib pab ces ua tau ntau yam. (Tej Lus Qhia 4:12) Tiam sis tib neeg tej nom tswv thiab tej khoom haum ua tsis tau kom lub ntiaj teb nyob tiaj nyob tus thiab muaj kev thaj yeeb. ‘Tsis txhob tso siab rau tej nom tswv, lawv yog neeg xwb, lawv yeej pab tsis tau nej dim kev ploj kev tuag li. Thaum lawv tuag, lawv yuav rov mus ua av; lawv tej tswv yim yuav kawg rau hnub ntawd.’​—Phau Ntawv Nkauj 146:3, 4.